رواية عآمـلوني گ فصـليه بقلمي ايمان محمد وٌ رين الزين الفصل السادس عشر 16 - بقلم آلگآتبه تآج آلعرآق

____________________________________
همس خطة شنو عمه عن شنو جاي تحجون

حسيتهم انصدمو لما شافوني بس مابينو

ام صكر. هاا مو مو اخلاص تريد تروح لبغداد حتى تسوي تحاليل بلكت تسوي طفل انابيب وصكر ماموافق فنحاول نقنعه احنا ونسوي أي خطة علمود يوافق
بصراحه اقتنعت بكلامهم وسكتت واخلاص هي وعمتي يباوعن لبعضهن ويرجعن يضحكلي كعدت مع عمتي وسألتها علي اي مشروب اسويه حتي يخف وجع بطني
اخلاص .... اكعدي انا اسويلج حبيبة
وفعلا راحت سوتلي كوب زهورات وشربتها شوي شوي الالم بدأ يخف لحد ما راح ضليت معاهم شوي وحاولت اكوم اساعدهم بس ماوافقو وخاصة اخلاص رفضت اكوم وهي سوت كل شي فرحت حيل بمعاملتهم وياي اجيت اطلع لغرفتي عمتي ماوافقت وكالتلي اروح لغرفتها ارتاح فيها لان الطلعه ع الدرج كل شوي غلط عالطفل دخلت غرفة عمتي نمت شوي ماكعدت الا وصكر يكعدني حتي اتغدي حييل نمت
كمت غسلت وجهي وكعدت حاولت اكل بس مالي نفس والأكل احس ريحته ماطايقتها

جابتلي عمتي قطعة جبن مالحة اكلتها كمت سويت جاي واخلاص لمت السفرة وتركت ام احمد تغسل الاماعين

مرت فترة على حملي تعبت بيها هواي من النساوة ..اخلاص طول الفترة اللي مرت مابطلت دموع كل ماتشوف صكر تبجي اوقات عمتي تأخذ صكر لغرفتها مااعرف شنو تكله بس يطلع من عندها ضايج .... بس صارلها كم يوم ماتبجي لما يجي صكر واشوف اكو فرحة بعيونها

انا هيه بالشهر الخامس ورهوفة بالشهر التاسع ضل الها كم يوم وتولد اليوم رايحين انا وصكر وعمتي حتي اسوي سونار اطمن عالطفل واعرف بنت او ولد اخلاص رادت تروح معانه وهم وافقو حتي لاتزعل
رحنا كلنا ودخلت انا وعمتي واخلاص للطبيبة ضلت تسالني وتطمن علي وضعي
وبعدها كالتلي اصعد علي سرير الكشف حتي اسوي سونر طلعت وضلت تسويلي سونر وعمتي واخلاص عينهم عالشاشة
الطبيبة. ماشاء الله صحته تمام وحركته زينه
ام صكر. هاااا دكتورة ولد ولا بنية
الطبيبة. ولد حجية
عمتي من فرحتها نست احنا بالعيادة وضلت تهلهل وتحضن بالطبيبة والدكتورة تضحك
اخلاص حسيتها فرحت كأنه الطفل ببطنها هي وكل شوي تحمد الله ماركزت معاها كلت يمكن من فرحتها انو صكر حيصير اب

طلعنا برا لكينا صكر منتظرنا يم سيارته ويدخن
عمتي بشرته أنو اللي ببطني ولد فرح بس مونفس الفرحة اللي كنت منتظرة اشوفها لما يعرف
مااعرف أحسه متغير صارله فترة دائما شارد ونظرته اليه غريبة
وكل مااساله يكولي مشاكل بشغلي أو خايف عليج
طلعنه بالسيارة ركبت ورا انا واخلاص واخلاص مابطلت كلام طول الطريق
اخلاص. اخ لو تشوف الطفل بالشاشة صكر ياخذ قلبك صغيرون ويحرك رجليه والله خطف كلبي
وصكر عينه عليه اني بالمراية وانا اباوع لاخلاص ومبتسمة لفرحتها الي وصلنا البيت ودخلنا جوا صعدت لغرفتي غيرت ملابسي وصكر اجا وراي

