إنك الشخص الوحيد الذي تأنس روحي معه يأتي و يزيل كل هذا الآسى بكلمة واحدة و أطمئن، إنك الشخص الوحيد الذي لم تقلل المسافة من محبتي له و رغبتي في البقاء معه بل أحبك كل لحظة كأنها المرة الأولى، أحبك جدا و لن يمحي هذا الحب أي شيء ❤"
*********************************
اجه ثاني يوم ابويه يريد ياخذنه لبيت عمتي الجبيره
حارث : نور مرام لمى تحضرو دنروح لبيت عمتكم دلال
بدلنه وتحضرنه واخذنه ابويه لبيت عمه دلال
طبعا عمه عدهه بنيه من عمرنه اسمهه نهى
وصلنه لبيت عمه جانت عمه موجوده واسماء ونهى سلمنه وگعدنه
بقى بابا شويه يمنه وگال راح اروح بشغله وارجع جلبت ويا اسماء
اسماء: عيوني ابو حيدوري تكدر توصلني بطريقك
حارث : اي ادللي تعالي
اخذها وصعد بالسياره وراحوا
احنه ضلينه فاتحين حلگنه
بقينه يم عمه
ضلت تسالنه عن وضعنه ومن هل اسأله
كالت انو ابوكم يريد يزوج اسماء
نور فتحت عينها على وسعهن
نور: عمه ملكيتوله غير اسماء يتزوجهه
دلال: وشبيها اسماء حلوا وشابه وابوج هاويها بعد شنو الي يمنع يتزوجون
نور: ماما جانت متحبهه تتذكرين كم مشكله صارت بسببهه
دلال : عمه امج وماتت والوضع اختلف هسه ابوج ارمل ومطلگ وعنده ٣ بنات منو تقبل بي مو زين اسماء قبلت بي !!
ضلينه صافنات منعرف شنحجي اذا هوا اصلا ماخذ قراره بعد حجينه لا يقدم ولا يأخر
كمنه نلعب ويا نهى بس نور نتيهت على رگبة نهى ونصدمممتتت
نور: شفنت برگبة نهى بت عمتي گلادتي الي ضايعه تخببلللت
— نهى منيلج هاي الگلاده هاي گلادتي وضايعه
نهى: شنو مالتج ماما اشترتهه اليه
نور : رحت اركض على عمتي ودمعتي بعيني
— عمه هاي الكلاده الي برگبة نهى مالتي ضايعه وسألت نهى تكول ماما جابتهه اليه
واني گلادتي اعرفهه والله
دلال : والله يا عمه مادري شكلج صدمتيني
هاي الكلاده قبل شهرين جابهه حارث كال بيعيها اليه واني كتله اخذهه لنهى مادام حرفهه ونطيته فلوسهه
نور: منقهرت لان بايعهه ولا انقهرت لان غيري لابسهه وهيه مال ماما الله يرحمهه واخر هديه الهه بس الي قهرني ضل يرزل بيه من كتله ضاعت والي قهرني اكثر محترگ قلبه عليه من شاف دموعي تنزل عليهه
بديت اكتشف ابويه بديت اعرف ماكو احد حنين علينه غير امي
كتلهه تمام عمه بالعافيه عليج
عفتهه وكعدت ع الدرج ابجي
يعني حتى ذكرى من امي مبقه
زين شلون يمد ايده على شي مو اله
ماما جانت تكول الي يمد ايده على شي مو اله يعتبر سارق يعني الله يحاسبه
معقوله ابويه سارق؟!!
كمت اتصفن صفنه تجيبني وصفنه توديني هاي ماما صارلهه ٣ اشهر من ماتت وحار شسوه
شلون بينه لو تزوج اسماء !!
اجه ابويه بالليل وكعدنه وجانت عمتي كاعده
وفتح موضوع اسماء ويانه
حارث: شوفن بابا اني رجال احتاج مره تخدمني تكمل احتياجاتي انتن صغار تحتاجن ام على راسجن باجر عكبه تخلص العطله وتجي مدارس تحتاجن وحده تقوم بواجباتجن ودتشوفن شلون متبهذل بيجن من بيت لبيت
واني قررت اتزوج اسماء
مره زينه وحبابه والاهم من هذا تحبجن
حتى تلمجن ببيت واحد ومتبقن من بيت لبيت
هوا يحجي ويجاوب روحه واصلا ماخذ قراره يعني حجينه مراح يأثر عليه
سكتنه محجينه شي ونور اصلا حسيتهه مهضومه من سالفة الگلاده فأصلا لا اعترضت ولا فتحت موضوع اكتفت بالسكوت
بقينه ايام ببيت عمتي واسماء ضلت تتردد عليها ويوميه جايه من ابويه موجود تكعد امى بحضنهه وتمشطلهه وتلعب وياهه ومن ابويه ماكو اصلا ولا تتقرب النه
بتاريخ ٧/٩ بنفس السنه الي توفت بيها ماما يعني بعد 5 اشهر ضبط من وفاة ماما
جان زواج ابويه من اسماء
هوا لابس قاط ومزين وصابغ شعره وفرحان عبالك اول عرس اله
وهيا بدله ومكياج وهم عبالك اول عرس
الهه
توسلت بينه عمه حتى نروح بالزفه بس ولا وحده بينه قبلت تروح
عمتي اخذت بتهه وراحت للزفه
بقينه بس اني والبنات بالبيت
ساعه نبجي لان كدر ينسى ماما وساعه نبجي لان فكر بمصلحته وراحته وساعه نور تتذكر الكلاده الي نياگت منها وطلع حاميهه حراميهه
ليله سوده جانت ومتنسي
اجتي عمه وبتهه بالليل
زافيهم لبيتنه وهنا شبعنه قهر اكثر
يعني هم اخذت ابويه وهم اخذت مكان امي بالبيت ونوب تتزوج بجرباية ماما ومكانهه؟!!
سكتنه وما باليد حيله
نور طلبت من عمه تخابر عاى جدو
كالت نبقى يمه فتره لحد ما العريس يحن علينه
بس عمه كالتلهه ماعندي رقمهم اخابر ابوج واخذ رقمه من ابوج واخليج تخابري
عدى على زواج ابويه تقريبا ١٠ ايام
بعد اليوم العاشر عمه جانت عازمه ابويه ومرته ع الغده فأجوي
منضرهم مدري نضحك عليه مدري ننقهر على امي الي راحت تركض للموت
اجه هوا ودشداشته عبالك مطبگ عليها كاشي معرفت تلزمهه وتكويهه اله وهيا بالفستان الابيض عبالك عمرهه٢٠ سنه ولاطخه الحمره الحمره وتتمعلج ضليت مركزه بمعانيهه موحلوه
والله مو لان مرت ابويه بس شكلهه حشى خلقك الله تخززي خشمهه كوولش جبير وطويل ووجهه هم طويل وسنونهه متراكبه شجاا ابويه وقبل بيها رغم هوا حلوو
نور شافتهه وهيا منا حاقده عليهم راحت دتسلم عليهم سلمت على اسماء ورجعت دتسلم على ابويه كالت لاسماء
نور: بلا زحمه ممكن خشمج داريد افوت
اسماء ضلت صافنه بوجهه وهاي جانت اول عداوه تنولد بين اسماء ونور
طبعا ابويه بهذاك الوقت عمره ٥٠ سنه وهيا عمره ٣٥ سنه....................
كملو الغدا واكلو وصبو جاي وفقرة جاي وجذب وكل واحد يحجي ببطولاته ايام زمان وكلهه تجذب ناس ترفع وناس تكبس كملو
بابا كال يله حضرن ملابسجن دتجن ويانه
كمنه حضرنه ملابسنه وبدلنه سلمنه على عمه وطلعنه
الطريق كله هدووء محد حجه وصلنه للبيت فتحنه الباب ودخلنه
واول مدخلنه اسماء نزعت الحجاب بالطرمه وكالت
اسماء: يمةة واحد ميرتاح اله ببيته
نور تمشي وتدردم
— شو صدگت روحهه بيتهه هيا مصارلهه كم يوم شبسرعه صار بيتهه
كبل فاتت للغرفه وفات وراها ابويه
نور تهز بأيدهه معاجبهه الوضع
راحت بدلت ولفت راسهه ونامت
لمى طشرت ملاعيبهه بالغرفه وكعدت تلعب
اني جانت ماما الله يرحمها معلمتني حياكه بس بعدني مبتدئه يعني ماعرف اسوي اشياء بس اعرف احوك قطع فجنت من اضوج او ماعندي شي اخذ الكرات مال صوف والسناره والتهي بالحياكه
فشفت روحي ضايجه طلعت الكرات والسناره وفتحت باب البلكونه وكعدت احوك
مرت فتره طويله واني كاعده مندمجه بالحياكه لحد ما ضلمت الدنيا كفتهن من ايدي وكمت كعدت نور
مرام: نونه نوور كافي اكعدي والله ضجت نووور دكعدي كافي نوم
نور : شتردين مني خليني نايمه
مرام : والله جعت ومليت انتي نايمه وبابا وباجي نايمين ولمى دتلعب بملاعيبهه وني باقيه وحدي من الضوجه جعت ☹️
نور: لعد ابوج شكو تزوج ست الحسن مو علمود تخدمنه ؟!
شو من اجتي لهسه بالغرفه متكوم تسوي اكل لو تنتضرنه احنه نسوي
مرام: عوفي ملازم ماريد
نور: شو دوخري الفاهيه متريد
ابوج كال تزوجت حتى تخدمكم يعني مو حتى تكضيهه نايمه واحنه نخدمهه
— كمت من فراشي طلعت من الغرفه توجهت لغرفتهم ودكيت لباب
— باجي باجي
اسماء : طلعت منزعجه وووجهه ميگصه السيف
— ها نور شبيج تصيحين فززتينه
نور: باجي متنه جوع نريد عشى
اسماء: ي چان كمتي سويتي الج ولخواتج مادامج جوعانه
نور: ماعرف
اسماء: لعد شلون جنتو بالبيت ابوج يكول تسويلهن
نور: باجي بابا كال راح اتزوج حتى تجي وحده تقضي احتياجاتكم هوا اني لو اعرف اسوي اكل جان مخليت بابا يتزوج
اسماء: وشنو جايبني للخدمه مثلا!!
