رواية ظلمات الغيهب الفصل التاسع عشر 19 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _17_

_ما بك ؟
_قلبي يؤلمني
_لماذا ؟
_خيبة ورآ اخرى، وموت ؏ قيد الحياة .
_ ومنو اليهتم واذا الليلة بجيت دم ، ومنو اليهتم واذا الليلة كرهت أسمي
وصار بقايا هم .

...........................
زهراء.........

صوت الصراخ وصراخ سيف وحتى صراخها ترس البيت كلة
ادحرج جسمي ونضرب بكل بايات الدرج وبالنص اريد الزم المحجر
ايدي صارت بين الحديدات انلوت وطك العظم وكعت بالكاع
غمضت عيوني والدم أخذني وما أعرف المصدر رأسي خشمي
جسمي التشخط ، وقبل لا أفقد حسيت بحرارة ؏ رجلي  صاحبه وجع
شديد بطني .

غلقت عيني استسلمت لا استطيع المقاومة أكثر ، نحل جسدي ، الألم ينهش
روُحـي الهزيل ، بدون رحمة او شفقة .

لا اعلم كم مر من الوقت لكن بدئت استشعر الوجع
فتحت عيوني بتعب واضح ، وثقل مبالغ ، حسيت وجهي وجسمي كله منفوخ
وارم بشكل ، الألم بكل مكان  ، بين ڪُـل هذا سمعت صوت
جذب انتباهي وما صدكت اني فعلا رجعت اسمعها.

ام الغيهب:- يمه زهوره عيوني تسمعيني افتحي عيونج  .

قاومت ڪُـل ما يدور من تخالط أفكار وأوجاع وفتحت عيوني
اباوع بوجههه اريد اصدك شكد مشتاقتلها هل انسانة .

ام الغيهب:- الحك ولك يمه الدكتور خلي يجي بسااع .

سمعت صوت امير يكلها:- يمه رحت كال روح هسة اجي وراك .

رجعتلي بلهفة صاحت بصوت:- زهراء يمه تسمعيني حاجيني گلبـي مشتعل بنارعليج حاجيني .

همست بـ أرهاق :أريد مي عمه عطشانة.

رفعتني بيها ما بيها شربتني مي ، بـ هل اثناء دخل الدكتور
عاط بعلو صوته:- لا ترفعووهاا موو زين ليش تتصرفون بكيفكم عجيييب .

هشام:- رادت مي عيوني اعصابك ، وبشر شلونها .

الدكتور:- صار يومين هنا اليوم شوية احسن وضعها أستقر تكدرون طلعوها باجر  .

امير:- شكرا دكتور احمد ماقصرت أخوية .

طلع هو والدكتور اريد ارفع ايدي حسيتها ثكيلة ماكدرت
ستوقفتني عمتي وهي تكلي:- لا تحركيها شتريدين تسوين اني هنا .

زهراء:- شبيها ايدي ليش ما تتحكرك .

ام الغيهب:- مجبريها مكسورة ، توجعج .

زهراء:- جسمي وراسي كلشي يوجعني الألم بكل مكان .

ام الغيهب:- حسبي الله ونعم الوكيل وين جانتلج هل مصايب .

رفعت ايدي الثاني تلمست بطني وهمست بتردد ممزوج بخوف
رهيب :- ابني راح مو وكع .

ام الغيهب:- هل طفل معجزة كلها ما تريده وهو متمسك بالدنيا
يريدج يمكن عرف أمه محتاجته.

نزلت دموعي والغواش صار بعيوني بسرعة صاحت :- موزين تبجين ولج عيني كافي بجي كافي .

دخلت بيبيتي وراها ايهاب وام ايهاب ، انصدمت بيهم الكل موجود
والمشكلة معقولة نحلت مستحيل اصدك اخاف اني بحلم .

باستني بيبيتي براسي وهمست:- الحمد لله ؏ سلامتج بيبي زهوره.

رديت بضياع:- الله يسلمج بيبي .

