رواية 30 يوم جواز الفصل الثاني 2 - بقلم احمد سعد

رواية 30 يوم جواز الفصل الثاني

مرام : هو انت ماتعلمتش تلبس حاجه شيك ف بيتكو قبل كده

احمد : بقولك ايه .. اطلعى من نافوخى وسيبينى اتفرج ع الماتش

مرام : طيب انا عاوزه اركب شاشه ليا لوحدى ف الاوضه عشان ابقي اتفرج . بدل مانت واخد الشاشه كلها لحسابك

احمد : اعملك ايه يعنى منا بنام هنا وانتى بتنامى جوه

مرام : متشكره يا ذووووق .. المهم عاوزه شاشه جوه تسلينى وانا سهرانه

احمد : ان شاء الله بكره هجيب الواد بتاع الدش وانا جاى ...

مرام : هو انت ف نهاية الشهر . هتطلقنى ازاى ؟ طلاق شفوى يعنى ولا هتبعتلى ورقتى على طول

احمد : اللى انتى عاوزاه ... يا اخى شوووط يا اخى

مرام : بكلمك انا على فكره ... المفروض تدينى اهتمام اكتر من كده . ايه قلة الذوق دى

احمد : ( بيبصلها وبيبرق وبيرفع حاجبه )

مرام : سورى يعنى بس ده ماينفعش . انا بكلمك ف موضوع مصيرى ومصيرك . اهتم شويه

احمد : مش عاوز اهتم .. انا اتدبست التدبيسه دى زى مانتى اتدبستى بالظبط ... وخلاص كلها 25 يوم .. اهبطى بقا خليهم يعدوا على خير

مرام : اهبط ؟ ايه اهبط دى ؟ يابنى والله ما اعرف انت مين هترضي بيك بعديا اصلا ...

احمد : مين هترضي بيا ؟ اه .. يابنتى انا اعرف بدل البنت الف وكلهم يتمنولى الرضا بس ارضا .. بس انا مافيش ف دماغى غير واحده بس ... تحسينا مكتوبين لبعض كده

مرام : واحده مين دى ان شاء الله

احمد : مش شغلك . خليكى ف حالك

مرام : ( بتبصله باستغراب ) بتحبها يعنى وبتحبك وكده ولا ايه ؟

احمد : جدااااا فوق ما تتخيلى ... يدوبك هنتطلق انا وانتى .. وهروح اكتب عليها على طول

مرام : يااااه . وده اسمه ايه .. والعده ؟

احمد : عدة ايه وانا مالى ومالك ؟

مرام : لا سورى استنى معلش . هى العده دى للستات بس ؟

احمد : اومال انتى فاكره ايه . انا ممكن اتجوز ف نفس يوم طلاقنا . دنا ممكن اتجوز دلوقتى اساسا وانتى على زمتى . بس مش عاوز اجرحها

مرام : يا حنين ... بتخاف على مشاعرها اوى كده ؟

احمد : طبعا ..

مرام : مين دى يعنى ؟ نعرفها ؟ اسمها ايه ؟

احمد : اسمها عشق .. الدكتوره عشق .... وبعدين الله ! ما قولتلك ماتشغليش بالك .. هما كم يوم يا بنت الناس هنقضيهم وخلاص ... اطلعى بره نافوخى . قومى اعمليلى شاى .. ولا اقولك قومى اعمليلى كيكه كده احلى بيها مع الشاى

مرام : مش عامله كيكات انا .. كيكة ايه ياابو كيكة انت

احمد : لا قومى ... قومى وماتوجعيش قلبى كل مره اطلب منك فيها حاجه ..

مرام : والله ما عامله حاجه ... ( بتزقه من راسه وهو قاعد ) ابقي خلى ست الدكتوره بتاعتك تعملهالك .... ( بتدخل الاوضه وبترزع الباب وبتفضل تنفخ )

احمد : ( بياخد الكاجو من قدام منه وبياكله بكل برود وبيكمل الماتش )

.....