رواية ظلمات الغيهب الفصل السادس وثلاثون 36 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _33_

أنسى نفسك بين اديه
خلي عطرك يبقى بيه
ماريد الوكت يخلص
وعينك بعيده عليه .

...............................
زهراء...

واحنه نحجي صاحت ممرضة بـ اسم هشام
راح حجه وياها تركي ورجع يحجي ويانا :- رايح الصالة
العمليات يريدوني الله يستر من الصاير گلبـي راح يوكف يابا .

عطت بفزع وايدي ترجف اخذت التلفون
من عمي وصوتي بالشافعات ينفهم :- لا عفية لا تسد المكالمة
يوگف گلبـي هسة ، بداعت اطفالك نزل التلفون
وبقينا وياك الله يخليك .

اشر بيده بعلامة أهدي:- كولي يا الله زهراء ابقي والله
ما ينغلق بس لا تبجين هيج .

هزيت براسي وهمست:- روح شوف شبي استعجل فدوة .

هز براسه وصعد فوك شاف الدكتور وكلشي
ما افتهم شنو يحجي ويا الى ان خلصت روُحـي كعدت والتلفون
بيدي يرجف رجف لحظات ترقب مميتة
جنت احس روُحـي تطلع الى ان كمل
باوع علينا ببتسامة وهو يمشي بسرعة :- منزلين الغيهب للغرفة
ركض للمصعد يريد ينفتح ما صبر نزلت دموعه مسحهن
بطرف ايده وركض ؏ درج فتح الباب وضحك
وهو يتقدم :- لك ابو الشباب شنو تسرسحت .

رد بصوت مو واضح ابد :- هشام غطيني بردان.

راح هشام تلمس راسه ذب التلفون وهمس :- لك صاير نار
حرارتك عالية.

رجع همس بصوت مرهق:- غطيني بسرعة.

ابو الغيهب:- بابا غيهب تسمعني الحمد لله ؏ سلامتك حبيبي .

- الله يسلمك .

عدل هشام التلفون مغطي بطانيات اثنين
ويرعش طلع رجله صايرات زرك من
البرد مخلي ؏ مخدة بس التخدير بعده
ما رايح حتى ما يكدر يثبت رأسه
جسمه راخي .

الغيهب:- اريد انام هشام تعبان حيل تعبان .

- أروح اجيب العلاج الدكتور وصاني لازم
ينطي آلك حتى تنزل حرارتك
رجع هشام اخذ التلفون وطلع
اخذه عمي ورجع يستفسر منه :- ها بشرني .

- ما ادري يابا هسة طلع من العملية
انتظر كم ساعة بين ما يصير زين
ان شاء الله وأبشرك.

ام الغيهب:- هشام بسرعة اخذ العلاج واكعد يمه
اخاف يحتاج شي وماكو مساعد ويا سودة علية .

هشام:- اي هو حتى ما امشي اركض في سبيل
اخلص بسرعة وأرجع اكعد ويا .

انتوا روحوا من يصحصح ويكدر يحجي اخابركم
لا يضل بالكم علينا هنا الدكاتره كلش زينين .

كعد عمي يحجي ويوصي بي ويستفسر
؏ فلوس  العملية وشگد كلفتهم
اني عفتهم وطلعت للمطبخ شربت
مي حلكي يبس من الصبح الـ هل ساعة
؏ لحم بطني ، واني بقمة حركان گلبـي
وقهري وكسرتي ودماري وحالي الـ مبهذل
؏ الغيهب اسمع صوت هل ما تسوه فرح
تعوج حلكها علية :- الـ يشوف الطم والبجي
وصخام وجهج قبل شوية صايرة نبي
قرأن وصلاة ، ما يكول هاي يمشي ويخون بيها
يمشي ويسحل بيها ، لج صوت صراخج جان يفزز الميت
ههههه سحل بيج الدنيا سحل .

اباوعلها وروحي صارت بخشمي
كلامها حفر گلبـي حفر فتح ڪُـل
جروحي النايمة انتفضت
وشفايفي ترعش بقهر مضموم
حاولت اسكت لان الوقت مو مناسب بس
ما تحملت وفقدت اعصابي واني
أتقدم عليها همست بتحذير :- شايفه هذا النعال هسة أخذه
من الكاع ودك ؏ وجهج يا طايحة الحظ يا تربية سزززز .

وسعت عيونها مصدومة من ردي
وعبالها اخاف منها عاطت بعلو صوتها :- انتِ تضربيني
بالنعال لج اني شكبرني تجي زعطوطه
مثلج لا فهم ولا علم تضربني بالنعال .

طلعوا كلهم من الغرفة وبعيونهم
علامات الصدمة رديت عليها
وما اكتفيت بـ الرد القديم :- اي وروح امي بالنعال وعلى
راسج جبيرتيش تريدين احترمج وانتِ نفسج ما محترمتها .

امير واكف يباوع علينا متردد يدخل
لان لمحت عمي التفت علية خنزر علية
يحذره ما يفتح حلگه .

