ثمار العار بالحلال الفصل الخامس عشر 15 - بقلم نهى

ثمار العار بالحلال ج٢
بقلم الكاتبة nuha-d-h

ام سهى -يمة صخام الصخمنة يبوووو هاي وين جانتلي
نزلت الدرج اركض ورجلية ترجف
سهى-يوم شكو شصار
امجد- لتخافين مصاير شي بس الوالدة
لازم تسوي من الحبة كبة وتعظم الامور
ام سهى- ولك يمة امجد شتحجي انت
يمة الموضوع ما ينسكت عليه
سهى -عفية احجو شنو صاير
امجد- استلمت تهديد من جماعة مجهولة
هاي ناس تعبانة
ام سهى-لك يوم شلون ناس تعبانين ليش مو همة نفسهم الي قتلو ابوك بباب البيت
سهى : منو هذولي شنو يريدون

.....................
منتصر -ولك عدي الحك سمعت الشيخ مزاحم يحجي وية ابوي يگول
راح نسوي مشية زلم وشيوخ بهاي الفترة علمود نطلب ايد عذراء بنت قاسم لعدي
عدي -اااااخ الله هاي شلون ورطة
انا ليومي هذا اتهرب من بنت عمتي الي حجزها الي جدي ورطني بيها
اتذكر من واحنا صغار
جنا نلعب سوية ولد وبنات
بس احنا طبعنا اذا البنية بلغت يعني و يصير عمرها
١٢سنة
تكوم بعد متطلع بباب البيت ومتختلط بالاولاد
بس اني اتذكر عليها ملحة وصحابة ظفاير
وتقويم اسنان
يعني بعد هاي السنين شتريد تصير
استغفر الله والله بلوة
واذا بنت عمتي منتهى
يعني هي جبر لازم اتزوجها ؟؟؟

عدي وهو يجر حسرة
-استغفر الله وكل هاي السنين اتهرب من سيرت الزواج
حتى بلكي احد يتقدملها ويتزوجها ويخلصني منها
بس صار عمرها
٢٢سنة وماسمعت فد يوم واحد اجة اتقدملها
يعني دخيل الله شكد جكمة
منتصر -يا خوية حرام عليك معلگها خطية
شنو ذنبها تراه الناس كلها تعرف هي محجوزة
الك بعد منهو الي يتجرء يطلبها
عدي -خاب متولي منا لا اجي اطلع حرگة الي بگلبي
كلها بيك
منتصر وهو يضحك
-ههههه ولك عمي انت صدك فلم خايب شنهي السالفة
اتزوج وفضها
من وراك محد راضي يزوجني الا انت تعرس
-خلاص هذا هو خليهم يزوجوني
بس خليها ببالهم
والله ولا ابطل سوالفي
وابقى اسافر لبغداد واتونس وهمة بكيفهم مشكلتهم
خو مايعدموني بالحياة علمودها

دخل ثائر هو وابوه
يتنفس بغضب
ثائر-گتلك يابة اجيبها هنا تعيش عندي لاتطولون السالفة ترة الموضوع ميحتاج هاي الهوسة كلها
ابو ثائر -بس بوية ثائر امها تريدها
ثائر بكل قسوة-مشكلتها مو مشكلتي
...................................

ام ابراهيم-لج عيني ام امجد شفتلج شيخ كلها تحمد بي
يگولون عنة مبروك
خلي ناخذ سهى بلكي يسويلها حجاب
لو يقرة عليها بلكي تنفتح قسمتها
ام سهى-والله ياريت الله وايدج بلكي تنفتح قسمتها
لج عيني راح اموت من القهر عليها
بس لا تعنس وتظل محد يقبل يتزوجها
ام ابراهيم - اي عيني حقج الله يساعد گلبها
الاصغر منها اتزوجن وفتحن بيوت وخلفن
وهي بعدها والحظ من حظها
هاي بتج بس جمال بلا حظ
ام سهى-اكلج هذا الشيخ ميصير يسويلها حجاب
بدون متروحلة
ام ابراهيم-لا دادا ميصير الاهي صاحبة الشأن تروحلة

