رواية ظلمات الغيهب الفصل الثالث وأربعون 43 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _40_

كـون يمَك ..
انه اخاف من الأمان الماهو مِنك ❤️
.....................................
زهراء..

حط التسجيل بوجهي وصاح :- مو قبل ما تفهميني شسوين
انتِ وجلال هناااااااا فوك وحدكم .

سحبت التلفون شمرته ؏ حايط بكل حيلي
تناثر بكل مكان فقدت واني اصرخ بعلو صوتي:- شكد وقح دخيل
الله عبالك إني رخيصه مثلكم وأروح اغضب ربي بهل
سوالف الطايح حظها مثلكم .

تقدم بتجاهي وهو صاك ؏ أسنانه :- سؤالي وأضح شعندج
انتِ وجلال وحدكم فوووووك .

باوعت بعيونه أريد اجر النفس حتى
بس أكدر ارد علية ما كدرت اسيطر
الساني ثكل صار خشبة ودمار ضربني
من راسي الركبتي ، شمرت جسمي ؏ جرباية
صرت أنفض من القهر جبرت نفسي
وبالسان ثكيل همست :- تماديت هل مره هواي غيهب هواي
وما اعديها وروح امي ما اعديها.

إقترب مني أكثر رفع راسي وصاح:- اخر مره احجي بتفاهم
وياج كررت سؤالي بدون تصرفات خارجية ومحترمج واكف
أسمع منج وبعد ما أكررها شعنده جلال واكف قريب منج
الـ هل درجة شهمس بـ أذنج .

-  اذا ما عندك ثقة بيه ليش تبقيني يمك .

رفعني من ملابسي رفع أيده خليت ايدي
مقابيل وجهي أتصدى ضرباته ، شمرتي
بعيد عنه وأبتعد وكف بزاوية الغرفة
ورد بصوت مخنوك :- ما أريد أستعمل الأسلوب القديم
عندي ثقة بيج بس ما عندي ثقة بـ جلال احجي قبل
لا ارجعج النقطة الصفر .

زهراء:- اذا عندك ثقة بيه اكيد تعرف اني لو
؏ موتي احافظ ؏ اسمك وبعمري ما أنزل راسك
وبعمري ما اسمح يصير غلط لو ؏ جثتي .

الغيهب:- واعرف انتِ تخافين أغلط
وحتى لو بدر فعل غلط من جلال اتجاهج
كان سمعج كلمة او تجاوز حدودا ما تحجين
حتى ما تصير مشاكل وتتصرفين من نفسج .

زهراء:- ولازم تعرف هل موضوع حساس اذا اخاف
عليك وما ابلغك هم ما اسكت وأخلي أيدي ؏ خدي وانتظر
منه يتمادى وياي اكثر  ، وكلت أتصرف مني
اروح ؏ عمي أو هشام وهم يتصرفون وياه .

أبتعدت عنه سحبت بطل المي شربت نص البطل
ريكي يبس بعد ما أكدر انطق بكلمة بس
أرجع واضغط ؏ نفسي في سبيل أخلي النقاط
؏ حروف :- الوصلك الفديو يريد خراب المصيبة
جلال شلون اذا يسمع لك عيب الرجال حتى يستحي
يحجي وياي واذا يريد يصيحني ما تنزل من السانه ام نور .

الغيهب:- ليش اقترب منج ليشششش .

زهراء:- هو حتى عيونه ما يخليها بعيوني وبوقت ما انطاني الهدية
ما رادك تنقهر منه سلمها الي وفهمني عليها وصار بهل
قرب واول ما سمع خطواتك دخل للغرفة يخاف منك
لان يعرفك أنسان همجي متخلف ماتعرف شنو يعني تفاهم
وبعمرك كله ما تعرف أبقى بقوقعتك المتخلفة الى ان ترجع
وحدك بلا سند ولا ولد لا زوجة ولا اهل .

تقدمت بتجاهه دفعته من صدره وصحت
منو صور هاا منو دفعك وانتَ مثل العربانة اندفعت علية
هيام جاوبني هيام دفعتك لان مو جديدة سبق وسوتها
وطعنة شرفي اني وامير وهل مره اني وجلال
بكل الطرق تريدوني أوصل القذارتكم بس اني ابقى تاج
؏ راسك وراسهن .

عافني وكعد ؏ تخم نزل راسه
ضغط علية بقوة واني بدون
توقف القهر البكلبي يمعني أسكت عنهم
دفعت الباب ونزلت وجسمي عبارة عن سعفة
ينفض نفض مو من وجع من هضم وقهر
من تعب وملل خلص صبري الى متى ..

نزلت ودموعي شلال ؏ خدي
دخلت للمطبخ صارت مقابيلي
اطكطك بـ أصابعها اخذت سجين
جنت فاقدة العقل بس صارت عندي قوة
ما تنوصف هجمت عليها سحبت شعرها
هي سحبت شعري أقوى خليت السجين
؏ ركبتها وصرخت :- انتِ صورتي موووو ؟

هيام:- خلي يشوف بعيونه شلون شريفة انتِ .