— حارث !! حاارث!!! شو اكعد
حارث: هاا شكو شكوو
اسماء : بتك تكول سويلنه اكل لان ابويه جايبج خدامه النه
نور : عززززا اني مكلت هيج كلت لو اعرف اسوي اكل جان مخليت بابا يتزوج اني مكلت خدامه
حارث :: للللجججج ادبسزززز متستحين تتجاوزين ع الاكبر منج رعنننننه
نور : بابا والله مكلت هيج احجي وابجي
اسماء : شنو قابل دا اجذب اني شو انتي ممربايه
نور: بحس عالي ما اسمحلج تحجين على تربيتي امي ربتني احسن تربيه
بس حجيت هاي الحجايه ابويه فز ضربني راشدي فر وجهي فرر
حارث: ادبسزززز يعلى صوتج ع الاكبر منج واني واكف !!
نور : ما ابقى هنا دقيقه هسه تخابر على جدو يجي ياخذنه
هاي اول يوم وهيج غيرتك علينه
رجع ضربهه ويغلط ويسب بيها
واسماء واكفه تتفرج وتضحك عبالك مسرحيه
واحنه نبجي لان ابويه من ماتت ماما لحد هسه يهين بينه ويضربنه ويرزلنه كدام الكل
نور فقدت ضلت تصيح ياربي اخذني وخلصني ماماا تعالي اخذيني يمج تعبتتتت والله تعبت
اني ولمى وحده حاضنه الخ وتبجي مابيدنه شي
وهاي جانت اول خطوات الجحيم الي شفناهه من مرت ابويه ….....................
ابويه ضرب نور ورزلهه كدام مرته وهانهه وكعت يم رجله دفرهه حيل وگلهه
حارث: يلااا كومي سوي زقنبوت لخواتج وانعل والديج اذا صخرتي اسماء داريد اشوف منو الخدامه
نور: اقبح واحقر شعور ممكن ان يعيشه الانسان هوا شعور الاهانه
مسويت شي طلبت من مرت ابويه الي عساس جايبهه لخدمتنه انو تسويلنه اكل
وين الغلط الي بالموضوع
ليش هيج ضربني كدامهه ليش غلط عليه وسبني وقبل انهان كدام الكل
مو مفروض اني بنته الجبيره !! شلون يهيني كدام خواتي الصغار شلون يقبل ع الاهانه لبته حتى لو جانت مرته شلون يغلط عليه ويضربني كدامهه !!
لججج ماما تعالي شوفي حال نور عينج تعالي شوفي حالي خلافج شنو الاكل واشبع رزايل وضرب واهانه علموده!!
تعالي شوفي منو اخذت مكانج وگلبت ابويه علينه
لييييش ربييي ليييش اخذتها مو تدري ماعدنه غيرهه ليش موتتهه لو موتنه احنه تلاثتنه ولا ماخذهه هيا لان نعيش بذل خلافهه
تعالي يوم وشوفي بناتج المدللاات شلون شبعن اهانه لججج يوم تعبنه
تحجي وتبجي وتسوي اكل
هيا غير الطماطه متعرف تسوي
كلت طماطه وخلتهه كدامنه اني ولمى وعافتنه وراحت للغرفه
طلع ابويه شافنه دناكل چان يصيح
حارث : نووووور نوووور تعالي
نور: نعم
كل ضنه انو يريد يراضيهه لان اذاهه بس نصدمنه بطلبه 😳................................
**********************************
إنك الشخص الوحيد الذي تأنس روحي معه يأتي و يزيل كل هذا الآسى بكلمة واحدة و أطمئن، إنك الشخص الوحيد الذي لم تقلل المسافة من محبتي له و رغبتي في البقاء معه بل أحبك كل لحظة كأنها المرة الأولى، أحبك جدا و لن يمحي هذا الحب أي شيء ❤"....
*********************************
قد تحمِل "مرحباً " كل الحُب في هذا العالم وقد تكون"أنا أُحبك" فارغة من كُل شَيء نحُن بحاجة دائماً لشُعور الأشخاص لا لكلامِهم! رُبّما لم تكُن مرحباً عاديّة بَل مُرّ حُباً !............
********************************
وكولو مامدللتنه وين لاكين كاتبه بارتين بيوم يلا هذا البارت هديه مني الكم وطبعا هاي الايام ماراح انزل بارت لان البطله مالتنه عدهه ضروف فهاي تعويض للايام الجايه لايك وتعليق حلو مثلكم........
اتمنى لكم قراءه ممتعه❤💜
فضلاً وليس امرا اترحمولها واقرولها سوره الفاتحه على روح المرحومه ام مرام يدخلها الجنه بحق محمد وآل محمد 🌺......
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!