رواية ظلمات الغيهب الفصل الخامس وأربعون 45 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _42_

تراجع عن قرارك خل نرد طيور
ويرد ساعي البريد يجيب ويودي
فراكك مو سهل حتى أكدر أنـه انساك
ولا أزمه وكولن تگضي وتعدي
أنـه شايب من التعب  ، بس بالاسم شاب
ولا اشبه أقراني  ، ولاني البگدي 
واجيب انتَ ، ورجعت وياك يم صباي
يما جنك بشر ، جنك حلم وردي ...
.......................
زهراء...

اقل النص ساعة وصل دخل وكل عادة صعدنا فوك
حتى ناخذ مساحتنا بالكلام
وأول ما نطق همس :- اني قررت
نـتفق ؏ نقطة اثنين تلاثه .

زهراء:- أسمع.

الغيهب:-بهل فترة هواي أمور صارت بطلب مني
انطيتج وعد ما ترجعين ؏ خراب اجهزلج
مملكة خاصة بيج وحدج .

شلت نور بحضني وهمست بستغراب:- ما فهمت.

الغيهب:- البيت الـ اشتريته الهيام انباع .

قبل لا انام مستشفى بكم يوم كعدنا كلنا
نريد حل الكل مشاكلنا أبوية قرر ..

ابو الغيهب:- ما أريد احجي اخاف تكولون أبونا طردنا
بس المصلحتكم احجيها الله شاهد علية
بابا إنتوا كبرتوا جهالكم صاروا إكبار لازم تكونون نفسكم
الى متى عايشين بغرفة وحدة انتوا وياهم .

هشام:- گلبي ما ينطيني اعوفكم واطلع .

ابو الغيهب:- اني اليوم احجيها يابا طلعوا شوفوا
حياتكم الله مكنكم وعدكم رواتب وفلوس
اعتمدوا ؏ نفسكم .

اسمعوني واحد واحد بابا هشام انطيك حقك بالبيت
وعندك فلوس فلس ؏ فلس اشتري بيت
انتَ وعائلتك وارتاح.

وانتِ بابا هاجر قبل فترة مو اجيتي وكلتي
أريد اعيش بيت قريب من بيتكم وحدي اني
وأطفالي اني موافق عندج فلوس بـ حسابج
وانطيج حقج وعيشي بسلام وراحة حتى
من اموت ما تكولين ابوية وكف بوجهه راحتي
واني ما اريد تعيشين وياج مرت اخ باجر عكبه
تتعارك وياه اخوج ليش اختك يمي خلي الج وطن .

هاجر :- عمرك طويل يابا يومي قبل يومك يا نظر عيني.

ابو الغيهب:- كلنا ؏ هل طريق ابوية اريد اذا بيوم
عيوني غمضت مأمن عليكم كلكم واحد واحد .

وانتَ بابا أمير مثل ما أتفقنا قبل يومين
اريد تلم جهالك تره تعبوا اكثر منك ومن امهم
وحتى لو مرتك مو زينة بس ماكو مثل الام
خوف وحنان واحتواء رجعها بشروطك .

امير:- اجتني البارحة للدوام اضطريت
اطلع وياها وسولفت بالسيارة

كلتلها رغم اعرف باطنج قذر ومو نظيف
بس الخاطر اطفالي ارجعج بس تبطل من الدوام
وبيت أخوها تنسى وبيتكم ما توصل اله
واذا بدر منها حرف غلط تطلك بنفس الثانية.

الغيهب:- لو ما ترجعها وتزوج وحده احسن منها .

ابو الغيهب:- ومنو يكول الـ ياخذها ما يتعذب
وياها اضعاف عذابه هو وفرح
وتروح تأذي الجهال يرجع آم جهاله ويسوي عليها
انضباط الى ان تنعدل يبطل فهاوه وتسهيل امور
غير نفسك وشد روحك افرض كلمتك بابا
هذا هشام نرجس ما تعرف ترفع صوتها كدامه
والغيهب انتَ اعلم بي بعد ماكو داعي احجي .

امير:- هل مره غير عن كل مره وداعتك
عرفت شلون اتصرف وياها واطلع مصايبها
من عيونها وروح الغالية لو ما اطفالي ما اشوفها
بعيوني كارها وكاره اسمها وجههه ..

هشام :- ميخالف أمير كول يا الله
لتسهيل امرك الخاطر عصافيرك كلشي سوي
لا تعذبهم خطيه واني يمك كلشي تحتاجه ما اعوفك بس اشر بيدك .

اي يابا والغيهب ما حجيت بي نسيته ؟

ابو الغيهب:- ههه وهل من المعقول الغيهب ينسي
هذا البيت يبقى للغيهب لان اعرف ما يطلع منه
وهو يستحق بيت العائلة اكثر واحد تعذب بيكم
وصار الوقت يستقر بعد ما ثبت ؏ شريكة
حياته وحبها وصار عنده نور حياته
لازم يحارب حتى يحافظ عليهم قبل لا
يضيعون من ايده ويكعد يعض اصابعه ندم

امير:- ومن وين تجيب ڪُـل هل مبالغ حقي وحق هاجر وهشام .

ابو الغيهب:- امكم الله يرحمها أصيلة حتى لا تلوموني
ليش احبها وابجي عليها ڪُـل ما أستلم راتب تضم 100
الف من توفت قبل فترة فتحت الخزنة ونصدمت بمبلغ
كلشششش مو قليل ، اخذت ربع منه ، انطيكم
حقكم واحد واحد واخلص اشتري راحة بالي

اما غيهب هذا البيت حقك ومن باجر يتسجل بـ اسمك
وفلوس البيت وفي ديونك وأخذ سيارة تفيدك ما تكدر بدونها ادري بيك
والباقي اخذ زوجتك وسافر بي ابدي خطوة جديدة قبل لا تخسر كلشي
تلاحك الروحك ابوية اريدك الخير بعد هل عذاب
بس عندي طلب واحد منك .

الغيهب:- كول يابا اذا أكدر يتنفذ اليوم قبل باجر .

ابو الغيهب:- تسمحلي اعيش يمك هنا بيت العائلة
الى ان الله يآخذ أمانته .

هشام:- عمرك طويل شبيك اليوم تحجي بالموت
البيت بيتك احطك بعيوني وتاج ؏ راسي .

هشام :- إني الجبير ليش ما تعيش يمي
ما اقصر وياك لا اني ولا سجى .

