السلام عليكم
طوفان رجل
الاخير part one
قُل لي.. لماذا أختَرتني
وأخذتني بيديكَ من بين الأنام
ومشيتَ بي.. ومشيتَ ثم تركتني
كالطفل يَبكي في الزحام
كالت جذبت علئ امي اليوم
كتلها اخر يوم بس اروح اودع صديقاتي وارجع واني جيت انهزم بس خفت حيييل وجيت الج هنا.
لطمت خدي ليش تنهزمين ولج شكوو
كالت درة يردون يزوجوني لعادل اخو رنا.
فتحت عيوني مصدومة تحجين صدك ?
ردت اي والله وهو همجي كايل لرنا ابطلها ماعندي وحدة تكمل دراسة
درة اني خايفة شلون ارجع عفية والله خايفة هم كعدوني بالبيت فعلا وع الاساس الجمعة الحفلة بس اني متدمرة والله متدمرة حرفيا كوليلي شسوي تعبت من الضرب والعذاب انت تدرين اني شكد تعبت علئ نفسي شكد درست وسهرت وتعبت الئ ان وصلت لهاي المرحلة.
ظليت اتحسب حسبي الله ونعم الوكيل هذا ابوج ليش هيج يسوي بيج.
ابويه يسمع كلام عمو حامد شنو يكوله ينفذ ولمن اجه عادل خطبني رفضت وكتلهم ماريده جبير وهماتين كايل يبطلني من الدوام كرهته مااطيق اتزوجه مستحيل درة حبابة تعبت شسووي اعرف اذا يلزموني هسه والله يدفنوني واني عدلة شسووي درة.
جانت تحجي وتبجي هسه بالله عمو حامد منتهين من يمه بس عمو فلاح شبي مو درست ونجحت وطلعت طبية ورفعت راسك مفروض تفتخر بيها ليش هيج يريد يدمرها ويكسرها.
طلعت من المشتمل وتوجهت لاحمد جان هو والجهال يلعبون طوبة بالحديقة الاضويه مفتوحة والدنيا صارت ليل.
هو شافني اجه باتجاهي وكف متخصر ويلتقط انفاسه
كال ها حجت شكالت شبيهه؟ حجيتله عنها
كال هي شنو تدرس
كتله طبية ماشفت اللابكوت ااالابيض بيدهه
رد بصدمة هاااي تدرس طبية
جاوبته اي مرحلة اولى وهي كلش هواي ضغط عليهه كوة كوة لو ما فيصل حاجاهم يله خلوهه تكمل ومعدلهه عالي حرامات
كال ديله صيحيهه اوصلهه اني ومااخلي احد يحجي وياها
كتله روح كول لفيصل هم يخافون منه وكلمته ماشية عليهم
كال شبيج هم عمامج من منو مايخافون اشو يخافون من خيالاتهم دصيحيلهه واني احميهه واكوللهم جانت ويايه اني وصلتهه الج
ضحكت كتله اي بلكي يزوجوهه الك هم هي تكمل دراسة وهم انت تنفتح العقدة مالتك
صفن شوية كال مدام هيج خلي فيصل يحلهه
كتله شنو ماناوي تطلع من الحالة الي انت بيها كافي ارحم نفسك شويه شوف حياتك
قبل مااكمل قاطعني كال الله وياج الله وياج اخذي زعاطيطج وفوتي يم بت عمج وسدي الباب الوضع مو امان
يوسف كال اني مو زعطوط اني زلمة
لزمه ظل يفرك بوجهه ويشاقي
وبعدها مشئ يريد يروح كتله وووين احمد تعاال كمل جميلك وخابر علئ فيصل خلي يحاجي عمامي
رجع كال شنو انت متحجين وياه ? لهالدرجة درة.
جاوبته اي يعني بس مااطلب منه شي بعد كرامتي وكبريائي
كال ايباااه ديله بله اني راح اخابره واحاجي.
سلم وراح واني اتصلت بوليد وحاجيته
كال جاي يدورون عليها وكالبين الدنيا
كتله دير بالك يأذوها عفية بامانتك
كال مو خوش سالفة ليش هيج سوت مو هيج تنحل الامور
هم ماتركوا الهه اي خيار ثاني بعد
كال جايين والله كريم
ووراها فيصل خابر وحجه ويايه
كال ليش مشغول!
كتله خابرت وليد عمود رسل
كال واني ليش اسمع من احمد ليش ماخابرتي انت
شنو درة شسالفة
كتله البنية خايفة وهسه اكيد عمامي معصبيين عليهه ياريت تستعجل
تنهد وكال وقابل انتظرج اني فعلا حاجيتهم وهسه هم جايين الج بالطريق.
كتله وشون خاف يأذوهه البنية خايفة حيل ومتوترة مو المفروض انت هم تكون هنا.
كال اني هم جاي وسد التليفون ومبين جان معصب
خليت التليفون علئ الطاولة ورسل تباوعلي ميتة من الخوف.
رحت كعدت يمها لزمت ايدهه كتلهه لتخافين فيصل يحلها
كالت وهي تبجي شنو كالج عمو فيصل
كتلها جايين عليج هسه
ظلت تنكت من الخوف لزمتهه اهدي بيها
لتخافين رسولة شبيج وليد اكيد وياهم وامج متعوفج محد ياذيج وهماتين فيصل راح يجي ياخذ منهم كلمة محد يتعرض الج ولا يفرضون عليج شي ولا يجبروج انت ممسويه شي غلط جايه لبيت بت عمج هم الي غلطانين بحقج
ظلت تمسح بدموعها وتناشغ انت تكولين هيج بس هم تعرفين شنو تفكيرهم مو غريب عليج
اندكت الباب حضنتني وتبجي
كالت اجوو درة اجووو شلووون.
