رواية ظلمات الغيهب الفصل الخمسون 50 - بقلم اسـاور حسين 🦢✨

رواية ظلمات الغيهب
بقلمي أساور حسين
بارت اضافي ✨

انتِ قضية رابحة تستحقين أن أحارب لأجلكِ .
.......................
يوم الخميس الساعة 8:45 صباحًا..

زهراء:- ضاع الوقت بسببك والله عندك سوالف .

حجيتها وإني أنزل الدرج ركض .

ابو الغيهب:- لج بابا كم مره نبهت لا تنزلين سريع
لا تزلج رجلج وتتكسرين .

الغيهب:- عوفها عوفها خليها تتكسر حتى أتزوج
وبالسنة حسنة انطيها آكل تبقه وحدها بغرفة.

عضيت اصبعي وصحت :- يغث يغث يماااااايييييي
هسة غير يسكت من الصبح دروح نام من يجون كلهم
اكعدك .

نزل كعد ؏ كرسي مقابيلي يضرب ؏ ميز ويغني
كاتب اسمك بالقلب لا تضن يروح وراسمك احلى بشر بعيوني
اني من دونك صعب لا تظن اعيش اريد اسألك هم تعيش بدوني .

صفك عمي بيده وهوه يدخل للغرفة :- الله يساعدج يا زهراء
يا عمو كعد مقابيلج شيخلصج منه اليوم .

باوعت بوجهه ضحك وغمزلي :- عليك الله غيهب عوفني اشتغل
واصعد العب انتَ ونور فدوة .

الغيهب:- لج خبالوووو بوسي ايدج ؏ النعمة مو زين
زوجج مگابلج وكاعد من حُـبي .

التفتت للسمج طلعته من الثلاجة وخليت الصوص علية
واشرت بيدي بـ استعجال:- يلااا غيهوب اخذ السمج وروح يلاا
كون ب1 كامل .

سحبني من خصري وعض خدي :- يلااا شنو يلاا اشتغل عند رحيم
عيديها مره الثانية وتتحول العضه من خدج لـ شفايفج .

رفعت أيدي وأشرت بسرعة:- ديلااااااااا يلااااااا روح .

ضحك بعلو صوته وما شوف غير ثبت وجهي
ونزل عض شفايفي خلاني اكمز بين ايده
اله شوية ابجي سحب السمج وهو يضحك :- تتحارش حتى تتعاقب
واني اعيش حتى اعاقبج .

طلع واني بديت أطبخ البرياني
حضرت المقبلات الباردة بكل انواعها
وخليت الدجاج بالفرن .

جلفت البيت بالكامل غسل للكراج
طلع عمي غسل الشارع لان الغيهب
يتخبل اذا يشوف باب البيت وصخ
خليت شالي اني ارش وعمي يمسح
وگفت سيارة الغيهب نزل اخذ الماسحة
من عمي ويأشرلي وين ارش وهو يمسح
لمع الشارع وحتى معطر ارضيات يرش بالكاع ويمسح
بحيث اي شخص يمر من بيتنا من الباب يشم عطر النظافة

تركته يلف بالصوندة وفتت خليت جدر الدولمة ؏ نار
وصعدت كعدت الجهال سبحتهم وبدلت الهم
نزلتهم جوة شغلت التلفزيون وعمي ينسى الدنيا وياهم
صعدت سبحت وطلعت
دخل الغيهب للغرفة وهمس:- اجت هاجر وهشام وعائلته .

زهراء:- صدك لعد بسرعة اسبح وبدل وانزل
اني اعدل نفسي وانزل عيب وحدهم .

جر ايدي انضربت بصدره ضرب
راسي بطرف أصابعه وهو يهمس:- ولج دلعي زوجج
المفروض انتِ تسبحني تلحكين عليهم .

زهراء:- هوة شنو صغير انتَ .

الغيهب:- مو كلت عامليني مثل ما تعاملين جهالج
دلعيني مثلهم خافي علية مثلهم وكليني شربيني
تنوميني تسبحيني ابنج اني ابوي ابوي .

زهراء:- باجر باجر مو اليوم هوسة ومخبوصين .

دفعني بهدوء وهوه يدردم ويروح للحمام :- اني اتزوج أحسن
احسني عايش بجفاف ما مدلعتني بطلت تحبني هل بنية .

زهراء:- ضمنت حبك عيوني ابوي ابوي .

حجيتها واني ألبس توربان بدل الشال حتى ما اتبهذل
خليت مكياج كلش خفيف ونزلت لكيت بالاستقبال يسولفون

زهراء:- يابه هلااااا نور البيت .

بوستهم وكعدت نتناقل الأخبار
نزل الغيهب مبدل بقه يسولف
هوه وهشام ؏ شغل :- شعجب ما مرتب لحيتك .

حجاها هشام وما اشوف غير الغيهب باوعلي
وهوه موسع عيونه:- مو كلتي مرتبة.

عضيت شفايفي وهمست :- شيسمونه اي شنو طبعًا فول ترتيب .

ضحك هشام من افتهم السالفة :- دروح عدلها
واني اجيب السمج .

زهراء:- قابل وقتها عود بليل يعدلها ؏ راحته .

هاجر:- زهوره الدولمة كملت اطفيها.

كمت واني ارد عليها :- اي عيوني اذا استوت طفيها .

لحكتني سجى وكفنا نجهز باقي التحضيرات
حتى الحلويات سمبوسة والكنافة وحلاوة جكليتية
رتبتهم بمواعين صغار وهاجر عدلتهم بالثلاجة .

طلع هشام والغيهب وگف ؏ المراية يعدل بلحيته
وهيه والله كلشي ما بيها بس هيج سوالف وآحد
لا شغل ولا عمل .

من خلصت كلشي فتحت الثلاجة حتى اتأكد
من المي بارد لو حار وتذكرت نسيت أخلي
الغيهب يجيب لبن .

ركضت العمي وهمست :- عمو نسيت اكتب للغيهب ؏ لبن
حتى اخاف اطلب منا لا يروح يصير عصبي علية .

صاح علية عمي وهوه كاعد :- لك غيهب كمل وروح جيب لبن .

الغيهب:- الدنيا حارة ولا أطلع والله.

زهراء:- لا حباب غيهب فدوة بس لبن .

الغيهب :- وترتيني خليني اكمل روحـي مني
مو شرط لبن اكتفوا بالمي وبس .

زهراء:- غيهب عيب شنو بس مي لازم عصاير ببسي هم .

الغيهب:- مشكلتج ليش ما كتبتي بالقائمة السويتيها
طول بعرض وما خليتي لبن .

ابو الغيهب:- ولك دروح .

الغيهب:- حلفت الله ما اروح زين لو لا .

دخل هشام تعبان من الحر نزل السمج ؏ كاونتر ودخل
كعد ؏ سبلت حتى استحيت اطلب منه .

بقه عمي يجادل هوه والغيهب
وكل شوية مستفز عمي :- هسة قابل منو اجه هوه جلال .

ابو الغيهب:- شكد متعب ولك بدل هل كلام روح اشتري لبن وتعال .

خلص وكعد ملينا من الحجي وهوه معاند ما يروح
تالي اخذ التلفون دك رقم وصاح:- انتَ وين .

الغيهب:- يعني قريبين علينا.

باوعلي وصاح بصيغة آمر :- خوش وانتِ داخل اشتري لبن
جيب صندوك بس بارد واذا ماكو بارد اشتري ثلج دبر نفسك .

سد التلفون والتفتت يباوع علينا :- فضيتها من يوصل جلال يجيب البن .

زهراء:- شكد عيب غيهب صدك تحجي .

رفع ايده يفر بيها ويصيح:- هووووه شنو العيب ماكو بقاموسي
شگلت قابل هوه لبن .

هشام:- لا تصرخ ولك احجي بصوت ناصي شهرتنا.

الغيهب:- ادوس بطني هل خبالوووو عبالك خابرته
يجيب ملابس ماعدنا.

