رواية تل الذهب الفصل الثالث وثلاثون 33 - بقلم Raghad Almoualy

              تـــــــــل الذهـــــب
                  رغــــــــد الموالــــي
ـــــــــــــــــــــــــــــــــــــــــــــــــــــــــــــــ

سديم....

اتصلت عليه والي ردتلي امرأءه

- الو وينك حبيبي

- حبيبج نايم

- شنو. انتي منو

- انتي منو

- اني زوجة ادم هذا مو رقم ادم

- اي تليفونه وادم نايم من يكعد اخلي يخابرج
وسدته....

نار واشتعلت بيه وضاقت الدنيا بعيني احسها صغرت كلش معرفت لحضتها شنو اسوي غير انه اكتفيت ارجع للبيت والتزم الصمت لحد مايرجع

نضفت ورتب وطبخت بصوره اعتياديه

اتصل...

سديم حبيبي تأخرت عليج انتي وين

-  جاوبته بهدوء بالبيت

-تمام جايج محتاجه شي اجيب وياي

لا كلشي موجود

شطبختيلنه

كبسه دجاج

اي زين خل اجيب لبن لعد تره ميت جوع حضريلنه الاكل

اوك

سويت سلطه وحضرت الطرشي وبقت بس الكبسه اقلبها وي جيته
مرت دقاىق قصيره واجه فتحت باب البيت الخارجي ودخل السياره جوه ونزل

اسف حبيبي خليتج ترجعين اليوم وحدج

،  عادي مو مشكله وين جنت

- جنت بالشغل ونسيت تليفوني يم صديقي

- صديقك؟!

- اي حبيبي

يله وين الاكل تره جوعان

حضرته تعال ناكل

كعدنه نتغده بهدوء كملت اكل قبله وكمت احضرله الجاي وهو كمل كعد بالصاله وشغل تلفزيون يتفرج

بقيت افكر....  ليش كال صديقه
خاف صدك

معقوله يم صديقه... والمكالمه......  والكلام

لو فلم حتى يمشيها عليه

زين اواجها

لو اسكت

لو واجهته يمكن يدخل بعيني ويكلي هاذ العندي
وساعتها ماكو خيار امامي غير الطلاك

واذا كتمت معناها قبلت على نفسي ان اعيش مغفله وبلا كرامه

زين شلون.....؟؟

صاح سديم وينج

اجيت

اخذت الجاي ورحت يمه كعدت وبالي صار يودي ويجيب هو كان يتفرج على التلفزيون واني بغير عالم
بين اواجه بين لا

انتبه عليه

وين صافنه

- لا هيج

- بشنو تفكرين

- ماكو شي

- منو وصلج سديم

- اني اجيت

تكسي لو مواصلات

- تكسي

- رجال جبير لو لا

- مانتبهت

-حلوه هاي مال مانتبهت

- انت ليش تسأل

- لا هيج

-افوت انام تعبانه

رحت مددت على سريري

رغم قباحتك تشك بيه ادم بس سهله...

اجه يمي سويت نفسي نايمه

سديم.        سديم.     

نمتي حبيبي.     

حسيت عليه طلع من الغرفه

بقيت بصراع بين يكذب بين لا وحتى دليل ماعندي يثبت
بس هو يكذب والا منو هاي الي دزله مسجات
معقوله صاحبة الصوره
ليش متكون زوجته

يمكن متزوج وعنده اطفال

زين ليش حتى يتزوجني وليش ماعايشه ويا

يمكن تزوجني صفقه

يمكن الله اعلم هذيج زوجته شنو هسه تعاني بسببي
بس شلون تعاني وهي ردتلي

يمكن من حركة گلبها رادت تحرگلي گلبي
رادت تقهرني مثل ماادم يقهرها بيه

مراح اسامحك ادم لو طلعت متزوج
مستحيل ابقه وياك ثانيه وحده 

مشى اليوم اعتيادي والثاني  والثالث ومرت ايام
وصرت اراقب بتليفونه ماكو اي شي
صرت اركز بكل كلمه يكولها خصوصا لمن اكعد احجي ويا