كملت وروحي فرفحت:- تعايريني هاي بدل ما توكفين وياي
وتنصحيني لان انتِ اكبر مني وعندج خبره بالحياة
اكثر مني  تجين وبعين صلفه تشمتين بيه ليش بشنو أذيتج
شنو الـ بدر مني وصلج المرحلة تحقدين علية
وتشيلين ڪُـل هل حقد ما قصرت وياج انتِ بالدوام وجهالج
عندي تخليهم ترجعين ماكلين وسابحين ونايمين
بعد ليششش هل حقد عييييب علبج والله عيب .

دفعتها هاجر وصارت مقابيلي
لان حالتي صارت يرثى لها:- بس حقد بس غل ، وغيره ، وسمم
هل نماذج حتى ؏ ضرب يحسدون ويغارون ينقهرون لان ما ينضربون .

زهراء:- هي ما تشوف حالتي حالة
هلكت والله هلكت من الصبح الـ هل لحظة
؏ لحم بطني واني حامل تبهذلت يا حسد هذا
تكليلي سحل بيج الكاع تستهزئين لان سحلني .

فرح:- لا تاكلني وتشربني افتهمتن لو لا اكلج
شفتي منه زين وتبجين .

زهراء:- اني هنا اعذرج لان لو مجربة تحبين شخص
من ڪُـل قلبج وتنطي ڪُـل طاقة حبج وحنانج وتعتبري
ڪُـل اهلج وناسج ما تسوين هيج وما توكفين مقابيلي
وتنطقين بتفاهاتج يا تافهه .

كملت هاجر بكل حرقة قلب
تحجي وتأشر بيدها ؏ غرفة عمتي:- ما تشوفين معلعلين ولج
معلعلين من الصبح الـ هل ساعة وابنه بالغرب وحده
بين الحياة والموت بدل ما تكومين تسوين لكمة الـ امة والـ ابو
والـ اخو ياكلوها تسممين بيهمممم انتي تزيدها بمشاكلج
ندري عندج حقد وسم لازم تفجري هسة
بيج خير خلي يرجع الغيهب وتحجين كدامه يتصرف وياج
تصررررررررف مو خوووششششش تعرفين يعني شنوو
تصررررررررررررف مو خووووش .

فرح :- ما تعرفين تحجين لج شنو تهدديني بالغيهب
ما عندي رجال وتريدي هو يتصرف وياي .

تقربت هاجر منها وهمست بصوت يوصل مسامعها
وبس بالكوه سمعتها شنو تحجي وياها :- هههههه عبالج ما مفتهمتج
ڪُـل هذا السم عود شوفوني وصلوها للغيهب  تريدين
تسوين بلبله بين الأخوان اصلا أمنية حياتج الغيهب
يتصرف وياج بس هو ما شايفج بمزاجه
اذا اخليج برأسه يطفرج بـ ليلة ظلمة.

هجمت تريد تضربها فزت هاجر ورجعت
ليورة مردت رجلي طفرت وما احس
غير طرف الشباك دخل بنص ظهري عطت بوجع
ومن الصدمة الـ اشوفها بهتت واني اباوعلهم

هجم امير سحبها من ايدها
وشمرها ؏ حايط وهو يصرخ بوجهه :- صدمتيني شنو
هل حقد الـ بعيونج .

ضربها ؏ عينها وكمل كلامة متفاجئ :- لعبتي نفسيييي
بهذا حاجبج رافعته وبس انتِ وبس وتعايرين بهاي
وتغلطين ؏ هاي عايفج مووو تعايريها بالضرب
وسحل بيج الكاع نسيتي اني اخووو وهنااا
وحق الله منا ابدي بيج اسحلج سحل للشارع
اشمرج بطرك ملابسج هاي .

فرح:- انتَ هم وياهن ما تشوف يتفقون علية
زهراء تبدي وهاجر تولعهااا انتَ زوجي
المفروض توكف وياي مو ضددي امير .

امير:- عسى امير يشيع جنازتج يا طايحة الحظ
هسة تولين فوك تلمين ملابسج واشمرج
؏ بيت اخوج عووودددد خلي يتحملج ساعة
وحدة .

صعدت ؏ درج وهي تبجي وتصرخ :- تعايرني بـ أخوية
غصبًا ما علية يتحملني اني واطفالي لعد شعبالك
اني بلا اصل وفصل مثل الكح... زهيرررررة
هجمتتت بيووتناااااااا من دخلت لليوم .

انوب خجلت من يمي ؏ كلامها استصعبت الموقف
فوك ما هم مشلوع گلبهم نجي احنه نتعارك
حتى عمي منا هو تعبان ومنا مصدوم من عدنا بقه ساكت .

وعمتي حتى ما طلعت من الغرفة
وهيام ختلت بلا صوت ولا نفس
عفتهم وصعدت فوك هم رجعوا المكاناتهم
تقابلت وياها صعدت بسرعة
انوب لا تشمرني من الدرج
نزلت وهي تبجي وتتحسب
وصوتها يلعلع بلا خجل ولا حياء.

