رواية ظلمات الغيهب الفصل الحادي والعشرون 21 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _19_

ولو اتيتني هارباً من دنياك
لأصبحت انا دنياك ومافيها .

...............................
زهراء...

حجاها واخذ شفايفي بين شفايفه بوسة عبر الزمن .

ابتعد بـ انفاس ثقيلة سند راسه ؏ راسي وهمس:- لا تعوفين لو شيصير
بيناتنا احتويني اتحمليني اني انسان سيئ اريد اصير طيب مثلج .

رفعت أيدي تلمست وجهه
البارد وهمست:- بس انتَ مو سيئ ، انتَ مثل الأسد مجروح
وتتحرك بخوف ما تريد احد يقترب ويأذيك آكثر.

الغيهب:- ما اريد بس تنطيني أمل تبقين ،من نغلط تعالي حتى او اني الغلطان احجي وياي سولفيلي اغلاطي واذكرلج اغلاطي ونعالج المشكلة .

زهراء:- انتَ تدري اني احبك ؟

الغيهب:- بعد ڪُـل الصار أخاف قل حبج .

زهراء:- حُـبـي الك حب ام الـ ابنها بكل مرة يغلط تنطي إعذار .

ضم وجهه بركبتي وهمس:- ڪُـل جروي تبرد هنا أنسى الدنيا
وأتمنى الوقت يوكف من أصير يمج  .

زهراء:- أثبت كلامك ولا تمنعني اساعدك ، لا تبتعد ، لا تضرب
لا تجاهلني ، اسمع مني خليني مرايتك .

الغيهب:- مو بيدي من أصير عصبي افقد عقلي بالكامل .

زهراء:- من زمان هيج لو ..

الغيهب:- لا ما جنت هيج نهائيًا ما جنت احب العصبية
ولا احب الصوت العالي ، أشتاق النفسي القديمه الضحكتي
الحقيقية حركاتي تهوري مغامراتي اووف زهراء شكد تعبت .

زهراء:- نرجع والله خلي أيدك بيدي ونعود احسن وأقوى من قبل .

الغيهب:- تظنين نكدر .

خليت عيني بعيونه وهمست بتأكيد :- ما اظن بس واثقة من كلامي .

الغيهب:- اذا تبقين وياي وعد أغير نفسي الخاطرج بس الخاطرج
انتِ اليوم أحلى هدية بحياتي انتِ نور ظلماتي ملجئي بأوقاتي
الصعبه مااريد اخسرج .

ابتسمت بخجل ونزلت راسي اتهرب من نظرة عيونه
مد ايدة رفع راسي وهمس:- تسمحين بوحدة ثانيةً.

حجاها وهو يأشر ؏ شفايفي غطيت وجهه بأيدي
وصحت :- كافي غيهب امشي روح الغرفتك .

الغيهب:- نوميني .

زهراء:- لا تصير طماع ڪُـل يوم تريد اني انومك .

الغيهب:- شكو بيها تكسبين آجر  .

ضحكت وبصعوبة رجعت نفسي عدلت المخدة
نام عليها سحب ايدي وحضنها على صدره بقوة بقيت
نفسي ؏ ظهر الجرباية اباوع ؏ ملاح وجهه
الحادة الى ان نام وانتظمت أنفاسه.

ما أعرف شكد مر من الوقت واني ؏ نفس الـ أتجاه
ولو ابقه ُ ؏ــمري كلة ما اتعب ولا أمل
يكولون الحامل لازم دائما تشوف صور حلوة
ناس جميله ، فـ اني استغليت الفرصة وبقيت
اباوع ؏  الأب لان يكفي جماله .

فزيت من صفنتي ؏ صوت فتحة الباب
دخلت عمتي نزعت عبايتها ولان ماكو ضوء
ما شافت الغيهب صحت بهمس:- سدي عمه الغيهب نايم .

خطية هِـيِّ جمدت تباوعلنا بعدم تصديق
رفعت ايدها تأشر :- هذا الغيهب صدك.

ابتسمت وهمست:- اي صدك واذا ما تستعجلين وطفين الضوء
يكعد يعرس علينا ويسويلنا زفه محترمة .

غلقته بسرعة وضحكت :- الف الحمدلله ربي ، خلي مستقر كون دوم
اشوفكم هيج شلون ما احجي ما أوصف فرحتي.

زهراء:- حبيبتي ام قلب الطيب .