التفتت ؏ ايهاب وكف قريب وبابتسامة همس:- شلون صرتي بنت عمي .

هشام:- اني اكول من تطلع انتَ تصير عال العال .

رجعت النقطة الصفر غلقت عيوني بخيبة امل جديدة تصعق احلامي
ماراح تنحل ياربي ما راح تنحل .

ايهاب:- انتَ اذا تحب اطلع اني خطوه وحدة ما اتحرك من المستشفى
اذا مو بت عمي تصير زينة وتكدر توكف ؏ رجلها وتطلع وياي البيت
ابوها .

امير:- واضح ما تريد تجيبها ؏ بر كلنا اطلع منا الغيهب ؏ وصول .

ايهاب:- لا تبالغ عبالك ما ادري منا راح يجي هو الغيهب وجوده وعدمًا نفس الشي ماكو اختلاف بس مغثه.

هشام :- احترامًا للنسوان ويانا ما أتجاوز وياك وهسة ارسلك الشعبة الكسور

وسرعان ما التفتلي وحجه وياي بعتب ونبرة صوته مؤذية
للقلب والروح:- اخ منج زهراء اخ يا خوية لو بقيتي وطلبتيها منه
والله نجبر الغيهب يطلكج ولا هل مصايب الوكعت ؏ رأسنا .

زهراء:- وبرأيك الغيهب نكدر نجبره ؏ طلاك ، اني ادمرت وانتِ كلش زين تعرفون ، عمي هواي حاول ويا والكل ضد تصرفاته الكل يحجي
علية بس هو ما يقتنع لا بكلام صغير ولا جبير هو جبرني .

أمير واكف بالباب بسرعة عدل نفسه وهمس وهو يمسح
؏ شاربه:- أغلقوا الموضوع الغيهب وصل .

هنا وقفت الساعة ، ودكات قلبي تجمدت ، رعشة ايدي وجسمي الـ بدآ وكانه
سعفة شجر باهتة ، غلقت عيوني وبلعت ريكي بصعوبة تامة

دخل بكل جبروت وما توقف بالمشي ، كان يمشي بتجاهي
بس عيونه متركزة ؏ ايهاب ، كان يرمقه بنظرات صارمة
طغى عليها الحقد الدفين ، لفحني عطرة وهو يرتكز ؏ حافة
السرير انحنى وبكل بساطة طبع بوسة سريعة ؏ جبهتي
وبـ رد فعل تعجلي درت وجهي للناحية الثانية ابعد نفسي
منه ومن قربه المبالغ به .

أبتعد وبصوت رخيم همس:- حمد لله ؏ سلامتج .

أضطرابات قلبي يصاحبها صعود صدري بتنفس مخربط
ما كدرت اسيطر ؏ انفعالي او حتى اخفي خوفي منه
رغم الكل موجود ومتأكدة ما راح يكدر يسوي شي بس اخاف منه مو بأيدي.

وبضحكة مستهزئ رد علية ايهاب:- وسلامتك ابو الغياب وسلامتك .

فر السانه داخل حلكه ورد علية بضحكة:- الله يسلمك حبيبي الغالي .

بـ هل اثناء دخل عمي ابو الغيهب وعمامي وجدي ، صارت الغرفة هوسة
تقدم عمي من شاف الغيهب وايهاب يتلاغون فوك راسي
دفع غيهب وباس راسي تحمدلي بالسلامة لكن قاطع كلامة الغيهب
وهو يكول :- زهراء خوش ابن عم عدها مو يابا .

وكف عمي وسحب أيده:- متشوف حالة البنية مو وقت سوالفكم
اطلعوا منا اثنينكم تعاركوا بره .

ايهاب:- لا شعدنا نتعارك بالنسبة الي گلبـي بـــاااااااارد .

الغيهب :- هم صدك ليش نتعارك ، بس ردت اكلها الزهراء ابن عمج خوش
رجال بس الله يرحمه عمره قصير ...

رفع ايهاب ايده ليفوك طك اعظام ظهره وهمس وهو متوجهه للباب
حتى يطلع:- نقدم ؏ تمديد عمر من ابو الغياهب .

الغيهب:- ايهاب لحظة .

طلع الغيهب المبايل من جيب البنطرون وتوجهه
اله وكف مقابيله ورفع التلفون ، تغيرت تعابير وجهه ايهاب من شخص
واثق اله شخص مهزوز ما يكدر حتى يكمل الفديو
حاول يسحب التلفون صاح بي الغيهب:- فكر اطخ مجرد اطخ
اصبعي حتى اخليك عبره لمن لا يعتبر .

بلع ريكة وصاح:- شلون وصلت للـ

الغيهب:- اخ يا ايهاب شكد مقهور عليك ، ليش صرت جنتل مان
وضليت تهوبز وتكمز جنك قرد تهدد وتخطف شوفوني خوش زلمة
خوش نعال ،

بربك احسلك هل مصيبة الوكعت ؏ راسك ، شفت شلون اليفكر
بعقله  يضرب اقوى من الشايف روحه برتبته لا ويستخدمها
بأمور تخالف القانون .

ايهاب:- شتريد .

ابو علي:- شبيكم ، انطيني التلفون اشوف شنو السالفة .

الغيهب:- اطلع منها اني وايهاب نحلها مو حبيبي الغالي.

عاط إيهاب وأعصابه تشنجت :- شتريددددددددد غيهب .

الغيهب:- تنتظر مني مكالمة اكلك شريد بيها ، وهسة اريد تفر وجهك
وتطلع من المستشفى بكبرها وتروح تلف راسك وتنام من يوصل اتصال
اكعد واذا خالفت كلامي تعرف شنو اكدر اسوي وهاا اريد اخليك ؏ علم
انتَ مراقب من ڪُـل الجهات وين ما تروح وين ما تمشي الغيهب وياك
انييي وياك ايهاب والزمن طووووويل .

ايهاب:- واذا اكلك عادي تفضحني بس ما اخليك تحقق مرادك.

الغيهب:- سبع ابن سبع أستمر.

توجهه الي وهمس:- يلا يمه وقعت ورقة خروجهه بدليلها ونزلوا جوة
منتظركم بالسيارة .

ابو علي:- البنبة ترجع ويانا اني وابوك أتفقنا.

الغيهب:- واني كلت زوجتي ترجع وياي انتوا مو امان حتى تبقه وياكم
وحسابكم ما خلص بعد وبعد ورانا تحقيق عميق بالموضوع .

ابو الغيهب:- مو وحدك تقرر البنية موجودة نأخذ منها .

الغيهب:- ما بيه حيل احجي مثل ما كلت هسة نطلع منتظر جوه.

تركهم ونزل همست بصوت يرجف:- ما اريد اروح الله يخليكم ما اريد
راح يموتني الغيهب ما يرحم بحالي بعد الصار .

ام الغيهب:- كلنا يمج ويفكر يأذيج شحده والله اوكف عظم بالزردوم .

هزيت راسي وصحت:- ما أريد شفتوا عيونه شلون يباوع والله يخوف اخاف الله يخليكم ما اريد اروح رجعوني .

ابو ايهاب:- ما نبقيها يابا ما تريد نجبرها شنو .

ابو علي:- خلي يشتكي علينا بس ما نجبر بنيتنا امشي ناخذها .

ام الغيهب:- منو يشتكي .

ابو الغيهب:- يريد يشتكي عليهم هم ونسوانهم حتى يعرف منو دافعها
بس اذا ترجع ويا يعوفهم وهو يعرف بطريقته.

زهراء:- صخام بوجهي ما اريد والله ما اروح .

ابو علي:- بدلي جدو بدلي ترجعين ويانا .

