ثمار العار بالحلال الفصل الثلاثون 30 - بقلم نهى

ثمار العار بالحلال ج٢
للكاتبة nuha-d-h

((مساء الخير والمحبة على احبتي
اتمنى لكم قراءة ممتعة)

كلام سهى ورفضها الي كدام الكل
كان اكبر طعنة اتعرض الها لثاني مرة بحياتي على ايد سهوة
وانا ما مستعد بعد اتنازل
لهنا وكافي شكلي ما راح اتعلم من
لسعة الزمن
كل مرة اكون انا الخاسر الوحيد بالحب
زوجتي الاولى مقصرت
واجتي سهى وكسرت جميع القواعد بافعالها وصدها ورغم ذلك مازلت متمسك بيها

وهي كانت لحد اخر لحظة تريد تتزوج شخص ثاني
وتتركني وراها بدون ما يرفلها جفن موقفها هذا
صدمني وخلتني اصحى على حالي
والله على ايدها شفت انواع الصد والهجر
كرهت كلشي بحياتي وشكل حظي ما كاعد
وية العشك
...........................

ام سهى والفرحة ما سايعتها
تباوع لبنتها لابسة ثوب العرس
مامصدكة عيونها كل ساعة تصلي علىً النبي
خاف تحسدها
: ماما سهاوي عين الباردة عليج طالعة تجننين
ربي يسعدج ويهنيج
اباوع على امي شلون فرحانة
واني النار تسعر بگلبي من الخوف الي جاي اشعر بي
اليوم اروح برجلي للجحيم
لحد هسة اتذكر بيوم صارت مشيت الزلم
والشيوخ وصار العقد
اتفاجئت من كالت رواء ثائر صار عندة شغل
وما راح يكدر يدخل يلبسج الذهب
كلت ميخالف اصبر واتحمل ولازم اكون مستعدة
لردة فعله وما راح استسلم
اعرف كلش زين اني من وافقت على زواجي من ثائر كنت اعرف راح يكون امامي هواي حواجز
تحيل بيني وبين ثائر اولها صدي وثانيها خذلاني الة
اكثر من مرة وهو حقة هو قاتل بما فيه الكفاية علمودي
واني ما اتنازلت عن اي حق من حقوقي
وكنت لحد اخر لحظة مستعدة ان اتزوج غيره واتركة علمود ابني
وهاي شانت بخاطرة وياي
صعدت بيومها بالليل وبدلت ملابسي وغسلت وجهي
واني كلبي ميت على شوفته
وصلت رسالة فتحت النقال وجانت من ثائر
: الف مبروك عليج انا
شوفي سهوة مو بعدين تكعدين تندبين حظج
ترة انتي جبتيها لنفسج
وراح تدخلين برجل للجحيم
والظاهر بعدج مستهانة بية وما تهابين
الوحش الداخلي
كوني مستعدة للي راح يجيج
..........
رجفت ايدي وكع النقال مني من الخوف
صار ثائر يتوعدلي
واتفاجئت يوم ثاني المهر عمو قاسم كال
: الشيخ مزاحم يكول بنهاية هذا الاسبوع الزواج
استغربت من الاستعجال وخفت احس بروحي
ضيعت نفسي بقراري
وقطعت طريق طويل مامنة رجعة
ومشيت بي بدون ما التفت خلفي
مر علية الاسبوع واني احس روحي بحلم واريد اصحى منة
امي وعمة منتهى خبصني خبص
وامي كل ساعة تكول همزين اني مجهزة سهاوي
من كلشي بس لازم نطلع اكمل كم شغلة
اني سويت روحي ملتهية ادرس حسن بس لكن

هيهات اين تفرون
الجدة وعماتة استلموني زيارات وهلاهل
اتذكر دخلت علينا بيبتهم هي وعماتة وجانو محملات بالجنط ما اعرف شنو بيها
بس حسب كلام بيبتهم : يمة هذا نيشانج
تعاي يمة خل احبنج(بوسة)
اقتربت منها وباستني من خدي وهي تهلي وتصلي
وبعدها
استلمني عذراء وبنات خالها تنظيف وتعديل وحف
واني احس روحي مثل اللعابة بيدهم
وتركيزي متشتت
جنت اتمنى اشوف ثائر حتى يطمني انو قراري
بالموافقة جان صحيح
وما اريد اتندم
اباوع على حسن شلون فرحان
واستغربت من اجاني وكال ماما عمو ثائر كال
انت تكعد وية الزلم بالعرس
وعمو ناصر كال انا اجيبة وياي
طبعاً هي كانت مجرد كلمات
بس حسيت بيهم اكو امل
خلص الاسبوع وبنهاية بالليل
زارنا الشيخ وابو ثائر وصاحلي عمو قاسم حتى ادخل عليهم
دخلت وسلمت واني كلبي يرجف ورجلي تطك برجل جنت اتمنى ان ثائر يكون جاي وياهم لكن خابت كل امالي من شفت بس جده وابوه موجودين
سلم علية جدهم ورحت اقتربت اسلم على ابوه اتفاجئت بكمية البرود الي عاملني بيها
ابتعدت عنة واني محملة بالف علامة استفهام ؟؟؟
شنو سبب هالبرود،؟؟؟
اتصلت على صديقتي سارة وعزمتها
وهي كالت اتمنى اجي بس مثلما تعرفين عساف وثائر ميتحاجون وبعدة ثائرزعلان على عساف وماخذ منة موقف
ما اعرف ليش من اتصلت على سارة وحجيت وياهة زاذ خوفي بالزايد
وعرفت صفة جديدة عن ثائر انه راسة يابس
وزعله كلش صعب
يعني صديقة روح بالروح وهو لحد الان ميتحاجة وياه
والادهى والامر من هذا كلة انصدمت من
عرفت من رواء ان ثائر بعدة مزاعل ابوه ووجهة ثكيل عليه
ومن عندها قريت على روحي سورة الفاتحة
لان الظاهر طريق الوصول لثائر مو بس بي حواجز
لا وانما متروس حواجز كونكريتية
و امي وعمة منتهى اخذو جنطي كلهم وراحو هناك
يصفطونها بغرفة ثائر
يعني شنو راح نكون اني وياه بمكان واحد ويجمعنا سوة
حسيت بشعور داعب احساسي
يعني راح يرتبون عطوري بصف عطور ثائر
وملابسي يصفطونها بكنتور ثائر يم ملابسها
كان الشعور بحد ذاته بي لذة ونكهة مملؤة بالشغف
اتمنى ثائر يحس مثلي بنفس الشوگ الي اني احس بي بأتجاهة
.......................
دخلت عذراء علية وجانت طالعة تجنن
عذراء: خالة راح يوصلون خلي نلبسها البرنص
كلبي كام يرفرف مثل العصفور
امي انتبهت علية
لان اول مرة امر بهيج شعور
يعني شنو اني راح اعرس يعني بعد ما راح صبح
بوجه امي واكللها صباح الخير
شفتها كامت تمسح بدموعها
دخلت نور وكالت اخواني يردون يشوفوني
اتصلت عليهم صوت وصورة وفتحت كامرة وياهم وشفت اخوتي
امجد قتيبة احمد كلهم كاعدين ويسلمون علية
احمد: كللللللووووش واخيرا راح تتزوجين
وظل يهوس
عرس سهوة هيل وطش بالولاية عرس سهوة
وشفت قتيبة يضحك ويباركلي
وانتبهت لامجد يبتسم وبعيونة غصة
وشوق لاهلة
انكسر گلبي على اخوتي رغم ضحكتهم وتهانيهم ماكدر
يخفون عني نظرات الحزن الموجودة بعيونهم
كان واضح عليهم يحسون بالغربة والفراق عن الاحبة
لا يطاق لكن الدنيا مالهة صاحب
خانتني دموعي من حجة امجد
: الف مبروك يالوردة اتمنيت انا موجود واسلمج بيدي
لزوجج واوصيه عليج بس
شكلي مامكتوبلي بس يالله
اهم شي شفتج بثوب العرس حيل حليانة
ولايك عليج ديري بالح على نفسج
صرت انسح دمعة وتزل الثانية
عذراء: يالله كافي شنو كلبتيها مناحة ترة راح تسيح الكحلة وتصيرين تخوفين جنج زومبي
سمعنا صوت الطبل والهلاهل والزلم صارت خبصة وكمزت من مكاني من صوت الرمي
عبالك مو عرس حرب
شفت عمو قاسم يبتسم الي كان بمثابة الاب بوقفتة وياي
اقترب مني وباسني من راسي
: الف مبروك سهاوي ربي يهنيج
دخلو النسوان بالصفكات والهلاهل
ودخل وراهم الشيخ مزاحم
كان لابس بشت وعكال كان ينطق بالهيبة الوقار
يحيطون بي مثل الهالة
يمة گلبي كمز من مكانة بيوم طل علية ثائر بطلة
العرسان اجيت اوكع من طولي
قطعت النفس
كعد بصفي بس محجة اي كلمة وياي
وكان يبتسم ويسلم على عماتة والاهل
وما وجهلي اي نظرة
جنت كلي ارجف
انتبهت على الشيخ مزاحم اقترب من عندنا
: يالله بوية على بركة الله
نهضنا اثنينا وحط ايدينا بأيد بعض
لمس ايدي حسيت مثل التيار الكهربائي سرة بحسمي
كانت ايدي قطعة ثلج وايدة نار
اتوغل دفو ايدة ووصل لكلبي
كان هناك ضوء ضعيف موجود داخل گلبي هذا الضوء هو الامل الي من خلاله كدرت امشي وية ثائر واطلع
من البيت اهلي

اتنفست ريحتة و تسربت لداخل انفاسي ودخت
صار كل الحضور مالهم وجود الا ثائر
كنت مركزة وياه لدرجة لو يرمش احس بي
انتبهت عليه مد ايدة ونزل البرنص على وجهي
احس بروحي ما اكدر اشوف طريقي طلعت بباب البيت واشتغل الرمي والهلاهل
كمزت من مكاني ولزمت ايدة حيل اريد احس بامان
رفعت راسي حتى اشوف طريقي
انتبهت عليه قرب راسه وهمس باذني
نزلي راسج لا يشوفوج الزلم
يممممممممممممة صوتة يمة ياصوتة
اشكد مشتاقة اسمع صوتة
هي كانت مجرد همسة بانفاسه الحار مرت على ركبتي
صرت ازهر مثل الوردة الي يزكونها (يسقونها)
بمي
فتح باب السيارة وساعدني هو وامي حتى اصعد
صعدت وباوعت جان الشارع متروس جهال وزلم
وشفت ابني حسن لابس قاط فدوة لطولة وواكف يم ناصر لابس دشداشة بيضة
وحارث هم لابس قاط
سمعت باب السيارة انفتح وركب ثائر
وعلي اخوه كان هو الي يسوق
باركلي وشغل السيارة سمعت اصوات الجهال تركض
ورة السيارة عبالك راح يزفونا بطريقتهم الخاصة
واتحركت السيارت واصوات الهورنات ملة الشارع
انتهت على عدي كعد يرمي
علي: الف مبروك يالوحش شايف خير وتستاهلها
كمز كلبي من سمعت كلمة وحش
ما اعرف ليش من يوم عرفت ثائر هو نفسة الوحش
واني صرت اباوعله كشخص غريب علية
لان كنت اجهل ان ثائر هو نفسة الوحش الي يخافون منة الجميع
كنت اجهل هذا الجانب من ثائر
طول هاي معرفتي بي كنت اشوف فقط الجانب المتحضر من ثائر
اما هذا الشخص الكاعد بصفي شخص غريب علية ينادونة الوحش
على اساس اني ناقصة مخاوف وهذا الاسم زادهم علية
.......................
في لب اجواء العرس كان هناك حبيب
لا يزال يعاني من رؤية بنت عمتة تبتسم لغيرة
عذار عدي
شفتها ركبت بسيارة اخوها حارث
واجيت اتخبل من شفت صديق حارث كاعد
بصفة
ما شفت نفسي الا ساحب الولد ومطلعة من السيارة وكاعد بمكانة
حارث : خير ابو الشباب جا وين مصطفى راح
: مصطفى نزلتة من السيارة وكلت اركب وياك لان
سيارتي انطيتها لاخوي رافد
شفتها ورف كلبي لهواها واتمنيت تحن عليه
بنظرة منها
.....................
وصلنا لبيت جدهم بعدما اخذونا فرة
ما اعرف ليش هاي الفرة بالسيارات
بس يتهيأ لي ان هذا نوع من انواع
التفاخر بين العشاير
يسمونة الاشهار بالزواج
واول ما وصلنا لبيت الشيخ
ذبحو يم رجلي ذبيحة
واول ما شفت الدم
گبل اغمى عليه وما حسيت بعدها بأي شي
شفتها اغمي عليها
شلتها هي وبدلتها الهوسة
وانخبصو الكل وصرت اصيح سوو مجال
اريد افوت وصعدتها فوك لحجرتي
جان كلبي يرعد رعد من حسيت بيها صارت بين ايدية
حسيت على ضربات خفيفة على خدي
فتحت عيوني على كيف واني احس بدوخة
ركزت شوية
باوعت شفت وجه ثائر الخايف يريد يطمن علية
اي هو هذا ثائر
لكن سرعان ما اتحول الى وحش من شافني
استرديت الوعي وشفت امي مدتلي كلاص
عصير
: لزمي ماما سهاوي شربيلج شوية
بللي حلكج بي
شفتة نهض من يمي
: انا اترخص رايح يم الزلم
بديت استوعب مكاني وشفت نفسي نايمة بوسط
سرير عليه فرشة ملكية لونها ابيض
مال عرسان بس كلش حلوة
وكان عطر الغرفة كلة بخور عربية
صرت اباوع لكل تفصيل بالغرفة
واتمهن انتبهت على بش معلك على زاوية الغرفة
وبصفها روب نوم ابيض خاص بية
حسيت بخدودي صارن حمر
من كد ما جنت مشغولة بالتفكير بثائر
نساني حتى شلون استعد لهاي الليلة
بعد مرور ساعات
لاتخلو من الخبصة والهوسة ناس داخلة وناس طالعة
والجدة خطية دخلتلي
وكالت يمة غيري هدموج (ابدل ملابسي)
دخلت وياي امي وساعدتني
ما اعرف شنو كان قصدهم
لبست السيت الابيض رغم اني مو بنية (عذراء)
بس امي اصرت هي والجدة الا البس ابيض
تكول فال خير
طلعت وصارت الجدة تهلي وتصلي وتقرة ايات
بعدين شفتهم
جابو طشت ماي ورد وورق ياس
: سهوة جدة حطي رجلج بهذ الماي
وبعد سوتلي طقوس غريبة عجبة
تكول انها لها الدور بنجاح الحياة الزوجية
بين الزوجين
كنت انفذ كلشي تطلبة مني
احتراماً الها لكن بغير اقتناع
من خلصت صاحت لعذراء
وانطتها الطت وكالت
: شمري الماي بالسطح
دخلت رواء بصينية العشاء وكانت مغطيها بقماش ابيض
وانفتح الباب وسمعت صوت خشن
يمة ثائر نزل على راس وايد بيبتة وباسها
ونوب اترخصت مني اني وياه وطلعت هي وامي
...............
وتركوني لوحدي يم الوحش
حسيت بروحي رجعت طفلة صغيرة
اول يوم الهة بالمدرسة وتبجي تريد
امها
اي اني بهاي اللحظة اريد امي
ولوما عيب جان كعدت بالكاع اصيح اريد امي
لان شعور اول مرة بحياتي احس بهذا الاحراج
الارتباك من الموقف والله يحفظة ثائر مدري
الوحش ما جاي يسهل علية الامور
رفعت راسي اريد اوف شنو جاي يسوي
انصدمت شفتة
واكف بمكانة يم الباب
مصدوم ويباوع عليه وكانت عيونة تريد تاكلني بنظراتة
اي هاي النظرات نفسهم نظراتة
الي كانت تراقبني من جنت بالكلية وخلتني اتعلق بي
انتبهت عليه هز راسة مثل الي يصحي نفسة
حتى يوعى
اباوع عليه بطرف عيني نزع عكاله
والجفية وعلكهم
وفتح كم دكمة
جنت كاعدة على طرف السرير ومدنكة راسي
وايدي متشابكة مع بعض
حسيت بي اقترب مني
وظل واكف
رفعت راسي اريد اعرف شنو ديسوي
باوعتلة كعد يخربط بشعره
وخربط الدشداشة وحطها الفتحة صفح
جنت اراقب حركاته
مستغربة شنو ديسوي
اقترب مني وهمسلي
شوفي يسهوة كل الي راح اسوي
مو لخاطرج لا
وانما حتى اثبت للكل انا امتلكتج
مسح بطرف صبعة شفتي وعصرها
ونزعني الروب وميل الشريط عن كتفي
وخربط شعري ومسح عيني من الطرف

راح اتخبل هذا شديسوي وياي
باوعت عليه شلون حط
صبعة الي صار بي اثر الحمرة
ومسح بي ركبتة
نهضت مصدومة من حركتة

تركني وطلع يتباهة امام اهلة والربع
بأمتلاكي وصرت من حلاله
عرفت شنو كان يقصد بكل هاي الحركات
حتى تبين عليه معالم العريس
حتى كل واحد يشوفة من الاهل راح يعرف
انه قضة هاي اللحضات الحامية بحضن زوجتة
وامتلكها
ومن هاي اللحظة عرفت
ان هذا شي سيء والقادم اسوء
كعدت عالسرير واني مثل المبنجة مابين
ندم وحيرة
فهمت رسالة ثائر والله يعلم شنو راح اشوف على ايد
ثائر والوحش

وهنا تبدا حياة جديدة مع سهى وثائر

يتبع