طلعت هاجر من غرفة عمتي
هجمت عليها شالت ايدها من شعري
كدرت إضغط عليها اكثر عطت
واني اشهك :- لو تموتين ما توصلين للبالج
لج أعرف تريدين توصلين فكرة أني أشبه
موج هاي بـ احلامج قبلها اتهمتيني اني وأمير
واليوم اني وجلال همج تكولين شوفهاااا
بس تخسين انتِ وياه تشوهون سمعتي اني
أصيلة وربتني مرأة أصيلة كسرت ظهرها علية
يا سافلة علمتني شرفي ثم شرفي ثم شرفي حتى مماتي
تريدين تقارنين نفسج بيه كعدتي بحضن اخو وراح ازوجج
وكعدج بنصنه وكدام اخوو هو ما يستحي وانتِ ما تستحين
ليششششششش تنزلوني المستواكم ليشششششششش .

صب الدم من ركبتها كمز هشام من الدرج سحبني
وصاح :- شصااااير ذبي السجين ذبيهاااا

رديت وأني بحالة هستريا:- خليني اموتها وأخاف قبل
صار عندج دليل وسجنتني هل مره بيدي اموتج واحرك
جثتج اخليها رماد وانتِ بلا اصل ولا فصل حتى محد يسأل
عليج لان عاااااااار واذا صار شي ابوية يستلم القضية
وايهاب استاذ غيهب ما يدخل لان اهم شي مصلحتكم عنده .

وانتوا سمعتوا الصار لا تغشون
نفسكم اخوك صار عربانة الهيام تصور بمرته
وهو يتهجم عليها بدل ما يركعها ؏ حلكها .

عود أكتفى بنص هل هوسة
صوت جلال والغيهب رج بيتنا رج
يريدون يصعدولهم نزله دفع من فوك ليجوه

جلال:- عيب عليك هل كلام لك هاي أختي
مستحيل افكر بيها ، بيوم غلطت اني وموج لان هي رخيصه
وانتَ تعرف كلششش زين اني شنو أقصد.

الغيهب:- اني ما أقارن اعرفها شريفة وتسواك وتسواهن
بس اني ما عندي ثقة بيك واخاف ؏ زوجاتنا منك لانك قذر .

هجم هشام ؏ الغيهب ضربة
بوكس ما شفت الغيهب غير واكع
بالكاع :- لا تجمع لا أشوه وجهك زوجاتنا شنو
يعني سجى وزهراء بمستوى موج وهيام الكحـ ...... ولك .

زهراء:- الظاهر هيج بس سهلة ما دام هيام
طلعت شريفة وهو شريف واني طلعت المو شريفة
ما أظل لحظة عندك وحق الله .

عفتهم يتصايحون بعد ما هجم ؏
هيام الصراخ صار بفلس لكيت نور
يبجي أريد أخلي بيدي ما كدرت اسيطر
سحبت الجنطة خليت ملابس دفع الباب
ودخل بقمة غضبه :- ووووين تروحين .

عاف كلشي من سمع نور يبجي :- الولد مو يبجي ليش ما تشيلي .

زهراء:- جسمي يرجف ما أكدر.

سحب بطل مي بارد من الثلاجة غسل وجهه
بسرعة وغسل شعره الكاع صارت عبارة
عن مي نشف وجهه وشعره وصار ياخذ شهيق
وزفير الى ان وكف وشاله ضحك بوجهه وهمس:- دنيتي يبجي
حبيبي اشششش بابا يمك حبيبي بابا يمك  .

حضنه وهو يهز بي نزل يستنشق عطره
وهو يهمس:- افيشششش شكد طيب عطرك نوري .

هو سكت وبس يباوع بوجه ابو
ويفر براسه يطلع صوت من شفايفه
وهو يطك اصبع بالهوه حتى يجذب إنتباهه.

عفتهم ونزلت الـ هشام بعده يصيح
عليهم من شافني سكت مسحت دموعي
وحجيت بقهر :- الزلمة من ينطي كلمة لازم يكون
كدها وانتَ انطيتني كلمة بس تصير مشكلة
بيدك تاخذني البيت ابوية صح لو غلطانة.

هشام:- إطلع ناقص شرف اذا رضيت ؏ صار
بيج ومو زلمة اذا ما أخذج هسة بيدي البيت ابوج .

زهراء:- لبست عبايتي وجهزت جنطتي وأغراض
نور فوك ما اريد اشوف وجهه اخوك لو سمحت
تنزلهن وتاخذ نور من عنده حتى نروح بدون مشاكل
لان راح اوكع بعد ما بيه ابقى وأكفه.

أمير :- اكعدي هنا واحنة نكمل كلشي وننزل
لا يصير بيج شي منو يفيدج .

هاجر كاعدة مقابيلي تشك
ما نطقت بحرف واحد
جلال كاعد مقابيلي رفعت راسي وهمست:- خجلانة منك
لا بيها ولا عليها وكعت ؏ راسك مصيبة.

جلال:- اني اعتذر منج أختي وحسبي الله ونعم الوكيل ؏
كان السبب ، اني فرحان لان شفت الغيهب تخطى ڪُـل الماضي
وفرحان وياج وفرحان بـ أبنه طلعت هل رخيصه صفح .

نزل امير صعد الجنط وأشرلي :- صعدي بالسيارة زهراء.

زهراء:- ونور .

أمير:- ما يقبل تطلعون بس هشام يحجي وياه
هسة دقايق وينزلون أمشي يلااا .