- سؤال فضولي ادم ممكن

- اسألي

- علاقاتك السابقه شلون هيج فجأه كطعتها يعني شكتلهن لصديقاتك

- غيرت رقمي

- مو يعرفون البيت والشركه

- الي تجي تعرف شيصير لهسبب هن هم ماناقصات وجع راس
هي علاقه عابره اخذت فتره وراحت واحد ليش يوجع راسه من وراها

- حبيت بحياتك

- حبيتك الك ياكمييييسل

- يلا شقه حبيت

- اي

- وشنو نهاية هذا الحب

- انه اتزوجج يعني فتركنه

- ليش

- عوفي ليش وخلينه بالمهم ماكو شي

- شتقصد

- طفل ماكو

- ادم صارلنه اسبوعين متزوجين شبسرعه اصير حامل بعدين احنه مو تفقنه اكمل كليه

- اريد طفل منج حبيبي

- اخلص كليه

- هسه متشوفين نفسح الا حامل

- اطمئن ماخذه احتياطي ودااخذ حبوب

- شنوووو حبوبيش هاي

- مانع حمل

- باوعلي بغضب....  تاخذين مانع حمل منو سمحلج

- احنه تفقنه ادم

- اتفاقيش هذا الي تحجين عنه
شوفي سديم حبوب المانع هاي تكطعيها اني اريد اطفال

- اجلت الزواج لان اعرف حتريد اطفال ادم

- اي من حقي

- ومن حقي ادرس

- ادرسي مالازمج اني بس طفل يجينه

- وشلون هااااا شلوووون ميرادله عنايه

- مربيه اجيبله مو مهم
المهم عندي طفل

- الله يخليك ادم هالسنتين تكضي وراها طفل سهله اخلفلك عشره

- سنتين شنو مستحييييل طفل اريد وهذا حقي

- سكتت من جهه حقه ومن جهه اني هم حقي ادرس

- وينه شريط الحبوب

- بجنطتي

- كام على جنطتي طلعه للشريط الحبوب
وحركه على الطباخ

اتسائلت ليش هيج يرجف على طفل ومصرّ انه اخلف طفل

زاد خوفي اكثر وصار عندي دافع اقوه انه اراقبه

مرت الايام.... بيوم وصلني للجامعه فتت بالبدايه لكن مجرد حرك السياره مباشرة وكفت اخذ تكسي تأخرت شويه بعدين صعدت بتكسي ورحت بنفس اتجاه الشارع  عيني يمنه ويسره عل انه اشوف سيارته
ولحسن حضي بموقف السيارات لما كانت التيرفك لايت ناطي إشاره حمره لمحت سيارته من بعيد
ولما حركت السيارات وجهت السايق يلحكه بدون ماينتبه

بقيت وراه لحد ماوقفها للسياره امام بيت ونزل دك الباب ثواني ونفتحت ودخل هو...

ترددت بالبدايه بين انزل وادك الباب بين اراقب للنهايه حتاريت

بالنهايه قررت انزل واواجه قدري وشوف شنو ضامتلي الدنيا......

نزلت وتمشيت ببطئ دكيت الباب دقائق ونفتحت الباب كانت مره تطلع منتصف الثلاثينيات
مكياجها كان كلش طوخ ودشداشه لون اوف وايت تعتليها مداليه ذهب كبيره شعرها فالتها ولونه كان اشقر ذهبي وتعلج وكفت تخوصرت كالت تفضلي حتبقين صافنه بوجهي

ممكن افوت للحمام

- نيالي....  فوتي عيني فوتي

فتت وعيني يمنه يسره اريد اشوف ادم
اشرت على الحمام كالت هنا فوتي

فتت وبقيت واكفه شنو اسوي هاي معرفتني يمكن مو زوجته او زوجته ومتدري
تأخرت ودكت الباب وينج

- لحضه

- تاخررت بعد شويه وطلعت كتلها

ممكن مي

- مي نوب

- سكتت وهي فاتت جوه ورحت وراها فتت من الباب الثانيه جانت على الاستقبال فتحتها وفتت