همس. فرحان صكر هيجيك عمران
صكر ... منو عمران
همس .... ابني مو انا قررت اسمي عمران علي اسم بابا وان شاء الله اسمي ابني الثاني سلمان علي اسم عمو

ضل شارد بوجهي شوي وبعيونه نظرة حسيتها انا نظرة حزن أو شفقة مااعرف هي هيج لو انا اللي حسيت هيج
همس. شنو اللي شاغل بالك صكر دائما شارد وهاي الفترة متغير

صكر. ماكو شي ماكلتلك مشاكل بشغلي

همس. ومشاكل شغلك شلها بنظرة عيونك الي

صكر. شمالها نظرتي مافتهمت

همس. احس نظرتك الي حزينة واشوف نظرة شفقة مادري ليش

صكر سرح بوجهي شوي وكال. متوهمة ماكو هيج شي يلا انا راح اروح للديوان رايدة شي

همس. سلامتك
راح صكر وتركني بحيرتي ضليت بغرفتي لما سمعت رهف تناديني من تحت طلعت لكيتها واكفة بأول بايه عالدرج من تحت ضحكت عليها صايرة مثل البطة ماتكدر تمشي

همس. هههههههههه شنو اللي موكفج هيج ولج

رهف. مااكدر اصعد انزلي أنتي يلا
نزلت كعدت معها وعمتي معانه وكل شوي اعاندها واضحك علي شكلها

همس. ماشاء الله صايرة مثل البطريق كوليلي تاكلين اكل ايهم لو شنو ها

رهف. تضحكين علي هاا شوفي كلها شهر او شهرين وتصيرين مثل الفيل مو مثل البطريق
ضلينا نضحك شوي وطلعت اخلاص من غرفة عمتي واجت كعدت معانا نظرتها النا احس بيها حسرة كأنها تكول ليه هما يحملو وانا لا ليه مااصير ام مثلهم
كل مااشوف نظرتها هاي اوعد نفسي راح اخليها تربي معاي ابني ولما يكبر راح اخليه يناديها ماما مثلي

ضلت رهف شوي ورجعت لبيتها
مر أسبوع ورهف صارلها كم يوم تعبانة
عمتي تكول لازم هيج يصيرمعاها لان اول طفل ولادته تصير صعبة شوي

جنت نايمة بالليل وصكر كان عند اخلاص وسمعت أصوات طلوع ونزول عالدرج باوعت بالساعة اللي بالتليفون لكيتها 2.5الفجر طلعت من غرفتي لكيت صكر نازل من عالدرج وعمتي لابسة عباتها ومنتظرة تحت
سألتهم شنو اللي صار
رد صكر أنه رهف تعبانة وتولد وعمتي رايحة معاهم
صكر راد يروح معهم بس مايكدر يتركنا لحالنا انا واخلاص

ضلينه بقلق ومانمنا وكل شوي صكر يتصل علي ايهم يطمن علي رهف لعند الصبح الساعة 8 الصبح بشره أنه هي ولدت وصحتها زينة هي والطفلة
اخذنه نفس وحمدنا الله
حوالي الساعة 11 اجو من المستشفي ورهف اجت عدنا حتي ندير بالنا عليها لانو بيتها لحالها هي وايهم وعمتها مرة جبيرة ماتكدر تخدمها رحت عليها حضنتها واخدت الطفلة من عمتي صغيرونة وناعمة ومثل الكمر ماشاء الله عليها
ضليت ابوسها

واجا صكر شالها وهو فرحان باسها ورجعها الي
ضلت معي شوي واجت اخلاص شالتها وضلت معها فترة طويلة وهي تضحكها وتناغيها رهف دخلوها بغرفة عمتي نامت هي لأنها ماكانت تنام من تعبها صارلها كم يوم ايهم كل شوي عندنا يطمن علي رهف ويشيل الطفلة ويكلمها كانو هي كبيرة وراح تفهم كلامه عمتي تضل تضحك وتكله ماتسمعك لانها صغيرة
بس هو مصمم انو بنته تفهم عليه وتضحك لما يكلمها
عمتي تكله انو اي طفل نفاس يضحك اوقات وهو نايم
بس هو مااقتنع سألتهم اختارو اسم الطفلة

رهف. ايه اتفقنا انا وايهم نسميها همس

انصدمت لما عرفت فرحت حيل ومن فرحتي ضليت ابكي حضنتها وضليت اشكرها كنت فرحانة انو الطفلة علي اسمي بس الفرحة الأكبر بالنسبة إلي انو انا غالية علي حدا لدرجة يسمي طفله علي اسمي
دايما احس حالي مرفوضة مااعرف ليش برغم كلهم يحبوني وماقصرو معي بس احساس انو انا شي مرفوض وماله مكان كان مسيطر علي يمكن لانو اهلي تركوني من صغري أو يمكن بسبب رفض عمتي الي بالاول وكرها الي

صكر دائما كان يحاول يبعد عني هالاحساس ...لما كان يجيبلي هدية أو اي شي كنت افرح بيه حيل واضل ابجي ولما يسالني ليش ابجي ويستغرب انو من كثر فرحتي ابجي كنت اكله أن لما اتذكرني وجابلي هديه حسيت حالي مهمة والي كيان

يزعل مني انو انا لهسه احس حالي وحيدة أو مالي احد ومرفوضة ويحاول يفهمني أنو هذا بيتي مثل ماهو بيتهم كنت أفهمه انو انا اقتنعت بكلامه بس بداخلي احساس الرفض مسيطر علي عقلي
العصر اجوي هناء اخت صكر وعمتي هناء يطمنو علي رهف ويباركولها بالطفلة عمتي ضلو شوي وراحو
سناء اخت صكر مااجت ولا عمتي صابرين لأنهم بعيدين واتصلو اطمنو علي رهف وكالو راح يجو يوم سبوع الطفلة

ثاني يوم اجا عمو صالح ومرته واخوات ايهم واخوانه ونسوانهم يطمنو علي رهف وجايبين هواي هداية لرهف والطفلة باركولها وعمو صالح كان فرحان بالطفلة حيل وضل حاضنها ويبوسها وهما يضحكو عليه كانو اول حفيد عنده

احمد اخو ايهم. ايه يابه اللي يشوفك شلون تبوس بالطفلة يكول اول حفيد عندك وانت عندك جيش احفاد هههه.

عمو صالح. اللهم صل على محمد لاتكول هيج ولك تريد تحسد احفادي

ضحكنا علي طريقة كلام عمو صالح مع ابنه رجع كمل بس هاي بنت ايهم اصغر اولادي وفرحان أن الله طول بعمري لما شفت أولاده كلنا دعينه اله الله يطول بعمره لما يزوج أحفاده كلهم ضلو شوي وراحو وايهم راح معاهم وكال راح يجي يطمن علي رهف والطفلة العصر

راحت اخلاص وعمتي يجهزون الغدا ورفضو اساعدهم
كعدت يم رهف شوي وشلت همس الصغيرة بالله شكد حلوة وصغيرونة وشكلها لما تطلع لسانها كأنها ترضع شفتها يخطف القلب شوي ودخل صكر اجا كعد يمنا شال الطفلة وضل يلاعبها

رهف. يوم اللي تشيلين طفلج بحضنج هموسة

همس. تسلمين ياعمري

رهف. اكيد متحمسة للطفل ومنتظرة يوم يوم حتي تشيليه بين ايديج

همس. مسحت بطني انا منتظرة الساعات والله مو الايام وكل يوم اضل ادعي اللي يجيبو بالسلامة هذا روحي ولما اولد ماراح اتركه بالأرض راح اضل شايلته ليل ونهار الله يقرب الايام

رهف. الله يكومج بالسلامة ياروحي

همس. ان شاء الله

التفتت علي صكر لكيته سارح بوجهي ويباوعلي بنفس النظرة الغريبة مثل عادته بالفترة الأخيرة

رهف. اكيد انت حماسك للطفل اكثر من همس مو

صكر. اكيد

ناول الطفلة لرهف وكام طلع استغربت عليه شنو اللي صاير وياه طلعت وراه لكيته راح لغرفتنا وشكله مهموم كاعد علي طرف السرير ومنزل راسة وحاط ايده علي رأسه رحت لعنده ومسحت علي شعره رفع وجهه الي هالمرة ميزت النظرة اللي بعيونه كانت نظرة شفقة واضحة شنو سبب هالنظرة

همس. شكو شبيك صكر صارلك فترة علي نفس حالتك هاي ولاتكلي مشاكل بالدوام احس الموضوع اكبر من هيج
سكت شوي ورد

صكر. وشنو اللي تحسين بيه

همس. مااعرف بس احس نظرتك الي كلها شفقة وحزن كولي صكر صاير شي وانا ماادري بي

صكر. لا شنو اللي راح يصير

حط ايده علي بطني وكال
كوليلي شنو هالطفل بالنسبة الج انا ادري كل ام تحب طفلها بس انتي احس هالطفل بالنسبة لج اكبر من طفل وامه كعدت يمه وحطيت ايدي علي بطني مثل عادتي لما اتكلم عن طفلي احط ايدي علي بطني كانو طفلي يسمعني

همس. اكيد هالطفل بالنسبة إلي عائلة كاملة انت تدري انا عشت وحيدة ماعندي إخوة صحيح رهف كانت الي اخت واكثر بس كنت اتمني يكون عندي اخ او اخت احس طفلي راح يعوضني عن كل هالشي راح يصيرلي ابن واخ وصديق

صكر. تدرين شنو احساس اخلاص وهي مايصير عندها طفل

همس. حاسة بيها والله ووعدت حالي بس اولد راح اخليها تساعدني بتربية طفلي واخليه يناديها ماما مثلي

كام من مكانه ومسح علي وجهه حيل
مسح علي شعري وكال. ان شاء الله ان شاء الله
وطلع بسرعة وتركني بحيرتي شنو سبب سؤاله هذا وليه يسألني عن احساس اخلاص شوي واجتي اخلاص تصيحلي حتي اتغدي ياالله شنو اللي ديصير اخلاص جاية بنفسها تصيحلي حتي اتغدي

احس كل شي حولي غريب واحس ورا كل هالراحة والحنية ايام صعبة مااعرف ليش بس انا بعمري ماكنت صايرة مركز اهتمام لاي احد
وهسه كلهم يهتمون بيه حتي اخلاص اللي طول عمرها تكرهني الله يستر من الايام الجاية نزلت وراها لكيت صكر واخلاص وعمتي كاعدين عالسفرة رهف يصبولها كبلنا بشوي وتاكل بغرفتها لأنها لسة تعبانة شوي كعدت معهم اكلت واخلاص كل شوي تكلمني وتضحك معاي

صكر عينه علينه يتابع اللي يصير وساكت بس علي وجهه ابتسامة صغيرة من معاملة اخلاص وياي
خلصنا واخلاص لمت السفرة ورفضت اساعدها شوي وجابت جاي واجت صكر شرب جاي وراح للديوان لان اليوم ماداوم ضلينا كاعدين شوي وبعدها كل واحد راح لغرفته رحت لرهف غرفة عمتي لكيتها نايمة وهموسة الصغيرة نايمة عمتي راحت نامت يم رهف
طلعت لغرفتي ونمت كعدت بعد العصر مالكيت صكر كلت اكيد لسة بالديوان

لأنه اليوم المفروض يبات عندي اكيد ماراح لاخلاص
كمت اتوضيت وصليت طلعت من الغرفة لكيت صوت صكر وعمتي جاي من ناحية غرفة اخلاص رحت لعندهم اشوف شو اللي صاير

سمعت صكر. لاتخافي يمة انا كلت كلمة وماراح اتراجع عنها صحيح راح اظلمها بس أن شاء الله يعوضها بطفل ينسيها

عمتي. ايه يمة هذا هو عين العقل شنو ذنبها ها المسكينة تضل طول عمرها من دون اطفال وتشوف النسوان كلهم يحملو ويصير عندهم اطفال وهي لا .وانت تدري غلاوتها عندي وانو اعتبرها مثل بنتي واكيد ماكو ام تظلم بنتها

اخلاص ببكاء. ايه صكر والله حلم عمري اصير ام وانت تدري سويت كل شي وأخذت هواي علاجات وماكو فايدة وماراح يتحقق حلمي الا بهاي الطريقة شنو ذنبي مااصير ام ولا يصيرلي طفل الله يخليك حققلي حلمي والله ماراح امنعه عنها بيوم وانت تدري

فكرت أنهم يتكلمون عن اخلاص وعن عمليتها وأنها تسوي طفل انابيب بس منو اللي ماراح تمنعه
مافهمت هالشي بس مافكرت بالموضوع ونزلت تحت لرهف لكيتها كاعدة والطفلة علي رجلها ترضعها
كعدت يمهم وضلينا نتكلم شوي اجت عمتي واخلاص كعدو يمنا واخلاص بعيونها فرحة بس تحاول ماتبينها
حسيت بضربة ببطني فتحت عيوني هاي اول مرة احس بضربة كنت احس بشي مثل النبض ببطني أو ضربة خفيفة لان الدكتورة كايلتلي أنو الطفل راح تظهر حركته بهالفترة

بس هالمرة حسيت الضربة واضحة
همس. يمة حسيت بضربة ببطني

ام صكر. اي يمة الطفل هو اللي يسوي هيج

همس. يعني هالشي زين للطفل ولا خطر عليه لان الاول كانت الضربة خفيفة

رهف ضلت تضحك عليي
ام صكر. لا شنو خطر هالشي يدل أنه الطفل بخير وكل مايضرب بطنك هيك اتاكدي أن هو بخير بس لو مر يومين او اكثر وما ضرب بطنك تعالي كوليلي بسرعة حتي نروح ونطمن عليه

همس. اي

اجت اخلاص يمي وطلبت تحط أيدها علي بطني حتي تحس بضربة الطفل حطت ايدها شوي وكرر الضربة
فرحت وضلت تضحك
اخلاص شوفي خالتي كيف يضرب فديته حبيبي

ام صكر. الله يجيبه بالسلامة وينور بيت أبوه

انا ورهف كلنا ان شاء الله بس اخلاص حسيتها تدعي كانو هي الحامل مو انا
اخلاص. أن شاااء الله يارب الله يجيبه بالسلامة
ضلت رهف عدنا اسبوع واجا ايهم حتي يرجعها للبيت لأنه راح يسوي غدا وعزيمة للطفلة راحت وثاني يوم سوو العزيمة رحنا كلنا كان بيتهم مليان ناس
دخلنا وكعدت شوي واجت سناء وعمتي صابرين ومعهم اهل اخلاص

سلمت علي سناء وعمتي صابرين وحضنوني
بس اهل اخلاص كان سلامهم الي بارد ومن ورا خشمهم مااهتميت كانت اخلاص جوا بالمطبخ اول ما اجو اهلها طلعت وسلمت عليهم وأخذت امها وخالتها اللي كانت تريد بابا علي جنب وضلو يتكلمو بصوت ناصي وكل شوي يرفعو رأسهم يباوعولي واخلاص فرحتها راح تطلع من عيونها مااعرف ليش

اجت كعدت يمي سناء وضلت تسالني عن حملي وعن الطفل وفرحت لما عرفت أن اللي ببطني ولد هما مايهتمون ولد او بنت بس لان صكر شيخ ففرحتهم بالولد اكثر لان راح يشيل اسم أبوه ضلت تدعيلي الله يكومني بالسلامة صاحت عليها وحدة من النسوان تركتني وراحت رفعت

رأسي لكيت خالة اخلاص تباوعلي وبعيونها نظرة شماته وتضحك ضحكة صفرا مثل وجها يالله شكد اكره هالانسانة احسها كتلة من تلخباثة والحقد حتي نظرتها تخوف وام اخلاص تضحك وتحضن باخلاص كامت خالتها واجت لعندي من دون مقدمات حضنتني وكالت .. الف مبروك عالحمل أن شاء الله يجي الطفل بالسلامة ينور بيت أبوه وأمه
____________________________________
يتبع.....

لتنسون المتابعه لحسابي وحساب ايمان صديقتي
والتعليقات
والتصويت

حبايب تعبنه ديروح خالي بلاش يعني الروايه مشاهداتها عاليه وتصويتها قليل شاركوها حتى ترتفع

مع تحياتي الكم. رين الزين