كتلها اهدي اهدي هذا فيصل واخذتها فوتتها بالغرفة
بينما فاتت هو فتح الباب وفات ويكحكح يعلن عن دخوله.
انعصر گلبي لمجرد حسيت راح اقابله واتذكر هواي شغلات حلوة بيني وبينه ياريت ماصارت حتئ لاينعصر گلبي كل هالعصره واتأذئ ونار تاكل بكلبي .
وصار گبالي واجت عيني بعينه والمشاعر ماكدر افسرها
وكفت كدامه بدون كلام ومبين معصب لان مااطيته خبر
كال درة وينها رسل جيبيها وامشي للبيت الجبير عمامج جايين.
كتله وميجون هنا شنو يعني.
فتح عيونه مصدوم ومعصب من اجابتي
درتله ظهري مو بيدي من اشووفه اتمنئ بس اتعارك وياه املخه اضربه ومااعرف شسووي بي اكثر.
كال شبيج درة من كل عقلج يجوون هنا شبيج انت ماتفهمين الكلام.
وكفت صفح وباصرار وانتر كتلك ماادخل لذاك البيت وهي بي اني.
عاط بعصبية لعد جيبيها وووينها
اجت رسل خايفة حضنتني كالت درة لتعوفيني
حضنتها واباوعله معصبة واخووزر.
صوت سيارات دخلت للكراج وبهاللحظة رسل عافتني وراحت تستنجد بي.
عمو فدوة لاتخليهم ياذوني
ظل يهدأ بيها هو بس عينه عليه
نظراته تاكلني اكل بس معصب حيييل.
انعزلت عن كل شي حواليه وتذكرت من سعئ بدوامي بالكلية اول مرة ومن جنت اصيحله عمو
ومن بين كل هالذكريات تذكرت جدي.
اخخ جدي شكد حياتي فارغة ومالها طعم بدوونك
شكد افتقدك بكل شي وبكل لكمة اكلها وبكل نفس اجره اشهكه وازفره.
وطبوا عمامي للبيت اول مرة من بعد سنين يجون
ومن فترة طويلة ماشايفتهم ووليد وياهم
يباوع عالمشتمل ويباوعلي
ونظراته تسألني متفاجاة
معقولة درة عايشة هنا!
ظل فيصل يحجي وي عمامي بالساعات هم يحجون ورسل بيناتهم تبجي واكلت طن رزالة من ابوها وعمو حامد ويمكن لو ما فيصل موجود جان ضربوها.
واتفقوا ميزوجوها ولا يحرموها من دراستها بعد ضغط جبييير من فيصل.
اخذوها وديطلعون وهي بعدهه ما مأمنة
توسلت تبقئ يمنا علما تبرد السالفة خاف ياذوها هسه
لان خلتهم بموقف محلو وخافوا عليها كلش.
بس وليد وعد محد ياذيها.
يوسف جلب وي وليد ديروح وياه
كال مو باجر جمعة خلي اروح بس فيصل
رفض رفض قاطع ويوسف ضاج وعصب.
كلش قلقة من علاقتهم وضايجة
من فترة ماشفتهم مثل اب وابنه
كله يتناطحون بالنظرات وابد ميتوالمون
ماردت الامور توصل لهالحال ابد لازم الزم يوسف واحجي وياه.
وفعلا بليلتها حاجيته
ماما حبيبي ميصير هيج تعامل ابوك وتعانده وتباوعله بهيج نظرات وتخزر هذا ابوك ميصير
كال يوولي
فتحت عيني بصدمة وصيحت عليه وووولك يووسف
مااقبل افتهمت ماااقبل شبيك انت شبيك.
كال وانت شبيج تصيحين مو انت زعلانة منه وجايبتنه هناا بهذا البيت مو هو ضربج مو تزوج عليج.
حاولت وبذلت كل جهدي حتئ لا ابجي
كلامه شكد يعنيلي وشكد مبين هو كل الي
ديسوي هذا وياه ابوه ردة فعل وانعكاس افعاله
عليه.
يوسف طفل طفل بس هو وعئ علئ شي وسيطر عليه بحيث مايكدر ينسى او يتجاوز.
بقيت كل الليل احجي وياه وافهمه
ابوك مجبور يتزوج مابيده شي هو يحبني
واني زعلانة منه صح بس هالشي بيننا
علاقتك بي ملازم تخرب حرامات هو يحبك
صرت اكوله كلام اني ممقتنعة بي لدرجة حسيته قرا افكاري وافتهمني مجبورة وصار يجاريني هو همين.
سكتت عن الكلام وكمت سويت اكله بسكت وفوكاهه كريم وككاو وحبشكلات وشغلات يحبها وكعدنا نتفرج فلم
((ناني مكفي))
Nanny mcphee
فلم كولش حلوو ويضحك ومناسب لعمره
هو حسيته اندمج وظل يضحك على مشاهد الضحك وحتئ بعد الفلم تعلم كم كلمة انكليزية وصار يحجي بيها.
وللاسف كل الي بنيته بذيج الليلة اجه فيصل يوم ثاني وهدمه كله.
اجه معصب ويريد يرجعني للبيت الجبير
بحجة عمامج اشمتوا بيج من شافوج هنا
بس اني عاندت وهو معاند ومعصب وحاول يسحبني وياخذني غصب وصار الموقف عنيف كلش والجهال يبجون وبين كل هذا الي اني بي جان بالي يم يوسف ماريد تتعب نفسيته اكثر.