توجهت بسرعه للغرفه
وارجف گلبي يدك بسرعه  فتحتها

وشفت ادم كاعد بالغرفه اول ماشافني وكف على حيله
سديم....  انتي شجابج هنا

- نزلت دموعي بسرعه همست ليش

- عصب وصاح بوجهي وانتي شجااااااابجججج

- اجت المره تركض باوعتلها وباوعتله واابجي

اجه عليه بقوه ولزمني من زندي شطلعج من الكليه شجاااابجججج

- اجيت اشوف الي دايصير من  ورايه

- تكلمت بااستهزاء ومربعه ايدها

هي هاي مرتك عشتوووو

- باوعتلها وهو كال امشي

ماامشي قبل مااعرف هاي منو

- امشي كتلج

- منو هاي

باوعتله كالت كللها منو اني

- سكتي تقى

- تقى.     هاي تقى

- حجالج عني لازم

امشييييي

- شتصيرللللك.  

- ماتصيرلي شييييي

تقى- شنو مااصيرلك شي اني ويا نحب بعض وقريبا حنزوج

- باوعتله و دموعي تجري  عتني من ايدي ورحت ويا 
صعدت بالسياره وهو صعد وسدها بقوه وحرك سيارته بسرعه بدقيقتين وصلنه للبيت

نزل ونزلت واول مافتنه تكلم

شجابج ست شطلعج من الكليه

- مارديت

- جايه تراقبيني انتي الرجال لو اني شلون تطلعين واني ماادري

- مارديت

-  احجيييي

- وجاي تكلي شطلعج؟

وتراقبيني؟

من حقيييييي

انت صارلك فتره تكذب اااادم

- اني كذاب

- ايييي تكذب عليه تكلي ماعندي شي وكطعت كل علاقاتي تاليتك وياها بعدككك

- بكيفي اسوي الي يعجبني متمنعيني انتيي

-طول مااني زوجتك الي احترامي ومن حقي امنعك
اني هنا مو للخلفه والكراب وحضرتك مخليلك كم وحده للمزاج

- انتي عليمن تنترين وتراددين

- هذا حق مو ارادد

-المطلوب شنو ست

- منو هاي وشنو علاقتكم

- صاحبتي

تتركها

- سكت

- ادم اذا تبقه بهاي علاقاتك اني وياك كل واحد بطريق

- انتي شنو تهددين

- شلون متحسبها احسبها

ولج اني ماااتهدد ادم اني ادم
بكيفي واسوي الي يعجبني ودام طلعتي وتراقبين ورايه لااعاند واسوي الي اريده يعجبج بعجبج مايعجبج يطبج مرض

وعافني وطلع سد الباب بقوه وراه

خذلانه الي جان كلش صعب
هو هذا الي تزوجته وردته يكون الي عون بس اني استاهل اني الي قبلت بي رغم مساوىه
لميت ملابسي ورحت لبيت خالي طول الطريق الف فكره اجت براسي وذكريات وخيبات والم
مرات تنزل دموعي وانتبه سايق الكوستر ينتبه لمن ابجي لهسبب اكابر وامسحها بسرعه
شريط ذكريات يمر عليه

ذكرياتي الأليمه منين ابديها من طفولتي القاسيه
عشتها بحرمان بألم 

بحسرة ام واب يحتوني

بدايات طفولتي كنت اعيش  اني واختي مريم مشتتين  بين بيوت خوالي
يوم هنا ويوم هناك  تذكرت مرت خالي وهي تسولفلي عني وعن مريم..

جنتو صغار وحده تحب الثانيه  مرات تكونين نايمه مريم جنه اذا ننطيها شي جبس او بسكت ماتاكله الا
لما تكعدين وتاكلوه سويه
جنتو تنامون وحده يم الثانيه
وتلعبون سويه
وابد مااسمعكم تتعاركون مو مثل جهالي
حتى مرت خالج منار مره كالت

دباعيهن شلون وحده تحب الثانيه جهالنه شكد نعلم بيهم ونربي ماكو فايده

والي ماعدهن ام تربي متربايات صدك كلشي قسمه وحظ

مره وكعت مريم ونجرحت وانتي بقيتي تبجين عليها
حتى بعد ماخفت جروحها صرتي تخافين عليها
وتصيحين اوااا

تاليتنه اني ومريم كل وحده بدنيا الله اعلم هي هسه عايشه ميته وين هي
وشنو تسوي شلون تمشي حياتها

هم متزوجه...  لو لا

بين عاىله لو لا

عايشه لووو
ومكدرت اكملها بجيت

وصلت بيت خالي دكيت الباب ك العاده تتلكاني مرت خالي هله هله بنتي سديم

ولما وكعت عينها على جنطتي اختفت ابتسامتها

هاي شنو

شنو هاي الجنطه الي وياج

- اني وادم خللص انتهى كلشي

- شنو شتحجين

بجيت متحملت حضنتني وكالت

يمه سديم ليش شنو الي صار

عين وصابتكم جنتو عصافير حب

- فتنه جوه
وكعدت تسأل على الي صار وسولفتلها

-  وجامعتج شلون

- هاهيه هاي السنه اصلا مفتهمت منها كلشي جامعتيش

لتنقهرين وعيونج ميلكه ظفرج 
ليجي وليتوسل وانتي الي راح تردين اعتبارج
يله كومي غيري ملابسج شلون دولمه حامضه مسويه تلوك لهل الحلك كومي

- ابتسمت وكمت غيرت ملابسي وغسلت
خلت مرت خالي الخبزه بالصينيه وگلبت جدر الدولمه
ولما شالتها جان منظرها يفتح النفس

- دكلي سديم شوفيها شلون دولمه لتنسيج القهر مال ادم

- ابتسمت مجامله وتغديت وياهم

وغسلنه مواعين وشربنه الجاي
عادات روتينيه اعتياديه تتعايش والي بيك يهدم جبال
مرت ايام وجنت كل ليله ابجي وهو لا اتصل ولا حتى اعتذر على الي صار
سمعتني مرت خالي  بالليل ابجي اجت

سديم تبجين شبيج

مابيه خاله

- ليش يمه ليش تسوين بنفسج هيج

- لعد فوك الي سواه حتى مااعتذر ماحسسني الي قدر عنده ليش هيج

- اتركي ووصدكيني يجيج ويعتذر بس هسه يكابر

- شتركه خاله متكليلي

- حقج بس خو متبقين تبجين تعالي بحضني اقرالج
واحصنج بالقران بنتي

خليت راسي بحضنها على رجلها وصارت تقرالي وتمسح على راسي
ايات قرانيه ومن ضمنها اية الكرسي جانت تقره..
بسم الله الرحمن الرحيم...

الله لا إله الا هو........ 

وصلت (( وَلاَ يَؤُودُهُ حِفْظُهُمَا)) 

خاله شنو معناها داىما اسمعها

- معنى ولايؤودٌهٌ... أثقله

جاء عن الشيخ الشعراوي رحمة الله عليه انه معنى ولايؤوده اي اثقله

وحتى ابسطها الج اكثر
مثلا هسه انسان يكدر يشيل عشر كيلوات
من حنزيدها عشره حتصير عشرين مراح يكدر يشيلها الا بإنحناء العمود الفقري ولو زدناها عشره حتصير ثلاثين ولو شالها يمكن يوكع من فرط الحمل الثقيل

ومعنى ولايؤوده حفظهما اي لايثقل على الله حفظ السماوات والارض
احنه السماء والارض مكدرت العين توسعها يعني
تشوفها كلها لكن وسعها الكرسي الرباني
الله قادر على اتساع واحتواء وادارة هذا الكون العجيب

سديم-- سبحان الله
الله على كلشي قدير

وانتي كلتيها الله على كلشي قدير يكدر يابنتي يغير حال ادم من حال الى حال
هو فاسد وبلا دين وخلق تكدرين انتي تغيري
يابنتي المره تغير الرجال

الا هذا خاله مشفت مثله

- مجربتي لو مجربه يتغير

- وهو وينه سعيد بلي دايسوي حتى الي ماعبرني واجاني

- اصبري بنتي اصبري

- من هو هذا الشيخ الشعراوي

هذا شيخ مصري اسمه محمد متولي الشعراوي
عالم دين ويعد وزير الاوقاف المصري
اشهر المفسرين معاني القران الكريم
بطرق مبسطه ومحببه للمسلمين كدر يدخل ويأسر قلوب الناس ويحبون الاسلام اكثر