اخر شي صار كدامي هاجر كامت الـ هيام
تكتل بيها وكلامها نبت سچين بنص گلبي :- حسبي الله ونعم الوكيل
عليج لج رجعتي النقطة الصفرررر
خسررر ابنة وحبيبته بسببج اليوم اموووتج والقران اموتج .

صعدت بالسيارة روحـي تطلع مني
بقيت منتظرتهم هواي الى ان طلع نور
هشام صعد :- وين نور .

هشام:- قافل ما يقبل تروحون
كتله رايح اخذ زهراء وبقي الولد يمك .

زهراء :- هو شنو يبقي يمه غير يرضع مني .

بعدنا نحجي طلع بيده نور فتح الباب نزله بحضني
وهو يهمس :- نزلي نتفاهم جوه واني اخذ حقج .

زهراء:- حقي من منو اني ما مقهورة من زوجتك
العزيزة هيام بكثر ما مقهورة منك انتَ
تهجمك ما أنسى افتهمت ما أنسى .

الغيهب:- بس اني ما ضربتج اجيت افتهم منج
ردت جواب وكلت اني عندي ثقة بيج بس ما عندي
ثقة بجلال وهذا حقي .

زهراء:- لا مو من حقج وهذا مو مبرر باجر
عكبه تكتلني بدفعة من دفعات الساق.........
انتَ مو أمان انتَ ما تستاهلني غيهب وآني أستحق
الـ أحسن منك .

حضنت نور والتفتت الهشام :- يلااا عفيييييييية خلي نروح منا
بعد اختنكت منهم ومليييييت .

فتح أمير الباب طلعت السيارة
هو طلع وصعد بالصدر عاط بي هشام:- وين صاعد أنزل غيهب
لا ارتكب بيك جريمة لا تخلي صوتي ينسمع بالشارع.

الغيهب:- سوق وانتَ ساكت روحـي بخشمي واني اذا تصير
روحـي بخشمي تعرف افقد بعد استرها علينا واطلع.

هشام:- تريد تكبرها اكثر وتتعارك ويا أبوها.

زهراء:- أبوية مو طفل ويتعارك وياه
هل مره اذا رفعت صوتك علية وداعت أبني
ما أسكت وتفرج ؏ الـ استهتار .

طلع هشام جكارة يريد يشرب
أول ما شغلها صاح بي :- ذبها مو زين ؏ نور نسيت شكالت الدكتورة .

هشام:- ليش يبقى عقل براسي من سوالفك مو زين نمشي بالشارع .

بقه هو وياه بس يتعاركون الطريق كلة
راسي صار طبل اول ما وكفت السيارة مقابيل
بيت ابوية فتحت الباب :- اوكفففييي اني انزلج .

زهراء:- لا تنزل ولا تدخل أبتعد من حياتي ولا تشوفني
وجهك مرة الثانية لا تخليني اسمعك كلام ما يسر لا عدو
ولا صديق واخليك عبره لكل شخص مثلك
وراح أبقى ُ عمري كلة أتحسب عليك هجمت حياتي
وكسرتني الله يك.... .

ما كدرت اكمل الكلمة سديت حلكي ونزلت
واني امسح بدموعي دك هشام الباب هسة
غير يبقى بالسيارة نزل وكف هو بالبداية
طلع ابوية سلم واخذ نور من أيدي :- يابا هلااا بنور وزهراء .

زهراء:- هلا بيك بابا .

اني بعدني وأكفه باوعلي بستغراب وهمس:- شبيج بابا ترجفين
احد وياج صاير شي .

هزيت راسي وإني أبلع عبرتي :- لا ما بيه شي بس بعدني
ما طبت زين ويجيني مغص بطني مرات .

باوع الغيهب ما مقتنع بكلامي :- شوف باوعلي اذا اشتم
انتِ نزلت دموعها وقاهرها ومخليها ترجف .

الغيهب:- اي شسوي .

لواء:- وحق من إنزل القران الكريم
شغلت أسبوع واحتمال أقل وبدون ما تحس
اخليها تخلعك بـ اقرب محكمة وادفع حالي ومالي واخلصها
منك تجي تسأل عليها اصدمك بالطلاق وبـزواجها من الـ يستحقها.

انبلع الغيهب وكوه يسحب بريكه
ضحك يضيع الفشله والصدمة
والخوف الـ ينقري الف بوجهه :- مو من الأصول ما تعزمني
اهلهل بالعرس هاي ام نور لازم انسوي الواجب وياها .

رحيم:- يعني صح كلامي انتَ مأذيها .

زهراء:- يابا ماكو هيج حجي فدوة كافي .

رحيم:- ما إطلع رحيم اذا ما اسويها بس تضوجها وتنزل ادموعها.

تقرب من ابوية وهو يغمز:- بذاك الوقت يطلع أسمك نجف تعرف النجف .

رحيم:- ادفنك بيها .

الغيهب:- اخ منك رحيم ما رحمة بحالي

سحبه هشام وهمس:- سنة الوالدة بعد يومين الـ هل سبب اجت
ام نور ترتاح يمكم مو زين عليها الهوسة .

رحيم:- اذا هيج خوش تفضلوا.

هشام:- لا تعذرنا مستعجلين غير مره ان شاء الله .

رحيم:- اروح أصيح ؏ حارس يدخل الجنط .

