رواية تحت جناح الظالم الفصل الخامس عشر 15 - بقلم zaho._k99

- كلمة الأعتذار لن تمحيَ دموعي التي هدرت أيّاما و لياليِ وأشهرًا و ما قاسيته من عناءٍ، لو حدّثتك عمّا أحدثتهُ كلماتك من جروح لن تلتئم، لقد استغرقة خيبةَ أملي و إنكسار خاطريِ وددتُ لو لم يكن صحيحًا.. لو كانَ مجرد غيابٍ كـ العادة، لو كان كابوسًا، لو كان كذبة! لَـ كم تمنيتُ أن ما ما للغدِ وجود! و لكنّ للأسفِ فقد حان الوقت، الإنتصارَ لـ كبريائي الضائع، لأجِل روحي التي أخرستها و لكن هيهات إنها الخيبات التي لاتنصفها الكلمات .

************************************

من بعد هل موقف اسماء شدت ويا نور شده مو طبيعيه كامت تحاربهه بكولشي
بالاكل باللبس يوميه تخابر ام دره وتتعارك ويا نور ومنا بدت الحرب بين نور واسماء

بدت المدارس  وجنت كولش خايفه لان هل سنه غير عن كل السنوات
هل مره المسؤليه اكبر
بس جنت دائما اشجع نفسي بنفسي
- اني گدها
- اني شاطره
- هذا اختبار من رب العالمين اليه ولوما رب العالمين يشوفني كد هل مسؤؤليه ميخليني بيها "لايكلف الله نفسآ الا وسعها"

جنت اداوم الصبح بالمدرسه  وارجع من المدرسه گبل للصالون نور جانت تجيبلي وياها ملابس فأبدل واسبح وابدي بشغلي
ووقت فراغي جنت اكعد اقره بس جنت استحي اقره گدام ام دره فمرات تنام الظهر او تطلع وماكو زباين اكعد اقره
ارجع للبيت  اكمل تنظيفي ارتب جدولي واطلعلي ملابس والف راسي وانام وهيج جان جدولي
جان حلم عمري اصير بايلوجيه كولش احب هل اختصاص ( تشريح علم الاحياء تحليلات)
بالبدايه جنت مسيطره ع الوضع لان دروس قليله اكملهه بالصالون بس بمرور الايام واجهت صعوبه فضيعه
جنت اقره بالصالون واشتغل وارجع للبيت اشتغل واكعد اقره لل٢ او ٣ انام ٣ ساعات واكعد اقره وابدل واطلع للمدرسه جنت انتهي من التعب
جان عندي يوم الخميس عيدد ارجع انام ودوامنه بالصالون يوم الجمعه ب٢ الظهر فبس بهذا اليوم جنت اشبع نوم وارتاح  رغم اسماء مچانت تعفيني عن شغل الببت وجانت تحاول تضغط عليه حتى ابطل من المدرسه شنو غايتهه ماعرف رغم اني دا اشتغل وابدد ما اشكي يمها من تعب او ضغط حتى لتكولي بطلي.............

دائما جنت اجمع فلوس بس ما اكدر اتصرف بيها
لا اكدر اشتري ملابس ولت اكدر اشتري الشي الي اريده
فأنجبر اداوم بالملابس الي عندي رغم احذيتي تعبانه ومو جديده والملابس بس سيت واحد اشتريت جديد الباقي قديم
يعني الي يشوف منضره يبين عليه فقيرة الحال

بيوم من الايام بشهر الواحد جانت الدنيا باااارده ثلج والصبح ضباب ومطر
طلعت بالبلكونه دااشوف الجو
بارد يگص گص  حرت اني ماعندي ملابس شتائيه مال مدرسه ولا عندي قمصله حايره شلون اروح
لبست القميص والصدريه ولبست جوا القميص بلوز بس الدنيا ثللج ولبست حذاء نور من جانت بالمتوسطه وطلعت
اطرافي جمدتت من البرد نوب اروح مشي للمدرسه والشوارع طيان ومطر وحالتي حاله
وصلت للمدرسه اتختل بين البنات من البرد
شافتني مدرسه كالت صعدي جنطتج وتعاليلي
كل ضني علمود دفتر  الغياب او شي يخص الصف لان جنت المراقبه مال صف
وديت الجنطه ورجعتلها

مرام: نعم ست

المدرسه : ماما ليش ملابسه قمصله والجو بارد ؟؟

مرام: حرجتني بسؤالهه وحرت شجاوبهه ونوب كاعدات مدرسات بالغرفه والغرفه هدوء وينسكع صوتهه فكولهن انتبهن 
اني بساعتهه لو ذابحيني ميلگون بيه قطرت دم ع الموقف الي تخليت بي

—ءء شسمه مو ست  مو احتر
اتلعثم وماعرف شحجي رغم البرد بس ني حسيت روحي سخنت

المدرسه: تحترين بهل برد؟؟

مرام: لاا ست بس اني عندي حساسيه واختنگ من البسهه

حست بيه دا اكذب وحرجتني اكثر

المدرسه: ماما لتستحين اذا ماعندج احجي الفقر مو عيب

هيا حجت هيج ودموعي جرن احجي بقلبي يافقر الي تحجي عليه واحنه حالنه زين

— ست مو هيج والله اريد بس ابررللهه بس ماعرف شحجي ماكدر انطي بأهلي ولا اريد تعطف عليه وتستخطيني
داحجي وجان تفتح جنطتهه وتطلع ٢٥ الف من الجنطه وتخليهه بيدي

المدرسه: هاج هاي ماما اشتري قمصله واني مثل امج

كمت ابجي

مرام: ست اني ممحتاجه والله بسس بسس ماكدر اخذ هاي الفلوس.....
حزن بنفسي واحد يستخطيني وينطيني صدقه واني ممحتاجتهه بس اني وضعي اصعب من الفقير والمحتاج
يجوز الفقير عنده ضروفه  وهيا الماده الي مانعته يشتري او يدفي نفسه بهل برد
بس اني لا اني الي محتاجته اهم من الفلوس................

نطتني الفلوس وطلعت من الغرفه اخذتهن لان حرجتني والمدرسات كولهن ضلن يباوعن فأني ردت بس انهزم ماريد ابقى اكثر لان الموقف اذاني كولش
صعدت لصفي وكعت ابجي ع الموقف الطايح حظه الي تخليت بي بسبب اهلي
اجوي البنات يردون يعرفون شبيا وليش ابجي
كتلهم شفت درجتي مال فيزيا وموزينه
ابدد مجنت اتعمق بعلاقاتي بالمدرسه علاقتي سطحيه بحيث محد يعرف شي عن حياتي غامضه بشكل

من بعد هل موقف رجعت دزت عليه نفس المدرسه
وگالت اكو فلوس نجمعهه احنه المدرسات وننطيهه للطلاب المتعففين فخلي امج تجي باجر حتى نسلمهه المبلغ

جاوبتهه: ست اني والدتي متوفيه ووالدي هم متوفي واحنه كاعدين يم بيت عمي
( تمنيت لو ابويه صدوك ميت ع الاقل تحل علينه الصدقه ) فمنهه وكمت ياهو الي يسألني اكوله والدي والدتي متوفين وبالفعل احنه ابونه مات ويا امنه والي موجود بالبيت نحسه رجل مرت ابونه لان ماكو اب هيج مهمل ومو حنين على بناته
وحتى من كذبت هل كذبه مطمنه مراح تنكشف يوم لان من ماتت ماما لهل لحضه محد اجه علينه للمدرسه وتفقدنه وشاف وضعنه الدراسي شلونه

المدرسه : لااااااا صدوك تحجين ؟؟
اسفه ماما موقصدي اجرحج  واني اكول مرام متفوقه وشاطره وماكو اهل بتهم هيج متفوقه وميجون يسألون عليهه بالمدرسه

متدري هيا اهلي محاربيني ع الدراسه
نطتني الفلوس ورفضت اخذهن وكلتلهه عدنه راتب اهلي عايشين بي ومكتفين وممحتاجين وهيا هم مرادت تحرجني ستأذنت وراحت

رجعت للصالون واني كمية فرح بداخلي مو طبيعيه
سولفت لنور ولام دره ع الي صار وكتلهم انو كذبت ع المدرسه وكتلهه ابويه ميت

ام دره: ييييي زين ماسويتي هسه هوا شمسويلج ع الاقل خلي بعداد الموتى احسن..........

نور جان الهه فضل كولش جبير عليه
جانت من ام رده متجي متخليني اسوي شي تكلي فوتي بالاوفيس اقري واني اكمل الزباين  وجانت بالبيت هوايه تشيل هليه من شغل البيت ودائما تشجعني اقري وادرسي وكسري خشم ابوج ومرته  وني جنت انصت لكلامهه واحاول انفذه
استلمت النتائج مال فصل الاول والحمدلله ناجحه وبتفوق جان معدلي بوقتهه٨٣ رغم قليل واقل من السنه الي قبلهه بس جنت مقتنعه بي لان اولا الرابع علمي صعب كوولش وثانيا بدون مدرسين وثالثا والاهم جانت ضروفي صعبه رغم هذا وجبت معدل زين الحمدلله
رجعت للبيت بيومهه فرحانه بنتيجتي
اجيت راويتهه لابويه محجه شي ولا حسسني بالانجاز الي مسويته مجرد كال مبروك وبس اما اسماء

اسماء: خل اشوف نهاية هل مدرسه شنو شراح تصيرين دكتوره ؟؟

مرام بفهاوه : اللله يي والله باجي بلكي اصير دكتوره كلش احب المجالات الطبيه

اسماء: لا هاهيه ماعترف بالتدريس بالعراق اذا مرام صارت دكتوره

مرام: باجي والله اني ذكيه بس مدري ليش انتي ممقتنعه بيه

اسماء: دمشي ولي الذكيه انتي المكناسه متعرفين تلزميهه

حاولت تقهرني بس ولا اهتميت
دائما تكولي الفاهيه صح اني بطيئه بشغلي ومن انظف بس نظيفه ومن اشتغل من كل قلبي وادقق بشغلي  هيا ميعجبهه لان اتأخر............

بيوم من الايام جان بارده ومطر والشوارع غرگانه فطفت الكهرباء مال محل ومنا اصلا زباين ماكو فأم دره كالت خل نعزل المن مفتحين
عزلنه ورجعنه للبيت  بس البيت هدووء
يوميه نرجع الهوسه مال جهال واصله لراس الشارع استغربنه
احنه بابنه الخارجي بي سيم يعني نفتحه من برا
فتنه البيت هدوء ماكو احد غرفتنه فارغه المطبخ الصاله الاستقبال كولهه فارغه
سمعنه صوت من غرفة ابويه واسماء مال رجال غريب
نصدمنه اني ونور وضلينه متبسمرات بالباب لحد منفتح الباب وتخبلنه من الي شفنااا….......

طلع رجال ضخم اصلع من الغرفه وبظهره اسماء لابسه ثوب قصير اسود وشعرها مفتوح ومكوش
شافونه وضلوو يباوعون علينه واحنه نباوع بوجوهم اسماء صار وجهه اصفر والرجال استغرب من وجودنه ستأذن منها ولف وجهه بالغتره وطلع

اسماء: نور مرام لتفتهمني غلط

نور: البيت فارغ وانتي ورجال غريب بالغرفه وبهذا لبسجججج الخززززززي وتكوووولين لتفتهمووني غللط
شووفي انيي ما احاسبج ولا الي اي شغله بيج ذنبج على جنبج بس لمى ساعه وحده بعد متبقى يمجججج
اختتيييي حديثه وبنيه شلوووون تفوتين واحد للبيتتتتت هاي تالي عمرنه بيتنه يصير مگ…ه ؟؟؟؟ مخفتي على سمعتتتتنه مخفتي على سمعة جهااالج ؟؟ موگف بعينجججج حاررث؟؟ رجال الشيب تاااارس شعرررره  مانقهرتي عليه تخوووني وبفراااشه ؟؟؟؟ تخوني وهوا مثل الجلللب يطلع من الصببببح لليل حتى يجيب الراااتب ويخلييي بيدج ؟؟؟
اريد افتهممممم بشنو مقصررين ويااااااااج وهيج تسوووين
بشنوووو قصرنه شوو نقصر على روحنه في سبيل نرضيييج  حسبي الله ونعم الوكيل بيججج حسبي الله ونعم الوكيل
واني اله هذا الدثوو الي خالج تخوطين بشواربه وهوا مكيفففف خل يجي ويشووف هاي الي خالهه بيتهه وسواهه ام فلااان وفضلهه علينه شلوون تخونه

اسماء: نور ابوووس ايدج اسكتيي  الله يخلييج  لجج مادري نثولت ابوووس ايدج سكتي تعالي فوتي بالغرفه واني افهمج كلشيي وكافي عياط
تحجي وتبجي وتتوسل بنور

فاتت وياهه نور  وني ضليت افر براسي
هاي شلون تصادق وهيا على ذمت رجال  شلون الهه نفس برجالين زين احنه اخذتنه السوالف ومسألناها على لمى والجهال  ذوله وينهم ؟؟ بس لاسوتلهم شي

مرام: باجي ..باجي ممكن ادخل؟؟

اسماء :تعالي

مرام: باجي الجهال ولمى وينهم شو ماكو

ندارتلي نور : ييي صدكك الجهال وين همه ولمى ؟؟

اسماء : بالمنتزه عجبهم يرحون واخذتهم لمى

نور: طلعي مرام وسدي الباب

ني هم طلعت  وسديت الباب  وطلعت نفسي من السالفه
اني من النوع انعزاليه ولو تنگلب الدنيا مالي دخل مدام الموضوع ميخصني ما ادوخ روحي بي
كعدت اغسل بملابسي مال مدرسه كملتهن وكعدت اقره كل هذا الوقت ونور واسماء بالغرفه
رتبت جدولي وبقالي كم ماده ادرسهه بس تعبت كولش غفيت مادري شكد وفزيت على صوت الجهال ولمى

لمى: مرام هاي انتي هناا؟؟ شجااابج ؟؟  مو بعد وكت

مرام: طفت الكهرباء بالصالون وعزلنه ورجعنه
لمى جان بعيونهه خووف من شافتني بس ني من شدة غبائي مفتهمت ليش خايفه ولا حتى سألتهه

اجتي نور من المطبخ
هااا ست الحسن شرفتي؟؟
وين جنتي بالله ؟؟ غيرج وحده تكعد تدرس طايحة الحظ مو عايفه  دراستج وتفرفرين بالشوارع

لمى :هييي وانتي شعليج ماما تقبل وكتلهه يله طلعت انتي شكو تتحكمين بيا

نور منا محترگ قلبهه من الموقف وشايطه ومنا لمى استفزتهه ونوب تصيح لاسماء ماما  جرتهه من شعرهه وضربتهه راشدي

نور: ادبسززززززز طايحة الحظ صوتج من يعلى اشربچ تيزااب والله سوالف بنات الشوارع مو يمي وسالفه ماما تدري وماما تقبل متاكل عندي اني دا اطلعععع من الصبح لليل واجي مكسوور ضهري واكعد انظف واسوي عشى كل هذا في سبيل متركن دراستجن وانتي حضرة جنابج تفترين بالشوارع؟؟؟...........

توضيح مهم من البطله بخصوص الاحداث:

طبعا اكو بنات راح يستغربون ويسألون ليش ما اشتري ملابس واروح بيها للمدرسه
ماكدر اشتري لان جنت اطلع من البيت واسماء بيها طبع نگس تفتش بكناتيرنه وبغراضنه وياويلهه الي عدهه شي وهيا متدري بي راسا تاخذه
والي يسأل ليش كلت على ابويه ميت
لان جنت صدووك اتمنى يمووت لان كول الي صار بينه بسببه اذا على اسماء فهي اذا كامت او كعدت تبقى مرت اب بس اويلي عليه هوا اب واحنه بناته من دمه ولحمه شلون يتعامل ويانه هيج
ابويه جان يشتغل بمكان ماكدر اذكره بس راتبه جان ٢٠ ورقه بالشهر وبيتنه ملك وعنده سياره يعني لامحتاج لشغلنه ولا مفروض يخلينه محتاجات
دائما جنت ادعي ربي انو يمووت حتى نتحرر من الي احنه بي
هاي الاحداث ب ٢٠١٣
لمى من بعد مشتغلنه كوولش اتقربت من اسماء وصارن صديقات حتى كمنه نخاف نحجي شي كدامهه لتنقله الهه
وهذا التقرب مجان من فراغ جانت ورا بلاوي ومصايب وطراگيع هم بس اكتشفناهه فايت وكت
نور حاليا عمرهه٣٠ سنه  ولمى اذا عايشه فعمرهه٢٥ سنه...............

***********************************

أعرف أنني تغيرت أصبحت أكثر هدوء من ذي قبل، أتجنب المناقشات و كلمات اللوم و العتاب، أشعر بالملل من المحادثات الطويلة، لا أطيق التحدث في الهاتف، لا أعبر عما أشعر به لأي شخص مهما كنت غاضب و حزين و محطم، أصبحت أكثر عقلانية، أفكر كثيرًا قبل إتخاذ قرار واحد، أنا الذي كنت الأكثر براءة و عفوية، تحولت.

***********************************
طبعا ما راح تبدي المأساه الحقيقيه للبنات الثلاثه مأساه مرت الاب والسحر والشعوذه مالتها وحتى زنى زنت وانتو قيسو..........
اتمنى لكم قراءه ممتعه...........

وتستمر القصه ادناه...