- يعني مثل الشيخ احمد الوائلي

- رحمة الله عليه..  اي مثله

-داىما احب اسمعله كلما اختنك واضوج احب اسمع الكلام الي يكوله ارتاح

- احمد الواىلي ميتكرر ابد  ..  احنا البشر نحتاج تطهير للنفس هذا التكهير يجي لما تستمع لكلام يريحك نفسيا الاحتواء الديني الرحمه الربانيه الي تغمرنه وقت مااحنه نسمع لكلام يقربنا لله عز وجل اويصبرنا على ابتلاءات الدنيا او يخلصنا من هوسة الحياة نفسيا تلكين نفسج خفيفه وكأنه ملائكة الله
حفتج وازاحت همومج

ياسديم الله مينسانا ابد...  حتى لو احنا نغلط ونسوي اشياء يمكن تغضبه بس لما نرجعله نادمين يحتوينا
ادم لو تقرب لله بقلب خاشع ونادم
الله يفتحله باب التوبه

تعرفين التقرب شلون لازم يكون

- شلون

- يكون انه المؤمن يتعبد الله كالعاصي
والعاصي يتعبد الله كالمؤمن

- جميل

- لهسبب ابد لاتكولين هذا سيء بيا وجه يقابل ربه لتنسين الله نطاه يوم جديد بالحياة معناها ابواب التوبه مفتوحه

- ابو طبع مايتغير

- اقوال احنه افتعلناها....  هواي فنانيين كانو يجهرون بالمعصيه وتابو وهسه صارو احسن الناس

- صعب خاله صعب مشفتي الي اني شفته

يعني

ااااخ
اني صوجي

صوجي اقبل بي

واحد زاني.... شارب للخمر....  شلون اقبل بي

- يمكن الله خلاج بدربه تهدي
هو متغرب عن اهله
وكان شاب اعزب والوكت هذا وكتنه اغبر
واكو نسوان اعوذ بالله منهم توكع الي ميوكع
احجيلج سالفة هاروت وماروت
حتى تعرفين ليش الله يسامحنه

هاروت وماروت كانو ملاىكه
الله سبحانه وتعالى انزلهم للارض يختبرهم هل هم يستطيعون الصبر على ملذات الدنيا
لان هم كالو احنا نكدر نصبر

فلما نزلو للارض بهيىة بشر وكأنهم بشر لكن هم ملاىكه في الاصل
هذوله اجاهم الشيطان بهيئة إمرأه جميله جدا فاتنه
مغريه فأثارتهم ورادو يعملون وياها الفاحشه لكن اشترط عليهم انه يحتسون الخمر
واحتسو الخمر بعدها كالت الهم اسجدو للصنم
سجدو وفعلو الفاحشه
لما صحو من سكرتهم وعرفو شنو سوو
رادو يصعدون للسماء لكن ماكدرو يصعدون
بعد لان الله غضب عليهم فطردهم من رحمته
تقول الروايات انه الله خيرهم بالعذاب
عذاب الدنيا ام عذاب الاخره
فاأختارو عذاب الدنيا

- ليش

- لان هم شايفين عذاب الاخره مؤلم فاأي عذاب غير عذاب الاخره يكون اهون

فعاشو في بئر في بابل
وعقابهم كان أنه يتنفسون دخان اهل الدنيا
يعني مو اوكسجين

دخان

انتي تخيلي تكدرين توكفين بدخانه لثانيه وحده

- لا مستحيل

لكن هم عاشو هيج
لهسبب يابنتي الارض ماارادت اانه بني ادم تخلق من طينتها

-شلون يعني

- لما اراد الله ان يخلق البشر وهو اول الخلق ابونا ادم
اوحى الله للارض الملك جبرائيل انه يقبظ قبضه من الارض يعني ياخذ تراب

فكالت الارض لجبرائيل...  اقسمت عليك بالذي بعثك لاتأخذ من تربتي

ف لان اقسمت عليه..  صعد جبرائيل للسماء ومااخذ

ولما اوحى اسرافيل اقسمت عليه ايضا
فرجع للسماء اسرافيل

ولما اوحى عزرائيل اقسمت عليه هو الاخر
لكن كان رد عزرائيل

( وأنا لاأعصي امر ربي...  ف أخذ قبظه من الارض وصعد للسماء...  لهذا السبب وكله الله عز وجل في قبض الارواح)