ابو الغيهب :- السبب اختياري الغيهب لان
اني احب بنتي زهراء هي تفهمني عدها
طيبة وحنان متربية صح تخاف الله
ولا صغرًا بنسوانكم بس انتوا تعرفون زوجة
أخوكم وتعرفون قصدي وزوجتك عدها دوام بابا هنا
أبقى بيتي احسن ما اكدر اطلع من ذكرياتي الحلوة .

هاجر:- وهم تبقه قريب علية وكل يوم اجي اشوفك .

الغيهب:- يابا البيت بيتك انتِ تبقه وأني إطلع
بس عندي ملاحظة بعد ما تكعد اذا يطلبون منك
مساعدة عوف دور الملاك ابو جناحات وخليني اطردهم
بطريقتي الخاصة ما اريد يرجع البيت ملجأ.

ابو الغيهب:- اني اكعد بغرفتي صوتي ما ينسمع
أختي اذا أجت ما استقبلها اني بعد تعبت وجال صحتي
؏ كدي ما بيه حيل مشاكل  ، الساحة الك كعد الكحبـ ..... البداخلك ابوية .

هاجر:- بابا وجلال ؟

ابو الغيهب:- جلال تنازل عن حقه للغيهب
لان عنده بيت بـ أسمة ما يحتاج معتمد
؏ نفسة ومستقر من زمان بيت وسيارة وظيفة راتب المهندس مو شوية .

هاجر:- بقت ملاك ومن زمان تنازلت وهي مو بحاجة
بس انشوف بيوت ونستقر كلمن بيت ونخلص .

الغيهب:- بعد ما تكملون أرتب البيت
وأغير كلشي حتى ارجع زوجتي وابني .

ابو الغيهب:- التسهيل من الله ربي يفتحها
بوجهكم وينور طريقكم يابا تعبتوا كلكم
وان شاء الله بعد هل تعب راحة وإستقرار لا يزول  .

.........
زهراء:- يعني كلهم راح يشيلون وتفترقون.

الغيهب:- هاجر أشترت بيت بصف بيتنا 100 متر
وبدت تأثث بي ؏ ذوقها وبراحتها .

هشام شاف مشتمل والبارحة كمل عقد البيت وصار بـ أسمه
هل كم يوم يبدي يأثث هو وزوجته.

وأمير رجعت فرح ؏ ذمته قبل كم يوم
شرعًا وقانونًا بلا حاضر وغايب .

زهراء:- ووافقت تبطل من شغلها ؟

الغيهب:- اي وافقت وبعدهم يدورون ؏ بيت
هل كم يوم ان شاء الله يشوفون ويستقرون.

رفعت شعري وهمست :- لعد ليش تخربطت ؟

الغيهب:- مو مهم المهم هسة بقيت بس اني وياج ما مستقرين
طلاق طلكت وبعدتها هسة هي بغير محافظة لا اشوفها
ولا تشوفني ، طلبتي تخلصين من هوسة اهلي وكلت
تم وهاي البيت صار بـ أسمي ، بعد شنو التريدي مني
اني جاهز بس رجعي لان تعبت ومليت وما املك ذرة صبر
أقاوم بيها .

زهراء:- وحالتك عصبيتك المفاجئة غضب ؏ كلشي .

الغيهب:- اني رجال أصير عصبي من يصير
غلط ، من أشرف تصرف ما يعجبني
وانتِ تعرفين شلون تتحكمين بغضبي
ماعندي شي وياج اذا جنت قبل اعصب
لان ما اطيقج اليوم اني أشتريج بروحي
وكل شوية اكول التريدي يتم بدون تفكير .

بخصوص حالتي كزوج وزوجه اني وياج نسافر التركيا
نكعد اني وياج ونحجي للدكتورة وهي عدها الكل مشكلة
حل ماكو شي صعب اذا أنتِ ويايه .

بعد طلبي كولي اني جاهز
بخصوص دراستج اني انطيتج وعد
وخططت بس يصير نور عمره سنة
اقدم الج ؏ ثالث وأكون وياج لحظة بـ لحظة
الى ان توصلين وتحققين حلمج .

وداعت نور اكون الج سند اهل ام اب صديق
واريد منج تكونين زوجتي حبيبتي صديقتي
وام بحنانج لا تعوفيني بعد ما حبيتج
حاولت أعيش بعيد عنج الفترة الفاتت
عاندت حاربت قلبي ونهاية العناد
إنتهى بالمستشفى جنت بين الحياة والموت
بسبب حبج شكد جنت اكول غيهب لا تعترف
غيهب اسكت لا تنطقها بس انطقها تبتعدين
وتذليني وفعلا هذا الصار .

زهراء:- ابد ما ابتعدت حتى انتقم او اخليك تنذل
ابتعدت حتى أطالب بحقي المسلوب من اول زواجنا
طالبت بالاستقرار ، طالبت بيك بزوجي يكون ألي وحدي
وتحقق بيومين بدل ما انتظر سنة احرك بنفسي
جنت اعرف انتَ تكدر تحلها بس متساهل عمدًا
طالبت بحالتك لان اريد اعيش طبيعي مع زوج طبيعي
يحبني ، يحترمني ، يشاركني احداث حياته
ما طالب غير بحقي غيهب لا تكلي انذليت
لان اني ذليت نفسي إضعاف
ولا تكلي إنتقام حضرتك انتقمت مني ؏ اغلاط غيري
ما اريد أفتح دفاتر قديمة ومن حُـبي الك وحتى
احافظ ؏ حُـبي وعلى ابني ارجع وياك بس
وداعت عيون امي وداعت ابني يا غيهب غلط
واحد منك بعد اهدم كلشي واهدمك وفعلا
هنا استغل حبك واخليك حطام مثل ما سويتني
حطام وبعمري ما أتساهل وياك بعد .

الغيهب:- وعد وداعت عيونج وغلاتج وغلات
نور الصار بحياتي دروس خلتني أصحى
وأحسب حساب مو خطواتي لا أحسب
حساب الحرف الـ انطق بي وياج
ما اخليج تندمين ؏ هل فرصة وهل مره اعوضج
عم ڪُـل ادموعج النزلت بسببي بيوم .

اقترب مني سحبني من ايدي طوق وجهي بيده
وهمس :- اخليج تاج ؏ راسي ولج ڪُـل الحب والاحترام والتقدير
انتِ مرتي وام بيتي وام ابني نور عيني وحبيبتي .

زهراء:- وانتَ ابو بيتي وابو ابني ما اخليك
تندم بيوم ؏ حُـبي وبعمري ما اهز ثقتك بيه
اكون زوجتك وسندك اليوم وكل يوم . 

