إنك الشخص الوحيد الذي تأنس روحي معه يأتي و يزيل كل هذا الآسى بكلمة واحدة و أطمئن، إنك الشخص الوحيد الذي لم تقلل المسافة من محبتي له و رغبتي في البقاء معه بل أحبك كل لحظة كأنها المرة الأولى، أحبك جدا و لن يمحي هذا الحب أي شيء ❤"
***********************************
فتنه للاستقبال وجان نتفاجئ بوجود خالي
مرام : خالو محمد!!!!!
الخال: هلاا والله شلونجن شخبارجن
كام بوسنه وسلم علينه واحنه في حالة صدمه
شجابه علينه وهمه ناسينه من يوم الي طلعنه من بيتهم
نور : شلونك هالو شخبارك شذكرك بينه
الخال : والله يا خالي احنه مناسيكم
بس انتو الي متردونه
واني حالف ما اجي ولا اوصل بيتكم ولا الي دخل بيجن بس ابويه اخخخخ منه كتل روحه كتل عليجن
حارث بأرتباك: ابو جاسم هسه مو وكت هل حجي اكعد اشرب جايك
نور: لحضه بابا خل افتهم
شنو الي سوينا الكم ومتردونه احنه مو بنات اختكم ؟ امي جانت مقصره وياكم؟؟ شو تجيب وتحمل الكم ولجهالكم ولنسوانكم هاي هيج تردولهه الجميل ببناتهه؟؟ تجي ببيتنه وتكول ماريدهن شنو الي سوينا فهمني
الخال : احنه الي مردناكم ؟؟
شكم مره خابرنه على ابوجن بس نريده يجيبجن وانتن متقبلن ؟؟ لجن ماتت خالتجن بالجذب مرفعتن تلفون وسالتن على حالنه كلنه اطفال وميفتهمن نخابر ونسال ونريد نحجي وياجن وانتن ترفضن مو انتن الي تكولن متبرين من خوالنه ومنريدهم !! ششفتن من عدنه
شو اجيتن من ماتت امجن بقيتن معززات مكرمات يمنه لا احد غثجن لا احد سمعجن حجايه ونسوانه قايمات بكل واجباتجن وابويه وامي يكومون ويكعددون بنات مروه ويا بنات مروه بس صدك لو كال المثل اليربي غير بزره يزرع بغير گاعه
وهسه ست نور طالعلهه لسان وتوكف وتكلي شذكركم
هوا يحجي واحنه مو مستوعبات الي دنسمعه وابويه وجهه كام يذب الوان
رغم عرفنه ابويه هوا الي منعنه من بست جدو وراد يكطع علاقتنه بيهم بس محجينه كدام خالو وكلنه ابويه
بقينه مثل بلاع الموس لا نكدر نحجي ونكول احنه مندري ولا نكدر نضل ساكتين ونشوف الحقد بعيون خالي وجيتة المجبور عليها
اكتفينه بالسكوت
نور : ءءء خالو كلت بو ما ابويه ما اجي
جدو بي شي ؟
الخال : جدج مريض وموات وصارله شهر يون عليجن اتصل بابوج ميجاوب وجدج اكل راسي اكل وهسه نقلنا مستشفى
واذا تتكرمن وتجن ويايه يشوفجن اكون ممنون
فقدنه نبجي على جدو لو على تصرف ابويه لو على دنيانه الي يوميه تصدمنه بشي
نور : ايي اكيد نجي ولتفتت لابويه موو بابا
حارث : اي بابا هذا جدكم ومن ريحة امكم اخذي خواتج وروحو شوفو
بس لتبقون بالمستشفى لان امراض واخاف عليجن
اكثر شي اكرها بأبويه التمثيل هوا يمتى خايف علينه حتى هسه يخاف
سايرنا وكلناله ماشي
بدلت لمى واحنه بملابسنه مال شغل وطلعنه ويا خالو
صعدنه بالسياره وهوا
حجه
الخال: اني لتهيت بالسوالف نسيت اسألجن
ساعه ٩ بالليل وين جنتن
اني ونور وحده تباوع للخ ومنعرف شنحجي
اخاف نكول جنه بالشغل وابويه مجذب غير جذبه وتصيرلنه مشكله
حجت نور : مو شسمه ءء مرام مو نجحت للرابع اعدادي؟ فدخلهه بابا معهد علمود تتقوه وهسه كملت ورحت جبتهه