ماريد يوسف يصير نسخة من فيصل ماريد فيصل ثاني بنفسية هشية ومعرضة للامراض النفسية مااريد مااريد.
صررت اصررخ عليه بعلو صوتي وميهمني منوو يسمعني فقدت وانهارييت رووح فيصل رووح الهه وعووفني اني وجهالي عوووفني.
عاط ولازمني بقسووة لج ماابينااا شي مابييينا كتلج ماكدر ارفض لخالي طلب وجدي الله يرحمه مووصيني مااتفهمين هالكلاااام
وظل يصيييح شوون اثبت الج شلوووون لج اني طبت وتعالجت علئ،ايدج لاتمرضييني مرررة ثااانية لاتمرضيني
من شفتج علئ فراش المرض بالمستشفى دموعي ماوكفت لج بهذا عمري،وابجي عليج وانت ابررد من قالب الثلج
صيحت منوو وصلتي،الهالحال غيرك منوووو كااافي عوووفني لاتخليني اندمك والله تدري بيه كولشي اسوي عووفني كااعدة هناااا
صيح لااماعوفج موو اليوم ترجعين باجرر وبسيطة اني اعلمج.
انتهت الحرب الي اندلعت بيناتنا فجاة باستسلام فيصل وطلع من البيت بذاك اليوم تعبت حييل.
وراها بايام اجانه وليد ورنا وجهالهم رحبت بيهم ودخلوا للمشتمل.
يوسف من شافهم حييل فرح يحب جهالهم ويمووت علئ بنتهم الصغيرة اخذهم وراحوا يلعبون.
ضيفتهم وكعدنا نسولف ظل يسال وليد ليش انت هنا مو بالبيت الجبير.
الموضوع الي جنت مترددة احجي بي حجيت
كتله بعد ما تنهدت اريد ابني بيت بكاع ابوي واستقر بي.
كال شنو معنئ هذا انت تردين تنفصلين
هزيت راسي مااعرف ولااعرف ردة فعل فيصل من قراري هذا بس اريد تسعى الي بهذا الشي ولو انت مشغول بس احمد هم راح احاجي يساعدك حتى لان هو ماعنده شغل.
كال أأايدج وزين تسوين وشجعني بالفكرة بس اني خايفة من فيصل ورغم هذا مصرة اخطي هالخطوة.
راحوا واخذوا يوسف وياهم ومن اجه فيصل وماشافه كلب الدنيا وراح جابه فعلا الحياة وياه صرت مااطيقه صرت مااعرف ليش عايشة يومي وقررت ابدي حياة جديدة وقررت انفصل عنه
وراها حاجيت احمد ماقبل وكال راح تفتحين عليج باب من جهنم وهم اذا ماكتيله راح تبنين بيت بكاع ابوج يتخبل لتسوين شي من وراه.
لعد بس هو يسوي كلشي من ورايه ولا حتئ يصارحني وهذا مر علئ زواجه اشهر ولا طلق ولاا ابد وبعدهه نسرين علئ ذمته صح تسافر بس هم ترجع للبيت الجبير ووياه.
جان هذا موقف احمد بالبداية بس الي صار بعدهه غير رأيه.
بيوم اجاني فيصل للمشتمل الجهال نايمين واني بس الي كاعدة.
حاول يتقرب مني بس اني رفضت بقووة وهو جن جنونه وعصبب وصار يصيح مابيني وبينهااا شيي انت شبيييج شبييج ماتصدكين شبيييج.
جاوبته بعصبية كتلك مااريدك مااطيييقك كاااافي كااافي انت ماتمل ماتشبع كااافي اعتقني وصلت لمرحلة كارهتك كاارهتك ولااكدر انسئ كااافي والله لدرجة لو تنام وياهه كدامي ولاااهتم لان كارهتك انت ولاشي بحياتي.
فتح عيونه علئ اوسعهم بصدمة
ولزمني من ايدي قووي وبعنف
سببلي وجع قوي
ومشاني وخلاني يم شباك المشتمل وكال باعي الي راح يصير خليج مراقبة.
الوقت جان بالعشرة بالليل والجهال ينامون علئ وقت وهو طلع يخابر وحرك سيارته وراح
رحت يم الجهال تمددت بس غير تغفئ عيني ابد ماغفيت
وراها سمعت صوت سيارته.
طليت من الشباك واشوفه فتح الباب لوحدة نزلت من الصدر جان شكلها استغفر ااالله وهو ينزلها عينه عالشباك مال المشتمل
هو كايلي من قبل مااسوي الحرام اتزوج زواج مؤقت
ومااعرف هالزواج شنو يفرق عن الحرام بقيت واكفة اباوع وبس وعيني بعينه
تبعته نظراتي واخذها صوب المكتب حسيت بقرف ورغبة بالتقيئ بس بقيت بمكاني عالشباك واسبح بالسبحة الي بيدي
احس عيوني تحجرت وكلبي ميت ورغبة بداخلي ماريده بحياتي
صرت اجبر نفسي اتخيله وياها حتئ اكرها واكرها اكثر.
