رواية يا احلى نوبات جنوني الفصل الثاني 2 - بقلم مريم اماسي الليل

#يا_احلى_نوبات_جنوني
#اماسي_الليل
بقلمي ام مريم
#الجزء_الثاني
حقوق النشر محفوظه
علاء:ورا كم يوم اتفقت ويا نمير على يوم ينتظرونا على غدا
رحت لامي گتلها الحجيه ام نمير عازمتج وعازمتني على الغدا عدهم يوم الخميس
اني خلال هالايام ساعه اكول هاهيه اتزوج وساعه احس نفسي  راح اتورط
اجى يوم الخميس بدلت واخذت امي  قبل لا اوصل ل شارع بيت نميرمن بعيد شفت بنيه نزلت  من تكسي شكلها دتتعارك وياه دترزله من مشت وعافته التفتت
شفتها كل احوالي انگلبت گتلها يمه هاي البنيه اريدها
امي اندارت عليه گلتلي وينها يمه دخلت للفرع گتلها هاي گلتلي واني اشفت منها بس ظهرها
گتلها يمه اني شفتها بقيت امشي على كبفي وراها
هي اندارت بعصبيه اظاهر عبالها ابو التكسي ديلحگها
من شافتني وشافت امي حركت ايدها تعتذر
گتلها يمه شفتيه گلتلي حلوه وصغيره بس ....وسكتت
گتله يمه بس اخاف مترضى بيه جاوبتني لا يمه موقصدي بس هاي صغيره واخاف تشوفك چبير ليش تأمل نفسك
مشيت بصف البنيه نزلت الجامه گتلها اذا تحبين نوصلج الدنيا حاره
ابتسمت لامي واتجاهلتني كلتلها خاله مشكوره عاجبني امشي
امي گلتلها حبيبتي اصعدي خاف مو زين عليج الشمس
جاوبت اشكرج خاله بس الحقيقه ما اكدر اصعد وياكم واني هسه متعرفه على حضرتج اعذريني
علاء:هي تحجي واني باقي اباوع عليها وعلى وجها ومعانيها
ومبتسم طبعا هي مبينه عصبيه نار
لان دتحجي ويا امي بأسلوب حلو بس مبينه مغثوثه وصايره نار
اكيد ابو التكسي مضوجها
وجها من الشمس صاير احمر
امي جاوبتها براحتج حبيبتي اندارت عليه امي گلتلي يله خلي نروح للناس منتظرينا مشت البنيه خطوتين
گتلها يمه اسأليها وين بيتكم
امي گلتلها خاله وين بيتكم اندارت ضايجه خاله هنا بيت اختي بيتنا بغير مكان محتاجه شي أمري
امي باوعتلي بنظره معناها شكد عيب جاوبتها لاخاله سلامتج بس ضل بالي عليج مدا اكدر اعوفج بالشارع وحدج تمشين
البنيه خاله ليضل بالج بيت اختي بالشارع الثاني  ذاك عشر دقايق واوصل. رحم الله والديج اخذي راحتج....  امي ودعتها
علاء:من دلتني عرفت بنفس شارع بيت نمير أمنت
گتلها يمه عوفيها براحتها  طلعت بالسياره  وصلت لبيت نمير نزلت امي دكت الباب اني بقيت بالسياره  طلع نمير دخلت امي لبيتهم  طلعت من سيارتي اتجى على العكازات
اجى نمير يساعدني گتله انسى موضوع اخت مرتك قلبي اخذته وحده اختها بشارعكم  هسه تجي شفناها براس الشارع انتظر ويايه حتى اشوفكياها ودليني بيتهم
بقينا كم دقيقه اني وياه نسولف  نمير شفته ديباوع ورايه انداريت گتله لك هاي البنيه الجايه ضحك گلي ما اندل بيتهم
گتله لعد خلي انتظرها اشوف وين راح تدخل ورا دقيقه وصلت يمنا بقيت اني متفاجئ وهي هم متفاجئه سلمت على نمير ودخلت
ضحك گلي تعال هاي  رفل اخت مرتي دخلنا بس بنفس الوقت فشلت من نمير لان صار ساعه اتغزل بأخت مرته
من دخلت لگيت البنيه متفاجئه بأمي ودتسلم عليها ودتسولفلهم شلون اتقابلت ويانا..... نمير  كلي اتفضل سلمت ودخلت اندارت عليه شفتها نزلت عينها على رجلي ضجت.....  نمير سألها ليش ما خليتي التكسي يوصلج للباب
جاوبته قليل ادب بقى يضايقني بالكلام  من شافني راح اوصل گلي قصدي شريف واريد الرقم رزلته ونزلت
علاء:ورا دقايق دخلت البنيه الي شفتها بسياره نمير ليورا شايله بتها سلمت.  انتبهت عليهن كلش يتشابهن ويا مرت نمير
بس كل حده متميزه عن الثانيه الارمله طولها حلو ووجها حلو بس حزين الي اخذت قلبي متوسطة الطول بس تطلع منها نار جاذبيه
تدخل للقلب بسرعه حتى شفت امي حبتها لان لسانها حلو حتى علاقتها بنمير شقى وضحك كأنه اخوها مو رجل اختها وكلش واثقه من نفسها شخصيتها قويه واجتماعيه بسرعه فرضت نفسها على الكل
واباوعلهم كلهم من تحجي مبتسميلها واختها الارمله هم سولفت بس ما جذبتني مثل هل شراره  طول الكعده احسها مثل التيار
الي ويا كل حركه وضحكه يشحن قلبي
طبعا اني بقيت ماخذ دور المتفرج فقط احجي ويا نمير واهله
بس ويا البنات مكدرت اتجاوب وياهم لان حسيت بيهن كم مره ينتبهون لرجلي
ورا ما خلصنا الغدا البنات ريا زوجة نمير  ورشا الارمله  دينقلون السفره للمطبخ بقت رفل بيدها الطفله انطتها لنمير بين متروح اتجيب خاولي صغير
حبيت الطفله اخذتها من نمير لعبتها شويه
رفل جابتلي خاولي صغير گلتلي اخاف تذب عليك حليب رفعت راسي  باوعتلها بنظره اعجاب  ردت احسسها مخلي عيني عليها اخذت الخاولي  منها هي خجلت  وراحت يم خواتها تساعدهم ......الطفله بيها شبه من امها وخالاتها بس ما ادري ليش حسيتها  تشبه رفل بقت بحضني اتمنيت يجي اليوم الي  يصير عندي طفل اكعده بحضني واللعب وياه .....بعدها جابوا الجاي والفواكه بقيت استرق النظر وكل متصير عينها عليه ادزلها نظره مقصوده لحيت وياها حسيتها ارتبكت   طبعا مر الوقت بسرعه ولا حسيت بي ولو بيدي ما ارجع للبيت گتلها لامي يله
احنه نترخص
تدرون النسوان يتذكرن اخر سالفه من واحد يگلهم يله بقت امي واگفه ويا ام نمير تكمل سالفتها اني انتظرها تخلص حتى اوگف 
شفتهم مراح يبطلون حجي وگفت ويا مردت اوگف ماسيطرت رجعت كعدت على القنفه شافتني رفل ........شافت
نمير بيده الطفله اجتني  گلتلي اساعدك گتلها مو هسه من تجين يمي بصوت ناصي ......جاوبتني شيصير منك ابو التكسي نفس قلة الادب عدكم
اندارت على نمير گلتله انطيني بنان .......اخذتها ووگفت على صفحه
صحت على امي گتلها يله حجيه .......ووگفت ما اعرف اول مره اصير جريء وما اهتم لرجلي كدام احد واتصرف تصرفات ونظرات بحياتي ممسويها بس هالبنيه استقتلت عليها
هي بعد  ما باوعت بوجهي بقيت بس اريدها تباوعلي قبل لا اروح
سوت نفسها دتلعب ويا الطفله
طلعنا وصلت يم الباب أ تشكرت منهم
وطلع نمير ويايه ديوصلني بين متخلص اخر سالفه الي يتذكروها النسوان يم الباب
گتله نمير انت اخويه اني رفل رايدها مره بس اريدك انت وريا تأثرون عليها انت تعرفني لاعندي سوالف مكسره وحياتي كلها شغل والحمد لله اموري الماديه ماشيه ومخلص كليه اريدك تذكرلها كل هالامور حتى تتغاضى عن موضوع رجلي
نمير ان شاء الله اذا من قسمتك متصير لغيرك جاوبته لا نمير جديات لو هي لو ما افكر بعد بموضوع الزواج
ضحك نمير گلي لك  من ورا كلامك دا احس نفسي ماعندي غيره
جاوبته لتزعل مني موقصدي بس لان انت اخويه واكدر افضفضلك والصدك البنيه دخلت قلبي
نمير :والله ما اقصر وراح احجي لريا تحجي وياها ونردلك خبر
ورا ما راح علاء وامه
دخلت للبيت صحت ريا گتلها شنو رأيج بعلاء گلتلي خوش ولد ليش گتلها اذا راد رفل تنطوا
گلتلي والله ما اعرف لو رشا جان گتلك متمانع لان بعقلها توزن الامور ومحتاجه رجال يسند ظهرها خطيه مشافت شي من رجلها الاول ٦شهور وتوفى وهي حامل ب بنان
بس رفل هاي غير شكل ما اعرف الصدك دماغها شلون يشتغل
گتلها ريا بالاول احجي كدامها عن مميزات الولد وبعدين فاتحيها
جاوبتي ان شاء الله هسه من اكعد ويا هن افتح الموضوع
ريا :ورا شويه بقيت بس اني ورشا ورفل گتلهم شفتوا لعلاء
هذا خطيه عنده شلل اطفال ولادي بس حالته تعتبر افضل من غير حالات شلل الاطفال لان يكدر يمشي بالعكازات
رشا :اي انتبهتله خطيه لابس مساند بتك من رجله

كلش انقهرت عليه شكله حلو
رفل :ترى لتاخذكم الرأفه بي ترى صلف وعينه گويه بقى يبصبصلي بنظرات مال مو راحه ومن ردت اساعده يوگف گلي من تجين يمي
ريا :اي صدك ترى هو رايدج وترى الولد مابي عيب غير رجله وهاي من الله خو مو نحاسبه عليها بس الولدخريج هندسه ميكانيك وياسر يشتغل عنده
وعنده بيت وحده وسياره وحالته الماديه خير من الله وهو صديق نميرمن صغار يعرف اخلاقه يگول ورده
رفل:بس اني ما افكر بالزواج حاليا اريد اتخرج حتى اشتغل واساعد ابويه ذاك اليوم شفته كلش مهموم خطيه علمود المصرف
رشا :اي والله خطيه بابا هاي كعدته گلبت كل الامور مچنه حاسين بضنكه ماليه هسه يادوب خطيه ويا شغل ياسر ديسد المصرف الحمد لله ان شاء الله تفرج متبقى هيج اني لو الگالي وضيفه من باجر اتعين
ريا :هسه شنو گلتي رفوله فكري زين قبل لتجاوبين
رفل:خلي افكر كم يوم واردلكم خبر
خلي اعرفكم عن نفسي اني رفل صف ثالث ادارة اعمال من عائله بسيطه ابويه موظف اتقاعد قبل فتره مو طويله لان اتمرض
عندي ريا زوجة منير هاي ام عقل ناضج كلش تفتهم وتصرف صح
رشا هاي عاطفيه كلش بحيث قبلت بزوجها وهي متحبه لان شافته هو يحبها واستقتل عليها وبقى يگلها لاخر يوم بحياتي
ابقى اخطبج الى ان توافقين تالي تعاطفت ويا وتزوجته وبقت تتعامل وياه بعطف وتبينله هي تبادله الحب لكن بيناتنا احنه خواته جانت ادكول بعدني ما حبيته حبيت حبه الي وتالي ورا ٦ شهور اتوفى الولد وهي حامل جابت بنان يتيمه حتى مشافت ابوها لذلك احنه انحاول انعوضها ابويه كلش متعلق بيها واني احسها بنتي مو بت اختي تقضي وقت بحضني اكثر من امها لان من ارجع من الكليه لحد ما انام هي ويايه حتى من ادرس