رواية ☆ ذنـــــبٌ بـــلا ذنـــــب ☆ الفصل الثالث والثلاثون 33 - بقلم Hend_AlBoor

- اريدج حلالي

باستغراب - شاكر

يخجل و يبتسم - شنو

تبتسم بخجل - شنو شنو

يتقرب عليها - سرّي جنتي ابالي من جنا قبل اجيكم و نگعد اقريج بس جنت خايف احجي و تبعدين لان حلمج ماجان زواج و من صارت السالفه اجيت وراج للمدينة ادور مالگيتج ردت اتزوجج و نستقر هنا شارع شارع دورت من يئست تزوجت

- عشرين سنة ضامة وجهي شاكر وين تلگيني

- و لگيتج

- كبرنا ما بقى شي بالعمر

- بعدنا انتي سبعطعش و اني تسعطعش

تضحك - عمري ثمانية و تلاثين شاكر مو طفلة و تقشمرني

- اني طفل و قابل تقشمرني بكلمة موافقة

- حتى عيب من جهالنا

-ماكو عيب بالحب سرّي

تضحك بخجل - شاگولك بعد

- گولي اي

تجي امها - يمة لا عبالج استقريتي جوا سگف امنتي بالدنيا ترة غدارة و المرة بدون رجال بدون سند الدنيا من تشوف واحد وحده تنفرد بي و تشوفه كل ضيمها

- تحجيلي بالضيم يمة تحجيلي بي و اني عشته عشرين سنة و عيشت هالمسكينة وياية

- بنتج يجيها رجال و ياخذها يعوضها عن كل الراح اما انتي شلون تبقين وحدج

- خالة الا اسويلج تمثال اتعلمي سرّي اخذي الكلام والله دتحجي درر

تضحك يكمل - خالة بنتج ليش تضحك

- ذكرني بيوم گعدت وياك من ايام زمان و ما جيتني تشكي منها و تگول خالة بنتج ليش تضحك من اسولف وياها

يضحك - اي والله ماتغير بيها شي  حتى عنادها

-  لان بعده هذاك الطفل الي يشجعني و يدفعني حتى احقق هدفي رغم يعرف عاداتنا شنو و انو تفكيري ضد كلشي بالقرية بس جان يستمر بالدعم و يفرعني على لعادات  شاكر جان الرجال الوحيد الي يختلف عن كل زلم القرية

- شاكر خوش شاكر سرّي شگلتي على طلبه

تنزل راسها بخجل - الله كريم يمة

شاكر - يعني اي

ام سرّي - اهلهل

سرّي - لااا يمة خوما صغاار عيب

- الا اطير بيج للگمر و ازفج

- شتزف شاكر ماكو لا حفلة و لا شي بس عقد سيد و محكمة باعتبار رجعتني على ذمتك گدام الناس

- صار الي تردي يتم

ينزل بكر يشوفهم فرحانين - فاز المنتخب لو بيبيتي رشحت للانتخابات
يگوم يركض عليه شاكر ينهزم بكر - لك مو الف مرة گتلك معليك ببيبيتك

يلزمه يطرحه بالگاع يصيح و يضحك - بيبي بيبي

- عوف الولد شاكر

- شفتي يمة هذا سندي الي دتنصحيني بي  اصغر من ابنه

بفخر - شبي ابن اختي

- طفل 

- شرايده يمه هو الحلو هيج شحلات الرجال من يضحك و يتشاقه

نزلت على صياح بكر - هاي شكو شبيكم ،  بابا عوفه

- هاأها صارتلك اخت و تدافعلك

عافه و هذاك ممدد بالگاع مديتله ايدي و سحبته

بكر - ها راح ترجع خالتي على ذمتك

باوعت على امي فشلت مني جان بيبي تگول -  اي بيبي الناس شتگول ما يصير عيب و حرام لازم يعقد عليها الشيطان موجود

سرّي تلطم خدها - يمة شتقصدين 

يضحكون - ماعندي مقاصد يمة على النية حجيتها

يدير على جنة - نسيت اطلب ايد امج منج

ابتسمت - موافقة
احة حضني - فدوة للبنات

بكر - و اني

- انت شبيك

- شو خالتي سرّي ماطلبتك مني

يضحكون عليه - ليش تضحكون لعد ربي وحد عن جنة

ام سرّي - تدلل طالبين ابوك منك لبنتي سرّي ؟

- لا اوافق

شاكر - لك ليش

-  رايده يبير و يوغف على گلبي

يركض و ينشمر عليه نعالات ابو و بيبيته

ام سرّي - يمة عقدوا باقرب وقت لان لازم اروح اني ارجع لولدي

- يمة ابقي وين تروحين اروح وياج

- وين تجين ماريد اخوتج يعرفون بيج دمهم حار اخاف يأذوج و يأذون هالطفلة وياج

- يمة اخوتي اعرفهم مستحيل يأذوني هسة كبرنا بعد

شاكر - سرّي اذا الج عافوج لان بنتهم اما جنة مايعوفها لان يفكرون هي من غلط و حرام يأذوها

