رواية تسأليني الجزء الثاني الفصل الثامن 8 - بقلم الحساب مغلق

مسائكم عسل

#سوزان المندلاوي

ا
ماعرف شلون كمز عليه همام
الي شفتي رنه راشدي قوي ..وحجي ..ماذكرهه .
ممصدكة هذا همام هيج وكع عليها ضرب
وصياح
لج كافي تعبنا يومية سالفة انهدي..الله يهدج
بيج حيل وكوية
  احنا تعبانين
هي تصرخ والحجية واني نفزع عفية
همام عليك الله بناتها يعيطن
نايم عليها ..حتى مداشوفها بس اشوفها ترافس .
بس هي هم متسكت
كدرت ادفع همام عنها وصارت بظهري هي ..
كامت تعيط ..
الا اخابر حازم يذبك ورة الشمس وتهدد وهو يتخبل
ويرجع يهم عليه ..
ام الرياجيل ..وفشار اول مرة اسمعه بحياتي ..
ولج ..كااافي ..
وكفت كبالة كتله
بداعة قائد عوفها عوفها وكمت اصيح
محسيت الا بدفعة الية من ورة
وكعت كعود بلكاع احس شي انهز بيه
رغم بطني مو جبيرة جانت ..
والكاع الي جواية
بكعدتي ..صارت مايات
كمت ارجف
همام
شبيج قمر كولي
ما اعرف ما اعرف ابجي وارجف لحظات الى هسة من اذكرهن ارجف
انهزمت تمارا للغرفة هي وبناتها
كعد يمي احجي عيني شنو شسوي
كام يفتر دايرة مداير روحة
الحجية كالت تكدرين تكومين راح تجيبن انتي
ممتوقعة هيج كالوا تحسين الالم واوجاع بس شو كلشي ماكو
بس مايات تنزل هواية
كتلهم
مابي شي بس اخاف اكوم من مكاني
راحت الحجية جابتلي عباية وكتلة لهمام ينزلي الجنطة
جنت محضرتها قبل اسبوع
لفتني بالعباية وكمت احنا ودنطع
طب قتيبة هاا خير
همام كلة
هاي المخبولة دفعتها ما اعرف يمكن راح تجيب
كال والله اذا صارلها شي اذبحها
الطريق كله همام يندار عليه
بيج شي يوحعج شي
اكوله لا وصح ماكو وجع ..
اخذوني لمستشفى
اكولهم  مابيه شي اني
اكلهم مابيه عفية رجعوني
ما اعرف احس برودة بأطرافي وخايفة كلش
دخلنا للاستشارية شفت دكتورة كالتة
خل تنام بسرعة
شافتني كالت
حالا للعمليات مي الراس طاك ومتجيب طبيعي
وملحكه المي خلصان ..
هفت امثر اريد اسيطر ع نفسي ماكدر
شفافي ترجف ..
كمت ابجي
هنا ردت امي وينج يمة اريدج

بقيت ابجي مثل الاطفال
حتى الدكتورة كالت
لج مو عيب شكبرج شطولج اريد ماما
انتي راح تصيرين ماما
طلعت الحجية
وكللتهم للولد جيبوا امها ..
قتيبة راح على امي
همام جان يركض منا ومنا سوالي الدخولية
بس رادوا توقيع الزوج
اووووف من جاوبهم همام
اني بس ارجف ..
ول يابة متوفي
زين ابوها
والله مريض ميكدر اني اوقع
ميصير زين تتحمل المسئولية لان بعدها صغيرة
اهذ الولد ورلح ..وماعرف باقي التفاصيل شنو
الظاهر وقع ..
وصعدوني بمصعد للطابق الثاني
دخلنا بغرفة حلوة مرتبة
همام كلي نامي اخذي راحتج راح اكعد برة
كتلة
عفية اريد امي
هسة يجون والله لتخافين
الحجية ساعة تدعي وساعة تبجي وساعة تفشر على بتها
مكدرت انام بس كعدت ع السديه
وهاي بطني شكد جانت عاليه وصاعدة
كلعا نزلت ..وكمت احس الطفل تكوم ..ويضغط ع بطني
بس ماكدر احجي اخاف ..