طلعت وسدت الباب رجعت الوضعيتي الى آن أخذني النعاس
ونمت ويا ، كعدت الصبح وهو ما زال نايم ويا فرحتي
واني اشوف حبيبي وحلم حياتي نايم بصفي
إقتربت بدون صوت  تقدمت طبعة بوسة
سريعة بطن عيونه ، وسرعان ما عدلت نفسي وكمت
من السرير ، استوقفني صوته وهو غالق عيونه
همس:- زهراء .

غلقت عيوني حيل من الفشله وهمست:- هممممم .

الغيهب:- تعاي .

رجعت وكفت كدام الجرباية ورديت بارتباك:- أجيت .

الغيهب:- عيدي الصار .

زهراء:- شصار .

الغيهب:- عيدي زهراء عيدي .

بلعت ريكي وهمست :- بعدين ، واسفة كعدتك .

الغيهب:- اقتربي .

زهراء:- أقتربت.

الغيهب:- عيدي .

عضيت شفايفي بخجل ونزلت طبعة بوسة بعينه الثانية
بعدني ما متحركة خشن صوته ودار وجهه
ورد بحزم :- اطلعي  ...

ظليت بمكاني من هول الموقف ما اكدر اتحرك
حرفيا فتحت حلكي وكفت .

صكيت ؏ اسناني وحاربت ما ارد علية
تجاهلته وطلعت من الغرفة لكيت عمي
مقابيلي كاعد هو وعمتي ، ايدة ؏ راسة
واضح علية مغثوث حيل .

ام الغيهب:- هلا زهوره.

زهراء:- صباح الخير عليكم .

ابو الغيهب:- منين يجي الخير واني مخلف شياطين .

كمل كلام وعافنا وطلع بره .
زهراء:- ياستار شبي عمو اليوم .

ام الغيهب:- ماكو شي حبيبه لا دوخين نفسج
خدري الجاي وتعاي كعدي اكلي ما دام الصمون حار .

زهراء:- هاجر والبنات وين .

ام الغيهب:- بدواماتهم يمه .

زهراء:- وانتِ وعمو تريگتو  .

ام الغيهب:- بس جاي شرب عمج رأسه يوجعه.

عفت كلشي وكعدت مقابيلها همست بصوت
خافت يوصل المسامعها :- خوفتيني لا تخلين بالي مشغول
كولي صاير شي .

ام الغيهب:- عمج يحلها ، انتِ همج كافي عليج .

طلع الغيهب من الغرفة يمسح بوجهه
تجاهل الوضع وبدون ما يلتفت صعد
صاحت علية عمتي بصوت غاضب:- استحي من تشوف امك
كاعدة كول صباح الخير لو زعطوط ما تعرف .

كمل طريقه وصعد ، مر الوقت وهو ما نزل
كمت خدرت الچاي  بـ ايد وحدة الثانية مجبريها
وخليت اجبان بالصينية ورحت العمي بره
زهراء:- عمو .

التفتلي بوجهه تعبان همس:- ها يابا .

زهراء:- حضرت ريوك ناكل سوه .

ابو الغيهب:- الف عافية ؏ كلبج اكلو اني اريد اطلع .

زهراء:- قبل لا تطلع اكل كم لكمة فدوة .

ابو الغيهب:- ما اريد اكسر بخاطرج بس صدكي ما الي نفس .

زهراء:-تصدك اني هم ما الي نفس بس لازم اخذ علاج
وانتَ المفروض تشرب علاج ، فـ ناكل لكمة وهاي هِـيِّ

ضحك وتقدم حضني من كتافي وهمس:- جبر خاطر انتِ يا عمو .

دخلت ويا ابتسمت عمتي وكعدنا ماكو نفس بس اكلنا
وهو فعلا طلع بسرعة واني رتبت الصينية بدون ما اغسل
ما اكدر ابد وحتى الدوخة رجعت .

دخلت للغرفة اخذت علاجي وتمددت
جريت نفس وخليت الافكار تاخذني
بـعالم اخر عالمي متعب .

مر الوقت وصار الضهر رجعت هاجر
وياها اطفالها ، غسلتلهم وبدلت حضرتلهم
اكل كعدت توكل وتسولف وياي ويا عمتي .

سمعنا صوت هشام هو وزوجته صعدوا فوك
بدون كلام ، كمت اريد مي شفت الغيهب
طلع صار خلف عمي الرجع وحتى ما ندري
التلفون ما وكع من ايده من الصبح الـ هل ساعة .

كمل مكالمة وألتفت شاف الغيهب
صاح بي :- شتريد وأكف ورأيه.

الغيهب:- شبيك مخبوص اباوع عليك من الكامرات
من الصبح تفتر بالكراج وحاير صاير شي أساعدك.