ام سرّي - كلامه عين العقل ربج ستر على هالبنية و انضم سرها  لا تفضحي انتي و تهدمين حياتها محد يرحها اذا عرفوا نولدت من هيج سالفة

- اسم الله عليها اني عشت حياتي لخاطرها  كلشي و لا بنتي

على امتحانات اخر السنة عقدوا بابا شاكر و امي ورا الامتحانات قضينا العطله بالشمال
خالتي ميعاد متعلمة الخياطة من خدامة بالبيت الي جانو بي ، صارت تخيط و توفر مصروفها

تدخل سينا لغرفة الخياطة - يمة بس اتخرج و اتعين ماخليج تسوين شي

- لا يمة ما اتعب من اخيط لان احب الخياطة احسها متعه مو بس باب رزق و بعدين انتي لازم تتزوجين خوما تبقين طول العمر يمي

- ليش اتزوج

- شنو ليش خوما تبقين بدون زواج ما يصير يمة منو يشيلج بالمستقبل غير ابنج ، اني ما دايمتلج

- الله يطول بعمرج هسة هذا الحجي مو وقته يمة ليش تشغلين بالج

- اذا ما اشغل بالي بيج بمنو لعد افكر ..

رجعنا بنهاية العطلة وراها باسبوع بدا دوام الجامعات

- جنة كويتي الهدوم

- اي ماما

-  انطيني الدجاجة من يمج يمة

فتحت باب الثلاجة جان تگول - لا يمة طلعته تموع هيانها على الكوانتر

- تمام  ، وين بكر باجر دوام ا گالي شيلبس حتى اكويله

- من يرجع اسألي و اكويهن

دتثرم زلاطة انطيتها الدجاجة - هاج يمة انطيني اني اسوي الزلاطة

اخذت الدجاجة و گامت تگطع بيها ذبت السجينة گالت - يمة يمكن هاي فاسد لحمها

- صدك شوفيني

اخذتها منها شميتها - مابيها ريحة
قريتها من وجهها - شميها ماما مابيها ريحة

- لا يمة لعبت روحي منها

طفرت من مكانها و ركضت للحمام گامت ترد ركضت عليها - شبيج يمة

تغسل وجهها - مابية يمة مابية

- شنو مابيج رديتي كل الاكل خلي اتصل بابوية

ايدي ترجف شلت الجهاز داتصل طب ركضت عليه - بابا امي تعبانة معدتها توجعها

راح عليها - سرّي شبيج روحي ليش وجهج اصفر امشي للدكتور امشي

يجرها من ايدها توگف و تسحب ايده - اهدا شاكر مابية شي

طب بكر انطاني العلاليگ خليتهن بالمطبخ و طلعت امي مبتسمة و بابا شاكر مخطوف لونه - جنة خوفتني عليج

بكر - سلامتج باجي

- سرّي لا تجلطيني شبيج خاف ضامة علية

- بية طفل منك

صفن بوجهها و التفت علينا عيونه يضحكن من الفرح و بنفس الوقت مصدوم دار علية بكر گال - راح يحضنها لو يبوسها عيب ديري وجهج ولج
فتحت عيوني بوجهه صدك حضنها و دموعه نزلت گاللها - اموت عليج
خجلت منهم بكر مد ايده و خلاهن على عيوني - شگتلج
صدك جذب يابة اكو هنا حدايق راعوا مشاعرنا و هاي البنية بعدها بريئة هسة تطلع عيونها منين اجيب واحد يحضنها

وخرت ايده - شدتحجي ،  يمةة
ضحكوا علية وجهي صار احمر - عوف اختك

يعدل ياخته - اريد اخ يشد ظهري

بسخرية - و ليش اخ عيني اريدها اخت احجيلها اسراري

يدير عليها - شعندج اسرار لج هسة گلت عليج بريئة

- كلمة التنگال

يهمس - و الي ضربني بوكس

- ماعرف اصلا نسيت بعدك تتذكر

-  لع مانسى الا اردله البوكس

-  ماعندي شي وياه

بكر : ادري

شاكر - شيجي من الله خير المهم زوجتي تگوم بالسلامة ، طبعا جبتلج مفاجئة بس سبقتيني باحلى خبر