فتت للغرفة وسديت الباب
نزعت دشداشتي لكيت
ضهري مزروف والدم
يجري اخذت ملابس
ودخلت للحمام سبحت وكفت جوه مي دافي
حسيت الوجع قل احسن من قبل
نشفت ولفيت نفسي وطلعت
والحمد لله عندي لاصق جروح
شلون ما كان خليته وبدلت
تعبت وخلصت طاقتي
ما صدكت خليت راسي ؏ مخدة
اريد بس انام وجع راسي يختفي
من وره البجي والهبوط
نمت وما كعدت اله واني احس الحرارة تاكل
بجسمي اكل رحت بسرعة غسلت وجهي
ورجعت اخذت مسكنات عند الحاجة
وكعدت اشرب مي بارد اريد
گلبـي يبرد نار ومشتعلة بي
اباوع ؏ ساعة دنيا فجر
والجامع يقرأ قرأن خليت شال ؏ راسي
ونزلت لكيت عمتي كاعدة بالمطبخ

- ها زهوره شكو شصاير ليش كاعدة بيج شي .

- رجعت حرارتي ارتفعت وما اكدر انام
اكلج عمة هشام هم خابر عليكم .

- اي خابر ب2 بليل الغيهب حجه ويانا
وسأل عليج عمج گله نايمة .

- عمة اخاف يفكر نمت لان ما أهتم
بـي شلون صار ونوب يتنحس .

- لا امي غير عمج ما قصر
كال البنية تعذبت من الصبح
قران وصلاة وبجي وهشام
يحجي هم لا تفكرين هيج
هو بذات نفسة كال عــوفوهــا
خلوها ترتاح لا تتخربط .

تنفست براحة وهمست بخوف
واحتراس:- عمة اريد اكمل نومتي بس مرعوبة
أخاف انام وهم ما أكدر اكعد نفس ذاك اليوم .

- اخذتي علاج .

- إي اخذت.

- باجر اخلي هاجر تاخذج للدكتورة هم تطمنين
؏ طفل وهم تعرفين شنو ببطنج ولد بنية
حتى نعرف اندلع من هسة 
الأميرة لو الأمير.

ابتسمت واني احك راسي
بتوتر :- لا ما اريد اعرف من أولد عود شنو يجي هلا بي .

- براحتج ، أخذي مخدة من الغرفة
وتعالي نامي هنا يمي راح اصلي
وأقرا قرأن شوية ابقي كدام عيوني .

- بس فدوة اقري بصوت عالي .

أومأت بهدوء عفتها ورحت بسرعة
اخذت مخدة من الغرفة لكيت هيام
نايمة لابسه عود دشداشة خفيفة
مال نوم بس هيج بيضة الـ گلوبات
طافية بس هِـيِّ بيها ضوة
وشعرها اصفر مفروش ؏ مخدة
تشبه الممثلات الـ أجنبيات.

طلعت بسرعة قبل لا تحس
علية خليت المخدة بالصالة
وغطيت نفسي زين
بس سمعت صوت عمتي تقرأ قران
نمت براحة حسيت بالأمان
وما كعدت غير الساعة 10 الصبح
غسلت وشفت عمو يگلب بجهازة
وكفت فوك راسة وهمست ببتسامة ذابلة:- صباح الخير عمو .

باوعلي ورجع يباوع ؏ جهاز :- صباح الخير بنتي .

- عمو شوكت احجي ويا الغيهب .

- هسة اخابرهم اذا حصلت هشام يخليج تحجين .

اشرت بيدي يستعجل ضحك وهمس:- من توصل للغيهب تفقد
من الحماس تشمر بيدها علية .

ابتسمت بخجل واني اطكطك بصابيعي
أتصل عليهم شوية ونكطع بقيت
كاعدة يمه بالربع ساعة اسولف ويا
رجع اتصل هشام فتح خط وسلم علية
وبعد السلام همس :- الغيهب كاعد .

- اي يغسل بوجهه بالحمام .

طلعت راسي وهمست :- صباح الخير .

ضحك ورد وهو يعلي صوته :- هلا بخبالووو اكو جماعة
حلموا بيج البارحة .

الغيهب:- هشاااااااااام اريد منشفه .

اخذها وراح صار قريب من عنده همس:- خبالو تريدك .

- عوف التلفون هناك واطلع نريد ناكل جيب ريوك
وخليني احجي وحدي يلاااااا .

طلع هشام وهو راح للتلفون سحبه
شاف عمي سلم علية :- شلون صرت بابا .

رد بـ ضعف وإرهاق:- والله يابا بعدني أيدي
مأذيتني ، وصارت زركة ، وحرارة عالية بيه
الدكتور يكول لان دخل شي غريب ؏ جسمي .

- كم شبكة.

كعد ؏ جرباية وهمس :- أثنين صمامات واثنين شبكات
بس زرفوها الـ ايدي زرف اريد احركها ما أكدر.

- يرادلها صبر بابا البارحة سويت العملية
قابل تريد اطيب بسرعة .

- اريد ارجع طكت روُحـي .

- خلص جلساتك وتلحگ ؏ رجوع .

- الله كريم
تحمحم وهمس بدون تفكير:- خبالو وين .

فر عمي الكاميرا وهمس:- هاي خبالو هاج التلفون
اخذي وصعدي فوك لا دوخيني انتِ ويا .

واني ما صدكت بسرعة سحبته وصعدت
للغرفة سديت الباب ورغم بيه الم ما ينحمل
نسيت كلشي وكعدت اباوعله:- الحمدلله ؏ سلامتك غيهوب .

رمش بكل هدوء بعيونة وعدل
كعدته وهو يثبت التلفون مقابيلة همس :- خبالو الله يسلمج
احجي بعد اريد أسمع صوتج .

غلقت عيوني بخجل وهمست :- بالي يمك من التعب نمت
ما عبالي تكعد بليل .

احط ايده ؏ خدك وهمس وهو يأشر ؏ عيونه
بـ اصبعه:- عيونچ  .

زهراء:- تعبانات ومورمه ما ادري من الحمل
من قلة النوم والخوف صايرة فلم .

الغيهب:- عيونچ رب الـحٰسن سعادتي تريدين تموتيني ؟

زهراء:- اسم الله ؏ گلبك غيهب ما اريد أشوفك
تعبان وضعيف شوكت أرجع اشوفك بكامل
قوتك وصلابتك.

الغيهب:- بس ارجعلچ رجعيني
مثل ما تحبين أكون فصليني  .

- أريدك سالم .

ضحك بمكر يريد يغير الموضوع:- تموتن ؏ سالم الكامل
القوي والصلب .

ضحكت بعلو صوتي وهمست :- شكد ما تستحي .

مسح ؏ وجهه بقوة وهو يهمس :- راح اموت أريد
أرجع اعرس عليج بوووياااي اذا الزمج زهراء
نبقى سنة اني وياج بالغرفة.

زهراء:- اوووووو اروح أحسن اليوم ماكو
كنترول ؏ السانك .

دخل هشام تحولت ملامحه للجدية وهمس:- اخذي راحتج
وديري بالج ؏ نفسج .

- ماشي وانتَ هم دير بالك ؏ هشام
لا تعاند وتشلع گلبه .

هشام:- يبوووو زهراء خاب فدوة الكلبچ ، هذا مو بس شالع گلبي
مهسترني بالعناد  .

الغيهب:- انچب لك لا تروح زايد فدوة الكلبچ شنو
وانتِ روُحـي الـ سويچ  بس تتمضحك .

سديت المكالمة ونزلت واني أضحك
شافتني عمتي ضحكت ؏ ضحكتي وهمست :- ها ولج .

رجعت الجهاز العمي وگعدت ويا عمتي
وهاي الصفرة هيام مقابيلي تخوزر بيه :- تعارك الغيهب وهشام
وضحكت عليهم ولا يكعدون راحة .

- يا ليش تعاركوا .

كعدت اسولف الها وهي تضحك احب
ضحكتها حلوة تحسسني الدنيا بعدها بخير
كملت سالفتي وكمت نظفت البيت وطبخت
وعمي ڪُـل شوية يجي يطمئن علية :- ها عمو محتاجة شي
اذا تعبتي كعدي وارتاحي.

- لا تخاف ما اتعب نفسي أساسًا كملت وصاعدة ارتاح
بين ما يرجعون الجماعة من دوامهم .

واول ما كملت صعدت بسرعة سبحت
وتمددت اباوع بتلفوني واسمع اخر اخبار
رجاء:- لج أحتمال راح يخطبني رسمي اصير زوجته .

زهراء:- احلفييييي أيهاب كال .

رجاء:- من زمان متفقين ؏ خطبة بس تعرفين
بسبب المشاكل الصارت أجلنا الموضوع كله بس
هسة صار الوقت المناسب أكون الـ ايهاب .

زهراء:- عاد والله مو مجاملة إيهاب ونعمة منه
زلمة معدل وصاحب نخوه ويحبج هواي
من طلعنا للنجف والنبي رجاء يباوعلج ويرجف
عليج لو ما عيب يشيلج ويمشي حتى ما تعبين .

رجاء:- ڪُـل هذا قليل ، لو تعرفين ايهاب شصار الي
زهراء هو ام واب وصديق وحبيب ايهاب كلشي
معزته جبيررررة بكلبي شگد ما احجي قليل بحق
هل انسان .

زهراء:- بكل وقت وكل ساعة أدعي ربي يجمعكم سوه
وما يفرقكم وكون ڪُـل العقبات تنزاح عن طريقكم
ويتم كلشي بخير وسعادة .

رجاء:- اذا صارت خطبة ما تعوفيني وحدي زهراء مو ؟

زهراء:- اني اعوفج امداني اي والله
وعد اكون ام واخت واوكفلج وگفه ينرفع بيها راسج بالعالي .

ردت علية وصوتها بي عبرة بچي :- ما انحرم منج .