سهى سمعت كلام امي وام ابراهيم متت قهر ودخلت عليهم وفاجئتهم
-يوم من صدك تحجين كل عقلج
هاي انتي الواعية المثقفة تدورين هيج سوالف
مع الاسف عليج يوم شبقيتي للمتخلفات الي ماعدهم
توعية ومعرفة
قابل الشيخ احسن من رب العالمين ؟
والله صدمتيني يوم زين لهدرجة اني حجر عثرة صايرة
بحياتكم انتي وامجد واحمد
اي مو زهگتوني بعيشت الله كافي عاد
اعتبروني عندكم جلب واتحملوني شلون بالله تذبوني بالشارع
يعني زواج والله ماكاتبلي اتزوج
ترة لااني اول وحدة ولا اخر وحدة
اني ادري بيج ليش هيج دتسوين لان اختي نور الصغيرة راح تتزوج واني بعدني
يمة ارضي بالامر الواقع كلمن وقسمتة
عفتهم وطلعت

ام سهى وهي تحجي وية ام ابراهيم
- خو شفتي بعينج صايرة اعصاب وماتتحاجة
ام ابراهيم بجهل -اي عيني هاي بنتج بانت عليها علامات العنوسة ماعليج بيها وبكلامها ترة بنتج حلها عند الشيخ

ام سهى - لج عيني سدي الموضوع هو حتى لو هي تقبل
اخوانها مراح يقبلون تطلع اذا درو يلعبون بيها طوبة
شوفت عينج حصرة عليها الطلعة
سودة علية حتى زيارة لأبوها كوة اخذها امجد مرة وحدة متشوفين اريد اشوفها متزوجة وبراس رجال حتى اطمن عليها ويرتاح بالي
........................................

سهى
بالمدرسة
:هلو سرى هَـا شلونج اليوم
سرى- هلو ست
اني زينة الحمدلله
:حجيتي وية بابا على موضوعج
:لا مكدرت احجي وياه سمعت من خالو كال
ابوج راح يجي ياخذج على نهاية الامتحانات
:يالله حٍٍِْــًبٌٍـــِٓېٍٓ عادي من يجي عليج حاولي تفهمي
:ان شاء الله
:اني راح اخلي المديرة تحجي وياه على مستواج
من يجي ياخذ اوراق النقل مالتج بلكي يتفهم
سرى بامل : والله يا ريت ست اكون ممنونة

..............................

ثائر
بوية منو گلك تخطبلي بنت الشيخ راجح
ترة انا موش جاهل
انت حتى ما كلفت نفسك تسألني
الشيخ مزاحم ضرب العصا بالارض
:وما دامك يالوحش موش جاهل معناتها تعرف بالاصول
والاصول تگول توافق ابوك لان انطة حجاية للشيخ راجح
وطلب منة ايد بتة الك
والشيخ راجح قبل وكال گبعو واخذو
نهض ثائر بغضب ولم ايدة بقبضة
- هذا هو براحتكم الي تشوفو سوه
انا اترخص منكم
وتركهم وطلع
التقى بطريقة بعدي وضربة بكتفة ومشة بدون ما يلتفت
عليه
عدي - شني وحش على وين رايح اوكف
ثائر-فاير من الغضب والقهر وكأن انا ناقص علة ويردون يحطون براسي مرة

عدي كمل طريقة وهو يفر بيدة متعجب على اخوه الثاير
ودخل على ابوه وجده
وشاف الجو متوتر
: احم الله بالخير
الشيخ مزاحم - هلة الله بالنور
ايه شرف المسعد
جا انت شنهو ماتكول عندك اهل وتنشد عليهم

عدي يحجي وية نفسه
والله واجاك الموت يا تارك الصلاة الظاهر اليوم
الشيخ مزاحم مسوي حملة تصفية
: شيخنا اعذرني
تراني معذور شغل بغداد طايح كلة براسي
وشوفت عينك ما فارغ احك راسي
: خايب شوف ولك هاي سوالفك ما تعبر علية لا عدالك
انا ما اعرف وين تولي
ووين تخوتل ترة يكون بعلومك
كلشي تسويه يجيني بالحرف الواحد
عدي : ما ادري ليش ما استغرب ولا متفاجيء
اعرف بيك ما تعدي عليك لاصغير ولاجبيرة
اذا مايكون عندك بيها علم عمنك ذيب

: بلا هذرة حضر نفسك على نهاية الشهر راح نسوي مشية زلم ونخطبلك بنت عمتك
ما اريد هالمرة اعذار وحجج
والله من وراك كصرت رگبتي جدام قاسم رجل عمتك

عدي بطاعة مغصوبة
: هذا هو جدي تم شتفصل انا البس
ابو علي: ما غصبن عليك تنفذ وانت الممنون
شنهو نسيت سوايتك
الي سودت وجوهنا
عدي بقهر -بوية مو وكتة هذا الحجي
...........................

جنت راجعة من الدوام
واشوف الناس ملتمة بباب البيت وصوت عياط
عزة العزاني يمة هذا بيت اهلي
شنو صاير وصلت السيارة يم باب البيت وفتحت الباب
اريد بس انزل من السيارة
واوصل لباب بيتنا
مكدرت احس رجلية صارو خيوط
لكيت امي كاعدة بنص الكراج يم باب المطبخ ونسوان المنطقة يهدؤن بيها ولازمات ايدها حتى ماتلطم
شفتها تحرك براسها وتصيح يمة احمد يمة قتلو ابني

حسيت باد جسمي ووگعت جنطتي من ايدي وجسمي صار كلة يرجف
اجاني ابني حسوني يبجي وحضني
حسن -ماما رمو خالو احمد يم باب البيت
الناس تكول
صفت سيارة يم باب البيت بيها اثنين رياجيل
ورمو على خالو احمد وعلى البيت
وكعت بالگاع من سمعت كلام حسن
احس گلبي انخمط التفتت
شفت خالي يهدي بأمي ويصبرها
موفق - ام امجد رحمة على والديج ميصير الي دتسوي بروحج حتى مو زين على احمد
هيج تفاولين عالولد
سهى وبصوت يرجف وگوة تطلع الكلمة
- خالو اروحلك فدوة فهمني گلبي راح يوگف
مدا افتهم شنو صاير
-احمد رموه بباب البيت وهسة هو بالمستشفى وحالتة كلش خطرة
واجتي الشرطة لهنا وگعدو يحققون
وبعد التحقيق يكولون اكو شهود عيان شايفيهم بالمنطقة قبل كم يوم
دازين الكم تهديد على اساس بينهم وبينكم ثار
ودم لان ابوكم الله يرحمة بزمن النظام البائد
كان حاكم على ثلاث خوان بالاعدام
وهسة اخوتهم الي كبروا يردون ياخذون الثار ويكلج
هذا واحد وبعد نكتل ثنين منكم حتى ناخذ بثارنا
حسن -اي ماما حتى كتبو على السياج
هذا البيت مطلوب دم
كعدت اضرب على وجهي والطم عالضيم
يمة هاي وين جانتلنا

وشفت امي اتخربطت واخذوها للمستشفى وبيومها
خطية وطلعت مرتفع ضغطها انطوها ابرة تنزل الضغط ورجعنا وامجد بالمستشفى وية احمد
والكل مخبوص خبص على بيتنا
وصلنا للبيت واجتي ريم اختي وجها اصفر من الخوف رجلها جابها لعدنا وراح للمستشفى يم الولد حتى يطمن على احمد واحمد الي لحد الان ما نعرف وضعة شنو

وبوقت المغرب
وصل عمي قاسم وهو وخمس سيارات متروسة رياجيل معگلة واحدهم جنة باب من الضخامة بالاول خفت حسبالي هذولي اجو علينا حتى يصفونة واحد واحد
جنا كاعدين يم امي بغرفتها
دخل علينا امجد
وصاحني اني وتمارة وريم ونور
امجد -بنات سوو حسابكم اليوم عمي قاسم والزلم الي جايين وياه راح يبقون عدنا
وحضرو الفرش والعشا اريدكم تبيضون الوجه
سهى-هذولي منو الي اجو وية عمو قاسم
امجد- هذولة نسابت عمو قاسم خوال اولادة اهل زوجتة
لج هذولي يهزون الكاع هز اذا صارت عندهم طلابة
والله سخرهم النة من درو بعمو قاسم عندة طلابة ومتعدين على اولاد اخوه
مقبلو يخلونة يسافر لوحدة واجو وياه
لج لوتشوفين سياراتهم شلون سدت المنطقة
خطية جابووياهم اثنين بيك اب دبل قمارة
وعليها اثنين حرس مسلحين برشاش ((بي كي سي ))
گالو سيارة تبقى بباب البيت والثانية تنتقل وياهم للمركز