- گول

ينطيها ورقة - اقري

تفتحها ورقة اسماء قبولات الجامعات تقرا اسمها تباوع عليه و عيونها تدمع - شاكر
تحضنه و تبجي

جر ايدي بكر و خلاها على عيونه - انت شبيك اليوم

- شش ماريد اشوف اكتفيت حضنه لخ و اصيح زوجوني

سرّي - شوكت قدمتلي

- رحت لمدرستج و سحبت وثيقه و رشحتلج اعرف امنيتج تربية و طلعتلج لان معدلج عالي

- الله يحفظك و لا يحرمني منك

يوم سعيد اضافة للايام الي راحت نمت و روحي خفيفة مشايله هموم بس فرحة امي تسوة الدنيا عندي رحت ثاني للدوام

طبيت للبناية .. كالعاده من وقت داطب لممر القاعات صار بوجهي مجد عيونه بعيوني وگفت نزلت عيني عنه مشيت اريد امر سد طريقي

- خليج

- مجد

- اربع اشهر بدونج مرن اخذن كل حيلي مو تريدين هسة تروحين من گدام عيني

- مجد احنا بممر رئيسي .

- باوعي علية

ارتبك ايدية ترجف - مجد الله يخيك

- عيونج

سخنت لا اگدر اشيلهن و اخلص و لا يخليني امر فتحلي طريقي عبالك حررني مشيت للقاعة اخذت نفس عميق دخل كتمت نفسي

مرن يومين و سينا تسألني على فهد صعدت بالسيارة رحنا لبيت خالتي ميعاد اخذنا سينا الطريق كله نتهامس
- يعني ديداوم كل يوم و ميجي جنة شنو معناها

- يمكن مشغول بشي اعذري

- لا راح اموت من التفكير شسمع عني و ابتعد

- وج شيسمع قابل هو عرف بينا خدم و مگادي ما ابتعد

- يمكن اهله عرفوا و ماقبلوا

- ما اعتقد ، انتي گتيله استقريتوا ببيت الكم

- لا لان ادري بي مخبل و يتقدم و اني ماريد زواج هسة 

- الله كريم لا تقلقين تريدين احجي وياه

- لا اياج

- لعد و الحل تبقين هيج مقهورة

- اليوم امرلج و اشوفه

- تمام

- بس لا ما اجي لو يحبني صدك جان اجاني مو ورا عطلة اشهر مشايفني ميفكر يجي جنة

- لا تنقهرين انتي شخسرانة تعالي بحجة علية

مرن محاضرتين و دزتلي رسالة جايتني
تدخل سينا لبناية طب الاسنان بقلق و تردد ،  توگف بالممر الرئيسي بحزن تهمس لروحها
- شنو هالذل جاية حتى  تشوفي و هو ميريد
ترجع بسرعة تحدث نفسها - ما اريد عادي اتحمل بدونه سنة سنتين مراح اموت
تنزل عن مدرج البناية بسرعة بدون ما تشوف گدامه تعثر يلزمها فهد بانفعال تسحب ايدها - عوفني

- شبيج

تتركه و تمشي عصبية يروح وراها - اوگفي سينا
يسحبها من ايدها و يروح بيها للحديقة
- عيب منا الطلاب يشوفوني اركض وراج شبيج داگولج اوگفي

بانفعال - ما يهمني و لا اريد اشوفك

- شبيج تخبلتي

ببكاء - مو لعبة اني بشر انت شنو جنت مرتاحه لا رايده احد و لا احب احد غمضت عيوني و امنت بيك عبالي دتمشيني بهدوء مو هيج تشمرني بحفرة حرام عليك بشر اني

- اهدي شدتحجين انتي

يرن جهازها تشوف امها تمسح دموعها - الو ماما

- ليش اتصل عليج ماكو

- جنت محاضرة و خالته صامت

- جانة يمي ناس جوي عليج ماتحملت انتضرج لما تجين گلت اگولج

- على شنو

- خوش قسمة و انطيتهم حجاية

بانفعال - يمة شدتحجين شنو حجايتيش ليش تنطيني بدون متاخذين رأيي

-  ناس ذهب و ولد ما يتفوت و اني ادرى بمصلحتج

تدير وجهها عن فهد - اني الراح اعيش وياه مو انتي الله يخليج ليش هيج سويتي اني مو گتلج ماتزوج هسة

