رواية ظلمات الغيهب الفصل الحادي وأربعون 41 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _38_

انــه
أنـه المايدري شيسوي
أنـه الضايع مثل تعبي
أنـه الحاير بروحه شلون
أنـه المحروك بيه الدم
أنـه ؏ العشرة متندم
أنـه الماينفكد لو غاب
أنـه الطاريه ما ينجلب
أنـه الشدت الدنيا ويا
أنـه الناقش اثر مبجاه
أنـه الشوغاته ما تصفن
أنـه الماله عزيز يحن
أنـه الخلك خلك مسجون
أنـه الكلشي بيه يون .
..........................
زهراء..

نزل بنت هاجر وهجم وهو موسع عيونه
يوزع نظراته بيني وبين جلال :- هذا القذر شيسوي هنـــا .

ابو الغيهب:- اجه يشوفني امك دائما توصيني اذا صار بيها
شي جلال برجع بنصنه ما اريد اكسر بخاطر امك
خلي روحها ترتاح .

جلال:- غيهب بروح امي كافي تعبت وتندمت
شوف رأسي انترس شيب الله يخليك سامحني والله
بعد ما اغلط .

تقدم سحبه من قميصه وصاح :- أطلع بره جلال ما اريد أشوه وجهك .

لزمت ايده وهمست بترجي:- غيهب لا تستعجل بس أريد احجي وياك
دقايق والله .

دفعني وصاح :- ولا صوت وانتَ هم تطلعين بسرعة .

زهراء:- لا تتهور بس نحجي هاي شبيك .

نزل هشام كلمة مني وكلمة منه صعدنا فوك
طلبت من هشام اني أتفاهم وياه اول ما دخلنا
الغرفة شمرني ؏ حايط وكف بعيد عني :- ليش توكفين بصف جلال
من سمحلج تطلعين وليش تدخلين .

زهراء:- وانتَ ليش عصبي وبس تنتر الى متى تبقه
ما تعرف تتفاهم وبس تعلي صوتك تره احنه هم نعرف نصرخ .

سد حلگي بقوة وهمس بتحذير :- لا تختبرين صبري
عليج والله الزمج دك ما ارحم حالج .

بقيت صافنه واني اتذكر الخطه التكتيكية
وهي الحل الأمثل تفيدني  مع الغيهب .

بست كف ايده المخليها ؏ حلگي
هو طابك حاجبه ويباع بغضب جسمه كله
يرتعد من الأعصاب رفعت أيدي طوقت
ركبته نزل ايده اقتربت طبعت بوسه
خفيفه ؏ خده وهمست :- ما عاش الـ يعلي صوته بوجهك
بس انقهرنا علية وهذا اخوك عمتي موصية عمي علية
وخطيه عمو احتار بينه وبينك .

الغيهب:- لا تدخلين بالموضوع لا أكسر راسج .

زهراء:- هاي اني گدامك كسر راسي بس تره گلبك
ما ينطيك اني زهرتك تالي اليل تنام بحضن منو اذا تكسر راسي . 

رخت ملامح وجهه وهمس :- اششش ولا صوت
ما أريد اسمع صوتج وللمرة الآخيرة انطيج إنذار
لا تدخلين أعيدها بعد .

هزيت راسي وهمست واني اطبع بوسهً
ثانية بطرف شفايفه :- لا تعب نفسك وتعيدها بس أسمعني
أخر مره اذا تشوف كلامي غلط أنزل شسوي بي سوي .

صك ؏ اسنانه ورجع شعره للخلف وهو يهمس :- طربيني .

- حبيبي صار الوقت تثبت للكل انتَ تعالجت من الماضي
ونسيت كلشي وبديت ويايه حياة جديدة
بدينا من جديد وتخطيت جلال
اثبت للكل موج بعد ما تهمك
لا تكسر بخاطر ابوك ما بقالكم غيره
صير أحسن منهم وتعامل بالأحسن  .

الغيهب:- من اباوع بوجهه أذكر ذاك اليوم
من غدرني وضربني بكل حقد علمودها
واخذها واني بالكاع انزف وشرد هو وياها
اتذكر ....... استغفر الله ما أريده زهراء لا تضغطون علية .

- هذا ماضي ومهما صار انتَ تعرف موج شكد
ادبسز هِـيِّ لعبتها صح مثل هيام ، لا تسمحون
الـ أمثالهن يهدمون صلة الرحم بينكم .

ابتعد وهو ينزع ملابسه اتجاهلني ودخل
للحمام سبح وطلع بدل وهمس :- حضري الأكل.

زهراء:- توعدني ما تسوي مشاكل .

الغيهب:- أحاول .

زهراء:- تنزل هيج .

حجيتها واني أحرك اصبعي ؏ طوله
نزل راسه يباوع ؏ نفسه وهو يرد بتعجب
فاتح أيده ويفر برأسه:- شبيهن ليش ما إنزل بيهن.