الغيهب:- ونعم ما اختاريت متأكدة
منج أصيلة يا عزيزة قلبي سعادتي يمج
من اليوم انتِ بلادي وموطني .

نزل اخذ شفايفي بين شفايفه
فصلنا عن العالم لدقايق طويلة
طفرنا ؏ صوت نور وهو يبجي
أبتعد بسرعة مسح وجهه بيده
وهمس :- شوكت نسافر.

غطيت نفسي بشال ورضعت نور
وأني أرد علية :- هل اسبوعين ما أكدر أسافر أبد.

الغيهب:- ليش والقرآن بعد ما أتحمل فراكم تعبت
لا اكل با شرب با نوم اشتاقيت ادخل الغرفتي
واستنشق عطر النظافة شكد شفت عالم تنظف
بس ما يعجبني غير نظافتج وعطرج الـ يترس غرفتي
وملابسي .

زهراء:- كلها سهلة بس ارجع ما يمر يوم اذا مو كلشي
تحبه عندك وغلات عيونك عندي
بس باجر السنة مال امي واتفقنا اني ورجاء نسويها
بيتها من الصبح نروح هناك جهزنا كلشي بس انظف
ونطبخ من أخلص هم ما أكدر ارجع كول ليش .

صفك بيده وصاح :- حتى تشلعين گلبي .

ضحكت بصوت عالي ؏ وجهه
وملامحه نعقجت :- لا مو وراها بـ سبع ايام عرس رجاء
تريد اعوف اختي وحدها بهل يوم .

الغيهب:- لا شلون بووووويياااي عوفي رجلج
ميصير تعوفين اختج .

زهراء:- زوجي موجود قابل راح يطير
بس اختي يوم من العمر هذا عدها لازم أكون حاضرة.

الغيهب:- يلااا بقت ؏ هاي نتحمل والله يساعدني
بس تخلصين بوجهنا التركيا .

زهراء:- ان شاء الله بس أخلص نسافر .

الغيهب:- أمشي اريد مي يبستي حلكي .

اخذت عصير من الثلاجة شرب منه
وجر نفس همست بفضول وإني أشوف
ملامح وجهه شلون تعبانه:- ليش تخربطت هم كلبك وجعك .

الغيهب:- لالا هل مره مو گلبي .

زهراء:- يا عبالي بسبب كلبك .

الغيهب:- أرتفع الضغط وإني أصلًا لا اكل ولا شرب
جنت مقابيل القاضي عندي قضية احجي وياه والدنيا
تفتر بيه مثل الدولاب قبل لا اخلص غوشت عيني وكعدت ؏
تخم وبعد ما حسيت جايبين إسعاف نقلوني للمستشفى
وما صحيت بس الحمدلله عدت ، هااا انتبهي دايخ وتخربطت
ووصلت للموت بس نجحت بالقضية .

زهراء:- شاطر بهل سوالف ، ماتشوف شر هذا
بسبب التعب والإرهاق اليومي .

الغيهب:- بسببج انتِ عايفتني وأني بعز حاجتج .

زهراء:- من ايدك ومن مصايبك لو تصير زين
ويايه هم اعوفك لا والله بعيوني اخليك بس انتَ ما تنجرع
توكف بالبلعوم وشايله هم شلون أرجع.

وكف ؏ حيله وصاح :- أروح احسن ومن تكملين
السنة وعرس اختج اخليج تشوفين وجهي ونحجي
بهل سوالف عند الدكتورة ما اريد تتعاركين ويايه
هسة وتكبر الأمور.

زهراء:- منين أبدي للدكتورة وشكول هواي لا وحده ولا اثنين .

الغيهب:- هاي بالذات عوفيها للدكتورة تسحب الطاقة
الـ بداخلج بالكامل ترجعج وكأن هسة مولودة.

زهراء:- نروح ونشوف .

الغيهب:- باجر الصبح اجي اخذكم البيت امج .

زهراء:- ما يحتاج إيهاب يوصلنا انتَ لا تطلع
من البيت أرتاح حتى من نسافر تكون صحتك مستقرة.

الغيهب:- وصلت تريديني بصحة جيدة حتى تستفادين مني .

فتحت الباب واني افتهم معنى كلامة عطت :- دروح غيهب
خلصني من السانك السان دلالة .

الغيهب:- كشفتج بعد ام الحلوين ناقص بعد تكولين
لان من نسافر اطالب بحقي الشرعي .

زهراء:- ما اكولها عيوني عجبتني حالة الأخوان العشتها وياك
وبهاي حالتك بعد انتهت كلش روحك كوه شايلها.

تغيرت ملامحه صك ؏ اسنانه
ولزم ايدي دفعني للغرفة طبكني
؏ حايط وطبك الباب بقوة ومن الضحكة
تحولت الرجفة:- اخ غيهب أيدي مو قصدي والله جنت اشاقة وياك .

لزم وجهي بكل قوة حسيت انمرد بيده
صارت عيني بعينه اباوعله وعظامي
ترجف من اشوفه يضغط ؏
مخارج الحروف بكل قسوة :- الأخوة الـ تحجين عنها اني سويتها
بـ إرادتي في سبيل ما تتأذين بيدي وأله أكدر اخذج هسة بس ما أضمن
حالتج بعدها واحتمال تموتين جوة أيدي لان ما متعودة عليه
ولإن احبج وأخاف عليج محارب نفسي واحتياجاتي كرجل
وما أتقرب تجين حضرت جنابج تستهبلين براسي .

نزلت أيده من وجهي وآني أهمس:- ما أقصد بس ....

إبتعد عني وهو يعدل الملابس :- ما صار شي
هذا الكلام يطلع نتحاسب علية بعدين .

طلع بدون ما يسمع كلمة ثانية مني
نزلت ركض وره ما وكف أبد سديت
الباب ورجعت للبيت أغسل النور وابدل
واني تفكيري مشغول ما قصدت اضوجه
المصيبة هو حسبها تقليل منه ومن دوره
كرجل يا مصيبتي شكد عيب .

بقيت أكل بروحي الى ان رجعت رجاء
شافتني أفتر داير ما داير نفسي واكل بـ اظافري
كعدت ؏ جرباية وهي تباوعي بغرابة :- ها شصخمتي الفاهية .

كعدت كبالها حجيتلها ڪُـل كلامنه
طكتها ضحكه بعلو صوتها:- يا ولج صوتج نور نايم
شنو هاي الضحكة تبع مشبوهات .

رجاء:- بردتي گلبي بي حل خلي يحس
حتى يصحح نفسه لا يستغل الوضع بحجة هاا
مو افقد وهل سوالف الطايح حظها عدل نفسك
هل حاجة لازم تكون بين ڪُـل اثنين متزوجين
هي مكمل للحياة الزوجية يجي هو يخرب
لحظاتها ليششش .

زهراء:- رجاء والنبي كلامه صح
هو مو بيده الموضوع خارج عن أرادته لان اني شفت بعيوني.

رجاء:- اي من تروحون للدكتورة افتهمي منها
متأكدة اكو حل للموضوع خوما تعيشون هيج طول حياتكم
بعدين هو يكول احتياجاتي كرجل صخام كليلة واني
ما عندي احتياجاتي كزوجة ، انتَ مانع نفسك
وعلى أساس مسوي معجزة براسي ما مفكر بيج .

زهراء:- ادري بي يفكر بالموضوع من ڪُـل جوانبه
بس هو متردد يخطي خطوه وحده يخاف من عواقبه
اووووو شكد اكره هل موضوع صرت سدي هل
سالفة الغبيه الى ان أروح للدكتورة وأشوف حل
ابقي هنا عند نور رايحة احجي البابا .

هزت براسها عفتها ونزلت جوه
دورت بالبيت ماكو طلعت بالحديقة
لكيته يخابر وكاعد ؏ كرسي مقابيلة
كلاص جاي من شافني غلق المكالمة وهمس:- هلو بابا .

ارتبكت وإني اتذكر الموقف:- صار شكد كاعد هنا .

رحيم:- قبل لا يطل غيهب عصبي
ردت أوجه سؤال الج عن السبب
بس شفت انتِ مبعدتني عن الموضوع وما حاسبتلي حساب .

زهراء:- لا والله بس اني ما احب يكبر الموضوع
انتَ تضررت هواي مني ومن الغيهب ما احب تتأذه
اكثر من قبل وكتفيت أبقى بيت ابوية ويكفيني كونك موجود
واحتمي بـ أسمك وارفع راسي بيك .

رحيم:- ليش غيهب طلع عصبي
يمشي ويكفخ بالحياطين حتى ما يشوف كدامه.

بلعت ريكي بخجل حرت
شلون أشرح الموضوع :- دك التلفون واحد محامي وياه
مسوي حادث ، المهم هسة هو اجاني حتى يفهمني
اخر ما توصل اله .

كعدت احجي عن ڪُـل الاحداث بترتيب
ومثل ما شرحها الغيهب اقتنع نوعًا ما
وختمها:- مهما يكون قرارج ما اوكف بطريقج
تريدين تبقين او تنفصلين ما أعارض اهم شي عندي
يصونج ويحافظ عليج لان اذا بيوم بدر منه تصرف
مو حلو أعدم وجههه بدون رحمة.

زهراء:- ان شاء الله هاي أخر مشكلة عندي أحساس بداخلي
يكلي بعد ما نسافر نستقر .

رحيم:- اني رجال وهو رجال كبر بعيني لان
حارب وطشر أهلة في سبيل يحافظ ؏ زوجته وأبنه
سوه الماكدرت اسوي بيوم واحافظ عليكم
انتِ وامج واختج ، بعد هاي تصرفاته ثبت حبه
مو بس كلام طلع گول وفعل .

زهراء:- ڪُـل مكتوب يصير برضانا او غصب
عنه ولازم نعرف مو ڪُـل شي نتمناه يصير
أحيانًا ننجبر ؏ واقع ما نرغبه وما تخيلنا
الـ هل درجة صعب بس رغم احنه مجبورين
لازم نخلي ببالنا نكدر نغير الواقع بـ إصرارنا
وقوتنا وثقتنا بنفسنا وبالله سبحانه وتعالى.

أبتسم ابوية وسحبني الحضنه وهو يهمس:- بارك الله
بيج انا اشهد انج قوية كدرتي تغيرين هواي بـ انسان
مثل الغيهب صعب وعصبي تذكريني بوعي امج ونفس كلامهم
ونعم التربية الله يرحمها وأضح تعبت عليج
ربي يكتبلج الـ بي خير الج بابا .

زهراء:- أمين يارب .

رحيم:- جهزتوا كلشي .

زهراء:- اي كلشي كامل .

رحيم:- اليوم واني راجع من الدوام عزموني
؏ مطعم اني ولواء ثاني من دخلت شفت
اخت الغيهب هاجر اسمها مو ؟

زهراء:- اي صح هاجر شبيها .

رحيم:- لا مابيها شي بس شفتها هي وصديقتها كاعدات
ومن كمت صارت مقابيلي وكفت سلمت عليها .

زهراء:- اي وهي ردت السلام .

رحيم:- اي إي وكفت وردت السلام وتصافحت اني وياها
وأضح عليها أمرأة قوية الشخصية وعقلها كبير واعية
انتِ سبق وكلتي هي منفصلة عن زوجها أتذكر مو؟

نزلت راسي وفريت حلكي وسرعان
ما رفعته ورديت :- انفصلت صح .

رحيم:- وما أرتبطت بعد .

زهراء:- لا وما أعتقد تفكر بـ هل أحتمال
وشالت فكرة الارتباط من راسها بعد الصار بيها .

رحيم:- تقنعيني وحدة بجمالها وشخصيتها
وبعدها بعمر صغير تبقى بلا زواج ڪُـل عمرها .

سويت علامة ما أدري وهمست :- والله ما اعرف
حسب علمي هذا راح يصير وبعد هي وقدرها
بس ليش تسأل عنها .

رد برتباك وأضح:- حبيت أعرف عنها أكثر
ثارت فضولي اتجاها .

زهراء:- ليش أحس عجبتك ؟

رحيم:- تعجب اي رجل مو بس اني
إنسانه مثقفة محترمة جدا فارضا وجودها وقوة شخصيتها
اضافة جميلة ومرتبة بشكل كامل مكمل .

رفعت حاجبي وسعت عيوني
مع ضحكة متعجبه:- ناقص تكول خطبيها حبيتها .

رد بضحكة:- ما نوصل الـ هل مرحلة
فكرة الزواج لغيتها من قاموس حياتي .

هزيت راسي واني اوكف
وبابتسامة شك همست :- واضح واضح بدون ما تحلف .

