رواية ياقدري واحلى قدر الفصل الأول 1 - بقلم Shody ✨✨

اجمل شيء بالدنيا هي زقزقة العصافير الصبح وياهة خيوط الشمس الي تدخل خجلانة من خلال شباك غرفتي الصغيرالي ابد مينسد لا بالصيف ولا بالشتاء ونسمات هوى باردة تدخل بصدري تنعشني وريحة گهوة عمي الصبح تعلن عن بداية يوم جميل 🌞
- الوفة يلله يوم كاعدة !تعالي تريگي
- اي خالة كاعدة اجيت
احلى شي من كليتنة نلتم على سفرة الريوك وعمي الله يحفظة يفتح الجريدة ويقرة اخر الاخبار وكل ساعة يسولفلنة عن شغلة ويجابو الولد
_ بابا يعني والله هاي الاخبار الي دتقراهة كلهة دنقراهة بالفيس بوك انت شعاجبك بالجرايد متگلي
_ ابني الجريدة الهة طعم خاص بنقل الاخبار يافيس هذا الطلعلنة صفح
_ يابابا والله لو تقبل اسويلك فيس بوك اخبارالعالم كلهة بيدك شوف جماعتك واصدقائك كلهم عدهم بس انت مچلبلي بهالورقتين الي مصيرهم يمسحون بيهم جام هههههه
ضحكنة على حجايتة وسمعت صوت الخط
_ يلله مع السلامة
_ الله وياج بنتي ديري بالج على نفسج
*
اني ايلاف عمري ١٨ سنة يتيمة الابوين وعايشة عد بيت عمي من اني وصغيرة وعمري ٤ سنوات امي وابوية توفو بحادث سيارة وجابوني لبيت عمي يربوني ،، زوجة عمي عاملتني احسن معاملة ولافديوم حسسوني اني مو بتهم ربيت وية بنت عمي سمر لان بيناتنة سنتين چنة مثل التوم ابد منتفارك عمي چان عندة ٤ ولد معتز الچبير ومرتضى اصغر منة بسنتين متزوج وعايش بيت وحدة  وسلام وحسن وبنية وحدة سمر من واني صغيرة احب ابن عمي الچبير بس بگلبي ومحد يدري غير گلبي وربي ابد محاچية لاحد وبيوم الي سافر لدبي يشتغل راحت روحي ويا هو چان اكبر مني ب١٠ سنين وچان دائما يشوفني اختة واني اموت باليوم الف موتة مو بيدي ياناس هو الگلب يختار محد يتحكم بدگاتة خلصت سادس وطلعت معدل زين ودخلت كلية الاداب قسم انگليزي وبديت اداوم بالجامعة اتعرفت على صديقة اسمهة مروة چانت كلش حبابة ومرتبة چنة اني وياهة نفس الطول والجسم تقريباً اني چنت ناعمة بس جسمي مليان برشاقة الي يشوفني عبالة اني اتمرن لان بطني ممسوحة وباقي جسمي مليان شعري اسود طويل وسرح وبالطرف بي لفة خفيفة وعيوني چانت صفرة ورثتهة من امي اما باقي اوصافي فچنت بنظر الكل جميلة
-عدنة محاظرة مال استاذ طارق اليوم
- دخيل الله شگد حقنة مينجرع
- مروة عيب لحد يسمعچ ترى صحيح هو شديد بس شرحة للمادة كلش مفهوم
- يلله حبي خلي ندخل                                           چان الي هواية معجبين بالكلية ودائما چانو يجون يريدون يعترفون بس اني مااكدر انطي فرصة لأي واحد بالي كلة يم معتز ابن عمي وگلبي مدگ لأحد غيرة ،، وبيوم واني راجعة من الكلية نزلت من الخط واسمع زوجة عمي تخابر وفرحانة وتهلهل
- ها يوم عاد شلونهة حلوة ولو ادري بيك ذوقك حلو ميحتاج احجي واوصيك ، هااا كلش زين وانت شوكت تجي نشوفك يايمة مو متنة على شوفتك ،، اي اي ان شاء الله ،، الله يسلمك يوم حبيبي ،، الله وياك 
اجة ابن عمي حسن چان اصغر واحد بولد عمي واكبر مني ب٤ سنوات
- ها الوفة اجيتي
- هلا حسوني شكو شو الكل مخبوص
- اي خطية معتز شايفلة وحدة بنت اوادم هناك بالامارت عراقية وامهة اماراتية وتشتغل ويا نفس الشركة وهسة ديحجي وية امي وابوية حتى يرحون يخطبوهة الة ،، شبيچ الوفة شو وجهچ اصفر ايلاف بيچ شي                                                        
اني وگف گلبي وحسيت روحي دتنسلب مني اريد اتنفس مااگدر اختنگت گوة سيطرت على نفسي وجاوبت حسن
- لاحسوني مبية شي بس اليوم من الصبح محاظرات ومااخذت ريست ابد ومااكلت شي ،، فتت گبل لغرفتي ومااعرف شلون وصلتلهة ليش ياربي ليش سافر وچان عندي امل يرجع واشوفة هالنوب طلع يحب وحيخطب الحمد لله على كل حال فتت للحمام فتحت الدوش گعدت جوا وظليت ابچي اريد اصرخ اريد اطلع قهري كلة گوة لملمت نفسي وگمت وطلعت لگيتهم صابين الغدة ودينتظروني
- يوم شبيچ شو وجهج اصفر مدري احمر وعيونج ذابلة بيج شي
- لايوم مابية بس تعبانة من رخصتكم اريد انام ممشتهية اكل
- لا ماما اكليلچ لگمة وروحي نامي.                       كعدت اجاملهم واني احس فرحتهم وسوالفهم عن معتز نار ودتنصب بجسمي ،، اجتي سمر من الدوام چانت مكملة معهد معلمات وتشتغل معلمة بمدرسة ابتدائية قريبة يمنة
بملابسهة گعدت عالميز تاكل ويانة
- ميتة جوع
- الناس تسلم تگول شلونكم رئسا ميتة جوع
بلله هاي شلون راح تخرج اجيال على ايدهة هههههه
- يوم هسة اكل واملي بطني واسلم ،، شكو شو فرحانين شكو
- حنروح لدبي اني وابوج
- هلو عيني شنو شهر عسل جديد
- ولج شهريش راحت علينة هالسوالف ،، رايحين نخطب لاخوج معتز مرة
- صدك بالخير ،، بس عود ليش بس انتو ترحون واحنة
- هسة نخطبهة وبالعرس ناخذكم كلكم ونروح
- شنو شو الوفة ساكتة ماكو حس
- والله سمورة تعبانة كلش يلله من رخصتكم اروح انام   رحت لغرفتي وذبيت نفسي عالچرباية ومگدرت اغمض عيني ابد ،، مرت الايام وراح عمي ومرتة يخطبولة واني چنت احس نفسي داموت شوية شوية غابت الابتسامة من وجهي ومالي خلگ الدنيا حتى بالدوام حسو علية وصديقتي مروة اكثر من مرة تسئلني لحد مافد مرة استسلمت وسولفتلهة وچانت اول مرة اسولف لانسان عن مشاعري ونصحتني وگالتلي لازم تنسي لان بعد هو انسان مرتبط وانتي تشوفين حياتچ ،، ورجعو بيت عمي ومرة عمي بس تحچي بالبنية وشلون مرتبة وحلوة وتنگع بالگلب واني اتگرضم كل ميجيبون سيرتهة ،، وقرب موعد العرس ومگدرت اعتذر وچنت مجبورة اروح
- الو الوفة
- هلو مراوي ،، شلونج
- عوفچ مني اريد اعرف انتي شلونج شخبارج
- عادي !! شسوي يامروة اتمنى مااروح بس شنو العذر الي انطيهميا اشو عطلة لو صاير بالدوام چان اتعذرت بالدراسة بس هسة ماعندي اي عذر وكلهم حيروحون اني وين ابقى
- ميخالف حبي روحي ولبسي احلى لبس اريدچ تطلعين ملكة الحفلة لتحسسين احد انو انتي مقهورة مااوصيج بعد
- الله كريم            
-
سافرنة ووصلنة للفندق الي حاجزلنة معتز بي چانت غرفتنة اني وسمر سوة وغرفة لسلام وحسن وغرفة لعمي ومرتة وغرفة لمرتضى وزوجتة واطفالة نزلو الظهر يتغدون اني كتلهم اريد انام تعبت من السفر وممتعودة على الطيارة في سبيل ماالتقي بي اخاف يقرى بعيوني شي او ينتبه على حالتي او يجوز مينتبه علية بس مااكدر اشوفة مااعرف شنو حيكون تصرفي بقيت نايمة للعصر واجتي سمر تحجيلي
- امداج يالثولة ظلي نايمة ،، دتعالي شوفي العالم امج متنسية بيج عالنوم
امي !! دمعت عيوني اني لو عندي ام مچان انجبرت احضر عرس الاحبة واشوفة ينزف لغيري
- لچ الوف مودااحجي وياج يمعودة شبيج !!
- لا حياتي بس ضعط الطائرة بعدة براسي اذاني لحد هسة مدااسمع بيهة
- اي عادي لان اول مرة 😁
- على اساس انتي ماكو مگطعتهة للطيارات كم دولة رايحة بلة زحمة 😒
- هههههههه ديلله حبي بدلي دننزل نلتقي اسم الله بالعروس
- اشو تقلدين !! اشتغل شغل الحماوات
- لا شقلد عيني ليروحون يسمعوني شيخلصني
بدلت لبست بنطرون جينز وقميص ربع ردان لاستيك وبي شدة نهاية الدكم ابيض وبوتين اديداس ورفعت شعري مثل الكبة فوك راسي وحطيت ميك اب خفيف بس برزت عيوني
_ ها سمورة كملتي ،،، سمر چانت لابسة كيلوت مقلم نيلي وقميص جينز ومسشورة شعرهة وفاتحتة وميك اب كلش حلوة،، سمر جان شكلهة حلو شعرهة كيرلي تصبغة احمر وچانت حنطاوية وعيونهة سود كبار وعدهة رصعة بحنچهة
_ اي كملت يلله
نزلنة واني ادعي بگلبي الهي وانت جاهي لتفضح عيوني لتخليهم يحسون علية
نزلنة بالمصعد وشفتهم ملمومين بالرسبشن ينتظرونة عرفتة من ظهرة اندار علينة واجة يمشي يمة من فدوة رحت لطولك ولشكلك
هو چان طويل جسمة معضل وعيونة كبار جوزي على صفار ورموشة طوال وحواجبة ثخينة معگودة وشعرة سرح اسود يرجعة ليورة
صارت عيني بعيني ظل فاتح عيونة ويباع علية متفاجئ اخذت نفس قوي وكتلة
- هلو معتز شلونك بالخير والبركة
- تسلمين حبيبتي الوفة ،، يوم الالج ،، ومد ايدة يصافحني رجفت ايدي بأيدة واني اسحبهة من ايدة على كيف
- وينچ الظهر كالو مالچ خلك
- اي والله ضغط الطائرة اذاني
- سلامات حبيبة ،، عادي تصير لان اول مرة تركبين
اندار عليهم گلهم يلله نطلع ،، طلعنة ورحنة لدبي مول وكعدنة بكوفي ورة شوية اجتي خطيبتة
چانت مرتبة طويلة ورشيقة ومحجبة سمرة وبشرتهة صافية وعيونهة سود كبار وحاجب ثخين وخشمهة صغير وحلگهة صغير بس چانت من تحچي عدهة فرگة بسنونهة مخربة شكلهة من تحجي جانت لابسة بنطرون قماش زيتوني وقميص بيجي مقلم بزيتوني وبرتقالي وحجاب بيجي اجتي سلمت علينة واحد واحد ومن وصلت يمي باستني وگالتلي يوم الالج.        
الكعدة كلهة مباوعت علي اخاف تفضحني عيوني
اجة يوم العرس ورحنة للصالون اني وسمر ونور زوجة مرتضى
نور چانت سمينة شوية بين قوسين جسمهة مخربط وبيضة كلش بس بدون ملامح تنذكر يعني عيونهة صغار وخشمهة كبير شوية وشعرهة سرح على شگار چانت تشوف نفسهة فد شي علينة ودائما تحسسنة هي اية من الجمال واحنة ندري بيهة غيارة وحسودة بس تحاول متبين
لبست فستان چويتي بلة ردن مقسم على الجسم وشعري رفعتة بف من گدام وفتحت الباقي واني شعري طويل كلش وحطيت تاج روماني ذهبي ولبست ذهبي الي ورثتة من امي وحذاء عالي وحطيت مكياج ذهبي وازرق جوة عيني برز لون  عيوني
_ لچ الوف شنو هالحسن طلعتي تخبلين
_ حياتي انتي هم تخبلين طالعة
چانت سمر لابسة فتسان قصير احمر وشعرهة سوتة تسريحة ناصية ونزلت خصل وحمرة حمرة وعدسات طالعة تخبل
اجتي نور كالت
_ ها ولكم عالگيهة فد مرة 
سمر گالتلهة
_ نور ليش خالة حمرة طوخ وية السموكي لازم تخففيهة احلى
_ لا حياتي هيج احلى اني اعشق هذا اللون كلش يلوگلي دباعيني وداعتج اني العروس
احنة وحدة ظلت تباع عالثانية وسكتنة معلقنة رجعنة للفندق ولاگانة حسن وسلام بالرسبشن باوعلي سلام
_ هاي شنو ولچ شطالعة لعابة اليوم الخلايجة يلزمون سرة عليچ
_ ههههههه تسلم سلومي عيونك الحلوة
نطت سمر
_ لعد واني ؟؟
جاوبهة حسن
_ لچ انتي گمر طالعة يلله امشي تأخرنة
اني لزمني حسن وسلام لزم سمر ورحنة للقاعة
گعدت عالكرسي المخصص النة ودخلو العرسان واني روحي انسحنت من فات لازم ايدهة وفرحان يباع عالكل والناس كلهة تصفگ وترگص واني احس بصعوبة شلون اصفگ ورجلية حتى مدتشيلني اوگف اباوعلهم واتخيل نفسي اني الي داامشي ويا
چان حلمي اشوفك عريس بس العروس اني
چنت احلم اشوفك بالكوشة بس اني الي اگعد بصفك واني الي ارگص وياك ونگطع الكيكة سوة ،، هاي الهلاهل الي
قسمة ونصيب حچاية تكسر خاطر الفاگد حبيب
تمنيتك الي بس الله ماراد
_ شنو عيني ست ايلاف مناوية تگومين ترگصين بس لا هم حتنامين هنا
_ لا سمر والله استحي
كامت مرة عمي
_ يلله يوم گومي رگصي لاخوج وفرحيلة
گوة جرتني سمر ورحنة وكفنة يم العرسان وهمة يرگصون وكفت يمة واصفك رجع ليورة وانطخ بية وهو يرگص اندار علية وصفن باوعلي من فوگ ليجوة وعگد حواجبة
_ ايلاف !! خو مااذيتج
_ لا مصار شي
اجتي العروس وكفت يمي ولزمت ايدي ترگص وياية شگللهة اگلهة انتي الاخذتي مني وتريديني ارگص وياج بعرسچ من حبيبي اگللهة ترديني ارگص بعد ماسلبتي روحي وعافيتي
جاملتهة وردت ارجع وكفت اشرب مي وكف يمي معتز
جريت بطل المي دااشرب اتقرب مني وهمس بصوت ناصي
_ انتي شوكت كبرتي وهلگد صرتي حلوة !! وعافني وراح
ظل جسمي كلة يرجف معقولة هو هيج كال لو اني اتخيالي هذا الشي
رجعت كعدت عالكرسي واني مثل المضروب على راسة واباوعلة شلون يضحك وفرحان وواگف يركص وية اصدقائة وعروستة تركص وياهم مرت علي الدقايق والساعات سنين ماعونت شوكت تخلص وارجع لبغداد لغرفتي لمخدتي الي انترست دمع وونين بتوالي الليل
_ اخ يابة مااحس برجلية
_ حقج سمورة من الركص
_ اي ههههههه وانتي شبيج بسرعة رجعتي
_ يمعودة استحي
_ والله اني ادري بمعتز ضاج گلي گعدي شوية واخذي هاي البلوة وياج خلتگعد العيون كلهة عليهة
_ منية البلوة ؟؟
_ انتي ،،  وحتى گايل لمرتضى وحسن شعجب محجيتو على ايلاف شلون هيج لابسة بدون ردن وهي منا صايرة تخبل يكللهم الكل يباع عليهة !
خلص العرس ورجعنة لبغداد يوم ثاني ماطولنة لان عمي عندة شغل چان مدير عام بوزارة حكومية وگوة گدر ياخذ اجازة كم يوم للعرس
خلصت العطلة ورجعت اداوم وحاولت بقدر المستطاع انسى معتز بس كل ميجيبون سيرتة گلبي ينط من مكانة مو بيدي
وهالايام بالكلية انتبهت اكو واحد دائماً يلحگني وين مااروح اشوفة ورة فترة چنت گاعدة بالسنتر انتظر مروة وبيدي ملازمي دااراجع للامتحان اجة نفس الشخص وگف گبالي
_ صباح الخير ايلاف ممكن احجي وياج دقيقتين
_ صباح النور ،، والله اعذرني مستعجلة عندي امتحان ودااراجع
_ بس امتحانكم مو اول محاظرة ثاني محاظرة
_ وانت شمدريك ؟ وانت شمعرفك بأسمي
_ اني اعرف عنج اكثر مما تتصورين واريد اكلج صار فترة طويلة مراقبج وبهاي الفترة عرفت كل شي عنج
_ والمطلوب شنو !!
_ اني حاب ارتبط بيج ومااكلج علاقة وهاي السوالف اني يابنت الناس جايچ من الباب
_ بس اني مااعرفك
_ اني اسمي اثير. خريج هندسة حاسبات عندي شركة سياحية وعندي بيت خاص بية وحدي وكل شي تريدي اني حاظر ,, واذا تحبين تعرفين عني اي شي لاخ هذا رقمي وشوكت متفكرين زين رديلي الجواب
_ ارجوك خلي رقمك الك اني لا اريد رقمك ولا اريد ارتبط ، ومن رخصتك حتبدي محاظرتي
_ دقيقة ايلاف لتستعجلين فكري بالموضوع ترى اني مو طفل وداالعب عليج اني عمري ٢٦ سنة وسبق وكتلج جايچ من الباب
_ من رخصتك ،، عفتة ومشيت وشفت مروة واكفة وصافنة كتلهة
_ شنو اخرج هيج مو صار ساعة انتظرج
_ لج منو هالصاك الي چنت واكفة يمة
_ واحد بطران على ربة اريد اجيج من الباب احد گايلة اني اريد اتزوج
_ يعني ايلاف كل مرة اريد احجي واسكت نفسي گوة يعني انتي لشوكت تبقين وفية بحبج لابن عمج ترى الرجال تزوج ومتونس وية مرتة وعايش حياتة وانتي هنا صايرة چنج شبح مكظيتهة دراسة ومحاظرات ونوم حتى بالصدف اشوفج تضحكين ترى ميصير هيج ياحبي اني احجي لمصلحتج عوفج منة انسي وشوفي حياتي ،، جربي تعيشين الحب وية انسان يبادلج هذا الشي مو باقية تحبي وحدج وهو ميدري عنج
_ مروة كافي سدي الموضوع ارجوچ
_ ايلاف اني مو قصدي اجرحج بس دااشوفج مثل الوردة وكدامي دتذبلين لشوكت ابقى ساكتة
عفتهة ومشيت وجسمي كلة يرجف ،، ادري بلحچتة صحيح و لمصلحتي بس نفس الوقت مدااكدر موبيدي هذا الشي مرات اروح افتح الفيس بوك واروح على صفحتة اشوف صورة واشوفة شناشر ارتاح نفسيا
مرة اجاني اشعار من الفيس انو معتز قبل اضافتي
- ياعزة بس اني شوكت دزيتلة اضافة اويلي ياربي شگد عيب ردت الغيهة بعدين كلت يلله شسوي اثاري واني دااطلع ضاغطة عالاضافة ورايحتلة
مرت الايام ودريت بزوجتة حامل والفرحة بالبيت والهلاهل وامة خابرتة تباركلة وحجت وياهة واني بداخلي فرحتلة لان حيصير اب
دااكلب بالفيس واجتني رسالة من معتز
_ هلو الوف شلونج
_ الحمد لله
_ شكو ماكو 
_ماكو شي سلامتك ،،، طبعا مدااعرف شجاوب احس ايدي تيهت الحروف ومدااندل شلون اكتب
_ عالخير بحمل سوزان
_ تسلمين
سكتت وهو سكت ومشت الايام واني اداوم وهذا بعدة يلحكني ومرة من المرات رجع وگفني
_يعني لشوكت ابقى انتظر ياايلاف اليوم امي جايتكم وانتي بعد بكيفج بعد ماانتظر
_ والله مااعرف شگلك يااخي اني مااريد ارتبط اريد اكمل دراستي
_ يمعودة هسة اني گلت حبطلج من الدراسة ياعيني وداعت هذني العيون الوگعني شتريدين قابل بكل شروطج بس وافقي
_ الله يخليك جوز مني والله ماافيدك ،، شوف حياتك
عفتة ومشيت وجتني مروة تركض كتلهة
_ اذا فتحتي حلگج متلومين الة نفسج 
_ لا عمي لا احجي ولا شي بطلت ،، واشرت على حلگهة بمعنى سديتة
ويوم من الايام رجعت للبيت لگيت الجو موطبيعي متكهرب
فتت لغرفة سمر
_ سمر شكو شو الكل ضايج اكو شي
_ ايلاف شگلج مرة معتز كلش مريضة والدكتور طلع گايللهة ميصير تحبلين وهي مكايلة لمعتز ومعاندة الدكتور وحبلانة وهسة خايفين عليهة والطفل چبير مو مال تجهظة وهسة معتز ميت من القهر ميعرف شيتصرف
_ يعني شبيهة مريضة ؟
_ عدهة ضيق بصمام بالقلب هو المسؤول عن توزيع الدم للجسم من هي وصغيرة وهي مگايلة لاخوية عن هذا الشي وممنوعة من الحمل والولادة لان تأثر على حياتهة
_ صدك تحجين وشلون تضم موضوع مثل هذا ؟؟ وهسة شنو الحل؟
_ مااعرف بقت يم ربج بلكت يلطف بحالهة وبحال اخوية هالمسكين
رحت للهول لگيت مرة عمي حاطة سجادتهة وتصلي وتبچي وتصيح الهي برد گلب ابني وعمي كاعد گبالهة وصافن
رحت لغرفتي وصافنة بمعتز وحاله اكيد حالة ميسر عدو ولاحبيب سودة علية حبيبي ربي يفرح گلبك الهي ربي سيدي مولاي حتى لو مو نصيبي خلي فرحان وابعد كل هم عنة ربي فرح گلبة بمرتة ونجيهة
راحت ايام اجت ايام فد يوم گاعدين بالليل نتفرج مسلسل اجانة اتصال من معتز
_ يمة اريدج تدعيلهة دخلوهة عمليات
_ يمة ليش محجيت من وكت يمة جان اجيناك ليش شايل الهم وحدك
_ صارت غفل بعدهة مداخلة بشهرهة بس تخربطت وكالو لازم ننقذ واحد منهم لو الام لو الجنين وكتبوني تعهد على مسؤوليتي وهسة اجة ابوهة واختهة واخوانهة كلهم هنا ودنتتظر رحمة الله ادعولهة يمة
بقينة على نار كل ساعة نخابر ونسئل لحد مگال طلعت من العملية تحت العناية المشددة وجابت بنية ومحلفتة قبل لتدخل cالعملية يسميهة ملاك ورة ساعة خابرنة منتهي گوة يحجي
_ ها معتز شنو الاخبار؟