اخذت نور منه هو طلع بره استغليت الفرصة
وحجيت بسرعة :- ما اريد أكبر الموضوع وسديت السالفة
بس الك ايام قليلة اذا ما وصلتني ورقة طلاكي اخلي ابوبة
يدخل ويسوي الـ براسه وهاي اني حذرتك كدام اخوك .

الغيهب:- تزوجين غيري يعني تتقبليها .

زهراء:- كلشي أسوي وعيونك .

دخلت اني ونور هو بقه صافن موسع عيونه
التفتت يباوع الهشام :- سمعتها شتحجي وياي  .

هشام:- تستاهل يا طايح الحظ كون صدك تسويها
اذا ما اركص بعرسها بعنادك .

دخلت للبيت فارغ ما بي صوت
لحظات وفات الحارس
باوعلي وهمس:- وين تحبين أخلي الجنط .

زهراء:- خليهم هنا ما قصرت .

أبتسم بوجهي وهو يرد :- لا ولو تدللين .

نزلت راسي وهو طلع سمعته يحجي هو وابوية
الى ان دخل يضحك :- شلونج بابا زهوره.

زهراء:- الحمدلله زينة وانتوا .

رحيم:- بخير الحمدلله ، خليني أصيح عليهم ينزلون .

راح للدرج يصيح بـ أسمائهم طاير بينا
ومن نبرة صوته تبين الفرحة :- تعالوا ولكم اختكم هنا .

نزل سيف يطك أصبع:- هلاهل هلاهل الـ ام نور .

اقترب سلم وكعد يضحك
ويشاقيني الى ان نزلوا التوأم يكمزون
متفاجئين بنور شلون صغير .

أضحك وسولف بس راسي طبلة
ولو ما عيب اكلهم يسكتون ويخلوني وحدي :- لعد رجاء وين .

رحيم:- والله بابا بعد الدوام تطلع هي وايهاب يجهزون بيتهم شوية
شوية بين ما يكمل يزوجون ما يريدون يطولوها .

زهراء:- اي هم متعودين ؏ بعض ، وهم خطوه حلوة يستقرون
بيت وحدهم بعيد عن القال والقيل .

رحيم:- هو يعرف بيها ما تتحمل أحد يتأمر عليها
لو يسمعها كلمة لان ما تسكت أختصر الموضوع
واخذ بيت قريب ؏ كدهم حتى يبقى رأسه بارد .

زهراء:- زين ما يسون ربي يسهلها عليهم
ويبعد عنهم ڪُـل شر .

سيف:- تعالي صعدي ارتاحي فوك بين ما ترجع رجاء.

زهراء:- اي والله علوه أريد انوم نور.

صعدت گدامه هو صعد الجنط ورايه
سد الباب خليت نور ؏ جرباية وذبيت
ملابسي طلعت ملابس ثانية اله بدلت القديمات
رضعته شوية ونام بقيت أفتر بالغرفة راسي يريد
ينفجر الى ان دخلت رجاء اول ما شافتني
عرفتني جنت ابجي سدت الباب وهمست بخوف :- شبيج .

انفجرت ابجي بحضنها الى ان خلص حيلي
واني اسولف الها الصار كله من البداية للنهاية
تخبلت وبدل ما هي تهديني صرت اني اهدي بيها
حتى لا تطلع وتحجي الـ أبوية والمصيبة
صوت ايهاب جوه .

رجاء:- لج هذا للمره الثانيه يسويها ليش تسكتين ليششش .

زهراء:- ما اريد تكبر ابوس ايدج انوب تصير
عشائرية لو سجون ومحاكم كافي تعبت ومليت.

ضربت أيد بيد وصاحت :- والحل فهميني والحل .

زهراء:- اني هددته اذا ما يطلك بسرعة
انطي خبر الـ ابوية هو يتصرف وياه
وهو ابوية ما قصر بدون ما يعرف خوفه
حتى بعد ما عرف يحجي كدامة .

رجاء :- اذا ما طلك افجر بيتهم ؏ راسه .

زهراء:- شنو انعديتي من د١عش .

رجاء:- اصير اسوء من د١عش اذا ما ينعدل .

كعدت فحطانه بالشافعات اجر النفس
انطتني مي وهمست :- الله لا يوفقة اذا ما اطلع ڪُـل دمعه
وكعت من عينج دم تنزل من عينه هل ما يخاف الله
أنسى هل ايام وارتاحي تونسي ويانه شوية ولا تفكرين
الى ان انشوف شنو تاليتها.

زهراء:- هو هذا الراح يصير اريد ارتاح تعبت .

رجاء:- سهله عوفيها علية. 

حضنتني وكعدت عند نور تباوعله
عفتها ودخلت للحمام سبحت وبدلت
ملابسي وطلعت كعدنا سوه نسولف ؏
حفلتهم وبيتهم والأثاث ، فرحتها وطريقة
كلامها تنطيني طاقة امل بالحياة
تخليني اعرف الدنيا بعدها بخير
واكو فرح رغم ما حياتنا مو سعيدة
ورغم ما نعاني بعد الضيق فرج بقوة الله .

رجاء:- أمشي ننزل سوه ايهاب يريد يسلم عليج .

زهراء:- بس أخلي شال ؏ راسي .

لفيت شالي  ونزلت وياها
استقبلني بضحكة :- السلام عليكم ام نور .

