رواية ذنوب لاتغفر الفصل السادس عشر 16 - بقلم Rozaya1122

#البارت الخامس عشر
#ذنوب لاتغفر
#للكاتبه《روزاية》

لاتكن سمحآ وطيب القلب معي..
عاتبني اشتمني أنبني..
لاتقابل اسائتي بأحسانك..
فأنا اتعذب من هذا...
من خطأ ارتكبته ولا اعلم لماذا؟؟
لاتسامحني فأنا اريد ان اسامح نفسي..
اخطأ في حقي لكي اصحح لنفسي فعلتها
وبذلك نكون قد تساوينا....

♡♡♡♡♡♡♡♡♡♡♡♡♡♡♡

من صاح عامر ثابت....
الحجيه ضربت صدرهه وصاحت يمه وليدي
فاطمه والبنات بجهه واني كاعده بمكاني ادك على راسي بس هذا عندي بالدنيا اموت ورا ياربي...
وكلهه تصيح ثابت ..
يعرفون ثابت شراني وعصبي...

هي دقايق بس صارت شهر ماكمت استوعب الحجي الي يمي بس لمحت عامر دخل وايده وملابسه كلهه دم...
بدون وعي اخذتني رجليه قبل الكل ركضت لزمت عامر من قميصه بس اصيح وين ثابت؟؟
عيوني مغوشه وما ادري شجاي يصير لزمتني افراح وتحجي وي رجلهه شكو وين ثابت؟؟

.. الحجيه واكعه بباب المطبخ ويذبون عليهه مي..
كال عامر شجاكم صلو على النبي ثابت مابي شي بس عركه صارت وواحد تصوب ..

من كال هيج كمت اضحك بدون شعور وامسح دموعي واحلف بي يكول ثابت مامات..
يمكن بهذيج اللحظه تخبلت لان اتصرف بدون وعي..
كام يصيح علينه عامر وطببنه جوااا...
كال هسه يجي يمه ناس ..

كمت احمد واشكر بربي
والحجيه خطيه كوه تفتح عيونهه ..
فاطمه وبنات علي يبجن بس انسام بعين وكحه ولامهتمه ولا عبالك اخوهه ...

شوي ونسمع صوتهم اجوو..
دخل علي وعامر وعيوني ادور ثابت...
اول ماشفته ركضت علي حضنته.. هو طويل رفعت نفسي وحوطت ركبته بأديه...
حسيت ايده على ظهري..
نسيت الواكفين ومنو ووين اني؟؟ كل اليهمني ثابت بهاي اللحظه..
همس يم اذني وخري منا اخوتي عيب..
ابتعدت عنه وراح باس راس امه وحضنهه وهي تبجي وتعاتب بي ليش يمه شكم مره موصيتج؟؟ تريد تموتني ولك ثابت...

يطمن بيهه وهي بحضنه ..
التفت عليه كال سويلي جاي...
هنيال اعصابك على هالبرود ..
رحت اسوي جاي وامسح بدموعي ..
كمت اتخيل لوصاير علي شي..
منو الي ليش مامكتوبلي افرح ؟؟
كمت ابجي واتخيل حياتي بدون ثابت..
ماحسيت غير الدنيا افترت بيه كمت اشوف الكاونتر بالمكلوبي... ووكعت..

ما ادري شكد مر الوقت بس انتبهت بحضن الحجيه بغرفتهه وتقره ايات على راسي ..
لقاء وافراح واكفات ..
كالن شجاج ماسمعنه غير بس صوت الوكعه اجينه لكيناج متخربطه..
وشالج ثابت وتغمزلي لقاء لوتشوفي شلون خاف عليج...
.. ابتسمت على حجايتهه
وافراح دكلهه ماتوقعنه ثابت هيج يحبج لان مايحب بس امه وتضحك...

اجه ثابت كعد يم امه من شافنه طلعن..
سحبني من ايدي وكعدني بحضنه رجليه صارت على رجلي وراسي على صدره ..
نسيت امر الحجيه مديت ايدي وحضنته من ركبته ..
كال شلون صرتي؟
كتله زينه...
ضليت على هذا الوضع وهو يسولف وي امه على المشكله..
.. يكولهه لاتشغلين بالج هذوله السرسريه الي كل سنه اجو يهدون علينه..
.. يمه لعد منو التصوب؟ وهاي الطلقات المن..
.. هاي هم يضربون بالجو وعامر جاب اسلاحه بس ماضرب بي..
هم هواي من ضربو بالجو اجت بواحد من زلمهم..
.. يايمه نارهم تاكل حطبهم.. شوكت نخلص منهم
امشي عليك محمد اجفه شرهم صارت عندك مره يمه خلي يولون ناس ماتستحي ومايخافون الله..

.. راسي بركبته واشتم بعطره يخبل
همسلي بصوت خفيف كافي ولج...

ما ابتعدت ضليت بحضنه مثل الطفل من تضمه امه لصدرهه...
خرب عليه اللحظه صوت عامر يصيح ثابت...
بعدني بهدوء وكام يشوفه..
اني كوه مفتحه عيوني ونسيت الحجيه..
.. كالتلي دهر فرج خايبه شبيج صرتي جنج دجاجه...
.. ابتسمت بخجل ودنكت
.. ولج شفتي شلون يحبج وخاف عليج ونومج على كلبه حتى نسه السويتي..
.. لزمت ايدهه وكعدت كبالهه كتلهه خاله اريده بس الي ساعديني يرجع مثل قبل..
.. ضحكت بوجهي كالت ولج انتي مرته تقربيله حسسي بحبج ..
هاي البنوات اشكال عدهه حيل وانتي جنج دجاجه بيهه جدري...

.. علميني حجيه والله اسمع كلامج..
.. ولج كومي منا شعلمج..
هذا عقلج شبي فكري ودللي رجلج ولاتخلي يروح من ايدج...

فرحانه فرحانه اريد اطير كلساع اعيد اللقطه من خلاني بحضنه ويسولف وايده على خصري..

بليل طلعوا الولد وضلينه وحدنه بس علي يمه جماعته...
نسولف ونضحك وانسام ماعاجبهه الوضع..
كمت حضرت ملابس ثابت مال الدوام اسمع انسام تحجي بالتليفون دكلهه دتعالي باجر وشوفي بعينج...

ماعرفت ويامن تحجي وشتخطط هاي السعلوه..
كلما افوت من يمهه دكول شبيج جنج احصان هيج تمشين..
وما اجاوبهه ..
نعيمه سامعه بالسالفه واجتنه بليل من يوم عرسنه ماشفتهه..
سلمت عليهه وردت من ورا خشمهه مشتاقه للبنات بس هاي الحوته ماجيبهن...
حتى عمي جاي وماكلف نفسه يسلم عليه..
من طلعت لزمتني يم المطبخ كالت مبينه فرحانه ومتونسه ام الولد..
لاتفرحين هواي تنكشفين ويشمرج بالزباله...
كتلهه عليج بنفسج مالج علاقه بيه طلعت من عندج وابتعدي عني وخلي الله بين عيونج بناتج مايستاهلن وعفتهه ومشيت ..
هي تندل الباب وحدهه...

صعدت لغرفتي سبحت وبدلت وفرشت فراشي...
اجه ثابت كال راح اسبح حضري ملابسي مال الدوام كتله محضرتهن...

راح للحمام واني مددت بفراشي
لشوكت اضل نايمه بالكاع؟؟
يله الحمدلله شوي شوي يرجع
طلع من الحمام والخاولي على راسه عطره يمشي قبله...

واكف يمشط بشعره واني اسرق النظرات..
على طوله وعلى شكله..
التفت عليه وارتجى على الميز كال تعالي يمي..
جني خبله بسرعه كمزت من مكاني وشعري منفوش..
شجاني غير امشي على كيف وبهدوء ..

.. كال على كيفج شجاج جنج اعصار؟؟
.. وكفت كدامه وافرك بأيدي وارمش بعيوني..
.. اخذي حذر من انسام ترى تحاول تسحب حجي اذا سألتج شلونه ثابت وياج شدكليلهه؟؟
.. اكلهه زين وياي بس هو ينام على الجربايه واني بالكاع..
.. عفيه بالسباعيه ضربني على راسي باصبعه..
هذا شبي بس كليلي الله من ياطينه خالقج
دماغج شغلي اخواتي ماتفوتهن فوته وانتي جنج هبله..
.. اني موهبله كلمن يشوف الناس بعين طبعه
.. عدل وكفته كال ولج شكلتي..
خليتي ايدي على حلكي وماعرفت احجي..
جر ايدي من حلكي ولزم شفتي الجوه بايده ...
منظري يخرب ضحك..
كال كل حجايه دكوليهه فكري بيهه بهذا راسج الحجاره ..
واياج وبالج تتطاولين ودكولين موقصدي..
اذتني شفتي يضغط عليهه وفشلت من نفسي ومنظري مضحك نزلت دمعتي بسرعه ..

وخر ايده .. نزلت راسي امسح بدموعي حيل استهضمت الغصه ابلعومي صارت..
سحبني من خصري.. ورفع راسي بأيده ..
بأصبعه الجبير مسح دموعي...
وحرك اصبعه على شفتي السحبهه ...
غمضت عيوني لان الحراره صعدت لراسي...
همس يم اذني يله روحي نامي ...
فتحت عيوني ماباوعت بوجهه رحت لفراشي وضميت راسي بجيت وحدي ..
مااريد شي منه بس ليش هيج يحرك مشاعري ويعوفني شنو من عقاب هذا ياثابت؟؟

ثاني يوم اجتي ابتهال وصارت الجهال
قاق واذبح...
ناس تخرمش بناس ومريم بنت علي ماتحجي وياي وكاعده وي عماتهه ...

