يا أجمل الوحوش الفصل الثامن وخمسون 58 - بقلم رُسُل فَهد

التصويت + التعليق بين الفقرات لُطفاً
يا أجمل الوحوش
- رُسل فَهد
...

" جُمارة "

فتحت عيني الصبح و راسي على زندة حاضني بأثنين اديه
جان ذاك الحُضن وحدة يسولف كمية العناء الي مر بي زِناد
حتى يعيش هاي اللحظة ، بحيث بوسط هذا الكم الهائل من الحب
بعد ما تخلص زِناد من كل شخص ممكن يأذيني
وصل المرحلة الي جان خايف بيها على جُمارة من نَفسة

عيني على الغرفة شكد حابتها و كل تفصيلة بيها مهتمين بيها
تحركت شوية بس مستغربة الوضع شلون راح اكدر اوازن بين حياتي
و بين دراستي و اكثر شي جان يخوفني زِناد بعد ما يشوفني
صرت يمة يخف هذا الحب تدريجياً

فز بسرعة و سحبني اله قوي من تحركت باوعلي و ضغط على عيونه غطيت روحي باللحاف و ايدة خلاها على خصري
زِناد : نامي بعد وكت مو دوام اليوم
جُمارة : متعودة هي وكت

- اليوم نامي
ما جاوبته و بقيت مغطية راسي لحد ما حسيت روحي اختنكنت
هو رجع نام و اني بقيت كاعده اباوع للبردة و انتظر شوكت يكعد
امير جدة رهينة يمكن اليوم من الفرحة ما نامت للصبح

اخذت هدومي و هو كعد فتحت باب الغرفة بعدني ما ماشية خطوتين
و اسمع صوت الهلاهل من جوه جدة و غريبة
رهينة : هلا هلا يبعد جدتك هلا
طبيت للحمام الفوك و ما جاوبت جدة هاي اول مرة بحياتي استحي

و استحي حتى أطب للغرفة لافة الخاولي على شعري و واكفة بالممر لحد ما سمعت صوته جوه يعني نازل الحمدلله طبيت للغرفة
وكفت كبال المرايا اندك الباب و طبت روز
حطت ايدها على خدها و تضحك
روز : ههههههه مبروك

جُمارة : و شكو تضحكين هيو تعاي سويها
روز : شسويها غطي روحج بالشال
- احط لصقات مال جروح عندي بجنطتي
- هههههه والله يجمارة ركبتج لصقة مال صخونة ما تغطيها

غميتها لان ادري بيها بدون فايدة طبت غريبة تهلهل
و اخذت المشط من ايدي تعدلي شعري
غريبة : شايفة كل الخير حبيبة يالله و نزلي بلاية حجاب محد هنا بس رجلج و جدة

بيدي الكحلة ارسم عيوني بيها ، خليت مكياج خفيف
و روز يم الدرج تسوحل بية تريدني انزل لحد ما سمعت صوت ابوي و امي جوه ، رتبت الشال و غريبة كل شوية تصيح جُمارة تعاي تريكي نزلت روز من ايست مني و نزلت وراها جدة تهلهل و اني مستحية من ابوية سلمت عليهم و كعدت بدون صوت
احس كلهم بداخلهم يكولون هاي جُمارة لو غيرها

رهينة : حتى لو متريكين تتريكون ويانه كعدت محمد من الصبح دزيته على كيمر و كاهي و صمون بزعت روحة من التصخر
غريبة : اليوم حتى للمعمل راح من وكت

بالكوة اكلت لگمتين و جدة حطت بيدي فلوس شوية تحسن مزاجي
ابوية و زِناد راحوا من انطبگ الباب رفعت راسي و تنفست
رهينة : اليوم شني يا بزون المأكل لسانج
جُمارة : قصدج العتوي مو البزون

شهكت و فتحت عينها و جرت العكازة
رهينة : ياهو ولج بس لا تگصدين زِناد هسة اخابرنة اخلي يرد يذبحج كبال ابيج من اشتعل ابيج اعله هالبت وًهالخلفة
جُمارة : صبيلي روز اي شي صبيلي ما شبعت

غريبة : هسة أنا اصبلج تدللين عرفتج مستحية وًما أكلتي
تغريد : عادي تصير بأول ايام بعدين تتعودين و تتأقلمين
رهينة : بعد روحي ذيج الشوفة شلون فرحان اليوم ومكيف
اريد هاي الضحكة ما تنزال بجاه شريفة بت الحسن

روز :طبعا ما تنزال بعد جُمارة و حصلها
رهينة : شلونها على أساس تستأهل ام لسان الزفر
رفعت عيني باوعتلها صفح

غريبة : جدة بس خابري زِناد تأكدي منه اكيد عمامي اليوم يجون يتغدون يمنه حتى احضر
رهينة : اي اكيد جا موش كتلج أنا يعني أنا كلامي موش اكيد
- لا حشاج بعد كلبي بس خافن معزومين بغير مكان
- هسة اخابرنه و أشوفن

رغم كل الوجوه متعودة عليها بس حسيت الجو غريب عليه حتى نفسي غريبة صعدت فوك و اني صعدتلي تباوعلي الفرح و الندم واضحات بعيونها
تغريد : والله يمة امس الليل كله ما سكتت من البجي
ادري ماتصدقين بية بعد بس والله من عاينت فرحتج البارحة
غميت روحي الف غمة على كل سواية صارت بيجً

جُمارة : مو كتلج يمة انسي و بعدين هم رحتي للطبيب
تغريد : جانت عجيبة تسولفلي عجايب عنه و شمسوي بيهم و شكثر حاطج بـ ببالة كلت جُمارة رچيچة مو مال هيج عيشة ما تحملها حاولت بديه و رجلية كون يعوفج ويأيس منج

جُمارة : ما يأيس مني يمة شوفي هاي صورتي
واسمها و مخليها بنص غرفته الله يعلم من شوكت
تغريد : الله يسعدكم و يهنيكم بجاه كلمن عنده جاه
- امين يارب

اجوي عمامي هم و نسوانهم تغدوا يمنه حتى عمي عمار مدري شعجب بس كل شوية يرفع راسة لزناد يباوعلة بغل و يدنك راسة
أنطوني كلهم فلوس و يسولفون و يضحكون سوه
قاسم : والله واحد من جماعتي خوش زلمة و ناس خيرين
كال إذا جيناكم على مرة تردونة جثير يزيدنه شرف
ناخذ منكم مرة
رهينة : بيت مَـن
- بيت ال ابو سرحان يمة

رهينة : جثير خوش وادم ما تطيهم بتك يعمار
ام سلام : لا خالتها تريدها
- خااااااب گميييي و الله اعله گص رگبتي ينطون لخواتج مرة امهات المكسرات الرادن يصخمن راس حفيدتي
- ديالله هسة على ساس شلونها حفيدتج
- تاج راسج و راس خواتج جاهل و غلطت و هسة ابنها ها عرض افادة شمسويتلكم

ام سلام : أنا حالفة لو يوم يبقى بعمري ازوجهم كلهم
رهينة : سويها چانچ مره و الله حاطه مره فلعة كمر جوه أبطي بس تميلين شويه أزوجها لعمار
كح عمي عمار و عدل كعدته عمامي كلهم ضحكوا

زِناد : شراع جاي يمشي بسالفة حسن لان من ضمن اعترافات عجيبة عليه هو الكاتل حفيد ربيعة الي وراه انكتل امير بس امجد مقنعة بفلوس و كايله أنا أكفلك و أطلعك

يعقوب : الله يكسر ركبة هالعجيبة و هالامجد جنت اسمع بالشياطين و هسة شفتهم ماكو هيج قابلية والله لو سامع سوالفهم ما اصدكها بس المشكله جاي أشوفها بعيني

رهينة : و شحصلوا من هذا كله حبل الجذب لو شمهما طال تاليته ينكطع و ال سرهيد عدهم بخَت يطيح حظ كلمن يلعب وياهم عوج و راح تبقى عجيبة عبرة لكل واحد ما يرضى بقسمتة و يعترض على امر رب العالمين

ام سلام : يمههه يمههه وليدي يرد لحظني شكبر بختي الله يكسر ركبة كلمن جان السبب سنتين من عمرة راحت وليدي :
درت وجهي على امي لكيتها صافنة و تبجي ، كام ابوية يمها يسكت بيها

فاخر : شراع ابو النسوان ماكو محامي غيرة
ام عدنان : و انتَ صدكت بعدنان مادكلي شمالك
زِناد : والله دولة و علم وتاج على الراس اصلاً حاير شسويلة
و اكسر عينه على هذا التعب كله

ام عدنان : اي والله نشمي و ماعندة المو زينة جا هن بنات الحرام جثيرات و هجامات البيوت هواي
فاخر : والله اخوها عدنان ما يتفاهم
زِناد : و عدنااااااااان شنوووووووو ياهو ابووووها انتَ لو عدنان أنا العصر جاي و اريد اشوف شني رايها

عمار : والله هي اكبر غلط صارت لهذا ابن فتنة
ما انطيتوها لولد عمها فضلتوا الغربة و هاي تاليها
ام عدنان : والله الولد زين وياها و حتى للدراسة رجعها
و ما مقصر وياها بس هي خشم يابس

عمار : بس زِناد ما يسوي غير اليصرفلة
زِناد : اليصرفلي طبعااااً و شبي شراع خط و نخلة و فسفورة و ما حاسبة أنا غير من ال سرهيد و احسن شي سوينا صار نسيبنة

عمار : بعد انتَ إذا حبيت واحد تحبة ياهو يجيبة بالطاري
زِناد : جا شد الهمة و خليني احبك
- انا الما يحبني ما أحبة
زِناد : هههههههه ليش ما احبك شمسويليً

رهينة : بعد عمري هو حتى ما يعرف الكره شني و عليش يكرهك جا غير انتَ مكسراتك هواي ويا و شايل بخاطرة عليك
زِناد : يمون يمون

عمار : هو دومة مدنيها كلها و شامرني غادي
جُمارة : هسة بالأخير يطلع حتى عمي عمار يغار على زِناد
و يريدة بس اله
كلهم باوعولي مصدومين و و حتى اني انصدمت شلون حجيت بصوت عالي و طگوها ضحكة حتى عمي عمار الما شايفين اسنانة طول حياتنة ضحك

قاسم : احلى شي بجمارة صدك الي بكلبها على لسانها
عمار : يعني صدك شراع راح يطلع حسن خاف ما يطلعوه
هاشم : ليش ما يطلعوه الطرفين يتنازل و احنه نحركها من يمنه
و أن شاء الله الأمور كلها تمشي بخير

زِناد : و للمعلومة للمعلومة حتى أكون وياك واضح تدري هذا شراع الما عاجبك من جان ببيت جدتي كاعد و ورود صارت وياها ذيج السالفة
هو عَبنة زلمة و ابن أصول مو بس ما حطها بدماغة لان يعرف رباتنة شني ، هو بنفسة أثناء التحقيق وي امجد الجلب و الضباط تستجوب بي نفسة امجد في سبيل يصخم راسي و راس الخلفوني
هو الي أعتدة على وردة

قاسم : ولك موش رجال و هاي المصايب كلها منه
جا لو زلمة جان شسوة و علي كل يوم بالليل اغمض عيني ما مستوعب صدك لو كالوا اخطر كائن بالدنيا الانسان

ام عدنان : جا هو مو يكولون عرف اهله ليش ما راحلهم معقولة كلبة ما حن عليهم هي الجلاب هم تحن بيناتها
هاشم : مو كالوا رايحلهم و شايف الوضع ما عاجبة
تلكيهم ناس فقرة على كد حالهم

ام سلام : كش و غدي والله ما تنعقل و لا يرضة يشيلها الراس معقولة ابن ادم على الفلوس هيج يسوي
زِناد : يسوي أنگس البشر إذا مخافة الله انشالت من گلبة
بعد يسوي سوايات الشيطان يستحي يفكر بيهن

قدمت غريبة الهم الچاي
قاسم : الشغلة الوحيدة الربحاناها من حقد و سواية
عجيبة أجتنا غريبة الحلوة ، زِناد مو خلصت عمرك تتمنى تصير عندك اخت

عمار : يالله حتى اخذها لخالد
شهكت وباوعت لزناد و جدة جرت ايدها
رهينة : لا وينها و وين خالد غريبة جبيرة على خالد
تراها بعمر زِناد إذا ما تدري

غريبة : عمي حسبت اخوتي الصغار أنا عديتهم كلهم
زِناد : و مسودن انا أزوجها شعدها متزوجة خليها يمي
اشبع منها ياهو يستاهل أنطي عرضي اضل طول العمر ما مرتاح و احسب الف حساب لحياتها

رهينة : جثير تمرمرت هي خليها تتدلل بزود اخيها هسة شني قحط الرجولة
باوعت الها رافعة حواجبي هي بسرعة لگفتها
رهينة : لا تعاينين طبعاً ما اكولن عليج هيج لأن أنا ادري راحتج يم زِناد موش يم اهلج و لا يم غيرة

جُمارة : خلصتي عمرج تكولين الزواج احسن شيء للمرة
و هسة صارت الرجولة قحط
رهينة : موش أنا بعد ما يهمني اليعرس و الما يعرس زِناد و اخذ جمارته

ضحكوا عمامي و راحوا محمد هدومة كلها تراب
زِناد : بشر وين وصلتوا
محمد : ما بقى شي ان شاء الله و بعدين اكلك يعني
أنا تغريد وين أطيقها تخليني اشتغل عمالة بـ بيتها
هو أنا بيتي و بيت علاوي ما تعبت بي هيج

زِناد : يالله الشغل لعمك لو حتى عمك ما تحبة
محمد : جا عمي شني هو اول و تالي بيد تغريد
جُمارة : ام جُمارة

محمد : لا موش جُمارة شراح تسمون اخوج
رهينة : والله يعگوب يكول ان چان ولد اسمي زِناد
و إذا بنية رهينة بعد كلبي
محمد : ليش شني لسه ما بين
- لا ما بين الجاهل ناعم
زِناد : امشي امشي اصعد امشي

جُمارة : يا شنو رهينة خطية اختي تنظلم جدة بهذا الاسم
بالمدرسة يخلصوها تصنيف عليها
رهينة : ياااااع ولج اسمي هذا
- اي جدة بس كلشي بوكته حلو يعني بهذا الزمن منو يسمي رهينة بالله زِناد بي باب و جواب
زِناد : يعني حتى اسمي ما مقتنعة بي جثير

دك تليفونه و صعد و اني و جدة نتعارك على الأسماء
غريبة : دمشي اصعدي لأخوي هسة منا لحد ما تجيب امج
الله كريم يجوز انتِ حبلة
جُمارة : لا حبي اني ما اريد جهال إذا ما اخلص كلية صدك ذكرتيني لازم اتفق وي زِناد ادري بي ما يرفضلي طلب