زهراء :- وعليكم السلام ايهاب شلونك شخبارك .

ايهاب:- الحمدلله زين نور شلونه .

زهراء:- بخير ربي يسلمك .

ايهاب:- والغيهب .

ابتسمت بتصنع واني ارد :- يسلم عليك هواي .

ضحك ودار وجهه يكمل سالفته هو وابوية
رحت الرجاء بالمطبخ لكيتها تسوي جاي
صبت بسرعة ورحنه كعدنا يمهم .

دخل علينا اثير من الباب يصيح :- يكولون التؤام هناااا
لك عيني العبب .

اول ما دخل ابوية عاط بي :- شبيك تصيح طرشان .

اثير :- مقبولة منك عمي بكل الأحوال ما ترضى
علية احجي صوت ناصي عالي هي حظوظ منين
اجيب حظ ايهاب .

ايهاب:- من شيب الخلفوك يمتى عندي حظ وخطيبتي رجاء.

رجاء:- جنت بالمطبخ وتذكرت اليوم خميس .

ايهاب:- لا اليوم جمعة .

رجاء:- كلت خميس يعني خميس يابا طلكني .

ضحك ابوية وعافنا وطلع بره
اثير :- اسكت انتَ وياها خلوني اسلم ؏ زهوره
شلونج بنت العم شخبارج شنو هل جمال بعد الولادة.

ايهاب:- كون الغيهب يسمع يخليك قرد تزاكط ؏ بيوت .

رجاء:- لا تذكر أسمة هل ......

ايهاب:- يا ستار ليش شصاير .

زهراء:- ما صاير بس رجاء ما تحب الغيهب .

ايهاب:- اثير اريد جكاير وتعبان ما اريد اطلع روح جيبلي.

أثير:- كول اطلع لا تبقه تلف ودور صير صريح لو تخاف من رجاء.

ايهاب:- اي اخااااف كوووووم.

اثير:- حسبي الله عليج يا رجاء يا بنت رحيم لعبتي
لعب بالولد خليتي ما يعرف يتنفس بدون خوف .

كمل كلامه وطلع يمشي سريع :- وهسة شصاير .

زهراء:- صدك ما صاير شي .

رجاء:- ما بيني وبين ايهاب أسرار لا تخافين
ما يسوي شي انتِ ما تريدي ، ولازم يكون
عنده علم حتى اذا شخص فتح حلگه يفرك حلگه .

اكتفيت بالسكوت وهي تحجي بالسالفة كلها
ايهاب:- اني ما أدخل اذا ما تنطيني الكارت الأخضر.

زهراء:- ما أريد مشاكل .

ايهاب:- ومنو يكول أسوي مشاكل آني اريد
انطي درس بعمره ما ينسى واخلي يعرف
عرضنا طاهر مو مثل القذارة الـيعرفهن
اخلي يعرف الأصيلة شنو والرخيصة شنو .

زهراء:- ما أريد أبوية يسمع
أخاف ينفذ كلامة وصدك يجبرني ؏ زواج
مثل ما قبل راد يسويها .

ايهاب:- أخلي يجبرج ؏ زواج واني عايش
ازين شاربي اذا بيوم واحد يجبر بنت عمي
؏ شي يمعودة هي لعبة عايشين بغابة وما أدري.

زهراء:- يعني .

ايهاب:- اعتمدي علية وارتاحي بيت ابوج
ولا تفكرين ولا تعبين والباقي علية اني اخوج
بس تحتاجين شي يجيج لا تترددين ولا دوخين
كلشي يوصل الج وانتِ كاعدة.

زهراء:- كلتها زلمة معدل انتَ أشكرك من ڪُـل گلبي .

ايهاب:- ما سويت شي بعدني .

رجاء:- هسة شنو .

ايهاب:- هسة اروح انام.

رجاء:- ويين اليوم خميس .

ايهاب:- يوم الخميس استراحة الزلم .

رجاء:- وين أبوية يابا طلكني .

ايهاب:- ام حلك ام السان رشاشة
امري لله استسلم.

رجاء:- مجهزة الفلم عليك انتَ واثير وسيف الحبشكلات
مو بس انتَ تصرف هم  يصرفون تره ما خليهم ياكلون .

هز براسه وطلع اني صافنه عليهم
ونيتي ابد مو صافية :- أطرش بالزفة شكو ولج .

رجاء:- يا عيوني هاي يسموها سهرة يوم الخميس
أسيطر بيها ؏ النقيب ايهاب حتى لا يروح منا ولا مناك .

زهراء:- ولج ايهاب فقير يا منا ومناك .

رجاء:- وروح امي ماكو فقير غيرج
تره خير الزلم بي غلط ما يجي واحد كامل مكمل .

زهراء:- ايهاب شبي بالله .

رجاء:- شحجي ومنين أبدي شوفي أول ما ايهاب
اعترفلي بحبه اني رفضت ليش لان صاحب ونسى
هم الضباط اغلبيتهم هيج يوم الخميس يوم الملاهي
اول ما عرفت بي يروح تخبلت علية وما سكتت
لج بوقتها خطبوني وافقت هو شوية وينتحر
هددني وهدد ابوية وعمي اجه كتلني شلون توافقين
وابني راح يموت بسببج .