تذكرت قبل خطوبة رزان دز عليه بالبيت الجبير واني لخاطرها رحت جانوا دازين اكل جاهز والجهال يحبون البيتزا رحت يمهم
فاتن كالت لفيصل يله ابو يوسف ورق
هو كل عرس مصاريف النسوان والولد والجهال عليه
شكد مايكون المبلغ
فاتن رادت هيج مبلغ وبعدها هشام هم كال مبلغ ورزان كالها الي تطلبي خلصهم وسال نسرين هم كالت مبلغ
بعدين فاتن كالت ودرة شنو ماتنطيها لو ماتحضر الخطبة
جاوبها ام يوسف تامر امر المبلغ الي تكوله وانطيهه ضعف
ابتسمت كتله تسلم
كالت يله كولي
كتلها انتي ليش مدوخه نفسج الي ردتي حصلتي واني وابو يوسف نتفاهم
كالت لعد شمعنه احنه عرفتي شكد راح نصرف
ابتسمت وهزيت راسي كتلها هنيال قلبج بس هيج اكولج
بيوم الخطبه وهوسه ودخلت اني وجهالي كلها
صفنت عليه اني جنت لابسه فستان اسود واحمر نص مخطط ونص اسود ساده وحزام احمر رفيع
والتوم لابسين قميص احمر واسود وبنطرون اسود ويوسف بنطرون احمر وقميص اسود واني حذاء اسود عالي وفاتحه شعري لحد وركي اسود فاحم واركز بعيوني بالكحل
دخلت والصور كلها تاخذ الي والجهالي
احمد كبالي كال شنو هاي بيت فيصل شنو الجمال الشايلي
هو نزل جان لابس دشداشة وعباءة بخيوط ذهبي والساعه والمحابس هيبه جان لابس غتره بيضه من نزل رفع راسه وشاف احمد ياخذ صور النه بالكامره ظل صافن ويكول ماشاءالله ماشاء الله شنو هالجمال يابه هاي شنو الجهال شطالعين
ركض ايهم كاله بابا شوف احنه كله اسود واحمر وانت مو مثلنا
كاله قيصر ولا يهمك بابا صاح جيبولي الغتره الابيض والاحمر حتى يقبلون اخذ وياهم صور
وفعلا بدل غترته واجا اخذ صور ويانه هوايه والناس تباوع
وتقرب وشاورني لاتنامين اريدج بهاي الملابس وطلع
باوعت لنسرين شفتها تراقب درت وجهي منها
اني كملت الخطبه وكلها راحت اخذت الجهال ورحت لبيتي بدلت الهم ونومتهم بغرفتهم
ونتظرته وصافنه ويانفسي اكول اني صدك كاعده انتظره واكيد علمود ينام ويايه اشتهاني ورادني واني لازم اكله حاضر وظليت افكر بين اقفل الباب لو انتظره تالي انتظرته.
ومن اجا على وجه ابتسامة مامصدك انتظره.
اني من يتزوج عليه مااخليه يلزم شعره مني لو يموتني
اني بالنسبه اله اهز هاي الثقه من مااصير على مرامه او ارفضه يتخبل ويقسي عليه
ويتاخد الزواج وسيله حتى يادبني حتى هاي الحبسه مالتي مايريد مخلوق يشوفني ملك بس اله الصراحه هو بالفراش زين مو رومانسي بس يهتم بمتعي ومن اريد اغثه اصير جامده يتخبل ويتعصب ويكسر الغراض
اجاني وفتح اديه يريد يحضني درت وجهي
كال تعالي
كتله مااكدر جانت نسرين بحضنك مو؟
كال لا والله هسه اجيت من بره عطشان لحضنج
كتله مااكدر لزم شعري يمسد بيه باديه نزلتها وكمت ابتعدت عنه
اجاني بسرعة لزمني على الحايط وخله اصبعين بنصهم صار بلعومي وضاع الهوا ووكعت وماادري بالدنيا شنو
و بس اسمع صوته يصيح درة فدوه اكعدي لاتسويها بيه درة اكعدي وغسل وجهي ياله صحيت
وجريت نفس شفته عافني وراح سجد يشكر ربه كالي الحمد لله الحمدلله كولشي مااريد منج بس اشوفج عايشه كدام عيني باسني براسي وطلع يركض.
اتذكر شغلات تخليني اتراجع بس يرجع ياذيني وافعاله تزيدني اصرار.
حجيت لاحمد علئ الي صار وهالمرة ايدني فعلا فيصل طوخها حيييل
واتفقنا ومن ورا فيصل تم كل شي انفرشت الكاع او بالاحرئ 100 متر منها واحمد ووليد هم الي لزموا كل شي العمال والخلفة.
ومرت الاشهر ومر علئ زواجه من نسرين تلث سنوات
وماعرف عن علاقتهم بس نادرا مااشوفهه كله مسافرة
شكد تدزلي مرة هشام تريد تحاجيني ارفض اقابلها وشكد تجي وتدك باب المشتمل ماافتح الهه.
وهو الظاهر ما طلقها عناد بيه
كل مرة يجي ويريد يجبرني ارجع للبيت الجبير واقفل واعاند ونتعارك عركة شكبرها وابقئ معاندة لدرجة علاقتنا خربت وكعائلة تشتت ماعرف الحكمة من هذا كله شنو
علاقة يوسف وابوه كلما الها تخرب فقط ايهم وادم يحبوه ويردوه وياخذهم وياه.
وحتئ المشتمل الي كاعدة بي تعبان وقديم وهو عناد همينه رافض يعدله النا.
وصار البيت بتلو ووراها هيكل.
واني كله افكر شلون ورا ميكمل البيت واروح للمحكمة واطلب الطلاق منه شلون .
وردة فعله والجهال ووووو وكوومة افكار مأرقتني ولااكدر اكل ولاا اشرب مثل الناس اذا مااغص
واجه اليوم الي حطم كل امالي وبدد كل هاي الافكار
دخل فيصل
جان معصب وبقمة غضبه عيونه الا شويه تنفجر هلكد ماحمرة وملتهبة.
شمر سفطة فلوس جوا رجليه وكعن تفاجئت
وتقرب مني وهو يصيح بعلووو صووته.
وووولج درررررة هيييج تسوووين من وررراي ولج شنووو زعطوووط كدااامج ماتتوبين انت.