عاط بصوت واحد نفذ صبرًا:- ما اريد منكم شي
بس كفوني شركم تعبت منكم ولكم ابتليت خلفتكم

الغيهب:- خيرر سلامات .

آبو الغيهب:- اشوف الخير وانتو ولدين شلون صايرة هاي .

فات عمي وغيهب ويا :- هسة شمسويلك جنت فوك كلشي ما مسوي .

ابو الغيهب:- هو ارتاح منك يوم يطلعلي صخام ذاك
واني بعدني دايخ بذاك وادور علية يطلعلي اخوكم
الجبير الغبير بسالفة ما تخطر ؏ بال لا بيها ولا عليهاااا .

الغيهب:- هشام .

ابو الغيهب:- اي صخمان هشام اخوكم .

الغيهب:- شبي مو فوك نايم .

ابو الغيهب:- لا هاي هِـيِّ نايم والكم انتو ما تنجرعون
لو الله ياخذ عمري ويخلصني منكم ومن شركم اريد ارتاح  .

طلعت عمتي وهاجر من الغرفة وهشام نزل
هاجر:- عمرك طويل يابا كول يا الله .

ابو الغيهب:- يا الله ولج بابا تعبت من ذولي غير كلت اخلف
حتى يشيلوني بكبرتي ولكم شلعوووو گلبـي تعبت خلصت روُحـي منهم .

جلال الكلب اخابر علية ما يرد والدنيا محتركة عليه .
هذا ما ينحزر ساعة زين وبدقيقة يكلب واكع البنت العالم
دك كتل وتهديدات ورزايل ما يعرف شنو احترم .
وهسة طلعلي بالجديد العار الجبير يريد يطلك شايفه هيج ضيييم .

وسع الغيهب عيونه وبعدم تصديق همس:- هشام يريد يطلك مستحيل .

ابو الغيهب:- ليش مستحيل غير كلكم عارات غير كلكم چلاب
غيررر كلكم اتفقتوا تريدون تجلطووونيييي .

هشام:- الموضوع ما مستاهل يكبر يابا اني وياها
كعدنا وصار إتفاق بيناتنا والطلاك الحل المناسب .

ابو الغيهب:- المناسب بشنوو ولك بشنو عدكم اطفال منو يربيهم
تريدون تبهذلوهم ، تشتتون الاطفال ولكم حرررامممم والله حررام .

زوجة هشام جانت وأكفه بس فوك همست:- يبقون بيناتنا ما يتشتتون .

ابو الغيهب:- يا بيناتكم ولج يا بيناتكم ، منو يتحمل اطفالكم
يومين تلاثه اهلج يملون لح يابا مو ترحين كم يوم تجين روحج
طالعة منهم ، ما اريد احجي وتكولين يعيرني بس ما اريد اضوجج
اني مثل ابوج واريد مصلحتكم اطفالكم ماكو احد يتحملكم غيركم
بيناتكم تنوموهم شيلوهم بعيونكم ، كبروهم اضغطوا ؏ نفسكم
الخاطر عيونهم حلو مشاكلكم ولا تمرضوهم ولكم بوية والله
يتبهذلون .

هشام:- واذا يبقون عايشين بيناتنا ؏ مشاكل هم يتبهذلون
وهم يتمرضون .

ابو الغيهب: تفااهمو ما معقولة مشاكلكم ما الها حل
ولكك ياابا لا تتشدد رخي  حياتك ويا مرتك اخذ وانطي بيها
ساعدها وتساعدك عينها وتعينك حبها وتحبك
اضحك بوجهه تضحك بوجهك
سمعها كلام حلو تشبعك غزل
ولكم انتو ليششش صعبين ولدي ليش صعبين
بهذلتو بنات العالم الله يبهذلكم .

ام الغيهب:- عوفهم تعبونا نارهم تاكل حطبهم اذا عبالهم
من يطلكون يشمرون الجهال هنا وهناك وكل واحد يربيهم
شوية غلطانين .

ابو الغيهب:- من هسة اكول انتَ اذا مفكر تربي الجهال هنا
خليها بالك امك مرة جبيرة بـ احلامك تربي طفل
هاجر حايرة بجهالها وبالدوام
امير وزوجتة دوامات جهالهم بالشافعات يشوفوهم
اما الغيهب وزهراء انتَ اعرف بحالتهم
اخوك اخبل منك لو هو يفلش مرته
لو تشرد منا وتتفلش وهذا حالها هِـيِّ تحتاج مدارات
فـ أيسسسسس من عدنا اغسل ايدك بمي وصابون وقاصر

هشام:- لا دوخ نفسك احنه حاسبيها من ڪُـل النواحي .

ابو الغيهب:-فعلتكم تغضب ربكم .