زهراء:- ولا منج يا شمعة حياتي.

هل كلمة قبل جنت احجيها الـ امي وماكو شخص
يستحقها غيرج بهل وقت يا حبيبتي .

يلا عطلتج اخذي راحتج .

رجاء:- زهووو احبج .

زهراء:- واني بعد يا حبيبتي .

سديت المكالمة ورجعت اتصفح
انفتح الباب وصارت ضحكت هجورة كدامي :- بزونتي بالغرفة .

شمرت التلفون وآني أكوم بصعوبه
اشرلها بيدي :- دخيلج أكره البزازين وطاريهن .

- رجعت تعاي كعدي وياي ما اريد أبقى وحدي
والحيايه مقابيلي .

رديت بستغراب :- مو بقت بس حيه.

هاجر:- لا وين رجعت فرح تكول والله اهلي مو كفيلين
بـ اطفالكم انطوني مليون اصرف ؏ اطفالي هناك وعود اروح .

هزيت براسي وهمست :- وتريدين تنزلين تغثين نفسج
وتغثيني وياج عايزين .

جرتني من ايدي وهي تمشي
تحجي وتتوعد:- اشك حلگها التحجي هو أريد
يفتحن حلگهن اطلع ضيم گلبـي بيهن .

زهراء:- أشم ريحة مشكلة صايرة ، منو وياج .

هاجر:- هسة نكعد ونسولف .

نزلنا جوه صبيت اني وياها فرشنا سفره
وكعدنا كلنا سوه بس فرح ما نزلت
اني ما مهتم كاعد يسولف ويحشش
ويا عمي واحد يضحك ؏ سوالف الثاني
عمتي من تاكل ما تحب تحجي
واني وهاجر ماخذين زاوية نسولف
تحت أنظار هيام زايده ماكو واحد معبرها

زهراء:- سولفي شصاير .

- اليوم اجه ابو الجهال .

- شيريد منج بعد .

- آجر البيت مني بس .

- بس شنو احجي شبيج .

- اجر البيت حتى لا تحس علية زوجته هو راد يرجعني
وسجل البيت بـ أسمي يخاف يكول الها وتزعل .

- لا تأجري اله وخلي يتلوع مثل لوعة گلبج .

- ؏ اساس هيج بس هو توسلني وحالته حاله
يكول خسرت كلشي حتى اهلي بقت بس هِـيِّ
تقوم بواجباتي حتى حاضر وغايب ما عندي
ادفع .

- لا تضوجين يروحي هاي هِـيِّ الفات مات
أنسي وأبدي من جديد .

- وهذا الصار وراح يصير .

كملنا سوالف واكل كمت لملمت المطبخ
وياها الى ان كملنا ڪُـل واحد راح الغرفته
بس امير حط مخدة ونام جوه ؏  تخم .

بين يوم ويوم نتصل ؏ غيهب
بعده متأذي من ايده ويشكي منها
واول ما طلع من المستشفى انصاب
بـ فلاونزا وكع بالفراش وهشام
ڪُـل كم ساعة يطمني علية
تبهذلت ونشل حالي الى ان حددت الدكتورة
النفسانية جلسة ، بيومها ظل يحجي وياي الى ان
راح وهل مره وحدة هشام طالع يفتر .

اول ما راح رتبت غرفتي ونفسي
ونزلت مثل ڪُـل يوم اكعد اني وعمي
بالحديقة يحجيلي ؏ ايام قبل وبطولاته
هو وعمتي شوية يضحكني وشوية يبجيني
الى دك تلفون عمي وهمس :- هذا الغيهب .

فتح خط سلم علية وهمس :- يابا اريد زهراء ضروري .

اخذت التلفون وهمست :- ها غيهب .

- روُحـي بـ الغرفة الدكتورة تريدج .

هزيت براسي وصعدت فوك عدلت التلفون
وهمست بخجل:- وينها .

اشرلي بيده وهمس:- هسة تجي .

- شصاير قلقتني .

- لا يحلو لا تقلق لا يصير بيك شي .

ابتسمت واني اشوفها وره الغيهب باوعتلي
وحجت ويا هو التفتت وضحك بوجهه ورجع
يباوعلي وهو مستمر يضحك :- تكول شنو هل ملامح العراقية
الحادة ، جاي ابالي اكلها عين الحاسود بيها عود .

ضحكت واني اخلي ايدي ؏ شفايفي :- هي تفتهم عراقي .

الغيهب:- لا ويييين ما تعرف .

رجعت تحجي ويا هو يهز راسه ويبتسم :- زهراء الدكتورة
تكول بعد جلسة ويرجع الغيهب الج بس انتِ راح تكونين
دكتورتي .

زهراء:- يعني بعد عندك جلسة .

اشرلي بـ اصبعه:- اي اي بس وحدة هو راح يصير
شهرين ضبط مسافرين .

ابتسمت وهمست واني مو بس خجلانه
وأصلت مراحل من الخجل :- كولها بعيوني بس اذا بقيت وياك .

التفت وهمس بـ انزعاج يحجي وياها
باوعتلي بشك وهي تحجي ويا وتأشر بصبعها
وهو مثل الحباب يترجملي كلامها :- تكول الـ يحب يسوي
المستحيل حتى يثبت حبه للطرف الأخر وبعد انتِ وشطارتج .

- هاي هِـيِّ هيج تكول .

- اي والله بس هي تحجي بـ ادب اني انقلها
بـ لهجتنا العراقية حتى توصل الفكرة وتعجبج .

بقت تاخذ وتنطي وياي وتشرحلي حالته
شلون كانت والـ وين وصلت وسحبت كرسي
كعدت بصف الغيهب طبك لزكت لزك
وهي تحجي قاطعت كلامها واني مطمئنة ما تفتهم
؏ كلامي خزرته وهمست واني اضغط ؏ مخارج
الحروف :- لزكت لزككككك ابتعد شوية لا تصير مو زينه
واتخيل عليك وبعد ما احجي وياك .

ضحك وهي تباوع منتظره ينقل كلامها
باوعلها بتلاعب وحجن وياها عطت بي
اريد اعرف شنو يحجي وياها كال :- كلت الها تغزلتي بيه
وبجمالي تموتين ؏ ربي .

زهراء:- امششششي منا .

ضحك وهي تضحك ويا سلمت عليها
وفعلًا نهيت المكالمة وياهم واني بقمة فرحتي .

بقيت كاعدة بمكاني الى ان دك تلفون عمي نزلته اله
ورحت انطيت العمتي علاجها كعدت تسولفلي ؏
ملاك وعلى اساس حملها متعب
ما حبيت احجي او اسمع شي عنها
وما بادرت ولا حجيت من شافتني
ما مهتمة سكتت .

يومين وفرح صاحت علية من جوه
وكفت احجي وياها بعدتها هاجر وهمست :- اذا تريديها
علمود التنظيف فـ اليوم دورج اريد زهراء وياي
نرتب كناتير ابوية وامي مخربطات .

خليت شالي ونزلت واني ارد عليهن :- اكمل ويا هاجر واجي اساعدج .

فرت ايدها ما عاجبها راحت واني دخلت العمتي
نزعت هاجر البردات بدلتهن والـ كناتير كلها طلعناها
نرتب وهيام لازم وضروري تعزم نفسها
تجاهلت وجودها وكملت الـ علية
ورحت ويا فرح رتبت المواعين هِـيِّ غاسلتهم
اباوع ؏ عمي يرتب بالحديقة
اليوم يوم سبت وكلهم كاعدين معناها يوم الترتيب والتنظيف
التفتت شفت عمتي طلعت بيدها مخاديد اثنين

- شسوين عمة .

- اشرهم ؏ حايط علمود الشمس .

أومأت براسي ورجعت اكمل شغلي
صدت عيني ؏ كراج وما أشوف
غير امير دخل وبعده هشام والغيهب
رايح يجيبهم من المطار وما حاجي الـ احد بينا
جمدت بمكاني بعدم تصديق
رجع يعني رجع الغيهب رجع
ضحكت وإني أصيح بهاجر:- هاااااجر الغيهب رجع .

طلعت تركض واني وراها صرت گوه اسحل
برجلي احس نفسي انشليت وكفت بصف باب المطبخ
سلم عليهم واحد واحد من شافني  جان لابس جنطة ضهر
ذب الجنطة  بالكاع وبضحكة سعادة
دك تحية وصاح وهو مثبت أيده
بحركة التحية:- يابا تحية تقدير ، واحترام ،وامتنان
ومحبة ، ومودة ، ومعزة الـ اجمل سـت الـحـسن بالكون
كله لج تعالي بحضني .

من الخجل وعدم التصديق
تشنجد بمكاني ودموعي تحجي الـ بيه
فتح ايده وصاح:- لك اووووووويييي خبالوووو يبجي .

سحبني الـ حضنه ورفع راسي باسني
بخدي وهمس:- مضعفين مرتي الله يضعفكم .

سحب أيده وصاح بعلو صوته:- هشام انتِ دخل الجنط اني عندي شغل .

ضحك عمي وعاط بي :- هل ولد بكلشي مشهور الله يشهرك كون .

هو ولا اهتم ولا خجل أستمر لازم ايدي ويمشي
بكل ثقة وصلنا للغرفة دفع الباب ودخل
سحبني من ايدي وتبدل عكس ما كان
قبل شوية يضحك ويحشش اخذني بحضانة
سحب الشال من راسي ونزل الركبتي
جر نفس وهو يبلع ريگه ، رجف جسمي
بين أيده همست بخجل:- ما كلت راح تجي .

أبتعد رفع خصلات شعري وثبتهم وره اذني
وهو يباوع لعيوني :- ردتها مفاجأة .

كمل كلامة وتقدم أكثر قيد شفايفي بين شفايفه
وأيده تلاعب خصلات شعري ما فصلها الى ما
بعد أنقطعت أنفاسنا سند راسه ؏ راسي وهمس
بـ خدر :- اريد اظمج بنص روُحـي اريد أحافظ عليج هل مره
اريد احافظ عليج .

