تحميل رواية «ظلمات الغيهب» PDF

رواية ظلمات الغيهب

بقلمي أساور حسين

الحلقة _35_

هل يمكنني احتضانك للأبد ؟

.................................

زهراء...

هيام:- اني العندي زوجة الغيهب الـ يدافع عنها

ويأذي الـ يلفظ اسمهاا وصايرة هِـيِّ الغالية

الشريفة الـ ماكو مثلها بوقت ما انتوا بالمستشفى

وهشام اخذ فرح هم للمستشفى البيت فرغ

اني جنت محبوسة بالحمام من طلع هو الغيهب

راد يضربني بقيت بره بعد ما تعبت ودخت من الحر

دخلت اريد اشرب مي وياريت ما فتت

شفت زهراء كاعدة بحضن امير بوضع كسيف

ما أكدر حتى انطق واكمل بعد بس جانت تبوسه

وهو يبوسها وهاي اني بلغتكم .

؏ طول ما هِـيِّ تحجي عيوني تعلگت ؏ غيهب

أنتظر أشوف رد فعله اتجاه كلامها شنو

معقولة يصدكها ، يصدك هيام بـ لحظتها

معناها خسرني للأبد.

حط أيده ؏ رأسه وهالة الهدوء

محاوطته ، الكل ساكت حرفيا

النفس ما ينسمع تحركت

واني أرتعد جسمي عبارة عن سعفة

متشنج بصورة رهيبة ، لا يمكن اوصفها

بالكلمات وگفت كدامه وصحت بكل ما تبقه

عندي من قوة :- ساكت غيهب ما اسمع صوووتك

ونزلت راسك  .

مديت ايدي رفعت رأسه صارت عيني

بعينه صايرة قطعة من الدم الأحمر

صاك ؏ أسنانه ، طال النظر بعيوني

رفعت حاجبي ورجعت كملت :- ليششششش سكتتتتت احجي

هاي الصفرة اتهمتنيييي بشرفي طعنتني بشرفي غيهب

لا ويا منوووو ويا اخوووك .

التفتت اباوع الـ امير واني

احس بعقلي باقي بي شوية ويختل

صرت مخبله رسمي وآني أصرخ

بعلو صوتي :- احجي امير لا تبجي احجي

كلشي ،  كوللهم زهراء شافتني ويا هيام وهي

شمرتها براسها لا تبقه ساكت أبداعت اطفالك لا تسكت .

ابو الغيهب:- افتح حلكك لك راح اموتك احجي .

لحظات هِـيِّ بس لحظات

أنسحب امير ونركع راسه بالكاع

وهشام صعد علية قيد حركته وصارت

البوكسات تنزل ؏ وجهه وجسمه

وصوت هشام زلزل البيت :- تعيدوهااااااااااا علية

لك تعيد غلطططططط جلال وانتَ شهدت ؏ ڪُـل

مراحل هدم اخوك هاي لو ما اني وياك جنه نبجي

دم ؏ حالته دم .

استمر بكل هستريا يضرب بي

ولا واحد منهم ادخل ورفعه منه :- لك عفت بيتي وزوجتي

واطفالي شهرين في سبيل يرجع اخونا مثل قبل

وانتَ باقي هنااااا تحضر كمين حتى من يرجع من السفر

يرجع أسوء من قبل هذا التريده .

أمير ما نطق بحرف ولا حاول حتى يدافع

عن نفسه مستسلم استسلام تام ، وهشام فاقد

وهو يضرب بي الى ان رفعه وركع رأسه

بالحايط ؏  اثرها فقد امير الوعي .

الكل بحالة صدمة مركزين عليهم

غافلين ؏ غيهب اباوع ؏ مكانه فارغ

وسعت عيوني وصحت:- الغيهب وين .

تركنا امير وتوجهت الأنظار ؏

غيهب الـ أختفى بدون ما يحس واحد بينه .

رجاء :- الغيهب صعد فوك .

بعدها تحجي ونزل مررت عيني

علية وستوقفني المسدس بلعت

ريكي وتصلبت بمكاني .

ابو الغيهب:- ذب المسدس غيهب لا تتصرف بغباء .

وكف هشام بوجهه وسحبني من ايدي شمرني

وره ظهره:- غيهب مستحيل تسويها زهراء تحبك

شنو تحبلك لك تموووت عليك لا تغلط وياها

باعت الدنيا علمودك ابوس ايدك لا تستعجل .

رفع المسدس وجهه ؏ هيام

اباوع شرايين أيده بارزات بكل

وضوح وجهه انطعن احمر

مشى بخطوات ثقيلة بتجاه

هيام وصاح:- الـ يقترب خطوة بس خطوة أطشر راسها .

هيام:- عموووو سوي شي يريد يموتني الله يخليكم ساعدوني .

هشام :- استغفر الله يريد يخبلنيييييي

غيهب نزل المسدس كلشي ينحل بس لا تسويها دم .

الغيهب:- وتريد الصار بيه قبل ينعاد هسة وما أخذ حقي

هِـيِ وأمير اليوم اخر يوم بعمرهم .