جان كبل صار بيناتنا يوسف هنا عمره 13 سنة
بعدت يوسف خليته وراي خفت عليه فيصل ماينحزر من يعصب.
ومثل ماتوقعت عرف جاي ابني بكاع ابوي من الوارد مال ورث ابوي وبيومها كلب الدنيا وضربني وضرب يوسف الي جان يحاول يفكني منه وورا مخلص معركته كعد يبجي مثل الطفل وصارت دموعه تجري.
تردين تتركيني درة ناويه تطلكين مني
جنت ساكتة هاادئة وكارهته ومخليه يوسف بحضني وامسح علئ اماكن الي اجت بيهن صواباته والتوم كاعدين ويباوعون والدمع بعيونهم.
هنا اني بعد خلص قررت اترك العراق كله وماابقئ بي ابد اخذ جهالي واروح فيصل وحش ومو مال اعيش وياه.
بعدها عرفت مأذينه لوليد ومتعاركين وياه فيصل وهشام وعمار
عمار ماعليه عتب بس هشام حباب استغربت ليش خابرته وعاتبته ليش هيج وي وليد ومسوين عليه وليه وهو وحيد وابن خالهم
هشام كال وليد غلطان وانت غلطانة ومتيصير تخطين هاي الخطوة وتسوين كل هذا من ورا فيصل.
فيصل مافك مني يجي بس حتى يطلع الحركة بيه ومرت الاشهر الجهال مدارس واني منعزلة عن كل العالم
وانحرمت من جية وليد ورنا ومن الروحة الهم فقط شوكة تجيني تونسني وتسليني على هم الدنيا
فيصل شكد يجي يتوسل بس اني اسمعه كلام يكرهني بي ويطلع.
الحياة وياه صارت متنطاق وبيووم اجه وجبرني وتقرب مني بالغصب عجزت واني اقاومه ، بهالعمر هو وبهاي قوته.
الفجوة كلما الها تكبر بيناتنا والكره والحقد يزيد ومااعرف شلون تتغير هالمشاعر وكل يوم اكثر من الي قبله اقرر اتركه وللابد.
بس طلعت حامل وولدت ابني كرم وهالشي الي اخرني وبداخلي قررت بس يكبر شويه اخذه واطلع رغم اشوف فيصل شكد فرحان بي.
كبر كرم وصار عمره سنة واحنا علاقتنا من سيء الى اسوء
يجي يجبرني ارجع لحضنه وارفض جنت احاول ماابين هالشي للجهال .
صرت ماطيقه كارهته وماريد اشوف وجهه
خاصة من اشوفه وي نسرين بالحديقة
واتساءل وينه حبها لارشد ووهو وينه حبه الي وليش بقت على ذمته كل هاي المدة .
قررت اشررد وتواصلت وي عمو حسن وكال يسحبني واروح يمه وانسى فيصل وللابد.
لم كعدت يوم ثاني الصبح افتقدت اطفالي كلهم التوأم ماكو وكرم ماكو ويوسف جان يم وليد.
ادور على تليفوني ماكو متتت من الخووف لا يربي وينهم ممتعودين ياخذهم فيصل بدون مااعرف اني لازم يبلغوني.
واستغربت تليفوني ماكو رحت للباب مقفوولة من برااا شسووي ياربي شسوووي وليش هو هيج جاي يسووي ليششش.
اروح للشبابيك افتحها اريد اشووف احد واسأله ماكوو احد.
ظليت اكل بروحي اكل ، سكتت الك هواي يافيصل هواي
من فترة اني متواصلة ويه عمو حسن اصلا هو ماكطع مني كال اسحبج يمي بس ولادة طفلي كرم اخرت كل شي
ردت اشرد واروح وانهزم منه رغم انقهرت على الجهال شلون احرمهم من ابوهم مااكدر ابد مااكدر.
خاصة التوام متعلق بيهم حييل وهم يحبوه وكرم بحث اخر يموت عليه ولاعبالك فيصل الي جان رافض يخلف ومايريد أطفال
من يسافر احسهم مقهورين ومشتاقيله ويخابروه ويحجون وياه على طول اليوم
بس هسه مدام هو سوا بيه هيج واخذ جهالي مني لا والله اسويهه واكدر يتدلل فيصل الا ابجي والله.
وراها بقيت احرك برووحي حرك ومعصبة يوسف جان يم وليد بوقتها بس التوام يمي وهو اجه واخذهم بغفلة مني اني ام سيئة شلون ما حسيت عليه ياخذهم شلوون !!! اصلا كرم كله يمي معقولة مايرجعهم .
مر الوقت وهم ماكو وصار الليل وهم ماكو
بعدها اجه لوحده وجان مبتسم تظاهرت بالبرود
وسألته وينهم فيصل
كال بالحرص والصون شعبالج ااذيهم اني هذا ظنج بيه لو شنو ؟
كتله بجمود رجعهم فيصل لاتخليني اطلع الشيطان الي بداخلي.
رد بشرط ؟
جاوبته شنو ؟
كام وتقرب مني همس مشتاقلج
هزيت راسي برفضض
كال والله مشتاقلج للصبح هم يمج والله
كتله ماكو ماااكو فيصل كارهتك كااارهتك
كال لعد ترجعين للبيت الجبير والبنية نسرين مالج علاقة بيها وهي أصلا كله مسافرة يم اهلها
ابتسمت باستهزاء مو على اساس زواجك منها مؤقت ؟
كام وتقرب مني قاومته بس حسيت روحي ضعيفة
مو لان اريده بس اريد فعلا اطفالي واريد اعاقبه هلمرة
كوة مر الليل عليه واجه الصبح جان نايم
بس اني مانمت
اول ماكعد كتله وينهم
رد لبسي وامشي وياي
سالته وين ؟
جاوب مو تردين اطفالج!!!
هزيت راسي ورحت لبست ورحت وياه ووصلنه لبيت المزرعة القريب من بيت جدي .
وتتهيج الذكريات من اوصل لهاي المنطقة اتذكر جدي وايامي وياه احس صوته باذني من ينطق اسمي من يضحك طيفه المحه بعيوني حتى يتخيلي اشم ريحته الماشبعت منهه.
وصلت للبيت واشوفهم التوم هناك ويوسف وكرم موجودين ويمهم احمد ونسرين بحضنها كرم وتلعبه
ركضت اخذت كرم و حضنتهم ودخلت جوى
عاتبت احمد بعيوني وهو باوع لفيصل.
انطاني تليفوني وكال شنو رايج نعيش هنا احنه كلنه كعائلة ونرجع سوى
سكتت ماجاوبته بس سؤال بداخلي معقولة حتى نسرين ويانه !!
باوعت يوسف مبين من عيونه تعبان ومعصب والظاهر هو جابره يرجع
هو يوسف اخر مرة راح وي شوكة اجت تزورني وجلب وياها ومن عرف فيصل وهو مانعه يروح لبيت وليد تخبل وعصب وعركة كالعادة ووراها اخذهم كلهم وجابهم هنا.
دخلت للمطبخ اجه ورايه احمد
كال والله عبالي انت هنا وياهم مادريت بي ماخذهم منج
وكلي ابقى يمهم اجيب درة وبقيت.
هزيت راسي بس ساكتة مااحجي ونسرين تحوم عليه تريد تحاجيني .
بس بعدها اخذها وراح وحتى احمد هم راح و بقينا لوحدنا اني والجهال واني اخطط وافكر شلون افلت منا شلون اعاقب فيصل
تواصلت ويه عمو حسن واتفقنا اجي يمه وهو حجه وي عادل يسوويلنه جناسي مزورة وجوازات ونطلع بيها لتركيا .
لازم اطلع واشرد واخلص من جوره وظلمه
الظاهر ما تحضرت زين حتى اواجه قوته وغطرسته ..
اني ويمه مثل الي يصلي ومايكدر يكطع صلاته وكدامه حية سامة وينتظرها تلدغه بأي لحظة
اني ما اريد اصير مثل الي جانن وجبة سريعة بحياته
ظليت افكر بيني وبين نفسي بس مااريد اطلب مساعدة وليد ولا استعين بي رغم ادري بي يفديني بروحه
بس ما اريده يتأذى مثل اخر مره أذوه بسبي وهو يذب نفسه للتهلكه على مودي لذلك اريده بعيد كل البعد عن مخططي
فكرت وفكرت ووسوست الي نفسي استعين بشخص
اي هو ماكو غيره يخلصني
وسمعت مركزه صار مرموق وترقى
كل الكلام هذا سمعته من شوكة من اجت اخر مرة
وصيت يوسف يجيبلي الرقم بس بدون علم وليد.
اي والله مصطفى هو الي راح يخلصني منه هسه صار عقيد بالجيش وعنده سلطة
نص ساعه وحصله يوسف للرقم وجابه الي
بسرعة دكيت عليه جاوبني بس كلت الوو
كال الله لايجذبني انتِ مو ؟
كتله منو اني بالله ؟
ضحك كال دره ترى مااتوه عن هذا الصوت واميزه
من بين مليون صوت ..
تنهدت كتله محتاجتك بشغلة ضروري تكدر ؟
كال ابشري رب الاگدر
كتله بخيبة ورجاء اريد اطلع منا تدري اني وين هسه مو ؟
كال اكيد كل اخبارج توصلني اول بأول
كتله اني عندي مكان بس انت تكدر طلعني هسه بعد مااكدر اتأخر
كال ابشري ساعة واني يمج
تفاجئت جاوبته بصدمة هيج بسرعة زين والكاميرات
كال صدك جذب سهلة اعطلها حضري نفسج مستعدة مو ؟
همست مستعدة اي ...
ختمت المكالمة وياه وركضت احضر كل شي
واني دااخلي اغراضي بالجنطة وكفت عن الحركة مااعرف ليش حسيت نفسي خنته لو اطعنه خاصة بعد اخر موقف ودموعه الي ماوكفت ...
سألني يوسف ليش ردتي رقمه
كعدت يوسف وحاجيته احنه لازم نطلع منا
باوعلي متردد بس ليش ؟
كتله ابوك ماينعدل بعد ابد احنه الليلة لازم نطلع وضروري .
لليل وحسيت طفت الكهرباء عن كل البيت واكوم واباوع واشوف عادل ومصطفى ووليد ابتسمت اصدقاء الطفولة.
تذكرت من فشخت عادل براسه وتذكرت من اعترفلي مصطفى بحبه تذكرت من حبيته
تذكرت من جنت احامي لوليد واوكفله وهواي ذكريات تمنيت ماكبرت بيوم وتمنيت ابقى بذاك اليوم الي جنت بي اكعد بظهر وليد وهو يلعب دعبل وياهم .
ومن بين كل هالذكريات جدي حبيبي .....
فتحت الباب الهم باوعت لمصطفى حيييل سنين وسنين وسنين اني مشايفته كبران شعره مشيب وبعده ممتزوج ليومنا هذا.
عادل تزوج وصار عنده اطفال .....
كالوا يله بسرعة جيبي الجهال وامشي
كل هذا صار بالاتفاق ويه عمو حسن اني ماردت وليد يتدخل ماريده يتأذى بس الظاهر حسن كايله .
