مّحًتّأَرٌة !
البيت هاجد له كم يوم من دخل معاذ المستشفى دانية ياعمري عليها فاقدته واضح عليها بس تكابر الوالد عنده شغلة طلع بعد الشاي مباشرة الوالدة حالتها مو بذاك الزود الله يعينها بعد معاذ هنادي مأجلين ملكتها بدون تحديد لين يطلع معاذ و يرجع وليد فارس الله يعينه احس الاشغال على ظهره ما يقصر و الله
كنت جالسة اتقهوى و اتصفح مجلة أزياء الهدوء معبي الصالة
نزلت هنادي و دانية للصالة يجلسون معي نسولف في ملكتها بنسويها في البيت عشاء بس و الزواج له خطط ثانية
هنادي : اقول شوشو وش رايك البس ازرق ولا احمر ؟
شروق : لا انتِ البسي احمر عشان يورد بشرتك بتلبسين ازرق بيطلع لونك سماوي
دانية : هههههههه تخيلي عاد العروس سماويه
هنادي : طيب موديل الفستان محتارة وش البس هذا ولا هذا
ورتني مجلة فيها كذا موديل اخترت لها المناسب لجسمها : هذا و القرار في الاخير لك
دانية : أنا ما ابي البس فستان نفسي البس تنورة
شروق : لا ما يصير هذي ملكة اختك يعني لازم فستان و طويل بعد
دانية : لا بلبس تنورة دامه بالبيت و بتشوفين كيف بطلع
هنادي : قمر والله قمر لو بخيش
دانية : ايه ادري من يومي قمر بس خيش عاد !!
شروق : سوي اللي يريحك أنا بطلب فستان جاهز نفس مقاساتي
دانية : من وين من أم فيصل ولا من النت ؟
شروق : لا من النت موقع اجنبي خلال اسبوع يكون عندك وعلى حسب مقاسك بعد
هنادي : حلو ابي مثلك شوشو
شروق : شوفي بفتحه لك و انت شوفي لو يعجبك شي اطلبه لك يوصل سوا مع فستاني
هنادي : يلا طيب وريني احسن من التفصيل و وجع الراس
شروق : دودي عطيني لابتوبي شوفيه هناك يشحن
***
كنت وافقة اسمع لهم صدمتي شلتني .. ما قدرت اتحرك من مكاني !
قام وقف مذهوول : معقول كل هذا صاير 11 سنة عندكم سر توني ادري
رائد : لاتزعل ياخوي مو بايدي
سعد : المفروض اعرف ومن بدري بالسالفة
رائد : ...........
سعد : ليش انا مو من العائلة ذي ولا نسيتوني بين الاميركان سكت شوي : أي اميركان اصلا انت متزوج قبل لا انا اخلص دراستي !
رائد : يا سعد افهم علي أنا كنت مأمور ما بايدي شي و الوحيد اللي راح يقولك السبب هو عمي سيف مو انا حتى انا ماعرف وش السبب
سعد : و ابوي ؟ ما سألته ليش
رائد : ابوي قال كلمة وحده ، لا تضيعنا !
قعد سعد وهو يمسح على شعره : تضيعنا كيف ؟ و الحين وش ناوي تسوي ؟
رائد : بنتظر ولدي بعده بقدمه للجازي وبحكي لها
قام مبتسم لي سلم علي : مبرووك بتصير أب من قدك
رائد : مثلك يا ابو فواز
سعد : ايه وش عليك يا ابو سعد
قام يتلفت حوله : وينه ابو سعد ماشوف احد
سعد يضحك : انت ابو سعد
رائد رافع حاجبه : ايه وش عليك يا ابو رائد تمون
سعد يحك حواجبه محرج : معليش وش اسوي هذا اختيار سارا
رائد تكتف : اجل اعذرني غالية يمكن تختار بذوقها
ضربه سعد على كتفه : انا اخوك يا دب
رائد : سبحان الله توني اصير اخوك
سعد : خلاص هونت لا تذلني على اسم
رائد : احسن ماسويت
سعد : يلا ندخل الشاي برد
رائد : يلا .....
دخلت قبلهم انتظر رائد متى يحكي ~
***
نزل فارس : السلام عليكم
الجميع : وعليكم السلام
فارس : وش تسوون ؟
شروق : نشوف فساتين للملكة
فارس : مو طالعين السوق ؟
هنادي : لا النت اسرع نطلب و نقضي الوقت في شي ثاني
فارس : ايه مبرووك يا عروس بتعرسين قبلي
هنادي : وش اسوي لك انت ماتبي
فارس : اي ما ابي مو انا قلت لك دوريلي
هنادي : ايه بس مو مهتم ولا انا لقيت لك وحده جميلة
شروق : وين لقيتيها
هنادي : بصراحة ماعرفتها زين بس اعجبتني وقلت ابي اعرف عنها اكثر بس ما صارت لي فرصة
دانية : من هي ؟
هنادي : شروق في ملكة صديقتك مو كانت وحده من البنات اللي على طاولتنا لابسه اسود وفضي اسمها هند
شروق : ايه هند ما غييرها يا حليلها
فارس : ليش انتِ تعرفينها ؟
شروق : ايه صديقتي ممرضة ، يؤ شلون راحت عن بالي هي معك ممرضة في المستشفى
فارس : هند معي أنا ؟!
شروق : ايه فارس تذكر زين يوم كنا بالسوق من فترة صح لقينا ياسمين و طلعت ممرضة معك في المستشفى هند بعد معكم تذكرها فرووس كلنا صديقات
فارس : ايه هند ماغيرها شلون انساها
هنادي بتطلع عيونها : فروووس وش هالكلام لا يكون ....
قطع حكيها وهو يضحك : لا يا انتِ مو كذا بس هي اللي كانت موقفة معي يوم سالفة غالية
هنادي : آهااا على بالي بعد ، طيب وش رايك فيها ؟
فارس : ما عليها كلام صراحة و لا اقول عنها شي عاقلة وحكيمة و امينة بعد
هنادي : على بركة الله نخطب و الملكة سوا
فارس : لا وش نخطب انتِ بعد أنا ما افكر اتزوج موظفة ابي ربة بيت
هنادي : وليش ان شاء الله
فارس : كذا ابي زوجتي لي ولبيتي بس محد يشاركني فيها
دانية : عندي لك عروس جميلة وصغيرة وتوها ما خلصت دراستها بس دبيه شوي
شروق : من هي بعد
دانية : رهف اخت صديقتك العروس بس لازم اشرط عليها تخطبني لاخوها ولا ما فيه
فارس : هههههههههههههه مو صاحية والله
شروق تضحك : نسخة طبق الاصل من معاذ
فارس قام : ايه جد ذكرتيني بودي الوالده له
دانية : بجي معكم
فارس : يلا بسرعة و نادي امي معك
دانية : طيب
***
رائد جاني بعد ما طلع بابا العصر قال بيخلص شغلة ضرورية لاني اصرت عليه ما يروح حسيت معه بالحنان اللي عمري ما لقيته بعد ماما ، كان يحقق معي
: وكيف عرفتي رقمه حتى كلمتيه ؟
غالية : دلال كلمته
رائد : يعني له كم يوم يجي بيتي و أنا آخر من يعلم !؟
لفيت عليه مستنكرة : هذا ابوي يا رائد !!!!
رائد : واذا ابوك لازم يكون عندي خبر بالاول
غالية : طيب على امرك ماعيدها
رائد : مايدخل بيتي بدون اذني مرة ثانية
غالية ببرود : ليش أنت ما قلت له هالكلام
رائد : الكلام لك لانك دخلتيه بيتي فاهمة بيتي
غالية بنفاد صبر : طيب وش شورك الحين ؟
رائد : لا تعزميه مره ثانية بيتي
غالية : ممكن تطلع برا
رائد شوي يطير عيونه من كثر ما فتحها على وسعها : تطرديني !! لا سيف هذا ساحر
غالية : لو سمحت لا تغلط عليه
ابتسم : اشوف صار لك لسان و الله
غالية : ايه صار لي لسان ولسى ما شفت منه شي اطلع برا الحين صديقتي جايه
رائد : سويت فيك خير يوم قلت لها تجي بس انت مو وجه خير حسابك عندي انت و ابوك يا بنت سيف
غالية بهمس : استغفر الله العظيم
/
\
/
\
قالت لي غالية عن زيارة زميلتها في المستشفى قلت طيب بقعد معكم شوي ما حبيت اردها واكسر بخاطرها
غالية متغيرة كثير المسكينة عانت كثير مع رائد وأنا اشوف احسن صار لازم توفقه عند حده شي حلو منها بس اخاف يتأثر ولدها من مزاجها لازم اكلم رائد يبعد عنها على الاقل الفترة الحالية لان الواضح انه من تأثير الوحام
نزلت استقبل هند اللي الواضح انها وصلت كنت على الدرج
هند : السلام عليكم
دلال : وعليكم السلام
نزلت سلمت عليها ما امدانا نقعد الا و غالية نازلة سلمت عليها وقعدنا
هند : غالية وش اخبارك وش مسويه ؟
غالية : الحمد لله عايشه انت طمنيني عنك وينك غبتي عني فجأة
هند : اشغال وربي العمليات و رؤى تعبانه و زواج ياسمين الله يعين
غالية تحمست من طاري المستشفى : ايه كيف المستشفى و كيف البنات
هند مبتسمة من طريقة كلامها : تمام ناقصنا انت بس
دلال : غالية ودك تروحين المستشفى ؟
غالية : نفسي بس وش اسوي في حالي
هند : والله نظامنا تغير بدونك انتظر يوم الاوف بفارغ الصبر
دلال : الله يوفقكم ، بعد اذنكم أنا طالعه
قامت ماشية مبتعده عنا جات رينا مقدمه لنا ضيافة بسيطة بامر من دلال
هند : غالية انت زعلانه ؟
تعجبت من سؤالها : زعلانه مِن مَن وليش ؟
هند : أنا و البنات !
غالية باستفهام : ليش صاير شي فيه شي ؟
هند : لا بس اتطمن
غالية متحمسة : وش صار وش الجديد خبريني
هند : أبد بس ياسمين بتتزوج قريب و رؤى اليوم ولد عمها بيشوفها
غالية : الله يوفقهم
هند : كاسرة خاطري رؤى تخيلي وافقت عليه بس عشان تعالج امها
غالية : ليش وش فيها امها ؟
هند : يوووه قصتها قصة اسمعي .....
هند حكت لغالية كل اللي صاير مع رؤى ؛ بعدما حذفت رائد !
غالية متأثرة : الله يعينها و يسهل امرها
هند : آمين ، آسفه غالية ماجيت انكد عليك
غالية : لا ولا يهمك
هند : أكيد
غالية : أكيد ، اليوم عشاك عندي ما بتطلعين من لين تتعشين
هند : لا معليش خليها وقت ثاني بعدين ممكن رائد يجي في اي وقت
دخلت دلال : لا تخافين ما راح يجي اليوم
تعجبت هند و ابتسمت ..
دلال : اقول غالية ما كأنك خذيتي وجه اشوفك قاعدة انسدحي يلا
غالية وهي تحك حواجبها : لا بس ما سمعتي الدكتورة وش قالت آخر مرة ؟
دلال : أنا سمعت بس يمكن انت ما سمعتي هي قالت قلت نسبة الخطر ما قالت انعدمت وانت اليوم قعدتي بما فيه الكفاية يلا انسدحي اخلصي
رفعت رجليني على الكنبه وانا مبتسمة قوية وعنيدة مدري على من طالعة
**
ﯾ̃ﺈ̃ ﺭﺑ̐ ﺂ̶̶̶̶̲̲̲ﺳ̶̉ﻋ̝̚ﮈﮬ̲ﮧ̲ دٌۅ̶ﯙ̷ًﯙ̷ًﻣ̲̌
عبد العزيز امس الليل وصل مع موظفي فرع الشركة في السويد فضل يقضي يومه عند امه ما عارضت خليته يكون براحته بشوف نهايته هو وامه وش بتكون ما صارت لي فرصة اقعد معه طول اليوم وغير كذا أجلت الاجتماع وهو معهم لذلك صار عشاي اليوم معه ..
كنا سوا ننتظر العشاء في احد الفنادق ... هدوء ممزوج بصوت الموسيقى كان الصوت المسموع هناك كسرت حدة الصمت بينا
: وش آخر خطط امك ؟
عبد العزيز ماعجبه السؤال : ولا شي
رفعت حاجب باستنكار : اكيد ولا شي
عبد العزيز : الله يطول لي بعمرك يا يبه خلها عنك صدقني ما تفكر تأذيك ابد
سيف : انت ما تدري وش اللي قاعد يصير يكفي حقدها علي لاني ارسلتك السويد
عبدالعزيز بابتسامة جانبية : بيني و بينك أنا مرتاح هناك بس ارجع الرياض انكتم
اخذت جولة بنظري عليه كامل : كم عمرك انت ؟
ابتسم ابتسامة وسيعه : 27 مبين ؟
سيف مبتسم : اكيد لا ، و متى ناوي تفرحني فيك ؟
عبد العزيز يحك راسه : والله أنا ودي من زمان بس الوالدة رافضة
سيف رجع ظهره على الكرسي : يلا حطها في القائمة عندك رافضة تزوج ولدها ، هذي ام هذي أخ بس غلطة عمري الله يرحمك يا يمه
عبد العزيز كاتم ضحكته : كيفها ناتالي رجعت بريطانيا ولا بعدها عندك ؟
ابتسم سيف ابتسامة كبيرة : دلال بخير تسلم عليك
عبد العزيز : الله يسلمها فقدتها ودي اشوفها
سيف : تقدر بأي وقت اطلبها
عبد العزيز : بشوف لي يوم قبل لا اروح
سيف ساكت مبتسم : ......
عبد العزيز : عساه دوووم يبه ؛ صاير شي أنا ماعرفه
سيف : ما صار الا كل خير
عبد العزيز : ما ودك تقول لي شي ؟ تراي فاضي و بسمع لك
ضحك سيف ضحكة قوية توزع صداها في ارجاء الصالة : ما اقدر آكل في موسيقى غيّر لي الطاولة
لفيت أكلم الجرسون بخصوص موقع بلا موسيقى وكنت اراقبه ارسل مسج من جواله ورجعه و هو مبتسم ..... غيرنا الطاولة لطاولة مطلة على شرفة واسعه هواها البارد لعب في شعورنا اللي ما حميناها من برودة الجو
عبد العزيز بعد صمت و تفكير : وش صار على غالية
ناظرني بنظرات عجزت افهمها و لف يناظر الانوار البعيدة : غالية بخير تسلم عليك
ابتسمت بدون ما احس جملته فرحتني ما تعودت اسمعها : جد تسلم علي ؟؟!!
ابتسم لطريقة كلامي : لا .. بعد صمت : وش رايك انت تسلم عليها بنفسك !
عبد العزيز بشك : سويتها ؟!
سيف : اليوم غداي كان عندها
فرحت له ودي لو تتقبلني ... اختي غالية
***
على طاولة العشاء الكل مجتمع ، رائد يآكل بشهيه .. ابي اكلمه مافيني صبر
سعد : لين تكفين الصبح جهزي عبد الإله و فواز الجازي ما راح تقدر
لين متعجبة : ليش وش فيك جوج ؟
الجازي : عندي مشوار بطلع من بدري
لين مندفعه : وين خذيني معك الله يخليك ما ودي اداوم بكرة عندي محاضرة وحده مدتها ساعة بس
رائد : اسم الله عليك خذي نفس هذا طاري الطلعات شوي شوي لا تموتين
لين بدلع : رائد بابا شوفه
ضحك سعد بخفة : مهبوله ، ها ما رديتي بتجهزينهم ؟
الجازي : لا ما توقع يمديها انا بجهزهم لك
سعد : لازم نطلع بدري عشان يمدينا نوصل على سبع
الجازي : خلاص بتصرف انا لين لا تعتمد عليها الا في طلعه
لين ترمش : فديتني
رائد : وعناداً لك ما في روحه
لين : بابا شوفه
ابو سعد : يا رائد خل اختك في حالها
رائد : ما قلت شي بس هي دلوعه بزيادة
لين : أحلى دلوعة
سعد : وش عندك تتغزلين في نفسك ليش مآخذه هالمقلب !!
لفت على ابوها : بابا بكرة الصبح نفطر سوا و نروح نتسوق و نتغدا و نرجع الظهر
ابو سعد : إن شاء الله
رائد : يبه سلمني هالبنت يوم وقسم لا ترجع لك بشنب
الجازي تضحك : حرام عليك رويد وش تبي تسوي فيها
رائد لف وجهه : رافعه ضغطي بدلعها الماصخ ذا
ابو سعد : يا رب عيشني للوقت اللي اشوف كيف تعامل بنتك
ابتسم رائد و رفع الملعقه يآكل ابتسم معه سعد وهمس له ، الجازي كانت تناظرهم
: الحمد لله
ابو سعد : وين يبه ما كليتي
الجازي : الحمد لله شبعت لفت لرائد : بس تخلص تعال ابيك في غرفتي
رائد اللي يناظر سعد : إن شاء الله
سعد بهمس لرائد : وش السالفة
رائد : علمي علمك
سعد : الله يعينك شكلها جاده أنا بروح أجيب سوسو يعني لا تنتظر فزعتي
رائد : من قال افزع روح لسوسو هههههههه
/
\
/
\
خلصت عشاي وترددت اروح لها بصراحة احس الموضوع زواجي مدري ليش
طقيت بابها بعد لحظات من الهدوء و الانتظار ، فتحت
: تفضل
دخلت وقعدت على الكنبة اللي اشرت لي عليها : سمي يمه
الجازي : انت محتاج تحكي و انا اسمع
رائد : عن ؟
الجازي : حياتك
رائد : عادي حياتي ما فيه شي كل شي تمام ولله الحمد
الجازي : و غالية
ما انصدمت تبون الجد حسيت بهالشي : وش فيها غالية
الجازي رفعت حاجب : يعني معترف ؟!
رائد : ما راح اكذب عليك
الجازي : ليش خبيت عني
رائد : من قالك
الجازي : مو مهم المهم اني عرفت
رائد بعد صمت : كنت بقولك بس انتظر ولدي
الجازي : كم باقي له ؟
رائد : حول 6 شهور
الجازي : رائد لهنا خلاص كافي ... لازم اشوفها
رائد : تآمرين
لحظات صمت قطعها صوتي : الجازي
الجازي : هلا
رائد : ما زعلتي ؟
الجازي : عارفه بكل شي
رائد : مِنْ ؟
الجازي : سمعتك تحكي لـ سعد
رائد وقف : أنا آسف
الجازي : مسموح
رائد : تصبحين على خير
طلعت مستغرب رده فعلها و سعيد بالهم اللي انزاح ~
***
اليوم ماعندي دوام في المستشفى حلو عشان اخلص اشغال معلقة بعد أول شي راح اسويه بمر مشعل اشوف آخر الاخبار معاذ ما بقى له شي و يخلص كورس علاج هذا اهم شي شاغلني في الوقت الحالي ركنت سالفة اختي على جنب الفترة الماضية تبون الجد تعبت من البحث هذي السنة الرابعه لي انا ابحث تجيني فكرة انها ممكن ماتت بس انفضها من مخي بسرعة بسبب حلم الوالد اللي يتكرر و الواضح ان البنت قريبة مو بعيدة بس كيف نوصل لها !
ودي اكمل دراستي في تخصص جراحة القلب بس الظروف المحيطة ما تساعد ابد
وصلت لمشعل في مكتبه ما كان موجود انتظره دقايق و هو عندي سلمت وقعدت
: هاااه وش صار معك ؟
مشعل : و الله يا فارس هالقصة وصلتنا لخيوط ما كنا متوقعينها في قضية لها 7 سنوات دخلت معهم فيها من شهرين بس و الحمد لله جمعنا معلومات كبيرة و باقي شوي و ينعرضون للعدالة
فارس : الله يبشرك بالخير الله يقويكم
مشعل : آمين
فارس : ترى غداك عندنا و ما نقبل اي اعتذار
مشعل : يا فارس و بعدين معك توني من كم يوم عندكم
فارس : خلاص عاد هذا بيت عمتك ننتظرك
مشعل : وش صار على معاذ متى بيطلع
فارس : باقي له شوي على كلام دكتوره
مشعل : الله يقومه بالسلامة
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!