وكفت كدامه وصرخت

بجنون واحس بروحي تنسحب مني :- لا تهجم بيتنا أبوس ايدك

عوف التهور وذب التلفون وشتريد تسوي سوي بس هل مسدس لا .

نزل ايده سحبني وشمرني وهو يرد:- طلعي منا بسرعة .

حجاها وسحب اقسام هِـيِّ لطمت لطم ؏ وجهه

بحيث وجهه صار دممم ما ينشاف من الزراك

ولان هِـيِّ بيضة بسرعة يبين عليها شكلها

صار مخيف :- بابا غيهب ذب المسدس دخيلك لا تورطني

لا تهدم حياتك الـ سعيت تبنيها ڪُـل هل اشهر .

ام الغيهب:- يمه غيهب مرتك حامل وين تعوف ابنك

فهمني وين تعوفه والـ منو الخاطرري اذا عندي خاطر

عندك يا يمه ذب المسدس.

هشام:- اعرف شنو شعورك ادري رجعولك نفس

ضربت جلال وموج وبعد ما عندك ثقة بينا

بس لا تهدم حياتك لا هيام تستحق ولا أمير .

ضحك مستهزئ بس واضح

الألم بصوته المبحوح :- هههههههه مفتهمين غلط هسة

لو متزوجها امير هم ما يهمني اي ولا يهمني ، اصلا عادي اخواني

ما تعجبهم غير بس النسوان الـ جنت وياهن

هم إرخاص وهنه ارخص منهم وبالخصوص هاي

الحربايه المتلونه وذيج ملكة الكحا........ .

دفع هشام وصار مقابلها وعاط :- تدرين شنو سبب موتج

لازم تعرفي قبل لا تفارقين الحياة هذا حقج .

هيام:- لا تنسى اذا تضربني تروح اعدام.

الغيهب:- الكدامج مو غبي اعرف ثمن اغلاطي

انتِ غبيه ما فكرتي بعد كلامج هذا الثمن روحج القذره.

هيام:- هاي جزاتي لان ما خليتهم يستغلونك

ويمشي المي من جوه رجلك وما تع......

بعدها ما مكملة ضربها ؏ مكان الخياط

بشاجور المسدس والدم صار بطولها

وكعت بالكاع ترافس برجلها من الوجع :- انفتحت الـ خياطات

لحكوووولي انفتح راسي .

نزل رفعها من شعرها خلاها تزيد

بالصراخ وهمس:- بعدج مصره تطعنين بعرضي

بعدج مصره تشوهين بـ تاج راسج .

ضربها بوكس ؏ وجهه وكمل كلامه

وهو يهز بيها :- من سافرت جنت ؏ علم اني تارك

زوجه شريفة ووفائها يسواج انتِ وعشيرتج

وادري لو اخليها بوسط جيوش من الزلم

تطلع منهم طاهرة وشريفة محافظة ؏

سمعت زوجها ابو ابنها .

تجين انتِ القذرة تتهميها بشرفها وتريدين اصدك

لا والله بـ احلامج ما تصيييييييير يا كحبـ.....

رجاء:- انطينياها هل كلبه اليوم اشرب من دمهااااا

لج حقيرة اختي تاج ؏ راسج فاشلة امهات الشوارع

عبالچن ڪُـل بنات العالم مثلچن رخيصات يبيعن نفسهم

الـ هذا والذاك قذرات حقيرات دمرتنها  .

لزمتها هاجر وصاحت:- عوفيها رجاء لا تقذرين ايدج بيها .

رفسها ؏  بطنها ورجع رفع المسدس

من تأكدت هو ما شك بيه ، بكل ما عندي

من قوة حاولت امنع المصيبة الـ راح اتصير اذا

ما أدخلنا .

وكفت كدامه لزمت المسدس ودموعي تصب

مديت ايدي نزلت راسه خايت عيني بعينه

وهمست بضياع :- لا تعوفني وحدي غيهب اني ما عندي

احد غيرك اذا تروح انتهي وكلها اتعبني اني ما اكدر اعيش

من دونك اذا تسويها اموت نفسي وراها لان ما اتحمل

فكرة انتَ تنسجن وتنعدم .

نزلت ايده وكملت واني بقمة انهياري

وروحي تنزف قبل دموعي :- كلشي يتصلح بس

القتل لا والف لا ، لا تيتم أبنه من هسة

ما عدنا غيرك والقران ما عدنا غيرك انتَ ڪُـل اهلي .

أثناء ما احجي ويا هيام راحت زحوف للباب

وطلعت تركض ودمها بطولها وقبل لا تطلع

بـ هل منظر ركض الها هشام ذب عليها عباية راس

سحبها من ايدها بقوة ودفعها بره البيت بكل غضب

وبدون رحمة .