طلعوا الجهال اربعتهم واخذونا بسيارة بالليل
وظلوا يحجون بيناتهم اول شي راح ياخذوني لمشتمل بالاسكان الى ان تخلص المستمسكات لان محتاجين صور النه وبعدها ننطلق لتركيا ومناك تهريب لاوروبا .
ورحت وياهم ونزلنا وبقينا بالمشتمل بس اني ممرتاحة ابد وكرم يسال عن ابوه
التوام ويوسف فهموا الوضعية واحسهم ساكتين بين رافضين وبين قابلين. ...
وفعلا طلعنا لتركيا اني والجهال بس رجعنا فيصل
(( التفاصيل غير متوفرة ))
من رجعنا رجعني للبيت الجبير هو اذاني بشكل
سلحني كدامهم سحل للمطبخ ويكولي انتي موعايشه ببيت الخدم يعني انتي خدامه منا وهيج هذا مكانج انتي هنا بالمطبخ .
جهالي يبجون ورايه واني ابجي اول مره اضعف ومااعرف اتصرف واحمد يجره مني موقف صعب بشكل ونسرين صارت حايط صد بيني وبينه.
جهالي خطيه فزعولي اتحرك يوسف واجا الابوه جان يكله يوسف بعصبية اسمع فيصل ترى امي مووو مو وحدها احنه زلم وياها واذا تريد تضربها اضربنا بمكانها .
اجو صاروا محاوطيني كلهم الكسره ماكو مثلها يمكن حيل صعبه عليه لان تعلقت وتعشمت بي هوايه وحسيت اماني وظهري.
كرم يكول بابا بعد مااحبك اني اكرهك
وادم يكوله شون تسوي بماما هيج بعد مااصيحك بابا فيصل ظل صافن عليهم.
لزم اخوانه يوسف وبقواا ويمي بالمطبخ واني اسوي العشا .
من مات جدي شفت اشياء ماشفتها قبل من الذله والله والله لو فيصل مسوي هيج وجدي عايش يمكن جدي يهدم البيت على روسهم والله فيصل اتمادى اكثر من شافني وحدي بس ماحسب حساب جهالي لي زرعت بيهم مثل مازرع جدي
تذكرت من ضربني وجدي صوبه وراد يكتله
هنا الجهال كرهوا ابوهم وكمنا حتى مانكعد ولا اشوفه ورجعت للمشتمل اكعد بي .
هو اخذ نسرين وسافروا تقريبا بقوا بالاربع اشهر مسافرين ورجع يتواصل ويه الجهال
اني صارت عندي حاله انسى هوايه
وراسي موتني وانام هوايه وحتى مااعرف جهالي بس يوسف اعرفه ومافرق بين التوم
ظليت اخذ حبوب راسي ماتفيد وانام ماتفيد عفت البيت والجهال ومااشيل نفسي والجهال كلساع اكولهم يفركون براسي من الوجع
اخر شي يوسف رايح لهشام وكايله عليه اجا هشام وفحصني كال لازم اخذج للمستشفى نسوي تحاليل .
طبعا ابوهم خلال سفره يخابرهم ويفتح كامره ويحجي وياهم بس مايسال عليه
هو وياهم بس اسمع يوسف يحجي وياه يكوله
درة كولش مريضه
اسمعه كاله شبيها يوسف كاله راسها يوجعها
ظل يضحك كايله بابا بسيطه لاتخاف على امك
ثاني يوم راح ويايه يوسف للمستشفى وسويت تحاليل وكالوا اسبوع وتطلع التحاليل واني حالتي تزيد ماتنقص.
مرة صحيت جنت بعقلي الكامل كعدت لكيته هو يمي مدد ومغطي عيونه صحت قيصر فتح وجان خايف خاف اذكر كتله شونك وصحته تعال اشبكني هو اجا وحضني واحس اجتافه تهتز
سألته شنو تبجي فيصل
هو ماحجا
وبهالفترة اهتم بيه مثل الطفل حتى يسبحني والاكل بس اني وياه وحتى من انسى جان يصفر وجهه ويسايرني حتى ماانقهر واتاذى
وبيوم جانت الحاله عندي وهو هسه جاي من الدوام
جنت اكولهم اريد جدي ليش اخابر عليه وماكو ويوسف لازم ايدي لان ابجي هو بدخلته عليه كال شبيها درة
كالت فاتن اجتها الحاله وتفر بايدها هاي حركة الخبال
هو هجم عليها وضربها راشدي
وعمار انصدم وصاح علئ فيصل انت شون تمد ايدك على مرتي
كاله من تعلمها تحجي بادب على تاج راسها بعدها احجي
وكمل اسمعوا زين كل واحد ياخذ كاع ويبنيها محد يبقى سمعتوا ? اني راح اسافر ارجع مالكه احد.
الدلال الي شفته من فيصل عبالك حلم
وفد يوم وكعت وتخربطت وبين الصاحيه والغافيه
سمعت هشام يكله لازمً تسافر الورم لايكبر وتسوء الحاله
اهنا صحيت كتلهم شنو ورم بيه اني شنوو ??
هشام كال بحزن اي عندج ورم بالدماغ ولازم تسافرين.
ظليت اباوع لفيصل وانت جنت تداريني شفقه مو لو تانيب الضمير خاف اموت وانته ظالمني ??
هو ساكت ويوسف وادم لازميني ظليت
اصيح عليه احجي فيصل لو هايه هيه اموت بعد احسن من عيشتك وجهالي كبروا خلي اروح يم جدي اشتاقيتله احجي وابجي ومنهارة وهو مندك ويدخن.