طلع هوه وهشام بره بالكراج ينتظرون
فتحت باب الشباك صاروا مقابيلي
هاجر تباوعلهم وتضحك ؏ نور الـ نخبص

النور:- هلااا لك هلااا لك العب عمو جلال اجاني.

الغيهب صافن بس يباوع علية
تالي انفجر بي :- صير ثگيل ولك لا اجه اطيح حظك .

رد علية بضحكة:- عوفني اليوم بابا هواي فرحان.

الغيهب:- ولك جلال مو بابا نويل .

هشام:- يا اخي عوف الولد فرحان شعليك
تعال بابا علي افتح الباب الـ عمك  وصلوا العرسان .

تراجع غيهب أستند ؏ حايط
طلعت أيدي بخفه بدون ما يحس
خليتها ؏ رگبته وبقيت أدلك بيها
التفتت غلق عيونه ولزم ايدي باسها
واخذ نفس قبل لا يتحرك همست:- الخاطري غيهب عاملة زين
ولا توكف ؏ كلمة بداعتي .

هز راسه وتوجهه الجلال
الـ واكف يفتح باب السيارة الزوجته اسيل
الغيهب:- جلولي وجهك مورد منعنش .

ابو الغيهب:- ولكم سوالف هل زلمة عوج حتى كلمة مثل العالم
الشريفة مايعرف يحجي هسة غير يسكت ولك هاي الـ كحبـ .. نومها اليوم .

الغيهب:- والله اشتهيت بسكت ام نور بسكت اريد يا بسكت .

هاجر:- دخيلك يابه انتِ لا تحجي كلمتك المعروفة البنية
ما متعودة بعدها .

جلال :- هههه اكو احلى من سوالف ابو النور .

أبتسم بوجهه ابتسامة استهزاء اخذ صندوك البن  وفتح الباب
دخلهم استقبلتهم من باب الاستقبال:- هلا بالعرسان توه ما نور البيت .

جلال:- ام النور البيت منور بيكم وبـ هل لمة الحلوة.

اسيل:- فدوة لعيونج حياتي منور بوجودكم .

الكل كعد قدمنا مجرد المي
ودخلت للمطبخ رتبت الأكل
؏ ميز الطعام وهاجر ترتب بالمواعين
وسجى رتبت البن والمي .

هاجر:- يلا عيوني الآكل جاهز تفضلوا.

خليت الخبز والكل دخل ڪُـل واحد بيهم كعد بصف
زوجته مشيت كعدت بصف الغيهب خليت كدامه الأكل
وبدينا نسولف وناكل بكل هدوء.

مر الوقت واحد بعد الثاني صاروا يغسلون ويرجعون
للاستقبال وگفت بسرعة حضرت الجاي والصينية
بديت اخلي الشكر واول ما خلصوا الكل صبيت الجاي
وزعته هشام يشاقي اسيل وجلال يلاعب نور
عمي يسولف هوه وسجى وهاجر تسولف الغيهب عن الدوام
عفتهم ورحت شلت المواعين شي بعد شي
فزيت ؏ صوت زينة تبجي سمعت صوت
الغيهب صاح:- نور بابا اختك تبجي .

رجعت امسح الميز حتى أبدي اغسل المواعين
وما اسمع غير صوت الغيهب رج البيت رج
رجف جسمي مسحت ايدي وركضت
اريد اشوف شصار لكيت غيهب واكف مقابيل
جلال وساحب القميص :- تريد نور يصير مثل
خوتك الفيط....... ويطبع بـ اطباعك القذرة.

اباوع ؏ جلال موسع عيونه:- صدك تحجي قابل شحجيت
يمعود غيهب شبيج .

هشام:- ما يستوجب منك هل غضب ابو نور
منا العروس اول مره تدخل بيتكم.

الغيهب:- ڪُـل ما اكول صار أدمي أحترمه
يخليني أرجع أهين بي وما اطيق وجهه .

عاط جلال بعلو صوته:- غيهههههههههب تخبلت .

رفع الغيهب أيده ودفعه من صدره
وطلع بالكراج ، جلال عاف ايد نور
وطلع هو وهشام وره من الخجل رجعت
للمطبخ الشباك مفتوح بعدني هستوني
اريد اسمع وما اشوف غير الغيهب
هجم ؏ جلال وفر وجهه براشدي
شهكت بفزع ودخلت للاستقبال ايدي ترجف :- اسيل حبيبتي
هاي اول مره تدخلين بيتنا اذا تحبين تعالي ويايه اشوفج
الفوك .

هزت راسها وگفت وعلى وجهه ابتسامة جميلة
تخفي قلقها ، صعدتها في سبيل ما تسمع صوت وقبل لا
اروح همست الهاجر :- غيهب وجلال يتعاركون شوفيهم فدوة .

صعدتها للممر وهمست:- هنا جانت غرفة جلال
ومقابلها غرفة امير وهاي المقابيلج غرفتنا
والطابق الاخير بي غرفتين هشام كاعد بيهم

اسيل:- حلو بس ليش الكل طلعوا
حتى هاجر طالعة عدنا البنية المطلقة
تكعد بيت ابوها ؟ زين حتى امير ماكو وياكم اليوم .

زهراء:- صح لمتهم حلوة بس الاستقرار
هم حلوة شخص عنده وطن خاص بي بعيد عن الهوسة
ليش انعيش كلنا بيت واحد وينفرض ؏ ڪُـل شي همه ما يريدونه
الانسان من يطلع ينام ويكعد بكيفه ياكل الـ يعجبه
ويطلع شوكت ما يريد هذا استقرار وضروري ينعاش .

هل عائلة ما عدهم تقيد واذا يحبوج يحترموج وتكونين
جزء لا يتجزأ منهم كلش حنونين وطيبين
فـ لا تخافين او تخجلين من احد منه .

فزيت ؏ صوت جلال جوة:- اسيل وينج .

ركضت نزلت بسرعة وهيه ترد علية : هنا حبيبي شفت البيت
تريدني بيك شي .

جلال:- لا ما بيه بس خابروني بالشغل يريدون
شغل بالحاسبة مالتي لازم نرجع بسرعة .

اسيل:- يلاا ما عندي شي .

عافتني ونزلت بس عيون جلال تباوعلي
بقهر وخذلان وحسرة طلع ينتظرها بالكراج
وگفت گدام الشباج اسمع صوت جلال
يعاتب الغيهب :- مو وگفت ويايه وگلت سامحتك
واعتذرت منك هوواي غيهب .

هشام:- اتركه هاي سوالفك تثبت بعدك ؏ ماضي .

الغيهب:- هشام تسكت لا تلوحك ناري .

وكف هشام مقابيل الغيهب ورد علية بغضب:- غيهب تحترم نفسك
لوووووو شلووووون مو راح ادوس ابطنك والله .

ابو الغيهب:- تستحون وتسكتون تلاثتكم لو اتصرف وياكم .

هشام:- احنه شكو تعال شوف هذا تخبل علينا.

ابو الغيهب:- وشنو الغريب ليش مصدوم
كحبـ..... وكعدت فجأة ينومها شنو .

طلعت اسيل همه سكتوا اخذها جلال وطلعوا
القهر واضح ؏ وجهه دخل الغيهب
وره هشام عصبي بشكل :- عيب عليك احنه بيتك هيج
اطلعها سم علينا كول بعد لا توصلوني  .

الغيهب:- لا تظل تحجي شيطي بيطي اكرمنا بسكوتك .

هشام:- غيههههههههب احترم والله راح اضربك .

هاجر:- كافي فدوة شبيكم اسم الله عين ما صلت على نبي .

الغيهب:- هذولي شياطين تفيد وياهم .

هشام:- منوووو شياطين غيهب .

الغيهب:- انتوا شياطين ما دام واكف ادافع الجلال العار .

زهراء:- عيب غيهب هذا اخوك ، فدوة ابو علي كافي
كول يا الله ولا تكبروها اكثر مو عيب فضحنا الغيهب
مقابيل البنية .

الغيهب:- ولج شو ما تعرفين تحجين منو فضح منو .

زهراء:- انتَ فضحتنا دومك تفشلنا اكو واحد يعزم اخو
العريس ويضربه كدام زوجته تره خززززيييي .