ما احس بي غير دفعني وطلع من البيت

رجاء بسرعة اجت سحبتني من ايدي

وصاحت بوجهي:- لج زهراء تعالي وياي انتِ وين عايشه

شنو هل سوالف وشلون تبقون طليقة الغيهب بنص بيتكم

وين صايرة عمي عيب عليكم مخليها گدم مرته وبين اخوته

الغلط منكم ابو وامه ، اي ووالله لا غلط ابنكم ولا غلط ذيج

الرخيصة لان أمثالها مستعده كلشي تسوي حتى تحصل الـبراسها .

كعد عمي أيده ؏ راسه

وأمير كدامنا فاقد الـ هل دقيقة

بعدنا ما مستوعبين الصار ورجع دخل

هشام ذب مي ؏ امير بس فتح عينه سحبه

واخذه فوك شمره بالغرفة وقفل الباب علية :- هنا مكانك الى ان

يرجع الغيهب ويتصرف وياك والـ يداخل هل مره مثل القبلها

اتبره منكم كلكم واطلع من البيت وحق الله بعد ما تشوفوني .

نزل يرجف ويحجي ويا عمي محروك گلبه ؏ غيهب

لان هو شاهد مراحل العلاج كلها ويعرف شگد تعب

حتى رجع يضحك .

عمتي رجعت الغرفتها وهاجر حارت بين عمي وعمتي

اما رجاء سحبتني من ايدي وصعدتني اني حالي حال الجثه

تحرك بيه مثل الخرخاشه ، گعدتني ؏ جرباية

وبقت تفتر بالغرفة وتلطم ؏ راسها .

رجاء:- شنو جابرج تتحملين ماكو شي يجبرج

عندج اهل وشگد ما يسون ما يوصلون المصايب هل

عائلة الفاسدة لج عيني ماكو هيج بعمري

ما مرعلينا مثلهم .

زهراء:- الغيهب جابرني ابقى ما أكدر اعيش بلا

الدنيا تخنكني واحس نفسي ضعيفة اني احتاج

الغيهب مثل ما هو يحتاجني .

رجاء:- اسمعي مني وتعالي وياي لج

هذولي يموتوچ والله يموتوچ.

زهراء:- ابوج ما يريدني ولا عمامج انتِ شتحجين رجاء.

رجاء:- بس حجي بابا قلبه طيب وما يقبل

؏ أذيتي ولا أذيتچ .

زهراء:- ڪُـل عقلج اعوف الغيهب بنص الطريق

اني گاعدة احجي وياج واحس بنار

تاكل بكلبي وين راح ليش طلع بـ هاي حالته

اخاف بسوي حادث لو يغلط ، رجاء شلون اذا يرجع

للصفر وهم يرجع يروح شقق وبنات ما اتحمل بعد .

غطيت وجهي وبچيت الى ان انهد حيلي

رجاء حاضنتني وتبجي وياي :- انعل ابو الحب دمرتي نفسج

وضيعتي شبابج علمود الغيهب .

لزمتني دوخة صرت ما أكدر

حتى اوكف وأنطق بحرف

خليت راسي ؏ مخدة وجسمي ينفض

وبين الكاعدة والنايمة حسيت برجاء ترفع خصلات

شعري وبيدها قرأن كعدت بصفي وتقرأ وتبجي

دموعها زرفت گلبـي ، رجعت غفيت وفزيت واني

اسمع صوته فتحت عيوني صار مقابيلي

سدت رجاء القرآن الكريم وهمست :- زهراء حرارتها عالية

ضروري ننتبه لا تصير عدها مضاعفات لا سامح الله .

رد بصوت رخيم :- تحتاج مستشفى أخذها.

رجاء:- لا بس اريد أخذها وياي للبيت ادير بالي عليها

هنا كلكم مشغولين انتَ عندك مشاكل واخوتك هوسة

وهاجر حايرة بين امك وابوك والجهال كلهم عدها .

غلق عينه عصرها بـ اصابيعه وهمس:- گعديها خليني أوصلكم.

عدلت نفسي ستندت ؏ ضهرالجرباية

وهمست بصوت ناصي :- رجاء جيبيلي مي

من جوه وكون بارد .

هِـيِّ بسرعة افتهمتني وطلعت بقيت ؏ كعدتي

هو نفس ما هو ما تحرك الحسرات تحجي بالنظرات

قبل لا ننطق بحرف :- تعال غيهب .

أستند ؏ ميز وهمس :- حضري نفسج .

بيه ما بيه گمت من مكاني وتوجهت اله

وكفت مقابيله رفعت نفسي ؏ أطراف

اصابيعي وسحبته من مقدمة قميصه طوقت

رأسه بـ اثنين اديناتي وقيدت شفايفه بين شفايفي

فصلت البوسه سند مقدمت راسه ؏ راسي

تعانقت نظراتنا بضياع همس :- رجعت اختنك زهراء.

اخذني الحضنه بلمح البصر

ضم وجهه بركبتي وستسلم

كدامي وهو يبچي بعجز :- دموعك غالية لا ترخصها .

الغيهب:- ليش اخوتي هيج اريد افهم همه ليش هيج .

