رواية عآمـلوني گ فصـليه بقلمي ايمان محمد وٌ رين الزين الفصل الخامس عشر 15 - بقلم آلگآتبه تآج آلعرآق

آتنفسـگ مـثل آلهوى حبگ مـثل هہذآ آلعمـر

يگبر آحس يووووومـي

حسـ بيهہ يل مـآبعتگ شـوف آلروح عآشـگتگ

تحبگ مـن صـدگ روحي

عشـگنهہ وآلعشـگ لآيگ علينهہ
____________________________________
صكر. اي كلت بس رجعت بكلامي

همس. بس انت وعدتني صكر

صكر. حتى واذا مرجعتج للدراسة هسه انتي ندمانة علي زواجج مني يعني انتي وافقتي تزوجيني علمود دراستج مو

همس. بالاول وافقت علمود دراستي بس هسه كلشي تغير صرت احبك صكر

صكر. واللي يحب يضحي علمود الي يحبه انا اغار عليج من الهوا والله الطاير وماريدج تضلين رايحة راده للمدرسة وكل الناس تشوفج

همس بخفوت. ب بس هذا مو سبب حتى اعوف دراستي علموده

صكر بعصبية. بس بالنسبة إليه سبب جبير ويلا طفي الضوة اريد انام شوي

خفت اطول معه بالكلام يضايق اكثر وقررت بس يهدي ارجع اكلمه  طفيت الضو وطلعت برا الغرفة وانا مخنوكة رحت لغرفة عمتي لكيتها كاعدة هي واخلاص

ام صكر. هلا وغلا تعالي بنيتي

رحتلها كعدت يمها وانا الدمعة بطرف بعيني

ام صكر. كوليلي السفرة جانت زينة

همس بصوت ناصي. اي

ام صكررفعت وجهي بايدها. منو مزعلج يايمة
مااتحملت كمت ابجي واشهك واخلاص تباوعلي ورافعة تك حاجب

ام صكر. اهدي حبيبة بس كوليلي منو اللي غاثج

همس. ماكو شي بس جنت مشتاقتلج

ام صكر بغمزة لاخلاص. روحي اخلاص سويلي استكان جاي

اخلاص. حاضر خالة وطلعت برا وقفلت الباب وراها

ام صكر. وهسه صرنا لحالنا احجيلي يلا شبيج

همس. صكر رافض ارجع للمدرسة

ام صكر. وهذاا اللي مزعلج يايمة رجلج مايحب احد يشوف عرضه وانتي تعرفينه لسه ماتعودتي عليه

همس. بس هو واعدني بس نزوج راح يخليني اكمل دراستي الله يخليج يمة احجيه انتي جنتي شاهدة علي كلامه لما كالي نتزوج وتكملين

ام صكر. لااا انا مااتدخل بهاي ألامور انتي وهو رجال ومرته ومايصير أتدخل بينكم

همس بدموع. بس هو قافل وماراح يوافق

ام صكر. شلج بالدراسة مو انتي تزوجتي وخلص ماله داعي ترجعين للمدرسة

همس. بس هذا حلمي وحلم اهلي وعمو سلمان شلون ترديني أتنازل بهاي السهولة عنه

ام صكر. اوقات الظروف تجبرنا نتنازل حتي تمشي الحياة بطلي بجي وعوفيها للايام يمكن الله يهدي ويرجعج لحاله

همس. بس مابقى وقت الدراسة راح تبدي

ام صكر. مو ضروري العام يمكن السنه الجايه أو اللي بعده اتركيها لظروف

ضليت ابجي حسيت ماحد مهتم لمشاعري ولا رغبتي وكأنه وجودي حتي ماله داعي مجرد تحصيل حاصل
صكر ادري يحبني بس مايحترم رغبتي ومايسمحلي حتي احقق حلمي

طلعت من غرفة عمتي وانا ابجي علي حظي كابلتني اخلاص والله شفت بعيونها نظره فرح لدموعي بس مابينت مرت من يمي ودخلت لغرفة عمتي مسحت دموعي ورحت للمغسلة غسلت وجهي وحسيت عيوني تحركني من كثر مابجيت

رحت كعدت بالاستقبال مااكدر اصعد للغرفة وانا ضايجه من صكر كعدت شوي افكر شلون اقنع صكر يوافق عالدراسة قررت اروح لعمو عباس وأكوله علي شرط صكر واللي يصير خله يصير بلكي يحاول يساعدني ويكلم صكر

كعدت شوي ورهف اجت هي وهناء وعمتي من برا
رهف. هموسة ليش كاعدة هنا لحالج

همس. صكر فوك نايم وين جنتو

رهف. جنا بالبيت عندي هناء ساعدتني ارتب البيت شوي تعرفيني تعبانة ومااكدر

عمتي هناء. شمالها عيونج عمة انتي باجية شي

همس رتبكت. هاا لا عمة ماباجيه

اعرفها ماصدكت بس غلست كعدنا شوي هما يسولفون وانا بالي مو يمهم  وطلعت عمتي واخلاص من الغرفة وكعدو معنا شوي وصكر نزل من فوك لابس دشداشة نيلي ولاف والغترة والسبحة بيده وجواله كعد شوي وراد يكوم
همس. صكر انا راح اروح لعمي عباس شوي

صكر باوعلي. اكو شي

همس. هاا ل لااا ماكو بس مشتاكتله

صكر. راح اتصل عليه واخليه يجي لان هو مايعرف احنا اجينا

همس. بس انا اريد اروح لعنده

صكر وهو مضيق عيونه. وليش تردين تروحين كلت راح اتصل وهو يجي اللي ببالج شيلي لأنه ماراح يصير سمعتي لو لا

طبعا الكاعدين ماحد فاهم شي ولا يعرفون علي شنو كلامنا
همس. بس هذا ظلم صكر

صكر على صوته. شنووو شنو ست همس ماسمعت عيدي بالله دشو عيدي

همس. الله يخليك صكر وافق ارجع لدراستي

صكر. انااااااا شنو كلت ماكلت لاا وخلاص الموضوع انتهي ماكو نقاش

همس بدون وعي.  بس انت كلت راح اخليج تكميلن بس نتزوج

ماوعيت علي اللي كلته الا لما رهف شهكت
ونسيت انو صكر مانعني اجيب طاري الشرط لأحد

رهف. وانا اكول ليش همس وافقت بهالسرعة اكيد لأنه مساومها علي شي بس احنا مافهمنا

عمتي هناء. انت شارط عليها تكمل دراسة بس توافق  تتزوجك ردددددد صكر

صكر ضاج وعصب كلش عيونه صارت حمر من عصبيته اجاني مسكني من شعري وضربني راجدي علي وجهي احس خدي خدر من قوه الضربه

صكر. انا اعلمج كيف توكفين بوجهي ماااكو دراسة والله ولا راح تطلعين من البيت ولو جبتي طاري الدراسة مرة ثانية راح اكسر راسك ولج
نتر ايدي من ايده ودفعني وكعت بحضن عمتي هناء لانها كانت تحاول تدافعلي

ضليت ابجي وهي تواسيني رهف تضايقت حيل وطلعت من البيت رجعت لبيتها وهناء اتصلت على رجلها يجي ياخذها

ام صكر. مو انا كلتلج اصبري شوي وعوفي موضوع الدراسة هالايام بس ماسمعتي كلمتي وهاي النتيجة

عمتي هناء. خللص سعدية كافي عوفيها بالي هي فيه
ام صكر. هاااي بنتي هناء وانا اريد مصلحتها بس هي ماسمعتني

عمتي هناء. وانتي جنتي تدرين عن هالشرط

ام صكر. اي ادري

عمتي هناء. هااا چا ليش ماوفيتو بوعدكم معاها انتي جنتي تدرين يعني كلمة منج ويا صگر تحل الأمور

ام صكر. وهو من يمتى صكر يسمع كلمة من احد ماتدرين عنيد هو راسه يابس

عمتي هناء. الك الله ياليتيم الك الله

كل هاد وانا بحضنها ابجي واتذكر شلون ضربني كدامهم
عمتي هناء. انتي ثولة ولج شلون تخليهم يشرطون عليج هالشرط هااااه ليش مااجيتي وكلتي

همس ببكاء. صكر كايلي مااكول لاي احد لأنه لو كلت راح يمنعني من الدراسة

عمتي هناء. خلاص  كافي عمة يلا اطلعي لغرفتج ارتاحي وانا راح ارجع للبيت وباجر اكون عندج

ماجنت حابة اطلع لهاي الغرفة بس ماعندي مكان غيرها اروحله فتحت الباب ودخلت مددت جسمي  عالجرباية ضليت امسح دموعي لحدما غفيت
كمت مااعرف المدة اللي نمتها  علي ايد تمسح على شعري فتحت عيوني لكيته صكر انتفضت من مكاني وبعدت عنه
صكر. هاي شنو همسي لهالدرجة كارهتني 
مارديت عليه

صكر. ادري انتي زعلانة مني بس انتي استفزتيني مو انا كلت لاتجيبين طاري الشرط لأحد وانتي كلتي كدامهم وماهمج

همس بصوت ناصي بسبب النوم وكثرة البجي.لان انت وعدتني

اقترب مني رفعني وحطني بحضنه وانا احاول ابعده عني بس ماتحرك جنه حيط

صكر. والله سبب رفضي مو كره الج ياعمري كمل بصوت ناصي  بس انا اغااااار ماريد احد يلمح طولج
مارديت عليه رجع كمل

صكر. شوفي راح ادوس علي حالي واحاول اتحكم بغيرتي و اخليج تردين للدراسة بس مو هاي السنة العام القادم لاني حلفت ماشي

همس بفرحة. كول والله
ضحك وكال ما مصدكة لا احلف يعني حسيت انه يضحك علي عقلي كأني طفلة يحاول يرضيها بس ماراح يسوي شي من اللي كاله سكتت وكلي أمل ارجع للدراسة صحيح راح تضيع سنة علي بس مو مهم  المهم ارجع وخلص

ضل شوي يصالحني وماتركني الا وانا راضية ومقتنعة أخذني ونزلنا اتعشينا وبعدها طلعنا للغرفة وكال أنه راح يصير يوم عندي ويوم عند اخلاص من باجر يعني راح يضل معاي اليوم وباجر هو عند اخلاص
شكد ضجت من هلشي بس سكتت ماتكلمت لان مو من حقي اضوج لان اخلاص مرته الأولي مايحقلي ازعل حتي وفعلا صار يوم يبات عندي ويوم لاخلاص
ومر شهرين علي زواجي ورهف هسه بالشهر الرابع من حملها الحمد لله النساوة والتعب مو مثل قبل صحيح اكو تعب بس مو مثل الاول وسوت سونار والطبيبة كايلة الها بنية وهي وايهم فرحانين حيل

اخلاص اوقات تشد وياي بس عمتي تكلمها وتبعد عني شوي وترجع مرة ثانية صكر طول هالفترة وهو مدللني ومازعلني مرة ثانية من بعد ماضربني
عمتي تحبني ومعاملتها معي كأنه امي

اول شهر بعد ماتزوجت سألتني عن موعد الشهرية  كطعتني أو لا ولما اكول اجت احسها تضايق بس تسكت وما تتكلم وهسه ثاني شهر وموعدها بس
صارلي يومين الشهرية ماخرة عن موعدها بس ماتكلمت كلت يمكن تجي عمتي كالتلي أن الشهرية لما تكطع يمكن صار حمل مر أسبوع والشهرية مااجت رحت لعمتي كلت الها انو متأخرة علي

فرحت وضلت تدعي واخلاص واكفة متوترة وتفرك بايدها
ام صكر.كومي يلا يمة بدلي ملابسج وانا راح اتصل علي صكر يودينا نسوي تحليل

همس. اي

صعدت غرفتي لبست عباتي وحجابي وأخذت البوشية بايدي البسها لما يجي صكر صكر مايخليني اطلع من دون البوشية بس اخلاص ماتلبسها ومرة سالته ليه انا البس البوشية واخلاص لا يكون رده انو يغار علي انا
اسكت ومااتكلم شنو اللي اكوله راح يغير رأيه يعني
نزلت عغرفة عمتي لكيتها مبدلة ومنتظرة صكر كعدت يمها

شوي واجا صكر دخل بسرعة شفت بعيونه فرحة بس ماتكلم
صكر. ها خلصتو

ام صكر. اي خلصنا يلا يمة

طلعنا وركبنا بالسيارة عمتي اصرت اركب انا كدام تكول اخاف يكون اكو حمل واللخبطات  اللي بالطريق
خطر عالطفل ضحكت وركبت كدام طول الطريق احس صكر متوتر علي فرحان وعمتي تدعي وتنذر انو اكون حامل وصلنا ونزلنا للعياده ودخلنا
شوي واجت دكتوره تسحب من ايدي دم حتي تسوي التحليل

جنت خايفة حيل بس قويت كلبي ومديت الها ايدي وغمضت عيوني بكل قوتي حسيت بنغزه الإبرة ضغطت على سناني من الالم سحبت الدم وكالت ساعة وتظهر النتيجة صكر اخذنا كعدنه بمطعم قريب عالعياده

شربنا عصير وكعدنا شوي صكر اشوفه باوع بساعته
صكر. يلا مرت ساعة نروح للتحليل نشوفه
رحنا وعمتي ماسكة ايدي وتدعي
صكر دخل كال علي اسمي وسأل علي تحليلي
الطبيبة. تفضل التحليل الف مبروك حامل بس لازم تتابع من طبيبة نسائية 

صكر من كثر فرحته حسيت عيونه غوركت بالدموع
وعمتي يمي تحمد الله وحضنتني وضلت تبوس بيه وانا اضحك من فرحتي ومن تصرفات عمتي طلعنا برا وصكر اتصل علي رهف سألها عن اسم الدكتورة اللي تتابع عنها

صكر. يلا دكتورة رهف موجودة بعيادتها هسه

همس. مو ضروري اليوم خلوها يوم ثاني

عمتي صاحت. لاااا نروح حتي نطمن علي صحة الطفل
باوعتلها مستغربة كل همها الطفل شافتني هي وانا مستغربة
ام صكر هااا وحتى هم  نطمن علي صحة هموسة
غلست كلت اكيد من فرحتها لخبطت بالكلام ركبنا السيارة وطلعنا علي عيادة الطبيبة انتظرنا دورنا ودخلنا انا وعمتي وصكر انتظرنا بالسيارة
الطبيبة سالتني عن اسمي وعمري
لما كلت الها عمري 16 سنة ونص
 
الطبيبة ضحكت  اوووووي صغيرة حيل
ضلت تسالني عن موعد آخر شهرية وهاي الأسئلة
طلعتني للسونار واشرت علي نقطة صغيرة علي الشاشة وكالت انو هذا الطفل ضحكت جنت راح ابجي من فرحتي

طول عمري احس حالي وحيدة مالي احد صحيح عمو سلمان الله يرحمه ماقصر معاي وكان اليه اب وعم وكل شي ورهف كانت  اخت الي 
وصكر وحبه اليه بس هالطفل يختلف أحسه راح يصيرلي سند وراح يكون عندي عائلة خاصة فيني
طمنتنه الدكتوره عن صحة الطفل وكتبتلي مثبتات ووصتني لازم ارتاح ومااتعب حالي حتي يستقر الطفل

طلعنا من عندها لكينا صكر منتظرنا وكأنه منتظر علي نار

صكر. هااا بشرو

ام صكر. مبروك يايمة الله يتمم حملها علي خير وتشيل طفلك بحضنك تطمن الدكتوره طمنتنه عن الطفل وكالت وضعه زين بس يرادلها راحة حتي يستقر الحمل

صكر. الف الحمد لله ياربي مبروك هموسة

همس. الله يبارك فيك

راح صكر وأخذ الرجيتة يجيب العلاج ورجعنا للبيت
دخلنا لكيت رهف منتظرة وواكفة اول ما دخلت حضنتني  وضلت تباركلي وتبكي من فرحتها ههههه
رهف. مبروك ياعمري الله يتمم علي خير وتكومين بالسلامة

همس. الله يبارك بيج حبي

رهف. انتبهي علي حالج زين هالفترة وديري بالج علي صحتج اهم شي

همس رايه اكيد

ضلت رهف شوي ورجعت بيتها صكر نزلنا وراح عالديوان لان الناس منتظرينه يحل مشكلة صايرة
شوي واجتي اخلاص بس شكلها متغير كأنها كانت تبجي مااتكلمت معي ولا كاني موجودة كل كلامها مع عمتي وتسأل عن حملي وعن الطفل استغربت منها بس كلت يمكن فرحانة الي ولصكر شوي واجه صكر اول مادخل واخلاص كامت تبجي هو راح عليها حضنها كدامي ويمسح علي ضهرها

زعلت عليها وكلبي انعصر مو سهلة علي اي واحدة ضرتها تحمل وهي لا ووعدت حالي بس اولد راح اخليها تربي الطفل وياي بس اللي استغربته انو لما يكون صكر ماموجود هي طبيعية مابيها شي
واول مايجي تكوم تبجي وعمتي تاخذهم ويدخلون غرفتها ويطلعو بعد شوي كانو ما صاير شي..... غلست عنهم ومااهتميت

اجتي هناء اخت صكر وعمتي هناء باركولي وكانو فرح
مر اول شهر بحملي وانا زينة بس ثاني شهر بدت النساوة والتعب كل مااكل شي استفرغ ودايما نايمة كانو نعس الدنيا كلو بيه بيوم كنه كاعدين كلنا بعد العشه بشوي نباوع عالتلفزيون وصكر كاعد معنه يشرب نركيله وعينه عالتليفون

فجأة حسيت نفسي داكل مانجو وصرت احس طعمها بحلكي

همس. صكر اريد اكل مانجا

صكر بستغراب. رفع رأسه من التليفون شكلتي

همس. اريد مانجا الله يخليك 

صكر بضحكة. بدت طلبات الحمل مووو

ام صكر. كوم يمة هاتلها مانجا هاي نساوتها عليها

صكر. اي كايم ورجع كمل بضحك  بس مو اجيبها وتكولين مااريد هااا

همس. لا والله مااكول بس لاتتاخر الله يخليك
راح وضل نص ساعة واجه معاه جنطة كبيرة مليانه مانجا مدها الي

صكر. هاج المانجا

اخذتها منه وفتحت الجنطة وطلعت واحدة واكلتها من دون غسيل من كثر مارايدتها
صكر. ولج لاا لا اغسليها مايصير هالشي مو نظيفة

اخلاص. هاتها صكر انا اغسلها الها هي الحمل متعبها
اخذتها وراحت المطبخ غسلتها وجابتلي ماعون مليان
ضليت اكل وهما يباوعون علي وصكر يضحك علي فرحتي بالمانجا وفرحان انو اخيرا راح يصير اب وطفله اللي ببطني  يشتهي شي

صكر. ماتزودين منها حتي لاتتعبين

همس وهي تاكل وايدها وحلكها كلهم مانجو. لا ماراح اتعب طعمها حلووووو كلش

صكر ضل يضحك ويهز برأسه
صكر. بالعافية بوية اكلي وكل اللي تشتهينه راح اجيبه الج ولولدي حبيبي

مارديت عليه اصلا موفارغة ارد
رفعت رأسي شفت عمتي تتابع التلفزيون واخلاص تباوعلي بحقد اول ماشافتني ضحكت

اخلاص. بالعافية حبيبتي
هزيت راسي وكمت غسلت ايدي ووجهي وحطيت باقي المانجا بالثلاجة واجيت كعدت معاهم شوي وكله راح لغرفته وطلعت انا وصكر لغرفتنا ونمنا  لأنه كان عند اخلاص البارحة كعدت الصبح لكيت صكر راح لدوامه حسيت عندي غثيان مو طبيعي
رحت اركض عالحمام وضليت اتقيء لما حسيت روحي راح تطلع

تعبت ونزلت لعمتي اسالها علي اي مشروب اسويه  لانو بطني توجعني ومبطلت اسفراغ اجيت افتح الباب وسمعت اخلاص وعمتي

ام صكر. خلص كافي ماتبجين مو كلنا نصبر حتي يصير اللي نريده

اخلاص. بس انا تعبت خالتي تعبت

ام صكر. تحملي هي كم شهر بس

اخلاص. وصكر شنو اللي راح يقنعه

ام صكر. يقتنع لا تخافين بس انتي نفذي اللي اكوله واستمري بخطتنه

استغربت يا خطة يحجون عنها فتحت الباب ودخلت شفت وجوهن اصفرت همس. خطة شنو عمة عن شنو جاي تحجون.......
____________________________________

سلام بنات
رجعتلكم مادري شكم يوم غبت عن الواتباد بس والله اول ماصحتلي الفرصه نشرت هذا البارت ومثل ماكلتلكم راح نعوضكم والبارتات الجايه كلها حماس وبيها قهر ومشاكل هم بس كله يهون

الي تعرف شكم يوم توقف التنزيل تكتبلي بالتعليقات

لتنسون
المتابعه
التصويت
الكومنت

مع تحياتي الكم رين الزين