طبوا 2 سسترات كالوا كومي انزعي
ولبسي مال عمليات
شي ازرك ومفتوح من ورة مرتاحيت
كتلهم عفية ميصير ابقى بدشداشتي
لا عيني ميصير
مو اني حزينة
هسة قابل جايبيلج بدلة
حبيبتي يلة بسرعة لاتروح تطلع الدكتورة وتعوفج
ما ادري ليش تعاملهم جاف
ويحجون وبعصبية ما ادري اني خايفة
بدلت وابجي اريد امي
راحوا ..
بقيت كاعدة وكتلها حجيه نطيني العبايه ماطلع هيج ..
جابتها غطيت راسي
ضلت تقرا ايات ..يمي
كتلها يمه ..بطلت اريد ارجع
صفنت عليه ..شنو بطلتي
ارجع للبيت
صار هوايه مضاحكه هي
ضحكت وين ترجعين يول
كمت ابجي للبيت عفيه هزميني
ضحكت اكثر ..قمر ..
لزمت اديها عفيه بطلت ماجيب

طبوا علية يلة خل تجي للصالة
ضلت توصي بيهم ..وطلعت فلوس ..وبوستهن يداروني ..

لبست عباتي
وكالوا اي شي لابسة تنزعة ذهب 
نزعت حلقة قائد وانطيتها للحجيه ..
دخل همام ..
كتلة وين امي عفية
كلي
راح قتيبه يجيبها
اريدها عفيه ..
ول قمر لا تبجين ..يزي بعد ..
اريد امي ..
السستر كالت يلا ماما
كلها اوكفي نحاجيها ..
لا تخافين
كلنا وياج
الا ماما شتريدن اجيبلج مصاصة
هههه
اي اضحكي راح يجينا
ايهم صيري سباعية واني وياج
ما اعوفج ابدا والحجية هم
رحت وياهم امشي ارجف
مو خوف ما اعرف احساس
احساس امتزج خوف والمجهول ..
طببوني بغرفه ..
اول ماطبيت .بقيت واكفه يم السديه
شفت ولد اثنين يمي سستر جريتها فدوة هذول يبقون بلعمليه كالت لا
كتلها اني لازمه عدة.  فدوة
كالت الطب مابي عدة انتي مريضة لو يضطر دكتور يجيبج ماعليج حرج
لا فدوى ...
نامي ..هسة
جانت جبيرة بلعمر . وشعرها ابيض ..ملامحها مبينه
السنين
اخذت منها الراحه ..
نومتني وغطتني ..زين ..

الثاني طلع وبقى شاب واكف يم راسي
والسستر ماعرف شتشتغل
غرفه جبيرة ..جانت حتى خفت اباع ع الغراص ..
نمت ..
اجه وكف يم راسي ..
كال شسمج
قمر ..
شكد عمرج ..
راح اصير 19
جيد ..
ليش هيج خايفه ..
بجيت ..
لا لا تنامين تكعدين بحضنج طفلج ..
سكتت ..
ضحك خشمج من البجي شوفي شكبرة ..
ضحكت حسيته يمتص الخوف مني ..
شكد عندج اطفال
وخله شلون مال قراصه الهدوم باصبع ايدي ..
ماعندي بس الي ابطني .
كال يلا سنه واشوفج ..جايه تجيبين بعد
كتله ماجيب بعد ..
جتف ايدة كال ليش ؟
رجلي مات ..
ضل ساكت..
يعني انتي ..ارمله ؟
ي ..
كام يسولف وي الدكتورة طبت ..
ها قمر كالو خايفه ..
رجع كال مدي ايديج ..
دخل كانونه بايدي غمضت عيوني حيل ..
وبدة يحجي ..
شمخلصه
معهد وزوجت ..
صار شكد مزوجه ..
مصار سنه ..
جاب ابرة 5سيسي
وخلاها ..بلكانونه ..
كال الله يحفظج لشبابج ..
ضليت اباوع ع الابرة وصل 3سيسي..
وراها ..نمت ..
حسيت اصوات واضواء
مخربطة ماكو شي واضح
بس حسيت قائد فوك راسي
ومسح على راسي وراح
احساس بس مشفته ..
اريد اصيحة اكلة اخذني
وياك ماكدر رجعت نمت
اريد احس ..واحجي بس اسمع صوتهم مو واضح
حسيت بالغرفة وامي موجود
كلهم فرحانين
يخبل حلو ان شالله يعوضج خير
شويه شويه ..فتحت عيوني .
بالم فضيع ..
والسسترات زرفوني ابر
وهمام يطب ويطلع
وقتيبة يوزع فلوس
ماما ..ماما..
جتي يمي بوستتي شلون كمر اجاج ..يخبل ..
والكل فرحان بيج ..
بس هم مكان قائد فارغ لو الف يمي بس هو غير
شفت ايهم حبيبي متوقعت هيج زغيرون وناعم بس حواجبة معقوجة مثل ابو
يا ترى شلون راح تطلع
منو يوكف وياك ..وهاي دنيتنا مترحم ومحد رحم امك  بيها
طبت سستر ..ضربتني ابرة بلوريد
واندارات ع قتيبه ..
كالت بعد شتريد تموت عليك ..
ضل صافن والكل جفل ومنهم اني ..
كالت ثبرتنه ياقائد وياقائد تعال ..
قاطعتها ..
كتلهم اريد اطلع ما ابقى اليوم
كالت خلي تجي الدكتورة وتقرر..وطلعت بعد ماخذت المقسوم ..
كالت امي اي تجي يمي
كتلها
لا ماما اني اروح لبيتي
الحجية هم كالت
لا عيوني ام سجاد ابن قائد ميفارك حظني ابدا
بعد اجراءات طويله ..وساعات
رجعنا للبيت
لكيت محضرين جرباية بغرفة الحجية
امي راحت كالت اشوف ابوج واجيج
لزمتني الحجية كالت بروح قائد عليج اتركيها لتمارا ولتوضجين منها يمة مجبروين نخليها
هنا رجلها مطلوب هناك
كتلها
مطلوب لعد هو مو ضابط
همام
كلي ياضابط هل كلاوجي جذاب يأخذ فلوس من العالم عود يعينهم وياكلها عليهم
وهسة العالم تريد فلوسها واهلة مبتلين بي طاح حظة سكط..وطاخ حظ تمارا سمعتي يمه
يصيح لام قائد يمه ..
انتبهت بايد همام حلقاي باصبعه الصغير
اريد اكوله عليها ..
والحجيه كالت يمه قمر لخاطري
كتلها
يمة شعندي وياها اني خليها
بس كون هي تفك مني ياخة
همام
اذا بعد طلع منها شي اكصو لسانها كص
هسة خلونا بهل الحلو فدوة ول يابة يخبل
اريد اجيب ذبيحه الو ..
ضلو يحجون تعبانه ومكان العمليه يوجع ..
نمت شوية وهمة معافوني..
كعدوني ..
اجتي امي وابوية واحمد
مصدكت شفتة  بابا حبيبي..واحمد

شال ايهم وايدة ترجف
اذان بأذن وكبر بأذن
وكلة ان شالله حظك احسن من حظ امك وابوك
وكصتك خير عليهم ..
وسلم عليه وانطاني ظرف
كلي بنتي هاي الج واعذرني ..وابريني يابه ..
احلت السفرة ..من عرفت ولادتج
واني بأريج الذمة وراضي
عليج دنيا
واخرة انتي اكثر وحدة كاسرة ظهري من خلفتي
مرات الدمع يجف بلعيون ..
جفت دموعي بكسرة ابويه ..

كتله يابة كلشي ما اريد بس وجودك كافي
تروح وترجع بالف سلامه ..
وانتظرك تجي بشوفتكم ترد روحي بابا ..
طلعوا علمود السفر ثاني يوم
راحت امي ..
والولد راحو
تمارا ولا نزلت ولا شفتها ولا باركت
ايهم ..مشفته ..
بحضن عمتي ..وحاولت ارضعه مكدرت ..
تعبانه كل شويه انام واكعد
وبديت اصخن
والحجية تكول عادي مال حليب
وانطوني علاج ..
تعبت كلش..
مابيه اتحرك كوة اكوم ..للحمام ..
وهمام ..جاب اكل ..من برة ومالي نفس الاكل ..
كل ام من تجيب اكو فرحه ..
اني مبيوكه مني هلفرحه ..
من كل شي انباكت ..
عرفت العدة خلصت ..مالتي ..
وياريت طلعت صح كضيتها مشاكل بمشاكل

جنت انام وافز ..
والحجيه سهرت وي ايهم..