زهراء:- يولون كلهم بس اثبت ولا تسمح الـ احد

يشوفك ضعيف ما اكدر اشوفك بـ هل ضعف

خسارتهم اهون من ما يبقون يستغلونك .

الغيهب:- خسارتهم منو هم واخسرهم شبيج زهراء

حالهم حال اخر الجگارة وگعت من ايدي

ما اهتم وداعتج ما أهتم عندي الغالية ما تهمني رخيصه.

بس اني مخنووووك جنت طالع النسوووان خيير من الله

بالشارع هووواي نمل نمل ، يعوفون الدنيا كلها تدنى نفسهم

؏ طليقة اخوهم لو خطيبته ماكو هيج قذارة.

زهراء:- لا تسمع من طرف وأحد غلط حبيبي

أكو لغز بالموضوع أمير مو هيج اعرف هل انسان

شكد طيب وگلبه نقي ، لا تنسى امير صايم مصلي

مستحيل يغضب ربه الخاطر وحدة مثل هيام .

الغيهب:- راسي شوية وينفجر ولا بيه ولا بـ عمليتي 

ولا بالعلاج تتطاير علية المشاكل من كل مكان

وين ما اروح مشاكل مليت .

مسحت وجهه بيدي وهمست :- اذا انتَ ما تكشف الحقيقة

ماكو احد يكشفها شد حيلك وأسمع اخوك امير الـ هل

ساعة ما نطق بحرف .

الغيهب:- انتَ شفتيهم ؟

هزيت راسي وهمست :- اي شفتهم بعيوني وهم امير

جمد وما تحرك نهائيًا.

تركني وطلع صاح ؏ هشام بسرعة

صعد اشر ؏ باب وهو يحجي :- افتح الباب بسرعة خليني

احجي ويا واسمع منه .

هشام :- خلي يولي لا يصير بيك شي بسببه .

الغيهب:- لازم نسمع منه .

هشام:- غيهب كلت عوف امير والله توكع

حالتك حرجة الدكتور كال ارتاح شهر بالفراش

انتَ كاعد تگتل نفسك يمعووود .

الغيهب:- افتح الباب هشام بعد ما أعيد كلامي

لا تخليني أكسر الباب والدنيا .

استسلم ونفتح الباب امير كاعد ؏ جرباية

رفع راسه باوعلهم وورجع نزل راسه .

الغيهب:- اجيت اسمع منك اذا طلعت انتَ

الغلطان حالك حال القبلك اعتبرك ميت

تموت نفسسسسس جلال امير نفس جلال بالضبط فـ احجي .

صعد عمي ركض عاط بيهم :- غيهب عوف اخوك تخبلت .

الغيهب:- يابا والله ما انصحك تحجي وياي روُحـي

خلصت بسببك كم مرة كلت يابا استرها علينا وطلع

هل متبربگه ولا أخذت كلمة مني تعاندني دائمًا تعاندني .

انتَ احجي لا أشوه وجهك لا تبقهمثل النسوان ساكت .

أمير:- اول شي رجع الكاميرات ؏ ساعة الـ رجعت

بيها من المستشفى وزهراء ضربتها .

الغيهب:- ما أتذكر الساعة .

أمير:- ولا اني بس زهراء أحتمال تتذكر.

ما طلعت الى ان صاح علية هشام

انطيتهم الوقت وكعد الغيهب يرجع

بتوقيت الكاميرا .

تقربت منه امير وأكف بالكراج وهي طلعت

من الحمامات الخارجية ، تقربت تحجي

وامير مبعد وجهه ما باوعلها ابد ولا عبرها

تالي رفعلها حاجبه وعافها ودخل .

أختفوا من عيونه كمل أمير الصار.

امير:- دخلت بعدي فورًا وبدون

مقدمات كعدت بحضني ومجرد

ما أقتربت باستني دخلت زهراء

جمدت من حركة هيام وتصلب جسمي

من شافتني زهراء ، وبنفس الوقت انتَ

دخلت ويمكن هِـيِّ سامعه صوت سيارتك

وهيج سوت واحتمال تريد تضحك ؏ واحد بينا

او تشمر مصيبة علينا حتى ناخذها .

فعلًا كلشي صار بالدقايق وبكل تكتيك

عبالك حاسبتها :- ڪُـل الصار بسببك يابا .

امير:- كم مره اجيت أشتكي عليها كدام امي

كلت يمه بس ادخل للبيت الكاها فاتحة المي

ومطلعة رجلها بالكراج عود شوفني .

واذا افوت منها تضحك ضحكة الـ .... استغفر الله

واني اصلي طلعوهاا ، بكل مره تكول هل كم يوم

هل يومين تالي هذا حالي وگعت بيها واني مو صغير

صاحب جهال بدون ما تسمعون مني تضربوني هل ضرب .

هشام:- تستاهل حتى مره الثانية لا تصفن

وتحجي بسرعة ولا تلزك بـ حلگك .

الغيهب:- وين وديتها هشام .

هشام:- بس طلعتها منطقتنا ونزلتها هل چلبه .