عاط هشام محروك كلبه :- شنو اول واحد يطلق
غير ما متفاهمين .

ابو الغيهب:- لا تعلي صوتك مو عبالك جبير وما اضربك
هنا انومك وادوس راسك بقندرتي ، اني ما موافق على طلاق
اريد تكعد انتَ ومرتك كدامي وكدام امك وحدنا بغرفة وباب تنسد
علينا تنطيني خمس اسباب منطقية توصل فعلا للطلاق
واني اذا اشوف كلامكم صح ويستاهل توصل للطلاق
بيدي اخذكم وتنفصلون بعدددد عايل اني .

هشام:- مواضيع خاصة ما نحب نذكرها كدام احد .

ابو الغيهب:- بس اني وامك مو احد وغصبًا عنك تحجي
وتفهمني كلشي لا وحق الله اتبره منك حالك حال ذاك العار .

الكل سكت التفت عمي ؏ الغيهب
وعاط بعلو صوته :- وانتَ لعنة حياتي .

الغيهب:- عوفني اني ما بيه حيل مشاكل
مو بكل مشكلة تخلوني بالنص .

صفك عمي بيده وصاح:- الفقير الزين ابن الزين
ولك ولك غويهب انتَ حالك حال الكح.... الكحب... تنستر
ومشاكلك ما تنستر .

أمير :- يابا هاي مالتي لا تبوكها .

ابو الغيهب:- اكل تبن .

هو هسه راجع من الدوام اكل غلط عافهم وصعد يركض .

الغيهب:- هاي اني كح.... وما انستر .

عمي يرد عليه بكل حركت قلب :- ولك اكلك الكح....
استر منك انتَ مشهووووررررر .

هسة غير يسكت الغيهب زاد النار حطب
وصاح:- هذا بالله شبي اليوم ولج يمة شنو ما انطيتي حقه الشرعي .

شال عمي الكلاص وشمره علية وعاط:- خليت بيها حقوق ولكم
لعبتوا بينه لعب الله لا يرضى عليكم .

رفع ايده الغيهب ويأشر بأصبعه:- اخذلك هاي الحبوب
يبيعوها بالصيدلية .

هو كال هيج لو هشام وامير كعدوا ؏ درج يضحكون بعلو صوتهم
هم ونسوانهم وهاجر فاتت للغرفة :- تضحكون علية كواويد
والله اليوم ما اخليكم بيتي امشوووا اطلعووو بره
تره والله اني اطلع .

الغيهب:- بس كول يا الله هو انتَ وحدك تصرخ
كلشي ماكو وتعظم الأمور ، هشام يريد يطلع خلي
شتريد منا هِـيِّ حواء تنحمل تنجرع تنوكل تنبلع .

ابو الغيهب:- وانتوا شنو تنحملون ولكم هذا موتني حواء
وحواء ولك انتَ بدون حواء وين تنطي وجهك ابن السطل
ولكم انطوني اشرب من دمه هل چلب .

طفر عمي يريد يلزم الغيهب هو طلع وسد الباب صار بالكراج وعمي
جوه وعمتي تركض تريد تهدئة وهو قفل ؏ غيهب
ابو الغيهب:- هو من ذاك اليوم اربع ايام واكف هشام وياك
بالسيارة اجـيت صحت بيكم شعدكم ضحكت ضحكتك الشريرة
هِـاي الشيطانية وكلت ماكو شي من ساعتها راح بيها هشام
اي والله وفتت الـ امكم هم كلتلها احجي يا مره مو كتلج

ام الغيهب:- كتلي يا عيوني والله كلت بس كافي مو زين عليك
خليهم يولون شيسون يسون امشي نعوفلهم البيت ونطلع .

ابو الغيهب:- هو هم هيج كافي اريد اهج تعبت لعبت نفسي .

دخلت عمتي وياها عمي للغرفة ومستمرين يحجون ويغلطون عليهم
عمي تهستر اني نبلعت بلع وكفت بزاوية الصالة
وكلهم كاعدين البنات ؏ درج هنا وهشام وامير
الغيهب دخل وكف بالباب واحد يباع ؏ ثاني
وهاجر جوه تحجي وياهم .

هاجر:- الله يخليك يابا لا تسون هيج والله عيب
صرت استحي اطلع بالشارع الوحيدين بالمنطقة
اصواتنا دوم طالعة.

ابو الغيهب:- بسبب اخوتج العاريه.

هاجر:- ما تطلعون والله رجلي ؏ رجلكم وين عايفين البيت
فدوة الطولك يابا كافي .