وسع عيونه وتقدم بتجاهي لزم ايدي
وهمس بتحذير :- كم مره نبهت لا تدخلين امشي
جوه لا ابتلي بيج وحق الله .

هشام:- ولكم شبي هذا ارفع ايدك غيهب وعوفها تره زودتها .

من الخوف الساني انبلع واني اباوع بعيونه
تجدح نار وهوه يباوعلي بكل غضب
عافني وطلع صاح هشام علية رد
وهو يطلع :- اطلع قبل لا اتصرف تصرف مو حلو وياكم
واصير مو آدمي وما افتهم بس انتوا تفتهمون .

صدت عيوني ؏ نور كاعد وجهه
صاير احمر مخنوك خنك اول ما
شافني باوعت علية انفجر :- شبيك ماما .

نور:- اريد عمووو جلال اريد جلال ما شفته.

هشام:- كافي حبيبي عمو من اطلع اخذك ويايه تروح تشوف عمو .

نور:- لا هسة اريد أروح أشوفه .

هشام:-  البس حذائك اخذك لا تبجي عمو حبيبي انتَ زلمة.

وگف نور يريد يلبس الحذاء
حجه عمي ينبه بيهم:- تطلع بدون ما تنطي علم البابا .

نور:- بابا عصبي هسة .

ابو الغيهب :- تدري بي عصبي وتريد تطلع ما تخاف يعاقبك
ويحرمك من كلشي تحبه .

نور:- اني احب عمو جلال اريد أروح اشوفه
يريد يشتريلي لعبة جديدة .

أبو الغيهب:- شوية ويجي ابوك احجي وياه هوه ياخذك
وانتَ هشام اكعد وسكت لا تخلي يتخبل علينا بالزايد
تره ما بينا حيل هوه صار عصبي بسبب نور .

هشام:- انتَ يابه ابقى خاف من الغيهب
حتى لو غلط اوكف وياه عاشت ايدك .

باوع الزوجته وصاح بيها :- منتظرج بالسيارة.

بقيت جامدة بمكاني عزا شصار قبل شوية نضحك
ليش صار هيج ليش ، طلعت سجى رجعت للمطبخ
وهاجر ويايه غسلت المواعين ونظفت كلشي
صار اليل اخذت أولادها وسلمت وهيه توصي:- فدوة زهراء
ما اوصيج بعد احجي وياه يعتذر من جلال كدام زوجته تفشل
والله عيب البنية شنو تحجي علينا .

زهراء:- والله بس يرجع احجي وياه لا يظل بالج عيوني
صدك  لحظة من الهوسة الصارت نسيت  .

دخلت للمطبخ فتحت الثلاجة اخذت حصتها
وهمست :- هاي حصتج من الحم الغيهب گال اعزل الج منه .

اخذته وبوستني وطلعت رجعت اخذت
زينة بحضن عمو تلعب بدلت ملابسها
وبدلت ملابسي ونزلت أتفقد نور ضاع صوته
دورت علية لكيته ؏ نفس كعدته ما متحرك
وعمي داخل للغرفة.

زهراء:- لك نور ليش ما مبدل ملابسك .

رد علية وصوته متروس عبره يريد يبجي
بس يحاول يسيطر ؏ نفسه:- لا رجع بابا ولا رجع جلال
عافوني هنا شنو عافوني هنا بلا كلام .

زهراء:- وانتَ شعليك بيهم ولك امي لا تخبلني
بسرعة كدامي بدل لا يرجع ابوك ويشوفك
هيج يتخبل عليك والله .

انفتح الباب الخارجي اباوع ؏ ساعة 9 ونص
رجعت شعري استندت ؏ حايط
وهمست بتحذير :- اركض فوك بدل بين ما احجي وياه.

اول ما وصل الدرج دخل الغيهب
هوه شاف نور وصاح :- اوكف نور اوكف .

التفتت نور يباوع بعيوني وهمس:- بابا وين رحت
انتظرتك انتَ وعمو جـ ......

قاطع كلامه وهو يرد بتحذير :- ابقى بملابسك لا تبدل .

زهراء:- روح ماما روح بين ما احجي اني وبابا .

وجهه نظراته بتجاهي وصك
؏ اسنانه:- وانتِ بدلي اوصلج البيت اهلج .

نور بسرعة صعد توجهه للتخم كعد
وطلع من جيب البنطلون جكاير شغل
وحده وهمس:- بسرعة .

زهراء:- جكاير غيهب مو تركتها صار هواي رجعت عليها ليش .

طبك رجل ؏ رجل ورجع ظهره ؏ التخم
بكل اريحية وايده مستنده وبكل هدوء يسحب النفس
ولا كأن وأكفه احجي وياه اتجاهل وجودي بشكل .

هزيت رأسي بـ عصبيه مخلوطة بقهر من هالة البرود
الـ صارت عنده .

صعدت فوك بسرعة خليت ملابسي بالجنطة
ونزلت اني والجهال صعدنا بالسيارة وبس صوت
انفاسنا تنسمع ، اول ما وصلنا وقبل لا انزل
همست بتعب:- الف مره كلت من تصير عصبي
وتمر بمشاكل لا تبعدني وانتَ مصر ؏ غلط
وبسوالفك هاي تخسرني غيهب والله تخسرني .

نزلت وهوه نزل الجنطة اول ما انفتح
الباب سلمت ؏ ابوية ودخلت
وهو ظل يسلم خليت زينة على
تخم واني احترك گلبي صاير نار .

فتحت الشباك اباوع علية يضحك
هه اني اعرف غيهب يمثل التعب
والرجفة بيده تحجي قهر كون كامل
صعبت علية روحـي شلون بعدني عنه
وهوه صعب علية  اكثر ، دموعي صارت تتساقط
بدون سيطرة خفت لا يدخل ابوية يشوفني
غسلت وجهي وصعدت فوك دكيت باب سيف
وصحت:- سيف انتَ موجود .

فتح الباب صار مقابيلي جسمة صاير ضخم
ابتسمت تقدم باسني وكرص خذي:- لك هلا بالزين
هلا بسورها ونورهاا .

زهراء:- عبالي طالع .

سيف:- لا وين اليوم جنت بالدوام من رجعت نمت وهاي كعدتي .

زهراء:- يا زين كون تتعب بالدوام .

سيف:- انا الملازم سيف رحم ابن الواء منو يتنفس ويايه
وشلون اتعب اذا كاعد بغرفة الوالد .

زهراء:- شغلوني وياكم وكعدوني وسكتوني .

سيف:- مو حلو اني اريد مداهمات
وبيكيسي كلاشنيكوف وطب طك .

سمعت صوت ناعم يحجي بالغرفة
طبكت حاجبي بستغراب:- شنو هاي صوت منو .

ضحك بتلاعب وهمس:- النفس مال اني .

زهراء:- وينها .

راح للتلفون ودار الكامرة علية :- هذا الحلو مالي ممنوع المس .

زهراء:- لج هلوووو سمسوم شلونج .

سمر:- هلا بـ زهوره هلا بحماتي الحلوة .

زهراء:- ضامنتها كلشش .

سمر :- بجيبي وداعتج .

زهراء:- ليش مقصرة شعرج كلش .

سيف:- ناوية تموتني بجمال الرقبة .

ضربته راشدي بطرف اصابيعي
وهمست:- ولك صاير مو خوش شو سرسري عيب .

سمر :- عادي عادي عوفي تعودنا.

اباوعلها تتلمس رقبتها بكل هدوء وهوه
مركز بيها وعلى وجهه ابتسامة تسحر
زهراء:- اثنينكم منحرفين.

سمر:- الـ يگابل اخوج شتتوقعي يصير .

رد عليها وهوه يغمز إلها :- يصير حباب وحلو .

التفتت علية وصاح:- نور وزينة وين ؟

زهراء:- جوة اجيت انزلك امشي .

