بعد الوصول إلى شركه محمد الشبرويشي
توبه : أستنا حضرتك هنا
محمد بيه: لا طبعا اطلع في مكان فوق تقعد في حتى لو ليك مزاج تشرب اي حاجه خد راحتك
توبه : أن كان كده يبقى نطلع بقا
محمد بيه: تعالى
في جانب آخر كان عرف الموظفين ب وجود محمد بيه دون علم منهم وبدأ عليهم حاله من اللخبطه
محمد بيه: توبه المكان ده مخصص للبريك وده مكتبي اقعد مع نفسك هنا لحد ما أشوف اللي جاي علشانه و. نرجع على المهندسين
توبه : تمام ماشي يا فندم
توبه : يا ولاد المدلعه كل دي مكنه قهوه اي العز ده
واحده من الموظفين : انت بتعمل اي هنا
توبه : انتي شايفه اي
الموظفه: ما ترد على أد السؤال
توبه : يعني ماسك فنجان ووقف على مكنه قهوه هكون بعمل اي بصلي المغرب مثلاً
الموظفه: اي ده الأسلوب ده أنت تبع اي
توبه : بقولك اي الله يكرمك أنا لسه أول يوم ومش عارف حاجه ولا فاهم حاجه اخلعي من دماغي و خليني اشوف البتاعه دي هتنزل القهوة امتا
الموظفه: انت السواق الجديد صح
توبه : اه البتاعه دي شغاله ولا لا
الموظفه: يا أخي حط الفيشه
توبه : اه والله عندك حق العلم نور برضوه
الموظفه: أنا هبه
توبه : وأنا توبه
هبه : توبه
توبه : اي مش حلو
هبه : لا ياعم حلو حلو المهم
توبه : اي المهم
هبه : خد رقمي
توبه : لا مش بالسهولة دي كده مش ههتم بيكي خليني اطلب أنا
هبه : تطلب اي وتهتم اي أنا بقولك خد رقمي وبعد كده لما تكون جاي الشركه مع محمد بيه اتصل بيا علشان نبقا عارفين
توبه : اه يعني عصفوره وكده
هبه : خلي بالك لو رفضت مش هتعرف تكمل معانا احنا مش هنسيبك انت حر
توبه : طب روحي شوفي حالك الله يكرمك
هبه : ياعم اسمع بس دا احنا هندلعك هيكون ليك مكافئة شهريه مننا على كده
توبه : كام يعني
هبه : انت عايز كام
توبه : مليون جنيه
هبه : انت اهبل أما احنا كلنا منعملش مليون جنيه
توبه : روحي ياستي الله يهديكي اشرب القهوه ولا هتوجعي دماغي
هبه : اسمع بس احنا كلنا أصحاب مع بعض يرضيك يعني تيجي على غفله حد مننا يطرد بسببك
توبه : اه يرضيني شوفي شغلك وانتي محدش يعملك حاجه إنما عايزاني عصفوره لو هتدفعي كام لأ
هبه : يعني كده
توبه : كده و كده وكده حلي عني
محمد بيه: توبه بتعمل اي
توبه : مش قولتلك مش هعرف اشرب منك القهوه الله يحرقك
محمد بيه: يابني
توبه : تحت امرك يا محمد بيه
محمد بيه: هات قهوتك معاك وتعالي
توبه : وسعي وسعي كتك البلاء والبلا
هبه : اهو انت
توبه : (بيخط على مكتب محمد بيه)
محمد بيه: ادخل
توبه : تحت امرك يا فندم
محمد بيه: اقعد ياعم مالك في اي
توبه : مش عايز اوجع دماغ حضرتك بس
محمد بيه: لا ياعم اقعد عايز احكي معاك شويه
توبه : خير يا محمد بيه
محمد بيه: أنا مش عارف اقولك اي والله يا توبه على اللي عملته مع مها وخصوصاً انك اخدتها عندك والبنت بصراحه شكرت في والدتك الست شفيقة وبرضه اختك اميره تعاملت مع بنتي معامله حسنه اي حد مكانك كان ممكن يستغل مها بطريقه سهله جدا وهيا كانت في أضعف حالتها
توبه : يا محمد بيه الواحد بيعمل لله بعدين دي زاي اميره اختي أنا لو اختي في نفس الوضع كنت هتمنا حد يقف جمبها
محمد بيه: مها كانت كلمتني عن موضوع السبع سنين حبس وبصراحه كنت فاكرك مش كويس وبتضحك على مها بس لما سألت ناس حبيبي عرفت انك فعلاً كنت مظلوم في الموضوع ده وعرفت كل حاجه
