ذنوب لاتغفر الفصل الحادي وثلاثون 31 - بقلم Rozaya

#البارت التاسع والعشرون( الاخير )
#ذنوب لاتغفر
#للكاتبه《روزاية》

الظالم بما ظلم ، و الشامت بما شمت ، و المُسيء بما أساء ..
فلا تحزن و ربك أعدل العادلين ❤ ،،

اخذت الظرف وكعدت على الجربايه باوعت بداخله رساله والظرف مفتوح...
فتحته وطلعت الرساله....
بديت اقره بيهه وي كل كلمه احس نفسي يضيق...
بدون شعور نزلت من الجربايه وكعدت بالكاع...

اقره بيهه واتخيل رد فعل ثابت ...
الرساله جانت من دنيا كاتبه بيهه..

ثابت حبيبي...
اعرف من راح تقره الرساله اني بعيده عليك مااريد منك غير الرحمه..
سامحني ثابت نزلت راسك وخليت اليسوه والمايسوه يعيرك بيه...

اريد اعترفلك بشي بس امانه عليك ماتسوي هيج..
وتعتبر هذا الشي ماسمعته...
ثابت اني ماخنتك ولا فديوم كلت لغيرك حبيبي
حتى من تزوجت بالي يمك ...
والله ماخنتك..
انسام لعبت لعبتهه ووكعت براسي وجنت مجبوره لان اذا حجيت اختي تطلك وامي وابوي هددوني اذا حجيت انكتل..

انسام عدهه علاقه بحما بسمه وبنفس الوقت عدهه علاقه بصديقك الي على اساس اني خنتك ويااا...
حياتي ماشيه وياك لحدما اجه اجه اليوم الي كشفت بي انسام عدهه علاقه بحما اختي...
واني اعرف عدهه علاقه بصديقك..
ما كدرت اتحمل تعاركت وياهه وكلتلهه راح اروح احجي لثابت...
وتوسلتلي وحلفت ما اتعيدهه بعد وسكتت...
ما انكر ولا اجذب عليك اني حجيت ويا مرتين بس والله وداعه روحي الي خسرتهه
حجيت ويا بخصوص انسام وخوفته يعوفهه قبل ماتدري انت...

مرت ايام واني وانسام صديقات وهي كلش قريبه عليه وعبالي صدك بطلت من سوالفهه...
لحدما كشفتهه مره ثانيه بعدهه عدهه علاقه بحما اختي ...
من واجهتهه رايحه مسولفتله وهو راجع على بسمه ومتفق هو واخو يطلك بسمه..
اذا حجيت ...
وصل الحجي لأبويه وكال لازم اطلكج من ثابت شنو هاي اخته هيج اخلاقهه وانت تعرف ابويه مايحبكم جان...

انسام لعبتهه صح واستغلت حما اختي وكال بس تحجين وتجيبين طاري انسام نطلك بسمه

ضليت ساكته لحدما اجه اليوم الي على اساس اني خنتك بي..
تذكر ثابت شكد توسلتلك واحلفلك ما خنتك..
تذكر شكد قسيت عليه واذيتني ...
تذكر ثابت شلون تحبسني ايام بدون اكل وكلساع تجي تكتلني وتطلع...

كلما اريد احجي امي وابويه يمنعوني لان حما بسمه كايلهم اذا كالت انسام السبب نطلك اختهه ....
وهو بسمه غسلت دماغ اهلي بأن اني صدك عندي علاقه بالولد صارت كلهه ضدي شكد حجيت ومحد سمعني
توصل الحجايه بطرف لساني واريد احجيلك واهلي يمنعوني...
ما ادري ليش كلهم يدافعون لانسام حتى امي فضلت ستر انسام على فضيحتي..
كلهم ساندوا انسام وخلوني ساكته..

من جابت الدليل انسام ومحادثات ومكالمات من خطي بيومهه تخبلت ردت احجيلك وابرئ نفسي...
والله ما راسلت اي واحد ولاحجيت وي غيرك بس انسام وامي وبسمه ما ادري شنو غايتهن سون هيج..
بس الي كدرت اعرفه بمرور الايام انسام تبوك فلوس منكم ومشبعه امي وبسمه ..

ثابت ماتعرف ابوي شسوه بيه تمنيتك موجود وتحاميني ..
ابوي صدك خيانتي مثلك وعاقبني اضعافهه..
حتى جوي جواني...
وانت تخليت عني وطلكتني حتى بدون ماتشوفني ...
سنين مرت واني ادفع ثمن غلطه انسام وممنوع احجي لان انكتل وبس افتح الموضوع ثاني يوم..
تجي بسمه هي وغراضهه مطردهه رجلهه وابوي يرجع عليه..

زوجني غصب عني لواحد بكده اندثر شبابي ومات كلبي وكرهت كلشي بحياتي..
سنين عايشه على ذكراك ما نسيتك ولا لحظه ...

اني غبيه صادقت انسام ومن اجينه يمكم رضتني وكالت اني ماسويت هيج جانت خالتي تطلب مني هيج ..
ضاعت عليه الحقيقه وماكدرت احجي واسوي مشكله لان وجوده مولائق يمكم..
بعدهه كالت مالج علاقه اني راح اخلي يتزوجج ويوميه تجي دكلي ثابت يكول احبهه بعدني..
لذلك شفتني كمت اتقربلك ...
ترى تربات ايدك اني وماسمحت لكائن من يكون ياخذ مكانك...

حجيتلك الي مضموم وارتاح كلبي ورا ماطلكت بسمه شكد حاولت احجيلك ومانطيتني مجال وخفت من الله اهدم حياه انسام وهي تزوجت ابن خالتي بعد...

بس ما دريت راح اودع الدنيا بخساره ما احمل غير بس اسمهه...
قررت انتحر لان ما اكدر اتحمل بعد ....
الصار بيه موهين توالت عليه الزلم الغريبه واغتصبوني بأبشع الطرق...

جنت اصيح باسمك بكل قوتي وما التفتت عليه ...
مو لساني يناديك كلبي ياثابت كلبي...
يوميه اتعذب واني اتخيل منظري بين ادين الوحوش واكول هسه يجي ثابت ياخذني بحضنه...

من اشوفك تصعد ورا تقوى سجاجين حاميه وتنغرز بكلبي...
ما اكدر اعيش واني وحده مدنسه جنت حلم بالنسبه الي وهسه صرت سراب ..

ديربالك من بسمه وانسام ترى يدورن ورا تقوى ويريدن يوكعنهه..
بسمه وانسام اتفقن وي ابن عمك براق وهو سوه بيهه هيج واكيد حاسبتهه مثل ماجنت تحاسبني وهي بريئه...

طولت عليك اتمنى تسامحني على غبائي
بريئه اني والله ما خنتك ..
صديقك واختك الخانوك مواني....

اذا قريت الرساله اترحملي واتمنالك حياة سعيده وتشوف احفادك..

من كملت الرساله واني عيوني مغوشه من البجي معقوله هاي دنيا هيج شافت ...
معقوله انسام هدمت حياه اخوهه وحياه هاي البنيه..
دخيلك ربي شتشوف جواك...
وين عايشين احس نفسي بمسلسل تركي..
انتي ام بسمه شلون انطاج كلبج تظلمين بنتج بهالطريقه...

تذكرت من اجن يمنه علاقه دنيا مو قويه باخواتهه وحتى قليله الكلام وي امهه...

والله لو ادري بقصتهه هيج جان خليت ثابت يحجي وياهه ويسامحهه..
الله يرحمج دنيا...
راح شبابج بسبب الماتخاف الله...

رجعت الرساله ابمكانهه وكملت التعزيل شلون ماجان فكري يم ثابت..
اذا قاري الرساله شعجب ساكت لانسام وماحاسبهه يجوز لان حلفته دنيا؟؟
هوايه اسئله ادور براسي بس ماكو جواب ..

ما اكدر احجي واسأله وضعه مايسمح للسؤال...
بيومهه من رجع ثابت بسرعه نام ....

مرت فتره واني ويا بصراع هو تأنيب الضمير ذابحه واني موضوع الطفل مدمرني...

بيوم منهن كاعدين بليل ونسمع بس صوت صياح انسام وصوت الهبد مال البوكسيات..
كلنه ركضنه وانشوف ثابت لازم انسام من شعرهه....
يسحل بيهه بالمطبخ وهي بكل صلافه تصيح وتغلط وتصيح عوفني مخبل...

بوقتهه هجم عليهه دفرات وبوكسيات وهي جوا رجليه وبعده لسانه شطوله...
اباوع لعلي واكف ورا ثابت وما ادخل بس خالتهه تصيح عوفوهه راح تموتهه ...

اخذهه سحل للمخزن وقفل عليهه الباب..
والتفت علينه كال خلي وحده منجن تجرب حضهه وتفتحلهه الباب وخلي تشوف شسوي بيهه...

محد حجه حرف عبالك الكل يكله سمعا وطاعه ...
طلع هو وعلي...
وانسام صوتهه شعلوه ادك بلباب كسرته وتغلط على ثابت وتسب بالحجيه..

صدك قهرتني شكد عوجه بكل صلافه اطلع صوتهه لعد شكد عرمه ووكحه...

رحنه كعدنه بالصاله وحده تسأل الثانيه شكو؟؟
شوي ورجعوا الولد وبوقتهه سمعوا صياح انسام وهد عليهه علي ..
ماشفت شسوالهه لان ثابت صاحني اصعد ويا...

اول ماطبينه للغرفه كتله شبيك ثابت؟؟
كعد على الجربايه كال مابيه شي ..
تعالي شبي وجهج اصفر صار شكم يوم ماعاجبني...

كتله ثابت ما اريد اخليك بأمل ويطلع ماكوشي...
بس صار اسبوع متأخره عن موعدهه واخاف مثل كل مره هم اسوي تحليل وماكو..

ابتسم وخله ايده على وجهي كال لا ان شاء الله اكو شي...
رغم عصبيته بس ارتاحيت من ابتسم...

ثاني يوم من كعدت لكيت علي كاتل انسام كتله مضيع ملامحهه حته صايره تخوف...
بعدين عرفنه لاكيهه تراسل واحد واخذوا التليفون منهه خالتهه راحت يم بتهه همزين ماشافت انسام جان اطلكت ونامت على كلوبنه...

ورا ايام عرفت من ثابت مواجهه برساله دنيا وبوقتهه هي وبسمه معترفات ...
وثابت انهار حكم على دنيا بدون مايسمع منهه لان كان الدليل موجود...
ما اتوقع اخته تبيعه وادمر حياته...

راحت دنيا وذكراهه لازال مراود ثابت ...
ما ادري شلون متحمل الي سمعه ..
دائما ادعيله الله يجبر بخاطره ويكدر ينسى..

بهاي الايام فاجئنه ثابت بقرار ننتقل من البيت لان تحسن شغله واشترى واحد..
بنفس اليوم الي انتقلنه بي اخذني للمختبر حتى احلل...

جنه كاعدين ننتظر النتيجه بكل لهفه...
صاح المحلل بأسمي كام ثابت واني كلبي ينبض بسرعه تعبت كل شهر تحليل وارجع بالفشل...
بعدني اردد ايات بكلبي سمعت صوت المحلل يكول الف مبروك...
رجليه ماعادت تشيلني دموعي نزلت بغزاره هالمره دموع الفرح مو دموع الخيبه ...
اجاني ثابت واللمعه بعيونه كال..
مبروك حبيبتي حامل...
ما اكدر احجي المراجعين انتبهوا عليه...
طلعنه للسياره اول ماصعدت باسني من راسي ..
كتله ثابت مامصدكه اني حامل..

اباوعله لاول مره اشوفه فرحان عبالك الي كدامي شخص ثاني..
ملامح وجهه جانت دائما عبوسه...
هسه لا كل معاني الفرح والامل بيهه...

نزل للمطعم اخذنه عشا لان يمنه فاطمه...
رجعنه للبيت الفرحه ما وسعتنه...
الحجيه من سمعت الخبر كامت تهلهل وتبوس بثابت.
وعبالك ثابت الحامل....

مرت اشهر الحمل بصعوبه ...
فاطمه جابت ولد وسمته ثابت ...
وحته معبس وجهه جنه خاله و24 ساعه يبجي...

بهاي الفتره صارت مشكله جبيره انسام ورجلهه وبوقتهه اجه جابهه وشمرهه على اخوتهه ..
وكال ما اريدهه وطلكهه ثاني يوم...
بعدين عرفنه رجلهه لازمهه عدهه موبايل سري واطلكت ورجعت على اخوتهه بس علي وعامر ...
يطبون ويطلعون يكتلون بيهه صارت خدامه حته اسمع اخبارهه يكولون ماتحجي حرف وي اخوتهه...
من كدما ذاليهه...

قرب موعد ولادتي وطلع بيه ولد جانت الفرحه اكبر....
بيوم منهن بليل وحسيت على الم قوي...
ضليت للصبح بي ومايزداد..
اجت ساعات الولاده واحس كلبي ينشلع من مكانه من كدما اصرخ بعلو صوتي...

ما هدءت ابد لحدما خلو الطفل على صدري..
احس الدنيا توقفت لحظات ..
واني بساعات الولاده دعيت الله يرزق الذريه لكل محروم ...

طلعوني لغرفه خاصه لان جنت بمستشفى خاص وثابت والحجيه فوك راسي لساني مابطل من الحمد والشكر على هاي النعمه الي بيهه...

اجه يزن ونور عليه الدنيا...
التهيت بحياتي وما اطلع للباب بحيث رجعت ثقه ثابت بيه ...
ولا مد ايده عليه من اخر مره مال الزفه...
لحد ما اجه يوم صادف عيد زواجنه جابلي موبايل وخط وخلالي كل البرامج بس بعلمه ودائما يتابع وياي...

اسمع اخبار بيت عمي ثابت مايقبل اروحلهم..
غاده تزوجت وغسق مسافره ويه احمد ونعيمه وعمي عرج مايطبهم ...

اما بسمه تزوجت صديق علي مرته ميته وماعنده اطفال...
وبان تزوجت واحد من كرايب امهه ...
حياتي عاديه وحاليا حامل 5 اشهر وبيه بنوته هالمره...

تعلمت هواي اشياء وتندمت على كل فعل بدر مني...
لحد الان من اتذكر الي سويته اشمئز من نفسي..

الموبايل .. الموبايل..
وخاصه الانترنيت..
هدم بيوت هوايه عوائل..
الي اطلكت والي لحد الان تعاني من شك زوجهه...
والي على ذمه رجلهه وادور ورا وتخونه...
وكل هذا يرجع السبب للاهل لان ماعدهم متابعه لابنائهم

مثل مانكول حبل الجذب كصير ..
ولازم يجي يوم وتنكشف كدام زوجهه لوخطيبهه ..
وهذيج الساعه راح تدفع الثمن غالي...

الى هنا تنتهي قصتنا مع ذنوب لاتغفر...
ذنب تقوى سوء استخدام الموبايل وماكو احد احد نصحهه واحتواها ...
ودفعت الثمن غالي لحد ما كدرت تستعيد ثقه زوجهه بس تبقه الثقه على المحك ومهدده بالسقوط من اقل تصرف...

اما ذنب ثابت الي حمله بسبب عادات وتقاليد جده وعمه الي عانى ماعانى من الظلم والطفوله القاسيه...

دنيا الله يرحمهه طلعت من الدنيا ماتحمل بس اسمهه وهي ايضآ حملت ذنب اتهامهه بالخيانه...

لكل انسان جزاء بما عمل ..
لا تاخذنه الدنيا بغرورها وننسى مخافه الله وخاصه اليتيم ...
ماتعدي حوبه اليتيم لوبعد سنين...
اتمنى تكوني استفاديتوا من القصه واستمتعتوا ..

حبايب كلبي احبكم وشكرا لكم على التصويت...
ولكل من نورتني بطلتهه الحلوه..
انتظروني بقصه جديده ...
احبكم💋❤