أجت بيبي هِـيِّ وعمتي لبسوني ملابسي وكفت اريد انزل من الجرباية
الدوخة سطرتني ، تقدم ايهاب بس شنو وجهه نكلب اصفر كركم
والمصيبة ما اعرف شصاير جدي خلصها يخوزر بي ، الجو كلة مشحون
بحيث اندفع ايهاب وهشام لزمني وهو ما كدر يحجي حرف .

من شافوني فعلًا ما اكدر أمشي راح امير ورجع ويا عربانه صعدت نزلون بالمصعد ، شفت الغيهب من بعيد مستند ؏ سيارة ويشرب جكارة
وصلنا وعمي همس الـ امير :- وصلها السيارة جدها معليك بي .

التفت امير ورد :- سالمين غير يفضحنا ويشهرنا هنا .

ابو الغيهب:- ما تريد ترجع البنبة شلون بالله نجبرها .

امير:- بكيفك يابا عليمن تصير عصبي علية اني شدخلني بيكم .

وفعلا عبر لكن الغيهب وقف امير واخذني تقرب بحذر
الناحيتي وهمس بتهديد :-صوت ما اسمع كدامي للسيارة بعد ما اتحمل مماطلة.

لزمني من ايدي صعدت بالسيارة نزلت دموعي وصحت:- ما اريد ارجع اريد اروح البيت ابوية غيهب ما اريدك .

طبك الباب بوجهي وصعد بالصدر وعمتي بصفي هشام ساق السيارة
وعمي واميربالسيارة الثانية ، اما بيت جدي بس يباوعلي ما تحركوا
مشت السيارة للبيت وكفنا مقابيل الباب ، نزل عمي قبلنا استقبل بيت جدي
ودخلوا عمامي وبيبيتي وحتى ايهاب ، من شفتهم نزلت دخلت جوه
هم رجعت الـ هل لعنة يعني ما راح اكدر اخلص من ظلمات الغيهب
شنو الحل ما اعرف اني تايهة .

عمتي ما خلتني كاعدة اخذتني منها هاجر باستني ودخلتني جوة الغرفة عمتي
وببيبيتي ويانا ، وفرح وسجى موجودات ، راح عمي ذبح ذبيحة
وطبخ الغداء وما قبل واحد بيهم يطلع من البيت وشرط عليهم يكملون حتى يتفاهمون ، وفعلا هذا الصار .

بعد ما شفتهم خلصوا يريدون يطلعون ضليت اشهك وابجي بعلو صوتي
خايفة مرعوبة وين راح يعوفون بعد الصار ، شلون يأمنون بالغيهب
يمررها سلامات ، بس يطلعون متأكدة راح يسحلني سحل واني روُحـي خلصانه ما عندي القوة للمواجهة.

دخل جدي وعمي ابو اثير بس بقيت ثابتة اريد اروح وياهم
اقتنع عمي اروح بس انتهى كلشي بدخول الغيهب وحجه
بصوت واضح يوصل المسامعهم :- عوفونا وحدنا اني وياها لازم نحجي .

رفض جدي وعمي وكف كداما يقنع بي
والغيهب رأسه يابس اكثر منهم وأصر
ضروري يحجي وياي ؏ انفراد .

ابو الغيهب:- نعوفهم وحدهم اتعهدلك ما يتجرأ ويفكر يأذيها لان والله وحق ڪُـل حرف بالقرآن الكريم بعدها لا هو ابني ولأ أعرفه.

جدي اطمئن بعد ما سمع كلام عمي عافونا وطلعوا
باوعت بطرف عيني ومن الخوف عصرت ملابسي عصر
راسي بالكاع ورجلي ما اسيطرعليهم من الرجفة .

تحمحم وتدرج الناحيتي وهمس:- هواي ستفزيتيني زهراء هووواي .

تساقط دمع عيني يستنكر ما ينطق به صكيت ؏ اسناني وهمست
زهراء:- ما اريدك ليش ما تعوفني تعبت منك تعبت .

مد أيده حكم امساك وجهي من الحنك :- باوعيلي هنااا بعيوني ركزي وكولي ما اريدك .

رفعييي عييينج لج هنااا تكولين ما اريدك يلااااا كوليها .

إرتفعت صوت شهقاتي المتواصلة ، شجعت نفسي حتى ارد
لكن هو سبقتي واقترب من أذني
وهمس بتخويف :- حتى ادمرچ ، انهيچ ، افنيچ ، اهدمچ انتِ وياهم زهراء
خليني اتحمل اكثر ولا تستفزيني لان ما اخليج تطلعين صاحية منا .

صرخت بعلو صوتي :- ادمرني غيهب ليش اني ما دمرت لو ما انتهيتتتت
شووف حالتييييي ڪُـل الصار بيه بسبببك انتِ دمرتني كأنك لعنة
تقربت علية وبدت تاكل بكلشي احبة ، راحت فرحتي، وضحكتي، ونستي
راحتتتتتت امي غيهب بسببك حتى ما شفتهااا ، تريد تهدمني انهدمت بدخلاتك علية الفجر وعطرك نسائي ، اني انتهيت بسببك

شووف حالي فوك ڪُـل الصار تريد ادمرني
شبقيت بيه عوفنيييي مليت منك معقولة ما عندك قلب الـ هل درجة
ما ترحم بحالي ، دائمًا تعيش دور المظلوم ، انتِ مو مظلوم انتَ ظالم
طاغي ماعندك إنسانيه وما تخاف الله زين .

دخل عمي عاط بصوت:- غيهب .

كنت منهارة كليًا احجي وارتعش ما اعرف من كلامة ، لو من الوجع
الـ بيه حرت وين انطي وجهي صرت مثل الحمامه المذبوحة
الوب من حركت گلبـي.

حضنتني عمتي تريد اسكت ما اكدر هذا حدي
تعبت اصير الفقيره الـ لازم اسكت وما افك حلكي
حتى ينقهرون علية و يرفقون بحالي .

زهراء:- لهنا وحدك غيهب بعد ما اسمحلك تهين كرامتي اذا كلهم
مو بعيني اني ادافع عن نفسي لان بقيتني وحدي وما اعرف شنو غايتك
تخليني  بلا سند ولا ظهر أحتمي بي منك ومن ظلماتك وطغيانك .

وبعدها شسوي تموتني خليني اموت واروح الـ امي ارتاح من هل
حياة الما ترحم بحالي ، هو اني اريدددد امي محتاجتها
تاخذني الـ حضنها وتحميني منك بعد ما اريدك مــا اريددددده يا ناس .

عمي ابو الغيهب كابلني وكعد يبجي وياي هل انسان يخليني
أغير ڪُـل تحركاتي انصدمت شكد ما هو شخصية بس
طيبة قلبه ما توصفها الكلمات هو بمثابة بلسم للجروح والنزف الروح
اخذني شبكني بقوة صرخت بنفاذ صبر:- اخ يا عمو اريد امي والله تعبت
شتحمل وعلى شنو اسكت نهد حيلي وحق الله نهد حيلي .

ابو الغيهب:- الله يهد حيل كلمن يهد حيلج بنيتي تاج راسي كومي وياي
انطيني ايدج تعاي وياي تعاااي .

بدون تفكير وكفت بتعب سند جسمي علية وطلعني من البيت كلة
الكل كان ساكت اما جدي وعمامي كعدوا وايدهم فوك راسهم
الغيهب دار وجهه ؏ شباج ما عرفت شنو كانت رد الفعل .

طلعت من البيت وعبرني الشارع وكفني مقابيل باب بيت امي
وطلع مفاتيح همست بستغراب:- والمستأجرين ؟

ابو الغيهب:- طلعوا ابوية انتِ والحمدلله من راحوا اكعدي بيت امج
شمي ريحتها استرجعي ذكرياتچ انتِ وياها بنتي .

دخلني للبيت حسيت قلبي نقبض تذكرت ڪُـل دخلاتي للبيت
صحت بعلو صوتي وبـ انهيار :- يمه يا شمعة حياتي يا حبيبتي
اطلعي استقبليني وين الهلا يا بعد الهلا يا يمه .

كعدت بالكاع وهمست بصوت ضعيف :- محتاجتج اريدج يمي حبيبتي
ادري تسمعيني يمه والله محتاجه وجودج بس اريد انام بحضنج
الله يمه ادفع ُ ؏ــمري كله وارجع بس ساعة وحدة بين ايدج
لو يرجع الزمن والله ما اعوفج لحظه وحدة اني ضعيفه بدونج
جنتي انتِ ڪُـل قوتي انتهيت ، دشوفين حالي ، دموعج الغالية تنزل
من تشوفين عذابي ، زين يمه ادعيلي ارتاح لو تاخذيني يمج هلكت .

فزيت وتراجعت للخلف واني اشوف ظل فوك راسي
رفعت نفسي شفت الغيهب فتحت حلكي اريد اصرخ
انقض ؏ شفايفي وسد حلكي :- اششش لا تخافين بس احجي وياج ما اسوي
شي وداعت عيونج ما اسوي شي .

بقيت اتحرك بين ايده اريد يعوفني بس
صدمني وهو يهمس:- بس اريد احضنج ويهدن جروحي .

شال ايده من شفايفي صحت:- إبتعد غيهب ما اريدك .

الغيهب:- تريديني گلبچ بيتي زهراء.

زهراء:- قبل بس هسة بردة نار حبك وصرت اتمنى لو بقيت مجرد
حلم يا غيهب ياريتني ما اقتربت منك ولا سمحت تقترب مني ودمرني
لو باقي بعيوني ذاك الـ أتمناه بحلامي .

الغيهب:- بس اني احتاجج انتِ دوآ گلبـي ، ما تصورت اشتاقلچ
بس غيابچ غير ڪُـل تفكيري انصدمت بنفسي زهرتي اريدج .

زهراء:- جذاب انتِ ممثل تريد تخدعني حتى أرضخ وتضحك
علية بعدين ترجع للتعنيف هاي غايتك مووو ، كلبك صلب غيهب انتِ ما ينعاش وياك .

الغيهب:- أني صَعب الـطبع بس يمج ألين ، كلت اني دمار وساعديني وما سمحتلج بس هل مره وعد اخليج وياي اريد تساعديني محتاجج وحق
الله محتاججج لا تعوفيني اخر مره سامحيني بس هل چانص .

زهراء:-انتِ دمرت كلشي غيهب دمرتني ودمرت حتى اهلي .

الغيهب:- مستعد أصلح كلشي الخاطر عيونج ،انتِ جنتي حالج حال القبلج
بس صررتيييي غير عنهم ما اكدر بعد أجازف وأتخلى عنج .

زهراء:- اني ابتعد احارب حتى اهاجر تحكمك واستغلالك .

نزلت دموعة ونزل جسمه الـ ايدي وحضنها بين أيده
وباسها ، بقيت جامدة بمكاني ما بدر مني رد فعل
غير علامات الذهول :- لا تروحين نورچ غلب ظلمتي ، مستعد نبدي
صفحة جديدة وراح نبعد الكل عن حياتنا .

زهراء:- انتَ حاولت وفشلت ما تكدر لان تحبها وما تنساها.

هز راسه بسرعة وحضن وجهي بين أيده:- ما أحبها هي سبب كرهي
الحياتي بس رجعت احب اكعد الصبح واستكشف شنو الجديد
بسببج صرتي كلهم انتِ المهمه عندي والباقي امحيهم
انتقامي ما اريد بعد انتقم ولواشوفهم كدامي ما يهمني
گلبـي برد وبس انتِ ناري وسبب قلقي وخوفي وتفكيري .

زهراء:- وأبوية ؟

الغيهب:- باجر يطلع اني حاضر .

زهراء:- وايهاب .

الغيهب:- ايهاب أذاني  .

زهراء:- من ايدك انتَ غلطت وهذا استحقاقك.

الغيهب:- صح اني أذيتج وأخذت جزأه عذابج بسببي
ورجعت غلطت ويا ابوج اني اسف
حتى ايهاب انتهى موضوعه وما ينفتح .

زهراء:- والتسجيل ما اعرف شنو شوفته.

الغيهب:- ينحذف .

زهراء:- اني احدف بيدي .

الغيهب:- بي شغلات مو حلوه ما احب تشوفيها وعد كلشي ينحذف .

زهراء:- متأكدة راح ترجع تأذيني .

الغيهب:- اني انسان ما أضمن نفسي ، بس انتِ احتويني بكل حالاتي
واوعدج ما امد ايدي عليج بس ساعديني واريد منج تعرفين شلون
تهدأ اعصابي ممكن .

زهراء:- اخاف افشل للمرة الثاني ، إني محطمة كليًا وما اتحمل خذلان
اكثر بعد ، اخاف منك غيهب اخاف .

الغيهب:- لا تحرميني  منج ، هل مره غير راح اسمحلج تكونين اقوى مني
حتى تكدرين تساعديني ، كوني مسؤولة عن كلشي حتى مواعيد طلعاتي ودخلتي ، تلفوني شغلي فلوسي وكل ما املك تحت امرج .

زهراء:- واذا خلفت ننفصل فورا .

الغيهب:- صار .

زهراء:- اريد شهود ؏ كلامك .

الغيهب:- منو .

زهراء:- عمي ، ابوك .

وكف وهو يستند ؏ حايط شكله متأذي حيييل من ناحية صدره
طلع صاح عمي واجه وكف مستغرب:- يابا اسمعني اريدك تكون شاهد
؏ كلامي واذا بيوم خلفت نطلك اني وياها بدون نقاش .

ابو الغيهب:- وشنو هو كلامك اطربني .

بدآ يسولف العمي واني بين فترة وفترة اشارك بالحوار الى ان انتهى
برضاتي ورضاء عمي طلعنا من البيت تعبانين والوجع آخذ حيز
من حيلي ، رجعت ضهري منحني دخلت جوه وسولفت البيبي ما عارضتني
وعمتي طارت من الفرح بس بكلبي غصه ملجوم  بقيت حايرة
وما اعرف تصرفي صح لو استعجلت بموافقتي .

بس ردت ڪُـل المشاكل الصارت تنحل
من جهه ابوية الـ انشمر بالسجن ظلم
ومن جهه ثانية ايهاب حياته كلها بخطر .

اخذت ادويتي ونمت واني اون من الوجع
بيت جدي من اطمئنوا علية راجعين لبيوتهم
كعدت ثاني يوم ؏ صوت مو غريب علية
فتحت عيوني انصدمت من شفت ابوية كدامي
بچه بحزن وهمس:- سوده علية يا بوية تأذيتي وانتِ بيت ابوج .

الكل طلع بقيت بس اني ويا اقترب علية وهمس:- منو سوه هيج بيج بابا
حاجيني اريد اعرف حتى اتصرف لا تخليني احاسب الكل .

همست وكلبي محروك منها :- رجاء المريضة ، تره مو بعقلها مريضة
نفسيا وما اعرف شنو السبب ، هِـيِّ انحرمت من امها واني انحرمت من اب
بس ما تصرفت مثلها شنو هل تصرفات الهمجيه.

هو من عرف عيونه صار بكصته باسني وهمس:- حقج آخذه بيدي من عيونها ، والله ما تعدي .

عافني وطلع صحت علية ما وكف ، دخل الغيهب يستفسر :- شبي ابوج طلع عصبي .

زهراء :- مابي شي بس صار عنده شغل مستعجل .

الغيهب:- عليمن تضحكين بكلامج ، تريدين اصدك .

زهراء:- راسي يوجعني .

الغيهب:- غيرتي الموضوع بس ميخالف نعديها الخاطر هل عيون
التعبانه ، لازم تاكلين حتى تشربين علاج .

طلع من الغرفة سمعت يحجي ويا عمتي وهاجر
رجع بعد دقايق بيده الصينية كعد مقابيلي وهمس:- الف عافية وكليني واوكلج ما عايشين هل اجواء.

زهراء:- خليني ساكته ما عشت غير الصخام وياك .

الغيهب:- هاي عود سكتت لو تحجين شلون .

زهراء:- احير منين احجي وشلون ابدي وشلون انتهيي هوواييي هنااا هوووايييييي .

اخذ ايدي باسها واقترب باس خدي وهمس:- اعوضج بيوم من الأيام.

زهراء:- بس كف ايدك عني وكلشي ما اريد .

أبتسم ويا ما يريد يحجي دخل هشام صاح:- ها ولك عوف زوجة اخوي
ختلت بيها ما شايف .

الغيهب:- لا وين شايف قابل اني هشام اربع وعشرين ساعة خاتل بالغرفة .

هشام:- شلون يجبرني افضح المستور ، اخ يا زهراء لو تشوفين الطفرة
الصارت القرد ما يلحك الغيهب من خابر ايهاب وكال زهراء بالمستشفى
صار خبل طلع بالتراك يصيح ودونييي ، لان تعوق ما يكدر يسوق .

الغيهب:- ما اريد اتجاوز خليني محترمك .

هشام:- يعني ما احجي .

الغيهب:- اطلع يلااااا ..

هشام:- رايح اجيب بطل سڤن .

الغيهب:- شسوي بي .

هشام:- الزهراء لان انت  من تحجي يراد بطل سڤن حتى تنبلع .

وكف الغيهب يريد يلزم هشام وهذا طفر وسد الباب
خربني من الضحك ولا يستقر ، رجع الغيهب تريكت اني ويا
من كملت شربني أدويتي  وهو هم شرب ، دك تلفونه وهو يشرب
يريد يطلع ما بحجي كدامي صحت :- اوكف بـ مكانك غيهب .

التفتت وهمس:- بيج شي .

اشرت بيدي :- تعال

رجع مستغرب من كلامي همست:- افتح خط وارفع الصوت .

الغيهب:- ليش .

زهراء:- الغيهب .

الغيهب:- اعصابج يمعودة هاااج افتحي بيدج .

فتح خط واجه صوت رجل سلم وبعد السلام كال:- خوية اسبوع الجاي
اول جلسة شلون كلشي ما متفقين .

الغيهب:- ولوعندي ضروف بس اجبر نفسي باجر الساعة 5 تعال للمكتب

بدا الرجال يحجي بالقضية وغيهب يستجوب بي أول مره اشوف
شلون يحجي وبكل طلاقة ، شوية واشر يريد يطلع ، ابتسمت وهزيت
راسي فر ايده وطلع من الغرفة .

مر وكت طوويل بعد ما رجع ، احتاجيت اروح للحمام
بيه ما بيه طلعت من غرفة عمتي للحمام ، من خلصت
غسلت وطلعت لفت إنتباهي حركه خارج الكراج
توجهت بخطوات ثقيلة للباب فتحت الباب بدون صوت
ردت أتفقد الغيهب ..

خرجت روُحـي ، وقف الزمن هنا ، انهدم ڪُـل ذرة امل حملتها بداخلي
بـ اصلاح الغيهب هنا رجعت لازم ينهدم كلشي ونسترجع الحرب

حرب الغيهب وزهراء ما تنتهي ولا راح تنتهي ما دام الشيطان بالنص
والغيهب مو راضي ينهي .

جمدت اطراف رجلي واني اشوف موج والمصيبه الكبرى
متقربين ؏ بعض وموج بكل ثقة تطبع بوستها ؏ شفايف الغيهب ...

يتبع ....

- البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد .