رواية تيم وجيلان الجزء الثامن 8 بقلم حنان أحمد ماهر
تيم وجيلانرواية تيم وجيلان الحلقة الثامنة
قربت ليلى عليا بابتسامة
ـ Hoç galdeneiz
اتكلمت بابتسامة قلق ـ أهلاّ بيكي
ـ فينك يا جيلان كده تختفي من غير ما تقولي لحد
تسلسل الخوف جوايا حاولت مابينش ليها حاجه ـ ليلى لو سمحتي مش عايزه …
قاطعتني وهي بطبطب على كتفي ـ متقلقيش يا جيلو انا مش كده …مش هقول لعمو عزت حاجه بس أنتِ رايحه فين كده
بصيت على اللي كان واقف معاها وهو ده اللي كان بياندي بإسمي من شويه علشان كده فكرته تيّم
بصت عليه وبصتلي ـ متقلقيش كرم مش بيتكلم ولا هيقول حاجه
اتنهدت بارتياح ولسه هتكلم بصت على تلفونها بارتباك ـ طب يا جيلو انا مطره امشي دلوقتي هبقى اطمن عليكي بعدين يلا سلام
بصيت عليها باستغراب فوقت على صوت ـ الطائرة ستُقلع بعد عشر دقائق
اتنهدت بحزن ولسه بلف علشان امشي لقيت حد يمسك ايدي وبيلفني ناحيته
كنت لسه هزعق بس شوفته عيني جت في عينه ابتسمت ـ تيّم
دخلنا الاوضه وحطيت حاجتي وتيّم دخل قعد على الكنبة وكان نظرة متسبت قدامه بشرود
من لما كُنا هناك في المطار وهو متكلمش معايا وركبنا العربية وكنا قاعدين ورا وكِنان اللي كان بيسوق علشان تيّم ودراعه اللي تعبه وبرضو مكانش بيتكلم معايا
اتنهدت بقلق وحزن واتقدمت ناحيته وقعدت جنبه ـ تيّم
مردش عليا
حطيت ايدي على أيده
بصلي وبعدها رجع بص قدامه تاني
الدموع اتجمعت في عيني
ـ طب أنت مش عايز تتكلم معايا دلوقتي ليه
بصلي واتكلم بهدوء مخيف ـ مش عارفه ليه
ـ عايزني اعمل ايه ها قولي ….طنط سميره جت وطلبت مني امشي كنت عايزني اعمل ايه
اتكلم بعصبية وغضب اول مره اشوفهم ـ وهو كان المفروض تسمعي كلامها …مش المفروض تيجي وتقوليلي..مين اللي دخلك البيت ده انا ..يبقى المفروض لما تيجي تخرجي منه يبقى بإذني انا مش بإذن حد تاني ..ماكنتش متوقع منك تعملي كده الصراحه مكنتش متوقع انك تمشي وتروحي من غير ما تتكلمي معايا ولا تقوليلي …ايه اللي عملته معاكي غلط علشان تمشي بالطريقة دي
اتكلمت بزعيق ودموع بتنزل من عيني ـ معملتش حاجه والمشكلة انك معملتش معايا حاجه وده السبب اللي خلاني امشي
قام وفضل رايح جاي في الاوضه بيحاول يهدي ..مسح على وشه
ـ يا بنت الناس ماتجننيش يعني ايه علشان كده مشيتي
ـ علشان حبيتك
قُلتها معرفش قُلتها ازاي بس اتقالت بسرعة
حطيت ايدي على وشي وقعدت اعيط
قعد جنبي وحط أيده على كتفي ـ جيلان
بصتله ـ أنت الشخص الوحيد اللي حسستني بالامان بعد وفاة بابا أنت شخص الوحيد اللي حسيت معاه بالأمل واني هقدر اعيش مرتاحة بعد كل اللي حصل ..كُنت عايزني اعمل ايه بعد اما شوفتك خدت الرصاصة بدالي عايزني اعمل ايه اشوفهم بيإذوك واسكن مش هعرف علشان كده مشيت.. أنت اتجوزتني علشان تحميني وانا سبتك علشان احميك
ـ ومين قالك اني محتاج حماية ومين قالك كمان اللي كان السبب في الرصاصة دي عيلتك
اتكلمت باستغراب ـ أُمُال مين
ـ اسلام
ـ إسلام!!
اتنهد ـ اه اسلام كان عايز يإذيكي علشان يردلي اللي عملته فيه يعني مش عيلتك السبب ولا أنتِ كمان
بصيت قدامي بحزن
مسك أيدي ـ جيلان
انتبهت له
ـ ممكن متعمليش اللي عملتيه ده تاني ..أنتِ متعرفيش انا حسيت بإيه لما عرفت أنك مشيتي وكمان من غير ما تقوليلي حسيت روحي بتتسحب مني بالبطيء
بصتله بحب وعيني في عينه
ابتسم ـ يلا اوعديني أن اللي حصل ده مش هيحصل تاني
ـ وعد
ـ لا خليها söz علشان أصدق
ضحكت ـ طب خلاص يا سيدي söz
مسح دموعي وقرب مني ـ ها بقى كنتي قُلتي حاجه كده من شويه بس اتخدنا في الكلام ومسمعتش كويس قوليها تاني كده
اتصنعت الغباء ـ حاجه ايه انا مش فاهمه تُقصد ايه
بعد عني بغيظ ـ لا والله
ضحكت عليه ـ طب ما تقولي تُقصد ونتفاهم بدل المضايقه دي
كان لسه هتكلم بس مسك دراعه بألم ـ آه
قربت عليه وانا بمسك أيده اللي ماسك بيها دراعهُ ـ تيّم مالك
شدني ليه ـ محتاج حضن بس وهبقى كويس
حاولت ابعد منه ـ على فكره بقى انت رخم اوي مافيش حد بيعمل كده وقفتلي قلبي
بصلي ـ سلامة قلبك يا قلبي
ابتسمت انا مش عارفه الراجل ده ناوي يعمل فيا ايه تاني بجد
بعدت عنه وضربته على دراعه بخفه
ـ آه
ـ اهو كده علشان تتوجع بحق وحقيقي
ـ قلبك أسود اوي يا جيلو
اتكلمت وانا بقوم أتحرك ناحية الحمام
بصيت له ـ من عاشر القوم بقى يا تيمو
دخلت الحمام وضحكت عليه لما سمعته بيقول ـ كتر خيرك يا قلب تيمو
ابتسمت بحب وانا بتنهد وبحط ايدي على قلبي ومبسوطه اوي أن انا هنا ومعاه
في الصباح
كُنت انا ونيره في المطبخ بنعمل آيس كوفي علشان نشربه بعد ما قولتها على طريقة تجنن واني مش بعرف اشربه غير بالكراميل..انا أصلاً بعشق اي حاجه بالكراميل تشوكيلت آيس كوفي كيك اي حاجه من دول فيها كراميل بعشقها
ـ بس برضو في نهاية أنتِ غلطانه يا جيلو ماكنش ينفع تعملي كده ده لولا أني سمعت ماما وهي بتكلم عمتو وحسيت أنها هتعمل حاجه وروحت صحيت اخويا ماكنش اخويا لحقك ولا جابك على هنا
بصت لها بصدمة ـ يعني أنتِ اللي قُلتي لتيّم
ـ اه يا اختي أمال حلم بيكي مثلاً وأنتِ مسافره ف قام مخضوض ملقاكيش ف عرف أن الحلم حقيقة وراح لحقك لأ إحنا مش في مسلسل تركي هنا وبعدين المفروض تُشكريني لولايا مكنتيش هتبقي هنا
ضحكت عليها ـ لا ده شكل المسلسلات التركي عامله عمايلها معاكي بجد …ويا ستي شكراً
ـ العفو العفو
قالتها بتواضع مبالغ فيه وبطريقة مضحكه
ضحكت عليها وحضنتها
استغربت بس بعدها حضنتني ـ بجد فعلاً شكراً يا نيره وشكراً انك معتبارني صاحبتك وبتحبيني
خرجت من حضني واتكلمت بحزم وجديه ـ بجد هزعل منك لو قُلتي الكلام ده تاني .. أنتِ مش صاحبتي اصلا أنتِ اختي وياريت تفهمي ده كويس واللي انا عملته عملته علشان انا بجد حبيتك من قلبي وارتحت اوي لما شوفتك راجعه مع تيّم امبارح علشان لو ماكنش لحقك كُنت هسافر واجيبك احبسك هنا علشان ماتفكريش تمشي تاني
حضنتها من كتفها بحب ـ حبيبي حبيبي انا بجد يعني
ضحكت بعدها ابتسامتها اختفت وبصت بعيد بحزن وشرود
ـ مالك يا نونا
قُلتها بقلق
ـ انهارده قراية الفاتحة يا جيلان وانا مش عايزه ده انا مش عايزاه يجي يتقدم أصلا
اتكلمت بحزن عليها ـ هو أنتِ متكلمتيش مع تيّم
ـ وهو أنا
هلحق امتى اتكلم معاه بس ما أنتِ شايفه اهو الأحداث اللي حصلت وراه بعض
ـ معاكي حق
قلتها بحزن وانا ببص لبعيد بعدها رجعت بصتلها ـ طب ما تتكلمي معاه دلوقتي وانا هاجي معاكي
ـ مش بالسهولة دي يا جيلان مش كده ماينفعش بعد ما ادينا كلمة للناس نرجع فيها وكمان هما خلاص قربوا على وصول
ـ قربوا ايه بس يا نيره ده لسه فاضل تلت ساعات
ـ لأ ما هو احنا عندنا كده في مصر التلت ساعات دول كأنهم نص ساعه هتتعودي هتتعودي
ضحكت بعدها طبطبت على كتفها واتكلمت بحنيه ـ طب ماتفكريش أنتِ وسيبي الأمور تمشي زي ما متيسرلها واللي مكتوبلك هو اللي هيبقى ليكي
بصتلي وابتسمت بحب ـ معاكي حق وكده كده تيّم هيسألني عن رأي وانا هرفض.. المشكلة بس في ماما
ـ وهو مين اللي بيقدر على مدام سميره
ضحكت ـ مافيش غيره بابا
ـ يبقى تتكلمي معاه تخلي يكلمها وكل حاجه هتتصلح
ـ تصدقي معاكي حق انا ازاي مفكرتش في كده
خبطتها على رأسها بخفه ـ علشان العقل ده مبيفكرش غير في شخص واحد
اتكلمت بهيام ـ اه والله معاكي
ـ امشي من قدامي دلوقتي يا نيره علشان بجد هضربك
جريت وهي بتقول ـ مكنتش اعرف انك عصبية اوي يا جيلو ربنا يكون في عون اخويا بجد
جريت وراها وانا بتوعدلها ـ بقى كده…. ماشي ماشي يا نيره
في المكتب
ـ ما قولتلك خلاص مش هيتم حاجه..هغنيها يعني
اتكلم كِنان بغيظ وعصبية طفيفة ـ انا مش عايزهُ يجي أصلا
ـ عايزاني اطرد الناس يعني
ـ ياريت
قالها ببرود
ـ الله يهديك يا كِنان قولتلك مش هنقرأ حتى فاتحة خلاص بقى
ـ وافرض بقى مدام سميره أدخلت
ـ لا متقلقش هي عارفه اني زعلان منها جامد بسبب اللي عملته في جيلان ف مش هتقف قصادي
قلتها بشرود
رجعت بصتله تاني
ـ المهم خلصت الشغل اللي قُلتلك عليه
ـ اه خلص متقلقش بس هو في حاجه كده لازم تعرفها
ـ حاجه زي ايه يعني
ـ البنت اللي بندور عليها
ـ مسكتها
ـ لأ
ـ أُمُال
قلتها باستغراب
اتنهد ـ البنت اللي بندور عليها هي نفسها البنت اللي كانت واقفه مع مراتك امبارح في المطار و……
….