معلومات حلوه خاله والاخيره صدمتني

- طاعة الله اوجب من كلشي يابنتي

- زين شنو اسوي هسه

- لاتبادرين لان هو ممبادر
فااريدج ترجعين للكليه مالتج وهو ماله حق يمنعج

- ارجع

- اي تروحين وتداومين وتعوفي صارلج هنا كم يوم وهو ولا اجه ولااهتم

- يعني تشوفين هيج عمه

- اي

حنتظر يومين نوب اذا مااجه اروح واداوم

هاهيه الي تشوفي

اذن الفجر كومي نصلي

- سهرتج وياي خاله

-لا بنيتي عادي امشي نصلي

- فرشنه السجادات ووكفنه نصلي وي صوت الاذان وهدوء الليل يقشعر الجلد

صلينه وكملنه واتجهنه للنوم اخيرا
ثاني يوم ندكت الباب
جانت الدنيا ظهر فتحتها للباب ومن دون ماابين وكفت وره الباب كلت منو

العفو ابو البيت اذا موجود

- لا والله

- الحجيه

- اي موجوده ثواني

- لبست خالتي العبايه وطلعت

وكفت اسمعهم من وره الباب

انه سألت على بيت اللواء سعد كالو هنا بالمنطقه هاي

- اي جيرانه جانو

- وين هم

- سافرو خافو على اطفالهم وسافرو

-معرفتو وين راحو

- لا

- العفو خاله بيت منو انتو

بيت ابو حسن

سمعت نخطفت وحده من المنطقه ولهسبب سافر اللواء

- اي.....  وصارت تبجي....  اي بنتنا مريم تؤم اختها سديم جانت صغيره سوده عليه... 

- ومالكيتوها

- لا

- واختها وين عايشه

- ويانه

سكوت لثواني.....  بعدين حجت

- انت شتريد من اللواء وتسأل

- مااريد منو شي بس اجيت عليه بمصلحه
ماشي خاله اترخص

- غالي وليدي

- فاتت خاله جوه وتمسح بشيلتها دموعها

-  منو هذا الرجال خاله وليش هيج اخذ معلومات وراح

- يامعلومات بنتي جاي يسأل على بيت اللواء سعد

- اي وشذكره بي شدراه رايدين يخطفون بنته

- تلكي سامع من اهل المنطقه

-مبين غريب ومو من اهل المنطقه لهجته تختلف

-سديم لتكبرين الموضوع اللواء سعد معارفه من شمال العراق لجنوبه
بس سوده عليه مريم ورجعت تبجي

سوده عليه يايمه لو بس ادري وين صفه بيج الدهر وين صرتي

والله الموت اهون من هيج فراك

على الاقل اكو گبر اروح ازوره ابجي عليه اذب حرگة گلبي بي

ياسواد وجهي من امكم شراح اكلها لو متت وسألتني عليكم
شگلها ضيعت وحده من بناتج
والله اعلم بيد من صفت وصارت

لو بنتج الثانيه الي نجبرت تتزوج من ضيق الحال

الشكوى الك يارب

مسحت دمعتها وكالت اكلج سديم نسيت اكلج
كالتلي جيرانه ام محمود اكو ناس اهلها ماتو بزمن صدام ونطوهم فلوس ورواتب

-ههههه وانتي تصدكين بهاي الامور

-اي لان يعتبرون متضررين النظام السابق

- خاله الله وكيلج روحي وتعالي من دائره لدائره وهاهيه خليني هسه بضيمي

- مثل مكتلج رجعي داومي حتخسرين دراستج

-باجر حروح.....