زهراء:- مو كلتي ابو ايهاب ما يحبج .

ايهاب:- من زمان ما يحبني بس من عرف ايهاب يحبني
رادني عوود عشتوو المهم من وافقت كال لو تبقين
أخر بنية بالعالم ما اخذج الـ ايهاب
راحت أيام استسلم ايهاب وكل التهديدات تبخرت
اجه يتوسل وحلف بغلاتي بعد ما يعيدها ويدخل ملهى .

ضحكت ؏ حركاتها وهي تطبك رجل ؏ رجل
وتعدل بحاجبها :- تالي يا عيوني آني أصلًا خطيبي
ما شفت وجهه غير مرتين وبهل مرتين اكعد مجبورة
ويا والتوأم انومهم بحضني ومن يسأل اكله شنو اطردهم
اخوتي هذولي ، الى آن فسخت الخطوبة
هي فكرة الزواج بكاملها رافضتها لليوم .

قوست حاجبي وهمست بستغراب:- لليوم شنو قصدج يعني
انتِ ما تحبين ايهاب.

جرت حسرة وهمست :- اذا اكلج ما احبه معناها أكذب
عليج اني أرفض الزواج والـ يصير بالزواج يعني
ما أتقبل رجال يلزمني تفتهميني .

زهراء:- عززا صدك تحجين وشلون اذا تزوجتي .

رجاء:- هو يعرف بهل حالة وكاعد يحاول يخليني أتخلص
منها اخذ جلسات عند دكتورة وهو هم يساعدني.

زهراء:- يساعدج ؟

رجاء:- مو البالج ولج ؏ طول فترة حبنا
هو ما بايسني غير مره وحده بس
وبهل مره صرت اذب من راسي
ومن يومها ما عادها ومحترم حالتي وصابر
بس ما اعرف الى متى يبقى صابر علية
وشلون تنحل بعد الزواج .

زهراء:- أكيد ما يكعد بس يباوع عليج مثل العندي
يكلي اني شبعت بعد ما أفكر بهل سوالف
لعد اني زمال انتَ شبعت اني شنو .

ضحكت بعلو صوته وهي ترد علية :- امداج ما تعرفين
تردين علية كليله ؏ شنو ماخذتك صورة جرجوبه
بس حلو واباوع عليك ما تشتغل
ولكم اشك اهدومي شنو ولك مو مرأة يمك حجر ماعندي
احساس مشاعر صخام انوب المصيبة تحبي .

زهراء:- اناني يفكر بس بنفسه وعلى اساس حلها
من ما يقترب وعود هو هذا حل مثالي بالنسبة اله .

رجاء:- اكلج هو اذا يريد يشوف حل السالفة سالفتين
والنبي حياتكم كلها مصايب وغلط من اساسها .

زهراء:- عوفج مني وفهميني انتَ شلون .

رجاء:- اني اذا يحبني يصبر علية
واني أتوكل ؏ ربي هو يساعدني .

زهراء:- ونعم من الله انمرد گلبي مرد
ليش ما مكتوبة النا الراحة.

رجاء:- أختبار من ربنا كولي الحمد لله ؏ ڪُـل حال
عسى ولعل بعد الضيق فرج .

زهراء:- الحمدلله.

رجاء:- كومي نجهز للسهرة اليوم صباحي ماكو نوم .

زهراء:- ولج اني تعبانة.

رجاء:- وداعتج من تشوفين السهرة
وجمعتنا بعد ما تعرفين معنى النوم
خليج ورايه ومعليج .

زهراء:- نشوف تاليتها وياج الخبله.

رجاء:- هههه اني وياج مميزين بس بهل
حاجتين ، انتِ قمة الهدوء ، واني قمة الخبال .

زهراء:- رحم الله امرئ عرف قدر نفسه .

دخلنا جهزنا انواع المقبلات
بقيت مصدومة:- ولج بس لا تشربون هاي سوالف سكارى.

رجاء:- كلشي يصير كملنا تعالي ويايه .

صعدت فوك شفت نور جوعان شبعان محتاج
شي لكيته بسابع نومه حبيب امه مثل الملاك
اتمنى أرجعه البطني حتى ما يتأذى ابد ، التفتت اباوع الرجاء
تسوي تنظيف البشرتها هجمت علية تريد تسويلي
ما قبلت كملت وسبحت لبست تراك جديد
وشعرها رفعته كعكة ليفوك لان كلش طويل
عكس شعري كد ما جنت أخلي قصير صرت
اكره هل كصه صرت اخلي يصير طويل
وصل بمستوى أكتافي .

خلت مكياج خفيف طلعت تجنن :- تدري اباوع
عليج وأشوف نفس وبداخلي صوت يكول
اذا تبدلين هيج تصيرين لان من تزوجت
بس اول كم يوم رتبت نفسي
وصارت المشاكل ما تعوفني نسيت
نفسي ومن ذاك اليوم الـ هذا اليوم
ما رتبت نفسي غير كم مره وجنت مجبورة .

رجاء:- يعني ڪُـل ذيج الفترة ما تعدلين نفسج بليل .

زهراء:- ليش اني اعرف نهاري من ليلي
لج حتى ما أتذكر لبست سيت نوم اله
لان ما جنت احز تحركاته ابقى بدشداشتي
في سبيل ما افشل نفسي اني دفنت نفسي وسنة
كاملة من شبابي ؏ شنو .