توبه : اضحك عليها علشان اي يعني يا محمد بيه عايزك تحط في دماغك أنا واللي زاي حلاتي مش بتوع هبش في الدنيا أنا باجي معاك سكه على الأبيض والله جيت معايا سكه مكمل معاك معامله والدنيا حلوه مش جايه معايا مش جاي معاك ومش هنتعامل مع بعض تاني
محمد بيه: يابني مالك أنا بتكلم معاك سخنت كده ليه
توبه : أنا بقول لحضرتك بس دماغي اي
محمد بيه: طب قولي حد كلمك في حاجه هنا ولا قالك حاجه
توبه : هنا فين قصدك في الشركه
محمد بيه: اه اصلي شايف السكرتيره وقفه تاخد وتدي معاك في الكلام
توبه : اه مكنتش عارف اعمل قهوه على المكنه
محمد بيه: يعني مفيش حاجه تانيه حصلت ولا قالت اي حاجه
توبه : يا محمد بيه هو أنا اعرفها علشان نتكلم عن اي حاجه
محمد بيه: خلاص أنا كنت بطمن بس مش اكتر
توبه : ولا يهمك يا محمد بيه
محمد بيه: أنا خلصت ياله نروح المهندسين
توبه : تمام ياله بينا
في جانب آخر
مها :ماما شفيقه يا ماما شفيقه
شفيقه : ثانيه ياللي على الباب
مها : اميره فين
شفيقه : جوه في الاوضه
مها : ماشي اميره
اميره : اي يامها عامله دوشه ليه
مها : بتعملي اي تعالي شوفي جبتلك اي بقا
اميره : لا طالما جبتيلي يبقا لازم اقوم
مها : تعالي علشان دا اختراع الموسم ونطلع الترند
اميره : فين ده
مها : اهو
اميره : الله الجهاز ده شكله تحفه دا موفر كهربائي كنت شغاله على فكره زاي كده والله بقالي سنه
مها : منا عايزه بقا اي تعمليله تطوير حلو كده بحيث أنه يخفف استهلاك اكتر ويكون سرعه اكبر بدال ما هو شبه مصيده الفار كده
اميره : وريني كده الجهاز ده
مها : خدي
اميره : ربنا يسامحني في الفكره اللي في دماغي بس أن شاء الله تنجح
مها : هتعملي اي
اميره : لالالا سبيني اخد و ادي مع نفسي كده شويه وهقولك
في جانب آخر
محمد بيه: علي فكره أنا سمعت اللي حصل بينك وبين هبه
توبه : طب كويس أن حضرتك سمعت علشان تصدق أن مفيش حاجه حصلت
محمد بيه: بقا يا راجل تقولك خد رقمي علشان تنبهني انك جاي مع محمد بيه وتقولي مفيش حاجه
توبه : لا كده يبقا سمعت فعلاً
محمد بيه: والله ما عارف اعمل معاهم اي تاني علشان يتعدلوا
توبه : أطردهم اسمع كلامي يا محمد بيه دي ناس مش تمام
محمد بيه: وبعدين يا توبه بعد ما أطردهم
توبه : اقفل الشركه وفكك من الموضوع ده بلا فرهده وكل شويه رايح اكتوبر وراجع من اكتوبر
محمد بيه: يالهوي على دماغك يا توبه هو ده اللي جه على بالك
توبه : طبعاً يا مدير هو أنا ناقص وجع دماغ
محمد بيه: بس كده مش هيكون عندك طموح
توبه : أن شالله ما كان عندي طموح قال طموح إلا (وبيضحك)
محمد بيه: هو انت معندكش طموح يا توبه
توبه : والله يا محمد بيه أنا من ٢٠١٩ وأنا مش فاهم حاجه نفسي اقعد مع حد كبير يقولي اللي حصل في حياتي من ٢٠١٩ لحد الوقتي علشان أنا حاسس ان مصر حوراتها كترت اوي الفتره دي بصراحه
محمد بيه: يعني قبل ٢٠١٩ كان عندك طموح
توبه : اه طبعاً
محمد بيه: اي هيا
توبه : كان نفسي اطلع بيه كبير كده زاي حضرتك
محمد بيه: والوقتي
توبه: نفسي اطلع من اللي أنا في وكده يبقا اتعشت على الآخر
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!