عمي ما تأثر وفعلا اخذو الجنط وطلعو من الغرفة
دفع الغيهب وطلع من الباب وعمي ويا
ركض هشام وامير يريدون بوكفوهم
ولا قبلوا وصدك راحوا ، دخلت للغرفة بس ارجف
والحرارة رجعتلي راسي صار فرد مره
فاتت هاجر تبجي وتناشغ عليهم وهم حقها
فوك مصايبها نجي كلنا انزيدها عليها
بس هِـيِّ قوية تعجبني قوة شخصيتها
واصرارها وطريقة تعاملها مع أطفالها
احتوتهم وصارت ام واب ما ضعفت
ورجعت بحجة مسؤولية اطفالي صعبة
لا بالعكس حاربت زوجها وكفت بوجهه
وحتى جهاله نحرم من شوفتهم وصار
يتمنى كلمة منها لو حرف بس تعطف علية
بي وتنطي امل ، أخذت حقها كامل منه
وعاشت براتبه اما راتبها كلة تجمع بي
حتى تشري بيت وتخلي وطن الاطفالها ..

البيت صار هادئ الكل التزم الصمت
تالي ڪُـل واحد دخل للغرفة ظل البيت فارغ
ما بي صوت عمي ولا حنان عمتي
افتقدتهم من اول ساعة الى ان صار
اليل تكابلنا اني وهاجر وكعدنا نبجي
والمصيبة من نخابرهم  ولا واحد يرد

صارت ب١٠ نزل هشام وامير
وياهم غيهب يحجون بالكراج

أمير:- كله منك ابو البلاوي .

هشام:- انجب اني شمسوي حجيت الـ امي هِـيِّ حجت
شنو كفر اريد اطلك .

بين كل هذا الغيهب عازل نفسه عنهم وما نطق بحرف
صاح علية امير ما رد بس مستمر يشرب جكارة بعد جكارة

هشام:- مو نحجي وياك .

الغيهب:- ابالك وحده هشام .

هشام:- لا بس تقصير مني ومنها .

الغيهب:- اذا ابالك وحده ما انصحك عندك اطفال
لا تهدم بيتك علمود نزوة.

أمير:- باع منو يحجي .

الغيهب:- اولآ ما عندي اطفال ، ثاني شي ما مدخل الحياتي وحدة
وما اهدم حياتي علمود وحدة .

امير:- وال .....

الغيهب:- ما عندي علاقة بيهن مجرد أخلص حاجتي عدهن
واطلع وبعد ما اشوف وحدة من عدهن ، وللعلم صار هواي ما
رايح ولا بالي اروح .

وهسة كافي تره دخت اصعدو فوك واسكتوا.

هشام:- وين نصعد يمعود كوم ويانا نشوف ابوية وامي وين .

الغيهب:- روحوا انتو اهلي ما يرجعون هسة اذا ما نحل مشاكلنا .

هشام:- اني ما انام اذا ما يرجعون امشي امير .

اني وهاجر بالمطبخ كلشي نسمع
طلع امير واخذ هشام ، وقبل لا يطلعون صاحت
هاجر عليهم ياخذوها وياهم .

طلعت للكراج كعدت مقابيله ركزت بي
هو شافني بس ساكت صافن ، دايخ حاير
ما ينعرف ولا ينحزر .

زهراء:- بيك شي غير موضوع عمتي وعمي.

رفع عيونه رمش ببطئ ورد بأرهاق:- كلشي بيه اني كلشي .

زهراء:- اسمعك .

الغيهب:- اني بوضع ما اكدر احجي بي تعبت من الكلام .

زهراء:- بس انتَ البارحة ما جنت هيج حتى بوقت العركة
مابيك شي ليش تخربط وضعك هسة .

الغيهب:- سمعت خبر ومنتظر يأكدون علية .

زهراء:- يخص منو ؟

الغيهب:- نفس الموضوع الشاغل ابوية وصل الـ هل مرحلة
يطلع من البيت ويهج مو بس من عدنا لا الموضوع اكبر من هيج .

زهراء:- خوفتني والله شصاير .

الغيهب:- بعدين خلي نحل موضوع ابوية وامي ونشوف الباقي .
باجر عندي دعوة بالمحكمة ولازم اروح حتى ما اكدر أجل .

زهراء:- بالكي يرجعونهم .

الغيهب:- ان شاء الله ، لو سمحتي اريد كلاص مي .

زهراء:- صار .

كمت والوجع مستمر بيه اخذت كلاص مي بارد وطلعت
انطيته شرب الكلاص كلة مبين يابس ريكة عرفت
الصاير شي جبير مو هين وسهل اكو سالفة صايرة
وكلها مخصوصة بيها بس شنو هِـيِّ ما اعرف .