اخذ التلفون لبس سماعة بلوتوث
ونزلنا ركض نور من شاف سيف
رفعه وشمره ؏ تخم يدغدغ ويبوس بي :- ولك مشتاقلك
حقير ليش ما تخابرني وما تسأل علية بس من تحتاجني
خالو سيف تعال ابو حلك .

ضحك نور وصاح:- والله بابا ما ينزل برنامج
اتصال عايفيني بس العب اباوع يوتيوب .

سيف:- سودة علية يا خالو حياتك معاناة.

رحيم:- اذا يعذبون نور هنا يجي وبعد ما اقبل يرجع الهم .

نور:- حتى بابا يعرس علينا .

خربنا من الضحك علية :- هسة خالو اريد حلويات
وعصير وكيكة.

سيف:- راتب ابوك عندي .

نور:- تريد ازعل عليك وما أحبك بعد .

سيف :- امشي يلاا امشي .

يريدون يطلعون أبوية صاح بـ سيف :- كلشي يريد وكلشي
يحب تشتري اله خطية اخاف يسهر اليوم ؏ فلم .

زهراء:- لا وين يسهر كاعد من الصبح وتعبان .

سيف:- يابوية اليووم لا تدخلين بكيفنا نشغل فلم ناكل
ونباوع الى ان انام موو صحيح خالو .

ركض كدامه وصاح:- صح صح .

طلعو وبقيت بس اني وابوية انسولف
ما حسسته بشي لان اعرف ابوية كلش
زين بس يسمع صاير شي يلعب لعب بغيهب
وبسابع احلامي يرجعني اذا ما يكبرها .

خابرنا ؏ رجاء من شافتني صارت تغلط:- لا يا حيوانة
تجين وما تبلغيني اجي ويااااج .

زهراء:- لج ؏ اساس باجر بس الغيهب مايكدر عنده شغل .

رجاء:- باجر من الصبح يمج .

ايهاب:- ماكو رجال تسألي هنا يمكن ما موافق .

رديت بضحكة:- والله حقك ولج غير تاخذين موافقة.

ايهاب :- مستهتره صوج عمي ما رزلج .

رحيم:- ما اوكع بينكم لان تتصالحون واني اطلع
بوجهه الأسود مثل ذاك اليوم تعاركوا  أدافع الـ هذا وحاجز الها
تالي تصالحوا وزعلوا مني .

رجاء:- حبيبي عادي لو سمحت ممكن اروح باجر الصبح .

ايهاب:- نرد الجواب بكتاب رسمي غدًا ان شاء الله .

سلمت علينا وراحت ونور وسيف رجعوا شغلوا
فلم على تلفزيون وعدل التلفون حتى تباوع سمر ويانا اشوفها
تاكل نفس حلوياتنا اني عرفت الموضوع
بس سألت:- نور وين رحتوا .

نور:- رحت اني وسيف ؏ وحده حلوة اسمها سمر باستني
وباست عمو سيف وعضت ايده حيل وهوه كرصها

قاطعت كلامة واني اباوع السيف اختنك من الضحك
صحت بي :- ولك سيف شلون هيج تسوي كدام الولد
وشلون تروح البيتهم بالله شافوك اهلها عزا .

سيف :- ولج امها عدها علم وخواتها هم بس ابوها
واخوانها ما يدرون قابل شسوي  اني اخلي هل حلويات الطيبة بحلكي
واخليها تباوعلي امداني .

زهراء:- اثنينكم مخابيل واحلف عليكم
بس دير بالكم ؏ نفسكم لا تصير مشكلة فدوة اروحلك .

سيف:- والله حذر بس لازم اشوفها .

زهراء:- ليش ما تتزوجون وتخلصونا.

سيف:- بعد إلها أخر سنة وتتخرج ونتزوج.

زهراء:- تزوجوا وخليها تكمل يمك ليش
هل شلعان القلب .

سيف:- اني اعرف نفسي غيور وعصبي انوب
تصير بيناتنا مشكلة وابطلها يمعودة تكمل احسن.

زهراء:- من هسة تصير ويانا مشاكل .

سيف:- الحياة بلا مشاكل ما الها طعم
الله من كعدت الـ هل ساعة سبع مرات
متعاركين اساس نجاح العلاقة.

زهراء:- اروح انام قبل لا اتخبل، وانتَ نور كمل
اكل وأصعد مو تسهر للصبح .

نور:- حاضر امي .

صعدت وايدي ؏ صدري امشي بثقل
حسيت هموم الدنيا تجمعت وصارت ؏
شكل طابوكة وعلى صدري تمنعني اجر
النفس عدل ، خليت زينة تنام وظميت
وجهي بيدي انفجرت ابجي بدون توقف
بمجرد ما اتذكر موقفنا ضحكتنا
وشلون يغنيلي ويتحارش بيه الصبح
اتعب اكثر وكلبي ينقبض اكثر واكثر
خليت راسي ؏ مخدة  راسي
ثكل والحرارة ادك بعيوني
غفيت واحتمال فقدت من الوجع
اريد الوقت يمشي اتهرب من الواقع
ومن كلشي صار ويايه .

فزيت وجهه الصبح عيوني ما تنفتح
خليت ايدي ؏ صدري من الهبطة:- ولكمممم كعدوا رجاء اجت .

فركت عيوني حتى اشوف الساعة
وسعت عيوني وصحت:- صخام الساعة 7 الصبح .

رجاء:- صخام بوجهج الفاهية ايهاب طلع
للشغل وكعدت هددته اذا ما ياخذني ولا اخلي
يروح للدوام فـ اضطر يعني شسوي بعد  .

تقدمت كرصتني من أيدي وصاحت
بيه:- ولج خبالو ليش تجين وما تنطيني خبر ؟

بعدني اريد ارد عليها وسعت عيونها
وصاحت بفزع:- عزا شبيج صايرة جمرة حارة.

لزمت راسي ورجعت ؏ مخدة:- راسي يريد ينفجر .

كعدت بصفي وقلصت عيونها بشك :- بس من تنقهرين
تصير عندج هل حالة شبيج زهراء الغيهب حاجي وياج .

انفجرت احجي الموقف وابجي
مصدومة ؏ مستغربة من الصار
انفعلت وصارت تحجي علية وتغلط
وتريد تخابر ؏ غيهب وتهدده بـ ابوية .

زهراء:- الخاطري ما اريد ابوية يعرف
فدوة لا تصير مشاكل اني صدك مابيه حيل
مشكلة وتنحل حالها حال القبلها.

رجاء:- منا الباجر اذا ما يخابرج ويعتذر
ويفهمج ؏ كلشي والله ثم والله اخلي بحلك
بابا وايهاب وقد اعذر من أنذر.

زهراء:- جيبيلي مي يبس حلكي هسة اموت ويرتاح
استاذ الغيهب خلي بعد يتخبل يطرد يتعارك يضرب
الرايح والراجع .

رجاء:- صدك خبالو وعقلج صغير ليش هالتعظيم
غلط ولج غلط عوفي وتعاملي بمثل ما يتعامل بالضبط وراح
تشوفين شلون يرجع يتوسل .

درت وجهي باوعت النور فارش دوشك
بالكاع ونايم بكل عمق  ، كمت غسلت وجهي
اباوع ؏ ايدي رجعت ترجف
رجعت اخذت تلفوني ؏ امل اشوف مكالمة
او حتى رسالة بس خاب املي بي وتعبت .

رجاء:- كافي لا يصير بيج وتموتين كافي بابا
تعالي ويايه اريد اسوي دولمة وبلا غيهب
وسوالفه الـ ما تنبلع ابد. 

همست بـ إرهاق واضح :- بابه مايحب الدولمة.

رجاء:- تعلميني بـ بابا ادري بي
وصيت ايهاب من يرجع من الدوام
يشتري سمج .

كمت بدلت الزينة ورحت للمطبخ لكيت
رجاء أجهزة بالمواد :- اكلج شنو أخلي بعد مواد جهزت
بصل وكرفس وتمن هاي هيه .

زهراء:-هاي هيه بحلگج .

رجاء:- هاا سالمين .

