رواية يا قاتلي هل لي بكلمة الفصل الثاني 2 - بقلم HaboOoshy

الجـــزء الثاني ~

*****

بعد مرور خمسة سنوات على السابق

*****

كنت جالسة في الصالة اشرب كوب عصير برتقال و اتابع صباح السعودية احب هالبرنامج كثير انتبهت لها وهي داخله البيت معها شي غريب استغربته بالبداية بس ماستنكرته اعرفها مهبولة هالبنت ما دآومت في الكلية عشان تجيبه : أمووووآآح .. وهذي بوسة لأحلى بآبي
قفلت منه فرحانه كثير بالعود الجديد اللي شريته لكن يا فرحة ما تمت لقيتها بوجهي : لين وش هاللي معك 
لين : امممممممم ، عود مثل ما تشوفين ماتعرفينه يعني
الجازي : اقصد وش تبين فيه وش يسوي هنا عندنا بهالبيت
لين : اممم عاتي يا عمري كله عود أبدق فيه لآ اجتمعت مع البنات
الجازي : رجعيه مكان ما جبيته ما يقعد مزمار الشيطان بهالبيت دقيقة وحده
لين : مو على كيفك بآبي يدري عنه و موافق فديته
الجازي : احترميني يا بنت عن الدلع الماصخ وبتشوفين يا أنا يا أنتِ
لين تأففت ولا قالت شي و طلعت ركض لغرفتها ، أما الجازي طلعت جوالها تدق على ابوها .. بعد ثواني جاها صوته
أبو سعد : هلا يبه
الجازي : كيفك يبه ان شاء الله بخير
ابو سعد : نحمد الله سبحانه ، آمري بغيتي شي ناقصك شي
الجازي : ما يآمرك ظالم ياكل الغلا .. بس ودي اسألك عن الآلة اللي جايبتها لين البيت
ابو سعد : اممممم ... ايه تقصدين العود
الجازي : ايه يبه ،، الله يرضى عنك ما يصير اللي هي تطلبه ولا يصير انت تجيبه لها
ابو سعد : ما فيها شي يا بنتي خلها توسع صدرها شوي
الجازي : يبه هذا ما ينفع هذا مزمار الشيطان ودخل بيتنا بكرة يدمر حياتنا
ابو سعد : الليلة ان شاء الله برجع ونتناقش بالموضوع الحين عندي شوي شغلات
الجازي : آسفة يبه قطعت عملك المعذرة
ابو سعد : ولا يهمك يا نور عيني
قفلت منه وتنهدت : الله يصلحك يا لين و يهديك

***

طلعت من تغيير ضماد المريض وراحت تغسل ايدها مر سعود بجنبها و وقف وهي تعديه ونظراته القذرة تلاحقها ، دخلت غرفة الممرضات تعدل حجابها
ياسمين : بنت وش فيك ماجيتي من بداية البريك
رؤى : ليش قالولك ميته على جلستنا خليها بكيفها
ياسمين : ما شفتوا سعود يا قلبي عليه ، يركض وراها ركض وهي مطنشته مدري وش لقى فيها
رؤى : لا هذي ما معك حق ، كل الجمال فيها وه بس الله يرزقنا
ابتسمت غالية على سوالفهم و قعدت بدون ما تعلق
هند : وش فيه الحلو ساكت .. تكلمي يمي مو مآكلينك
" المعروف عن غالية سكوتها الدائم ، مآتحكي إلا ما ندر في المستشفى هادية جدا و اغلب كلامها على حالة مريض مع الدكتور بحكم انها ممرضة "
ياسمين : أقوول هنود شفتي الموظف الجديد اللي اسمه رائد ؟!
رفعت غالية راسها تناظرها تنتظر تكملة كلامها
هند : اسم الله عليك قالت هنوود ما قالت غلو ، ايه كملي سوس وش فيه
ياسمين : انت شفتيه يعني اقصد شفتي وجهه ؟
هند : لا والله بس سمعت انه الموظف الجديد بس ما قابلته من قبل
رؤى : وهـ وهـ ، فاتك نص عمرك وش من جمال عليه الله يحرسه ويخليه لأهله
غالية بصوتها الناعم الهادئ : الحين انتم ما تملون بس تناظرون خلق الله وهذا وسيم وهذا بشع
ياسمين : اخيرا نطقت و ليته من سنع
هند : اي ليته من سنع وش عليك انتي هذا الجمال الله حاطه بالدنيا عشان نصد
رؤى : ايه جد خل نشوف المزايين دام مالنا فيهم نصيب تبين تحرمينا نتأمل
قامت غالية : الله يكملكم بعقولكم ؛؛ دخلت عند المرايا تعدل حجابها بترجع لعملها

***

خلص دوامه وطلع للبيت .. وهو في الطريق رفع جواله ودق عليها
رائد : وينك ماشفتك اليوم
غالية : موجودة بس علي شغل كثير
رائد : وأنت دايم عليك شغل مافي أحد غيرك يشتغل
غالية : ــــــــــــ
رائد : المهم اليوم بمرك بعد العشاء طيب
غالية : كيف يعني بتنام هنا ؟
رائد : مهبولة انت لا بس بسير عليك اشتقنا للحلوين ، تأكدي لا يكون احد موجود بحارتكم
غالية : طيب
قفل منها بعدما وصل البيت و كانت الجازي في استقباله
الجازي : هلا و الله اسفرت وأنورت
رائد : هلابك يمه كيفك وش مسويه
الجازي : بخير دامك بخير ، احط لك غداء
رائد : ايه والله تكفين جوج .. ميت جوع
الجازي : أبشر شويات يكون الغداء جاهز روح بدل ثيابك وتعال ننتظرك
رائد : ليش ما تغديتوا ؟؟
الجازي : لا و الله تعرف الوالد يحب كلن على السفرة و لين جابت لي بلوى معها فوق
رائد : بلوى !! وش جايبة وش مسويه
الجازي : رووح شوفها جابت آلة موسيقية معها وأنا مو نآوية أخليها في هالبيت دقيقة وحدة
رائد : أفااا عليك إلا زعلك أنا بتخلص منها لا تشيلين هم يا بعد عمري
الجازي : يسعدلي ياك فديت قلبك
رائد : فديتك يا يمه .. باس راس الجازي اخته الكبيرة وطلع لغرفته يبدل

***

في المستشفى ~

سعود : بنت الكلب مو راضية تلتفت لي
يزيد : خلها بحالها واضح على البنت انها مو راعية حركات
سعود : هه موراعية حركات اجل وش مدخلها تمريض ؟ ولا شفت صديقاتها كلهم تلاحظ عليهم
يزيد : استغفر الله بعدين لا تتبلى البنات انا ما شفت عليهم شي صح هم داخلين معنا اكثر ويمونون بس الحق ينقال
سعود : اسكت واللي يرحم والديك قال حق قال بكرة بتشوف وش من حركات عندها ذي الحية وياما تحت السواهي دواهي
قطع عليهم دخول الدكتور فارس اللي ما يطيق سعود : وش عندكم شباب هنا
يزيد : أبد وقت البريك جالسين
فارس : آهاا طيب و الغداء وشلون
يزيد : والله انا مطفر اليوم طالع الصبح ركض حالتي حالة ونسيت بوكي حتى ما تشوفني مو معلق بطاقتي
فارس : هههههههههههههه و الله انك مأساة رحمتك يلا غداك علي
يزيد : ونعم الصديق والله مو بعض الناس ولا فكروا فيني
سعود : وش قصدك ؟ الحين انت صرت كخه !! ولا فارس طلع احسن مني
ضاق فارس ما يحب يختلط مع سعود ابد وعشان لا تصير مشكلة طلع : يزيد أنا انتظرك برا
يزيد : يلا جيت ... سعود رجع عقلك لمخك ما يصير اللي تسويه واللي تفكر فيه خاف ربك
سعود : طس بس طس يلا
راح يزيد و خلاه وهو مو عاجبه الوضع ابد .. بينما سعود كل دقيقة من وقته يقضيها يفكر كيف يجيب راس هالبنت
آخر شي طلع من غرفتهم يمشي و لمح غالية عند مريض اللي كان بريكها مخلص من مده وقف يتأملها وسمع صوت من وراه
د.نواف : ها سعود اشوفك واقف ما عندك شي تسويه ولا بريك الحين ؟
سعود : ايه والله يا دكتور هالحين بريك بس قلت امشي شوي
د.نواف : روح تغدا لاحق على المرضى و المشي
سعود : أمرك دكتور ..يلا تبي شي بروح
د.نواف : أبد سلامتك بس لاتنسى لا تتاخر علي كالعادة تعرف احتاجك مع المرضى
سعود : لا ان شاء الله مو متأخر
راح الدكتور ترك سعود واقف في مكانه ولا تحرك لين لفت غالية وشافت نظراته القذرة كالعادة لها
غالية بهمس : الحمد لله إنهم ناقلينه لقسم الطوارئ من الاسبوع الجاي بيروح له و افتك منه هالقذر
ورجعت تكمل شغلها لين انتهى دوامها الساعة 3 العصر و طلعت لبيتها اللي يجمع كل معاني الفخامة !

***

بعد صلاة العصر .. وعلى جلسة الشاي في الحديقة و الكل مستمتع
أبو سعد : يا أولاد في موضوع بحكي معكم فيه
الجازي حست من نبرة ابوها الجديه حطت بياله الشاي ولفت على ابوها : سم يبه نسمع لك
ابو سعد : سم الله عدوينك
لين : قول بابي نسمع لك ، ورائد ما علق وكأنه متوقع او حاس بالموضوع
ابو سعد : أنا قررت أتزوج
بعد صمت دآم دقايق
رائد : مبرووك يبه ، الله يسعدك
لين : وش مبرووك انت الثاني لا انا مو موافقة مافي وحده تحل مكان ماما انا مو موافقة فاهم علي
الجازي : بنت احترمي نفسك وتكلمي زين في حضور ابوك ، يبه أنا مقصرة معك اخواني ناقصهم شي انا عيوني لكم
ابو سعد : ــــــــــــــــــــــ
الجازي : يبه أنا اتمنى لك كل السعادة سو اللي يريحك صدقني بكون مبسوطة طول ما انت مبسوط وسعيد
لين : بابي تكفى لا تتزوج بعد ماما هي كانت تحبك وتموت عليك ’’ سكتت شوي ’’ : الله يخليك عيد النظر

بعد سكوت عم المكان ..
أبو رائد : خلاص خلصتوا حكيكم .. رائد الله يبارك فيك الجازي انت ما قصرتي ورايتك بيضاء بس ولو أنا لازمني وحده تقوم فيني انت مهما صار ماتقدرين
لين بابا عمري ماقصرت معك بشي عمري مارفضت لك طلب عمري ما قلت كلمة لا بوجهك كل اللي تبينه على عيني وراسي مستعد ادفع عمري ولا اشوفك تبين شي ولا تلقينه
امك انا ما قلت انها ماتحبني بالعكس وانا اموت فيها بس وش اسوي غير اني اقول الله يرحمها وان شاء الله لقائنا في الجنة ، أنا ما ودي اسوي شي بدون رضاكم ألزم ما علي انتم
قآم طلع لغرفته مخلي اولاده كلن وتفكيره
الجازي : أنا كم مرة قلت لك تثمنين كلامك بحضور الوالد
لين : لا و الله طيب وش تبيني اسوي اصفق له مثلا ما سمعتيه وش قال !!
الجازي : بس ولو .. بغض النظر عن الموضوع هذا ابوك جنتك ونارك يا بنت افهمي افهمـــــي
لين : بابا على عيني وراسي بس مو موافقة
رائد : عطيني سبب على عدم موافقتك يا ست الحسن و الدلال
لين : وماما مو سبب ؟؟
رائد : لا يكون على بالك نسيناها ولا راح اسمح لوحده بهالكون تآخذ مكآنها بعدين تذكري مو امك لحالك بس وينها الحين هاااه وينها جاوبي
ما تحملت اكثر لين وبكت .. بينما الجازي مازالت صامته
رائد : يالين افهمي ابوي محتاج وحده تداريه وتقوم فيه لا انت ولا الجازي راح تبلون اللي يبيه خلاص عاد ما صارت اللي يشوف يقول زوجته مو بنته
قامت لين على حيلها وهي تشهق : انا مو موافقة مو موافقة وحتى سعد ما رآح يوافق .. ودخلت ركض رايحه لغرفتها
وهي تركض باسرع ماعندها .. صقعت في الجدار العريض في ممر غرفتها و طاحت منه لوحة كبيرة وتحطم زجاجها
قعدت من فورها وبكت وبكت لين غلبها النوم ونامت مكانها و الدم حولها ولاحد حس فيها
الجازي قامت بصمت وتوجهت للمطبخ كعادتها تطلع شوي من حرتها بفكرة ابوها للزواج حسستها انها مقصرة وهي اللي ضحت بالزواج وانها تملك بيت واطفال على خدمة ورعاية اهلها
رائد حس بملل من تصررف لين و صمت الجازي وانها اكيد شايلة بخاطرها بس هذا حقه و لو هي حيه فيه يآخذ عليها 3 بس تفكير الحريم وش يسوي فيه
أخذ جواله ودق عليها : بجيك الحين شوفي الوضع
غالية : مو أنت قلت بعد العشاء
رائد : أشوف طالع لك لسان وبعدين أنا حر بكيفي أجي متى ما بغيت وأنت تفتحين لي وتستقبليني مثل الكلبة فهمتي
غالية: ــــــــــــــ
رائد : قلت بجي جهزي الوضع
غالية : لا تكفى الحين الوضع مو مستقر ممكن اي احد يطلع فجأة
رائد : دبري نفسك بعد ساعة بكون عندك وترى ما بيكون لك خير ,, قفل منها بدون لايودعها او على الاقل يسمع ردها

.

.

.

.

.

تم الجزء الثاني