تأخر الوقت واني بين اروح ارتاح
بالغرفة وبين اوكف شوية بره
هو ساكت ولا تحرك .

الى ان سمعت صوتهم رجعو طلعت
لكيت الغيهب هستوه طلع من الباب
وهم كعدوا بالكراج هاجر فاتت
بس هشام لزم راسه يوجعه.

دخلت الهاجر اباوعلها حيل عصبية:-شصار ليش ما رجعوا.

هاجر:- حضي ما رجعهم ما يقبلون ميبسين راسهم
راح هسة الغيهب بس لا تعلك .

زهراء:- تعلك ويا منو .

باوعتله ودارت وجهه ما تريد ترد
بدلت وراحت ويا اخوتها بره
هم ساعة 12 صعدوا فوك هِـيِّ رجعت للغرفة

الى ان صارت الساعة 2 بليل رجع الغيهب وردت روُحـي من
سمعت صوت عمي وعمتي ويا طلعت بسرعة دمعتي بطرف
عيني ضحكت عمتي من شافتني وصاحت:-والله ما انقهر عليكم
كلكم انقهر ؏ هل يتيمة تكسر باب گلبـي وهذا يعرف نقطة
ضعفي هددني بيها ورجعت .

وكف غيهب ؏ درج صاح عليهم بـ أسمائهم
هم ونسوانهم لازم وضروري ينزلون اوامر من عمي
وغصب عنهم كلشي يتنفذ بدون نقاش .

وفعلا الكل نزل واجتمعوا بينا بالاستقبال
الجهال كلهم نايمين وبس احنه كاعدين
الجو هادئ الـ هل دقيقة والصمت سيد الموقف

لكن هل سكوت ما طول ونقطع من
الغيهب عدل كعدته ورفع صوته
يجذب انتباه الكل:-رجع ابوية وامي وياي لكن عدهم
شروط وغصب عنكم تنفذوها .

ابو الغيهب:-وقبلها تسمعون كلامي ونحل المصيبة
الأولى وبعدين مشاكلكم التافهه .

ركزنا ويا عمي وهو يتحمحم
ويضغط ؏ ڪُـل كلمة ينطق بيها
ابو الغيهب:- اخوكم جلال .

هشام:- شبي .

ابو الغيهب:- الشرطة تبحث عنه عمتكم ام موج بلغت عنه .

امير:- ليش تبلغ عنه .

ابو الغيهب:- قاتل موج .

هشام:- شنوووو قاتلها خلاص .

ابو الغيهب:- هو ليش دايخ اريد اعرف وين راح أختفى
زين جثتها وين البيت من دخلت علية عبارة عن دم
بس ماكو احد دفنها غير نعرف اريد يرد ماكو حرك گلبـي .

هشام:-شنسوي بـ هل حالة شلون نحلها .

أمير:- ما اعرف والله انتَ شدكول يابا .

ابو الغيهب:- غيهب ويانا .

الغيهب :- وياك بس اني  ما ادخل بموضوعهم .

ابو الغيهب:- ما عندك معلومات عنهم .

الغيهب:- لا طلعوني منها .

عافهم وكف صوته بالشافعات يطلع
اختنك وجهه صار احمر رجله ما
وكفت من الحركة ما اعرف مقهور او متوتر
قلقني وقلق الكل .

من راد يطلع عمي صاح بي:- اوكف ما خلصنا
بعد عندي موضوع هشام .

هشام:- يابا لا دوخ نفسك بيه .

ابو الغيهب:-اريد ادوخ عندك أعتراض.

هشام:- لا يابا ما عندي كول اسمعك .

ابو الغيهب :- انتَ وزوجتك تسمعوني كلش زين
اولا باجر الصبح توصل زوجتك البيت اهلها اريد
تبقيها أسبوع كامل وبعد هل اسبوع جهالك
تخليهم هنا يمي وتسافر انتَ وياها ؏ مكان من اختباركم
وحدكم ؏ حسابي تكعدون بعد ما تفكرون زين بهل فترة
تتفاهمون وتقررون اخر قرار بذاك الوقت اذا بقيت
انتَ وياها مصرين ؏ طلاك براحتك ما ادخل .

سجى :-ليش نطولها وهي قصيرة هو بايع العشرة من زمان .

هشام:- لا يا ملاك ؏ اساس انتِ ما بايعتها .

سجى:- بسببك .

هشام:- بسببج دستي بطني وساكت .

ابوالغيهب:-اي عفية من الروس هنا خليكم بالنص صير سالفة انت وياها .