رجاء:- ويريدج تستمرين تدفنين نفسج
لا تبدلين لا تهتمين بنفسج ، لان هو وأصل
مرحلة من دشداشة فقد اذا تلبسين سيت نوم
لاااااااا أحسب نفسك ميت .

زهراء:- بالفتحة الخامسة.

رجاء:- امشي هذولي اجوي وبعد تسدين
موضوعه ما اريد تفكرين بي .

هزيت راسي ونزلت وياها
لكيت ميز الطعام عبارة عن علاليك
طبطبت ؏ ظهره وصاحت:- كفو من ابو بيتي هاي إبدال
ما تشمر فلوسك ؏ منكر هنا ذبهن ؏ كرش مرتك .

باوعلها بمكر وهمس:- ابد ما تفضحين .

رجاء:- اعيش واشهرك وافضحك حبيبي ايهابو الوردة.

ايهاب:- رايح للبيت اسبح وابدل
واجي جهزي فلم رعب اذا اطلعين
دراما ورومانسي بالكرك ؏ راسج وراس الخلفوني .

رجاء:- هو شنو هذا الرومانسي ابن عم ابن خال
دروح بابا روح سوالفك تبع كفار .

عافنا وطلع طلعنا اكل عشيرة
دجاجة وبيتزا وكباب وكنتاكي :- ولج شنو مجاعة خوما مجاعة
منو ياكل ڪُـل هذا .

رجاء:- لج بابا نسهر للصبح نحتاج أكل
لآن انشوف فلمين مو فلم واحد نسلس بيهن ذني .

فتحت باب غرفه بيها تلفزيون بلازما
بعرض الحايط وداير ما داير الغرفة
ديوان ومخاديد كبار :- زهوره هنا نرتب الاكل
مقابيل التلفزيون حتى ناكل ونباوع .

هزيت براسي وبديت اساعدها خلينه الاكل
كله وطلعت صار بوجهي سيف واثير
بيد اثير باكيت جبير :-هذا كيك بمناسبة ولادة بنت العم .

زهراء:- عذبت نفسك .

اثير:- تدللين.

اخذتها منه فتحتها بالمطبخ
مكتوب عليها ام نور الغالية عدلنا
كلشي ورجاء استلمت الكعده صور
ما بقت شي ما صورته
وصارت بزاوية المطبخ مدري شسوي .

رجع ايهاب شغلنا فلم أكشن مغامرة
وكعدنا كلنا انباوع وناكل مندمجين
وكل شوية أصعد فوك أشوف
نور وأرجع أنزل أثير واخو ليث
سوالفهم ما تنمل ، وسيف الهاديء
يشبه شخصيتي ڪُـل شويه شايل
اكل ومخلي كبالي :- اكلي زين ضعفانه وجهج أصفر.

زهراء:- انتَ هم ضعفان .

سيف:- من الامتحانات فترة ونرجع للقاعة.

زهراء:- عسى ربي يسهلها عليكم وما يضيع تعبكم .

ما خلصنا غير من صارت الساعة
أربعه الصبح اباوع ؏ اكل كله خلص
ضحكت وأني اسمع صوت نور :- اني لهنا وخلص شحني
كعدتكم ما تنمل بس لازم أنام تصبحون ؏ خير .

رجاء:- ارتاحي حبيبتي اني ارتب المكان وهم أصعد انام
وانتوا يلاا كلمن يرجع البيت اهله نريد انام خلصت فلوسكم
عزلنااااا .

ايهاب:- بكيفكم تعزلون وتفتحون.

اثير:- صوج الزلم صايرين وصل بيد نسوانهم .

ليث:- عود سد حلكك .

ايهاب:- عوفه يريدني أمسح بي الشارع قبل لا انام. 

اثير:- أمي ما تسمحلك عزيزي
أكوم اروح احسن ابقى كاعد انتِ
وهاي السحارة.

كمز من مكانه للشارع
عفتهم وصعدت خليت راسي بصف
راس نور ونمت بعد يوم صعب مرهق بكل ما تعني الكلمة
رجعت اخلي راسي ؏ مخدة وحياتي مبهذله.

مرت يومين وبيوم اربعين عمتي
ابوية بدل وقرر يروح الخاطر
عمي لان هو حيل يحبه ويحترمة
اخذ ايهاب ورجاء وبيبيتي وطلعوا

بقيت وحدي بالبيت شوية اصعد
وشوية انزل العب بتلفوني
لو ارتب اغراض نور ما تأخروا
اقل الساعتين ورجعوا رجاء تضحك
كعدت وياها اريد اعرف شبيها
كوه افتهم منها :- لج شافني عباله انتِ جيتي
وكف كدامي تالي عرفني من الخزره
امداج زهراء ما معلمته ؏ خزر .

زهراء:- وتالي .

رجاء:- طلعوا للنجف كلهم .

زهراء:- وهيام.

رجاء:- ماكو ما شفتها بس ملاك سألت عليج
كتلها بخير ، وهاجر هم تسلم عليج هي وسجى .

زهراء:- الله يسلمهم .

رجاء:- صاعدة ابدل سوي جاي البابا فدوة .

- من عيوني .