زهراء:- لحم مثروم ولحم قطعي قطع صغيرة
دبس الرمان ومعجون وزيت وثوم اثنين ملح
وكركم بملعقة جاي ، ولامندوزي ، وطماطة
وحدة لو اثنين براحتج بعد .

رجاء:- وبهارات دولمة .

زهراء:- اذا عدنا بهارات فرش وطيبة خلي .

لزمتني وسحبتني من أيدي:- تعاي يا معدله سويها
وأني أحفر الخضروات .

بيه ما بيه سويتها واني اسولف الها ؏ عزيمة
خلصت قبلها ولزمت تلفوني فتحت الانستا
ومن التعب والخنكه اندفعت وحجيت
الـ حبيباتي كلشي وماقصروا ويايه
احس هونوا علية وعبالك كلهم يمي
انقهروا ويايه نصحوني وانتظروا الـ راح يصير ويايه
وصرت اناقشهم وانشر الهم كلشي يصير ويايه
ورجاء ترزل بيه كافي ذبي التلفون
كافي تعالي ويايه كعدي يمي اريد اشوفج .

وصل الرد من اساور
على ستوري المشكلة :- دخيل الله شبيكممممممممممممممم
ولكممممممممم كااافيييييي ولكممممم كافيييييي اشك هدوووممييييييييييييي
مو ختمممممتتتتتتت والدنيااا ربيع والجووو بديعععععععع كااافيييييييييي كون راشدي هيج ؏ وجوهكممممممممممممممم تعبت فحطططططططتتتتتتتتتتتتتتتتتتتتتتتتتتتت
وبعدددددد شصااارر انتِ وهاي اكتابتج عبالك واحد يركض فحطان .

زهراء:- شبيج ويايه اني حبابة والله هذا ابو البورتوقالي .

اساور:- يا ابو البورتوقالي يبس ريكييي ومحمدددددددد ولكممممممممم استقروا تعبتتتتتتتت .

تالي رددت ؏ ستوري ذكرت بي
وقت ما دخل وگال لمي ملابسج
اوصلج الـ اهلج :- ابوي ما يكدر بس ؏ امي بس علية اطلعين السانج بالله ليششش هيج يسوي بالولد اوكفييي فحطت اقرا ركضض تحجين بسرعة اشرب مي يبس ريكي والله ، هسة عزيمة شلونها والأكل يفتح النفس والترتيب يخبل ليشششش تخرب الدنيا ما يعرف يسكت
يلوموني من اكول ابو هلهوله.

سكتت شوية وكملت احس
هل بنية مهددة اساور:- ماادري احس مايريد يضوجج بكلمة كم مره كلت من تصير عركة بين جلال وابو البورتوقالي لا تدخلين هو يضوج من ادافعين الجلال والف مره كال لا دافعين الجلال كدامي .

زهراء:- انتي لو تشوفين جلال شلون يباوعلي يريدني ادخل حتى يسكت وهو ولا عبالك لج ميشوف كدامه مو عيب يضرب رجال شكبره شكده وعريس والنبي عيب خزي .

اساور:- لا تدخلييييييين بنتي لا تدخليييين مشكلة هو وجلال تورررررطين نفسج بيهااااا ليشششششش زهراء بطلي هل تصرفات تره تعبتيني واني احجي تدرين كلشششش زين الغيهب كلشششش ينزعج من تدخلين وتخلي بموقف ضعيف كدامج وكددامهممم اوووفف منج اوووف .

للظهر كمل كلشي دخل بابا وايهاب
دخل سيف وصاح:- شنو هل ريحة الاكل الطيبة
ولكم انصهار اريد اذب روحـي انتحاري ؏ اكل .

ايهاب:- ريري وينج هاي السمج .

دخل للمطبخ شافني وصاح:- يابه هلا هلا هلا بـ ام نور العلم .

زهراء:- هلا بيك ابو كيان شلونك .

ايهاب:- بشوفتكم صرنا احسن عيوني
شلونه ابو نور ان شاء الله ما متعبج .

زهراء:- لا الحمد لله بخير ويسلم عليك .

رجاء:- امممم بخير عشتوا.

ايهاب:- وصلت خير شصاير.

زهراء:- انتِ ما عندج كونترول ؏ السانج .

ايهاب:- مع الاسف عطلان من زمان
شصاير ام نور لا تكولين ضاربج لو
معلي صوته بوجهج .

زهراء:- لا والله بس صار سوء تفاهم وگال
يعني حتى لا تكبر المشكلة روحي الـ اهلج
تعودت علية لا يضل بالك هوه بس يفكر وتستقر أعصابه يرجع .

ايهاب:- اذا هيج فـ يا ام نور تصرف ابو نور صحيح
ليش يغلط بكلمة لو بتصرف وتكبر بينكم
واني بس يجي عندي تصرف ثاني وياه .

رجاء:- غلط شنو الصح رجال ومرته كلشي يصير بينهم
شو هذا ڪُـل ما صار بينهم شي يتبزبز ويبعدها.

ايهاب:- من وجهة نظرج بس من وجهة نظري صح .

رجاء :- وان شاء الله تريد تسوي مثله والقران
اتخبل واهج وبعد ما اخليك تندل طريقي
يابه والله العب ما العب حالك حال المخبل ادور علية
ما تلكيني وبراحتك بعد .

باس أيده وهوه يباوع ليفوك
وعافها وطلع بدون ما ينطق بحرف
زهراء:- اخبال الـخبلچ ان شاء الله خبلتي الرجال
اروح اصب احسن .

أبوية بطبعه من يدخل البيت بوجهه
للغرفة يسبح ويبدل ويطلع يشوف
شكو ماكو ، فـ بين ما كمل
فرش سيف السفره ونقلنا الاكل
او ما كعدنا طلع وصاح:- اليوم حبايبي مجتمعين يمي .

زهراء:- الله يساعدك بابا .

رحيم:- ويساعدج بنيتي .

راحت رجاء باست راس ابوية
ايهاب يلاعب كيان صار عمره
خمس سنوات يعشق أبو
وايهاب يسمي النفس الـ يصعد وينزل .

صرنا ناكل ونسولف بس بگلبي
نار محتركة اكل شكد الأكل طعمة
طيب بس بكلشي ما احس ، صرت اكل حتى
محد ينتبه علية ، نزل نور سلم ؏ ڪُـل
وكعد بحضن بابا يوكل بي .

سيف بغير عالم ڪُـل شوية يهمس ويبتسم
السماعات بـ اذنه ، كملت قبلهم حضرت
الجاي كعدنا نشرب ايهاب وبابا يتفقون ؏ شغل
واني ورجاء نسولف ؏ بيت جدي
للعصر دخلت علينا بيبيتي وام ايهاب
قدمت الضيافة وكعدت وياهم
شوية وفتحت التلفون بقيت مصدومة
مامصدكة ومستحيل اصدك
اساور صارت محامي دفاع للغيهب
يممممممااييي نازله علية هيه غلطانة
وهو منبهها بقناتها التلي والبنات
حالهم من حالي مصدومات
كلنا مصدومين كلنا .

اول ما طلعت بيبي وام ايهاب
خابرتها ماترد تعرف تعلمت اهلهل
واذا تجاوبني اهلهل عليها والله
دزيت رسالة كتبت:- اذا الزمج اگطعج بسنوني
يا كوبرا فعلا كوبرا.

ردت عليه تقهرني بالزايد:- هو شنو غير انتِ غلطانة .

سديت التلفون واني اشوف
ابوية دخل نام وسيف صعد
وايهاب راح بيت جدي
فتحت مكالمة اني ورجاء واساور
انخطط والحقيرات هاي تضحك
وهذيج تحشش وكل شوية اهدد بيهن
يعوفني بحالي ، الى ان صار اليل
رجاء ام بطن شالت التلفون طلبت
حلا الكيك والكنافة والكريب
وهذا نور نسخة رجاء يموت ؏ بطنه
وقتتها هوه دخل ايهاب وابو التوصيل اجه
دفع وكعدنا ناكل وايهاب يشكي منها
بالضحك يكبس بعدين يرفع يخاف تعرس علية .