زهراء:- تلبس فانيله وبرمودة كدام البنات .

الغيهب:- لا ألبس عباية الدنيا تسمط من الحر بابا
لعد شلبس هي فانيله سوده عبالك نازل مصلخ .

زهراء:- ما تسكت والله بطران البس مثل
العالم والناس وأنزل .

الغيهب:- مو اشتغلج غلط والله احجي عدل لا تعرفين شسوي .

زهراء:- شمسويتلك .

الغيهب:- ما تحترمين .

زهراء:- هو شنو ما احترام دروح شوف النسوان
ضحك وتحسيش ويا زلمهن بس انتَ معقد
حقنه غدي اوووع .

صفك ايده ورفع أصبعه عضه وهو يحجي دمه
محروك حرك :- يابويه اتمناج مو حامل
بوياااايييي اذا ما اسويج طوبة والعب بيج .

دفعني وهو يطلع من الغرفة يدردم :- خلك خبالو أتعب
نفسي وياج ليش .

عدلت نفسي ونزلت ركض وياه
وكفت بالمطبخ الكل نازلين
رتبنا الأكل وكعدنا سوه هشام
يسولف ويا جلال ويسأله عن شغله
والغيهب ڪُـل خزره ينطيها الهشام
وجلال تخليهم يسكتون بس هشام
سرعان ما يرجع يحجي وما يهتم .

الغيهب:- الأكل اليوم مو طيب شنو السالفة .

عمي بسرعة لكفها ورد علية:- طيب اكل وأسكت.

الغيهب:- أجذب عليك شنو أكلك مو طيب التمن ما مستوي زين .

رفع تمن بيده ومرده :- شبي رايح مستوي ومتهدر
تريده عجين .

زهراء:- أكل وكول الحمدلله ، هاي اني طبخت يعني طيب .

الغيهب:- وشنو يعني انتِ طبختي منال العالم طابخه
حسني من الطبخ مو طيب .

صكيت ؏ أسناني ورفع ايدي طبطبت
؏ ظهره وهمست:- اذا ما عاجبك لا تاكل
روح اخذ جبن من الثلاجة مو خلصت الماعون
وتصيح مو طيب .

هشام:- أقرا الفاتحة ؏ روح امي وكوم وانتَ ساكت
لا تعرس عليك خبالو شيخلصك بعد .

باوعلنا صفح وكام وهو يهز بيده ما عاجبه
الوضع ، غسل ورجع كعد بصف جلال :- شعندك اليوم هنا
فاتحين دار للعاريه وين ماكو عار يلفي عدنا .

جلال مجرد ما يباوع علية ما نطق
بحرف هشام رد بدل عنه :- عوف الولد تعبان ومريض
وأصعد بغرفتك نام .

زهراء اخذي وصعدي هذا دوخني .

الغيهب:- للعلم ماعندك غرفة تنام بيها
أرجع منين ما اجيت أحسن.

جلال:- نطلع نتفاهم بره اني وياك وحدنا .

الغيهب:- ما احجي ويا عار مثلك حتى
ما أنزل المستواك القذز ، اني صاعد أنام من اكعد
ما اريد اشوفك افتهمت .

ابو الغيهب:- أصعد هسة ومن تكعد يصير خير
لا تشهرنا كاعدين ناكل عديها وخلي الكح.... البداخلك نايمة .

عافهم وصعد بقيت كلشي عليهم وصعدت
أشوفه ثكلت وجهي ودخلت تحمحم وهمس :- الأكل طيب ما جنت
اقصدج بس حلكي مر بسبب هذا .

زهراء :- شمسويلك هو كاعد وساكت انتَ تتحارش
وتجاوز الرجال باقي ساكت .

الغيهب:- اي اني مو أدمي.

زهراء :- تعرف كلش زين هذا مو قصدي
لا دور حجج تتعارك بيهن ويايه .

الغيهب:- يعني اني ابو مشاكل .

وسعت عيوني اباوعله بصدمة :- شبيك غيهب شبيك .

الغيهب:- أتقي شري اليوم روحـي بخشمي .

فتحت الباب واني ارد علية :- أعطسها .

الغيهب:- ولج تعالي هناا بعدني ما خلصت كلامي .

طفرت فوك الغرفة هاجر حتى ما نزلت
جوه دكيت الباب وصلني صوتها
فتحت الباب لكيتها مسبحه جهالها
وأكفه تبدللهم ابتسمت وهي تهمس
بصوتها الدافي:- هاا تتنفسين سريع
تركضين شنو ، بس لا تعاركوا.

زهراء:- مو عركة بس هو يدور مشاكل
كلت أخلي يهدأ وبعدين احجي وأخذ ثاري.