هز براسه وطلع من الغرفة مشيت ويا

دخل للحمام غسل وجهه ودخل للغرفة

اشرلي ؏ صدره وهمس

الغيهب:- رجعت تعبان ، رجعت اختنك

زهراء:- صلي .

ابتسم وهو يباوعلي بستغراب:- اني اصلي .

زهراء:- اي انتَ صلي اوكف وصلي

صير قريب ؏ رب العالمين .

الغيهب:- بس الله سبحانة ..

زهراء:-  قال :- { لا تقربوا الصلاة وأنتم سكارى حتى تعلموا ما تقولون }

وانتَ بوعيك واعي ؏ تصرفاتك

كافي ظلام اذا تريد النور تقرب من الله سبحانه وتعالى

خليك بين أيده ادعي الله سبحانه يسهل علينا حياتنا.

الغيهب:- ما ادري أحسها صعبه.

زهراء:- براحتك ، اني هم تعبانه و..

الغيهب:- رجاء منتظرتج جوه بدلي وخليني اوصلكم.

زهراء:- لالا اني تعبانة واريد اروح المكان

أرتاح بي تكدر تاخذني.

الغيهب:- اي طبعا.

زهراء:- خلينا نسبح ونبدل ونطلع .

كمت رحت للحمام تحت نظرات الـ استغراب

سبحت بسرعة وهو ورايه بدلت ،  دخل

بسرعة لبس ملابس ونزلنا الكل يباوعون علينا عفته

واكف ويا عمي وهشام ودخلت الـ رجاء:- يلااا نروح .

عمتي كامت مفزوعة :- وين تروحين يمه لا تعوفي وحده

هو كل هل عصبية علمودج انتَ وحدج تهمي من بيناتنا .

أقتربت منها مسحت ادموعها وهمست:- تحملت الغيهب

بـ أسوء حالات الظلام وبقيت ، وهسة بعد ما صار

زين اترك أيده مستحيل شيلي هل أفكار من راسج

اني والغيهب روح وحدة .

لزمت ايده وهمست بتعب:- لعد وين رايحين يمه .

زهراء:- اذا يبقى گاعد هنا يرجع مثل قبل

اني حفظته ؏ غيب فـ عندي حل عوفي عليه .

مدت ايدها سحبت راسي وباسته وهمست :- الف رحمة ونور

؏ قبر امج الطاهرة ؏ هل تربية.

بستها وطلعت صارت هاجر مقابيلي كرصت خدي

وهمست بفرح :- روح يحلو روح .

زهراء:- أحبك يحلووو .

هاجر:- اموت عليج بزونتي .

طلعت بسرعة لكيته كاعد ما يحجي وياهم

بس جگارة وره جگارة يشرب بدون انقطاع

سلمت وطلعت وصلنا رجاء بعد ما فهمتها

؏ ڪُـل الـ بالي وطلعنا بنص الطريق همس :- وين تروحين .

زهراء:- الكربلاء .

التفتت مصدوم ورد مستغرب:- الطريق طويل .

زهراء:- اني وياك بنفس المكان ماكو احد موجود

هذا حلم حياتي واتمنى الوقت يوگف بينا الطريق مو مهم .

ابتسم ورجع يشرب جكاير بس مخنوك بشكل

ڪُـل شوية يا فاتح الشباك يا فاتح التبريد

ومن يجر النفس ينسحب بصعوبة

وعصر عيونه هاي ولا وكف منها

وأحيانًا توصل عنده يخربط بشعره

بعشوائية ، حاولت بكل الطرق أهدي أعصابه

بس جنت أفشل ، الى ان وصلنا عاف السيارة

بالكراج وخلصناها مشي .

صار الأمام العباس مقابيلي

نزلت دموعي وبداخلي صرخة

همست بصوت خافت يحمل ڪُـل

أنواع الألم:- أجيتگ يا أبو فاضل

أحتمي يمك اني بحاجتك لا تردني يا مولاي .

دخلت ؏ تفتيش وتفارقنا اني والغيهب

جوه صرت وحدي وهاذا مطلبي اريد اطلع

قهر گلبـي كله ، كعدت مقابيل قبر الـ امام

العباس حجيت ڪُـل حجي الـ مضموم

بچيت الى ان خلصت دموعي

ونزاح الم صدري حسيت ثقل صدري كله راح

بس ما كدرت ألزم الشباك سلمت من بعيد وطلعت

واني احلفه بـ أمه .

لكيت الغيهب واكف بالباب يباوع

بالوجوه اول ما شافني تقرب علية

مفزوع :- بيج شي تأخرتي كلت تخربطتي جوه .

ابتسمت بوجهه وهمست:- لا حبيبي بس زرت وطلعت

نروح نكعد هناك بعدني ما صليت.

هز راسه ومشيت اني ويا :- زرت انتَ ؟

الغيهب:- اي بس ما لزمت الشباك احس نفسي ما أستحق.