حضرت ملابسي ورحت للاقسام وي البنات وصرت اداوم جامعه واروح واجي

كاعده بالجامعه وصافنه على الطلاب الي يقره والي يسولف شباب وبنات بااول عمرهم والحياة الهم

بلا زواج وهمومه ويعيشون بظل ام واب

كانت امس خالتي هيجت اوجاع السنين

للحضات تخايلت لو اني ومريم هسه هنا 
تدرس وتروح وتجي

احجيلها الي بگلبي وتحجيلي الي بگلبها

بس الدنيا استحيفت حتى  الحلم والضحكه

توجهت حتى اروح للاقسام صادفني رجل

- سلام عليكم

- عليكم السلام

- انتي اخت مريم

- اي اختها  منو انت ومنين تعرف مريم

- اعرفها لااختج مريم

- فزيت....  شنووو تعرفها.   منين تعرفها وشلون ومنو انت

- الكلام مو مال نكعد هنا ونحجي تكدرين تجين وياي هاي سيارتي واسولفلج

- لاامااكدر اصعد وياك

- مو ضوع مهم والا مااكلج
عموما مو مشكله نكدر نكعد بحديقه عامه  او وين تحبين

- اكو هنا كافتريا قريبه نكعد ونحجي

- براحتج

- كعدنه ونحجي

- انت نفسك الي اجيت لخالتي قبل ايام

-اي جنت رايد اتاكد انتو لو لا

- منو انت ومنين تعرف مريم

- مو مهم منو انه خلينا نحجي بالمفيد

- شنو هو

- اختج مريم موجوده واعرفها وين

- فزيت بدهشه...  شنو وين هي بيا مكان اخذني االها

- انتو متروحولها هي تجيكم

-شوكت شنو ليش وين هي

- هلى كيفج أهدأي

مريم تعيش بمنطقه والي خطفتها عصابه هي ربت وكبرت بنصهم لهسبب صعب تروحولها

- نعصر گلبي من عرفت وشلون حالها

- زينه هي

- انت شلون عرفت

- مو مهم شلون عرفت بس وكت مااجيبها تطلعون مستمسكاتها الي تثبت هاي البنيه بتكم علمود القضاء من يدخل متنحكم اختج بالاجرام هي عاشت وياهم وحتدخل بقضايا هي في غنى عنها

- اي اي ماشي

- اروح انه

- زين رقمك عنوانك اسمك  على الاقل

- بدون مايتكلم كتب رقمه وطلع

رجعت لبيت خالي مامصدكه اسولفلها لمرت خالي

- خاله مريم
مريم

-شبيها مريم

- خاله مريم لكيناها

- دكت على صدرها ببانفعال كالت
شنووو
شتحجيييييييين

- اليوم

اليوم

اجاني الي لكاها
عايشه خاله
عايشه

- وينها
ومنو هذا

- حيجيبها هو

- منو ولج اهدأي وسولفيلي

- اليوم اجاني واحد للجامعه كال انه هو يعرفها لمريم وكلي هي وين بس كال متكدرون ترحون لان هي يم عصابه

- وشلون حيجيبها

مادري كال خليها عليه

- منو هذا متعرفي

- لا
سكتت لثواني بعدين تكلمت
خاله هو الي اجه قبل كم يوم ايده بيها شي

- اي جانت مضمده

اي لعد هو نفسه هذا الي اجه وسأل

- يارب يكون فعلا كلامه وكون لكاها ويرجعها لمريم بالسلامه واني
اني ياسديم جان عندي امل بأنه حنعرف خبر عن مريم
راح يجي يوم ونعرف شي عنها جتى لو كانت ميته
الحمد لله عرفناها عايشه حتى لو وي عصابه

- برأيج. خاله وي عصابه
يعني شلون حالها تلكيها تربيتها غير تربيتنه
اطباعها غير اطباعنه
خاف متعلمه وحشيتهم وقساوتهم

- خاله شنسوي المهم لكيناها

الحمد لله
المهم لكيناها بعد ننتظر هذا الرجال شنو يسوي فعلا حيجيبها لمريم.......

- مريم.....

جان الضرغام بالمنطقه اجه من بعد غياب استمر ايام
حاوطوه جماعة الحجي والحجي على راسهم وكف تكلم

والله ونورت المنطقه ياسيادة النقيب.......

مهما اختفينا لابد ان نظهر ذات يوم
لابد لنا ان تكشفنا الايام
ان تحط رحالها عندنا
لنواجه مصيرنا.....

كنت معكم انا رغد الموالي في امان الله ♥