هشام:- اوووف گلبـي ورم منها ما اريد اطول من باجر نخلص .

ابو الغيهب:- غصبًا ما عليك وعليها تنفذون افتهمتتتتت .

الغيهب:- كافي سوي مثل ما كال واسكت هو اسبوع .

هشام سكت ، وامير حجه:- ما اتعارك ويا مرتي وتسفرني
اسبوع ؏ حسابك .

ابو الغيهب:- انجب .

الغيهب:- اكثر واحد ياكل انجب امير.

امير:- هاي هِـيِّ خلصتوا نروح انام ورانا دوامات .

ابو الغيهب:- امشوا نامووو خلصووني .

كام الغيهب صعد اني رحت للغرفة نمت عيوني
بعد ما اكدر افتحها ، مر يوم ويومين
وجروها اسبوع كامل محد يعرف خبر ؏
جلال عمتي قطعت الاكل وعمي شوية ويتخبل
من الخوف والقلق ، اما الغيهب ما يبدر منا رد فعل
هادئ وهذا الزاد خوف عمي ،الكل مستغربين
منه ليش ما كلف نفسه بالجذب يجيب خبر عنهم .

چان مهتم بس شنو اكل وشنو اشرب وين انام
وما يكدر يصعد ينام اذا ما  نسولف
سوه الى ان بعد ما يكدر يفتح عيونة يصعد ينام .

هشام اخذ مرته وصار الأسبوع اسبوعين
وما رجعها وكل ما يحجي عمي يطلع
عذر او حجه ، الى ان بيوم رحت فتحت ايدي
وجيكت وضعي عند دكتورتي وبشرتني الطفل
بخير وكلشي طبيعي انطتني فيتامينات
وعلاج خفيف ، رجعت هلكانه انصدمت بروحي
مو مثل قبل القهر والصدمات أكلت حيلي وما بقه
بيه امشي وهاي اني بعدني بداية عمري
شلت هم شلون احدر اولد هل طفل بعد
ما راح حيلي ، وارجع اعوفها ؏ ربي هو يسهلها .

وصلنا للبيت الوقت متأخر هاجر بيت ملاك
وفرح متغديه والمواعين حتى ما مغسولات وصاعده فوك
صاحت عمتي عليها ولاول مره اشوف عمتي بـ هل حالة

ام الغيهب:- فررح وييينج .

طلعت من غرفتها اني واكفه اشرب مي
فرح:- ها عمه .

ام الغيهب:- مو وحدج بالبيت ليش ما حضرتي غده .

فرح:- المن احضر هو بس اليوم راحتي ما رحت للشغل
نوب اجي اخدم هنااا .

ام الغيهب:- شتخدمين كتلج نظفي هو غده الله واكبر غير ساعة
ب5 العصرشنو ما ناكل اليوم ناس كبار احنه ، بالله التنظيف
كله علية والطبخ هم بس اليوم طلعت شتخسرين من تسوين .

فرح:- اخسر وقت كاعدة ارتب جداول اطفالي ودفاترهم ؏ كتبهم
بدل هل هوسة جيبي من بره وفضوها اني وجهالي اكلت
وسجى وجهالها ماكو وهاجر عند اختها بقت بس النبي زهراء
وكلوهااا بلا هوسة.

ام الغيهب:- طلع السم بسم الله شبييج هاااا شو محروك دمج .

فرح:- لا محروك ولا منتول ، هذا الوقع مو عميان نشوف
بعيونه ، ست زهراء ماكله الجو عايشة دور الضحية
وكلها تبوس بذيالها .

ام الغيهب:- زهراء يبوسون بذيالها منو يبوس ولج
شو البنية متكسرة واليوم فتحت ايدها وطفلها
بخطر وتساعدني لان اصيلة.

فرح:- واحنه كح... زهراء اصيلة واحنه كح... خوش والله .

زهراء:- شبيج فرح صدك تحجين لو تشاقين .

نزلت الدرج فرح وجرتني من ايدي ودتني للطباخ
وصاحت:- لا ليش اشاقه يا عيوني احجي صدك وبكامل
قواي العقلية ، عندج ايد عندج رجل اخدمي نفسج
لا تضلين تطلبين واكلج وشربج يوصلن الحضنج
مو خدم احنه افتهمتي .

ام الغيهب:- صدك ما تستهين وطايحة حظ امشي ولي صعدي
فوك يجون زلمجن واحاجيهم ما اظل هيج زوجتهم
حتى يعينوني مو اصير خدامة الهم والنسوانهم .

زهراء:- فدوة عمه لا تكبروها هسة ابدل واجي اطبخ نمونه .

فرح:-عشتي استمري بـ هل لواكة والذل حتى لا توصل الغيهب
ويرجع يطحن اعظامج ونرجع نسمع صوت التعذيب
تره لعبتي نفسي .

كملت طعناتها بكلبي وصعدت عمتي جمدت عن الكلام
والدموع تحجرت بعيوني ، من الخجل عفت عمتي
ودخلت للغرفة اخذت ملابسي وصعدت فوك

ساعة وحدة بس وحدة مرت سمعت صوت تلفون عمتي
يدك ، صاحبه صوتها المرعوب وهي تصيح

ام الغيهب:- شكو شصاير فهمني .

ما اعرف منو يحجي وياها بس دخلت عمتي إنذار
طلعت من الغرفة مرعوبة من صوتها حتى فرح
وياي ، بعدها ما غلقت الجهاز
دخلت هاجر ترجف صاحت بعلو صوتها :- ووووين زهراء.

جمد الدم بعروكي تراجعت للخلف
ولا إراديًا خليت ايدي ؏ گلبـي
رجع صوت عمتي المفزوع يرن بالبيت :- شبي شمسوي
بس حاجيني بشنو تورط هل مره .

سكتت لكن سرعان ما عاطت:- ما اخلي ياخذها بس ....

اندفر الباب الخارجي ودخل الغيهب
بـ عجلة عاط وصوته دوي إرجاء البيت
بالكامل :- وووين زهراء .

شمرت عمتي التلفون وكفت ؏ درج تعترض
طريقة:- ما تاخذها ابوك ما يقبل ، شمسوي 
ولك شمسوي وكلها تريدك .

الغيهب:- يمه مو وقت كلام شيلي ايدج اريد
احجي وياها بالله وووخرررييييييي .
هاجر:- ابوية على وصول ويريدك لا تروح ما يقبل .

الغيهب:- لازم اروح زهراء تعالي كددداممممييي .

تقدمت مرعوبة بس بنفي الوقت ما اكدر ما ارد علية
زهراء:- شكو شصاير گلبـي راح يوكف شسويت غيهب .

الغيهب:-يريدون ياخذوج مني زهراء  .

زهراء:- اني يمك منو يكدر ياخذني شصاير بس فهمني .

الغيهب:-تحبيني .

زهراء:- طبعا .

الغيهب:- خلي ايدج بيدي وتعالي وياي .

زهراء:- وين نروح .

ام الغيهب :- ما تطلع وياك خطوة وحدة بره البيت روح منا
غيهب احمي نفسك اطلع بره .

الغيهب:-زهراء اذا عندج ثقة بيه وصدك تحبيني تعالي وياي .

ام الغيهب:- لا تسمعين من عنده زهراء عمج حذرني ما اخليج
ترحين ويا ، ما اعرف شصخممم الغيهب ولك حاجيني
شسويت من مصيبة جديدة .

الغيهب:- هل مره صدك ما سويت شي  هم اتهموني باطل
وأولهم ابووية غدرني وطعني بظهري .

ام الغيهب:- أبوك ما يسويهاا انتِ الغلطان غيهب انتَ .

الغيهب:- ما منتظر تصدكوني ، واخر مره اعيد كلامي زهراء اذا تريديني
تجين وياي حالًا.

همست بتردد:- بس عمو ما يقبل  اروح وياك .

الغيهب:- حالج من حالهم من اكولها لا تلوميني
ابقي بس بعد ما ينحل كلشي ما تبقين ؏ ذمتي
ترجعين لان خسرتيني .

عافنا يريد يطلع صحت بصوت
خائف:- لحظة الغيهب لحظة اجي وياك انتظر
البس عباتي .

وفعلا ركضت خليت عباتي اجتي هاجر تصرخ
وتحاول ما اروح بس ما كدرت اعوف الغيهب
وهو بـ هل حالة اني انطيت وعد ولازم اكون
كدها ويا بالزين والموزين .

نزلت والحيرة والضياع محاوطاتني
خايفة وخطواتي ثقيلة ، طلعت من البيت
وعمتي ادك وتلطم واضح كلش واضح
المشكلة جبيرة هل مرة .

اول ما تحركت السيارة طبك عمي ونزل
ويا زلم مسلحين ، عمتي أشرت ؏ سيارة
الغيهب هو وكف وعاط بعلو صوته

- لك غــيــهــب .

يتبع ....

- البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد .

هلو حبايبي شلونكم ، أتمنى بنهاية البارت عجبكم
اذا اشوف تفاعل حلو ونار وفووول نار وشرار ؏
هذا البارت انزل بارت اضافي ويا متفقين  😉