حارث : هااااا صاير خوارده حارث ويدخلجن معاهد وتدريس خصوصي شبي لعد جان بوكت مروه شايل ايده من كلشي ولو هيا حضوض
ايي نور بيا صف هسه انتي
نور بغصه وكوه تحجي: اني بطلت خالو
الخال : ليش ولج امج جان املهه بيج
نور: مالي واهس بالمدرسه وبطلت
الخال: مالج واهس؟ لعد بشنو الج واهس اذا بالمدرسه مالج واهس؟
نور : خالو صارلي هوايه من بطلت مو اليوم والبارحه ونسدت سالفتهه
الخال: مادري اكو شي مدا ارتاحله
نور : احجي بقلبي
شي واحد ؟؟ اكو اشياااءات انتو متدرون بيها
شكد دورنه سند وشكد ردنه احد يوكف ويانه شخص واحد جان كافي انو يسندنه انو يطبطب علينه ويكول اني لسه وياكم بس ملكينه هل شخص
مشت بينا السياره قرابة النص ساعه
صف خالو السياره بگراج جبير
قرينه قطعه مكتوب عليها مستشفى ابن النفيس
نزلنه ومشينه فات خالو للمستشفى واحنه نمشي ورا
لحد موصل للغرفه الي بيها جدو
فتنه وشفنه جدو على سديه وداير مدايره خالاتي وخوالي
وبيبي كاعده يم رجله على كرسي
بس بيبي كبرانه ٢٠ سنه فوك عمرها وخالاتي كبرانات
رحنه تقربنه نسلم خوالي الباقين دارو وجهم وطلعو حتى مسلمو علينه
رحنه سلمنه على بيبي اخذتنه بالاحضان تبوس وتشمشم بينا وتبجي
سلمنه على خالاتي شويه وجوهن اهون من خوالي
جدو جان نايم
تقربنه من عنده وبسنه راسه
ضلينه نحجي ويا وگان يسمعنه
نور: شلونك جدو حبيبي شبيك شمرضك
كوم شوفنه مو ردت تشوفنه احنه اجينه
نور تحجي وبيبي تبجي بهل اثناء جدو نزلت دموع من عينه وهوا مغمض
نور : جدو اگعد احنه يمك منعوفك كوم حبيبي كوم شوفنه يلا مشتاقيلك
خالاتي كامن يبجن وبيبي تنعي وتبجي صدوك كولنه بجانه هذا الموقف
لمى واگفه على صفحه واني ونور يم راس جدو......
جدو حالته متأزمه كولش وصحته تعبانه
من سألنه خالاتي شبي
كالو ضاربته جلطه قبل فتره وهسه هم ضاربته ثانيه وهوا منا عنده ضغط وسكر فرضعه كولش متأزم
بقينه كاعدين يمه قرابة الساعه
نور كاعده يم راسه ولازمه ايده
من بعد ساعه وعه واشر بأيده حتى نرفع جهاز التنفس من خشمه
رفعته نور وتقرينه عليه كلنه
الجد : ميلوو غاد خلو بس بنات مروه يمي
كولهم ابتعدو واحنه اقتربنه
— شلونك جدوو يلا شد حيلك وصير زين احنه محتاجيك
الجد: هاي ياهي هاي مروه شجابهه ( يقصد على نور لان تشبه ماما )
نور: لاجدو هاي اني نور
الجد : ولكم هاي مروه بشبابهه وكام يبجي
نور : لتبجي جدوو ماما ماتت الله يرحمهه صارلهه سنين
الجد: ولكم لتكولولي سنين
جنهه البارحه تلعب كبالي بالحوش ولكم مروه جبيرتي لهسه وجعهه برويحتي اخخخ يابويه رحتي قبل وكتج ولج بويه تعالي لبنياتج محتاجاتج
كمنه نبجي ومنعرف شنحجي لحد ماهو حجه
الجد: شوفن بويه ادري مرت ابوجن موزينه وياجن وانه هل تشوفني صحتي متعيني اسوي شي لو بحيلي والله لجان لعبتهم ع الحبلين هم هيه وهم حويرث الدثو ابو النسوان
العقارات الجن بي حصه بويه حصه امچن موجوده وانه خليتهه امانه برگبت خوالجن يبقون همه الوصيين على حصتجن لحد متتزوجن وكل وحده تاخذ حصتهه لان اعرف لو انطيتهه الجن الحيه وابوجن ياخذهه ونتن ماتحصلن شي وانه حصة بنتي مارضى مره غريبه تاخذهه هذا حقجن ولون اعرف هسه ماتكدرن تتصرفن بشي هل وصيت ليما تتزوجن تاخذنهن وبويه حاللني وواهبني انه قصرت وياجن اخر فتره بس والله ثم والله صحتي متعيني واكثر من مره اتصلت على ابوجن ومايرضى احجي وياجن