دخلت للبيت واني اسمع صوت ضحكته
الرجوليه ، صعدت للغرفة لكيت رجاء
نايمة بقيت الهي نفسي الى ان نمت باجر ورانا تعب .

من الـسبعة الصبح كعدت ؏ صوت رجاء وايهاب يتناكرون
زهراء:- سالمين رجاء من الصبح .

اشرتلي بيدها وعاطت :- اسكتي مني أريد افهم
ليش ما كعدني البارحة بليل وين خلص اليل
هاااا وين جنت وييييين .

لطمت ؏ وجهه وشمرت التلفون عاطت :- باعي شلون
سد التلفون بوجهي عنده شي هذا اليوم لو اني او ايهااابوووو .

زهراء:- اعصابج بابا افتهمي قبل لا تحكمين ؏ مقابل
بعدين ايهاب ما يسوي غلط والنبي تصرفج خطأ
دائمًا تظنين ظن سوء .

بدلت بسرعة ونزلت
كمت ؏ راحتي سبحت وبدلت اني ونور
لميت ملابس النا ونزلت لكيتها كاعدة تحجي الـ ابوية
وهو خربان ضحك عليها .

اخذ بابا نور يلعب وياه
ومشيت شربت مي ورجعت أريد اكعد وفات
إيهاب بملابسه العسكرية :- شبيج بابا أنتِ مخبله.

رجاء:- بهل سوالف اي مخبله وما اقبل
خطيبي يبات بره البيت .

ايهاب:- هو منو بايت بره البيت
وصلتج للبيت هنا ورجعت بس اكلت وسبحت ونمت
وأول ما فتحت عيوني خابرتج اصبح عليج صدمتيني
بالمشاكل اطلعيها من جوة الكاع  .

رجاء:- اي دير بالك اني ام مشاكل لا تتورط أنهي
كلشي وخلص وبرد راسك وين ما تريد تروح روح
بعد ماكو الـ يحاسبك .

ايهاب:- أحلف عليج مخبله مو بعقلج
لج وصلتج ونمت انتِ مو نايمة للصبح
اني هم نمت للصبح حلال عليج حرام علية .

رحيم:- دعوفها بابا سد السالفة تأخروا هم يلا
ينظفون ويحظرون كلشي وصلهم ومن تخلص السنة
تفاهموا.

عافنا وطلع وهو يرد ؏ عمي :- منتظرهم بره .

رجاء:- ما أروح وياك منو كال أروح وياك .

ما رد عليها  عافها وطلع وهي صعدت فوك
بين ما سويت ريوك البابا
أريد أصعد احجي وياها رجع فات
رحيم:- لك ايهاب عوفها هسة وروح للواجب
اني أوصلهم.

نزل راسه وكمل طريقه
يصعد فوك وهو يدردم :- ما ينطيني گلبي أعرفها
ضايجة وأطلع للدوام هاي مخبله تحرك الأول والتالي .

ابتسمت واني احس بـ أحساس
غريب من اسمع كلامة وحبه
بحيث ما يكدر يروح للدوام
ورجاء زعلانة يستصعب الموضوع .

كعدت ؏ درج ألبس حذائي
واسمع كلامهم صوتهم عالي :- تعالي وياي للبيت وكعدي
بيبي بعدها نايمة وحلفيها اني وياها اكلنا وصعدت نمت
بعد ما كعدت للصبح لج ليش تشلعين گلبي
مو نفتر اني وياج تعبانين من محل المحل وسوك سوك
حقي اتعب وانام مثل ما انتِ تعبتي ونمتي .

رجاء:- ادري بيك ما تحب النوم ومستحيل تنام
ڪُـل هل وقت الطريل عكسي تمامًا.

ايهاب:- لج هذا التلفون شوفي
شكد متصلين علية وما ادري بيهم من التعب
فقدت مو بس نمت ما تشوفين شكد كاعدين نتعب
في سبيل انخلص ويطلع بيتنا مثل ما نتمنى.

رجاء:- ما اصدك گلبي يلعب والله گلبي يلعب
اروح البيت امي ومن ارجع اتأكد بطريقتي .

ايهاب:- شنو هل طريقة عقلي شطح يمعودة
والقران كلشي ما مسوي وما مفكر اغلط وما اريد مكتفي بيج
ومقتنع اطلع مو رجال اذا اباوع ؏ غيرج بعدددد .

سمعت صوتها طلعت من الغرفة
وهي ترد علية :- الـ ذاك الوقت تعرفها أستاذ.

نزلت ؏ درج وطلعت برة البيت
نزل يفر بيده ابوية بس يضحك عليهم
مأمن ؏ رجاء لان يعرف ايهاب ما يرخص بيها .

سلمت ؏ ابوية وطلعت لكيتها كاعدة ليوره
فتح ايهاب الباب وصاح :- تعالي كعدي هنا
بكل طريقة تريد تسويني سايق ست رجاء .

صعدت واني أشرلهم بيدي ونور
بـ أيدي الثانية:- كافي ولكم صغار انتوا
عيب من الحرس بالباب شيكولون عليكم .

رجاء:- خلي يسوق واني اكلج بعدين الحرس
شيكولون من يشوفون المسؤول عنهم راجع وجهه الصبح .

عاط بيها بعلو صوته
لزكت روحـي بالباب من الخوف :- لج راجع مطوطح
ما اعرف أمشي بيه أثر ولج ليش تطلعينها من ماعونها
جنت مططططططططمممممممموووووورررر
كعدت وخابرتج اصبح عليج ياريت ما صبحت
فزيتي من نومج يا صباح وشلون تنام وين خلصت اليل
بالله هذا حجي تتهمين بيه باطل وتريدددين اسككككتتتت .

رجاء:- لا عيوني لا تسكت تعال اكتلني .

ايهاب :- ما امد أيدي ؏ مره بس اذا ما تحترمين
نفسج تخسرين الاول والتالي هاي وصلتج
بهل حالة اعتذرت واني ما غلطان وبررت
واني لا بيها ولا عليها واحترمتج وطولت وياج بال
بس الظاهر انتِ ما تريدين تستوعبين
واضح تعرفين جنت نايم بس لان قرب العرس
تريدين تسوين مشكلة بس ما تنولين البالج
شوفي باعي زين وصلتج بـ هل حالة
ارجع بليل اخذج اريد اشوف غير تصرفات افتهمتتتييي .

عافتنه ونزلت :- اعصابك اني احجي وياها .

ايهاب:- عينج عليها هاي مو بعقلها تروح
ترفع قضية طلاك بدون تفكير.

ضحكت من ڪُـل كلبي ؏ تفكيرهم
وشلون يخاف منها ، فزيت ؏ دكت الشباك السيارة
التفتت وسعت عيوني من شفت الغيهب
فتح الباب وهمس :- شنو هل مزاج العالي
والتكركر من الصبح بربك شحجيت وهيج
ضحكت ما تعلمني .

هذا ايهاب طالعة روحه من تصرفات
رجاء صاح بقهر :- ما تعوفني بحالي غيهب
يا  نكت يا تحشيش ياضحك وهاي النزلت لعبت علية.

الغيهب:- لا تفر الموضوع ؏ شنو تضحكون .

ايهاب:- يعني شفتني اضحك .

الغيهب:- لا هنا ام نور البلع القط السانها تضحك .

نترت واني متوترة:- الله واكبر ما أضحك بعد انوب حلوة
هاي جنت اضحك ؏ سوالفهم حرام .

اخذ نور مني وهمس :- نزلي عيني ام الحرام والحلال .

نزلت وهو نزل رأسه يحاجي ايهاب:- والله انكم
بلوة واولكم رحيم .

ايهاب:- ما تروح مني انتَ جنك رجاء اثنيناتكم
الاستفزاز عالي عدكم .

نزل الجدورة والغراض الـ حضرناها البارحة
وصعد شخط السيارة وطلع معصب بشكل عجيب
مشيت للباب همست :- هو طالعة روحه وانتَ تزيدها علية.

الغيهب :- ما تحجين وياها حواء جوة ما تكعد راحة
تلعب ؏ ولد مو عيب مو حرام وين القيم وين الاخلاق .

زهراء:- بقتهم الك عزيزي أعمل عليهن
وين رايح كاعد من الصبح .

الغيهب:- الأصح ما نايم ابد ما عندي مره
احضنها وانام مع ڪُـل الأسف .

باوعتله بقهر وإني ارمش بعيوني :- اوووييي خطية شكد مسكين
تزوج اذا تريد واحضنها ونام .

الغيهب:- زوج الـ يزوج .

زهراء:- اي لعد زين ربي أطفال وتعلم عليهم
عيش دور الاب بكل ما تعني الكلمة وأحتفظ
بـ أبنك عندي شغل اني وما فارغة من أخلص رجعة .

الغيهب:- شعرفني يمعودة .

زهراء:- تعلم ڪُـل رقم مي واحده حليب
دير بالك علية زين .

وكفت وره الباب أريد أسده
صاح :- عود خابريني من تخلصين
أرجعه الج .

هزيت براسي ودخلت قبل لا اسد الباب صاح :- مسيطرات
بنات لواء رحيم .

دخلت أضحك علية لكيت
رجاء تجلف بالبيت ما تقبل تحجي
ذبيت ملابسي ورفعت بجامتي
وبديت اجلف وياها غسلنا البيت
من فوك ليجوه وطلعت الجدورة
أطبخ بيهم سلكت الحم كلة قبل وقت
وكعدت أحضر بحشوة التمن
تكفلت بكل الطبخ لان اني ضابطتها
ومو أول مره اطبخ كميات كبيرة
جهزت تمن برياني بس تمن وحد وحشوة
وحد وطبخت المرك ورجاء ؏ طباخ
تكلي بالكبب والبورك ، اخر شي خليت
جدر الدولمة ؏ نار .

للعصر طلعت اذب الزبالة
وعفت رجاء جوه تباوع بـتلفونها
الما سكت لحظة وحده وهو يدك .

باوعت من الباب لمحت الغيهب
كاعد بالسيارة ويضحك ويضم
وجهه بيده ويفتحها عرفت
يلعب هو ونور بس
ولا مبين يااااا وين ابني .

اخذت تلفوني ودكيت علية بسرعة رفع خط :- وين مخلي نور
ما اشوف شي منه .

رفع كرسي أطفال يستعملونه للسيارات
وهو صغيروني بي يحرك بيده سريع
ابتسمت وهمست:- دير بالك علية.

الغيهب:- يريد ينام نعس اكل ولعب هواي
هسة شوية ويغفي ابوية يكول .

زهراء :- لا تحركه سريع .

الغيهب:- ماشي .

سديت التلفون ورجع يضم وجهه
عود يخوفه مايدري بوجهه مثل الملاك
ومن المستحيل يخوف ؏ هل جمال
ضحكت ؏ تفكيريالشاطح .

دخلت واقل الساعة اندك باب بيتنا
دخلت زوجت خالي وبعدها بشوية
اجت صديقة امي جوارينا وياها بنتها
كعدنا نسولف سوه الى ان دخلت
هاجر وسجى وملاك ، ومن بعدهم
صاروا الناس تجي شي بعد شي
الى ان صار المغرب دخلت الملاية
وبدت تقرأ بجيت دموع عيوني كلها
ورجاء مو احسن من حالي
هاجر وملاك من الطم ؏ ام فقدن
صرخت هاجر بعلو صوتها
شكت گلبي :- ؏ بختتتتتتج يممممممممه كوووومييي وحاجيني .

كمت من مكاني حضنتها وحضنتني
مسحت دموعها وهمست :- ما يرجعن بعد بس ويانا
يشوفونا دائمًا عيونهن علينا لا امي تعوفني ولا امج تعوفكم .

هاجر :- هي جانت لامتنا راحت امي وراح
كلشي حلو وياها وصرنا كلنا بعاددددددددد
ابعد من ما تتصورين .

زهراء:- لا تحركين كلبها حبيبتي وقريلها الفاتحة.

من القهر ؏ حالنا حتى الملاية سكتت
ما كدرت تكمل شوية وخلتنا نلطم
انهد حيلي وكعت ابجي ما بيه الطم بعد يايمه
من بدت الى ان خلصت انتهينا.

حتى ما كدرت أصب وحدي
اجت سجى والبنات وياي ورجاء
كلنا نصب ونعدل غرفة الاستقبال للزلم صارت
ابوية وعمامي وخوالي وعمي ابو الغيهب والغيهب والولد .

والغرفة للنسوان صبينا اكل
وزاد رتبنا كلشي بمواعين سفري
واخذهن ايهاب هو واثير يوزعوها ؏ محتاجين
وبداخل ڪُـل ماعون ورقة مكتوب بيها
بخطي وخط رجاء:- الفاتحة ؏ روح امي
(ثناء بنت وسام ) الاسم حقيقي ...

بدت العالم تسلم علينا وترجع لبيوتها
إجت سيارة ابوية مأجرها :- نروح انزور امكم .