صعدت واني وديت جاي الـ ابوية
كعدت وياه سولف عن عمي وحالته
وذب الصدمة:- من كلام عمج عرفت بيناتكم مشكلة وتأكدت شكوكي

زهراء:- متوهم صدكني .

رحيم:- ايهاب ليش هدد الغيهب اذا ماكو مشكلة.

زهراء:- شنو منو .

رحيم:- ايهاب طلع هو والغيهب يهدد بي بره
من شافوني سكتوا شوية ويصيرون قنبله وينفجرون.

بلعت ريكي برتباك وهمست:- ما أعرف أحتمال
بينهم مشكلة بس ما تخصني .

رحيم :- متأكد بينكم مشكلة بس منتظر انتِ تجين وتحجيلي كلشي .

غيرت الموضوع وكفت بسرعة :- اروح اشوف نور .

هز راسه عفته وصعدت فوك احجي الرجاء :- خابري ايهاب
شوفي شصار بيناتهم .

رجاء:- والله سألته كال انتِ وزهراء أبقوا بعيدين عن الموضوع .

زهراء:- يمه الفضول اموت اذا ما اعرف.

رجاء:- شغلي نفسج حتى تنسين لا تبقين تفكرين بي بابا .

زهراء:- غصب عني أفكر مو بيدي .

رجاء:- بمرور الوقت كلشي يتغير .

ومن هل يوم صار يوم يجر يوم ومرات الأيام
بهل فترة مصروفي ومصروف نور اسبوعي
يوصلني عن طريق هشام من يسأل ابوية
يجاوبه هشام :- الغيهب مسافر علمود عملية ابوية .

هل عذر يسكت ابوية بس مو دائمًا
وبعد غياب فترة طويلة اندك
باب بيتنا راح ابوية فتح الباب
دخل هو وهاجر وأطفالها
حضنتني بكل قوتها تبوس بوجهي :- شكد مشتاقتلج يا حقيره
هاي عود اني اعتبرج اختي شيصير لو تخابرين .

همست بصوت خافت ما اريد ابوية يسمع :- من اجيت غلقت
الجهاز ما اريد اسمع ولا اشوف شي من عنده .

هاجر:- حقج والله حقج .

اخذتها يمي فوك خلت نور بحضنها وكعدت اطك
صورة اله من ڪُـل الجهات وبعد ما خلصت
منه رفعت التلفون علية تاخذلي صور
وهمست :- من ذاتي اطكلج أصلًا
الغيهب ما حلفني اطكلج صورة وهو ابد ما مشتاقلج
وابد ما يذكرج اصلا مرتاح بغيابج  وابد ما مهتم لفراقج 
وعبالج ينام بالسيارة لا عيني ينام فوك
وما يفز يوميه يبجي ؏ نور والعكس صحيح .

زهراء:- اي صح والدليل ڪُـل يوم يسأل ؏ ابنة .

ذبت التلفون وهي ترد علية :- يريد تستقر اعصابج حتى يحجي
وياج ، الغيهب يحبج زهراء والقران يحبج .

زهراء:- بس اني أدركت الحب مو كلشي
ومو هو اساس العلاقات أمور هواي اهم منه
لازم تنبني عليها الحياة وكل هل امور اني والغيهب نفتقدها .

هاجر:- يعني شنو افتهم من كلامج زهراء.

زهراء:- كلش وأضح جوابي طريقنا خلص
وما مصلح البعض .

هاجر:- بعد ما حبج وصار بيناتكم طفل
تريدين تموتي انتِ.

زهراء:- لعد يموتني أحسن .

هاجر:- چان لازم تفكرين هيج من البداية
قبل ما تخلي بحبج ويصير بينكم نور
خليتي يتمسك بحبل وتريدين تكطعين حبل النجاة
ويرجع يوكع ؏ راسه حرام عليج والقران حرام.

زهراء:- وشبيدي انتِ مو انفصلتي عن زوجج لان خانج
هو خاني وزوج علية وتالي ما تالي يصدكها
ويطعنوني يتهموني بشرفي .

هاجر:- وانتِ عندج علم بيهن كلهن وبقيتي
وياه ولزمتي ايده الى ان ولدتي
وخليتي يتعلق بنور لج ليل مع نهار بحضنه
هسة صارت عادي تعوفي
معناها هذا انتقام منج .

زهراء:- شبيج هاجر .

هاجر:- احجي الحقيقية لو صارت مكروها
وما تنرغب تريدون بس نمشي ؏ نمطكم .

سحبت أطفالها وطلعت بقمة غضبها
امشي وراها اريدها بس توكف
حتى احجي وياها قفلت ابوية انصدم منها
ولا اهتمت ركبت سيارتها وراحت .

الثاني يوم توني طلعت من الحمام
اجاني سيف :- اجه الغيهب يشوفج وطلب
يحجي وياج وحدج صعدته فوك .

توني أريد استوعب كلامه وما أشوف
غير الغيهب صعد ؏ درج متوجهه
للغرفة عافنا  سيف ونزل تراجعت للخلف
دخل هو وسد الباب رفع حاجبه
ورجع أيده خلف ظهره:- وأضح مرتاحة بدوني
سهر ليالي ، وأفلام ، وكيك وام نور الغالية
غيهب بيش الكيلو ...

يتبع ...

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد

بنص اعماق قلبي 🥺🫂🤍