غريبة : جا هي الخلفة رزق موش بكيف ابن ادم دمشي امشي صعدي
رهينة : طكيها طكيها و صعديها
- يا جدة اطگها شلون اطگها هاي جُمارة زِناد

رفعت حاجب لجدة و حطيت ايدي على خصري مشيت من يمهن بدلع
غريبة : ههههه انهجم بيتج شكثر حلوة
رهينة : ولج وعلي إذا اكوملج المسلوعة البگة
بس شسوي بعد إذا هو كاتل روحة

لزمت المحجر صعدت و اني اتدلع كبال جدة غريبة تضحك و جدة تريد تكوملي فتحت باب الغرفة و طبيت هو واكف يم الشباج يخابر
واحد و يسولف بالشغل نزعت الشال و شمرتة على الجرباية
ما ادري ليش هاي اخر شي توقعته بحياتي راح استحي من زِناد

تمددت على الجرباية و غطيت حتى راسي رفع الغطى و التليفون بيدة
اشرلي بيدة شبيج ؟؟ هزيت راسي بـ لا بمعنى ما بية شي
ترخص من صاحب الاتصال و سد التليفون و اجه يمي كعدني عدل
زِناد : شبيج حبيبتي

جُمارة : والله ما بية شي بس هيج تمددت
زِناد : جمارة خو ما مرتاحة ترى بعدج و كلشي عليج يمر جديد الاسبوع الجاي تداومين و يوم ورة يوم تشوفين
روحج تأقلمتي و هذا مكان راحتج

جُمارة : ليش ما ارتاح و انتَ موجود زِناد
ابتسم بوجهي و مد چف ايده على رگبتي و اصبعة الابهام على خدي
حضنته بأثنين اديه بـ لحظة اشوف دموعي تجري اني ما بية
شي ولا مقهورة و لا ضايجة ليش ابجي ما ادري

ضحك و ايدة على خدي تمسح دموعي ، من ما سألني ليش ابجي
و اخذ الموضوع عادي كأن هو يعرف اصلاً حتى بداخلي و حافظني
كل هذا الحفظ يوم بعد يوم أحسد نفسي عليه لان ماكو مثلة
بهاي الدنيا

جانت النومة بحضنه أحلى نومة بالدنيا ولا مرة بحياتي عشت هيج
مشاعر و لحظات حلوة لان اني بأيد الشخص الصح
الي اهم شي عنده يشوف ضحكتي
زِناد : جُمارة خلصت عمرها امج تخاف عليج مني
لان جنتي صغيرة اكعدچ على رجلي و اصفن بوجهج

جُمارة : يعني هاي الحركة مو جديدة عليك
زِناد : كلشي مو جديد عليه
- شستفادت امي هاي اني كاعدة يمك
- امج تخاف عليج حقها بالسوته من جنتي صغيرة
بس السوتة وياي و انتِ جبيرة لاااا طول عمرة ما ينسي

جُمارة : اني ما اتذكر شي من طفولتي ابد مدري ليش
زِناد : الله يساعد راسج إذا بس السادس أربع سنين
- هسة المهم حققت حلمي لا تستهزأ ، ولو حققته بفلوسك يالله مو مشكله انتَ مو غريب اكيد ما تعيرني

زِناد : هههههه كلشي يخص زِناد الج
جُمارة : لا عمي اني مو وحدي عندي شرايچ كومة بكافة الأعمار أطفال و شباب و شياب هسة بديت احس حتى ابوية يغار عليك مني
- هههههههههههههه

وكفت يم المرايا فتحت علبة الذهب حتى اخلي التراجي لان ما اكدر انام بيهن وهو ينزع ساعته و محابسه بس هو سريع مو مثلي
خله ايدي على خصري باوعتله صفح
جُمارة : جدة دكول لمرت عمي قاسم سويلها الدشاديش
كلها مخصرة كتلها إذا البس كونية ينعجب بية صحيح كلامي لو بالغت
زِناد : ههههههههه

جُمارة : شو تضحك شككتني
زِناد : جدة واصل بيها الدلال حتى بهاي السوالف تفكر
- رهينة و ما ادراك ما رهينة و حبها لزناد
بلعت ريگي من أنطبعت بوسة خفيفة برگبتي
زِناد : أنا من چانوا يلبسونج بدلات و انتِ جاهلة
اخذهن اضمهن خاطر ما يلبسوهن الج مرة ثانية
و جاية تسأليني تنعجب بية لو لا

بقيت واكفة صافنة و فاتحة عيوني اباوعلة هو مبتسم راح تمدد بمكانه
جُمارة : عليك الله صدك ؟
زِناد : فتحي الكنتور و عايني
ركضت على الكنتور افتح بيهن باب باب هو ما گلي ياهو منهن لحد
ما فتحت كتنوره و تذكرت امجد من شمر ذيج الفساتين بالگاع
وي دشاديشه و العبي و الغتر و عطرهن اليكفخ الواحد
فساتين قديمة مال بنية واحد ماروني و واحد اصفر صغار يضحكن

جُمارة : والله يعني والله صدك زِناد
زِناد : چا أجذب عليج يالله علگيهن و تعاي نامي
رجعت الفساتين و اجيت كعدت بطرف الجرباية يَمة
لزمت وجهة بأثنين ادية و بست خَدة
جُمارة : امووووووت عليك زِناد

تدَنه و خلاني بصفة و غطاني ثاني يوم اجوي ولد عمامي كلهم يتعشون بالحديقة هم واكفين يسولفون ساعتين و زِناد بعده ما جاي
جدة كاعدة يمهم و هم كل واحد يشكي همة الها و هي تصبرهم و ترزلهم

خالد : جدة چا و أنا لو بعد زوجتي زِناد كعدتي و سكتي
رهينة : ولكم ادري يمال الوجع حاطين كوركم و كور تاج راسكم شني جا هاي اخوتك البعران مو كلهم اصغر من زِناد و تزوجوا ليش ما حسب مثل حساباتكم الوسخة

سلام : جا شعلينا جدة زِناد غير هو جان ينتظر مرتة
رهينة : اش يالله اش لا تضيجون خلگي شصار على اخيكم
محمد : هو زِناد بالمركز ما رضه نروح ويا هي خلصت السالفة بقت بس المحكمة باجر ان شاء الله خير

خالد : حتى تزوجيني جدة
رهينة : خاب ليش ما تنجب
إسلام : يعني جدة بشرفج عافها كلها بنات العالم ما تريد إلا هاااااي شيخلصك من ابوي من امي ولك هاي كله و زِناد بعدة ما يدري

محمد : ولك كلها تهون إلا أمي وعلي تشگك نصين
مرتضى : بابا الما ياخذ من ملتة يموت بعلتة
علي : خلي امك تخطبلك و بيض صفحتنا حبيبي

خالد : كومووووا و أنا شنو وحد منكم تردون تبيضون الصفحة براسي مثل ما كل واحد بيكم اخذ اليريدها
غصباً ما على روسكم توكفون وياي هسة من يجي زِناد
و دكلوله

رهينة : خاب و علي نصيحة من جدتك لا دكلة هسة راح يجي روحة فايرة من المركز يشيلك و يحطك بصف الغزلان
خالد : جدة شبيج جا موش حفيدج أنا اذكرج ايام شريك
جم مرة رحتي و ردوج و رجعتي
شريك : انجب غير جنت ابَوس اديها و رجليها

خالد : صدك جذب وين ما تردين ابوسج جدة عليج الحسين جدة هي شبيها مو شبعت ضيم هنا و هسة يم اهلها هم شابعة ضيم اكسبي بيها ثواب
علي : و إذا اجتي امي تشبعها ضيم نفس الشي
لو تخليها البت يم اهلها احسن

خالد : هاي عود اخوتي انتو والله لكم والله اخوة يوسف احسن منكم
سلام : جااااااا انتَ عفتها كلها تروح تحب مرت امجد
صاحيييي انتَ لو مخبل بابا
شهكت و باوعت لروز دارت وجهة عليه بصدمة

دك هورن براس الشارع سكتوا كلهم لان هذا هورن سيارة زِناد
و خالد عقد حواجبة وجر الكرسي كعد على صفحة
الهوى يكفخ بارد ثلج مدري شلون كاعدين برة و بدون ملابس ثخينة
انطاني غترته و عبايبته و عگالة علگتهن و راح يمهم

روز و غريبة يرتبن السفرة بنص الهول
رهينة : تعالوا طبوا يجدة ثلجنة ترى
زِناد : وين البرد جدة الله وكيلج روحي فايرة
محمد : غير انتَ گلبك حار من يوم يومة

باوعله زِناد صفح و إندار على خالد
زِناد : شبيك كالب الچهرة و كاعد غادي
رهينة : عوفة يجدة هذا هم الله مسودنة ماكو غيرك بهاي الديرة صاحي

سلام : زِناد خوية إذا واحد راد يتزوج و الناس كلها كالتله هذا البشر غلط و هو مچلب بي شلون تتعامل ويا جا معقولة هاي الناس كلها غلط و بس هو صح
زِناد : معقولة طبعاً جا هو منو الراح ياخذة هو لو البقية

كام خالد من الكرسي كلساع يمسح وجهة كل ما يتقرب خطوة
و هم الواكفين على صفحة كلهم التموا سوه باوعلهم زِناد مستغرب
زِناد : خير كلبي لاعب منكم تدرون لو ما تدرون

خالد : شيخ أنا اريد اتزوج
- بيها الخير جا هاي من الزينات
رهينة : والله هي خوش بت صبرت و عاشت ويانة يعني منه و بينه بس بعد بكيف زِناد و أبيك

زِناد : منية جدة
خالد : حور ، بس اسمعني خل أفهمك
- مرت امجدددددددد شجابك عليها

محمد : زِناد بس البنية خوش بنية مابيها شي و هي أصلا انظلمت ويانة و خالد يعرفها هو اصلاً الاخذ شراع الها
يعني مو توه يعرفها
زِناد : شنييييييي يعني يعرفها من جانت متزوجةةةةة
امشوا طبو طبو جوه أنا أعلمكم

شريك : طبوا يالله ما تستحون يومية مطلعينا سالفة جديدة
تعبتوا اخوي ادبسززية
محمد : شبيها شمعة
علي : إذا ما تزوجوها الي اخطفها و اصخم راسكم
شريك : انجب لك محمد طيحت حضك تغريد و ما حجيت

محمد : شحدها غصباً ما على خشمها اخذتها
شريك : اي خريج السجون
زِناد : كاااااااافي لا الطخ راس براس

شريك : إذا دكول. شمعة بعد افلش وجهك
رهينة : جا و إذا كال هو مو اخيك شمالكم زعاطيط
علي : انتَ هم كله روز و انجبوا اثنينكم

شريك : مو ملطلط مثله انا
زِناد : يعني أنا اخلص من الكبار و اكول ارتاحيت تجيني انتَ تطلعهم كسر ، اسمع خالد ذولة اخوتك واكفين مرة ثانية إذا سمعتك تنفست بهذا الموضوع لسانك أكصة

مرتضى : ابوي بعدة ما يدري و احنه گلنه نگلك انتَ بالبداية
صارلة شهرين خابصنة بس انتظرنا يخلص زواجك على خير و نحجي وياك
زِناد : و أنا كلت لااااااااااا

سلام : هاي هيَ سدوا الموضوع و خالد هو عاقل هسة
يكعد بينة وبين نفسة و يقتنع بعدين هو الزواج قسمة وًنصيب

هم يحجون و اني واكفة بالمطبخ اباوع عليهم خالد بقى مدنك ما جاوبهم و لا حرف و زِناد عينة عليه اجوي محمد و علي اخذوا الصواني
مال الاكل كام خالد يريد يطلع
رهينة : تعال ولك وين شمالك تخبلت
خالد : اي تخبلت جدة موش وحد أنا عنهم كل وأحد حارب الدنيا كلها و تزوج و ارتاح و أنا من حجيت انسدت البيبان كلها بوجهي

زِناد : تعال اكعد لا اكوملك
يونس : تزعل على مرة هي هاي تاليها الزلم
خالد : مثل ما ولد عمك كاموا يبجون أنا طالع عليهم
زِناد : امشي اطلع برة لك

إسلام : اعترفوا ياهو بيكم باچي
مرتضى : ديالله هسة انتَ ما بجيت من زعلت مرتك مو
خالد راح و طبك باب الشارع قوي و جدة بقت تلوب
و اخوته يقنعون زِناد و يختموها بكيفك بعد

رهينة : شني سالفة بيوتكم ماتت بيهن حية شوكت يخلصن
علي : والله لعبت ارواحنا جدة
رهينة : و انتَ شريكان ما ترجعلة مرتة عود
شريك : خل يخلص بيتها و ياخذها

رهينة : جا ترضاها ابنك عمرة راح يصير أربع شهور و ما ينام بحضنك تشوفه حالك حال الغريب ليش يجدة
شريك : لا ما مانعي عن ابو شوكت ما يريد ياخذة يجي ياخذة و يبقى يمه بس هو غير يشرب حليب امه

رهينة : اخذة ابنك ولك و خليها تلوب لحد
ما تستسلم و تجيك غصبا اعلى راسها
علي : لا جدة خطية امه متعلقة بي اروحلهم أنا اروحلهم و اشوفة خو ما اخليها تبكي على ابنها

محمد : كون تسمعك امي
بنص الهوسة صعدت فوك حسيت روحي نعسانة بس من طبيت الغرفة اجتي وراي روز رحت وياها لغرفتها تذكرتها غرفة اهل زِناد لمن نمت بيها اباوع لكل جزء بيها قديم بس ريحتها تتجدد

بصف ميز المرايا ميز مجرات وحدة جوه الثانية
والأولى يدتها مكسورة فتحت الثانية و مديت ايدي من عدها افتح الجرارة الاولى بيها شغله تتحرك فضولي لحد ما فتحتها يالله ارتاح
اباوع الهن طلقة قديمة و قلم حمرة سحرية ملفوفات بچفية رجالية بس الطلقة جانت طالعة الچفية و تتحرك بالمجر
و الي باقية بس الحمرة بالچفية

باوعت الهن مستغربة و روز مستغربة وياي
روز : هاي العائلة كل ما تتعمق بيها اكثر تنصدم اكثر
باعي الطلقة يعني تهديد الحمرة بالله مادري شنو

جُمارة : انجبي انتِ يعني وين اكو واحد
مهدد وهيج عايش حياته
روز : عزه لعد بس لا يطلع سحر بهاي الغرفة اكول اني شو هالايام احس بخنگة لعنة الله على الشيطان

أخذتهن ضميتهن يمي و رحت للغرفة
روز : ولج يمصخمة عزه صرت تحججي مثل رهينة ولج خاف يطلع بيهن شي استري علينا
جُمارة : هاي من علامات الحب ترى شوفي شكد احبج أإذي روحي و ما أإذيج

روز : انهجم بيتج ادري تردين تلزميلج لزمة
على زِناد راح تموتين
جُمارة : اي الصراحة كمية الحب الحب جاي تقلقني
سمعت صوته من الدرج روز طفرت لغرفتها

ضميتهن بكنتوري و سديت الباب بسرعة طب للغرفة يريد ينام بس اصواتهم جوه بعدها
جُمارة : شعجب صعدت و هم بعدهم
زِناد : عندي الصبح روحة لغير محافظة و اريد انام
وهم كاعدين يم جدة

لزمت جف ايدة و هو يباوعلي مصغر عيونة بأيديه اثنينهن
لزمت جف ايده
جُمارة : ليش لحد هسة ضامهن عني يعني هذا حبك كله
مو صدگي ، ترى والله اموت عليك اني

زِناد : يولن حبيبي عوفيهن
- ليش ليش يعني انتَ بأسوء حالاتي شفتني و ما استنكفت مني و ما تخليني حتى ايدك اشوفها
باس راسي و خله ايده على ظهري لحد ما نَيمني بمكاني
و يضحك وياي لحد ما خلاني اغير الموضوع و انام

كعدت الصبح هو ما موجود خليت ايدي على عيوني افكر شلون و شوكت يصير وياي بدون قيود و شوكت راح اني ما ادري نزلت جوة
غريبة تطبخ بالغدا و روز كاعدة يم جدة يسولفن

رهينة : هلا بالعروس بعد وكت ماضل شي للأذان
جُمارة : و شعندي يعني رجلي و ما موجود
- اي صحيح ماعندج عيال كون احطج يم مرت عمار تطلعلج بصف گلبج گلب

جُمارة : عشتوو شحدها و زِناد موجود
غريبة : تعاي تريكي عيني

كعدت يم روز و جدة بيدي كوب الجاي و جدة تباوعلي ادري بيها شكد فرحانة بس هي غيرتها على زِناد ما تكدر تضمها
رهينة : شني هاي ركبتج ما تستحين
جُمارة : شعلية أني يعني غير هذا حفيدج المحروم على كولتج

رهينة : خلي بالعافية عليه بعد كلبي دافع
ماي كلبة على خلقتج
جُمارة : يكلي روحي هاي انطيها الج
- اسم الله على روحة عابت خلقتج

اجتي تغدت يمنه خالة ام شريك و عالية و شمعة سلمت عليهن و صعدت اكشخ لان وره الغدة هو يجي طلعت واحد من الثياب الحلوة الخيطتهن نورس لونه مشمشي و مخصر لازم قوانين جدة

بدلت و صعدن يمي عالية و روز
اتمكيج و اسوي حركات لابنها و ننتظرة يضحك
روز : ولج شلون صايرة على رجلج راح يصير سنه
عالية : جا اكسر كلام اخوي خاطر بعد بس أجيهم يشحتني من الباب و ما دامني يم عمتي يعني اول و تالي هم اجي زعلانة

جُمارة : جا شوكت تخلص بيوتكم
عالية : والله بعد يخية كلها وي عرسنه عرست هسة حمويني كلهم جاي يبنون واحد بصف الثاني و هم يشتغلون وي العمال اول ما يخلصون شغل

جُمارة : و شعليكم انتو غير بنيتو قبلهم
عالية : بعد امهم مربيتهم على الحنية بعد كلبي واحد كلبة على الثاني يكولون شلون احنه نكعد و اخوتي الكبار بعدهم وً بعدين عمي عمار لو اشتم ريحة هاي البيوت كلها لولدة ما يخليهم يكملون لو يموتون

جُمارة : شنووو وين لكيتي هاي الكلاوات يعني شنو لسه ما يدري جا مو جاي يبنون بالبيوت ما يحس
عالية : ولج والله و الحسين ما يدري لا عمي و لا عمتي
كايليلهم بيوت صحبان زناد و هم جاي يبنون بيهن حالهم حال العمالة كلمن بيوميته

روز : شلون اهل يعني عادي عدهم ولدهم يشتغلون عمالة
بس مال يكعدون ببيوت مو عادي
عالية : عشيرة الله مسودنها الله وكيلجن بس انا صاحية

جُمارة : إذا انتٍِ صاحية سلام الله على المخابيل
عدلت الشال و نزلنا جوة نسولف
رهينة : شعجب فك سراحجن شريك
ام شريك : زعلت عليه صار يومين يالله جابنه اليوم بالليل يلتحق

رهينة : بطنج كبرانة صلاوات يشمعة
ام شريك : الله يساعد شمعة عليه هي الطايحة بيها هالايام معرس عليها حتى بوشية يريدها تلبس
- يغار عليها جا غير هي صايرة تجنن و انتِ شمالج وين لسانج تعلمي من هاي العرمة خلته حتى الما يرضى واحد بيهن يسويهن لخاطرها

شمعة : موش كل اصابيعج سوه يجدة شريك مو هسة أنا من كبل اعرفنه شنو و جان من اهلي يغار عليه عاد ابو طبع ما يغير طبعة المهم هو احلى من العسل على گلبي
ام شريك : فاهية ما تراوي العين الحمرة
جُمارة : اول مره أشوف عمة توكف وي جنتها ضد ابنها

ام شريك : جا هي بنتي موش جنتي
كتلها امس ما تصيرين مثل عالية هاي الملعبة ضاحكة على الزلمة و مخليته بنص ذاك الليل يجي على شوفة ابنه عطشان يشوفة و يروح

شمعة : أنا احبنة عمة و اعرفنه هو شنو ينهار و يعصب
و يغلط و بعدين يهدأ و يرد بحضني
غريبة : هههههههه صارت بيها احضان انتهت السالفة
عالية : لا ولجن هاي امي شايفته بس من يعصب ما شايفته من يكعد ركبة و نص يبوس بطنها
ام شريك : قابل مثلج أنا ملطلطة أعاين من الشبابيك

نضحك بصوت عالي تغدينه و اجه شريك هو و محمد تغدوا بالحديقة
و راحن روز صعدت يم رجلها و غريبة نامت بغرفة جدة هو سوالها زِناد غرفة فوك بس هي ماتعوف جدة ، وكفت يم المغسلة أعدل بشعري و الشال
رهينة : شعجب كاعدة
جُمارة : منتظرة رجلي انتِ شعجب كاعدة

باوعتلي صفح دكت عليه انطاها رفض يعني جاي
طلعت بالحديقة لكيت البطة تفتر شلتها و غسلت حلكها بالصوندة مال المي سمعت هورن سيارته بره طبگها و سد البيبان

فتح باب الشارع و طب للكراج التفت للحديقة شافني ابتسم اخذت البطة و رحت يمة أتمشى على كيف هو بقى واكف
بمكانة صافن عليه ما تحرك
زِناد : شلونها جمارتي
جُمارة : إذا الشيخ زين هي زينة

لزم حنجي بطرف ايدة و بَاس خدي طبينه سوه و رجعت البطة بالحديقة
باس راس جدة و كعد كبالها على الكرويته
هي كاعدة بالكاع يمها الصوبة
رهينة : شلونك يبعد جدتك
زِناد : والله زين راح وياي عمي يعقوب ما حسيت بالطريق

رهينة : ان شاء الله دوم ، اليوم جانت يمنه
ام شريك و بتها و جنتها
زِناد : هلا بيهم البيت بيتهم طبعاً

وكفت يمه هو يباوع لثوبي و لوجهي
رهينة : ما تكعدين
هزيت راسي ما اريد هو جر ايدي و كعدني على رجله ضحكت
و مد ايدة على الشال غَطه ركبتي
زِناد : بديتي تتعودين
جُمارة : اي

رهينة : و ليش ما تتعود شو هي جانت سايبة مكضيتها وياك تفرفر بالسيارات لو خاف نسيتي
ما جاوبتها خليت راسي على مَتنة هو عاض شفته و لازم ضحكتة كوه
زِناد : اليوم المحكمة على أساس و خليت شراع يأجلها
والله جثير مسؤوليات ألواحد راسة ما يكدر يحكة

جُمارة : ليش يحكة قابل بس گمل
رهينة : ماكو گملة غيرج
كرصتة بظهرة بعصبية غمض عيونة يضحك
زِناد : هي كل گملة هيج حلوة عمي خل تنترس روسنة گمل

رهينة : عابت الها والله مطلع عينها
باس خدي و عدل گعدتي
زِناد : ليش ما تسوه هاي العيون تطلع

حضنته بأثنين ايدي و جدة تباوعلة صفح
جُمارة : فديت حياتي و عمري والله لو ادري الحياة هيج يمك حلوة جان من الطفولة عفت امي و بقيت يمك
رهينة : جا شني هسة انتِ جبيرة عود
جُمارة : زِناد اني مو جبيرة ؟

زِناد : لو عمرج يصيرن مية تبقين بعيني هلگدچ
جُمارة : يعني مو جبيرة
- شلون مو جبيرة اكو دكتورة مو جبيرة بس جاي أوصفة بعيني شنو

جُمارة : صدك و هي اهم شي عينك ما يهمني شلون تشوفني عيون البقية
رهينة : انطيني ايدج ولج خل أكوم انامن
جدة تحجي و عاقدة حواجبها مد ايدة لجيبة فتح المحفظة انطاها
خمسة و عشرين ضحكت

رهينة : تعال ابوسنك يبعد جدتك و عمرها فدوة لأيدك
زِناد : تأمرين امر جدة و شوكت ما تحتاجين ما يردج غير لسانج
جُمارة : و اني

رهينة : و وجعاني لا تحطين كورج من كوري شلج غرض أنا و حبيبي حفيدي ابني هذا چلاويي
جُمارة : رجلي اني و ابو جهالي طبعا ما اقبل واحد يشاركني بي
هو بصوت عالي يضحك عايش اللحظة

صعدنا فوك و جدة جوه بعدها تدردم علية
زِناد : لج جُمارة على كيفج وي جدتي تراها ما تتحمل تنقهر و تتمرض و أنا عليها الدنيا كلها أحاربها
جُمارة : مو صوجك يالله روح لجدتك و اني شمسويتلها شبيك هي أصلا تغورني

زِناد : هي مرة جبيرة و لازم نتحملها حبيبتي
جُمارة : يعني تحب جدة اكثر مني
- ولج الشرايج ما سون سوايتجن

مرن شكم يوم و يومية جاي باليل منزل هدايا من السيارة
و احلى الهدايا جانت من ينطون ظرف مال فلوس ينطيني الفلوس و يكلي اكتبي على الظرف رقم المبلغ و ضمي بالجرارة حتى من تصير عند صاحب المبلغ مناسبة زِناد لازم يرجعها بكدها لو اكثر منها و اني المستفادة

جُمارة : و شلون تعرفهم منو
زِناد : اسمائهم ترى موجودة ورة الظرف هُم هَم لواته ترى
جُمارة : هدايا مال ناس زناكيل شمعرفنا بيها
- ههههههه

- باجر دوام تدري لو لا
- اي و شكو يعني
جُمارة : سلامتك خوية ماكو شي
اباوع لوجهة حصرته الضحكة بس ما راد يبينها

زِناد : المرة ما الها غير بيت رجلها
جُمارة : جا اني ما ادري والله ادري و كلبي لاعب منك جنت ادري راح تغدرني ليش هيج زِناد مو وثقت بيك اني يالله طلگني

زِناد : ههههههه
هوً كاعد على طرف الجرباية بيدة تليفونه مديت ايدي على ظهرة
جُمارة : آخر شخص بالدنيا توقعته يغدرني هو انتَ زِناد ليش ليش
مو اني اني حبيبتك و جُمارة گلبك و صدك اني ليش أتوسل بيك تطلكني و ارجع يم ابوي احسن

دار وجهة عليه و مد ايدة على بطني و اني منهارة ضحكت بصوت عالي لان يقرقرني و من اضحك يعصر شفتي بجف ايدة و يبوسها
زِناد : كتبج جبتيهن ما جبتيهن
جُمارة : لا كللهم خل امي تحضرهن كلهن راح أخابرها و انتَ روح جيبهن

زِناد : اشتغل عندج انا شنو
جُمارة : حياتي شعندي غيرك احبل اجيب
يباوعلي و اجتافة تهتز من الضحك جابلي الكتب بالليل و حضرت ملابسي و هو كل ما يصيح جُمارة اكول ها حبيبي حتى باجر الصبح من يشوفني كاشخة ما تجي لحظة ادراك و ينقهر عليه

كعدت الصبح على صوته هو واكف يم الميز يريد يسبح و يبدل جوه
فتحت اديه اثنينهم و حضنته و هو واكف باس راسي و نزل رحت
غسلت وجهي و وكفت ابدل سمعت صوت ابوية جوه الحمدلله
رتبت وجهي و نزلت يمهم كلهم يباوعولي و لا عبالك صارلي قرن أداوم

تريكت وياهم و طلعنه و اني كلساع اباوع لزناد صعدنا بالسيارة
يعقوب : شلونج يابة شلونه وياج زِناد
جُمارة : زين يابة طبعاً

- بالله تعرفين شعندج من امتحانات من واجب
جُمارة : لا خلي أداوم و اشوف
زِناد : اي حجاية زايدة يحاجوج دكي عليه
- ماعندي رصيد
- رمشيلي

نزلت بالباب و طبيت للكلية و حنين ما تحاجيني لان اني من اخذلي زِناد اجازة غلقت التليفون خاف. تدك عليه و تكول ليش ما تجاوبني
و اضطرّ أعزمها و اني ما أريدها تتقرب لعائلتي و لا حياتي

مشت اول محاضرة زينة بس الثانية و الثالثة ترزلت علمود الامتحانات الي تأجلت بالمحاضرة الرابعة من رزلتني الدكتورة احس روحي انهضمت و حتى الحجي ضاع عبالك متحلفين من يشوفون وجهي يحجون على التأجيل بصورة عامة النوب يرزلوني
- يعني هنا عندكم شسمها جُمارة
كل امتحانات الاسبوع تأجلن و اسمها يفتر بكل سجلات الغياب لا امتحان و لا امتحانين اربعتهن

جُمارة : دكتورة جان عندي ظرف و اني ماخذة اجازة
- اجازة شنو ماما هو امتحان امتحنه و اطلع ، اجازه وين كاعدين بالمدرسة احنه ترى هاي جامعة
و اني حالفة كل الي أجلوا ما امتحنهم

جُمارة : دكتورة لو ادري هيج جان اجيت امتحنت زوجي من اجه اخذ اجازة من العميد ما كاله هذا الكلام شلون ما تمتحنيني جا منين تحطيلي درجة
ما باوعت للقاعة الي نصها التفتت من كلت زوجي

- اي رسوب كل الي استهزئوا بالمادة و شعليه بزوجج اني منو الطالب انتِ لو هو
جُمارة : دكتورة كتلج هو الي طلبلي اجازة و لو ادري الامتحان ما ينعاد جان اجيت امتحنت و طلعت
ترى اني درجاتي زينه بهاي المادة

- لازم واحد بيكم يتحاسب حتى يصير عبرة للبقية
جُمارة : بس مو على حسابي دكتورة رجاءً و العميد هو يتحمل مسؤولية رسوبي لان من عندة اخذت الإجازة

- شنو انتِ عايشة اللحظة جاي تجبريني أكون مصرة على قراري و تنحرمين من الامتحان
جُمارة : من رخصتج دكتورة
طلعت من القاعة و الدمعة بطرف عيني ثلاث رزايل وحدة ورة الثانية
ساعة السودة الي ما داومت بيها

بيدي التليفون ايدي ترجف من العصبية دكيت على زِناد دك تليفوني مادري منين رصيد انتبهت للإشعارات هو محولي
خمس دولارات
- ها حبيبتي
الدمعة صارت بطرف عيني مسحتها

جُمارة : زِناد شسوو بية علمود الأجازة كل شوية دكتور يرزلني كدام الطلاب و هسة الدكتورة دكلي ما امتحنج
مو كتلك اجلها على العطلة ليش ما تتعاند انتَ

زِناد : تبجين لج جُمارة صدك تحجين هسة جاي
جُمارة : لا تجي عفية هسة يشدون وياي بالزايد و يرسبوني
عليك الله بداعت امك لا تجي
- جاي جاي انا اعرف ويامن احجي معليج
جُمارة : زِناد لا تجي
سد التليفون بوجهي ضربت كصتي خفيف و طلعت برة انتظرة

نزل من السيارة و اني احاول ارجعة
جُمارة : زِناد بداعتي بداعتي اوكف
زِناد : ترى ما رايح اتعارك ويا واحد شني جاهل كبالج يالله
امشي وياي أنا اعرف ويامن احجي

جُمارة : زِناد يشدون وياي والله
- امشي بابا امشي
لزم ايدي و اخذني للعميد حِجة ويا وسألني على الدكاترة مال يا مادة
دز عليهم العميد بس الدكتورة عندها محاظرة هو العميد راح الها للقاعة

خلصت المحاظرة و طلعوا العميد و الدكتورة
زِناد حجة وياها بأحترام
- والله دكتورة هي ما قبلت اي اجازة اخذ الها كلش حريصة على دوامها بس لو ما عرس و مجبور أغيبها ما اخليها تغيب
- عرسكم يعني
جُمارة : اي دكتورة

- إذا هيج عرسان جدد نطيح الكم الموضوع من الأساس ما ادري زواجكم لو كايلتلي طابة بنص عيني لا عيني تدلل و هي بنتنا و عروس من حقها
زِناد : الله يسلمج و يخليج

راحت الدكتورة و العميد ضل يحجي وي زِناد شوية وخلص
زِناد : يالله الساعة ١١ خل ارجعج للبيت لو شنو
جُمارة : زِناد لا حباب بعد وراي محاضرة خلي افهمها
يعني منو يرجع يفهمني
- ديالله ديري بالج على نفسج دكي عليه قبل لا تطلعين
- ماشي
راح و بقت عيني عليه بي طبيعة إذا مشه ما يدير وجهة ابد
و لاحضتها عليه اكثر من مرة

كعدت بالحديقة وحدي حنين عينها عليه و داخلة بغير شلة هي و كل البنات كل شوية يسولفن و وحدة تلتفت عليه خلصت المحاظرة الاخيرة
و اجه أخذني ابوية ويا وكاعد ليورة شاب يشبه ولد عمي عمار
بسرعة اجه على بالي حَسن اتذكر شايفته اول ما اجينه لبيت جدة

من وصلنه للفرع مالتنة اخوته كلهم واكفين برة و امه و جدة واكفات برة
و ي وكفة سيارتنا صار الرمي عالي من صفحة بيت ربيعة و الهلاهل بصوت عالي
زِناد : طبي بساع يالله يابة

جماعتنة هم كلها كامت ترمي و هلهولة امه تعادل هلهولة عشر نسوان
و من بيت عمي عمار ينطش الجكليت و الجهال تلم بالجكليت
و جدة تهوس حلو الفرح من يمر علينا بس تذكرت ضحكة امير و هضمة أمي هسة
....

" عالية "

عالية : علاوي مو هيج تكضة شمالك لا ينمتن الجاهل
علي : جا شلون و انتِ شني هسة عود يعني تعلميني

عالية : جا شلون ما اعلمك انتَ شمعرفك شني قابل مربي جاهل قبل اعترف بعد كلبي اعترف
علي : هو انتِ و متندم عليج بعد گلبي
اخذت الطفل من ايدة و حطيتة بحضني قَربنه اله اثنينه و خلانه بحضنه
عالية : ترى سمنانه لا تنكسر رجليك
- دمشي وياي يا عيني

- ترى موش حسبالك مكيفة أنا هم جثير مشتاگتلك
بس جفيني شرك بعد كلبي علاوي انتَ ما شايف امك شلون تعاينلي بيوم عرس زِناد و جُمارة

علي : هسة اختلف الوضع انتِ كبرتي و صار عندج جاهل
عالية : والله لو عشر فروخ يصيرون عندي امك هم
ما تعوف بنات خالاتك و هدى اول و تالي تاخذها
- لا ولج تزوجت

عالية : ولجج شو جنك مقهور علاوي صخام بوجهيي لا ضايج خاف جنت رايدها و تخاف
- منين خايف خايبة ما تنحبين شني اخاف منج طاح حظج
جا هي مو بذمتي و أنا طلكتها

- اي و هسة أجتك صحوة ضمير مووو خاف حنيت تتذكر من جنت أنا مشمورة بالكاع و تطب هي للغرفة تتمخطر تبوسك گبالي ، صدك أنا شبساع نسيت

علي : هههههه ديالله امشينا يا عيني
عالية : لا والله أنا صبرت صبرت و تحملت كلشي وحدي تريدني هسة ارجع و اكعد اخبز و انظف و محد راضي خليني هنا اخدم امي احسن

- مرت أخوج مو حامل ، من طبيت
رادت تطيح على وجها
عالية : اي مو شريك ما يرضى يشوفها
احد و هي تخاف منه
- ادري جا ليش فتحت الباب و هذا شريك شني ما يأمن بينه
شو مدري شلونه صاير

عالية : لا يمعود مو هيج هو مكروه مكروه بالغيرة
هي اصلاً مدري شلون جارعته
علي : طبعا بعد هذا الحجي ما يصرف الجن تردن حرية

ضحكت و انطاني مصرف ، راح و رحت يمهن امي بالشتاء تهيج عليها مفاصلها تكوم بالكوه تتحرك و شمعة ما نهون بيها حامل و تخلص ا لايام اليلتحق بيهن شريك كلهن تبجي و مريضة
اخلي زِناد يمهن و أنا اكف البيت بساع بساع
و هاي وحدة من الأسباب الما تخليني ارد ، لان انقهر عليهن
اثنينهن ينراد الهن مداراة

اندك الباب و سمعنا اكثر صوت نكرهة ديانة شريك الما بقى منهم غير ذولة الاثنين و هو يسددهم كل شهر بس هم يستغلوها من يلتحق حتى ينضغط عليه و يدبرلهم ، لا يرضى اني دكول لزناد و لا لجدتي و لا يكدر يتداين بعد جماعتة كلهم تداين منهم و لان تأخر بالتسديد ما يرضون ينطوه بعد

كل ما تطلع الهم امي يستلموها صياح و بصوت عالي بالشارع و هي تطب مهضومة تضل يومين مريضة و ما تجيب طاري لشريك حتى
شمعة : الله لا يوفقكم مو تدرون بي بالدوام
ام شريك : مال المرض هسة شني بايگكم مو جاي يسدد بيكم

عالية : هاي ثالث مرة يجون و ما نفتح الهم الباب
ام شريك : بلكي هسة يأيسون و يرحون
بقوا يدكون و يصيحون بصوت عالي امي كامت تبجي
و شمعة انهارت بعصبية عدلت حجابها و طلعت امي صاحت وراها ما دارت وجهها

طلعت وراها اركض فتحت الباب شوية و غطت نص وجها بالشال
شمعة : شمالكم خوية مو تدرون شريك بالواجب اليمر منا و يعاينكم هيج تدكون الباب و تغلطون موش زحمة و فشل و احنه وادم شيوخ ما تلوك هاي الوكفة بـ بيبانة
عدنا زلمة هو يتفاهم وياكم

- ما تجاوبون إذا موجودين شنو زعاطيط احنه هنا
شمعة : يعني انتو عظمة ما تدرون بشريك موش هنا و احنه حريم و حجيتنا مريضة من وراكم نايمة بالفراش ليش شني قحط الفلوس تراها وسخ دنيا

- شتصيرين من شريك انتِ
شمعة : مالك غرض شأصير منه ، أنا مرته ام ابنه وًكلنه هنا حريمة و تراه دمة حار الله وكيلكم لو يدري بسواياتكم يخزيكم بس احنه ما نريد مشاكل و ما نوصلة

- ياااااالله خل يجيب الفلوس هذا الحراميً
شمعة : ماكو حرامية و ما يستحون غيركم
حجتها و طبكت الباب بوجوهم ، هم بعد ما نطقوا حرف واحد
عالية : والله صدمتيني تدرين لو لا

ام شريك : شعدجن طلعتن مو صحت وراجن وعلي لو يدري بيجن يذبحجن على البلوعة خاف ما تدرن
صارت امي عصبية علينه و تغلط بصيغة جمع تالي زعلت شمعة و صعدت فوك تزاعلت بالليل و الصبح تصالحن

حطيت صينية الريوك و حضرت المنخل و المعجنة حتى اعجن و اصعد اخبز اول ما شربنه الجاي دك شريك على امي و مثل ما متعودين اني من تحجي ويا تفتح سبيكر حتى كلنا نسمع

ام شريك : الو هلا يمة هلا بعد كلبي شونك
انجويت بالجاي و صرخت من سمعت صوته يعيط وشمعة شهكت
شريك : يمههههههه شلوني يمههههه شمعة شعدها طالعة لذولة السرسرية ولج يمهههه صدك تحجين

ام شريك : اسم الله الرحمن يمة شبيك اسمعني خل احجي
شريك : شتحجين يمة شتحجين تطلعين شمعة لذولة ولج يمة تدرين بذولة شنو من نواقيص وعلي إلا اذبحها اليومً
شمعة اذبحها

ام شريك : شمالك يمة كول يا الله مرتك مريضة وًحامل
و هي ما طلعت الهم من وراه الباب رزلتهم جا فضحونا فضيحة و أنا امك والله يا يمة مريضة و رجلية سگط

ام شريك : عالية ترجع لرجلها و شمعة تولي لاهلها
و انتِ يمة انسي عندج ولد افتهمتي لو لا
و إذا سمعت احد يدري بهاي السالفة ما تلومن غير أرواحجن
حجاها و طبك التليفون شمعة من الخوف تخربطت و امي تدك عليه يطلع الها مغلق دكوم تفرفح

شلت الصينية و احتاريت بيهن كل شوية اندك عليه يطلع مغلق
عالية : هسة اليوم هو عصبي ما يتحمل يومين وًيلين عوفنه
ذولة شنو من سرطانات الله يعلم شگايليلة
ام شريك : كتلجن كتلجن لا تطلعن بس ما تتعادندن انتن
امي تريد تحجي اكثر من هيج بس تخاف على شمعة لا تتخربط

ساعة تبجي و ساعة دكللها هسة يلين و أنا احاجي اعرف شلون افهمة
مر اليوم الاول و الثاني و الثالث و شريك ماكو امي و شمعة اثنينهن مريضات و بيديهن التليفون يدكن عليه ما يجاوب

اجه يوم نزولة و ما نزل امي انهارت من اجة علي يريد يلتحق جايب
النه مسواك وشاف زِناد و راد يروح
علي : جا ليش شريك لسه ما نزل
عالية : ما ادري حتى تليفونه مغلق و ما نحصلة
- ما بي شي لان زِناد هم خابرني و خابرت الولد يكولون
هذا كبالنه زين بس ضايج

عالية : اي هو و مرته تعاركوا و ما يرضى ينزل يمكن
عود هاي خوش فيكة مال زعل لازميها انتو ما تستحون
علي : لان ما تنجرعن

راح و طبيت الهن فرحانة
عالية : لا يضل بالجو ما بي شي و هسة علي كالي جماعتة محاجيهم يكلولة هذا زين بس ضايج كتله هو و مرته متعاركين
ام شريك : اي زين تسوين حتى ما يضلون يسألون

صار كل يومين زِناد يدز النه بيد واحد من الولد مسواك و جدة تجينه
تواسينة و تحجي على شريك
رهينة : والله زِناد كلب الدنيا گلاب عليهم خابر علاوي يوصله يكله انتو واحد انكس من الثاني نسوانكم تزعل ما تودوهن لأهلهن ترحون تعوفون البيوت و تزعلون بالواجب

ام شريك : هسة أنا امه مو يدري بية مريضة ما يرف كلبه و ينكسر عليه هيج حليبي ما غزر
رهينة : يرد يرد هسة يأيس و يرد
خلصت ايام نزولة كلهن هناك و ما اجانه و بعدين صار التحاقة مرة ثانية امي دكت على خالي كاعد بالناصري بس هذا خالي بقى عايش
اجانه ثاني يوم تغده و امي سولفتله كلشي

بات يمنه و ثاني يوم راح لنقطة التحاقه و احنه كاعدات على احر من الجمر ننتظرةً شوكت يجي خابر امي و كاللها ما يقبل يشوفني
امي تحجي وي خالي و تبجي لحد ما اجانه بالليل هو هم خطية تعبان
ام شريك : ارتاح يخوية
- والله خوية ابنج هذا الكاع ما تجرعة شلون شالته بطنج
عالية : خالي هو أصلاً ثميني مدري سبيعي

ام شريك : شفته يخوي
- اي والله بس بالشافعات من خابرتج و بجيتي جان يسمعج بس ما رضى اكول هو يمي
- و ما انكسر كلبة على امه
شمعة : عمي شلونها صحتة

- زين و أنا حجيت ويا كلشي بلكي كلبة شوية يلين و يرجع يرجع ان شاء الله أنا رزلته و طيحت حضة
ثاني يوم اهل شمعة مدري منين سامعين هو ما يحجي وياها
اخذوها اخوتها و اني انهارت بالبحي

و اني محتارة بيها اخاف لا تنجلط و تنقهر دزيت رساله لعلي
يوصلها لواحد من جماعة شريك على امي تالي شريك قبل لا ينزل رايحله و كايله بعدني ابدل لزناد الصغير اندك الباب و طلعت افتحة
شريك خزرني كال السلام وطب جوه

فات علي و زِناد الصغير بحضنه امي مصخنة تون و تشمشم
بشريك لحد ما راح علي دار وجهة عليه
شريك : ما رحتي وي رجلج
عالية : خوية مرتك مو هنا و امي مريضة منو يداريها

شريك : شوكت راحت
عالية : قبل أربع ايام اجوي اخوتها أخذوها هي ما رادت تروح خوية والله شمعة ما سوت شي و عافية ابني
هي شالتها الغيرة عليك
- اششششششش سدي الموضوع

جفلت و الطفل كام يبجي اخذته و طبيت للغرفة
و هو كا يعاتب امي بصياح
شريك : يمةةةةةةة شايفيها شايفيها تدرين شني شايفيها
عينك عينك يكلي خوش قطعة عندك
يقلدولي صوتها من دكللهم أنا مرات شريك

ام شريك : ليش يمة باجر تتحاسب المرة حامل و انتَ مرضتها هضمتها و هضمت ابنها ترى هاي شمعة يا شريك
عاف امي وصعد فوك

النوب ثاني يوم اشتغلت بصمات اخوتها لشريك من فتح تليفونه لان هي ما دكللهم شبيها و تعاركوا بالبصمات لحد آخر بصمة دزها كال الهم يالله اختكم خلوها يمكم أنا ما أريدها بـ بيتي

هو يحجي هيج و وجهك من القهر محتقن والله الزلم مو صاحية
و هنيال شمعة من شردت و راحت لاهلها لان عَيشنة حرگ اعصاب
أنا و امي لازمين إنذار منه و امي كلساع تهدي بي و من ينام تقرالة ايات

عالية : شني ايات يمة شني مسودن هو
ام شريك : خايبة وعلي اكعدة اخلي يكوم يطلع حركة كلبه بيج ابنيي منفوس هو و مرته من تزوجوا لليوم ما ارتاحوا دين و اعصاب
و عركات و مرض

عالية : عمّي على هاي اعصاب شريك
شلون خلاني عايشة على مكسراتي
ام شريك : جفيني شرج اسكتي و صمي حلكج

دكت شمعة على تليفون امي طبيت للغرفة أجاوبها من كتلها هنا
ما صدكت من الفرحة بس بقت تسولف الي شلون اخوتها و ابوها معاندين ما ترجع بعد
عالية : معليج معليج امي هسة تخلي يجيج وًياخذجً
شمعة : اي خل يجيني حتىً لو نبقى متزاعلين بالبيت اني هنا يم اهلي مختنكة ، تعودت عليكم اريد ابقى يمكم

عالية : والله هو حتى البيت بدونج ما يسوه و كئيب هذا زِناد ابني يصيح وين عمة
شمعة : انجبي شبساع كام يحجي
- دولي مو صوجج لا تصدكين هسة تجين و تسمعين

خلصت ايام نزول شريك و احنه يومية تكب العيطة من امي تفتح ويا موضوع شمعة بدل و راد يروح امي لازمة ايدة
ام شريك : شمالك يمة مريتك و ام ابنك جا هي غير شالتها الغيرة عليك رجعها بعد كلبي رجعها يمة والله مشتاكتلها
رجعها و لا تحجي وياها

شريك : روحي انتِ عود رجعيها
حجاها وطلع امي كيفت بدلت و كالتلي بدلي طلعت و أنا شايلة ابني بيدي و احنه فرحانين ما دام راح ترجع يعني انحلّت السالفة كلها
رحنه لبيتهم كلها خازرتنة بس امها رحبت بينه

هي كيفت بينة و عينها على الباب بلكي تلمح شريك
عالية : الأمر خابرة عصبي تالي كال لامي روحي جيبيها بين ما ارجع هو هم جان مريض ترى و اكيد عليج
شمعة : يمة اسم الله عليه شبي ولج عالية

ام شريك : لا شرب دوة و صار زين يالله حضري هدومج حتى ترحين وياي أنا اجيت اخذج
شمعة : اي اروح
ام شمعة : والله عذرينا ام شريك أنا لو ترجعلي اكلج اخذيها و روحي بس ابوها و اخوتها ما يقبلون و راكب رأسهم

ام شريك : بعد كلبي عدها مراجعة للطبيب بلكي اليوم نعرف بيها وليد بنية صار سونارين نسوي و ما يبين
حاجيهم انتِ خل اخذ شمعتنا و نروح

ام شمعة : والله ما يرضون ذولة واكفيلي
بالباب يخوزرون بية
شمعة : يمة معلية بيهم أنا اريد ارجع وي عمتي
جلبت بأمي و امها تعت بيها و عينها على الباب تالي طبوا اثنين
من اخوتها يخوفون اعصاب جروها من ايد امي و طلعوها من الهول كله وهي تبجي

ام شريك : شجاكم عيني يعني ما تشوفين البنية شلون تريد رجلها و هي حامل لا تطيح و تتمرض شنحصل نحصل روسكم اليابسة
ام شمعة : والله تعبوني والله كالبين حياتي جحيم هم و ابوهم مرمروني ساعة السودة الانشمرت بيها بنصهم

طلعنا و امي تغلط عليهم و على شريك خابرته تعاركت ويا
و سدت التليفون بوجها بالليل خابرها و سولفتلة شسوو بيها من راحت
شريك : يالله خليها غادي يم اهلها أنا من اجي أجيبها
و أحرم عليهم شوفتها بعد

دكيت عليها لكيت تليفونها مغلق ردت اكللها حتى ترتاح شوية مرن جم يوم و تليفونها ما انفتح امي كالت اكيد اخذوا تليفونها منها
بقت امي تلوب عليها علي يجينا و يروح و يصورلي البيت و اخيراً
بدت تبين معانية

بعد يومين و ينزل شريك اندك بال الشارع قوية طلعت افتحة لأن امي من وراه البرد السوفان يومية هايج عليها انصدمت من طبت شمعة تركض و امها كاعدة بالتكسي من شافتها طبت كالتله تحرك و راحت

عالية : ولج ها شمعة شكو شكو
شمعة : امي جابتني لان ابوي و اخوتي راحوا مشية و راح تكللهم شريك اجه اخذها ، خابري و كليلة شمعة عدنه خاف يخابرونة

عالية : ولج هو راد يجيج بس ينزل شكد ادك عليج ما تجاوبين تليفونج مغلق
شمعة : اي اخوتي اخذوه مني
امي كيفت من شافتها نيمتها على رجليها

ام شريك : المهم امج تدري مو
شمعة : اي اي عمة هي وصلتني أصلاً و راحت
- يالله هاي هي هسة تدربها و تسكتهم
- والله عمة هم هَم ساگميها و ساگمين نسوانهم اخوتي مكرهين دكولن شلون متحملة شريك لأن أنا متعودة على اخوتي شريك يمهم لا شيء بهاي السوالف

ام شريك : هو على أساس يجيج بس ينزل كال بعد لو يموتون ما تروح الهم
- لا لا ما اروح بس خلي يرجع واشوفة عمة كلبي راح يطگ عليه

دكت عليه امي و فتحت سبيكر كالتلة مرتك هنا جابتها امك إذا سألوك كلهم أنا اجيت اخذتها
شريك : شوكت اجتي و ليش تطلع بدون علم احد
ام شريك : يوووووووه شريك چفينا شرك و إذا ما تتيدب
اخذها و اهج و أخليك بحسرتها والله والله

شريك : تشتغلن ضدي شنو
شمعة : بية ولد
هلهلت امي و باستها و هو سِكت
- يالله في أمان الله
حجاها وهو يضحك

شمعة : عمة خاف النوب يجي هنا يسگمني بهذا طبعة
و راسة اليابس
ام شريك : ما يتحمل هو يعاين عيونج يسيح ما تشوفين ما اجه إلا من رحتي لاهلج يدري بروحه ما يتحمل

بقينه نضحك و كاعدين نضحك الف الحمدلله و الشكر رجعت لمتنة
ثاني يوم أنا وياها كاعدين نعجن عجينة كليجة و امي يمنة تلفها ويانه
عالية : بس احنه نعجن كليجة الصبح حتى عند الأكراد
سالفتنا ما صايرة
ام شريك : من يجي اخوج و رجلج يجي يشوفج حاجي شريك و رجعي لرجلج يالله كافي تراها صارت ماصخة

عالية : اي راح ارجع شسوي أتحمل امه شهر شهرين
لان مشتاكتلة بعد ما اكدر والله من يروح تضل روحي تحومي ورا

عفتهن يسون كليجة و كنت طبخت الغدة استوت الكليجة و تغدينة
و غسلت الماعين و ادردم عليهن أميرات كاعدات يسولفن و انا اخدم بيهن والله ما تنلام بية عمتي اخبز الهم و اكلب الدنيا كلاب و هنا اشتغل اكثر من الخدامة و ما أفك حلكي بحجاية

شمعة نَيمت زِناد و خلته بالغرفة و امي طبت كوه تسحل بروحها
والله كاسرة كلبي شكد متأذية من رجليها دك تليفون امي يمي بالمطبخ لكيته شريك جاوبته كالي انطيني شمعة رحت الها اركض يمكن شمعة مو بكدي جان فرحت

عالية : هاج رجلج يريدج
انطيتها التليفون و فتحت سبيكر ضربتني على ايدي و وجهة اصفر
كالت الو و صوتها يرجف
شريك : شونج
كامت تبجي و هو يكلها اي ابجي حتى ما تنعاد
هاي السالفة بعد منا لحد ما تموتين
شمعة : التوبة والله التوبة إذا عدتها

شريك : شلونه ابني ، شلون صرتي
شمعة : و توك تذكرتني و تذكرت ابنك ليش هيج تسوي بية
- اني محذرج وانتِ ما تسمعين الكلام هاي اعتبريها
جرة أذن مرة الثانية راسج يتكسر

شمعة : انت شلونك بعدك مريض
شريك : أنا جاي شوية و أوصل حضريلي روحج
دفعتني و سدت السبيكر و صعدت تركض تحجي ويا فرحانة
نزلت بيدها هدومها تريد تسبح
شمعة : عفية عالية بداعت ابنج ما تخبزين ما عدنا خبز
و يكول جوعان اريد غده

عالية : يمعودة حتى لو ما بية حيل اشتري الحيل روحي روحي سبحي خل اعجن انفكت الجبسة و اخيراً رايتك بيضة يربي

كعدت بالكاع اعجن و اضحك اليوم شمعة من الفرحة راح تطلگ خليت المعجنة يم الصوبة حتى يختمر العجين و صعدت نضفت الهم الغرفة
لان هي ما تصعد الها امي تخاف عليها و صار الها هواي متروكة
و المرة بهاي الأشهر من تكبر بطنها حتى روحها ما تطيقها

غيرت الفرشة و كنستها و عطرتها فتحت الشبابيك و نزلت
عالية : ولج شمعة مو هواي تبطين بالحمام ترى الماي الحار يسهل الولادة ، اضل امشي و اعلم

الصوبة راح تطفى ما بيها نفط اخذت المعجنة وصعدت عود من انزل اترسها و أطب اسبح لا يجينا هسة هو يريدلة حجة
شغلت التنور بالسطح هذا البيت ما أحبنه لان حايط السطح عالي ما يخلينا نعاين زين

شنگت الخبز و بديت اخبز النوب اصوات هاي المدارس اليمنه غدي اول ما يحلون يهرجون الدنيا بس احس ايدي انشلت و ما اكدر اصفگ العجينة بيدي من اسمع صوت بابنه انطبگ و وحدة تعيط
احس كلبي انقبض هديت العجينة و ردت اصعد على الحايط ما كدرت نزلت اركض اصيح شمعة اريدها تكلي هاي شكو

اشم ريحة النفط تارسة البيت و الغرفة لحد ما نزلت جوه أطراف المدة
مشتعلة و باب غرفة امي مفتوحة شهكت و احتاريت شسوي ادية انشلت و اصيح شمعة بعالي صوتي ما هي بالبيت عقلي كام يحير شيفكر كعدت امي تعيط من شافت النار مدري شلون جريت السطل من الحمام و غركت البيت وبالي مو يم النار يم شمعة
ام شريك : منين هاي النار يمة
عالية : ولج يمة شمعة مدري وين سمعت وحدة تعيط
طاحت امي بالكاع

عفت كلشي و طلعت حافية من دورت على العباية و ما لكيتها
من شهمة روحي الدنيا برة انكلبت كلاب بالعياط طلعت مفرعة بدون كلشي أعاين العالم كلها ملتمة و طلاب المدارس كلها تعاين
عالية : شمعةةةةةةة ولج شمعةةةةةة

ما اسمع غير العالم تصيح لا حول الله
كمت أعيط أريدهم يوخرون حتى اشوف شنو و كلبي يرتاح
ان شاء الله الجاي افكر بي مو هو لا لا مو شمعة
عيطت و صفكت وجهي بأثنين ادية ولكم شجاي اشوف اني

هذاااا شريك شجابة شريكككك
ولج شمعةةةةةةةةة ، شبساعععععع

جُمارة :: واكفة وراهم بالمستشفى و هم أديهم كلهم روسهم ما مصدكين الجاي يصير يحجون بعياط من خابروا زِناد و اني كاعدة يمة بالسيارة نريد نروح لكربلاء نزور و معزوم من ام صديقة
شلون تحولت هاي العزيمة لروحة للمستشفى
جُمارة : شكو زِناد
زِناد : مادري اسكتي اسكتي

و بقيت صدك ساكتة من طبينة للستشفى و لكيت الدنيا و العالم كلها مخبوصة على اثنين بس شبيهم ذولة الاثنين ما ادري
ولد عمامي و عمامي كلها هناك و مرت عمي فاخر وياهم
علي يركض يروح ويجي بين الغرف

عمار : خاف اخوتهااااا اهلها ووووووين ليش ما اجوا
ركضت على مرت عمي فاخر تلطم على وجها باثنين اديها و كلهم يدكون على روسهم و يصيحون شلون
جُمارة : عمة شكو
سمعت رجال بعالي صوته يكلهم اني بيدي غطيتهم
كلهم انداروا يسمعولة و محمد واكف كباله يحجي ويا

- الله وكيلكم و العباس كفيلكم بيدي أنا أنا غطيتهم طلعت المرة من بيتها محتركة تعيط تريد اليطفيها من شافت حَلة الولد و كلها تعاين عليها حارت وين تضم روحها من المستحى لحد ما وكفت سيارة تكسي ونزل هذا الرجال يركض
هو هم من شهمة روحها احتار شلون يطفيها و يسترها شبگها و اشتعل وياها

كاموا يصرخون بعالي صوتهم محد مستوعب اجوي اهل شمعة ترسوا المستشفى و انكلبت الدنيا كلها واكفة اني على جهة ابجي
حتى عالية بالمستشفى و رجلها محتار بيها
اجتي الدكتورة تركض بيدها طفل لافينه بملحف ابيض انطته لعمي عمار و حتى الدكتورة تبجي

- هذا ابنكم ماتت امه بس هو الله كاتبلة حياة جديدة
لازم احد يبقى ويا بالخدج لان الطفل نبضة ضعيف
ضربت راسي بالحايط و ام شمعة ملخت روحها و اخوتها و ابوها
انهاروا بالصياح و التهديد علينه لحد ما طبوا شافوها

ام شريك جابوها للمستشفى فاقدة الوعي بقى عدنا امل من كالوا شريك بعدك عايش بس هو نسبة الحرق عالية و دمة متسمم شفت الطفل محد بحالة و مرت عمي فاخر احتارت بأم شريك
لان هم حالتها خطرة

رحت للخدج لكيت الطفل يبجي و صريخة تارس الردهة
مكتوب على اسمه جعفر شريك على اسم جدة
شكل الطفل يخوف صغير حيل و يقهر هو يبجي و دموعي تجري ويا
يا روحي امك جابتك و ما شافتك شكد قاسية هاي الدنيا

و شكد ما عندك حظ انت من اول لحظة بحياتك
من شفت الأمهات شلون يعاملن الأطفال الي بالردهة كلهم مثلة حسيت بالانتماء بقيت يمة و حفظت دواه كل ما يبجي تطيح دموعي
احس كلنا احسن من عندة

كل واحد بينة ملتهي بشغلة و الحزن هاي المرة مو مثل كل مرة
جانت اقوى غيمة تمر على ال سرهيد مثل الخيط الي افتر على كل الحلوگ و خَيط كل الضحكات الجانت مرسومة

مرت عمي فاخر تروح و تجي عليه والولد اخابرهم من يكتبون شي من برة و بقيت شايلة هم زِناد ما اريد اشوفة و هم يشوف شريك شلون يموت باليوم الف موته وهو متعلق بيهم كلهم و يخاف عليهم اكثر من الاب على ولدة

كلها مأيسة من الطفل يعيش الأطباء و البقية بس أني جنت احس ما دام انكتب اله عمر بنص رحم هاي المعاناة يعني اله مشوار قوي بهاي الحياة و اكثر. كلمة اسمعها و انقهر من يكولون خطية يكون احسن اله
دنيا بدون ام ما تسوه

اجتي ببدالي نورس بقت يمة وًاني رجعت للبيت ابدل احس روحي تعلقت بي و ما اكدر اعوفة يم غيري شارعنة من اول بيت نشتم بي ريحة موت و حزن الوجوه كلها تتصفن بالفراغ
بدلت و جان خالد موجود خليته يأخذني للمستشفى قبل لا اصعد مريت
بـ زِناد لان ما فارگ المستشفى و لا عاف شريك بس ايام فاتحة شمعة يروح و يجي

عالية صحت بس حالها حال المخبلة و ام شريك فاقدة الوعي للان
جدة من خلصت فاتحة شمعة نصبة فاتحتها بـ باب المستشفى
دكول ما اطلع إذا ما شريك يطلع وياي
قريت اسم شريك بيا غرفة و طبيت قسم الحروق بس الي فايتلة
يعرف الريحة الي بي شنو

اصواتهم و هم يتوجعون تمرد گلب حتى الما بي رحمة طبيت للغرفة و جان صوت شريك واضح بيها من كلمة مرتي وين جيبوها
خل اشوفها ما انقهرت على صوتة بكد ما انقهرت على زِناد و
هو يضرب الحايط بچف ايدة و يبجي
يبجي و دموعة كل ما تنزل يمسحها بطرف الغترة المشمورة على چتافة

من رفع راسة و شافني اجه علية عصبي
زِناد : جُمارة شجابج هنا طلعي امشي اطلعي
طلعني و ما خلاني اشوف شي سولفتلة على ابن شريك راح ابقى يمة
ما رفض مسح على راسي و صعدت يم الطفل

كلها تدعي لشريك يكوم بالسلامة بس حب شمعة جان اقوى
بوكت هم ضموا عليه خبر وفاتها و يقنعونة بـ اكاذيب مزيفة حتى تتحسن حالته و بالغلط الدكتور الخفر فاتح هذا الموضوع و ي زِناد
عبالهم نايم و هو كاعد كالب الدنيا بالصراخ و متخربط

اخذوله ابنه بلكي يهدأ شوية ما رادة و اني امشي وراهم اخاف على الطفل ما يتحمل اخذته من إيدهم و صعدت للخدج اركض بي
اسبوع ما طول شريك و انهارت المستشفى بخبر وفاتة

كلها راحت و حتى ام شريك طلعوها من المستشفى اول ما صحت بقيت وحدي اني و جعفر فرحانة لان حالته بدت تتحسن و دموعي تجري على ابو و امة الي قصتهم المستشفى كلها تسولف بيها حتى وره ما طلعوا منها و اكثر جملة اثرت بية من الدكتور كايل الهم
بالكوة كدرت افصل الزوجة عن زوجها لان هو جان ظهرة سليم و الي تأذت عندة منطقة الصدر لان جان حاضنها قوي حتى تنشال الأنظار عنها و محد يباوع على جسمها

و الحريق بعد التقارير و مطاوقة شمعة جانت تارسة الصوبة و هي مشتعلة ما مطفيتها و الدشداشة الي جانت لابستها قديفة
خلت النار تشتعل اكثر و اسرع

وره اسبوعين يترددون عليه و يبات واحد منهم يمنه بالمستشفى بالممر مال الخدج لحد ما كتبولنه خروج صرت اعرف اشيلة و احسة قطعة من كلبي طبيت للبيت و الحزن واضح حتى بالحيطان لبست دشداشة سودة و صارت بية خوفة لا ام شريك تنوي تروح لبيتها و تاخذ حفيدها وياها وهذا من حقها

بس الحمدلله من بقت كاعدة يمنه لان مريضة و غريبة تداريها و عالية هم حالتها مو احسن من امها و رجلها عاف حتى العسكرية و بقى يمها يداريها ، لحد ما صار عمر جعفر ثلاث اشهر و اني ما اقبل واحد يجيسه غيري وكلها منتبهة عليه اروح للدوام و ارجع من الباب اركض عليه أبوس بي ،

اخوي الي ولدته امي و اسمة زِناد ما تعلقت بي بكد جعفر
سبحان الي زرع حبة بكلبي لهذا الحد و زِناد بيدة مرات إذا ملتهية اقرة يسويلة ممة و يشيلة يسكته و من يسكتة و يرجعة لمكانة

يبدل و ينزل يطلع من البيت كله ساعة ساعتين يالله يرجع
لحد ما بيوم وكفت اسوي الممة اشتميت ريحة الحليب تقيأت و زِناد واكف يمي احتار بية و الخوف واضح عليه اشرتلة ما بية شي
زِناد : جُمارة ترى روحي هاي روحي من اليگح صارت تخاف
- لا والله مابية شي

رحت غسلت ونظفت الغرفة لكيته يباوعلي بنظرة غريبة عاقد حواجبة
جُمارة : شبيك زِناد والله ما بية شي
زِناد : جُمارة خاف حامل
- اني ؟؟؟ لا شوكت
- بدلي امشي بدلي

اني احاول اغير الموضوع لحد ما أيست منه هو كاعدلي و منتظر أكوم ابدل لحد ما عاط بية خفت منه صدك خفت كمت بسرعة بدلت
جنت ما اريد اروح لان متأكدة من الموضوع و احس روحي ما مستعدة
صدك اني شلون نسيت روحي هاي الفترة كلها
و طلع شك زِناد بمحلة طبعاً و اني حامل من قبل لا تصير فاجعة
شريك و شمعة الله يرحمهم

الله يرحمهم ، شبساع !!
جُمارة : جعفوري ياهوى الهَاب ، ثرية و الگمر غاب

(شمعة - شريك)

رُبما بعد كُل جرعة فرح سنتناول وجبة كاملة من الحُزن ولن ينتهي المسير دون عُكرة
ها قَد أُطفئت شمعة شريك
في نهاية هذه الرواية

ميهمني من اموت المهم انتَ وياي
منو ما يدري انتَ شكثر تهواني
و منو ما يدري شمعة شكثر عاشگتك
من گد ما أحبك متت شابكتك
- رُسل فَهد
.........

بعد مرور 3 سنوات
حُزناً على حُزناً على عَوض

"ورود "

بعد تحضيري للامتحانات مال السادس ابتدائي و اني زعلانة عند اهلي رجعت بعد فاتحة شريك امتحنت و نجحت بس جانت
كل الأجواء كئيبة شيماء أثناء طلعة من طلعاتها ويـه اخو زمرد
عايف تليفونه بالسيارة يمها و نازل يجيبلها شي فاتحتة و اول ما قارية
محادثتة وي زمرد رجعت مقررة قرار فسخ الخطوبة
شراع كيف بدون ما يسألها ليش حتى و هم عاندوا ما قبلوا يفسخون
بس الموضوع مو يم شراع طبعاً لان ما يكدرولة

وراها اجتي اعتذرت منه وسولفتلة كلشي
شراع : الحمدلله الي خلاج تعرفيهم و تقتنعين بكلامي
من وكت خفت لا تتزوجين و تعرفين الحقيقة
شيماء : الله ما يحبني الله يحبك انتَ لان جانت الخطط كلها عليك و ضدك و يكسرونك بية
الله ينتقم منها هاي الحية زمرد و الله يحفظك النه و لمرتك

من فرحة شراع بعد ما فسخت اختة الخطوبة عرفت أنا شكد هو يكره زمرد صدك و شكد جان شايل هم عائلتهم يرتبطون وياه
اخذنه سفرة للشمال كلنة و هناك صدك شوية تغيرت النفسية

من رجعت طلعت وأمة ما صدكت من الفرحة حتى أخواته تعاملهن تغير علمود الطفل كل السونارات جانت تطلع بنية وًامي احتارت شتجهز الها
تالي من ولدت طلع ولد و كلنة انصدمنا البنات ضاجن لان متحضرات الها بس عمتي فرحانة فرحة مو طبيعية لان حالها حال نسوان گبل
يميلن للولد اكثر من البنية

جنت اشوفة بالتصدف من ايد لأيد و حتى يمهن ينام
و الهدوم يتسابقن منو تجيبلة الأحلى ريحانة تداوم كلية
و البنات وظايف ، و اجة صديق شراع خطب آمل هَم محامي
و تزوجت و من عرسها بعد ما شافوا كرايبه خوات شراع بيوم الزفة
انخطبن شيماء و غفران اخذوهن ولد عم من عوائل راقية
و تزوجن

فرغ البيت و ما بقت غير ريحانة تداوم مرحلة ثالثة علوم مالية مصرفية
امير ابني بحضني شايلته و افتر ريحانة كل شوية دكول طلعت نتائج الثالث و يطلع الرابط غلط عشت توتر يخوف

امي كلساع تدك عليه لأن أنا ماكلة راسها ايام الامتحانات آكلها ما جاوبت شراع حتى خصوصي دخلني علمود انجح
بنص الهوسة دك عليه شراع توقعت راح يواسيني حتى ما انقهر
لان هو هم مترقب النتائج اكثر مني.

شراع : شنو هاي ورود شنو
ورود : بچم درس الله عليك
شراع : حرامات والله

- شراااااع شبيك لا تحرگ أعصابي
امير اخترع كام يبجي من صوتي انطيته لبيبيته
شراع : هههههه اي والله حرامات ردت ادخلج معهد بس تنجحين بس على هاي الدرجات صار عندي واهس تكملين السادس و تدخلين جامعة

ريحانة : الله ولججج ورود شنو هاي درجاتج عزه بعينججج
حطيت ايدي على عيوني ابجي من الفرحة و ريحانة شبگتني تضحك
اخذت التليفون مني دكول لشراع مرتك تبجي تبجي

امي خابرتها بشرتها كامت تهلهل يمكن تحس روحها تحررت من طناگيري ، و اني كاعدة يم عمتي و امير يلعب هو و ريحانة بالكاع
طب شراع بيدة كيكة بيها شعالة و يضحك
شبكته و اني امسح بدموعي
شراع : مبروك والله بطلة و تستاهلين

فتنة : يالله على هاي الفرحة نريد النه بعد جاهل
شراع : لااا يمة شعندي مفتح روضة نريد نسافر نريد نعيش حياتنا خلي يسجل امير بالأول يالله تفكر بغيرة

- شنو ليش يمة هذا ابنك يريد اخو اخت
- اني اخو و ريحانة اختة بعد شنو

صعد للغرفة عفت امير يم عمتي و صعدت ورا
جان يريد يخابر شمر التليفون و فتح الي ايدة شبگته مد ايدة
على القراصة فتح شعري و انفاسة برگبتي
ورود : شراع امووت عليك والله و ما متندمة على كل لحظة حبيتك بيها و انتَ ما تدري لان انتَ تستاهل

شراع : هي مال استاهل هاي منتهين منها بس انتِ بطلة
و هذا تعبج شفتي نتيجته
ورود : جنت احبك و شكد ادعي عليك من اشوف البنات تقرا
و هسة لو ما انتّ ما انجح

شراع : ههههههه وردة ام خشم اليابس
ورود : بَس لان الك والله احبك

شراع : اموت عليج اني حبيبتي
وخرت بسرعة من انفتح باب الغرفة و طب امير يمشي
- بابا بابا عمةةةةة
شراع : لج ريحاااااانة ليش ويا
ريحانة : والله جذاب شراع هذا ابنك شيطان كسر السيارة و بلاها براسي

شراع : كسرت سيارتك ، تغار منك تغار
أمير : عمةةةة بابا عمةةة
- يالله فدوة الها لَك شنو تريد اكتل اختي علمودك

ورود : أبشرك صاير يغلط
شراع : شيكووول
أمير : احبشششش
ورود : و اني اموت عليك يحياتي فدوة الك حتى لو تغلط

فتنة : عوفوا حفيدي ولك أمير تعال حبيبي تعال وياي
خل نروح نشتري
شراع : هذا بعد كم سنة من دلالجن يگلي اطلع حبيبي من البيت شعندك يمنه

- ههههههههه
شاله ابو و قرب خده يبوس بي و يقرقرة بلحيته و هو مستمر من الضحك مد ايدة شراع وره ظهري و شبگنة اثنينه ..

(ورود - شراع)

اتذكر أنني غَفيت و دموعي تملئ الوسادة بسبب خسارتي لأحلامي
التي كانت بسببك
كيف لي ان استيقظ و انتَ تضع قبعة النجاح على رأسي

حزن تارس حنايا الروح
صعب چانن عيوني بيوم أسكتهن
وما اصرف دمع لو ادري بالتعويض
" أحلامي تحققن بيد المخربهن "
- رُسل فَهد
.......

" حور "

وره ما رحت للمعمل و لحگني خالد من عرفني أنا حور بعد چـعب يمنة و كل يوم يجي يگلي راح نجي نخطب و أنا اضل شايلة هم اخوتي لا يحقرون و يطمعون بالفلوس

لحد ما صارت مصيبة شريك و شمعة الي خلت الغريب قبل القريب
يعيش الحرن و يكره الدنيا كلها و انمحت اخبارهم بعد ما اخوتي شيلونة بغير منطقة ايجار لان يردون يتقاسمون الحصص وكلمن ياخذ حصته و نسوانهم قبل لا يبنون كامن يفتحن موضوع زواجي
حتى لا ابقى وي وحدة منهن

كل ما اكولن أنسى كلشي و ابدي صفحة جديدة أعاين روحي تميل
لـ آل سرهيد و ما تريد غيرهم و كل قسمة غيرهم تجيني
أحسنها فاهية بعيني و اطلع مية الف حجة خاطر تنلغي الخطبة
بقيت انتظر ما أيست لحد ما وره سنة خالد اندل بيتنه بس ولد اخوتي كبروا بعد ما ينضحك عليهم صرت اوديلة حجي بيد بنونة من تروح للمدرسة و هو يدزلي حجي

لحد ما مدري منو كايل لأخوي و حسبالة بنونة تعرف الها واحد
لزمها كطعها تكطع انجبرت احجي و أخلصها و اخوي
ما قصر راواني الضيم و الظلايم يريد يعرف هو ياهو ما كلنالة من ال سرهيد و مرته كامت تخاف على بتها مني و ما شلت وياهم
رحت وي اخوي الثاني الي مرته الله ما يجرعها

النوب روحي متعلقة بـ بنونة و هي روحها بية
و اخوتي حالفين اي قسمة تجيني ينطوني و قبل لا تطلع السنة
الثانية لشريك اجتي جدة رهينة خطبتني اخوتي ما قبلوا بس نسوانهم
ضلن يحشن بيهم ، وره شهرين وافقوا
كلها لابسة اسود و امة ما اجتي جابلي تليفون و يومية تجيني أشكال الرسايل مدري منين تكلي إذا ما تعوفين خالد ادمر حياتج

همزين ادري بخالد شكثر يحبني و اعرف عمايل امه و خواته و خالاته
ما اهتميت الهن وره ٤ شهور من الخطوبة صارت الزفة
كلها فرحانة إلا امة حتى اخته زينة ملتهية تجهز بروحها تريد تتزوج

طبيت للغرفة و خالد طَب وراي احس الرجيف اخذني
خالد : قررت بغيابك ابني بيت احزان
اجت كل الشماته وياي عمالة

رفعت البركع اعاينلة
حور : دخيلك خالد خاف امك تطلع ضيمها بية
خالد : بعد گلبي گلبج ضيم امي مو اقوى من الضيم الشفناه

حور : جا احنه غير نريد نرتاح بعد ذاك الضيم
- نرتاح خَبازتي نرتاح اروح فدوة لتنورج الحار
- ما تستحي يومية لاحگني
- لا ما استحي لان بعدين انگلبت السالفة و اكو وحدة كامت
تجيني للمعامل

خزرته و أنا انزع البرگع
خالد : من گد ما مشيت بيوم فرگاك
طلع شامت يگلي تبات زاير
ضحكت لان ما أقاوم حَجية يضحك فتحت التسريحة و اني واكفة يمة
ساعدني و فتحها

خالد : كاعد ع الرصيف انتظرج سنين
شالوني بشفَل گالوا تجاوز
ضحكت بصوت عالي و هو هم ضحك اندك الباب راح فتحة
طبت امة بيدها صينية خازرتني و اني احاول اضم ضحكتي

ام سلام : ثگل شوية ثگل
خالد : اجت فكرة بدماغي و كلت راح انساج
صعد گلبي لدماغي و تفل على الفكرة
ضحكت و حطيت ايدي على حلكي وهو يضحك امه صافنة عليه تباوعلة
ام سلام : ولك هو انتَ مال عرس انتّ

لكيت عالية هناك و ابنها ما شاء الله جبير بس هي الوحيدة وره السنة الثانية من دارت بقت لابسة اسود كاعدين يتغدون
عمار : راح ابيع البيت و اشتري دونم جبير
لان هذا البيت بعد ما يكفينا
ام سلام : و ذولة جماعة زِناد مو يوم العلم يكعدون هنا شو صارت سكته

سلام : ما يحتاج يابة تشتري دونم أنا راح اطلع
ام سلام : يمةةةة وين شو اكعدددً
- مو بعيد يمة بصفج اخذت بيت من ذني البيوت
عمار : ماكووووو احد يطلع تردون مثل محمد تصيرون
هذا هو ملطلط و مرتة باعت حصتها و اشتراله بيت و هم بعدة مطلوب

سلام : حتى أنا يابة اشتريت
مرتضى : خصم الحجي كلنه اشترينا لان الجهال كبرت
و البيت صار هوسة يابة انتو لازم ترتاحون

عمار : مو كتلج ولدج كلهم دفانة
ام سلام : محد يطلع
تعاركت امهم وياهم و ابوهم طردهم و نسوانهم كلهن راحن لأهلهن يمكن جانن واكفات على شعرة من الضيم و ي
ساكتات الهم

تالي اجوي فلو الغرف و اخذوا الغراض و فرغ البيت
عمتي بين يوم و لليلة صارت تحبني يمكن لان بس آنا بقيت الها
هي تطبخ و أنا اخبز متعودة اعله الخبز و البيت ما يتوصخ هواي
لان مابي جهال

من خلصوا بيوتهم و رجعوا نسوانهم سوو يومية الغدة يم واحد و اجوي صالحوا امهم كلهم تشاركوا و جابولها محبس ذهب
رضت و ضحكت بساع و خلصنه اسبوع كامل يومية عزيمة بـ بيت

النوب عمتي كامت كل شهرين مسافرة حملة و تاخذني وياها
حتى تغور چناينها البقية عود ، بس نعمة بالحالتين أنا المستفادة
و خالد ما يكلي لا و لا يمنعني من شيء
احس جنت بسجن و هسة انفتح الباب عَلية

خالد : حبيبي الحملدار ما تركد نشوفك
حور : دخيلك حبي خليني أتونس بجالك
- كسرتي عيني هاي هيَ

تمددت بصفة اضحك شبكني و دفر الغطه
خالد : هنا تسكن العبرات
ضربته على ايدة وًاني اضحك مد ايدة على بطني يقرقرني
بأيد و ساد حلگي بأيد
خالد : هسة امي تسوي علينه مداهمة

حور : ترى حبابة والله معقولة بس وياي هيج
خالد : لا مو رحمة اختي تزوجت ههههههه
يالله الحمدلله وياج زينة لان جان طاح حضك يخويلد

حور : خالد تحبني صدك
خالد : يعني أنا مصادق جهال اخوتج لخاطرج و انتِ قيسي
- همزين صرت خبازة و بدت قصتي وياك

خالد : ما تشوفيني قبل لا اكل كل كرصة خبز أبوسها
وجه و گفة
حور : هههههههه احبك خَرب
خالد : اموت عليج و على ربج
ام سلام : ولج حووووور جوازج وين تعاي طگيلة صورة
صفگ ايدة بقلة صبر و اني خربانة ضحك ..

(حور- خالد)

حيث كان الخبز صاحب فضلاً
على حور إلى الأبد
بفضلهِ انتقلت من تلك الكوابيس إلى حلماً
لا تود الاستيقاظ منه

ما دام العوض انتَ
و حان وي الفَرح دوري
كلشي من الله بي حكمة
"و ما راحن هدر خُيزات تنوري "
- رُسل فَهد
..........

" عالية "

غير الحزن بعد ما مر على عيوني و اني بعيني شفت اخوي حبيبي و مرته من احتركوا سوه من غير الأحلام
الي تجيني بيها تگلي ما طبيت للغرفة خفت
على ابنج لا يحترك و يموت

و من أعاين ابنهم شلون يتمشى يمكن لو ما جعفر جان امي ما طولت اسبوع و ماتت وراهم ، علي الي عاف حتى العسكرية لخاطر يبقى يمي و ما يخليني احتاج احد و هو مو احسن من عندي الحزن
واضح على ملامحة كلها من انهار و ابجي جان يسكتني و يطلع من الغرفة ادري بي هو هم راح يبجي

صدمة شريك بحياتي خلتني بعد أتوقع من الدنيا كلشي و اخاف على كل شخص عزيز عليه خاف هم اخسرة صرت مثل المخبلة عليهم
علي إذا يتأخر دقايق اكلب الدنيا بالمكالمات و زِناد ابني ما يفارك عيني دقيقة امي يومية بالليل اروح الها استقرت بـ بيت زِناد راسها بصف راس جدتي و لان جعفر متعلق بجمارة وهي هم روحها بي

و كلنة ندري ماكو احسن من زِناد تبقى عينه على هذا الطفل
لان حالة حال ابو راح يكبر وحيد عاد زِناد يبقالة تچوه طول العمر و ما يخلي يحتاج احد

كرهت كلشي كرهت و نسيت حتى البيت الي جنت كاتلة روحي عليه
علي ايدة وره ظهري و زِناد ابني كدامنه واكف يفتح بـ باب البيت
جان علي مجهزة من كلشي لان صار سنتين و نص على موت شريك
والولد كلهم عافوا بيوتهم و وگفوا بناء من كد ما خيم عليهم الحزن

طبيت للبيت و طببنه غراضنه البقية لان صار النه يومين بايتين يم زِناد
بين ما شدوا الغرفة شمرت الجنطة على الكرويتة و طبيت وي علي أعاين البيت ما ردت اكسر بخاطرة دفع دم گلبة حتى يسوي

صعدت فوك اباوع لكلشي بالبيت
شبگني و يهديني بنفس الكلام هذا قدر رب العالمين و الي كاتبة لازم نشوفة يجوز اليوم هُمَ باجر احنه
عالية : اسم الله عليكم

صعد زِناد يصيح يمة يمة لحد ما وصل يلهث بيدة صورة
عالية : ها حبيبي
زِناد : هاي سورة خالوووو

اخذتها من ايدة صورة شريك جنت معلگتها بمراية ميز المرايا
وجابها علي من فلو الغرفة يأشرلي على المرايا عود رجعيها
شلته و خليته هو يرجعها و بسناها

شبگنة علي اثنينه من وره و خلانه على صدرة
علي : ديروا بالكم من كلشي من اروح للشغل ترى ما عندي بهاي الدنيا غيركم
عالية : حتى أنا ما عندي غيركم ترى انتو ابوية و اخواني و اصدقائي كلشي ماريد غير تضلون سالمين

علي : لج انتِ حبيبتي و بنتي انتِ روحي من هاي الدنيا
شبگته و دموعي تجري
زِناد: شبيج ماما شبيج بابا ضربج
علي : ولك انتَ شني حاطني جوه لسانك ششايفني يومية طاگها
ابن الـ خوش أوادم

زِناد : هاي امي بس اني
علي : مالتي هاي لَك
زِناد : مالتيييي انتَ امك بيبي هناك
عالية : يبعد امك و اسمها

(عالية - علي)

يُحكى في قاموس الحُب
ان العشق الحقيقي هو الذي يأتي بَعد كرهاً
لذلك كان عشقها صارماً لهُ تلك الصغيرة

بعد ذاك الكره و الغيظ
و مصايب گضن و تعَدن
"أنهجم بيت الصغار بيوم إذا عشگن"
- رُسل فَهد
.......

" روز "

بعد 6 اشهر من وفاة شريك و شمعة الله يرحمهم
طلعنه بـ بيتنا لان صارت المسؤولية على زِناد جبيرة
و انكلبت الدنيا من اهل محمد بساعة الشلنة ، تغريد وره ما جابت باعت بيت امي و انطتني حصتي اشتريت بيها ذهب و الباقي جهزت البيت لان محمد خلصت ميزانيته الله يساعدة فلوس سبع سنين يجمع بيهن و ما كدر يكمل البيت إلا تداين

و من دون كلنة الي تزوجنه اني الوحيدة بيهن ما حبلت و كل ما اروح للدكتورة دكلي مابيج شيء تنطيني علاج و ما يفيدني شي
ردت افتح الموضوع وي محمد بس الظروف الي صارت خلت كل واحد يبتعد عن الثاني بسبب الصدمة الي صارت

محمد الي حياته بس ضحك و تحشيش صار على كلشي ينگلب بارود و اعصاب حاولت اعود ايدي على كلشي لان صرت مسؤولة عن بيت و شكم طبخة على طبخة تحترك لو تطلع مو طيبة و شكم قميص على قميص يحترك و اشمره بالزبالة يبقى يدور عليه و يحجي عليه و يأيس

و مَرت عليه فترة تمرضت طلعت غدد بصدري
و كالوا نستأصلهم و نوديهم للزرع إذا حميديات لو لا
- إذا لا يعني شنو دكتورة
- بداية كانسر لا سامح الله بس هذا احتمال جداً ضعيف

محمد من سمع هيج تحولت من وحدة عمرها فوك الخمسة و عشرين إلى جاهلة عمرها مو اكثر من خمس سنوات يسبحني بيدة و يمشطلي
و ايدي على كلشي ما يخليني أمدها
جُمارة ما عافتني يومية تجيني بملابس الكلية جايبتلي جدر صغير من غداهم ، سويت العملية محمد و تغريد و جُمارة وياي

هي ما تأذي بكد ما تعيش الواحد قلق
و بقينة ننتظر الزرع شوكت يطلع لحد ما اجة الموعد محمد هو منتهي
و اني كاعدة انتظرة و اتخيل يجيني يكلي مو زين شلون راح تكون ردة فعلي و اني ويني و وين هيج مرض

كعدت ابجي احتاج بكل هاي المواقف امي
انفتح الباب و طبت خالة رهينة وًتغريد طشن عليه چكليت
و محمد يضحك
تغريد : الف الحمدلله ماكو شي تحاليلج نظيفة
رهينة : مابيها شي مو كلت الكم مابيها شي

حضنت محمد و هو شالني كدامهن يبوس بية
رهينة : يا يا ولكم واحد أضرب من الثاني

وراها بكم يوم استلم سلفة گبل حجز النه و سافرنه لتركيا و عاد عليه كل هذيج المشاهد حلوة رجعنه نفسيتنا متغيرة
روز : محمد ليش متسوي تحاليل بداعتي والله راح اموت على الطفل
محمد : تشككين بية اخت تغريد

روز : والله مو هيج هسة اني مو اسوي أشكال التحاليل
و ما افكر بشي سوي انتَ بس هالمرة و والله ما اكلك بعد
محمد : ميخالف شوكت تردين
- بكيفك

اتفقنا هاي المراجعة من اروح اخذ التحاليل وياي و خطية هو سوه ما كال شي وًرحت للدكتورة
روز : دكتورة والله تعبت من المراجعات صار سنتين
و كلتي جيبي تحاليل زوجج هذّني جبتهن
- ههههههه شور بينه الرجال عيني الف مبروك حامل

احس الفرحة مو بس غمرتني تطشرت مني
طلعت اركض اريد اشوفة و أبشرة من بعيد هو ابتسم و عرفني
روز : حامل حامل
محمد : و التحاليل ادبسز هسة من اصفكج
راشدي هم احد يكلي ليش

روز : ههههه والله حتى الدكتورة كالت شور بينه
احبك حبيبي ابو جهالي
محمد : اخت تغريد ما عليج عتب

وصلنه للبيت و هو مسوي روحة ضايج ادري بي جذاب لزمت وجهة ابوس بي من كل جهة بعد ما تحمل ضحك و خلاني بحضنة ايدة على بطني

روز : راح اصير ام و اخيراً و الوهمي ابو
محمد : شيطلع يعني إذا ولد ساقط و إذا بنية شلولو
- و النعم من ابوهم

- شبي ابوهم ما مغزر وياج
روز : شلون ما مغزر اروح فدوة لشواربة الشگر
باوعلي بطرف عينه ضام ضحكته
مديت ايدي ابرم شواربة عض إصبعي

درت وجهي زعلانة لزم ايدي يبوسها وجه و گفة
محمد : اوففف والله الدلع لغيرك ما يلوگ
روز : انتّ كاتب فوك بالغرفة روز و الوهمي
- اي اني و بكل مكان اكتبهن حتى بحايط المعمل كاتب

روز : ههههه تتذكر روز شارحة - الوهمي
محمد : يولي الوهمي اهم شي روز
حجاها و باس خدي

(روز - محمد)

لَو كُل من كان وهمياً سيأتي مثلك فـ معشر النساء
لا يريد رجلاً حقيقياً قَط أن لم يكُن وهمياً قبل ذلك

بوكت چان الحقيقي الناس رافضتة
هيَ تحبني و أنا أوهام
أجيلك و الگلب ممنون
أطش فوگك ورد و الدرب كلة الغام
- رُسل فَهد
.........

" جُمارة "

رهينة : ولج جُمارة وينج زِناد راح ينزل يطگج
جُمارة : يووووه جدة هسة هو شدعواه ما يصبر
ديرن بالجن عليهم عفتهم نايمين محاضرتين و اجي
غريبة : هسة جعفر يسكت بس يوسف شكد قنقينة
- غير جعفر جبير و يوسف صغير
اوف منجن اوف

طلعت كعدت بالسيارة سويت روحي شخصية حتى ما يصيح عليه
زِناد : عاينيلي شو عاينيلي
جُمارة : هاه عاين بوجهي شنو مشتاقلي
غير ولدك كعدوا و رجعت نيمتهم

زِناد : وانا ماعندي شغل و عمل اكعد انتظر
جُمارة : والله هذا الموجود مو كتلك اشتريلي سيارة و اخلص مني انتَ جايب التعب لروحك شو حتى سياقة علمتني ضلت على السيارة لو تخاف على فلوسك

زِناد : طفلة شحجي وياج
جُمارة : طفلة شنو دكتورة و هذا لابكوتي خاف ما تصدك
و عندي ولد اثنين كل واحد شكبرة و دكلي طفلة
جا الجبيرة برأيك شلون

زِناد : جعفر البارحة وصاني على مسدس و نسيت والله
جُمارة : طبعا تنسى هاي مو جُمارة بت ولاء
تنفذلها طلباتها ولدك ما تجيب الهم
- اليوم اليوم اطلعهم و أعشيهم حتى يشترون
- امهم هم ضايجة ترى
- تدلل

درت وجهي عليه مبتسمة دائماً مخجلني بأخلاقة
كملت الدوام بسرعة و خابرت ابوية اجه رجعني بسيارتة
لان زِناد مبين اليوم عندة شغل اول ما طبيت الفرع لكيتهم واكفيلي بالباب جعفر و يوسف و يمهم زِناد اخوية
جُمارة : عليك الله يابة خل انزل هنا عليك الله
ضحك و وكف السيارة نزلت رحت الهم اركض و هم اجوي عليه يركضون و يصفكون شبگتهم ثلاثتهم

جُمارة : شلونهم شلونهم الزلم الخشنة الحلوة
جعفر : ماما عمة غريبة صيحت علينه لان لعبت طوبة
زِناد : اي ماما صگد
- هههههههه ولك اني اختك ولك
تعالوا اليوم إلا اكطعهن

طبيت للبيت و هم يمشون وراي شقاوة علگت اللابكوت بالباب
جُمارة : غريبةةةةة شعندج ويَ ولدي عيني
غريبة : انهجم بيت ولدج شنو من شياطين ولج يلعبون
يمي و أنا اطبخ عطت بيهم

رهينة : هاي كاعدين بالباب منتظريها ولكم انتو شياطين
جُمارة : بالله رجاءً رجاءً ولدي خط احمر
ميتحملون وحدة تصيح عليهم زلم و غيرتهم متسمح الهم

غريبة : هسة خل يجي زِناد أعلمكم
جُمارة : عشتووووو تخوفيهم بزناد انتِ و زِناد وعشيرة زِناد أكلكم بسنوني والله إذا تضوجون ولدي

ام شريك : ولك أنا مو جدتك صارلي ساعة اصيحلكً
جعفر : جدة انتِ ما تضربيها و ما تصيحين عليها
اجيت سويت روحي أضرب غريبة و غريبة تبجي
و هم كيفوا

كعدت يمهم بالهول و هم داير مدايري
جُمارة : حضروا روحكم اليوم بابا يطلعنا نتعشى و نلعب و نشتري ألعاب و شتردن اجيبلكم تدللون دلال باجر جمعة
زِناد : جُمالة (جُمارة ) اني عادي وياكم الو
جُمارة : تبعاً حياتي تبعاً احنه نجيك للبيت نأخذك

جعفر : اي لدكول ماما هي بس امي اني و يوسف
جُمارة : لا خطية جوجو خلي يكلي شبيك
- يالله يالله عادي

جُمارة : اروح فدوة لهاي العيون الزرك تعال انطيني بوسة
بستهم واحد واحد بالسرة رفعت راسي لكيت زِناد يباوعلي مبتسم
زِناد : ما تدكين عليه ليش ع ابوج
جُمارة : حبيبي ما ردت أتعبك اليوم خليتك تنتظر
فتح ايدة بمعنى ما اكدرلج

صعدت فوك ابدل و نزلت لكيتهم يتعاركون هم وًغريبة
غريبة : إلا أزوج زِناد وحدة جديدة
يوسف : بابا بابا سيح بيهااااا
جعفر : ترى اجيج والله اذبحج عوفي امي

زِناد : خوش مسويتلج عصابة
جُمارة : يمة بعد عمري فدوة لعصابتي فدوة
لهاي الزلم الحلوة
كعدوا بحضني و نسولف بعد ما جان البيت كئيب و مابي ريحة ضحك
اجوي هُمَ سوو علينة البيت جنة جدة حاطة زِناد اخوية بحضنها

ابوية الظهر يجي ياخذة لان هو متعلق بينة و يوسف و جعفر ما يتعبوني من كد الحب أكلهم ناموا اني تعبانة ينامون أكلهم جاي اقره
يكعدون حبابين

صعدنا بالغرفة و خليتهم بچرابيهم
جُمارة : يالله هسة الي ينام اول واحد يحبني اكثر واحد
زِناد : اليوم حتى اشتريلكم العاب
- يالله انتَ هم نام عيني
- وعلي إذا اجيج

اجيت اضحك كعدت يمة مدت ايدي على چف ايدة وخرت الچفوف
شمرتهن على الكومدي و بِست اصابيعة واحد واحد
جُمارة : الدنيا حارة مو كتلك بعد لتلبسهن
زِناد: جُمارة اوف منج اوف
حجاها و باس ايدي

جُمارة : ايدك محترگة و موكلة هاي العالم كلها و انتَ تستنكف على نفسك يشوفوها يروحون الها فدوة ترى كلها عايشة بجالك خاف متدري
ما جاوبني يباوعلي مبتسم

و اني يم المرايا امشط شعري
- اصلاً انتَ بالدنيا كلها ما يجي واحد مثلك لا بكرمك و لا بحنيتك و لا هاي الروح الي تخليك مسيطر رغم كل الظروف
زِناد : والله أصعب ظروف مرت عليه هي الاخيرة و لو ما انتِ وياي اني انتهيت جنت خايف هذا الطفل يصير ضحية

جُمارة : يمة حياتي هذا حبيبي والله اول واحد يسويني ام هو خلاني اصير ام بدون ما اجيب
زِناد : الله يحفظج الهم
- و يحفظك شيخنا

ضحك و هو عينه عليه طلعنه بالليل تعشينا و تونسوا الجهال اشتروا
العاب و اشترالي وياهم
زِناد : ادري بداخلج طفلة
جُمارة : انتَ وين اكو منك واحد إذا لعابة ابوي بنص ذيج الظروف و محتفظ بيها لكيتك
- كلشي يخصج اني احتفظ بي

رجعت للبيت فرحانة اني و الجهال رجعت زِناد الصغير لامي
كلت بكلبي سبحانك يا اللهي هي امي على أساس شلون جانت تحب زِناد و هسة ابنها صار على اسمه

بلكشي رب العالمين عادل دخيل اسمه
عجيبة الي بوحدة من جلسات المحكمة دَچها امجد سجينة وبقت تعالج لحد ما ماتت و امجد انحكم مرة ثانية و صار اعدام

و حياة الي طلعت حامل بنفس الوكت الي لزم بي يونس دمعة وره البيت
عايشة اللحظة وي واحد غريب ، كتلوها و طلگها عمي فاخر و ارتاحت العائلة كلها من سم ذيج الحية

و مثل ما راد زِناد كل واحد من عمامي اخذ حصته و بنه بيت
و البيت الجبير صار مخزن لبضاعة المعمل و كبر اسم المعمل اكثر
وقسم من الأرباح كل شهر يروح ثواب لشريك و شمعة و فضة و امير
و كل شخص راجع النه

خلصت امتحانات نصف السنة و عشت احلى لحظات وي عصابتي
صار عيد ميلادي و ابوية جابلي كيكة اني حتى ما اهتمّ لأعياد الميلاد و التمينه بالحديقة قطعناها اني و جهالي و نضحك بصوت عالي
زِناد يباوع النه و مبتسم

جُمارة : ورق حبيبي ورق اكسر عيني بفلوسك
هههههههه
رهينة : كلها تشبع فلوس الا انتِ
- اي والله بزود رجلي اني وًجدتي عايشين

رهينة : اي طبعا جا شعدنه غيره نحبل نجيب
زِناد : جُمارة
رفعت عيني شمرلي من ايده شي لزمته فتحت حلكي بصدمة
و ابوية يضحك كلها تباوعلي من استوعبت الي بايدي
عيطت و رحت شبگته اركض تعلمت اكول شبگة احسها
صدك احلى من الحضن

جُمارة : و اخيراً سيارررة
ركضت مديت راسي لان من ضغطت على الهورن اشتغل برة
سيارة صغيرة لون ابيض تجنن من الفرحة كمت ابجي و هن يضحكن عليه

رهينة : بعد و بعد يشيخ زِناد تطورنا
زِناد : تستأهل الشيخة جُمارة

اول ايام عمامي كاموا يحجون بس المهم القاضي راضي
لحد ما تعودوا كمت كل ما ارجع اخذ عصابتي و نروح نشتري و نتونس و نرجع مرات ناخذ روز ويانه خطية

لحد ما بيوم صعدت الجهال كلها و اخذتهم اشتريت الهم حتى ابن عالية اخذنا ويانه و جعفر و يوسف يخزرون بية من كد الغيرة
و بنص هاي الهوسة حصلت صديقة بالجامعة حبابة الله دزها الي هدية
احسن من حنين بالف مرة هي هم متزوجة و عندها بنية
اسمها فَريدة

الظهر واني بحضن زِناد ادللة حتى ما يتغير عليه نزلت من الجرباية
فتحت الخانة مال الكومدي مالتي حتى اخلي جنطتي صارت كبالي الچفية الي بوسطها الحمرة وًالطلقة
اخذتهن و اجيت يمة اضحك
جُمارة : زِناد شوف عرفت كلشي بس هاي
كل ما اريد اسألك أنسى ، شنو هاي

زِناد : ولج منين جبتيها هاي
- من جرارة غرفة امك
- هههههههههههههههه

جُمارة : ضحكت يعني وراها سالفة جبيرة
زِناد : هههههه لا هاي من چنتي صغيرة و اني يومية اسولف لامي عليج و هي دگلي أولها و تاليها الك
جان عدنا عرس و شفتج تتحمرين ضربتج راشدي
و اخذت الحمرة منج

جُمارة : عزههههه يعني حتى ضرب ضاربني
زِناد : اي فـ اجيت و جبتها لأمي عصبي و جايب وياي طلقة وضامهن بالجفية اخاف من ابوي لا يشوفهن
كلت لامي والله الا انتحر بهاي الطلقة و ادفني الحمرة وياي
هههههههه

جُمارة : تنتحر علمودي
زِناد : تالي امي حبيبتي الله يرحمها ماخذتني على كد عقلي جانت كالتلي وليش تكتل روحك ضمهن وهي اول و تالي تكبر و نروح نخطبها اذا قبلت انطيها الحمرة
و كللها من عمر هاي الحمرة أنا احبج
و إذا ما رضت طَگها بهاي الچيلة هم عوز ما ترضى بت تغريد العرمة ، هههههههههه

بقيت اباوعلة محتارة شحجي ويا حضنته قوي و اثنينه نضحك
في أحد مجرات غُرفة من بيت عراقي جنوبي
هُنالك منديل قماش رجالي " چـفية "
يحتضـن رِصـاصـة و أحمر شِفاه قديم
مُنذ تاريخ هذا المنديل تبدأ الحكاية ...
و الآن وصلنا إلى خط النهاية

(جُمارة - زِناد)

حتى تلتقي صدرية الطب مع عباءة رجُل الجنوب كان ذلك الأمر مُكلفاً جداً
لكن تلك الشَوارب المُهيبة كانت مُصرة على أنّ لا يُلامس ذلك الخد الناعم غَيرها
يمك من أوگف أميرة ، گبالي لو توگف جيوش
ضَنهم يخوفوني منك
وَحش من گالولي عَنك
گلت يا أحلى الوحوش
- رُسل فَهد

النهاية 😞🤎

وداعاً بأطنان الاعتذار على عدم الالتزام في هذهِ الرواية خصيصاً
اتمنى ان يُرافق اسمي دعواتكم و تقُر عيني برؤية أبنتي
التي كانت رفيقتنا في هذه الرواية
نلتقي بأذن الله في رواية جديدة
- رُسل فَهد 🤎

حساب التواصل 🫰🏻👇🏻