- عرفت تتعصبين بالاول بس والله بعدين تدعيلي حقي اريد اشوفج عروس لشوكت تبقين بدون زواج اني اموت منو يبقالج

- اسم الله عليج يمةة بس هم ماتزوج و ماريده لا تربطين هاي بهاي مو غصب 

تقفل خط تلتفت على فهد واگف بوجه بارد بدون رد فعل من الي سمعه تروح عنه يلزم ايدها

- ترفضين منو

- ما يخصك

- جاوبي

بانفعال - ما ارفضه اقبل بي و اتزوجه زين انت شيخصك

-  اي عفية عبالي غير اموتج

تعقد حواجبها بوجه غاضب - انت شنو

- احبج و شلون جازيتي حبي رفضتيني

- شدتحجي

- مثل ما سمعتي

- شوكت رفضتك

- هسة

- فهد مالي خلگ دمك الثگيل

- والله اني الولد و الناس اهلي

بانفعال - بعد اذا تحجي وياية اگلب الدنيا

تتركه و تمشي بغضب يروح وراها يضحك - وج تعالي

تصرخ - عوف

- تعاي خبولتي

تمر الايام يخطبها يعيشون السعادة ليوم العطلة و الزفاف

رحت وياها للصالون بيوم الزفة لبست فستان بينسل قصير كملت تجهيزها الكوافيرة رجعناها بسيارة بكر لبيتهم بقينا محتفلين لحد ما اجوي الزفافة بس سمعتهم خالتي ميعاد گامت تبجي قهرتنا كلنا

- رحنا لبيت عروسته طبو يرگصون الشباب شفت جنة من طببنا فهد طلعت جانو ابوها و اخوها واگفين بالباب سلمت عليهم
- استاذ اگدر احجي وياك بموضوع

- گول ابني

- ماعرف شلون ابدي

اعرف الاصول مو هيح بس مجرد اخذ الاذن منك

- بخصوص شنو

- اريد جنة على سنة الله و رسوله

- يا ابني ماعرفك حتى انطيك كلمة يعني اسال عليك و ارجع الكلمة لبنتي

بكر - يابة زميلها بالقاعة

- ها هيج الموضوع  ابني انطيك الاذن و الشور شور البنية

ينسحب الاب يسلم على الناس يروح بكر على جنة يصيحها

- ها

- مي متت عطش من الصبح على رجلي واگف

- ماشي
رحت للمطبخ اخذت بطل درت وراية شفت مجد واكف يمها و مبتسم
- ادري شطالعة اليوم دمرتيني والله گلبي ميتحمل كل هذا جنة

- شطببك هنا روح

- شفت بكر من دزج

- مجد روح الله يخليك لا تسويلي سالفة

- اريد اتزوج

- متروح تتزوج

- اروح بدون عروستي

خجلت منه عفته و طبيت ركض

بكر - مي لو باجة

- هوسة بالموت عبرت و انت مو جنت واگف بالباب وين رحت بقيت ادورك

- اختنگت و دخت من النسوان هلاهل و هوسات و ركص

سرّي تدور جنة بنص النسوان ماكو تمد راسها بالباب تصيح مجد

- بلي خالة

- يمة شوفلي جنة وين اريدها

- ان شاء الله

دورتها شفتها يم بكر بالفسحة الجانبية يم الشباك رحت عليهم سلمت

يلتفت بكر عليه يخلي بطل المي على الشباك و يضربه بوكس بقوة

يعيطن النسوان الي ديدخلن يدير عليهن - ماكو شي استمرن بالهلاهل

- و هذا حسابي صفيته دكتور مجد

انصدمت من تصرف بكر - بكر

- حلگك دينزف جنة ضمدي جروح خطيبج

حجى راح استغربت - تعال
باوعت على مجد و هو يمسح بحلگه و يباوع على ايده خليت الكلينكس الي بيدي على حلگه  - الزمة

- شكرا 

- شگال بكر

- خطبتج من عمي شاكر

باستغراب - نعم

- شبيج استغربتي

- شلون تتقدم بدون مادري

- و حبيتج بدون ما تدرين و اشتاقلج بدون ما تدرين و افكر بيج اربعة و عشرين ساعة و هم ما تدرين و لا اخذ اذنج

خجلت منه سكتت ابتسم و گالي امج تريدج
رجعنا بالليل متكسرين امي جابت خالتي ميعاد يمنا لان مرادت تعوفها وحدها و هي بهيج حال مقهورة على سينا سوتها مناحة