زهراء:- ليش هيج تحجي غيهب حرام عليك قابل

انتَ قاتل روح ، لو كافر بيهم .

الغيهب:- عوفيني اني من أشوف نفسي استحق

أجي هنا والزم الشباك.

مشيت اخذت تربتين خليت وحده

كدامه والثانية كدامي:- زهراء ما ....

زهراء:- انتَ اطيب قلب بالدنيا لا تخاف اني وياك

بحماية أبو فاضل العباس (علية السلام )

خلينا نبدي بداية جديده من هنا ، نلتزم بالصلاة

ونقرأ القران ،حتى نتوفق بحياتنا .

ظل صافني بوجهي إقتربت لزمت ايده

وملت براسي رمشت بعيوني وهمست :- أسمع مني .

أبتسم وهمس وهو يقترب اكثر :- تستاهلين امسح

ڪُـل حياتي القبلج عشتها وأبدي من جديد بكلشي ، يلااا

يا نعمة الرحمن يلاااا نصلي .

وگف مقابيلي واني وره صلينا سوه

بحضرة ابو فاضل من خلص كعدنا بصف الحايط

هو كعد بصفي اني اخذت القران أقرا شوية

بقه يباوعلي الى ان تمدد ورأسه ؏ رجلي

همس:- اقري بصوت عالي شوية .

عليت صوتي وكعدت اقرا خلصت

وهمست :- صدق الله العظيم.

اباوع ؏ غيهب رايح بـ سابع نومه

صرت العب بخصلات شعره بكل هدوء

نايم بعيوني كأنه ملاك

مرت الساعات ورجلي بعد ما احس بيها

بس ما تحركت ، بقيت اباوع ؏ عالم

والاطفال شلون تركض وتلعب

ضحكهم وزقزقت العصافير فوك راسي ترد الروح

مقابلنا عائلة بيهم 15 نفر نسوان وزلم وبنات

ما دامنا كاعدين عيونهم ما رفعوها من عدنا

وأضح عليهم مستغربين شلون رجال نايم بحضن

مره لان هم مخلين نسوانهم ؏ صفحة وهم بصفحة ثانية

بدت خيوط الصباح تتسلل والشمس تظهر

تعلن عن يوم جديد ، أستقبلت هل يوم ببتسامة

خفيفه ازعج الضوء عيونه غلقها بقوة وفز يباوع

علية :- طلع الصبح .

زهراء:- اي حبيبي .

الغيهب:- واني بعدني نايم ؏ رجلج كسرتها .

زهراء:- عساها نوم العافية دائما جنت احلم

تنام بحضني وابقى اصفن بوجهك براحتي .

الغيهب:- تهدأ روُحـي وتستقر بحضنج للأبد ابقى احب حضنج

وحنانج علية لا تتخلين عني ابد .

زهراء:- ابيع الدنيا وأبقى يمك حبيبي  .

الغيهب:- حركي رجلج لا توكف .

زهراء :- لا هِـيِّ اصلا واكفه ما تتحرك .

اقترب يدلك بيها بخفة حتى ما اتأذه وعلى وجهه ابتسامة

وگف بعد دقايق وسند ظهري كمت بصعوبة

نزل هو بيده لبسني حذائي ولبس حذائه

وطلعنا تريكنا لان من البارحة لگمه ما مخلين بحلگنه

من خلصنا اكل زرنا الامام الحسين (علية السلام)

وبقينا هناك ساعة وطلعنا للبيت .

رجعنا الـ ابتسامة ما فاركت وجهي ولا وجهه

عبالك انولدنا من جديد ، وصلنا بـ ثمانية الصبح

خابر ؏ هشام فتح الباب ودخلنا بسرعة

بس سبحت وهو سبح اخذني الـ حضنه ونمنا .

كعدت؏ اذان المغرب نزلت سلمت ؏

الكل وحجيتلهم مقتطفات عن الزيارة

رحت أجهز الأكل سمعت خطوات

؏ درج رفعت رأسي هشام يريد ينزل :- جوعان زهوره.

زهراء:- عفية بس گعد الغيهب ياكل ويانا .

رجع صعد طول اله نزل صافن :-  ها هشام كعد .

هز راسه وهمس:- اي كاعد .

أبو الغيهب:- لعد شبيك صافن عبالك مكتول.

هشام:- انضربت ؏ وجهي .

ابو الغيهب:- منو ضربك غيهب .

هشام:- اي الغيهب ضربني .

ابو الغيهب:- هذا خبل والله مو بعقله .

هشام:- ضربني من فتحت الباب

تتخيل وتصدك اذا اكلك الغيهب يصلي .

ضحك عمي وهمس:- بـ احلامك هم ما تشوف الغيهب يصلي .

هشام:- كوم بداعت امي كوم وياي .

سحب عمي بالتواسيل والصراخ

صعد فوك ونزل هشام فتح التلفون وعاط:- اني عبالي اتخيل

شوفي يمه الغيهب يصلي وحق الله يصلي .

عمتي اخذت التلفون وبقت تباوع

رفعت راسها وهمست :- اخاف اتفقت ويا .

