ثمار العار بالحلال الفصل السادس 6 - بقلم نهى

ثمار العار بالحلال
للكاتبة nuha-d-h

سهى وهي تسحب سارة
-سارة كافي لتصيحين عوفي خل نلحك نروح عالمحاضرة لتفوتنا
رفعت راسي واجت عيوني متروسة دموع
بعيون الولد الي دعمني بسيارتة
هو جان يحجي وعصبي من التقت نظراتنا حسيت بي
قطع كلامة وظل يباوع علية شفتة فقد الكلمات حتى يكمل كلامة وية سارة وظل يباوع علية بنظرات
تموت
لاول مرة بحياتي احط عيني بعين رجال غير اخوتي وبابا بس بلحضتها حسيت بگلبي اجة يوگف
قطعت اتصال النظرات بيني وبينة وهمست بصوت بي رجفة خوف وبجي سحبت سارة
-سارة يالله امشي كافي لتحجين وياه ملازم مبية شي
سمعتة گعد يجلي بصوتة
- احم احم اكو وحدة تشمر روحها گدام سيارة هيج
شنو عمية
مرفعت راسي
ظلت عيني على سارة وحجيت واني افرك برجلي كلش اذتني
-لا مو عمية بس حضرتك الي جنت طاير بسيارتك عبالك بس انت بالشارع ماكو عالم وياك ما ادري عيونكم وين
يالله هسة على العموم تكدر تروح تكمل طريقك
حسيت عليه صار نار وعصب
-شنو حضرتج جاي تصرفيني لوتسكتيني

عزة هذا ما ناوي يجيبها لبر
اني ظليت اتلفت خاف واحد يشوفنا وهو عصبي
كمل كلامة -موش انتي الي تعلميني شنو اسوي

حسيت اعصابي تلفت وبعد ما كدرت اتحمل
طبعاً مااعرف شلون اتصرف بهيج مواقف
-هسة انت شتريد يعني هم انت داعمني وفوگاهة مقابل
يعني اكلك مصار شي وتكدر تروح حضرتك ميعجبك شنو يعني تريد مني ابوس ايدك حتى حضرت جنابك
ترضى
سمعت صوت من ورة الولد واحد يصيحلة
-ثائر سلامات شنو الموضوع
-لا ماكو شي بس هاي وحدة مطفية
ذبت روحها گدام سيارتي زين ما ابتليت بيها
وورطتني على اساس انة ناقص

ثائر
طبعاً انا احجي وية صديقي
وعيني ابد موگعت من على البنية
شايلة حسن رباني تجيب التايه
بنت اللذين خلتني اضيع الكلام
بحيث
عصبت عليها لان الهة يد بضياع الكلام مني
وانة هذا مو طبعي حسيت للحضات فقدت السيطرة
جانت تملك هالة من البرائة والضعف تجذب الانظار الهة

.......................
اسمي ثائر العمر٣٠سنة
اني من اهالي الجنوب
وجاي لبغداد عندي شغل
ومريت هنا حتى اشوف صديقي عساف
اني رجل اعمال حرة
شغلي مشترك وية والدي واخوتي يعني خيرنا حلالنا واحد
متزوج وصارلي سنتين مطلك مرتي
وعندي منها بنية احنا ناس معروفين بالجنوب من عشيرة ذايعة الصيت والجاه

اتعودت على سوالف البنات وفيكاتهم مال تشمر نفسها كبال سيارتي او يتصلون على نقالي بالغلط وتسوي نفسها متعرف او تمشي وتضرب بجتافي بدون متقصد
او تجي محتاجة مساعدة وغيرها من هالسوالف
صارت متعبر علية محاولاتهم بالتقرب مني والتعرف
علية لان يشوفني متاح حالياً للزواج

لكن انة بطبعي احب اصيد ما انصاد متعجبني البنية الخفيفة
الي تفرض نفسها علية لو تصير من ذهب فلا اعبرها

بالبداية من شفت صديقتها هدت علية وظلت تحجي عرفت هاي وحدة منهن لكن من سمعت صوت البنية الثانية الي كانت هي صاحبة الحادث
اتعلثمت بالكلام
لفتني نظرة الحزن الي بعيونها كان بيها ذبول
مغري يثير فضول اي رجل لحتى يبحث ويطقس
عنها لحتى يعرف سبب حزن هاي العيون الجميلة
اااااخ يااااابة والله حتى الحزن لايك عليهم
اخذني الفضول اريد اشوف هاي العيون اذا ابتسمت
شلون راح تكون شكلهن
ظليت اباوع عليها بعيوني ودرست كل تقاسيم وجهة
عيونها خشمها خوو حلگها هذا لوحدة داهية والحنك بي نونة
عضيت شفتي اتمنيت كون حنكها بين اسناني
واعض النونة
هزيت راسي مثل الي ينفض الافكار الشريرة من راسي
انتبهت عليها لزمت صديقتها
وحركت شفايفها وماعرفت شنو حجت لان كانت تحجي بصوت هامس
لكن بالنسبة الي حركة شفايفهة قضت على اخر
نقطة عقل عندي عبالك كانت تمتم بتعويذة
لحتى تنسج خيوط سحرها على افكاري
اعوذ بالله هاي منين طلعتلي
جانت محاطة ولاقطرة مكياج على وجهة
عبالك عصفور خارج السرب مالتة
يمكن هذا الشي ميزهة
انتبهت عليها موجوعة وتفرك برجلها
سافرت نظرات عيوني على طول جسمها عبالك
جاي اخظعها للفحص مو بيدي
حشمتها خلت الفضول يزيد عندي
اريد اشوف اكثر
يعني احتمال لو وحدة غيرها تمشي جدامي مفرعة
مراح تلفت انتباهي بگد هاي الي واكفة گبالي
وشفتها جرت ايد صديقتها
ظليت احجي ردت اطول وياهة بالكلام حتى اضمن بقاءها وقت اكثر اريد اتعرف عليها
هههههه انگلبت الاية صرت من البنات تطاردني الى انة اختلق الفرصة حتى احجي وياهة حسيت عليها
تريد بس تشرد مني ما اعرف ليش

سهى
اني شفتة ظل يحجي وشفت اجة صديقة
واني كمت ارجف عزة وهذا واحد لاخ اجة هسة راح ينقلون الصورة لاخوي احمد اني گاعدة ادك سوالف وية هذولي
انتبهت عليه انشغل بصديقة
اني استغليتها فرصة وسحبت سارة واني مرتبكة وحسيت على الم بالقدم وكعدت اعرج شوية واني امشي
-يالله سارة امشي شنو لطشتي
سارة وهي تمشي وياي بالگوة
-خرب حظي هذا منين اجانة خرب
والله عليه نظرات ذباحة ابن الاوادم بس هذا ممبين عليه طالب شكلة وملابسة مبين جاي هنا من غير مكان

ومبين من كلامة اصلا مو من بغداد
التفتت عليها واحنا بطريقنا للمحاضرة
-شوف هاي اني طايح حضي وجاي اعرج وهاي
كاعدة تحقق بهوية الرجال
-عفية عليج انتي گلتيها رجال
واحنا مو كل يوم نشوف هيج رجال
والله انتي اكبر ثولة اني لو منج والله ما اعوفة الا اخليه ياخذني للطبيب ويكشف على رجلي واخلي يتوسل حتى اتنازل عن الحادث واخلي ينطيني رقمة
ظليت صافنة بوجها
-و رقمة ليش شتسوين بي
- لج عوبة طبعاً ارقمة
لج انتي شفتي طولة وجسمة و اناقتة وكشختة وشكلة شلون شخصية
لج هذا ميتفوت مو كل يوم تصادفين هيج واحد
اوووف بس حرامات كون مصورة شكلة شلون فهة عليج وضيع الكلام
-اهووو هسة اليسمعج شايف الاميرة ديانا
ولو هو الحمد لله مقصر خوش زفني زفة
اشكد مكروه ماعندة اسلوب بالتعامل
-لج عوبة حقج وجه بومة وين تعرفين هاي السوالف مع احترامي الج بس انتي ثولة على گولت هذا الي اسمة ثائر
لان ممنتبهة على جمالج لج انتي حلوة بس من ورة اخوتج طامرين راسج بالتراب مثل النعامة بحيث خاليج متندلين دربج ومتشوفين احد غيرهم

ظل راسي يدور
يعني فعلاً شكلة ينطبع بالذاكرة ونضراتة تشغل التفكير
رحنا للمحاضرة واني اعرج بس على خفيف
لان ستوني يالله حسيت على الالم
وكملنا محاضرتين الاولى وبعدها اخذنا ريست
اني بيومها مگدرت اطلع بقيت گاعدة بالقاعة لان رجلي حيل كامت توجعني
اجتي سارة حتى تطمن علية وشافتني ما اكدر اگوم
- اذا متكدرين تگومين لعد اني راح اشتري كيك وعصير وارجع اگعد يمج يالله بَــاي
انطيتها مصرفي حتى تجيبلي وياهة وراحت
ورة لحضات خفت القاعة من الطلاب وبقة بيها كم بنية كاعدات على الاستيج الامامي وثنين ولد كاعدين يسولفون على مكتب الاستاذ
واني گاعدة بمكاني بنهاية القاعة وجنت اكتب على السجل مالتي اشخبط
حسيت اكو ظل وكف على راسي عبالي سارة
بس استغربت مو من عوايدها ساكتة رفعت راسي وجان اشوف هذا نفسة الي دعمني
ظليت فاتحة حلكي من المفاجئة
-ليش شردتي واني بعدني ممكمل كلامي وياج
باوع بعيوني ورجع كمل كلامة
-شنو شلونها رجلج
اني هو يحجي واني احس بلساني انعقد من المفاجئة
مااعرف ليش حضوره اربكني
اريد بس اطلع كم كلمة اتلاحك لروحي قبل لا احرج نفسي هذا شلون عرف مكاني وبأي قسم اني
-اة اة رجلي زينة الحمدلله
-بالله شو گومي گدامي خل اشوفها
گلبي اجة ينط من صدري عزة هذا يريد اگوم گدامة لابالله
-لا لا ميحتاج اگوم لتخاف مراح احجي لأهلي عليك واكللهم دعمتني اخذ راحتك
شفتة ابستم وعيونة ظلت تراقبني
-لا بالله اشو الا تگولين لاهلج ان انتي ثولة وشمرتي روحج گبال سيارتي وندعمتي
اني شهكت ضربت على صدري وكانت عيونة
اتبعت حركتي ونظرات عيونة ابد منزلت من شفايفي وعيوني وجسمي
ما اعرف حسيت عبالك گاعدة گبال جهاز سونار وداخضع لفحص شامل
يعني شكد سامعة بناس وقحين مثل هذا مشفت
انتبهت على الي بالقاعة صارو هادئين وكأنما
كانو يتسمعون لكلامنا
وشفت البنات كل ساعة وحدة تبوگ نظرة وتباوع عليه
اي طبعاً لان شكلة. وطوله
ملفت ويجذب النظر
بس اريد اعرف شيسوي هنا واكف
اصلاً هو مكانة هنا غلط
شيسوي جاي بالكلية ولا وبعد واكف هنا يمي يحجي وياي

-عفية الله يخليك روح منا ما اعرف انت هسة جاي شتريد مني
-اجيت اشوف اذا محتاجة مساعدة
هو صحيح انتي السبب بالحادث بس
رغم ذلك گلت ميخالف اگوم بالواجب

- اشكرك على سؤالك اني مبية شي تكدر تروح وانت متطمن
رفع تك حاجب بتسائل
حركتة لفتت انتباهي على حاجبة كان مقطوع من النصف احتمال اثر ضربة بس ضايفتلة جاذبية
وصاير عبالك رجل خطير
هو حقيقتاً فعلا يشكل خطر على كل بنية مثل حلاتي
- ليش احس بيج تردين تصرفيني وتفتكين مني شكو
عبالك ممرتاحة لقربي منج
وهو يحجي وعيونة بعيوني

ثائر
اول مرة بحياتي اشوف بنية مامهتمة احجي وياهة
مو تكبر مني بس اتعلمت على تملق واهتمام البنات الي
وابد ولامرة وحدة صدتني
بس اشو هاي غيرر هاي حتى من تحجي وياي
متباوع علية وتحجي بلا مبالات
وهذا الشي شدني الها