فزيت ؏ صوت التلفون باوعت الاسم
وجسمي صار يرعش مثل السعفة
وبداخلي شعرور غريب
بين فرحانة اتصل
وبين مقهورة وضايجة منه
وما اطيق اسمع صوته .

صار يتصل مكالمة بعد الثانية بدون توقف
سويت التلفون صامت وذبيته بعيد عني
حتى ما أضعف وارد علية وهذا استاذ بغسل
الدماغ ، نزل سيف يضحكون بيها
بس وجهي انخطف لونه ..

الساعة بـ 12:18 دقيقة اندك باب البيت
طلع ايهاب وستند ؏ حايط يحجي بكل هدوء
شوية ونفجر يحجي بـ انفعال ، طلع ابوية
تراجع ايهاب شفت ابوية ضحك ودخل علينا
الغيهب وبيده علاليك صرت مقابيلة
تقدم باسني بخدي وهو يضحك ولا مهتم
ولا عبالك صاير شي يتصرف بكل اريحية
انقهرت بالزايد صرت قريبه علية
همست بـ غضب مكتوم :- شعندك هنااا ليش اجيت
غيهب منو كال اريد اشوفك .

الغيهب:- اجيت اشوفج وحتى ما اتعبج أشتريت عشه
نتعشى كلنا وبعدين نتفاهم تره جوعان كلشي مماكل .

زهراء:- يعني ما تعرف تاكل بالبيت جيت هنا شكو .

يباوعلي بس عيونه تضحك يخليني
صافنه وكأن ايدي مربوطة:- اريد اتعشى اني وعمي
وسيف وايهاب موجود مو عيب تطردين زوجج ابو جهالج .

زهراء:- عيب عليك إطلع زوجتك ام اطفالك بليل
والله شنو تعاركت انتَ واهلك اني واطفالي شنو ذنبنا.

قاطع كلامنا دخول ابوية :- شلونك ابو نور .

الغيهب:- احجيلي انتَ شلونك لواء رحيم .

رحيم:- ششوف حضرتك اني بـ أفضل حال .

الغيهب:- واضح صاير اصغر مني ماتكبر يا ...

رحيم:- ياا شنو والقران هنا اخليك وادكك اسكتتتتت .

الغيهب:- افركم فر بـ ايد وحدة وداعتك .

رحيم:- داخل بيتي ويشمر علية بس ساكت
الخاطر ابنك الـ كاعد بحضني .

الغيهب:- اضحك عليك عفوًا اضحك وياكم
لا تاخذها بجدية شبيك .

رحيم:- شسويت ؏ قضية الـ كلفتك بيها .

الغيهب:- ڪُـل خير كم يوم وتخلص وسويتها
احسن من ما تريد .

رحيم:- يعني برأيك كم سنه تنزل الحكم .

الغيهب:- ما انزل حكم اخلي يطلع إفراج .

ايهاب :- شلون تره تزوير .

الغيهب:- بس ما عدهم دليل او تصوير هو
يزور مجرد كلام وشهود هل سوالف
ما تمشي ويايه اربع ايام بالمضبوط يطلع .

رحيم:- لوتي بهل سوالف تعجبني .

الغيهب:- مرات اني نفسي تعجبني وداعت عيون بنتك لواء رحيم .

جهزت الأكل ورتبت كلشي كعدوا ياكلون
اني دخلت المطبخ ما اريد أشوفه من خلص
راح يغسل صاحني انتبه ؏ حالتي
خجل حتى ينطقها ويكول تعالي ويايه
عرف بنفسه غلط بحقي بدون ما احجي
حرف واحد .

الغيهب:- وغلاتج وغلات نور وزينة
ما متقصد اتعبج واقهرج ردت تبتعدين
حتى لا تكبر بيناتنا اني ادري واعرف غلطان
بحقج ، ولكش زين  وادري ما تسكتين وتحجين
وتصيحين واني عصبي يبدر مني تصرف
بساعة عصبية وتلوميني ما اتحمل .

زهراء:- انتَ مو بس تعرف بنفسك غلط
لا وضعيف هم ما واجهتني ولا فهمتني
ليش غلطت بحق اخوك .

الغيهب:- أتجاوز حدوده يستاهل الصار بي
رغم هذا اني مستعد باجر اعزمهم ؏ مطعم
وتروحين ويايه حتى نحل الخلاف الخاطرج
والخاطر نور لان يحب جلال .

زهراء:- انتِ مو بعدتني حتى ما ادخل
خلص ما ادخل وخليني بعيدة عن حياتك
ومشاكلك تحلها وحدك لان الواضح ماتحتاج زهراء.

بحركة تمرد حسيت ولحظات
سريعة حسيت نفسي صرت
؏ صدره حاضني بكل قوتةوهمسز:- ما احتاجج شنو زهراء لج
انتِ نور حياتي البارحة رجعت للبيت احس الدنيا ظلام بعيوني
اليوم رجعت من الدوام والله ما اكدر ادخل البيت
رحت البيت هاجر مختنك والنفس ما ينسحب
اني اضيع بدونج انتِ قوتي ونعمتي وسعادتي.

زهراء:- بعد ما اتأثر بكلامك لان مجرد كلام
افعالك غيرر .

الغيهب:- رجعي نتفاهم بالبيت الخاطري .

درت وجهي واني امشي همست :- تعذرني ما اكدر والله .

عفته وصعدت فوك هوه يباوعلي مصدوم
دقايق بس وسمعتهم يسلمون علية وطلع .

انفجرت ابجي وراسي يريد ينفجر
رجاء ترزل بيه صرت ما اسمع من احد
حضنت مخدتي ونمت ما اريد احجي حرف واحد
قبل لا انام باوعت ؏ ساعة ب2:34 دقيقة راح .

الثاني يوم كعدت راسي مصدع بالزايد
اخذت التلفون الدنيا مگلوبة اتصالات
من الغيهب واساور وهاجر وعمي
والبنات بالانستا كلهم بقلق ومنتظرين
يسمعون خبر جديد .

حجيتلهم مقتطفات عن الصار
ونشرت الإتصالات
ماكو ساعة واخذت الجهال
ابدلهم رجعت مكالمات لم يرد
عليها 43 من اساور خليت
گلبي بيدي اخاف صاير شي
رديت عليها كالت :- لحكييلي ولج اني شكوو شسويت
والغيهب يخابر تره وگفت وياه هل مره.

زهراء:- تره ما ينلام من يكول كوبرا هسة عرفت
شنو شعور الغيهب من دائما ادافعيلي وتحجين علية
شدعي عليج هيه هاي هم صداقة.

اساور:- استغفر الله لج احجي احجيييي ليش يخابر
انوب هذا المسعد اتصل علية يكلي جاوبي الغيهب
هييييييه شنييي اني شكوو بيكم .

زهراء:- دجاوبي شوفي شيريد وتعالي كوليلي .

سدته مني وراحت ماكو مرت ربع ساعة
وصارت نص ساعة اجتني اساور تهلهل .

اساور:- زهراء اذا تحبيني راح يجي ياخذج
ارجعي وتفاهموا الموضوع مايستاهل
لج همه اخوان يتعاركون ويتصالحون العصر
وانتِ تدرين جلال يموت ؏ غيهب لو مو يضربه راشدي
عادي يسامحه وأصلًا هو ما زعلان منه
يعني تدرين بنفسج غلطانة ليش تكابرين ؟؟

عدلت التلفون بيدي ورديت
بتكبر وقهر :- والله ماكو غلط مني مجرد وگفت
مع الحق هو غلط بحق جلال .

اساور:- عجيب لا تدخلين لج بابا شعليج
بيهم هسة سجى هم أدخلت زوجته
الجلال ادخلت ليش بس انتِ ادخلين نفسج
بسوالفهم ومشاكلهم ما توبين.

زهراء:- تره العركة صارت ببيتي شبيج اساور .

اساور:- بيتج وكدام عمج يعني همه بيناتهم
المفروض تتعودين عليهم .

سكتت واني مارديت ادري بنفسي
مو غلط بالعكس تصرفي صح
لحظات وكملت :- ارجعي هو يكول عندي سبب بس يريد ترجعين وتتفاهمون سوه مثل كل مره بعيد عن الكل .