هشام:- لا يمه والله لا اني انصدمت مثلج

وما صدكت حتى ابوية فوك ما يقبل ينزل .

ضحكت ؏ كلامهم وهمست :- تحسسني الغيهب ملحد .

هشام:- هو مو ملحد بس ما تخيلت بيوم اشوف الغيهب

يرجع مثل ما چان صغير ويصلي تتذكرين يمه برمضان

هو قبلنا يروح يصلي .

ام الغيهب:- الله ايام لو تنعاد ما اخلي الصار كله يتكرر .

هشام:- هذا القدر يمه ما نكدر نغير قدرنا .

نزل عمي والغيهب ينزل وره متنرفز :- شنو جنت صاحب ملهى.

ابو الغيهب:- دولي بابا اني لو ما شايفك بعيوني ما اصدك .

كعد ؏ ميز ويرد ؏ عمو

بكل ثقة:- اني خوش رجال بس گحا..... الوطن لعبن لعب بيه .

ابو الغيهب:- الـ اثول مو هسة صليت .

الغيهب:- قابل كفرت هذا واقع حالي .

هز بيده عمي وكعدنا ناكل ونسولف

ماكو ساعتين وعمي وعمتي وهشام وياهم الغيهب

كلهم بدلوا نزل استاذ غيهب كاشخ اني سكتتت

كلت اصير حبابه اشوف بالله شيسوي .

راحلهم للغرفة وهمس:- ها هشام .

هشام:- اتبرى منك اذا مرتي ما ترجعلي .

الغيهب:- دمشي امشي بـ اول دقيقة ارجعها الك .

ضربه عمي وهو يمشي من يمه يريد

يطلع :- شاطر بـ هل سوالف .

الغيهب:- الحمدلله أحب أصلح بين اثنين

وما ادخل شياطين بيناتهم .

طلع عمي وعمتي وهشام

وهاجر واكفه يمي

وصل للباب وطلع ولا عبالك وأكفه واني شبت بيه النار

زهراء:- مو اتفقنا من يطلع ينطيني خبر .

ضحكت وهمست:- انخبص خطية وبعده ما متعود .

زهراء:- اجي وياج ، زين مو اتفقنا اني أختار الملابس

شكو هيج مبدل معرس وما ادري حتى هشام

ما لابس هيج اوووفر اخوج وحق الله .

قاطع كلامي واني اسمع صوت الباب الخارجي

انفتح باوعت من الشباك الغيهب يمشي سريع

هاجر:- يمكن ناسي شي من اغراضه .

درت نفسي اكمل غسل المواعين

دخل علينا وهمس :- نسيت اكلج زهراء.

- همممممممم شكو .

- احمممممم وياي .

التفتت علية يباوع ؏ هاجر خجلان :- طالع اني نرجع سجى .

- بعد وكت .

- نسيت .

- روح عيني روح العريس .

- لا والله عاديات وقديمات .

- ممممم واضح .

صار مقابيلي وفتح أيده:- باوعيلي والله قديمات .

غسلت أيدي ومسحتها زين وتقدمت

علية هاجر عافتنه وطلعت الجهالها بالكراج :- أنزع السترة

وهذا الرباط ما أريده وشعرك خربطة شوية .

احجي وأنفذ نزعت كلشي وخربطت شعره

بقه لابس قميص اسود وبنطلون رصاصي وبس .

الغيهب:- ناقص تكولين امسح المكياج .

زهراء:- مكياجك ابلادي ما يروح شسويله تورطت بي .

طلعت روحه وجهه احتقن احمررر

رفع حاجبه وقبل لا يطلع عاط بوجهي :- خبالووو والله تغارين مني

مو صوجج اني غلطان رجعت بعد تنذكر وما تنعاد .

اشرتله بيدي ودفعته :- اطلع وخلصني منك اطلع .

ضحكت هاجر وصاحت:- ياااا شمسوية بـ اخوية زهيرة.

الغيهب:- خبالووو مو بعقلها .

طلع وركع الباب كعدت اضحك علية اني

وهاجر دخلت حضرت الاكل وسويت كيك

هاجر سوت گهوة كعدنا ناكل كيك ونشرب كهوة

الى ان دخلوا وجهال هشام يتكامزون قبلهم .

اخر شي دخل الغيهب يفر بسبحة عمي

ماخذها منه ويحشش علية وعمي

يدردم :- السان دلالة وينك وين المحاماة .

الغيهب:- ضاغطكم.

هشام وسجى دخلوا اخر شي

طلعت اني وهاجر سلمنا عليها ودخلناها جوه .

بعدنا ما مستوعبين الوضع اجه هشام وبيده

جهاله:- هاجر وزهرة الجهال يمكم ينامون اليوم .

حجاها وبدون ما يسمع الجواب سحب سجى

من ايدها وصعدوا فوك .

ابو الغيهب:- عائلة مستهتره ما عدهم تربية من جبيرهم

لـ صغيرهم .

الغيهب:- انموت ونعشق نسوانه .

