رواية يا قاتلي هل لي بكلمة الفصل التاسع 9 - بقلم HaboOoshy

كنت أحسبك غالي لكن للأسف تغيرت !!!
وصرت فوق الغلا كله

الساعة 8:15 بعد العشاء
فايزة ترحب بالضيوف بكل ذوق واضح انهم ناس هآي كلاس مو مثل ما كانت تتوقع تفحصتهم زين تمنت ان المعرس لبنتها شذى
أم ناصر تأشر على شذى : هذي هي العروس بنت زوجك ؟
فايزة لوت لسانها : لآ العروس دآخل بتجي
أم نآصر : ايه زين عجلي عليها يآم متعب نبي نشوفها
قامت فايزة بغيض من ياسمين : إن شاء الله
طلعت وراها بنتها شذى : ماما الحين هذول الهاي بيخطبون بنت الفقر ذي
فايزة : أنا أوريها ما تآخذه لو تموت
راحت مع بنتها باتجاه غرفة ياسمين اللي كانت متجهزه ومحزنه حابسه عمرها
فتحت الباب بدون لا تطقه : قومي اخلصي الحريم بيشوفونك تكلمي زين معهم
مالي خلق مناقر تركتها و مشيت لحقتني مع بنتها السوسه ودخلوا قبلي
فايزة : تعالي حبيبتي تعالي هذي هي العروس ياسمين
ام ناصر : ما شاء الله تبارك الرحمن تعالي يمه بجنبي تعالي
فايزة : ليش واقفة بعيد عيوني تعالي اقربي
دخلت وانا مو طايقة نفسي شوي ابكي واقولهم مابي ولدكم بس مسكت نفسي رغم سوء نفسيتي الا اني لاحظتهم انهم ناس ذوق ومحترمين ولا هذي ام لواحد يبي يتزوج .. شكلها صغيرونه !
ام ناصر : ما شاء الله تبارك الرحمن كم عمرك ؟
ياسمين : 23
يارا بعفوية مثل الاطفال : انت ممرضة صح ياسمين
رفعت راسي وابتسمت لها على طريقة في السؤال كانت عفوية : ايه
يارا : أنا اسمي يارا اخت المعرس ان شاء الله تكونين نصيب اخوي بنفرح فيكم
كشرت ورجعت نزلت راسي .. رن جوال فايزة ردت : هلا ابو متعب .. ايه ان شاء الله ، مع السلامة لفت علي :ياسمين حبيبتي انزلي تحت ابوك يبيك بمجلس الرجال روحي له
فجأة صرت حبيبتها وصارت معي طيبة واخلاق ، اكرهها : إن شاء الله ، قمت واحسني ودي ابكي رجليني مو شايلتني رحت لقيت ابوي ينتظرني على الدرج مسكني وهو مبتسم يطمني : لاتخافين ما يآكل
رفعت راسي ناظرته وعيوني غرقانه : يبه لا تسوي كذا فيني ما صدقت لقيتك لا تخليني افقدك ثاني
خالد : يلا يبه عشاني ادخلي وصدقيني لو ما اعجبك برده بنفسي وش تبين اكثر
ياسمين : جد يبه
خالد : وعد انا عند كلمتي
مشى ابوي وانا مشيته معه بس خطواته بعيده بشوي دخل المجلس قبلي ودخلت و انا ماسكه يده وثوبه و عيوني على الارض همس لي ابوي : سلمي
لاشعوريا قلت : السلام عليكم .. مدري لو طلع صوتي اولا
جلس ابوي وجلست جنبه وعيني في الارض حسيت ابوي بيتحرك وكأنه بيقوم ما امداني اتمسك فيه الا وهو اللي قآم : خذوا راحتكم شوي وراجع
لا يا يبه ليش سويته فيني لييييييييش ظليت متوترة ودي اقوم اصرخ فيه مابيك اطلع برا عيوني غرقانه دموع .. حسيت فيه قرب قعد على الكنبة اللي جنبي
همس : شلونك سوسو
ما رديت ، رفع راسي بيده : تحرميني اشوف الجمال هذا
قفلت عيوني بقوة وفي نفسي اقوول وقح !
: لهالدرجة كارهتني ما تبين تشوفيني
نبرة الصوت مو غريبة علي فتحت عيوني ببطء تأملت وجهه اللي مقابل وجهي
: فؤاد !!
فؤاد : عيونه وقلبه وروحه
ياسمين : انت فؤاد !!!!
فؤاد : بشحمه ولحمه جاي لعندك يا عسل
ياسمين بفرحة : بس كيف كذا وليه ما قلت لي
فؤاد : هذي مفاجأتي لك أبيك تكونين زوجة لي يآحبيبتي
مشآعري مختلطة مابين حزن وفرح ودموع .. و صدمة ! ~

تَعالّ . . .
و حِس بإنَكْ للاَسفْ .. مـَ تِحسٌ !

لفيت الرياض كاملة اليوم مادري وين اروح ولا ادري وش اسوي فجأة طرا على بالي ابوي ايه هو لازم يشيل معآناتي الذنب مو ذنبي ناظرت ساعتي 9 الا ثلث لسى هو في الشركة لحسن حظي الشركة قريبة مني وصلت له كان موجود دخلني له سكرتيره
ابو سعد : هلا يبه رائد حياك
رائد : يبه انت عارف ان اللي فيني مو شوي وش ذنبي انا اتحمل كل هذا
ابو سعد : شوي شوي خلني اقدر استوعب
رائد : يبه غالية
ابو سعد : وش فيها غالية
رائد : يبه غاليه حامل !
بعد صمت للحظات : طيب وش بيدي اسوي هذا قدرك
رائد : يبه افهمني مابي انفذ شي ما اقدر اتركها هي زوجتي و ... ام ولدي
ابو سعد : خلاص لا تتركها وضيع نفسك وضيعنا معك
رائد : يبه ليش تتخلى عني وانا احتاجك الحين مو انت اللي جيتني وعمري 16 سنة اداوم في المدرسة واكبر همي سيارتي و الشباب قلت يا رائد لازم تتزوج قلت لي لاتضيعنا و الحين وش النتيجة قولي تهديد وضغط حتى حياتي انتم راسمين السيناريو وانا امشي عليه وفوق كل هذا مالي حق اعارض مالي حق ابقى مع زوجتي و ولدي ليش ليش يا يبه لييش
ابو سعد : افهمني انت خلك صاحي واعي ولو بتفكر عدل بتقدر تنقذ نفسك خلني بعيد وخل عمك بعيد تقدر تحل الموضوع بنفسك بدون مساعدتي لا تضعف انا ماربيتك على الضعف
رائد : يبه الله يخليك وجهني مابي اهدم بيتي مابي اضيع زوجتي و ولدي ولا ابي اضيعكم احسني مخنووق بموووووت
ابو سعد : اذكر الله و يلا خلنا نمشي البيت ارتاح و الصبح نتفاهم
رائد : يبه انا اخذت قراري ولا يمكن اتراجع فيه علم عمي سيف عليه
ابو سعد : وش قررت ؟
رائد : غالية بخليها تترك المستشفى بتقعد بالبيت
ابو سعد : اللي تشوفه اهم شي مابي اشوفك بهالحالة يلا قدامي ...~

مر اسبوع أهم الأحداث فيه :-
ياسمين و فؤاد .. ملكتهم بعد ثلاثة أسابيع
رؤى قررت تجيب امها للرياض بعد اقتراح هند خصوصا ان حالتها الصحية صارت افضل ولازالت رؤى مجتهد في عملها بينما هند لا جديد
فارس رجع يبحث عن اخته المفقودة بعد ما اهله تقبلوا خبر غالية انها مو بنتهم و معاذ و دانية .. لا تعليق !
سعود ضايع و مو صاحي يداوم الوقت اللي يبي و يترك الوقت اللي يبي كانه المستشفى ملكية لأبوه و في سالفة غالية شكله نآوي على شي ....
رائد و الاتصالات اللي تجيه و الطلب اللي رافض ينفذه وتمسك بغالية اكثر عشانه و سيف بعد مافي جديد تعدلت نفسيته ورجع يداوم بس كالعادة نفس الاسلوب مع غالية
ابو سعد و عائلته نفس الروتين الا انه قرر يتزوج في الفترة الحالية
غالية على حالها وحده ونفسية متدمرة اضافة لحبس رائد لها في البيت ورجع هجرها معاملة رائد لها حكاية ما يندرى وش نهايتها !!
الغريب ان ناتالي لها حقيقة .. اصلا لازم نستغرب وجودها وهي بريطانية تعمل خادمة في بيت سعودي !!

###########

قمت على غير عادتي الساعة 2 و نص الليل تعبانه احسني مكتومة تعدلت على السرير شربت مويه وتنفست بهدوء ظليت فترة على حالي ثم قمت آكل شي خفيف حآسه بجوع
مدري هالوجبات صآيرة ماتكفيني يمكن لاني اثنين الحين وه يا عمري ماتوقعت اعيش لهاللحظة مع اللي بدآخلي رائد مسبب لي رعب و الشي اللي يقوله مايحب يتناقش فيه مرة ثانية بس الحين كلي تفائل حسيت الحياة ابتسمت لي .. حسيت بالجوع يزيد طلعت رايحة للمطبخ سمعت صوت في جهة غرفة ناتالي و بصراحة خفت ..
مشيت شوي شوي سمعتها تتكلم ، ايه تتكلم وكلامها ... عربي !
ناتالي تحكي عربي ؟ ليش و كيف ومن متى و مع من بعد ؟ صوتها متغير كثير بس انا اعرفه هذي النبرة من حنجرتها حاولت اقرب اكثر ابي اسمع كأنها انتبهت علي سمعت هدوء وصوت خطوات تقترب مني
فتحت الباب : can I help you " أساعدك بشي "
غالية : مع من كنت تحكين ؟
ناتالي : Excuse me ?! " عذراً "
غالية : سمعتك باذني تحكين انطقي و لا وربي ماتقعدين عندي دقيقة وحده
ظلت تتأملني فترة ثم نزلت راسها تعجبت اكثر منها قلت : ما قررتِ ؟
ناتالي : الصبح بفهمك كل شي .. بعد اذنك
دخلت قفلت بابها وخلتني وانا مابين صدمة وتعجب وفضول ..~