زهراء:- كلت ما ارجع زين او لا .

اساور:- وتره شايف الستوريات مالتج
يكول هل سوالف اعديها بمزاجي
حتى خجلت واحتاريت شنو احجي .

زهراء:- آني خفيت ستورياتي منه شلون شافها .

اساور:- انتِ مو مثبتة هايلايت
من خفيتي الـ ستوري يطلع حتى الهايلايت
فـ هو عرف انتِ مفعلة الإخفاء مسوي
حساب بـ اسم بنية وداخل .

سحبت نفس وكملت :- زهراء الخاطري ترجعين
اذا عندي خاطر يمج لا تقهري خذية صوته تعبان.

زهراء:- خلص ارجع الخاطرج بس هوه
أذاني وشافني شكد تعبانه حتى خجل مني
كم مره اتوسل بي لا تبعدني من تضوج من
يصير شي احجي وهو ماشي وصار وشعندي غيرج ويصدمني .
مت
اساور:- بنفس الوقت تعرفين هو يحبج والله يحبج
وبعدج حتى لا تكبر بينكم وبالأصل انتِ متفقه وياه
تروحين ثاني يوم الـ اهلج يعني مصار شي
كبري عقلج ورجعي حبيبتي اروحلج فدوة الوجهج
حتى اليوم اجي اشوفج مشتاقتلج .

زهراء:- قشمري علية اروح ابدل واربد اشوف
شنو تاليتها وياه هل ابو البورتوقالي.

كمت اني ابدل اسولف الرجاء
وهيه تهز ايدها ما عاجبها الوضع
ختمتها واني اطلع خابرت اساور
ترزل بيها لان قنعتني ارجع

لبست حذاء نور ولبست حذائي
سلمت ؏ بابا وطلعت اول ما فتحت
الباب صار مقابيلي باس نور واخذ
زينة مني وهوه يباوع لعيوني
وقبل لا يبتعد همس :- طالعة حلوة تاخذين العقل يا ست الحسن .

رفعت حاجبي بعدم رضا
ومشيت للسيارة صعدنا كلنا
طول الطريق الكل ساكت
وصلنا للمطعم دخلنا
كعدنا ؏ كراسي رفع التلفون
وأتصل:- ها الحبيب وينكم .

شوية وكمل :- ماشي احنه طاولة رقم 5 .

دقايق ودخل جلال واسيل ببتسامة
حلوة وگفت بست اسيل وسلمت
؏ جلال وكعدنا ، اخذت زينة
من الغيهب ، وهوه يحجي ويانا
يريد يعرف شنو نريد ناكل .

جلال مغلس ؏ وضع ويسولف هوه ونور
واسيل تسولف ويايه من اجه الولد اخذ الطلبات
كلنا طلبنا مشاوي ، نزلوا الاكل حار يجنن
اكلت شوية والتفتت اوكل نور من خلصنا
طلبنا عصاير وبقلاوة وكريب
نريد نطلع اشرتله وسعت عيوني
اقترب مني همست:- يلاا اعتذر شنو راح نطلع .

الغيهب:- مو عزمتهم وخسرت 250 الف
هذا مو بس اعتذار سحل وزحف كافي طمع .

صكيت هلى اسناني ورديت بتحذير :- غيهب اعتذر لا تخبلني .

عدل ملابسه وتحمحم حتى يجذب أنتباه
الكل وفعلا صاروا يباعون علية
ركز ؏ جلال وهمس:- أعتذر ؏ موقف ذاك اليوم بيتي
عندي مشكلة بالشغل وصارت بوجهكم .

جلال:- ولا يهمك ما صار شي .

اسيل:- لا تعتذر ابو نور أصلًا نسينا الصار
سوالفكم وضحكم نسونا كلشي .

زهراء:- حبيبتي والله بـ ڪُـل وقت يعجبج
تعالي البيت بيتكم نتونس سوه .

اسيل:- ان شا الله اكون سعيدة بشوفتج حبيبتي انتِ .

الغيهب:- الجهال نعسانين يلا نطلع شدكولون .

جلال:- يلا تأخر الوقت .

صعدنا السيارات ودعناهم ورجعنا
للبيت ورجعت الحالة الصمت
وكفنا بالباب وطبكت سيارة ضرتي
نزل الغيهب وصاح :- هاا ملاعين وين جنتو طالعين
لا تعزمون لا تحجون انتَ وهاي الكوبرا .

نزل المسعد وصاح علية:- يول مو جنت طالع انتَ والفاهية
شتريد بعد بعدين ناقصين نكد ونعزمكم مو زين رجعت
الفاهية بفضل هل ملاك الصاعد بالسيارة.

اباوع الأساور بقت ترمش بعيونها
الغيهب:- سهلة صاير السانك السان رشاشة
من اذكر الكوبرا، امشي عليكم الله تعالوا نسولف جوه.

انحنى وهمس وهو يباوع الأساور:- ها اساور نروح يمهم
عندج وقت لو لا .

اساور:- اي ما عندي شي .

المسعد:- سالفة بيها زهراء يصير بيها وقت وحيل
سالفة بيها اني تتمرض وتصير مشغولة.

نزلت بسرعة وهيه ترد :- ؏ اساس انتِ ما تفرح تروح الـ استاذ
غيهب وتكعد وياه وطن سوالف وما تملون .

اقتربت مني باستني وصاحت:- فتحولي الباب يلاا عيوني .

دخلنا كلنا اول ما كعدت صاحت :- ها يول وجوهكم
مقلوبة احسكم بعدكم ما متصالحين.

الغيهب:- هسة عوفكم من الصلح انتوا شبيكم
مستلمينا يول ويولي.

ضحكت اساور واني ركزت
وخربت من الضحك ؏ رد المسعد :- يول غير خلصت قصتكم
البغدادية وحاليًا تركت ڪُـل المحافظات طفرت ؏ رمادي
وهاي اخوك صار يفهم كلمة الثانية عقلي يوجعني عود افهمها
مستلمتني اكس مربع ما تگول شوف تكلي ادحك
متكول تعال لا لا حدر مو هنا هين وهاي اني صرت  يولي
وهيه يول بقت يم ربنا شوكت تختم ونخلص
قبل فترة عاشت بدور الغيهب والـ خبال
وصارت فاهية مثل الاخت
هسة كلهم ضباط هاي بعد ڪُـل ما أشوفها
تستلمني تحقيق ؏ دك رمي ادعولنا .

اساور:- ليش احس الوضع ما عاجبك .

رد عليها وهوه يورث جكارة:- عاجبني وعاجب الخلفوني .

زهراء:- كومي أساور نحضر الضيافة.

عفناهم ودخلنا المطبخ فتحت الثلاجة
وهمست:- وين جنتي ؟

سحبت ماعون حلاوة جكليتية  من الثلاجة
وگفت ؏ كاونتر :-تعشينا ورجعنا وانتوا شصار وياكم
الغيهب اعتذر من جلال .

سولفت الها كلشي الى ان كملت اخذت الضيافة
ورجعنا دخلنا ما طولوا شوية وطلعوا
اخذت الجهال للغرفة خليتهم ينامون
ونزلت فتحت الباب سمعت صوته :- ابوية من البارحة بيت هاجر .

زهراء:- ليش تعاركت وياه ؟

الغيهب:- لا بس من سمع وديتج البيت اهلج
گال اني هم ما أظل يمك وطلع .

باوعتله بعدم رضا وصعدت فوك
ذبيت ملابسي وفتت سبحت وطلعت
بدلت وكعدت بفراشي لزمت تلفوني
انفتح الباب ودخل اقترب مني
رفعت رأسي باوعت بعيونه
سحب التلفون وكعد بصفي
جر نفس وهمس:- اسف .

زهراء:- هاي الـ اسف وين اصرفها غيهب
تجرحني وتقهرني وتگول اسف والمفروض
اني اتحمل واسكت مثل قبل يعني برأيك اني
مثل قبل عندي صبر .