نور : لا جدو حشاك من التقصير
انت هم الله يساعدك بيت بمسووليتك وولد وبنات واحفاد شتريد تصير واحنه الحمدلله هل تشوفنه عايشين والحمدلله
الجد : بويه نور انتي الجبيره عينج على خياتج ترى ابيج دثوو انتي خلي بالج منهن ذني امانة امج حافظي عليهن حتى ترتاح بگبرهه بويه
نور: بلا متوصيني جدو بناتي ذني وببطن عيني خالتهن
الجد : ولا تگطعن ببيبيتجن عبنهه تحبجن وتنوح عليجن هاي هم امانه يمج نور بويه
نور: احجي وابجي وكأنه يودعنه
حبيبي ببطن عيني بس لتحجي هيج ان شاء الله انت تكوم على حيلك وتلمنه كولنه يمك
الجد : لابويه مامنهه كومه هذا اسعد يحومي عليه كولسع اشوفنه بزاويه بالغرفه وامج هم شفتهه اضنهم يردون ياخذوني وياهم
( اسعد خالي مستشهد بحرب ايران شاب عمره٢٦ سنه هستوه صار ضابط ومات)
كمنه نبجي من حجه هيج فقدنه
خالاتي وبيبي وعلى صوت بجيته فاتو خوالي يركضون عبالهم بي شي جدو
شبعنه بجي نسيته نفسنه لل٢ بالليل يمه بقينه
عاد نام وبيبي كالت روحو يمه تتبهذلون هنا
طلعنه بالسياره خالي وصلنه للبيت
نزلنه وفتحنه الباب وفتنه البيت هدووء
رحنه كل وحده لفراشهه وحاولنه ننام بس هيهات النوم مزار عينه كولسع نتذكر شغله لجدو ونبجي عليهه نتذكر شلون جان يلعبنه من جنه نروح يمهم
تطفى الكهرباء وبأيده يسويلنه اشكال ينعكس ضلهه ع الحايط واحنه نفرح
لو جان ياخذنه لابو غزوان ابو اسواق يمهم يلمنه كولنه احنه وبنات خالتي وولد خالي ونروح يكول اخذو الي تردو واحنه نسوي هجوم ع المحل ونطلع وهوا يقشمر علينه يكول من تمشون ورايه يجيكم الطنطل واحنه من الخوف نركض كدامه
ومره وكعت وكمت ابجي وكلهم راحو بس جدو بقى يمي ديكومني واني اكله حباب شيلني ماكدر امشي واخاف يجي الطنطل وهوا يضحك عليه
لو جان ميقبل احد يفوت غرفته من الجناين وحتى بيبي ميخليهه تفوت واحنه من نروح كلنه يجمعنه ويشغل الصوبه علاء الدين ويكعد يسولفلنه قصة ابو طبر لو علي بابا
مواقف بسيطه بس شبعنه بجي عليهه
للفجر يلا جبرنه روحنه ع النوم لان ورانه دوام
نمنه كم ساعه وكعدنه نظفنه البيت وبدلنه وطلعنه للشغل
مقل روتين اليومي بدينه بالشغل لل٣ الظهر اسماء دكت على ام دره
( لان بوقتهه جانت متقبل نشيل تلفونات)
اجتي ام دره مخطوف لونهه ومرتبكه
ام دره: نونه حبيبتي اني ومرام اخذو تكسي منا وروحو للبيت مرت ابوكم خابرت كالت ابوهم متخربط
اني ونور وحده ضلت صافنه بوجه اللخ ابونه متخربط شنو واحنه شنريد نسويله
راحت من بالنه سالفة جدي
نور: يوم صاير غير شي احجي اذا صاير
ام دره : دروحن يا امي مضل وكت توصلن وتفتهمن واخذن اجازه هاي ال ٣ ايام
رحنه بالطريق وجان نور تفطن
نور: عزا العززاني كون بس لا جدو صاير عليه شي
مرام : لا اسم الله لتكولين هيج البارحه جنه يمه
نور : الثووله شنو البارحه جنتي يمه يعني شنو شديتيله رصيد حتى ليموت شوو دمشي كدامي مالي خلك غبائج............