ايهم قائد. ..
وعندة اخوان .جراح ..والبنيه ..
بقوا شي غامض ..
كمت الفجر ..عركانه وتعبانه حييل ..
كوة كمت وحركت روحي ..
كعدت ووكفت رحت وكفت يم الكاروك شفته نايم ..
ضليت اباوع عليه ..واتلمس ملامحه ..وحواجبه ..
فدوة ..شكد حلو
كامت الحجيه
ها يمه قمر
جوعانه موجوعه
لا لا يوم مابية شي
رجعت كعدت جابته رضعي ..كوة كدرت ارضعه ..
كتلها يوم ..جهال قائدشصار منهم ..
سكتت ..
احجيلي ..فدوة ..
كالت اريد اصلي دام الفجر طر
كامت ..
والتهيت وي ..ايهم ..
شويه وجتي جابت صينيه ..لبن وتمر وجبن وجاي ..
وحطتها ع جربايه ..
اتغذي ..واكلي .
اكلت لكمتين ..
وخليت ايهم بفراشه ورجعت نمت ..
كالت .قايد..
احس روحي انفضت ..من جابت اسمه
قايد جان عنودي ومتعبني .
يمه ..جبته .ع كومه بنات ..جان فرحتي يما ..
غمضت عيني ..
كبر وابو مات ..
توة شب ..وقرو برلسي ازوجه .لبنت عمه سماح
ثنينهم صغار ..
كتله لخاطر حلال ابوك ..حتى عمامك يلزمو ..
قبل يمه وصار الزواج ..
بس من اول يوم ممرتاح وياها ..
ويطلع يكلي حاجيها يما ..
واطب واحجي وياها ..
وترجع نفس الشي جابت اله 2
تصدكين ياقمر ..جنت افرش اله مدة ..بغرفتي،
وينام يمي ..
حسيتها غصت ..
تحجي وتاشر بلكاع ..توصف طوله
كملت
يرجع تعبان مايطب غرفتى يلبد يمي ..
يما خلافه فرغ الدار ..
عوفي حجيه لا تكملين ..لا تتخربطين
سكتت ..
رجعت ..
كالت مامرتاح كضه زواجه وياها مامرتاح
ومن ارتاح سكن كبر ..
كامت تمسح عيونها بلفوطه ..
مدري ..صوجي ..مدؤي حظه ..
سماح

ماتسكت يما ..الا يهطرها ..
ويجون خوانها ..وتصير الج لحم ..
يما ..كلبي خلص. من المكاون
كبرو بزرها ..
هو يطب هي تتولاهم للطفال وتضربهم ..كدامه
لو تعوفه ودور شي تغثه بي هذا حك ..وينكال
بس جانت راعيه بيت ..
وهذا عيونه تجدح ..من تضرب بزرة
والله يامي ..يلزمها يملخها ..
تحجي واني كلبي انعصر ..
ع حظه سودة عليه ..وعساني ابين لفاني وموت ..
كملت ..
كالت فرد مرة .الفجر .انا داتوضى
وقايد طلع من غرفتج ..
كتله هايايما ..شمسهرك
ابتسم بوجهي ..واشر ع غرفتج كال يما
وحق الحق ..ورة هلباب الجنه مالتي ..
اريد الزم نفسي ماكدر
كرهت روحي اكثر ..
ليش جنت ازعل وادلل لييش ..
امداني ..عساني لاشفت راحه بعدة..
كملت كلامها ..
كالت قبلج راد يزوج ..وانا دورته الو ..
فد شصار ..سميحه ..بيوم الخطبه
روحي دزي ع ابوج وخوانج ..
وتكانو وي قايد ..
وزتو بلسجن ..لان بيناتهم شغل ..
وانسجن ابو جراح ..
والا رحت الها انا ..وع عمامه يلا طلعو ..
يما بعد ماكو عم وله خال
لكمن يحود النار لكرصتو
سودة عليه ماشفت راحه ..
كملت ..
طلع والمشاكل جثرت وطلايب ..
مافضت الا من عرفج هدة ..
وردت روحو .الو ..وبدة يضحك صح يعصب ويعاند بس،عشك يايمه ...
سكتت ..
بس مابطلت سميحه بيوم عرسج يايما
سوت الهوايل ..وردت سجنته ..وتكاونو
و طلكها ..
شنووووو.
شلون ؟

وللحكايه بقيه