شاكر - سري تعالي

- عيوني

ينزلون للصالة بكر و جنة گاعدين - ها مجتمعين عند النبي ان شاء الله

- عليه افضل الصلاة و السلام

- اگعدي سرّي ، اكو موضوع اريد احجي وياكم بي

- گول شاكر خير ان شاء الله

- كل الخير جاي عريس لجنة اني گتله يتقدم لكن الشور بيد البنية

- زين ما سويت عيوني بيك الخير و البركة الشور شورك هم انت ابوها

- الله يحفظكم الي  ،  بكر انت عرفته

- و هي هم تعرفه بقاعتها يابة ، جنة ولد عيونه خضر اسمه مجد

سرّي بدهشة -  مجد

بكر اتصرف وياي كانما اني ماعرفه حبيت هالشي منه - اي ماما هو

سرّي - شاكر ابن صديقك المهندس محمد

- بيها الخير مادام كلنا نعرفه و اهله ناس ذهب يبقى الرأي رأيها

خجلت كلهم يباوعون علية سكتت - اني ماريد اتزوج هسة بعدني طالبة

- يمة مجد خوش ولد و اذا مقتنعه بي خلي يخطبج و انتظروا للتخرج

- رأيي من رأي امج

بخجل - مادري

تضحك -  جنوو الـ مادري حكمها حكم الـ اي

بكر -  اصوت بنعم

- الله يتمم ع خير و يسعدج بنتي

مر شهر على خطوبتنا بعد الضيم كله الافراح توالت شي ورا شي كانو السعادة جانت مجموعة و اجتنا دفعة وحدة او هي تعويض عن الالم الي مضى ، عرفنا جنس جنين امي ولد و صارت حرب بيني و بين بكر على الاسم مجد بالكلية ما يمشي بالكلية الا و ايده بيدي ،  گاعدة احدد مادة الامتحان راح يجيب لفات و شراب اجة گعد يمي انطاني اللفة و الميرندا
-  ها حبيبي اشرتيهن

- اي

گاعدين على مقعد بحديقة الكلية ناكل احبه  هدوءه ، عقله ، روحه ، و الحبيته اكثر بي  ما طلب مني شي محلو رغم عقدنا سيد لا بوسه و لا حضنه الحب طاهر و العقد هذا ما يحقلنا نسوي هاي الشغلات الا اتم عقدة النكاح ( الزواج ) هذا الشرع و يتم الزواج بالاشهار و اطلع من بيتنا لبيته گدام العالم لحد هذاك اليوم مانحلل الحرام بحجة عقدنا سيد مو كلها تعقد سيد يتم زواجه
اسم الله علينا من الفراق بس اليحب بحدود الله يبارك بزواجه الله و ملائكته

- صفنتي روحي

تبتسم - عليك

يضحك بخجل - خجلتيني

يصرخ فهد : لك عيون زرگ و خضر متگوليلي شنو الانتاج لخاطر الله مو صفنتوا الجامعة عليكم بنتك لابني زين

- فززتنا الله يطيح حظك ، قل اعوذ برب الفلق

يضحك - لك نذل ماحسد  لعد اخذتك مني بقيت افتر وحدي هنا انوب مالحگ اروح للحب مالي

- مشكلتك يلة منا يلة

- اشوفك بالقاعه حبي عود عوفي الي و لو شوي رحمة لامج و ابوج

راح بقينا نضحك طلع جهازه رفعه دياخذ سيلفي
- حبيبتي باوعي هنا
اتقربي خلي راسج يم راسي
احبج

حجاها ابتسمت و اخذ الصورة ، بعدني كلما يگولها اخجل

ــــــــــــ الــــــنــــــهـــايـــة ــــــــــــــــ

هند - قـد تنبت وردة في وسط مكان أسن غير قابل للحياة  و لـكن تنمو باصرار باجمل هيئة
فارضة عبقها في ارجاء المكان رغم طغيان الرائحة الكريهة فقد ادت الوردة رسالتها كأنهت وسط جنة

الطموح و الاهداف ليست لمن استطاع اليها سبيلا
و لم توهب الاحلام للرؤوس التي ترقد على حرير و ريش فقط

ع قدر المعاناة و الصبر تأتيك العطايا .. و على قدر الحمد تفتح الابواب

و ان اصابتك مصيبة ترحل بفكرك للهلاك .. فايقن ان بعدها رحمة ترحل بفكرك لسجدة طويلة ..

و نــــكــــرر ..
الحب و الصلاة .. كلاهما يتوجب وضوءاً

وفـــاءاً و نيـــة صــادقــة