بقيت صافنه شو هذا بس يم عمي

يحجي ومن يوكف كدامي اسحب الكلمة سحب

يماااايييي غيهب كون هيج دككككك .

تعشينا كلنا وكل واحد راح لغرفته

هاجر اخذت الجهال يمها

الثاني يوم ڪُـل واحد بيهم راح الدواماتهم

وهيج مر اسبوع كامل

يروحون لدواماتهم يرجع الغيهب بس يسبح

ويصلي وينزل ياكل وما يعرف ينام اذا مو بحضني

وبعد هل اسبوع المكالمة تتراكع ؏ عمي وعلى هشام

يابا منو هذا الـ هرانا هري:- هاي فرح وتريد ترجع .

امير:- واني ما ارجعها هسة لو تطلع نخلة براسها .

ابوالغيهب:- تكول اذا ما ترجعوني اكتل روُحـي والجهال .

امير تخبل شلون تهدد بيهم :- غيهب ارفع قضية باجر

واخذ جهالي منها .

ابو الغيهب:- لا تبقه تصرخ لا تنعدي من الغيهب

ما صدكت ينعدل اخوك اسمع مني بعد الكتل

والصار بيها راح تمشي عدل ما اعتقد ترجع تخبث .

الغيهب:- وهاي احنه نمشي وره معتقداتك .

ابو الغيهب:- غصبًا ما عليك افتهمت .

عافهم وصعد فوك بعد ما عمتي تتوسل

وهشام ينصح وعمي يحاول وافق امير

بس ما قبل يرجعها هو راح عمي

بليل رجعها صعدت اني فوك ما اريد اباوع

بوجهه وهاجر اخذت جهالها وصعدت وياي

هشام منبه ؏ سجى ما تفتح حلگها وياها

وهي هم عافت البيت وصعدت

اسمع صوتها تبجي وتشكي العمي لان ما نريد نحجي

وياها سديت بابي وكعدت ما بيه حيل أغث روُحـي .

امير نزل نام جوه والجهال يتكامزون ويلعبون ويا

الى ان نام صعدوا فوك الـ امهم .

  ثاني يوم صادف جمعة عمي كاعد قبل الكل

اني واكفه اعدل بنفسي واسمع الغيهب يتفق

ويا هشام :- خمس سمچات علية وانتَ جيب كباب .

أتفقوا وسد تلتلفون وكالعادة لازم يتحارش بيه

بوس ؏ حضن واطفر من ايده .

سحبني بقوة انظربت بصدرة

تقدم باس خدي وهمس :- اخخخخ يالجمالك سومري

ونظرات عينك بابلية اخذتي عقلي.

طبعت بوسة ؏ خدة وهمست:- وشوكت ان شاء الله اخذ گلبك .

رجع شعره ونزل باس ركبتي وهمس :- منو يكول ما

هنا عصافير وتركص ببطني وجهي ورد

ولو ما عيب اكمز ، بس طببب ما كملت الفرحة وكمل كلامة .

- يصيحوج جوه امشي انزل يحلووو امشي .

رفعت حاجبي معاجبني الوضع وعفته ونزلت

ماكو دقايق ونزل طلع هو وهشام ساعة ورجع

حضرنا كلشي فرح نزلت سلمت ولا واحد رد السلام بس

عمي واخ ياعمي ، غيهب ڪُـل خزره يخزرها بيها تساوي

عمرها كله ، وهاجر تتصرف وكأنها ما تشوفها .

كام غيهب يريد يغسل صاح علية عمي:- كعد امك بابا

تأخر الوقت البارحة اخذت علاجها هذا يثكل راسها .

بقه يحجي ويا هشام الغيهب غسل ودخل

فتح الباب وصاح :- ماعدنا نسوان ينامن هيج وكت

جناينچ كاعدات وانتِ نايمة تره عيب .

ضحكت والتفتت الهاجر همست :- اخذي العصير هجر .

سحبتها مني واحنه ڪُـل وحده

شايلة شغله كلشي تزحلك من أيدنا

واحنه نسمع صوت الغيهب زلزل البيت

وهو يصررررخ :- لااااااااااااااااا يممممممممممممهههه

لا تمووووتين يمه لا تعوفيني .

ركض هشام ركضت ويا وهاجر قبلي

سحبها من حضن الغيهب فحصها

وتخبل عاط بعلو صوووته :- يمه لا امي ماااااااااااتت

امي ماتت هاجر أمي ماتت .

يتبع ....

البَـاقيـات الصـالحـات🖤:-..

‏- سُبحـان الله .

‏- الحَمـد لله .

‏- لا إلـه إلا الله .

‏- الله أڪبـر .

‏- أستغفِـرُ الله .

‏- لا حَـول و لا قـوة إلا بالله .

‏- سُبحـان الله و بِحمـده .

‏- سُبحـان الله العَظيـم .

‏- اللهُـمَ صَل عَـلى مُحمـد وآلِ محمد

بنص اعماق قلبي 🥺🫂🤍