ابتعدت بتوتر واني ابتسم :- أرتاح هسة وبعدين نسولف.

رمقني بنظرات ضايعة وگف
وهو يسحب نفس زفرة بنفاذ صبر
دخل للحمام يسبح التوتر يقرأ مليون
اصلا ما اعرف أتصرف ؏ طول فترة
زواجي من عنده بس لحظات تقربنا
معدودة وقليلة الخجل وعدم التقبل
بعدهم بيه ما متعديتها .

حضرت المنشفة هو بطبيعته يبدل بالحمام
وحتى ينشف شعره بالشسوار قبل لا يطلع
طلع بس رش عطر والتفتت يباوعلي ويبتسم
؏ تشنج الصار عندي .

تبادلت ويا الـ إبتسامة وهمست :- رايحة اجهزلك اكل أكيد جوعان .

توجهت للباب بس اريد أهرب
قاطع حركتي وقيد أيدي وهمس:- ما أريد ڪُـل الـ أريده
هسة اخذج بحضني وأنام.

- غيهب بس ...

سد حلگي بيده وهمس بترجي:- بروح امج لا تمنعيني
ما اسوي شي بس أنام ؏ دفو احضانچ .

هزيت راسي بقبول قابلني بالرضى
نمت اني ويا ؏ جرباية وجهه مقابل وجهي
يرسم ملامح وجهي بـ اصابيعة :- ڪُـل جزء مني يريدج بس .

بدون ما احجي رفعت حاجبي بعلامة بس شنو
كمل كلامة بتردد :- بس ما اريد تمنعيني منج .

تقدم وقبل لا ينتهي
سحب شفايفي وصار فوكي وهمس بخدر :- شكد ما بيج من
حيل احضنيني .

دفن وجهه  يبوس برگبتي همست باشتياق:- اسمحلك تبوگني
من الدنيا وتضمني بين جفوف أيدك .

- اي مو تدللين اليوم احتلچ يا دنيتي وسعادتي .

نسيت الدنيا والماضي واني بحضانة
بس بدون سابق انذار أنسحبت أيدي
ثبتها فوك راسي وتحولت البوسه عض
بعدت وجهه عنه وصحت بـ ألم :- غيهب أفتح عينك .

باوعلي برتباك همست بخوف:- اياك تعيدها غيهب اياك .

- أعتذر مو قصدي بـ .....

- لا تخبلني مو تعالجت.

- نفسيًا ، والدكتورة نبهتج القسم الثاني عليج
يعني انتِ تعالجيني من هل جانب .

دفعته من صدره واني بقمة غضبي :- يا علاج غيهب اني حامل
غلط واحد منك اروح بيها .

ثبتني بيده حاولت اتملص منه
صارت لزمته اقوه رجع راسه بركبتي
وهمس بخوف :- اسف ما تتكرر لا تروحين بعد ما اقترب منج .

- من منو تقترب لعد ترجع الـ نسوانك .

- من المستحيلات ارجع اريدج وحدج .

- وتأذيني شلون تريدني وتأذيني .

- هاي اخر خطوة بعلاجي لازم انتِ تساعديني بيها .

دفعته من صدرة ثبتني وهمس :- لا تذليني زهراء كلت محتاجج
صبرتي ؏ كلشي هاي ما تصبرين عليها الى ان تنتهي .

- غيهب ما اقبل تأذيني اني مو حيوانه اله هل سالفة انقرف منها .

- وغلاتچ عندي ما اريد وما احب أذيچ واخر وحدة أفكر
بـ أذيتها انتِ بس صار سنين ؏ هل حالة فـ صارت
لا إراديًا تدريجيًا تنتهي لـ اجلچ كلشي مستعد أسوي .

رفعت أصبعي وأشرت بتحذير :- غيهب خلي ابالك
هاي اخر مساعدة لان هلكتني بكل مره اكول خلص
بعد ما بي شي تطلع سالفة صفح مليت وبزعت
اذا اشوف غلط واحد بعد ما أبقى مليت بالمعنى الحرفي مليت .

تقرب باس اصبعي وهمس :- اعتذر ما تتكرر واذا
بدر مني رد فعل ثانية بس نبهيني مثل ما صار هسة
وخلصص مره مرتين وتنتهي طولي بالج وياي
اذا تحبيني لا تحرجيني انتِ وحدج مخليتني اتمسك بالحياة .

- ولان اعرف انتَ تعالجت في سبين تحسن مسار حياتك الـ أجلي
وصححت ڪُـل عيوبك حتى ما ابتعد عنك باقية وياك
ومتقبلتك وبين ايدك بسس غيهب خلي ابالك
بعد ڪُـل غلط منك وخاصتا بـ هل موضوع
امنعك مني .

قلص عيونه وهمس بعدم فهم :- شلون يعني ما فهمت .

- يعني ابتعد يلاااااا .

ضحك وهو ينزل يبوس شفايفي ويهمس:- اعتذرت لا تسوين
كلبج قاسي وياي تره اني محترك عليج .