باوعت ؏ الغيهب باقي صافن
من شافني اباوعله همس :- اجي وياكم يلااا .

رحيم:- وابو الغيهب هم يروح يريد يشوف ام الغيهب .

هاجر:- وإذا أكو مكان أريد آجي وياكم .

رحيم :- السيارة جبيرة وبيها مكان للكل ، تفضلوا.

دخلت بدلت بعد ما غسلت جسمي
اخذت نور بدلت اله ملابس خفيفة
وطلعت اخذه الغيهب مني وصعدني بالسيارة وكعد هو بصفي
رجاء صعدت هي وايهاب ولا عبالك الصبح متعاركين
وهاجر وملاك راحوا ويانا وعمي وابوية وبيبيتي ام ابوية .

وصلنا بـ 12 زرنا وصلينا كلنا سوه
قريت قرأن والغيهب كاعد مقابيلي
رفعت راسي بعد ما همست :- صدق الله العظيم ، اكلك غيهب
قطعت الصلاة مو .

الغيهب:- لا والله ڪُـل يوم أصلي بس ماقريت قران صار هواي. 

زهراء:- وهسة صليت ؟

الغيهب:- اي صليت جوة ليش. 

زهراء:- عبالي تركتها كلت حرامات.

الغيهب:- أرتاح من اصلي مستحيل اعوفها.

ذبيت حسرة وهمست :- الله يهديك ويبرد قلبك .

الغيهب:- وكلبج يا گلبي .

الكل إجتمع بشكل دائري نسولف
مواضيع عامة وكل شوية غيهب وايهاب
متناكرين تالي ما تالي واحد كعد بصف الاخ
ويباوعون علينا ويضحكون عيالك كاعدين قروده
كدامهم .

الى ان صار الفجر وطلعت خيوط النور
طلعنا للمقبرة اول ما صرنا بنص
القبور فزيت ؏ صوت الغيهب:- لواء رحييييم .

رد علية ابوية من وره خشمه جان يمشي بس هو وعمي
قبل الكل  ويسولفون :- همممممممممممم .

الغيهب:- هذا النجف عيوني شووف زين .

التفتت ابوية يباوع علية وعمي كوه لازم الضحكة
رحيم:- هنا تاليته البشر يندفن بحفرة .

الغيهب:- ديربالك حفرة فارغة وراك لا توكع
لواء رحييييييم .

رحيم:- وينها دليني عليها اخلي راسك بيها .

التفتت علية وهو يحجي بتلاعب
وصوت مسموع :- سمعي ابوج يريد يدفن
ابو ابنج وبعد ما عندج رجال .

زهراء :- هو منو بدآ غيهب اسكت وامشي خلي نخلصها
؏ خير لا طلع صوتنا .

اقترب مني وهمس:- بس شوفي شوفي شلون صار أحمر
بس إني أكدر علية افتهم علية ويفتهم علية اكول ليش من تصيرين
عصبية تنگلبين حمرة ثاري طالعة ؏ رحيم .

باوعتله صفح وهمست :- بيك عضه وحق الله.

الغيهب:- تموتين ؏ ربي .

شفت قبر امي من بعيد مطبوع براسي
مميز من بينهم كلهم بعيوني ، تقدمت
انطيت نور للغيهب ومشيت الها
حضنت قبر أمي وصرخت فصلت عن العالم
الى ان انسحبت بقوة شميت عطره
وحسيت وجههي صار ؏ صدرة
حضني بقوة
الغيهب :- اششششش لا تتخربطين كافي مو زين عليج .

بقيت اناشغ ببين ايده كامت رجاء
غسلت القبر هي وايهاب ابتعدت كعدت كدامها
قريت قرأن الى ان كملت وعفناها وحدها سودة علية
لو بيدي ما اعرفها لحظة وحدة وأبقى يمها العمر كلة .

وصنا القبر عمتي ابوية شال نور وأخذنا بالربع ساعة
نبجي بس اهل ابوية ما اقتربوا حتى بيت الغيهب ياخذون
مساحة من الخصوصية ، مثل ما هم أبتعدوا من كعدنا عند أمي .

أصوات صراخ
اصوات عتب
أصوات اشتياق
أصوات ألم شوق
اهات وحسرات
فضفضة ولوم
بجيهم كلامهم مرد گلبي
دموع غيهب عموني عن كلشي
غسلوا قبرها بعد ما انتهوا من التعب
رجعنا للسيارة منتهين ما نكدر نحجي كلمة
نزلنا بيت الغيهب ورجعنا البيت اهلي
قبل لا نوصل ترجاني انزل وياهم ما قبلت
اجلتها بعدين .

رجعت للبيت بس سبحت وسبحت نور نمت
بقيت يومين ؏ هل حال اكعد ابجي ابجي
وارجع انام لا اكل ولا شرب
نهد حيلي ولو ما نور يجبرني اكوم ؏ حيلي
ما اكوم هو ينام واني انام هو يكعد اني اكعد حتى تلفوني
نسيت وين هو يجي غيهب يشوفني نايمة احس
بوجودة بس أمثل النوم وأفضله عن الكلام .

وبعد ما مر اربع ايام فزيت ؏ صوت
شهكات رجاء كمت مفزوعة صحت :- عزا العزاني شبيج .

رجاء:- لج ليش تعوفيني وحدي بعد خمس ايام عرسي
خايفة حيل خايفة كومي الله يخليج ساعديني
اليوم اذا ما تصيرين زينة يجي غيهب يبقيج يمهم
يكول هنا كلها تلتهي محد يدير باله عليها .

زهراء:- الحرارة بجسمي والله مو بيدي اسفة.

رجاء:- كومي سبحي واكلي وشربي علاج
والله تصيرين زينة هل ايام حيل محتاجتج .

هزيت راسي وسويت مثل ما كالت
صرت احسن بس الحرارة بعدها بجسمي
اجه الغيهب اطمئن ؏ وضعي وأمنت نور عنده
ورحت اني وياها اجرنا بدلت عرسها ما تريد حنه
بس عرس بالقاعة.

وحجزنا عند احسن مركز بالمنصور
اشتريت النفسي فستان وحجزت وياها بالمركز

وباليوم الثاني اخذت ملابسها البيتها
عدلتهم كلهم بالترتيب ويايه ام ايهاب
واليوم الثالث راحت للمركز نظفت ڪُـل جسمها .

وباليوم الرابع بدلنا خفيف وسهرنا للصبح بحفلة توديع العزوبية.