هاجر:- زين تسوين بي يستاهل
تعالي فوتي شفتج ما اكلتي زين طلعي عصير خلينا نبرد قلوبنا .

اخذت عصير وجهالها شغلوا التلفزيون يباوعون
كعدنا انسولف اني وياها تحجيلي عن الدوام
وعن حياتها واستقرارها رغم ضروف اهلها
بس هي مرتاحة ماكو ذل واهانة بحياتها مثل قبل .

للعصر نزلنا اني وياها لكيت عمي بعده كاعد
هو وجلال وأضح ؏ عمي شكد فرحان وهو يشوف
أبنه كدامه العرفته من خلال كلامهم وتصرفاتهم
جلال المدلل عدهم كان ما يرفضون اله طلب نهائيًا.

هشام عبالي نايم دخل من بره متسوك
وأمير وياه ، نزل الغيهب كعد بدون ما ينطق بحرف
ابو الغيهب:- هاي المشموره فوك ما تفتح الباب ننطيها اكل .

- لازم هم راح تدخل وتنقهر وتنزلها وتحجي وياها
وعيني واغاتي وتبقيها يمي وانتِ بحمايتي هل سوالف حفظناها.

ابو الغيهب:- صدك ما تستحي هو سؤال ما يحتاج هل كلام
بس اني غلطان خايف عليك .

- هههههه خليني ساكت گال يخاف علية .

عافه وصعد فوك اقل ساعة وصوت الصراخ يهلهل فوك
راسنا صعدوا الولد بسرعة بس جلال جمد بمكانه يباوع بالوجوه
ما مستوعب ولا يعرف الديصير شنو ومنو وشكو .

انوب من يمي خجلت منه شلون صافن
احسه غريب بيناتنا ، أريد امشي رجلي يبست
كوه وكفت ورحت للدرج تراجعت للخلف
وأني أشوفه نزل هيام سحل من شعرها
شمرها بالمطبخ وصرخ :- من اليوم هذا مكانج هنا
تنامين حالج حال البنكلادش تنظيف البيت عليج والحمامات
تغسليهن بوجهج ، وممنوع تنامين اله تالي اليل ؏ مخدة
بدون فراش  افتهمتي .

هشام:- أرفع ايدك مو هيج الحجي يمعود حلها بالتفاهم .

الغيهب :- مع أمثالها ما ينفع غير هل أسلوب
هي وشهادتها تغسل حمامات وتنام بالمطبخ
هذا مستواها.

هشام:- هيام لا ترخصين نفسج هيج لج بابا عيب
أنتِ محامية شهادة ومركز ليش هيج تذلين نفسج
وقعي وخلصي نفسج .

هيام:- بعد ڪُـل هل ذل والإهانة والضرب تريد
أتنازل لا وروح امي وابوية خلي يموتني بس
عناد بيه ما اتنازل خلي شيسوي يسوي .

كمز أمير طوق أيده هو من العصبية
صار يرجف :-  انعل امج وابوج على هيج تربية يا كلبه
واني هن ما اقبل اطلكج اخليج خدامة النا
وين ما اشوفج أدك عليج اشبعج كتل والله .

ابو الغيهب:- سمعي مني وطلعي منا بابا
لا تأذين نفسج أكثر .

هيام:- اريد اطلع عمو طلعني بس ما أتنازل
عن البيت واريد ابقى زوجته .

الغيهب:- وبرأيج  شنو نوع الكرون الـ أشدها.

هاجر:- غيهب عوفها فوك ما نريد انشوف وجهه
ما اكول غير حرامات التعب بيج مع الاسف الشهادة العندج
ما تستحقيها والله لو اندل وين يبيعون كرامة اشتريلج .

كعدت بكل ثقة ؏ كرسي
ايدها ؏ راسها هو صعد اخذ سويج السيارة
وطلع رجعنا ؏ كعدتنا عمي شوية وعافنا
وراح يمها انطاها اكل وكعد يقنع بيها
ويحجي وينصح وهي ولا عبالك
ما تقبل تتنازل عن الـ براسها .

رجع بليل هادئ عكس من طلع 
كعد ويانا يحجي ويضحك ويسولف
بس عبالك جلال ماكو هيج يتصرف بعدم مبالاة .

وقبل لا يصعد همس :- هاجر رتبي الغرفة الفوك جلال ينام بيها .

وقبل لا نستوعب صعد فوك من الفرحة
الدنيا ما وسعتهم صعدنا بسرعة اني وياها
غسلناها للنص وعفتها ودخلت للحمام
اختنكت وبعد ما أكدر أسحب نفس
دخلت للغرفة وجهي أصفر بس بدلت
ودخلت بفراشي نمت ؏ ضهري يوجعني
غفيت من التعب وأني خايفه.

باليل حسيت بي رفعني وهو يهمس :- تسمعيني شبيج زهراء .