مشينه بأستعجال لحد موصلنه البيت
دخلنه متفاجئات
ها باجي شبي ابويه
اسماء: ابووج؟ ياستار شبي ؟
نور : مو انتي خابرتي ام دره كلتيلها ابوهن متخربط خل يجن ؟
اسماء بقلة انسانيه: لا اني كتلهه جدجن مات وخالجن جاي بالطريق عليجن حتى ترحن للفاتحه مجبت طاري ابوجن
هيه كالت هيج واحنه فتحنه حلگنه على وسعه والدموع تنزل
— صدوووك تحجييين صدوووك جدو مااات وانتي تحجيها ببرود اعصاب
اسما: ديلا عيني مو ابن ال٢٠ سنه ميت وبعدين شتردن مثلا اشگ زيجي حتى ترضن مات الله ويا شسويله عرف ولف
موتنه روحنه بالبجي اني ونور بس لمى جانت بارده صح تبجي بس مو بحركه
انتضرنه يجي خالي حتى يودينه
كمنه بدلنه ولبسنه اسود وكعدنه ننتضر
اسماء تفتر علينه
المن رايحات هوا جدجن ومات والشغل شلون وراح يكطعون من راتبجن ومن هل حجي
احنه مابينه حيل ومالنه خلكهه
اجه خالو اخذنه بس لمى مقبلت تجي
اني ونور رحنه للفاتحه وهاي ثاني عزيز نودعه ويروح من عدنه
ثاني سند النه يروح
كل وحده صافنه بجهه والدنيا طالعه من عينهه
حجه خالو
الخال: لعد ذيج الصغيره وينها ليش مجتي
نور: بقت يم الجهال محد بقى يمهم
الخال: امممم مغزره بيجن مرت ابوجن ولا عبالك ماخذه مكان امجن من طاح حظجن
سكتنه لحد موصلنه
اول مدخلنه العياط والصياح يجيب التايه وخالاتي متخبلات خبال وبيبي سوده عليه تعبانه كوولش منتهيه
فتنه جوا نبجي ونلطم وكأن فاتحة ماما نعادت
بيبي تلطم وتنعى ومكعدتنه يمهه
ياعزيزاات جدهن وياحبيبات جدهن وتنعي وتبجي واحنه نيجي وياها........................
***********************************
إياكِ عزيزتي أن تسمحي للحياة بالمرور فوق روحكِ الطيبة هكذا بسهولة، كوني مُستعطية عليها وعلى كل يوم خائن استباح دمعك و استفز الألم في صدركِ، كلنا جئنا لهذه الحياة لنحارب لأجل ما نريده، لا تخسري المعركة فتجدين نفسك مُثيرة للشفقة بعد أعوام فإن كل خيباتك هذة التي تبدو لك نهاية الحياة ما هي إلا وقت سيمر كأنه لم يكن و كل انتصاراتك التي تبدو مُستحيلة ستلمسينها واقع بمرور الوقت أنتِ فقط كوني أنتِ وكوني قوية و سعيدة لأجلكِ قبل أي شيء أخر 🦋......
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!