في شركة تكنولوجيا واتصالات يونس كان قاعد على الكرسي وماسك ساندوتش طعمية سخن وبيفطر ومنظره يضحك وبيومي صاحبه قاعد بيبص عليهم تنح وهو بيقول :
يا عم بالراحة على الاكل هو في حد بيجري وراك… ده إنت داخل على التلاتين مش داخل ابتدائي علشان تاكل بالطريقه دي!
يونس بصله بقرف وهو بينفخ وبيقول : هو انا عارف اكل يا رخم ده انا نفسي تسدد بعد العميل اللي كان هنا اللي هو كان بيقدم شكوى ده الاستاذ فاكر ان الراوتر حصالة بيقولي حطيت فيه الفلوس والنت مشتغلش! أقسم بالله الناس دي عايزة دماغ لوحديها يا جدع.
بيومي:(بيضحك وهو بيرد عليه وبيقول) يا عم فوت إنت اللي خلقك ضيق.. ابلع اللقمه اللي في بقك دي وادخل على السيستم وشوف العطله اللي في السيدة زينب علشان متقدم كذا شكوى للشركه لنفس السبب.
(يونس بيمسح إيده في منديل وبيفتح الشاشة وفجأة بيتنح كأنه شاف عفريت قدامه وبدأ يكح واللقمة وقفت في زوره ووشه احمر)
يونس: (بذهول وصوت مخنوق قال) يا نهار أبيض! يا ميت مصيبة! بيومي.. إلحقني يا بيومي!
بيومي:(بيخبط على ظهره جامد وهو مخضوض وبيقول) جرى إيه يا ابن المجنونة؟ ابلع! اللي في بقك الاول إيه اللي حصل؟ المدير جه؟
يونس وهو متنح وبياخد نفسه بالعافيه قال: مدير إيه وبتاع إيه يا عم دي امي طلعت من التربه! رقم أمي يا بيومي! الخط أنا لفه في شاش وشايله في علبه الذهب بتاعة الغالية في دولابي.. شغال! السيستم بيقول إنه Active وبيسحب داتا كمان! هي امي بتراسلنا من الترب ولا إيه ؟
بيومي ضربه بخاف على ظهره وهو بيقول: خضتني يا غبي اهدى ياض تلاقي الخط اتسحب ونزل السوق تاني.. شوف بس متسجل باسم مين.
يونس: (بيدوس على الزراير بسرعة وهو مقتنع ان امه خرجت من التربه وشغلت الخط قال) لا يا بيومي مش الحجه الحمد لله ده متسجل باسم بنت اسمها ليلى شاكر وعنوانها في السيدة زينب في نفس المنطقه اللي انا عايش فيها دي جارتي؟! بس غريب انا ما اعرفهاش بس انا مش هسكت دي خدت اخر حاجه من ريحه الغاليه والله ما هسيبها وهجيب قرارها النهاردة!
اما عند بطلتنا ليلى اللي عمرها 20 سنه كانت واقفه قدام الحوض في المطبخ وقدامها جبل مواعين والميه نازله ضعيفه جدآ وسعاد مرات ابوها دخلت عليها وهي بتعدل طرحتها وبتقول :
إيه يا ست ليلى؟ هتنامي جنب المواعين؟ إنتي فاكرة نفسك سعاد حسني وخايفة على طراوة إيديكي؟ إخلصي يا بت هو إيه الكسل ده يا اختي ده انا بعلمك على اقل لو جالك عريس يلاقي فيكي حاجه عدله وزي ما المثل بيقول يا واخد القرد على ماله يروح المال ويفضل القرد على حاله وانتي يا اختي ولا مال ولا جمال يلا يا بت يا ام وش عكر!
ليلى: (بصوت واطي ورقيق وهي بتمسح دموعها قالت) والله يا خالتي سعاد بخلص أهو بس المية سرسبها ضعيف والحلل كبيرة جدآ هدد حيلي من كتر الدعك والله ارحميني شوية ضهري اتقطم.
سعاد:(بتحط إيدها في وسطها وبتعلي صوتها أكتر وهي بتقول) يرحمك ملك الموت يا بعيدة! ده إنتي أكل شرب نوم على الجاهز عايزة دلع إيه اكتر من كده؟!
خلصي يا اختي واعملي بلقمتك؟ ده إنتي المفروض تبوسي ايدك وش وظهر ان راضيه اقعدك هنا في بيتي بوشك اللي يقطع الخميرة من البيت ده!
يلا يا بت داري الخريطة اللي في وشك دي بدل ما كل عريس بيجيلك بيطفش وبصراحه الله يكون في عونه عنده حق يطفش؟! ما هو مين اللي هيرضى بيكي وانتي بالمنظر ده !
ليلى (وهي بتشهق بوجع وبتقول) حرام عليكي.. الندبة اللي في وشي دي ما كانتش بايدي ولا ذنبي دي نتيجه الحادثه اللي راحت فيها اغلى حد على قلبي امي الله يرحمها إنتي ليه كل شوية بتفكريني؟
سعاد:(بتضرب كف على كف وبتكمل في اسطوانه الرديح وبتقول) يا حلاوة! وكمان لسانك طول يا بت شاكر؟ ده أبوكي نفسه بيقول يا ريتها كانت راحت مع أمها وارتحنا من نحسها. غوري يا بت اغسلي الهدوم دي على إيدك اصل الغسالة الأوتوماتيك لسه الجديدة خسارة احط فيها الهدوم واما تتشلي ابقى اشغلها !
ليلى بتجري على أوضتها وهي بتترعش بتقفل الباب وترمي نفسها على السرير وفجاة موبايلها بيرن وترد وهي بتعيط ولسه دموعها في عينيها وبتقول :
ألو.. مين؟
يونس: يا مساء البسبوسه! إيه يا أبلة ألو دي؟ إنتي بتردي من تحت السرير ولا إيه؟
ليلى:(بضيق ردت عليه وقالت) أنت مين؟ وعايز إيه يا ظريف أنت؟ أنا مش ناقصاك.
يونس:
أنا يونس من شركة تكنولوجيا واتصالات… رقمك طلعلي عندي على السيستم قولت يمكن ربنا باعتلي مكالمة تفك الزهق اللي أنا فيه😄 لو مش هزعجك يعني؟!
ليلى:(بمرارة وهي بتلمس الندبة اللي في وشها قالت) دمك يلطش.. جيبت الرقم ده منين؟
يونس: الرقم ده كان بتاع أمي الله يرحمها وكان غالي عندي جدآ وباين عليكي شبه امي بالظبط لانها كانت بتموت في النكد بس انتي عديتيها بمراحل تاخدي ليفل الوحش في النكد ! إيه يا بنتي النكد اللي في صوتك ده اضحكي كدة وفكيها احنا مش واخدين منها حاجه!
ليلى: (بشهقة مكتومة ردت عليه وقالت) أنا مش نكديه ولو سمحت ما تشبهنيش بامك اكيد امك كانت حلوة ما تشبههاش بواحدة معيوبه ويا ريت ما تتصلش بيا تاني انا مش عايزة دوشه ومش هرد عليك بعد كده ؟!
يونس:(بهدوء مفاجئ رد عليها وقال) مفيش حد معيوب يا ليلى.. العيب في العيون اللي بتشوف المظاهر الخارجيه وبما إنك خدتي الخط بتاع بركه العيله ليكي عندي باقه رغي ببلاش كل يوم.. هكلمك بكرة.
ليلى (ردت عليه بصدمه وقالت) عرفت اسمي منين؟ أنت هكر يا حزني لتكون هكر فعلا؟
يونس: هكر إيه يا مجنونه انا من الشركه اللي الخط بتاعك تبعها عشان كده وصلت لبياناتك بسهوله؟! يلا قومي افتحي الشباك وشمي هوا بدل ما إنتي مكمكمة في مكانك كدة.. سلام يا لولو!
ليلى كانت متضايقه جدآ من اللي بيحصل ومين البني ادم الرزل اللي اتصل بيها
يونس خلص شغله واخد حاجته ورجع البيت في الوقت ده في بيت يونس كانت جدته محاسن خالتو عواطف قاعدين بيتكلموا عن اللي بيحصل في الحارة.
عواطف:يا ميت خسارة على البت اللي كانت زي فلقه القمر يعني شاكر ده مفيش في قلبه ريحة الرحمة؟تهون عليه بنته يرميها للعقربه سعاد تنهش فيها كده؟والله ياما النهاردة وانا رايحه السوق شفت البت
وهي شايله سجاد الدنيا والآخرة فوق كتافها ونازلة تنفضه قدام البيت ومداريه نفسها من عيون الناس بس الناس ما بيسيبوش حد في حاله كل ما يشوفوا البت يلقحوا عليها بالكلام !
الحاجه محاسن اتنهدت وقالت: يا ضنايا يا بنتي طول عمرها نسمة والندبة اللي في وشها دي هي اللي كسرت ضهرها وخلت سعاد تستضعفها واي بنت من غير امها حالها يغم ربنا يكون في عونها ويصبرها على ما بلاها !
عواطف: تستضعفها ولا ما تستضعفهاش ياما المشكله ان البت هتبور مين هيرضى يتجوز واحدة زيها ومين هيدق على بابها؟! خلاص حالها وقف ما فيش راجل في الحارة هيرضى بيها ده لو اعمى مش هيرضى برده يتجوزها والحق يتقال ياما سعاد عندها حق في دي مين اللي هياخد واحدة وشها متشوة ده الجواز قبول والقبول بيبقى في الوجه والمنظر الخارجي ودي يا عيني وشها باظ مين هيرضى بيها !
في اللحظة دي يونس بيفتح الباب ويدخل وبيرمي المفتاح على الترابيزة وهو بيقول:
مساء الخير يا أهل الدار جرى إيه يا خالتي عواطف؟ هو إنتي مفيش حاجه في السيدة بتفوتك ؟ ماسكة في سيرة الخلق ليه بطلي بقى نميمه انتي عارفه ان النميمه حرام؟
عواطف: الله يسامحك يا يونس انا برده بتاعه نميمه تعالى يا اخويا اسمع وانت تحكم ده انا بحكي لستك على البت ليلى بنت شاكر جارتنا.. يا عيني البت دي مالهاش بخت سعاد مرات أبوها مطلعاها من الملة وبتقول عليها معيوبة وتصدق يا واد يا يونس؟ البت فعلاً منظرها يصعب على الكافر بس هنقول إيه مين اللي هيرضى يتجوز واحدة بالمنظر ده الناس ليها المظاهر برضه ومحدش هيرمي نفسه الرمية دي!
يونس: إيه يا خالتي الكلام اللي انتي بتقوليه ده دي خلقة ربنا.. وبعدين إيه معيوبة دي دي بنت ربنا ابتلاها وهو قادر في اي وقت يشيل عنها البلاء؟وليه محسساني ان الجواز بيعه وشروة في سوق الجمعه واللي داخل لازما ينقي احسن حاجه؟! الست باخلاقها مش بشكلها الخارجي وياما ناس شكلهم حلو بس اخلاقهم زي الزفت!
عواطف:أمال إيه يا فيلسوف زمانك؟ الجواز قبول والبت دي وشها يقطع الخميرة من البيت! وكل الناس بتبعد عنها وقرفانه منها حتى مرات ابوها واخواتها مش طايقينها
وهي يعني مستحملة الذل أصل هتروح فين؟ما هي ملهاش غير بيت أبوها اللي مستخسر فيها اللقمة اللي بياكلها لها!
يونس: لا يا خالتي اللي عايز يتجوزها لازما يكون بني ادم والبنت مش معيوبه احنا اللي معيوبين بتفكيرنا يعني لو البنت عندها مشكله في بشرتها ده ما يحددش قيمتها لان الانسان قيمته في اخلاق وقلبه النظيف مش بشكله لان دي كلها مظاهر خارجيه؟!
عواطف:(بصيتله وهي مستغربه طريقه دفاعه رفعت حاجبها وقالت) وإنت مالك محروق دمك كده ليه؟ لا تكون ناوي تتقدملها؟ يا واد ده إنت سيد الرجالة وألف مين تتمناك الله اكبر عليك عندك شقه ومتوظف ده انت لو فكرت فيها انا اتبرى منك !