الغيهب:- ادري مليتي والله واني ما اريد تنقهرين وتتمرضين
بسببي ليش تبقين ونتعارك بس فكري بيها .

زهراء:- غيهب افهمني اني تعبت غلط واحد منك بعد
احرك الأخضر واليابس واتخلى عن كلشي واعيش حياتي
بين شغلي واطفالي وانتَ تطلع خارج قوس
كلشي تغير غيهب كلشي جنت ضعيفه حاليًا
اني اقوى من ما تتصور أتقي شري.

غمض عيونه بتعب ورد
وهوه يضغط ؏ ايده بكل قوته :- جلال بالكراج بعين وكحه
گال ليش تصرفاتك تصرفات شخص يغار لان اني ما تأثرت
بالماضي ولان ما تزوجت تلاث مرات وعنفتهم وعذبتهم
ولا طلبت من وحده منهم تسقط ابني وانما عالجت نفسي
بنفسي واختاريت شريكة حياتي وحدة لا غييييير .

فرك وجهه وكمل :- انفعلت وضربته ورغم هوه غلطان
رحت واعتذرت الخاطرج والخاطر هشام وابوية
اني من البداية ما أريد اشوف جلال .

زهراء:- صح جلال غلط بهذا التصرف بس يبقى
اخوك يحبك ويحترمك بس انقهر لان غلطت
علية گدام زوجته.

الغيهب:- الـ هل لحظة اكول يستاهل
كم مره نبهت ؏ نور من عدنا خطار بس اصيح
نور اشوفك كدامي ، كم مره نبهت نور اذا اختك تبجي
انتَ المسؤول يمكن صار الغطوة ؏ وجهه اركض
شوفها يمكن ذبانة مضوجتها نور مو صغير لازم
يكون مسؤول ، بوقتها اربع مرات اصيح بي
نور بابا اختك وهوه يضحك من صحت
بي جلال يرد عليك بكل برود:- هسة امها تروح تشوفها
قابل نور خدام عند زينة .

انفعلت وصرخت علية صح وكلت لا تخلي يتعلم خوتك
الفيط.... وارجع واعيدها ما اريد يتعلم نور ما يهتم بـ اخته
هاي اخته لازم يحميها بروحه ومن ذاته ما يتحمل يشوفها تبجي
هذا شلون يصير بالتعويد لازم اخلي يتعلم ؏ هل تربية.

عض شفايفه ورفع حاجبه وهمس :- وهسة شنو نتصالح
راضيه علية لو بعدج .

ابتعدت واني ارد علية:- لا نتصالح ولا نحجي
روح نام جوه اريد بعدك مثل ما بعدتني وخليتني
تمرضت وتعبت ونقهرت .

الغيهب:- ولو باقيه يمكن يصير اكثر ليش نتعارك
ما اريد خليتج تبتعدين وانتِ قبلها بيوم كلتي اريد
اروح البيت اهلي وخليتج تروحين بين ما استقرت
اعصابي ورجعنا لا تكبريها الخاطري .

زهراء :- كلت ما اتصالح شنووو بعد .

الغيهب:- بروح رحيم نتصالح .

زهراء:- رحيمم شكوووو بالنص استغفر الله.

الغيهب:- رأس المشاكل جالطني موتني .

زهراء:- تغار منه هسة اخلي يتزوج .

الغيهب:- زوجي ليش اغار قابل يتزوج علية .

ضربته ؏ صدره وصحت :- تغث تغث يبوووي .

سحب علية من الميز وهمس :- وهاي هدية
البارحة اشتريتها من اجيتكم ردت انطيها الج
بس عفتيني وصعدتي ، بعد هاي الهدية
ماكو صلح منا منا .

اخذتها منه ولبستها وهزيت راسي :- ابد ماكو صلح ابد .

ما احس غير سحبني من خصري وصار فوكي
يوزع بوسات بكل انحاء وجهي وهوه يهمس
بصوت عالي:- لج تتعززين علية ادبسززز .

زهراء:- غيهب روح مني اهوووو لك غيهب
عوفتي وروح يبووي .

الغيهب:- احبج يا حقيرة احبج واموت عليج .

زهراء:- اكرهك اني انتَ لعنة حياتي .

الغيهب:- قبل كلتيلي لعنة حياتج بس أحبك
وانتِ نعمة الرحمن وسعادة الغيهب .

بعد خصلات شعري
وهمس بصوت خدران :- يا ام صوت الدافي والكذله الحرير
و رصعه الخد عودتيني عليج والمحروم مومثل المعود
عودتيني عليج شيصبر ابن ادم لو تعود .

طبع بوسه ؏ ركبتي وكمل
بصوت ذبلان  :- آخ لو فرة ركبتج تشتهيني
إلا أخلي الشمه قِبله ودورة الزِنجيل ديني .

بيومها صارت السهرة للصبح وتم الصلح....

الصبح بشرت البنات وانتظرنا اساور تسرد الاحداث
بالتفصيل وهذا الصار ، قبل كم يوم خابر هشام ؏
الغيهب وگال :- كراج بيتي صغير اريد اطبخ بيتك
تستقبلني .

بدون ما يرد علية بدل  وراح جابهم كلهم
وگفت اني وسجى وياهم نثرم ونغسل
ونطبخ وهمه يهرسون بالقيمة وعمي فوك راسهم
تعبت حيل خابرت اساور تساعدني شوية و دخلت هيه
والمسعد راح يهرس بالقيمة
الى ان كملوا صرنا نوزع الطبخ بالمواعين
السفري والغيهب وهشام والمسعد وزعوها ؏
منطقتنا وما خلصت لليل ، راحت اساوري
ودخل امير وجلال وزوجته وهاجر وسهرنا للصبح
ضحك وسولف ما تخلص .

بيتنا بيت العائلة حمويني ما يرتاحون
بس بيتي وهاجر اختي كلشي تشاركني
واني كلشي اشاركها ، علاقاتنا طيبة
ومستقرين الحمدلله .

ماكو حياة خالية من المشاكل
بس حبنا وقوة التمسك العدنا
نحارب بيها اصعب الضروف
وبعد ڪُـل مشكلة ترجع
علاقتنا أحسن وأحلى من قبل .

اسئلة متكررة دائمًا تسألوني  زهراء بيها
وحتى لا تتكرر وتصير مشاكل
بالحساب ونفسيتها تتعب واني اكثر
فقرة اكرها من أنكون ؏ حق وشخص
يكذبنا وما عندي الوقت الكافي ارد ؏
ڪُـل وابرر يفضل ارد هنا ...

أسمائكم حقيقية
الغيهب مو حقيقي
اطفالهم حقيقي
زهراء أسمها الحقيقي
هاجر حقيقي
سجى حقيقي
رجاء حقيقي
ملاك هيام وفرح مو حقيقي
جلال حقيقي
هشام وأمير مو حقيقي
رحيم حقيقي
ايهاب مو حقيقي
سيف مو حقيقي

اعمارهم
الغيهب 33
زهراء 25
نور 7 هل سنة صف الثاني ابتدائي
زينة 6 اشهر عمرها
زهراء برج الجوزاء
الغيهب برج الأسد..

تسلسل عائلة الغيهب
هشام ، الغيهب ، ملاك ، امير ، هاجر وجلال .

حاليًا زهراء عدها إجازة أمومة تكملها وترجع اداوم.
وين اداوم ما تحب تذكر المكان وهذا حقها ..

ليش نطلق لقب ابو البورتوقالي
سبق ونشرت صورته برباط بورتوقالي والعُشتارات
طلقوا هل لقب الغيهب ابو البورتوقالي.

ذكروهم بالخير دائمًا ولا تسمحوا
للسسسسس يسقطون بيهم او يسقطون بتعبي
كُلكم شاهدين شكد تعبت بهل قصة
ودائما اهدي نجاحها لكل متابعاتي وعُشتاراتي
وملكاتي الـ بنص گلبي .

دائمًا وأبدًا متربعين بنص أعماق قلبي
اترك ملكاتي بـ حفظ الرحمن أحبكم 🫂🫶🏻

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد