رواية ☆ ذنـــــبٌ بـــلا ذنـــــب ☆ الفصل الحادي والعشرون 21 - بقلم Hend_AlBoor

- خير شتريد

- ست سينا

باستغراب - منين عرفته

يبتسم - روحاني و قريت الممحي

باستهزاء - نعم ،  و المطلوب ؟

- ليش تذميني

- اني

- لا امي

- مداتشاقه وياك زين و ليش داذمك

- لا ذميتي

- الي وصلك الكلام منافق وكذاب اصلا ماعرف اسمك

- مخد وصلي حرف

- لعد شنو هالكلام

- اي ذميتيني

بانفعال - شوكت

- هسة بگلبج

تصرخ - نعم

تعوفه و تمشي و تحجي وية نفسه - تافه يدور حجج

يمشي وراها - شجنتي تسوين هنا

توگف و تدير عليه - هذا ميخصك و لتضل تمشي وراية احنا بالشارع مو بالجامعة

ينتبه حوله و يرجع ركض - سيارتي

يشيل مجد جنطتها و كتبها و يطلع يوصل للبيت يدخل غرفته يخليهن على الميز و يمدد  تندگ الباب

- رونق ادخلي

- هلو مجد

- هلو

- اتاخرت اليوم شنو محاضرة اضافية

- لا التهيت بشغلة

- انزل اتغدا دانتظرك

- لا اكلت بالكلية انتي اتغدي

- عافيات

- الله يعافيج

انعزلت بالغرفه ابجي على نفسي و على امي شلون مرت بهيج موقف و محد گدر يخلصها بلحظة حسيت خلاص اغلى شي فقدته على ايد انسان وسخ

تدخل سينا للمطبخ تبوس سري - وين جنة

- بالغرفة

تروح لغرفتها تشوفها تبجي - جنة شبيج

- تعبانة سينا

- اهدي و احجيلي شصاير

- والله بعد مابية اتأذيت كلما اكبر تزيد المشاكل متمر سنة بدون مصيبة لشوكت اتحمل اريد اشرد من الدنيا كلها سيناا

- هي هاي الدنيا عمري لا تبجين

حضنتني بديت احجيلها كل الصار و ابجي

- و انتي شلون تصدگين بي ولج ليش ما اتصلتي علية بوقتها

-  ماضل بية عقل بساعتها ما ابالي غير امي و كلامه

- الله لطف و ستر انسي لا تسوين هيج بروحج

غفيت بهدوم الدوام گعدت بالليل سبحت و نزلت للمطبخ شفت ام شريف بالگاع ركضت عليها و اصيح - ام شريف ،  خالة  شبيج ،  ساهرة وينج ساهرة

- شبيهاا ،  شبيهاا هستوني جنت يمها مابيها شي

- ساعديني

شلناها للصالون نومناها على التخم ركضت ساهرة جابت مي و غسلت وجهها رونق تفحص نبضها
- وجهها اصفر شبيها خوما مريضة

- اكيد ضغطها سيد مجد

رونق بنتر - مو ضغط انتي دارسة طب و تشخصين من يمج

تفر بحلگها ساهرة و تعيب تهمس - لا انتي الطبيبة 

تفيق ام شريف تحاول تگعد نگعدها تلزم راسها
- هاي شكو شبيكم ملتمين

- خالة شبيج و ما تحجين ليش هيج

- مابية لتقلق يمة دوخه عادية من التعب

- هذا الحجي تقشمرين بي طفل ،  ساعديني ساهرة

- وين موديني مابية شي مجد روح ارتاح وراك دوام

سندناها و ودينها للسيارة
رونق - انتظر جاية وياك مجد

- اي عوذة خلت روحها
تنعم صوتها و تتغنج تقلدها -  اجي وياكم مجد

اخذتها بالسيارة للمستشفى انتظرنا  الفحوصات طلع وياها بداية ضعف بعضلة القلب و من الاجهاد حالته متدهورة اخذتلها علاجات و رجعنا للبيت

- ها شطلع وياها

-  بداية ضعف قلبي

تلطم خدها - سودة علية

- ساهرة ماوصيج عليها هاي امي الثانية ماريدها تتعب روحها بالشغل بعد

- بعيوني مجد لاتوصيني على الطيبة ام شريف

رونق - بهيج حالة نحتاج طباخة جديدة

ساهرة - سهلة تدبر

نمت بليلة هذا اليوم و روحي مقبوضة من القهر ما عاد بية حيل لشي ليش الاذية تجيني ما اذيت احد بحياتي و لا فكرت حياتي تعب بتعب كلما اگول استقرت و هدئت حياتي تطلعلي المصايب دفعة وحدة

ثاني يوم مجد واگف ابوابة البناية ،  ينتهي الدوام و جنة ماكو

فهد - ماتروح للبيت اذا ابداية الدوام ما اجتي هسه تجي

- برايك اسال بروف عوني

- ماعتقد يعرف لان ديسجلها غياب

- شلون لعد والله راح انفجر من التفكير

- من شوكت غرگان

- مادري شوكت و شلون الاعرفه اختفت فجاءة ،  فهد شديصير وياها

- مريضة او ضروف عادي ليش قلقان هيج

سرّي -  ميعاد البنية من الصدمة حتى جامعتها مدتروحلها  گلبي موتني عليها

- خليها ترتاح الي مرت بي مو شوية

-  اويلي عليج جنة اخذت حظ امها ميعاد اخذت حظي و خلفتها للعذاب

- لا تحجين هيج البنية جنها ورد كل وحده تتمنى بنتها تكون مثل بنتج جمال و اخلاق و علم

- و الفايدة ،  روحها دتتعذب البنية حابسة روحها و مكتئبة

- جنة قوية لو نسيتي هذا كلامج جنتي دائما تحجي الي

- زين شسويتي على الشغل خما ابقى عالة على الناس هنا

- شنو هالحجي قابل شماكله ششاربه و المرة ما مانعت اصلا تعاطفت وياج من سمعت الصار

- حتى لو  ، صاحبك حلو لتاكله كله

-  بكل الاحوال اني وصيت الاعرفهن و اذا لگينا مايعز عليج ام جنة

-  والله بدونج اني اضيع بهالدنيا من بعد رحمة ربي الله دزج نعمة و رحمة

-  فدوة لعمرج ام جنة انتي اختي

- سينا تگدرين تروحين لقاعتي تجيبين كتبي و الجنطة

- ليش شنو عفتيهن

- اي نسيتهن من اتصل بية النذل

- ادري خوما يبقن لحد هسه بمكانهن صارلج يومين مرايحة

- بلكي وحدة من البنات ودتهن لمكتب العميد ،  اسالي السكرتيرة

- ان شاء الله

اريد اشوفها و لو ثواني باوعت على جنطتها و كتبها و دفترها ورقت الدفتر مدونة ملاحظات
لفت نظري الخواطر الي كاتبتهن

"و هل للون عيناي سببا في رؤيتي لتعاستي جمالا  "
" كل شي يحبه الله جميلا ،  كالفقير "

اغلب خواطرها عن الفقر استمريت اورق و اقرا

" بين لقاء و لقاء سنين عذاب و عزيمة مصافحة صادقة و بريئة ،  عهد جميل و رب رحيم ،  معلمي عوني "

باستغراب - هي الطفلة ،  مستحيل

ثاني يوم بالكلية
سينا - اي حبي هسة  اني بكليتج اشوي و اتصل عليج

- تمام

تسال بنات عن القاعه يدلنها توصل مترددة تدخل تمد راسها تشوف بنات تطب تسلم
- العفو ستول جنة شاكر وينه

بيان - هذاك گلبي

- تسلمين

تشوفه فارغ و تنسحب تروح للقسم تسأل السكرتيرة

فهد يشوفها تطلع من قاعته تروح للقسم ،  يروح للقاعة - بيان هاي البنية منو

- ياهي

- الي مشت قبل شوي

- والله ماعرفها بس سألت على جنة

هو ومجد واحد يباوع للثاني يطلعون
مجد - منو هاي ؟  و وين راحت

- شفتها طبت للقسم

تطلع سينا من غرفة السكرتيرة  تمشي بممر القسم حايرة
- معقولة نباگن ،  و هنا بجامعة ،  لا مستحيل وين راحن

يصيح فهد - سينا

- حسبي الله هم هذا

يتقدم باتجاهه تتجاهله و تحاول تمر من يمه حتى تطلع ،  يخلي ايده على الحايط و يسد طريقها

بانفعال - شبيك انت ما تحل عني

- شتقربين لجنة

- ياخي ما يخصك

- يخصني و نص زين احجي

مجد - جنة ويانة بكروب الورشة و صارلها يومين ماكو ، موقفين شغلنا

-  اي ماكو داعي الاخ هنا يسد الطريق هيج ترا احنا بجامعة

- نعتذر

فهد - على شنو تعتذر قابل سديت طريق الملكه ديانا

يستفزها تحاول تضبط اعصابها و ترد -ممكن تنزل ايدك ترا مراح انهزم

- سويتيها قبل سنة

تعقد حواجبها و تسكت يبتسم

مجد - اختي خوما حصل شر لا سمح الله

- ماعرف عنها اني اجيت اسال لان مختفية 

-ليش من وين تعرفيها انتي حتى مو بنفس كليتها

ترتبك - هنا بالجامعة تعرفت عليها من قدمنا

مجد - اذا عرفتي شي عنها بلغينا حتى نبلغ الاستاذ شغلنا متوقف بالورش

- ان شاء الله

فهد يبقى بمكانه صافن عليها تباوع عليه - هسة ممكن اروح

تروح مجد يمسح راسه - حتى  صديقتها متدري وينها ،  فهد صاير شي

- ما دخل براسي كلامها معقولة ماعدها رقمها و هي صديقتها

- يمكن البنية شنو مصلحتها تكذب لو تعرف شي تگول مو تحي تسأل عنها

مر اليوم الثالث و اني مامداومة طبت امي

- جهزي حالج يمة رايحين

- وين

- خالتج لگت شغل

- هم ابيت

- اي و رحت الصبح اتفقت وياهم محتاجين طباخة باسرع وقت

- الحمدلله ان شاء الله خير ، دقايق الم هدومي

- انتظرج برا

لميت كل غراضي و طلعت امي جانت تتشكر اهل البيت ،  شكرتهم و مشينا

ام سينا - سرّي اي شي تحتاجي گوليلي مو تضمين مثل هالمرة

- ان شاء الله

رحنا لمكان مجهول مرة لخ احساسي يگول الشوارع افضل على الاقل اعرفها خطوة خطوة اما هاي البيوت ما ندري شبيها مابيها ،  وصلنا جان اكبر من بيت ام اوس ، گعدت بالغرفة ارتب غراضي و غراض امي طلبت مني ما اطلع و اني نجويت من سالفة اوس ،
داومت ثاني يوم باصرار من امي و هم ماردت محاضرات اكثر تفوتني ،  ضاعن نص كتبي و الدفتر الي مدونة بي شرح و ملاحظات دخلت للقاعة شفت مجد گاعد و ساند راسه ليورا و نايم ،  مشيت على كيفي

غمضت عيوني اتخيل وجهها اجتي ريحتها بخشمي هي الوحيدة تخلي زيت ورد جوري ،  ابتسمت و رفعت راسي شفتها وگفت راسا عبالي خيال

بقى صافن بوجهي و ساكت مشيت لاستولي مسحته بكلينكس طبوا الطلاب ارتاحيت ،  اجة علية رامي سلم

- هاي وينج ماكو

- ضروف

- ان شاء الله خير الحمدلله ع سلامتج

- الله يسلمك

- والله حتى الاساتذة افتقدوج بروف عوني كل يوم يسألني عنج

گعدت باستولي اعرف بروف عوني ليش قلقان عليها بس ماريدها تعرف انو عرفت هي الطفلة المشردة ماريدها تتحسس طب فهد بيدها كاستين جاي

- دهااك هااك گول فهد ماخادمني

- عاشت ايدك
واگف ديشرب جاي غص بي بس شاف جنة
- اسم الله

يگعد و يخلي راسه براس مجد و يهمس - هيانها جنة

- اي

- مو گتلك مابيها شي هسة تداوم

- اي

- شو وجهك ورد اليوم

- راح اجيبك ابوكسي

گام يضحك و يشرب بالجاي شلون اگوللها غراضج يمي كل ريست يجي اريد احجي و اتردد انتهى الدوام رجعت للبيت قررت باجر من الصبح اخليهن على استولها

سألت على جنطتي و كتبي بالقسم ماكو و لا باللوكرات رجعت للبيت

- الله يساعدج يمة

- هلا بيج حبيبتي  هسه اصبلج الغدا

-  لا يمة تعبانة اروح انام

-  على راحتج گليبي

نمت من التعب ما صحيت الا بالتسعة بالليل  گعدت اقرا جتي امي بيدها صحن فواكه خلته يمي

- جنة ما اكلتي شي

- فد اشوي اكل مالحگ يمة هواي رايحة علية مادة

نامت امي گعدت اكل بالفواكه و اقرا لنص الليل سديت الكتب و رتبتهن حتى انام ،  گمت اجيب مي من المطبخ الاضوية كلها طافية  بس ضوا خافت يوصل من اضوية الحديقه للمطبخ داشرب مي حسيت بحركة وراية جمدت من الخوف درت

بين النايم و الگاعد نزلت اتعثر اريد مي
- ساهرة هاي انتي

دارت علية عيونها الزرگ بالظلمة يضون و عطرها ، مديت ايدي على مفتاح الكهرباء شغلت الاضوية