يوسف
وره سفر فيصل امي حيل تمرضت صارت عندها حاله غريبه حاله ما اعرف شلون افسرها بحيث عجزوا الاطباء عن حالتها
حالتها مثل ما كالو مثل الرفض للواقع والم مو طبيعي براسها
سوينالها تحليلات جانت التحليلات نظيفه ما بيها شي بس حالتها ما تطمن ابد ما تطمن تخوف لان تنسى وترجع للماضي وتسولف على جدها عبالك عايش ويانه تتذكر الماضي بس الحاضر تنساه
جنت ابجي دائما لوحدي من اشوف هيج وضعها وهيج حالتها اني حيل احب امي اموت عليها لان هي تستاهل واحد يحبها عكس فيصل
جانت تشرب مهدئات ومسكنات وجانت تستحي تشكي وتحجي عن مرضها واصلا محد يرحمها وكلها تكلها متعجبه راسج يوجعج اصلا كلنه روسنا توجعنا
ومحد يحس بيها ولا يحس بشنو تعاني بس اني جنت حاس بيها ومتخبل عليها جنت مراقبها ومداريها رغم جنت صغير
جانت حتى ما تكدر تهتم بينه تجبر نفسها جبر حتى تكوم تسوي اكل النا
فيصل ما موجود جان مسافر من بعد ما طلك نسرين سافر وظل اربع اشهر بالسفر
جانت تروح للبيت الجبير وتكلهن ليش اني نايمه بالمشتمل شنو الصار
تركض وتصعد لغرفتها فوك تلگاها مقفوله تنهار وتبجي وتظل تتصرخ وتوصل بيها الحاله للاغماء صارت تنسى بشكل فضيع
وترجع تسأل .. هو جدي وين ليش اخابره ما يفتح خط ليش ما يجي يشوفني بشنو ملتهي وين راح ليش تأخر عليه
وتسأل بس عني وناسيه عندها بعد اطفال توم
مرات اسبوع تتحسن وتصير زينه واسبوع تنسي حالتها بحيث احس راح تموت اظل كاعد يمها افرك براسها اسويلها مساج
جان فيصل يخابر يسال عن الجهال يسولف وياي ويسال عن امي اكله راسها يوجعها حيل وهو يرد عليه يكول .. سألت عمك هشام وكال ما بيها شي
قفلت الخط منه ورحت اركض لعمو هشام حجيت وياه وظليت ابجي
عمو ما قصر وخابر على بابا كله .. فيصل لازم تجي بسرعه لان عدنا مشكلة بحسابات المركز الصحي ومحد يحلها غيرك
جاوبه فيصل كال .. تمام ان شاء الله هذا الاسبوع اني يمكم
انتظرنه اسبوع كامل وسمعت اطراف الكلام وهم يكولون … اجه فيصل اجه فيصل
ركضت لامي من دون ما اشوفه لكيتها نايمه وتون من راسها لزمت ايدها وكعدتها واني فرحان كلتلها .. ماما ماما فيصل اجه اكعدي فيصل اجه
باوعتلي بنظرات بارده ما تعبر عن شي كعدت ومشطت شعرها وظلت صافنه استغربت من حالتها اكثر وگلبي ظل يدك سريع
بعدها وكفت ومشت لزمت ايدها واخذتها عنده
اول ما دخلت هو وكف مصدوم مرعوب من وجهه من حالتها التعيسه وجهها اصفر وهزيلة بس عيونها النرجسية طافحة وناطياتها منظر مرعب حتى جانت ما تكدر تمشي
تقرب منها بلهفه وحضنهااا حيل بحيث ضاعت بحضنه حضن بس عظام مو مره بالغه
بعدها عنه وحضن وجهها كال .. شبيج ليش هيج متغيره
جاوبته بتعب وهي تكول .. ما بيه شي بس هذول الجهال منو يكولولي ماما اني مو امهم هم وين راحت امهم خطيه مساكين
باوعلها باسف وغصه وهو يكول .. اي جهالنه
تجاهلت كلامه وهي تكول .. اتصل على جدي ما يتصل ليش شبيه خطه معلق لو شنو هو ليش ما يرد
ماحصلته انت ?
هز راسه بنفي ورعب من حالتها وتراجع خطوات دليل على صدمته
رجعت انهارت بعصبيه وتغير مزاجهه وهي تكول … لا فيصل لااااا انت ليش هيج تسوووي حباب لا تسوي هيييج لاااا
رجع فتح عيونه مصدوم من حالتها ورجعت تراجع مره ثانيه وهز راسه برفض للواقع الي صار كدامه وصار يتمنى لو الواقع يكون خيال
طلعت تركض وهي حافيه وتصررخ … لااااا طلكني طلكني مااا اريدك ما اريدك
طلعوا وراها مذهولين من حالتها وكعت على ركبها وهي لازمه الموبايل وتتصل وتدوس بالارقام صرخت بصوت عالي وهي تكول .. جدي ليش ما ترد لييييش ما ترد.
للحكاية بقية اخيرة 🥺🥹
تاخرت والله اعرف ومليووون اسفة اليوم كله مانايمة بس اربع ساعات للفجر كاعدة بس انسخ وارتب بحيث راسي افتر فد مرة ولزمني صداع بس علمود اربط الاحداث حيل مخربطة رغم هذا اكو حلقات مفقودة مالكيت الها تفاصيل
مابقئ شي بس قليل كلش واختمها شكرا لصبركم
مانزلت اعتذار لان ضجت كل مرة اعذار اعذار بس والله مامغلسة ولا ناسية ابد اسرق من وقت واحاول ارتب الاحداث.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!