دفعته من صدره وهمست :- انتَ معاقب حتى
تخليها ابالك مره الثانية ومن تقترب مني تحسب
احساب التحركاتك وما تأذيني مثل ....

عض شفايفي واني ادفع بي من صدره
وفعلا منعته مني سحبني الـ حضنه
باس طرف چتفي وهمس :- كولي أحبك.

- كول احبج .

- كولي أحبك.

- احبك اني أحبك.

رجعني بحضنه بكل ما عنده من قوة ونام
مرتاح واني غفيت ؏ صفنتي بملامح وجهه
اخخخخ غيهب انتَ ڪُـل دنياي كلها .

فزيت العصر تريد تصير دنيا مغرب
دخلت سبحت واخذت بطل مي قريت
علية سورة البقرة كملت ورجعته بالثلاجة
فتح عيونه أبتسم ومد أيده رحت عدلت حاجبه
بطرف أصبعي واني لابسه جادر الصلاة
همس :- انتِ بلادي حالي وياج حال طفل وبيده حمامة
يخاف تتأذه ويا فـ يضطر يعوفها ويكتفي بالنظر الها
حتى ما يشوفها تعبانة بسببه .

تلمست وجهه وهمست بطمأنينة قلب:- أحبك والله .

سحبني بحضنه وهمس:- اريد اسبح وجوعان .

- اي يلاا كمل سبح وننزل .

اخذ ملابس ودخل بين ما عدلت نفسي والغرفة
طلع اني مجهزة بطل المي خليت بالكلاص
وهمست :- هذا مي قريت علية سورة البقرة اريد
تبقي بيدك وكل شوية تشرب منه ممكن .

اخذه مني وهمس :- طبعا ممكن اذا منج .

شرب شوية ونزلنا المي بارد والكلاص كزاز شفاف
يشهي ؏ شرب نزل يضحك هشام كاعد قبل لا هو يكعد
رمقه بنظرات استفزازية عاط الغيهب علية:- أكسر
عليك ماسحة الحمام اذا تباوع هيج عيونك علية
حتى كلشي ما حصلت .

هو سمع هيج فرش ايده براحة على تخم
وهمس :- شنو قابل ناس وناس .

هز ايده وراح الغرفة عمتي
وقبل لا يدخل صاح :- يمه كاعدة .

- فوت يمه كاعدة حبيبي .

عمي موجود جوه حميت الاكل
اجه هشام همس :- ام الزهوو اني هم بعدني ما ماكل
هو هذا الـ ماعنده مره ينوكل حقه.

زهراء:- اي والله صير حباب ورجع زوجتك.

هشام:- زوج الـ ينام اليوم بليل وزوجته مو عنده
جنت منتظر زوجج ينزل ونتفق نروح كلنا اليوم
ابوية وامير مو كافي محتاجين واحد يلبك بالكلام .

عليت صوتي واني ارد علية :- تقصد الغيهب يقشمر بالعالم
ويلبگهم بالكلام .

- امشيييي بابا لعد انتِ شنو مبقيج هنا غير لاعب لعب
بيج بكلامة فار راسج فر .

اخذت الصبنية عمي كاعد وامير وفرح
وهيام مخليها گبالي جبرت نفسي وكعدت
واني اشوف عدم اهتمامه بالكل
وعيونه مثبتها عليه اذا يلتفت على كد يباوع
على عمتي ويرجع ينظرلي.

اكل شوية ومن بين ڪُـل الكلام همس بتسأل:- هجر وين .

رد علية عمي :- فوك هِـيِ وجهالها .

قلص عيونه بشك وهمس :- فوك هِـيِّ وجهالها بـ هل وقت
ليش هِـيِّ تحب نلتم صاير شي .

التفتت امير خزر فرح ما اعرف شلون لمحه
هز راسه وذب الكلاص ضرب ؏ رجله بـ اثنين اديناته والنيه
واضحة ترك الكل وصعد فوك الها .

شلت الصينية غسلت المواعين
اجت فرح لازمة قلبها بيدها :- اذا صار شي  حوبة اطفالي
والـ بهذله برگبتج لان هل مره أطلع من هل بيت ما اخذهم
يتبهذلون بسببج .

- شبيج فرح هااا شبيج نقلب السحر ؏ ساحر مووو .

- تشمتين بيه .

- بابا هسة اني فتحت حلگي انتِ جيتي علية ترجفين
وتكولين خطيتهم وهل سوالف التعبانه مالتج الـ لعبت
نفسي منهاااا ، وتأكدي اذا طلع الحجي مو من عندي من
هاجر لان انتِ طوختيها وياها خليتيها تكره بيت اهلها .

بعدها ما مجاوبتني وصوت خطوات ؏ درج
صارت سريعة وصوت الغيهب رج البيت رج
وهو يصرخ بـ أسمائهن :-  لــــج هـــيام فــرح .

يتبع ....

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد .

أحبكم بالبورتوقالي  يا عيووونيييي 🧡