سهى
وبيومها انخبصنا خبص
طبخ وجاي وكل ساعة صينية جاي تروح وتجي وظليت احوم والله خايفة على اخوتي
وهذا احمد ما اعرف شنو مصيرة
وبعد ساعات الانتظار والدعاء وما ظل دعاء ما دعيتة لحتى يطلع اخوي من هاي الشدة ويرجعة النا سالم

بس الحمد لله طمنا امجد عليه وگال كدرو يجتازون مرحلة الخطر وسيطرو على الاصابة

اما هاي الطلابة والهوسة استمرت ثلاث ايام
والشرطة مكدرت توكع على الي رمو اخوي احمد
وصرنا بحالة قلق ونترقب الرايح والجاي

واني عندي امتحانات نهاية السنة
بهاي الايام
ولازم اروح طلبت اجازة يومين بس المديرة اتصلت وشرحتلها السالفة وكالت بس تعاي امتحني صفج
واخذي راحتج احنا نسد مكانج

صار الليل ودخل علينا عمو قاسم ووياه اخوي امجد جانو ستوهم راجعين من المستشفى
طبعا نص الزلم الي اجو وية عمو قاسم رجعو
وبقو بس كم واحد
- الله يساعدكم اصبلكم عشا
قاسم -لاعمو مايحتاج متعشين بس اذا تكدرين صبيلي جاي يابعد عمج
-من عيوني عمو
رحت دخلت للمطبخ وشفت نور اختي گاعدة على ميز الطعام ودتقرة امتحانها
فزت من مكانها واجتي لعندي
نور بتسائل وعيونها على باب المطبخ
: اكول سهاوي منو اجة
: عمو قاسم وامجد ليش تسألين
: هَـا لا هيج بس حسبالي بعد اجو ناس وياهم
: لا حٍٍِْــًبٌٍـــِٓېٍٓ اعرفج على شنو دتسألين
على حبيب القلب
دخل علينا امجد
: سهى حضري شوربة لحم حتى ناخذه ويانة للمستشفى لاحمد
: صار ٺــڊٍلََُلََُؖ بس دقايق
ونور انشغلت بتحضير الشوربة
كملت الجاي واني اباوع عليها خطية كان بعد كم يوم زواجها لابن عمي قاسم بس من ورة سالفة احمد
راح يأجلون العرس
رحت اخذت الصينية الجاي ودخلت عليهم وسمعتهم
قاسم- شوف عمو امجد ترة السالفة ما ينسكت عليها
وشوفت عينك الي رمو اخوك لحد يومك هذا محد لزمهم لا حكومة ولا جماعتنا كدرو يطيحون على اثرهم
امجد: يعني شبيدنا شنسوي
: لا بيدنا خو ما نكعدلهم منا احد ما يصفونكم واحد واحد
...........................
عدي : وحش خوية اتكفى الشر والعن الشيطان مو كلشي بالقوة تاخذة
ثائر: مالك دخل انت اطلع منها انا اعرف شجاي اسوي
قابل تريدني اعاين على لحمي يتربى بيد الغريب واسكت مثلك
عدي بقهر : شتقصد يالوحش موش انت الي تعيرني
عفو عليك هاي موش من شيمك
ثائر: هذا مو عار هذا واقع حال انت اتنازلت عن
ابنك وانهزمت من مسؤليتة عبالك اذا اخذتة تحت اجناحك راح يصبح عار يسود وجهك
عدي : انت شنهو ما تسمع زين اكتل روحي بالله حتى تصدكوني
يا ناس يا عالم هذا الفرخ موش الي
ابتليت على عمري وسويت زين
ثائر : تريد تقنعني ان انت كاعد تصرف على الحرمة وابنها لسواد عيونها زين هي ليش
شكتك عند جدي
عدي : وانا شدراني ما تروح تسأل ابوك اشو هو ورة كل مصيبة تطيح فوك راسي
ثائر بتسائل : وابوي شدخله
عدي: والله يا وحش مرات احس بيك مظلوم ومرات
احس بيك ظالم
: خايب تحجي عدل ولا تظل تذب الغاز
فهمني شتقصد كل مصيبة وراها ابوي ثمن كلامك كبل لا تحجيه
عدي : ماكو الغاز بس احب انبهك لاتثق بأي واحد واتوقع الغدر حتى من اقرب الناس الك يالوحش
اذا طاح الگوي كثرن سجاجينه (السكين )
...............................
قاسم
انتو ملازم بعد تبقون هنا لان الوضع خطر عليكم
وعلى البنات فاحسن شي تجون عندي هناك واني اضمنلكم سلامتكم لان السلف راجع كلة لنسابتي
وهناك اكثر امان
ام سهى-اي والله خوية يا ريت
اني بعد مالي گعدة بهذا البيت
الي اخذ ابو بيتي وهسة زين ما اخذ ابني
امجد-عمي شنو تحجي وشغلنا وبيوتنا
قاسم-عمي ياروح مابعدج روح انت شتحجي ولك عمي هذا ثأر تعرف شنو ثار يعني مراح يرتاحون الا يصفوكم كلكم انت واخوانك وموبعيد حتى البنات
هذولي ناس مايخافون الله وشوفت عينك دولة وحكومة
ماكو اشو هي تايهة هذا اخوك صارلة اسبوع حاولو اغتياله ولحد الان ماكو اي خبر عن الي رموه ولا كدرو يوصلونهم بالله فهمني من
يعيدون الكرة ويهجمون عليكم
بالله گلي انا اطالب منو بدمكم
امجد باستسلام -شوف عمي انت هسة اخذ امي واخواتي وسافر بيهم لسلفكم
وانا اخذ زوجتي والاولاد اوديهم لاهلها
واحتمال هناك ابات عندهم
منا لحد ما اشوفلي حل لوضعنا

قاسم : شتنتظر تعال ويانة بعد
امجد ..واحمد اخوي هنا ما اكدر اعوفة على الاقل خلي
يشفى جرحة واجيبة وياي

سهى وتم الاتفاق على هذا المبداء
يعني شنو اني اسافر وابني واهلة شي اكيد مراح يقبلون
اسافر بي بدون علمهم
.................
التهة امجد اخوية بترتيب الوضع
واني وامي التهينا. نحمل باغراض البيت بالكراتين
وكانت جارتنا ام ابراهيم موجودة ويانة
تساعدنا

سهى-يمة اليوم راح اداوم اسلمهم السجلات والاسئلة
وامتحن صفي واجي مراح اتأخر
والله كان اليوم اخر امتحان
رحت للمدرسة واحس الدنيا ضايكة بعيني
ابو عباس السايق-هلة عمو الحمدلله على سلامتكم
سمعت بالخبر ووالله كلش انقهرت على احمد ميستاهل

- الله يسلمك عمو والله عمو كلش خايفة على اخواني
- الله يكفيكم شرهم هذولي ناس متخاف الله ما عندهم شغل وعمل فارغين

وصلت للمدرسة ورحت دخلت عالمديرة و سلمتها سجل الدرجات وفهمتهة السالفة
وكان اليوم اخر يوم في الامتحانات
لكن المديرة انطتني اجازة واستثنتني من تصحيح دفاتر الامتحان لان وراي سفر

ورحت على صفي وبلشت يومي الامتحاني
وكالعادة اشجع بطالباتي
وشفت الطالبة سرى تكتب وتباوع علية بارتباك
وكل ساعة تباوعلي
عرفت عندها كلام بس كان الوقت ميسمحلي
ان اتكلم وياهة لان جنت اراقب
ورة ربع ساعة
اجتي مدرسة صاحت لسرى
كالت ابوها إجة عليها
شفت سرى ظلت تبجي وباوعتلي
سرى-ست عفية هذا بابا اجة علية حتى ياخذني وياه
هو حجة وية خالو گلة اليوم اخذ سرى من المدرسة حضرو جنطة ملابسها
عفية ست تعاي احجي وياه وقنعي اكمل دراستي
-شوفي حبيبتي روحي انتي واني جاية وراج بس شوية
اشوف مدرسة تأخذ مكاني
راحت سرى وصحت للمدرسة وسلمتها مكاني
ورحت ورة سرى حتى احجي وية
ابوها
سألت الفراشة عليها كالت يم المديرة
دكيت الباب استأذنت
رفعت راسي واني مبتسمة
هناااااااااا
وانصدمت صدمة حياتي واتزلزلت من ارضي
ووگعت الاوراق الي جنت لازمتهم
لاااااا مستحيل
همست بصوت ناصي
-ثائر
شفتة رفع راسة واجت عينة بعنيني
وكانت المفاجئة مرسومة على وجهة مثلي مصدوم
-نهض من مكانه وعيونة بعيوني وكأن يريد
يتأكد
- سهوة

يتبع