واجه اليوم الخامس يوم عرس اختي وحيدتي
بنت امي وابوية حسيت نفسي مو بس اختها
لا جنت امها حسيتها بنتي تلتمس مني الامان
بكل خطوة تخطيها .

طلعت وياها للمركز من الصبح ويايه
نور من صارت بـ 12 خابرت الغيهب
اجه اخذه مني واني مكيجت وبدلت
لبست فستاني هناك بعد ما حجزت حمام
عرايس اني ورجاء.

مكيجوها وطلبت ينفتح شعرها ؏ طوله
وصل النهاية ظهرها وتاج زين راسها
طلعت مثل الباربي حاولت ما ابجي كدامها
ركصت وأغني الها حتى اقلل من خوفها وتوترها.

صار العصر وخابرني ايهاب طلعت
وبقيت باهت لوني اباوع ؏ ذاك الكاعد بالسيارة
ويبتسم بنصر .

تقدم ايهاب باس رجاء
من راسها وهمس :- شطالعة بنت گلبي .

رجاء ما ترجف ترعش بين اديناته
كلش انيق ومرتب يشبه محمود التركي بدون غمازات
مشينا للسيارة صعدوا ليورة واني صعدت
بصف الغيهب يباوعلي ويضحك :- صخام هو شنو انتَ
مو مريض معرس لابس هيج .

الغيهب:- المرض ما يمنع جمالي اي والله ما يمنع جمالي
الحلو حلو لو تنكعي بطين هم يطلع حلو .

زهراء:- خربت كشختي من الصبح
مكياج وحمام وتالي تجي هيج  .

ايهاب:- وحق ربي عبالك هو العريس كسر علية.

الغيهب:- يحركها علية لج
غير طالعة اجمل من وردة فيكتور هوجو .

زهراء:- شنو هل وردة .

ايهاب:- سمعت من الغيهب .

الغيهب:- ضابط جامد ما تعرف بهل سوالف
هاي اجمل وردة بالعالم لونها داكن يستخدموها
بهداية بوكيهات وباقات الورد مرتي طالعة أحلى منها
سلبت عقلي شلون راح أسوق يمكن اعرس وياك اليوم .

ضحك ايهاب وهو يرد علية :- هو اليوم اظن بس انتَ تعرس .

هذا لكفهااا وضحك وهو يواسي بي :- يوووووو لكفتهااا
الله يساعدك يلااا ميخالف هسة اني بيوم عرس ما عرست .

عطت بي واني اتذكر وايدي خليتها
؏ راسي :- ايييييععععع اييييع لا تذكرني بيوم عرسي
ينقص عمرررييييييي غدددي لالا عيني اختي احلى
وشووف مو رجاء ام السان انبلع السانج .

رجاء:- اسكتوا من رجاء اليوم ماكو رجاء ماكو .. 

الغيهب:- ايهاب اخذها مني أغسل ايدك بقاصر.

رجاء:- هذا ابو هلهوله ليش اجه وياك .

التفتت عليها وصاح :- شنو ابو هلهوله
ترررره اعررررف شنو محورها الثااني
لا تعيديها .

رجاء:- لعد حرك ولا تهلهل .

الغيهب:- هم كالت يهلهل لا تكولين يهلهل
ادعي عليج بالهندي لج الكووبرااااااااا .

ضحكت بعلوو صوتي وهمست :- لا تحجي ؏ صددديقتييييي
وحرك السيارة تأخرنا .

طلع وهو يدردم علينا صفنت بتفاصيله
صار هواي ما شفته بهل جمال والفخامة
جان شكله يسلب العقل ويسرق قلبي
بدون أستأذن.

رافع شعره ليفوك مزين لحيته
محددها بكل دقة ، لابس قاط اسود بقميص ابيض
ورباط سمائي يلمع من فوك ليجوه حتى حذائه تلمع
مثل ما شفته اول مره واجمل بعد .

التفتت علية درت وجهي بسرعة
نظرته جانت عبارة عن كاشفج
ذبتي بيه واني متقصد .

وصلنا للقاعة كعدت اني والغيهب
؏ طاولة انصدمت من اجت
هاجر شايلة نور مبدل نفس قاط
الغيهب طبق الأصل:- عزززاااا مخنوك الولد بالرباط وين لكيت قياس
نور بالسوك ماكو هييييج .

ضحك وهمس:- خياط خيطنا عيوني عوفي كشختنا اهتمي
بـ اختج دخلت .

التفتت اباوع ؏ ملكتي جانت مثل الملكة تمشي
وايهاب لازمها بكل تملك ؏ أغنية حسين الجسمي (حصنوها باية الكرسي )
ضحكتها خلت عصافير ببطني .

الغيهب:- أستغفر الله مو خوش سالفة هاي مال توأم
شنو أشوف مرتي تفوت عبالك كاعد بحلم يغث
واشوف مرتي تزوج عليه.

ضحكنا كلنا ؏ كلامه نريده يسكت ماكو انفتح
ركصت هي وياه ؏ أغنية
يارا (ما بعرف )

دقايق وكف الغيهب مد أيده حتى
نروح نركص خليت نور عد هاجر
وكفت وضحكتي ما فاركت وجهي
ركصت وهي تكول :- عم حس بلون الدنيا أحلى صار
عم عيش انهار بألف انهار .

اقترب غيهب من اذني وهمس :- احبج احبج احبج احبج .

جسمي صار جلي وذاب بين اديناته
ما اعرف شلون سيطرت وهربت منه
وبدت الحفلة ركص جوبي
وسيوف ولد عمي ذبو لحم
وعمامي يشمرون فلوس ؏ ايهاب
عماتي يركصون هم ورجاء وهي انطلقت متناسية ڪُـل الخوف
الى ان صار ابوية قريب منهم ودعهم وهو يبوس راس
رجاء وصاح ؏ ايهاب:- ما اوصيك لآن أعرف الـ منو انطيت بنتي .

باس ايهاب راس ابوية وطلع هو ورجاء.

واني والغيهب ونور طلعنا نفتر بالشارع
وضحكنا ما غاب لحظة.

الى ان صارت بـ 1 بليل قررنا نرجع
دك تلفوني اباوع اسم رجاء انكمش گلبي
وغابت ضحكتي فتحت خط سمعت 
شهكتها :- الحكيلي زهراء ابوس ايدج تعالي .

يتبع .....

حسابي الـ انستا ...

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد

بنص اعماق قلبي 🥺🫂🤍