خطيه علي سوه عشا وحتى وزع لجيران
كال دزي لبيت عمج ودزيتلهم
كثرت تمن وتشريب لنعيمه ادري بيهه تموت على اكل العزايم ...
فرشنه السفره وكعدنه ..
كعدت بصف ثابت وبصفي ابن ابتهال عمره12 سنه.....
حسيت ايد ثابت على خصري وسحبني علي بدون مايحجي...
صرت لزك بي تشبعت بعطره وانفاسه لوما عيب الا اضل اباوعله
كمنه ناكل وبس طكطه الخواشيك ..
واني لو يصير اجيب خبزه وااسوي ثابت لفه..

.. كالت ابتهال ثابت .. تقوى كلش مرحه..
.. ماحجه بس ابتسم كالت الحجيه...
ورده تقاوي ضحكتهه مرسومه على وجهه بريئه..
.. فاطمه غصت من كالت هيج..
.. اي والله حيل حبيتهه الله يسعدكم يا اخويه
.. وهم ماحجه ندري ثابت بس حتى السانك ثابت مثلك..
.. كتلهه شكرا
.. كالت خاله انسام بس موصغيره على ثابت..
.. رفع راسه عليهه ..
كال هو عشا لو اجتماع كل واحد ينطي رأيه ماخذ رايكم اني ..
يمه من كال هيج صار الهدوء موطبيعي...
من يمي استحيت بله مره شكبرهه فشلهه بس اكو لغز بالموضوع لازم اعرفه؟؟؟

كملنه عشا وكمنه غسلنه مواعين...
وكالعاده طلع ثابت ومايرجعلي لنص الليل...
مااعرف شي عنه وين يروح؟؟

من كاعدين كالت انسام باجر تجي خالتي هي وبناتهه حتى يشوفنه ومشتاقيلهن..
منن كالت هيج الوجوه تغيرت وناس تباوع لناس..
... كالت شنو ماتقبلون خالاتي يجن لبيت ابوي؟؟
.. كالت الحجيه لا يمه هلا بيهن بس ماكو داعي نحجي تعرفين كلشي؟؟
.. الي اعرفه هذا بيت ابوي وامي الهه حصه بي واخواني هم ومن حق خالاتي يجن ويشوفنه..
.. وهسه منو كالج لايجن .خلي يجن بس اذا صار شي احملج المسوؤليه
.. ليش تحمليني وشراح يصير بس لزمي ابنج ومايصير شي؟؟؟
.. ولج احترمي نفسج شنو الزمه زعطوط هو بيج خير هذا الحجي احجي كدامه..
لو من تشوفي تصيرين ارنب ...

عافتنه الحجيه وكامت عصبيه وراحت وراهه فاطمه ردت اكوم كعدتني لقاء..

.. كالتلهه لقاء انسام ماله داعي هذا الحجي كلنه نعرف ثابت شنو وابن امه الي ينطق حرف كدامه اخوته زلم ويحسبوله حساب
.. كل عقلهم اخوتي .. بعد مااخذ هاي الزعطوطه وانتو حاسبي رجال البيت...
... انقهرت منهه كتلهه رجال وغصبا على الكل ..
اشو صوتج مايطلع كدامه هسه يله حجيتي..

اشو هاي اجتني جنهه زرافه ..
هجمت عليه تريد تكتلني ولقاء وافراح صارن دونهه وهدن الوضع وهددنهه بثابت يله سكتت
عفتهه ادردم ورحت يم الحجيه..
لكيتهه كاعده كتلهه تعاركت وياي وسولفتلهه شكالت..

... كالت ولج يمه عوفيهه هاي دواهه ثابت والله لوما اكول الله يحاسبني اخلي يكسر عضامهه..
بس مخافه الله المانعتني من يوم يومهه مال مهانه...
لاتحجين لثابت ترى عصبي وتكبر السالفه..
مابينه حيل المشاكل...

ضليت يم الحجيه لحدما اجه ثابت وصعدت للغرفه ماحجينه شي ..
والله هذا ثابت غريب يوم زين ويوم لا؟؟
قليل الكلام.. ليش كلهم يخافون منه ؟؟
هواي اشياء غامضه وتحتاج توضيح بس محد يحجيلي...
ثاني يوم كعدت ثابت ماكو بالدوام..
نزلت تريكت وكلهه تشتغل كتلهم شكو ..
كالن خاله الولد ام بسمه راح تجي هي وبناتهه ...
وعلي وعامر فرحانين بجيه خالتهم...
اني كمت اشتغل وياهم واشوف الحجيه ماقابله بس ساكته...

تغدينه وبدينه وجبه تنظيف جديده تعبت حيل ..
ملتهيه امسح بالكاونتر وحسيت على ايد وحده لزمتني .
شفتهه فاطمه كالت امشيي بدلي وتمكيجي ولعبي بخلقتج لعب ترى الي راح يجن اعداء ثابت...

ضحكت بوجهه كتلهه ميخالف ...
احبهه فاطمه رغم مواقفهه بس تحب اخوهه حيل...
صعدت بدلت لبست كلابيه خليجيه لونهه وردي ومكياج خفيف ورفعت شعري وخليت شال علي ..
خليت من عطر ثابت ونزلت...
اول ماشافني كالت لقاء هلا بمرت ثابت شنو هاي عيني خليتيني اغار اروح ابدل..

انسام وخالتهه عيونهم صارن بالمقلوب..
كعدت يم الحجيه وكلساع تصلي على النبي ...
شفت فاطمه ابتسمت بوجهه ابتسمت ابتسامه خفيفه...

شوي واجه علي كال اجت خالتي وفرحان بيهه...
من طبت خالته ضخمه طويله وياهه بنات...
ايه من الجمال كلهن كبار مو بعمري لبس اخر موديل..
ومكياج ...
يسلمن من ورا خشمهن وكعدن ...
اجت فاطمه كعدت بصفي كالت عيني خاله ام بسمه نعرفح على جنتنه الحلوه تقوى مرت ثابت...

الوجوه ماتبشر بخير ويريدن ياكلني..
كالت ام بسمه اهلا وسهلا اشو زغيرونه شعجب ثابت الا بعمره يله يزوج؟؟ بس يله هو موزين تزوج
.. كالتلهه فاطمه يا خاله غير ماشفتي شلون ذبح نفسه عليهه يوميه يدزني اجيبله اخبارهه حتى عينهه بشركه ويا ومن اتزوج بطلهه يكول اغار عليهه...

.. هاي فاطمه لو الجني مالتهه
تحجي وتضحك وتمدح بيه معناتهه الموضوع حامي والله الساتر شكو...

البنات الي وياهه 3 وحده احلى من الثانيه ..
كلهن يباوعن صفح وماعاجبهن الوضع...
بس لاحظت وحده جميله حيل بس تريد تفترسني وكلساع تباوعلي...
ضليت كاعده ومتونسه على المشاحنه وحده ترفع ووحده تكبس...

انطوهن غرفه وجايبات كومه جنط وياهن كامن يبدلن انداريت على فاطمه كتلهه شكو شصاير؟؟

كالت اسمعي ولج تلبسين كل ذهبح وتغوريهن هذني السعالو محد يعرفهن شنو وراح ينامن على كلوبنه ...
كومي بدلي لبسي غير هاي
تدفع بيه واني متعجيه ولقاء وافراح هم يدفعن ونفس حجي فاطمه...
ليش هي خالتهم شكو وليش داخلين انذار؟؟

رحت بدلت لبست دشداشه عاديه بس حلوه وكمت اشتغل بالمطبخ واسمع بس صوت الضحك والسوالف بالغرفه ...
علي وعامر مخبوصين والفرحه مالامتهم بوجود خالاتهم...
الي عرفته ام بسمه راح تبقى هناااا لان الوضع بﻻنباى متأزم ..
وانسام وخالتهه هنا يضلن لان رجلهه مسافر ...
يعني راح ينامن على كلوبنه...

حضرنه العشا وانتظر ثابت يجي وكلساع فاطمه والولد يكولون كون ثابت مايصير عصبي عرفت ثابت مايقبل يجون...
كاعدين كلنه وبناتهم كاعدات ننتظر ثابت...
شوي ونسمع صوت الهورن مال سيارته...
كام ابن عامر حسوني يفتحهه...
اني كمت للمطبخ اريد اتلكا...
اول ماطب صرت بوجهه كتله الله يساعدك..
ويساعدج...
باوعلي من فوك ليجوه شويه دشداشهه بيهه ضيق..
كال انداري ليورا...
فريت كدامه...
ضربني على ظهري وحجه بعصبيه روحي غيريهه بسرعه وبعد ممنوع تلبسيهه
.. كتله ماشي

مشيت ويا اول ما طبينه الصاله كال السلام عليكم.. الكل وكف ورد السلام..
اباوع لعلي وعامر صافنين على ثابت...
والحجيه وفاطمه يباوعله...
لحظات استعداد وترقب ...
هاي شبيهم وليش هلكد مهتمين؟؟
لمحت انسام صافنه وام بسمه وبناتهه ونظرات ثابت تحولت الى نظرات شر ...
ادعي بكلبي ياربي كون يضل هادئ ومايعصب..
مااعرف عليمن وليش ماقابل؟؟ بس من وكفتهم خفت..
#يتبع