سهى
- عفية عليك ترة راح انطيك اياها من الاخير اهلي ميقبلون احجي او اكعد وية اي واحد حتى لو بس سلام

ظل صافن على كلامي مثل المتعجب حسيت رفع تك حاجب بس اووف يمة شنو من عيون عبالك عيون صقر
-لهدرجة اهلج مواثقين بيج

-لا مو مواثقين بية وانما يخافون علية تگدر تسمي حرص

-على العموم لتخافين انا مجاي كاتل نفسي عليج
بس الواجب يقتضي ان اسأل عنج
يعني حتى لو داعم بزونة هم راح تكسر خاطري واجي انشد (اسأل) عليها عادي ترة لا تصدگين نفسج
يالله براحتج ست سهى فرصة سعيدة
وجهلي نظرة غريبة قبل لا يروح
ظليت فاتحة حلگي بالله هذا جاي يطمن علية
لو جاي يرزلني
اشو دخل علية مثل العاصفة وماانطاني مجال
وخربط احوالي وراح وتركني
عزة هذا شلون عرف اسمي
بس راح اسأل سارة اجت سارة وشافتة طلع من القاعة وهي نزلت بية دك اسئلة
حجيتلها على كلشي وظلت مصفصفة مثل حلاتي

رجعت للبيت وبرجعتي شفت جارتنا ام ابراهيم ستوهة طالعة من بيتنا وامي واكفة بالباب نزلت وسلمت عليهم
ام ابراهيم-هلة خالة سهاوي صايرة تخبلين عين الباردة
عليج كون الله يقدرني واشوفج عروسة
سهى ببتسامة-هلة بيج خالة اشكرج عيونج الحلوات
البنات شلونهم

-الحمدلله زينات سكتي اليوم جبتلج خوش عريس اني هسة رايحة خلي امج تحجيلج عنة
ظليت مصفصفة
ودخلت ورة امي بعد ما سدت الباب ورة خالة ام ابراهيم
وفتت للمطبخ واخذتلي كلاص ماي وكعدت اشرب
وامي فتحت الثلاجة وطلعت كاسة الزلاطة
ام سهى-روحي يمة صعدي بدلي ما اتغديت منتظرتج
سهى -ليش يمة واخواني وين
ام سهى -كلمن ملتهي بشغلة بعدهم ما رجعو والبنات كلمن بغرفتها وهاي اختج نور ملتهية تدرس
وكوة اكلت لكمة ولفت راسهة ونامت
سهى-يالله لعد انتظريني بس لحظة ابدل واجيج حتى تحجيلي على العريس التحفة الي جايبتة ام ابراهيم
بدلت ونزلت وشفت امي صابة الغدة وكعدت اني وياهة عالميز
ام سهى-هذا الولد من طرف ام ابراهيم تكول عليه خوش ولد وعندة سوبر ماركت والله شايل حمالتة
هو مرتة متوفية وعندة ثلاث اطفال منها ويدور على بنية بنت حلال
وام ابراهيم اخذت من نقالي صورة الج وانتي محجبة وشوفتها للولد وهو شاف صورتج وانعجب بيج بس بقة يسأل عليج بالمنطقة واخوانج يسؤلون عليه
سهى-اي يمة زين هو يعرف بتفاصيل حياتي لو مثل
الي قبلة يشردون من يسمعون بموضوعي
ام سهى وهي تتلفت بارتباك
-اة اة اني اكدت على ام ابراهيم متجيب سيرة للولد منا لحد ما تكمل سالفة خطوبتكم ويتعرف عليج وعلى اخلاقج يالله تحجيلة عن سالفتج
-هااا يعني قصدج نسويلة كمين حتى بعد ميكدر يرجع بكلامه صحيح ماما هذا قصدج نقشمر الولد ونضحك
عليه
ام سهى- سكتي سكتي هسة عاد الي يسمعج يكول لازميها وية صاحبها شاردة وياه
سهى -يوم هذا مو كلامي كلامكم انتو و اخوتي عني ونظرت الناس
اني اعرف نفسي بس الناس
عليها الظاهر
ومن هسة اكلج هسة تتصلين على ام ابراهيم گدامي وتكليلها تحجي للولد عن موضوعي قبل كلشي سامعة يوم لو يحتاج اعيد
كمت تركت الاكل عالنص لا انسدت نفسي
يمة راح اخذ نقالج اريد اتصل على خالة ام فراس
اريد اسمع صوت حسوني
طبعاً احمد الله واشكرة الف مرة على نعمة الكلية يعني لوما الكلية وانشغالي بيها جان هسة اني متخبلة والله واحتمال عايشة على المهدئات لان فراك ابني
خلة حرگة بگلبي بس يمكن ربي ياخذ شي وينطي شي
من شافتني امي گمت منها اعرج انتبهت علية
هههههه خطية امي من تسمع بسالفة خطابة الي
تصير متشوف دربها من وراي احس بيها
شكد شايلة همي وصار شغل امي الشاغل فكرها
بالحياة تريد تدبرلي عريس يقبل بية ويرضى بوضعي
گامت كل حجاية والثانية العريس
خطية حتى مرات اشوفها من تطلع للسوك وترجع
اشوفها تجيبلي كم فستان
وتگلي هذني ضميهن لعرسج من تتزوجين يفيدوج لو تشتريلي تراجي لو كلادة
دائما تحجي هاي العبارة ضميهن يمة من تعرسين
حسيت صار بيها هوس من وراي
والله كسرت خاطري امي
الظاهر عندها مخاوف ان اني راح ابقى گاعدة على گلبها ومحد راح يقبل يتزوجني بين قوسين
راح اصير عانس
ام سهى -هاي شنو ليش تعرجين اسم الله
سهى محبيت اخوفها
-لا يوم جنت انزل من الدرج بالكلية ونلوت رجلي
هسة اغسلها بماي حار شوية ورتاح
يوم ثاني داومت
نزلنا من السيارة ورجلي شوية توجعني بعد ما امي انطتني مسكن الالام
كنت اني وسارة نمشي ونسولف سمعت صوت ولد
صاح لسارة رفعت راسي شفتة نفسة الولد
الي حجة البارحة وية ثائر هههه عرفت اسمة لان مينسي
سهى -يالله لعد اني رايحة اخذي راحتج
عفية مو تنسيني مري علية
سارة -اوك يالله باي
رحت على محاضراتي وكانت اول محاضرة كمياء عامة
بعد مخلصت المحاضرة طلعت اني ومنى صديقتي
رحت ادور على سارة مشفتها
كنت اتمشى
طبعاً منى اتعرفت عليها وياي بنفس المرحلة خوش بنية
بعدين كعدت بالمكان الي دائماً نتواعد بي اني وسارة من اخلص محاضرة اجي هنا انتظرها وهي همين

كنت احجي واضحك على سوالف منى
هي شكلها حلو وكلامها كشكولي يجنن
منى -لج محجيتلج من ردت اطلع من البيت وشفت صديق اخوي
متعرفين شصار بية اجيت اموت من القهر
-ليش
-لج هو دك الباب واني من ورة الباب صحت منو
-كلي اني سجاد روح صيح لاخوك كلة سجاد بالباب ينتظرك عفية بالبطل
لج متت قهر مو هنا القهر
المصيبة من طلعتلة وخزرتة وكتلة اخوي مو هنا

كلت هسة يفشل ويستحي على نفسة لان هان انوثتي وقصفها
ما سكت گلي العفو انتي منو البنگالية مالتهم
عليج الله هذا وجهي وجه بنگالية
سهى حطيت ايدي على حگلي وصرت اضحك مكدرت اسكت
-لا والله مو كدامج انتي حلوة
بس تلگينة حب يكحلها عماهة
الله عليج انتي شجاوبتي
-كتلة بنكالية بعينك اذا اني بنگالية لعد انتة. شنو
جاوبني بكل ثقة
اني الاثيوبي برسم الخدمة مدام
ولج بوكتها معرفت اضحك عليه لو انقهر منة هذا
حتى على نفسة يصنف بس عودك شلون اثيبوبي غير يموت
-اشوفج مقهورة منة طلع لان وسيم
ابتسمت وحسيت اكو عيون دتراقبني
رفعت راسي واتفاجئت من شفت هذا الولد الي دعمني البارحة الي اسمة ثائر يباوعلي من صارت عيني بعينة
ابتسملي صفح
يمة گلبي اجة يوگف دنكت
وما بادلتة الابتسامة
وسويت نفسي ممنتبهة عليه والتهيت وية منى
وكلساعة تراويني شي بالنقال
واني نظري يمهة بس تركيزي بغير مكان
كان عقلي وية نظراتة الي ابد ماجاي تفارك مخيلتي
اتضايقت ما اعرف ليش خانتني عيوني ورجعت رفعت راسي عزة هذا بعدة يباوع علية
استغفر الله يعني كاعد وية كروب شباب يصيرون مقابيلنا
والكل ملتهي يحجي الا هو دون عنهم ساكت وداير راسة علية ويباوع بحيث حسيت بنظراتة تلفت الانتباه علية
رجعت بسرعة وخرت عيني منة اوف ورجعت اسولف
وية منى وخدودي صارو حمر من وراه الله لاينطي بليسك
شفت سارة اجتي علينا واني كأنما مثل الي جنت حابسة الانفاس
كمت من يم منى ورحت عليها
سارة -لج جبتلج اخبار الابشدة
سهى-عفية احجيلي بس بالاول خلي نروح بغير مكان
سارة باوعت وراي وشافت منى كاعدة ومكانة محد ماخذة
سهى-اريد اغير المكان لان كلش اتضايقت من نظرات هذا الي اسمة ثائر ياختي خنكني ماكو هيج شي والله اذا بقة هيج يباوعلي
سارة ببتسامة -اي شراح تسويلة تكليلة ارفع عينك مني
هههههه ترة حلوة هاي كل واحد وهو حر بعيونة وين يباوع انتي شكو
جرتني سارة من ايدي
ورجعتني وكعدت بنفس مكاني بس هالمرة عاندت نفسي وموجهت اي نظرة بتجاهة عبالك هو ولا موجود رغم گلبي صار يلوب يريد بس ارفع عيني واشوفة بعدة يباوعلي لو لا
ما اعرف ليش اكو شعور لذيذ
صار جميل بداخل گلبي
نتيجة اهتمام ونظرات ثائر بتجاهي حسيت باحساس غريب
سارة -سكتي ولج خلي احجيلج تتذكرين اول مدخلنا للكلية من صاحني الولد
سهى -اي هذا مو نفسة هو الولد الي صاح لثائر
سارة-اي والله طلعتي مو هينة بعدج تتذكرين اسمة
سهى-اهوووو شكد ثقيلة دكملي احجي
سارة-لج هذا الولد طلع اسمة عساف وياي بنفس المرحلة وما منتبهة عليه
المهم مو هذا موضوعنا
لج الموضوع صاحبنا ابو الشخصية ثائر
سهى من سمعت باسمة حسيت روحي گطعت النفس
منى -اكول اني رايحة اجاني اتصال بعدين ارجعلكم وتحجولي السالفة كلها
سارة -اوك سهى تحجيلج من ترجعين لان وراي محاضرة
راحت منى
سهى حسيت تلفت اعصابي ومابقة عندي صبر اريد اعرف شبي
-اي كملي
- سمعي عساف اجة وعرفني على نفسة بأن هو زميلي
وكال صاحبي شاف صديقتج الي وياج
وحاب يتعرف عليها وجداً عاجبتة وقصدة شريف ترة
بس بالاول حاب يتعرف عليها وتتعرف عليه

سهى بشهگة وحطيت ايدي على صدري
سمعت صوت خشن عالي عصبي
- لك عسااااف من اشتعلت عشيرتك
خايب تعدل كعدتك لا اجي اعلمك شلون تكعد وشيل ايدك من صدرك لا بالقران اجي اكسرها
عساف يضحك على صاحبة
-هاي شبيك ابو الشباب ليش تسب بعشيرتي شمسويلك

يمة سمعت صوتة التفتت عليه لا ارادياً
عزة هذا خزرني واشرلي بنظرتة على ايدي
عااااا هذا شنو عزززة هذا يقصدني اني بكلامة
والله مو طبيعي
انتبهت على ايدي
خالتهة على صدري من شهكت بسرعة نزلتها
وگعدت عدل
باوعت بتجاهة وصرت مثل الطفلة اريد اعرف
هو راضي على گعدتي لو لا

باوعت عليه وشفايفي تهتز حاصرتني البجية
من الاحراج
انتبهت عليه حاط ايدة على لحيتة وكاعد يتلمس بيها
وصار يحجي وية عساف
-عفية عليك وليدي صير حباب واسمع الكلام

عاااااا بسرعة كمت من مكاني مثل المكروصة
لا هذا مصخها
واني حاصرتني البجية لاول مرة بحياتي انحط بهيج موقف
والظاهر وية هذا الشخص راح يكون كلشي يصير وياي اول مرة سمعتة يحجي وية عساف وعينة علية
-لك اني ابوابوي محترك وهذا گاعد گبالي يلعب باعصابي
عزززة هذا يقصدني الي
لا بعد مااكدر ابقى اكثر صوتي بي البجية
-لج گومي خلي نمشي منا بعد ما اتحمل هذا كلش مصخها
تعاي خل نكعد بغير مكان واحجيلي
سارة-اهوو هاي شبيج عبالك راكض وراج جلب اصبري بس شوية
-اني رايحة ما ابقى لحظة وحدة هنا
اذا تردين تعاي وراي
لمت كتبها وغراضها واجتي وراي تركض
انتقلنا بغير مكان وحسيت رجع الدم بوجهي
وجريت نفس عبالك جنت حابسة انفاسي
خرب بالحظ
سارة تضحك علية -لج انتي شبيج جبانة ترة عادي الولد يباوع على بنية بس تردين الصدك مشفتي شلون اكلج
اكل بعيونة وانتي ولا معبرتة هههه حبيت
شكلج وانتي مسوية نفسج ممهتمة لوجوده بس بنفس الوكت انتي محتركة حرك من وراه الله
-هسة تكملين كلامج لو اكوم واعوفج
-يالله يالله شبيج متحبين الشقة عابتلج
على العموم من اجة طلب رقم نقالج
اي لتباوعين بوجهي هيج جننج بومة مستغربة
ترة عادي الولد يطلب رقم بنية وبقت يم البنية ترفض لو تقبل
-اي وانتي شنو جاوبتي عساف
-كتلة ابوية انت ترة هاي البنية بالذات مراح تقبل تنطيك رقمها لصديقك لو مو قصدة شريف
حتى لو يجب امة وياه مراح تقبل
هاي اول شي
ثاني شي هي ماعندها نقال لذلك لتعب حالك وانطيك اياهة من الاخير البنية مو مال لعب وهاي السوالف ابد مو يمهة انصحك تكول لصاحبك يروح يلعب بعيد عنها

سهى ضليت صافنة على كلامها وفاتحة حلكي من الصدمة
-هاي شدتحجين معقولة اكو هيج شي
-ههههه لج انتي بعدج متعرفين هذا العالم الي انتي بي
بعدج وردة مغمضة متشوفين اكلتة بكشورة بحيث مخليتة يندل حلكة ههه
وخلص الدوام وبعدها مطلعت من القاعة خاف اصادفة لان منى طلعت قبلنا
گالت اخوية اليوم راح يجي علية من وكت خلصت بس اول محاضرتين وراحت
من عرفت نيتة اتجاهي شنو خفت اطلع من القاعة واشوفة
لذلك فظلت البقاء هنا احسن
وخلص الدوام واجتي سارة علية وطلعنا سوية
ورجعنا للبيت طبعا احنا مأجرين سيارة خاصة بية اني وسارة بس حتى توصلنا لان سارة بنفس منطقتنا
رجعت للبيت كالعادة شفت امي وهي حاطة ايدها على خدها
سهى-هلة يوم شلونج شخبارج شنو شبيج ليش حاطة ايدج على خدج
ام سهى بحزن-لا هيج مبية شي بس اكول حظج وين نايم
سهى -شنو ليش يمة شبي حظي
ام سهى وهي تجر حسرة-لج يمة سهاوي العريس طار من ادينة ومقبل من عرف بالموضوع كلة من وراج
خليتي ام ابراهيم تحجيلة هسة على الاقل جان شافج واتعرف عليج اني متأكدة اذا يشوفج والله يغير رأية
سهى-شبيج يوم هسة الي يسمعج دخلت بالعمرين وعنست كولي يالله ترة كلة عمري على بعضة
٢٣ سنة
كملت يومي وكالعادة اتصلت على ام فراس حتى اشوفهم شوكت يجيبون ابني حسن حتى اشوفة
والله وجاوبتني وصوتها تعبان كلش
وحجيت وياهة وفرحتني من كالت راح اخلي عم حسن يجبة الج يبقى يمج فد شهرين لان هي راح تسافر هي وابنها للعلاج الظاهر عندها ضعف بالقلب
وتريد تسوي عملية يمة واني طرت من الفرحة ما اعرف صدك مصائب قوماً عند قوماً فوائداً
رحت بيومها ونمت بالفراش
وغمضت عيوني وصارت نظرات هذا الي اسمة ثائر
گدامي اووف شلون عيون جريئة خرب يعني حتى بجرئتة شخصية اووف بكل عقلي اني دافكر بنظراتة وبكلامة وطلبة من سارة
ما انكر شعور الانثى الي بداخلي اتحرك حسيت بالحياة مثل الزهرة الي يسقونها ماي وتزهر هيج صار حالي
لكن اني واعية
وعقلي هو الي يحكمني لايغرك حلو الكلام
ترة المثلي ما اتوقع الهة الحق ان تحلم وتتأمل مثل البنات
اوووف سهى خليج مهتمة بدراستج وابنج احسنلج هذولي همة مستقبلج ترة هذا او غيره بس راح يسمعون بموضوعي راح يشردون مثل الباقين
هو ذاك من طرف ام ابراهيم عندة اطفال وخاش بالعمرين ومقبل بية اريد هذا
الي نظرات البنات كلهن عليه ويتمنون منة بس نظرة
يجيني اني لا بالله صدك بطرانة
كعدت يوم ثاني الصبح على صوت صياح
احمد
ياستار شكو نزلت وعيوني بيها النومة شفتة يجر بمرتة
وكاعد يسب ويغلط
وشمرها عند امي
-يمة هاي بعد ما اريدها نكسة هسة تاخذينها وتوديها لاهلها
اني عين عالساعة خاف يجي السايق وعين على هذا اخوي الي كاتل مرتة من الصبح ويريد يطردها
ام سهى-لك يوم استهدي بالرحمن مرتك حامل وموزين عليها ليش شنو صاير
سمعتة
-ها مها احجيلهم شنو صاير لو اكول اني
يمة ست الحسن والجمال شفتها تحجي وية واحد بالنقال
وبينهم علاقة القذرة
مها-عمة والله جذاب هذا ابن خالي بالفيس جنت احجي وياه
ركض عليها احمد راد يخمطها من يم امي بس امي وكفت كباله
-لا يمة احمد اتعوذ من الشيطان مو هيج الحجي
هدي نفسك شوية وكلشي بالتفاهم ينحل
نزل اخوية امجد وظل يحجي وياه ويهدي
اني انتبهت عالساعة ورحت ركض ابدل بعد مبقة وقت
جنت البس واتذكر كلام احمد بيوم يگلي
مها تاج راسج
يالله هسة هاي بحضن رجال وخانتة وهي حامل
شحجي بعد بس اللهم لا شماتة مينطيني گلبي اتشمت باخوي
لان هذا مو طبعي
خلصت وسمعت السايق اجة واني ركضت وانطيت خبر لامي
اخو فراس راح يجي اليوم ويجيب حسن
رحت وصعدت وية سارة كان الطريق ازدحام
وصلنا للكلية متأخرات
سارة-هسة المحاضرة الاولى راحت علينا خلي نروح للنادي نتريك لان اني ما اكلت شي
سهى-حتى اني اكلت هبطة من الصبح من ورة اخوي ومرتة
ورحنا واحنا نمشي جنت احجيلها على الي صار
دخلنا واختارينا مكان بزاوية متعودات عليه
وراحت سارة تطلب النا
واني ضليت كاعد بمكاني وحاطة ايدي على خدي
اتمنى اشتري شي لابني حسوني من اروح ما اريد ايدي فارغة بالله خل اسأل سارة شنو تقترح علية
حسيت بواحد وكف يم الميز وحط علاگة سودة
گبالي رفعت راسي اتفاجئت

يتبع