فتحت عيوني بصعوبة ورديت بتعب
واضح ؏ صوتي :- ما أدري بس جسمي يوجعني
صار فترة تجيني هل حالة وتروح وحدها.

رجعت غفيت واني احجي واعرف بنفسي
أهذي واخربط بالكلام ، دقايق وحسيت بمي بارد
وهاجر واكفه يمي تبدلي ، فتحت عيوني احسها نار
وتطلع منها .

الغيهب يفتر يبدل وتوجه للكنتور طلع فلوس
وصلني روحه مفرفحه :- ساعديني نروح للمستشفى.

هاجر :- يااخي والله ما يحتاج تعودنا عليها
ڪُـل فترة ترتفع حرارتها بعدين تنزل .

الغيهب:- مخبله انتِ هاي حرارة مو لعبة
وخابرت صديقي يكول بيها خطورة ؏ حياتها
وحياة الطفل .

سحبني من خصري وكفني سندت نفسي علية
ونزلنا عمي قلقان ويحاول يهدي بي هو حتى ما يسمعهم

جلال:- أسوق السيارة وانتَ تكعد يمها .

الغيهب:- لا تدخل بشي ما يعنيك خليك بنفسك .

صعدني وصعد هو وما قبل ينتظر واحد بيهم
ونسيت الوجع ؏ سياقته المعوقه حسيت بطلوكه
من الخوف الى ان وصلنا هلكني هلاك
نزلت حولوني طوارئ فحوصات وكشف
والدكتورة تحجي معلك ما افتهم منها شي
عفتهم وطلعت عود هاي مستشفى أهلي

زهراء:- فدوة نطلع وباجر اروح الدكتورتي
اني ما اعرف اتفاهم بس وياها هي تفهمني .

الغيهب:- ؏ اقل إبره تنزل الحرارة.

زهراء:- عندي علاج غيهب طلعني منا .

اخذني من ايدي ورجعنا الطريق
كله يحجي أرد علية بكلمة لو كلمتين
أول ما دخلت صعدت ولفيت راسي
ونمت خلصتها نوم الثاني يوم العصر
كعدني الحرارة تزيد ما تنقص فجأة تجي
وتطحن عظامي طحن .

بقيت أون ودموعي تنزل ؏ خدي من الوجع
ذب ملابسي ودخلني للحمام سبحني بيده الترجف
رجف كعدني ؏ كرسي نشف شعري وبدلت
هو يفهمني :- حجزت من الصبح عند دكتورتج
ثاني اسم انتـ استعجلي حتى نوصل بسرعه.

طلعنا حتى الشارع ما أشوفه حتى السكرتيره
عرفتني بسرعة دخلت شافتني الدكتورة
وضحكت :- ها زهراء هم صعدت حرارتج مو كلت
خليج بعيدة عن القلق والتوتر والمشاكل بصورة عامة .

التفتت الغيهب وهمست :- شلون أفهمها حياتنا دك أكشن
شلون افهمها زوجي يتعاطى مشاكل
يتنفس مشاكل
يشتري مشاكل
ياكل مشاكل
يموت بدون مشاكل .

تقرب مني اكثر وهمس:- لازم اتعارك وياها حتى
تاخذ فكرة عن حياتنا.

زهراء:- استرها علينا يمعود بعدني حامل .

الغيهب:- اعديها بعد الولادة أستلمها.

زهراء:- ما تسكت مني عبالك تايهين العالم.

الدكتورة:- بيا شهر زهراء.

زهراء:- اليوم رابع يوم بالتاسع .

الدكتورة:- بدأنا بالعد التنازلي.

الغيهب:- يا عد تنازلي دكتورة النسوان
الصار عدهن حمل وياها صارت عدهن ولادة
وجهالهم كبروا وتزوجوا وخلفوا وهي بعدها
هسة فاتت بالعد التنازلي .

الدكتورة:- هههه خطية هي اول حمل صعب وثكيل
الله يساعدها ويكومها بالسلامة .

الغيهب:- تسلمين بس شوكت تولد بلازحمة تره
طلعت روحـي أطول حمل بالعالم صار عدها .

الدكتورة:- أريد افحصها تكدر تنتظرها بصالة
الانتظار دقايق وتطلع .

تشكر منها وطلع كشفت علية
سجلتلي علاج يخفض الحرارة وطلعت
كعدني وكف يستفسر مني :- بشري .

زهراء:- كالت بعد مو هسة بعدني بـ أول ايامي
لازم ما نستعجل .

الغيهب:- يلا بقت ؏ هل كم يوم .

زهراء:- تكول لازم أمشي ڪُـل يوم
اقل شي ساعة .

الغيهب:- ادللي .

طلعنا اخذ العلاج ضربت أبره
واخذني المطعم اكلنا سوه
وما قبل نرجع بقينا نمشي بالمنصور
دخلني ؏ محل ملابس أطفال
اشتريت آو بالأصح هو يشتري
بس يجي يكلي :- ها هذا حلو ، اي اي حلو اخذه كعدي انتِ
بس باعي.

اخر شي طكت روحـي عبالك اني مو امه
عطت بي :- هو شنو غير اني امه أختار
الـ أبني ؏ ذوقي .

الغيهب:- لازمج ما تروحين تختارين .

زهراء:- لازم نروح اني وياك نتناقش ونختار.

الغيهب:- تعالي أخذي راشدي .

انوب صدك فشلت عليت صوتي
علية فقدت مدري من الحرارة
لو التعب :- مو قصدي أسفة.

الغيهب:- لا والله تعالي أخذي راشدي حتى ترتاحين .

زهراء:- مو كلت اسفة والنبي تعبانه.

جر نفس وتقدم رفعني وهمس :- نروح ؏ محل ثاني .

ابتسمت اضيع السالفة وهمست :- اي ونختار كاروك هزاز .

الغيهب:- صار يلا بدون ما تعلين صوتج .

حكيت خشمي هو راح تحاسب
ورجعنا نفتر دخلت اخذت كاروك هزاز
لون ابيض حتى يكعد ؏ لون الغرفة
اخذت بوكس كامل صابون شامبو
وحتى حفاظات كلنكس قطن
ما خلينا شي ناقص كملنا ڪُـل الـ احتياجات
بيوم ، رجعني للسيارة ذب الغراض وراح
يشتري عصير برتقال طبيعي شربت
منه ردت روحـي .

رجعت تعبانة بالزايد
هاجر  اخذت الملابس ورغم حزنهم يفتحون بيهن وخربانين
ضحك :- شنو هذا وين يصير ؏ طفل
وبعدين من هسة تريد الولد يلبس بناطير وقمصان
ورباط غير يختنك .

زهراء:- حجيت وما فاد بقيت ساكته .

سحب منها تراك وهمس :- دشوفي صغير يمعودة
اصغر من جف أيدي قابل راح تولد زرزور.

هشام:- ؏ مصايب الله وكيلك اذا يطلع نص
كيلو أصلي صلاة شكر .

باوعلي وهو يرمش همس :- زهرتي يحجون ؏ زوجج
يا مصايب هاا اني مسوي بيج مصايب .

نزلت راسي ورفعت ايدي صحت :- لاااااا يتهموك
باطل وين اكو منك نسمة هوه باردة من شفتك لليوم

باوعت ؏ هشام وهمست :- بيوم من الأيام شفت الغيهب
يعلي صوته عليه .

هشام:- أبد .

زهراء:- بيوم من الايام شفتوا الغيهب مسوي عرس .

هشام:- ابد .

زهراء:- خاني .

هشام:- ابد .

زهراء:- بعد ليش تحجي علية هل وردة.

اباوع علية يخزر بينه بقرف وكف وهو يدردم :- سفله .

عافنه ودخل الغرفة عمي وهشام راح ويا
هاجر اخذت الغراض رتبتهن بالكنتور
واني ذبيت ملابسي وكعدت اسولف
؏ غيهب :- ما توقعت بيوم يهتم بـ هل موضوع
هو رافض فكرة الطفل لو تشوفين لهفته
وهو يختار الملابس حتى أختفى الوجع .

هاجر:- أتغير كلشي زهراء هو عرف انتِ تختلفين
انتِ المميزة بينهن كلهن واذا هو لليوم ما معترف
بحبه بس تصرفاته تفضحه وروح الغالية يحبج
بس ما يريد ينطقها الى ان يعنيها اخوية وأعرف تفكيره .

زهراء:- بقت أمنية عندي اسمعها منه .

هاجر:- تسمعيها وداعت هل عيون المريضة
كومي نامي وارتاحي وكلشي يهون .

هزيت راسي عافتني وطلعت
حلكي مر الساني خشبة اخذت عصير
وكعدت اشرب واحجي إني ورجاء.

رجاء:- زهراء أعرف وضعج ما يسمح وعدكم وفاة
بس والله خجلانة منج .

زهراء:- شكو حبيبتي شصاير .

رجاء:- أتفقنا أسبوع الجاي عقد السيد .

رديت والضحكة انرسمت ؏ وجهي :- حلفي .

رجاء:- والله حاولت نأجل الخاطرج اريدج
موجودة وياي بس الكل رفض وكالوا ما نريد تأخير .

زهراء:- أبد لا تأجليها عقدوا وبالعرس اني وياج
بس هسة تعذريني احترامًا للغيهب ولعيالي ما أكدر.

رجاء:- عاذرتج اريد تسامحيني وروح ماما ردت
نأجل بس ما قبلوا.

زهراء:- بيها الخير ياروحي اتمنالج ڪُـل السعادة
وخلي ببالج راح تزوجين ونعم الرجل رفعي راسج بي .

رجاء:- ماعندي غيره أرفع راسي بي هو ڪُـل حياتي .

زهراء:- ما راح انساج بكل صلاة اذكرج
ربي يبعد عنج ڪُـل شخص ما يحب الخير الج ويكمل كلشي ؏ خير .

رجاء:- امين ، اني اروح وكل يومية اخابرج اشوف وضعج
واذا تحتاجيني اتصال واحد تلكيني يمج .

زهراء :- ماتقصرين يا حبيبتي مع السلامة .

سديته وياها دخل الغيهب ابتسم وهمس:- بشري شلونج .

رجعت شعري وره أذني ورديت برتباك:- زينة أحسن من البارحة .

كعد بصفي يتلمس بشرتي
بـ أطراف اصابيعه :- عندي موضوع وياج بس .

نزل رأسه وأخذ أيدي يلاعب اصابيعي :- مضطر أسافر باجر .

زهراء:- تسافر وين وليش .

تقدم طبع بوسه سريعة ؏ طرف
شفايفي وكمل :- خابرني دكتور ابوية لازم يسوي عملية
لعيونه وعكب باجر حددها الدكتور اخوتي دوام عدهم
اني مخلص ڪُـل القضايا العندي بس انتِ شلون .

زهراء:- الدكتورة كالت بعد وقت روح وان شاء الله
بعد ما ترجع تصير ولادة لا يظل بالك علية .

الغيهب:- يعني ما ضجتي مني .

زهراء:- لا بالعكس أحبك من تهتم بالكل وتحسب أحسابهم.

نزل راسه باس ركبتي لفحتني حرارة أنفاسه
غلقت عيني واني اسمع وأركز بكل حرف
ينطق بي :- انتوا ڪُـل حياتي ، انتِ خليتيني أرجع
احب اهلي بعد ما كرهتهم ، أتمنى أرجع ربع
وكفاتج ويايه .

زهراء:- وجودك واهتمامك بيه يسوه الدنيا ومابيها عندي .

بأس راسي وكف يتهرب واني مثله
صرنا واحد يمنع نفسه من الثاني
هو رافض يتقربلي يخاف يأذيني
وإني أخاف منه لا يفقد السيطرة ؏ نفسة
مثل ڪُـل مره يحاول يتقربلي ويفشل
وتنتهي بكارثة وزعل وعركة
لهذا صار يجنبني ويكتفي
يبوسني او ينام بحضني .

سحب الجنطة رتب ملابسه
وهو مندمج يسولف عن الدوام
وشوية عن السفر والعملية
كمل وذبها ؏ جهه اخذ علاجي
شربني وحده وحده وسحبني
الـ حضنه نمت براحه
وما حسيت ؏ نفسي الى ان صار الصبح
باس راسي وفزيت :- اني رايح زهرتي ديري بالج
؏ نفسج وحاولي ما تتحركين ابد الى أن ارجع .

زهراء:- بس توصلون طمنوني عليكم .

الغيهب :- نتخابر كاميرا.

هزيت برأسي وابتسمت:- مثل ايام تركيا.

كرص خدي وهمس:- تدللين يا نعمة الرحمن.

عدلت شعره وهمست :- أحبك يا لعنة حياتي.

ضحك وأخذ الجنطة وطلع
رجعت نمت كعدت العصر
؏ صوت هاجر عدلت نفسي ونزلت :- شكو هاجر .

اباوعلها اعصابها متشنجة:- ماكو شي بس احجي ويا هل
اثنين بلا تربية والله .

فرح:- مو والله هسة اخليج هنا وافرك مصارينج المطلقة.

لطمت ؏ وجهي وصحت بيها :- عزا العزاج شنو هل كلام .

فرح:- انجبي ولا تسوين نفسج محامي الدفاع
وخليها ابالج شوية هل مطلقه احسن منج من تزوج
عليها لان يعرف بيها نقص طلبت طلاق
انتِ كلششش زايحتها سحلج خانج شفتي بفراش وحده
وتزوج وكعدها مقابيلج وبعدج وياه لان لا اصل لا فصل
لا شرف لا نعايل عتك  .

زهراء:- وانتِ احسن مني اني اذا حمايه يوكف ويغلط
علية ادفن نفسي ، لازم نسيتي أمير شلون سحلج سحل
ومسح بكرامتج الكاع ولو ما اني وهشام سحبناچ جنازة
من ايده راد يموتج ، وما مر غير كم يوم وكلتي اريدكم ورجعوني
وحتى ما احترمج راح عمي رجعج الخاطر الجهال
او تبقه ؏ امير ما يباوع بوجهج بس حكم القوي
وامير جهاله جابري عليج والدليل اسبوع هو نايم جوه
لو ما وفاة عمتي رجعته يحجي وياج وهسسسة
وين كرامتج .

طفرت ؏ مجرات سحبت
هاون بوجهي اريد أمشي جمدت أطرافي
دفعتها هاجر وهي ضربتها ؏ ايدها :- زهراء ركضي بره .

احتاريت بين هاجر وبين أطلع
رجعت هاجر عاطت علية شردت للكراج
لكيت جلال كاعد بالحديقه ومخلي سماعات
أندفع الباب تريد تطلع سحب السماعة وصاح:- شكووووو .

هي ولا تهتم كمزت تريد تضربني
سحبني من أيدي شمرني وره ظهره
دفعها بكل قوته وسحب الهاون من ايدها:- هاي ڪُـل عقلها
انطيني .

شو هاي انفتحت ؏ جلال :- باع منو يحجي الخاين
؏ كولت الغيهب القذر شعندك دمك حار عشتوو
لو ما انتَ نفسك نمت وتزوجت عرض اخوك
الظاهر هل مره الدور ؏ زهيرة .

جلال:- مو طبعي امد أيدي ؏ نسوان اخوتي
ابقى ساكت من يرجع اخوية يشوف حل وياج .

رفع التلفون خابر ؏ أمير وعلى هشام
ماكو دقايق ودخلوا هي شردت الغرفتها

حجينا كلشي هشام ترك الكل وركض للكاميرا
جلال:- شسوي هشام .

هشام:- أحذف التسجيل لا الغيهب يشوف كلشي
ويرجع يموتها .

وفعلًا حذف كلشي أمير عافنا وصعد فوك
بلا صياح ولا ضرب نزلها بعبايه ذب
الجهال بحضن هاجر وسحب فرح من ايدها وشمرها
بالسيارة .

هشام:- أمير اوكف .

أمير:- لا تحجي وياي عوفوني ما أريد أرتكب جريمة.

شغل السيارة وطلع ، التفتت هاجر ماكو
زهراء:- وينها .

جلال:- صعدت .

عفته وصعدت لكيتها دموعها
تجري ؏ خدها وصورة عمتي ؏ كلبها
حضنتها وهمست :- كلش زين تعرفين المطلقه
مو عار انتَ فخر اني اخذ القوة منج  انتِ قدوتي
مرات احسد قوتج انتِ مطلقه حافظتي ؏ نفسج
وصحتج وكرامتج واطفالج المفروض ترفعين راسج .

هاجر:- ما انقهر من كلمتها بكثر ما انقهر ؏ أمير.

زهراء:- يجي يوم ويخلص منها .

صاح علينا هشام نزلت اني هاجر ما تقبل
لكيت هيام كاعدة بالمطبخ مأخذه دور اني ما إلي شغل .

تجاهلتها وكعدت احجي ويا هشام
رتبت البيت وعفت كلشي وصعدت .

صرنا نجنب نكعد سوه ؏ كد الاكل
بس نخلص ڪُـل واحد ياخذ عائلته
ويدخل غرفته.

ويوم بعد يوم وبعد مرور 12 يوم
؏ غياب عمي والغيهب
جنت نايمة بفراشي الساعة سبعة الصبح
كعدت ؏ وجعع ابطني بس أول مره أحس بهيج
وجع ما ينطاق رفعت نفسي ملابسي مبلله
صرت ارعش مو بس من الوجع لا من الخوف
والزاد الطين بلة غيهب مو ويايه

هزيت رأسي بـ رفض وكمت
من فراشي ودموعي تصب ؏ خدي
اول ما وكفت نزلت حرارة قوية ؏ رجلي صرخت
بخوف ؏ فزع وطلعت من غرفتي
صحت ؏ هاجر ماكو رد
نزلت بخطوات ثقيلة احس بطني نزلت
بشكل مخيف هيام نايمة بالمطبخ صحت
بـ أسمها وإني متألمة:- هييييام لحكيلي هيام .

فزت من مكانها تباوعلي ببرود :- شكووو من الصبح .

عطت بصوت :- صعدي الهاجر كوليلها زهراء عدها ولادة.

رجعت لفراشها وهي ترد بلامبالاة:- خابريها وطلعي منا لا دوخيني .

؏ صوتي نزل جلال وأضح مبدل يريد يطلع للدوام :- شبيج .

زهراء:- بطني توجعني عفية اريد هاجر .

جلال:- يعني شنو ولادة.

زهراء:- اي لعد شنو .

جلال:- لازم شنسوي .

زهراء:- عزا ما ادري روح الهاجر.

جلال :- هاجر وين .

زهراء:-  خرب حضي فوك فوك بسرررعة .

ركض وهو مخبوص لحظات ونزل هو وياها
هي شافتني وتخبلت بسرعة بدلت وصاحت
هشام بين ما بدل هشام هي حضرت الجنطة .

هيام:- لا تونين فوك راسي روحـي هناك .

زهراء:- ما أنساها بس أخلص من هل شده احجي للغيهب اذا
ما اخلي يدوس راسج بالقندرة.

نزل هشام وسجى تصبر بيه
وتقرأ ايات ؏ بطني وتفرك بظهري
الى أن طلعنا صارت أقوى من قبل
صرت أصرخ بلا وعي ملخت نفسي
الى ان وصلت المستشفى أهليه
اخذوني منهم فحصوا ضغطي
وسكري وآني منتهيه يقيسون وزني
دخل بـ 80 دخلوني الغرفة خاصة
نزعت ملابسي شكللي مغذي
بيدي واني تهسترت ملخت وجهي
كطعت ملابسي هاجر يمي أصرخ
عليها حتى تصيح ؏ دكتورة وتخلصني 
وصلت حدها حسيت راح اموت
وطلكات تروح وترجع
اول ما قلت همست بتعب :- أريد غيهب خابري .

بعدني احجيها ورجعتلي خلتني ادك راسي بالحايط
هاجر:- زهراء بس يسمع صوتج هيج يتخبل .

زهراء:- اريد أسمع صوته هاجر .

خابرته  وآني أصرخ بعلو صوتي
بس راحت مني اخذت التلفون وهمست واني اناشغ:- غيهب .

الغيهب:- صوووتج رايح زهرتي أسف.

زهراء:- أريدك غيهب .

الغيهب:- وداعت عيونج بس مسافة الطريق من أربيل
البغداد واني يمج تكوميلي بالسلامة شدي حيلج
اني اريدج زهراء لا تعوفيني .

شمرت التلفون ورجعت أصرخ
فقدت الى ان اجتي الدكتورة
وياها جده وممرضات اثنين
دخلوني الصالة الولادة
لحظات بعمري ما انساها

ألم ، خوف ، رهبة ، لحظات رعب
تخيلات موت فقدان اشتياق
أختفت وكلشي أنزال وتبخر
واني أشوف (ملاكي )گدامي
بجيت واني اسمع  صوته
اجمل احساس وأعظم شعور
فرح ، سعادة واني أخلي بحضني

زهراء:- يا بعد ڪُـل تعبي أجيت يا حبيب امك .

أخذوا مني يسبحوا واني كملت ويايه الدكتورة
انتهيت بعد ما كدرت أفتح عيوني ولزمتني رجفة
غطوني وطلعوني للغرفة اخر شي حسيت
بي وسمعته صوت هاجر :- الف الحمدلله ؏ سلامة زهوره.

بعدها نمت بعمق ما حسيت غير ؏ بوسات
تتوزع بـ أنحاء وجهي فتحت عيوني
صار مقابيلي دموعه بعيونه تلالي :- الحمدلله ؏ سلامتج .

زهراء:- الله يسلمك حبيبي .

دخلت هاجر بيدها الطفل
وياها هشام :- لك ام الزوز صارت ام يا ويلي
الف الف مبروك يتربى بعزكم.

زهراء:- تسلم هشام.

صارت عيني ؏ طفل
قدمته هاجر للغيهب أيده ترجف:- ما اعرف هاجر أخاف يوكع مني .

هاجر:- لالا ما يوكع خلي بحضنك وكبر بـ أذنه
وها شنو راح يكون أسمة.

باوعلي وهمس وهو يمسح دموعه:- تسمحيلي آني أسمي.

زهراء:- إي طبعًا.

صار قريب ؏ أذنه وهمس :- الله أكبر الله اكبر
لا إله إلّا الله ،  لا إله إلّا الله اسميتك (نور )
نور الغيهب
نور الظلمات.

سديت حلكي بيدي واني اشهك ؏ منظرهم
هاجر وهشام عافونا وطلعوا إقترب مني
باس راسي وهو مستمر يمسح بدموعه:- اصريتي تهديلي نور
ورغم اذيتكم هاي انتوا بين ايدي نور وزهراء
انتِ حواء كدرتي تكونين عائلة لشخص عاش بقاع الظلام
اليوم اني بنص النور كم انتِ عظيمة يا حواء .

وآحده تستطيع تغير الكثير والكثير نعم انها حواء.

حضني بقوة وسرعان ما أبتعد
رفع راسي بطرف أصبعه :- أنحني احترامًا وتقديرا الج
انتِ انسانه عظيمة زهرتي سعادتي ونعمة الرحمن.

سحب نفس بقوة ورجع كمل كلامة :- انطقها وأني اعنيها
حروفًا ،  إحساسًا ، عقليًا وقلبي اليوم ينبض الج وحدج .

مسحت وجهي بـ أيد ترجف وشفايفي ترتعش
منتظره تتويج حبنا :- يعنييييييييييي.

طبع بوسه ؏ عيوني وهمس :- احـــبــج  زهرة روحـي .

يتبع ...

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد

بنص اعماق قلبي 🥺🫂🤍