رواية عآمـلوني گ فصـليه بقلمي ايمان محمد وٌ رين الزين الفصل العشرون 20 - بقلم آلگآتبه تآج آلعرآق

هآي آلآغنيهہ آحسـهآ تعبر عن حآل همـس مـن آخذو آبنهآ مـنهآ
____________________________________
شـفتو صـوتهہ شـلون فدوة شـلون تعبآن

شـفتو وجههہ آل جآن وردهہ شـلون ذبلآن

شـفتو طـولهہ آل جآن مـن آلسـمـآ للگآع

شـفتو عينهہ آلنآمـت وخلتني حيرآن

آذوني آذوني مـن حضـنهہ آخذوني مـآ بآجي

گل عمـري وبفرآگهہ بجوووني
____________________________________
رهف
بعد ماكالت الممرضة هيج وعافتنه القلق والخوف ماكل كلوبنه وانا ادعي وصكر ضل رايح وجاي احسه الندم جاي ينهش كلبه اجوي عمو عباس وخالد ابنه وعمتي هناء وياهم وايهم سألونه وينها همس كلنالهم عاللي كالته الممرضة عمي عباس ضل يلوم بصكر وأنه السبب باللي صار لهمس وصكر بس ساكت
بس لما خالد ادخل صكر هجم عليه وكامو يضربون بعضهم واحنا نفاككهم اجا دكتور وكاللهم لو سوو هوسة مرة ثانية يطردنا برا

صكر. ماحد اله شغل هذولي اثنينهم نسواني وهذا ابني الي اريدها تربي انا حر

عمي عباس. شنو هاي شلون يعني حر مو هاي بنت اخوي وام الولد اترك الجاهل لأمه وخاف الله

صكر. يعني هي اخلاص راح تاخذ الطفل وتهرب بي هو وياها وكدام عيونها ماحد راح يمنعه عنها كل شي باوله صعب عمي وهمس راح تاخذ وقت حتي تقتنع وان شاء فترة وتخلف طفل ثاني وسيف يضل مع اخلاص وكل واحدة منهم تربي طفل ويصيرون الاثنين همس واخلاص أمهاتهم

عمي عباس. انت مصدك حالك باللي تكوله يعني همس تولد الطفل الثاني الها مو طيب اذا خلفت طفل ثالث راح يصير لمنو هاااا

صكر. اخلاص راح تربي سيف بس يعوضها عن حرمانها من امومتها وهمس اي طفل ماراح أخذه منها راح يضل بس الها

عمتي هناء. هه بس خلي تكوم همس بالاول ويمر عليها انو انت اخذت ابنها وبعدها فكر بالطفل الثاني والله راح تدمرها ياصكر وباجر راح اذكرك بس وكتها مايفيد الندم

صكر بضوجه منهم. ان شاء الله ماراح يصير شي وراح تقتنع همس لما تشوف ابنها كدام عيونها وماحد مانعه عنها راح تقتنع

هزت عمتي أيدها وعمو عباس سكت بس خالد حسيته نار ويريد ينفجر وايهم واكف ماعاجبه اللي يصير بس مابيدنه شي نسويه صكر دماغه غاسلينه ومقتنع أن اللي يسوي صح

مر ساعة ونص وطلعت الطبيبة طمنتنه انو الضغط نزل ورجعت خيطت الجرح ووصتنا انو ماتسوي اي مجهود ولا احد يضايقها لانو ممكن ضغطها يرتفع مرة ثانية ومو زين لانو هي لسة من فتره صغيره ولدت شوي ودخلوها غرفتها دخلنا الها كلنه بس ايهم وخالد ضلو برا كعدنا يمها شوي وبدأت تصحصح وهي تون شوي شوي فتحت عيونها باوعت بوجوهنا وكانو تذكرت اللي صار وصارت تبجي

همس بدموع وصوت متعب. صكر الله يخليك كول أن اللي صار جان حلم وان ابني ماحد راح يأخذه مني

صكر. اهدي همس لا تبجين مو زين عليج

همس. ويطبني مرض عساني اموت وارتاح بس كولي ابني راح يصير الي ماحد راح ياخذه مني وتعبي والمي وانا اولده ماراح يروح علفاضي الله يخليك ريح كلبي والله احس حالي داموت

صكر. هسة صيري زينه والله كريم
وتركنا وطلع حتي يمنع اي كلام ثاني ضلينا يمها واجت الطبيبة وكتبت الها خروج كانت الساعة حوالي 12 بالليل اخدناها وطلعنا سندتها انا وعمتي هناء
طلعناها ركبنا بالسيارة وعمي عباس وخالد بسيارتهم وايهم وياهم لان اجو بسيارة واحدة

رجعنا عالبيت لكينا كلهم نامو وماحد فكر يطمن حتي علي همس لو باتصال صكر كال دخلوها بغرفة امي حتي يكون الكل يمها دخلنا الغرفة علي امي فتحنا الضو امي كعدت

ام صكر. هااا حبيبتي شون صرتي والله خفت عليج حيل وردت اروحلج بس ماكان اي واحد موجود وهسه تشوفيني ماكدرت انتظر اخذت علاجي وانتي تعرفي بس اخذ العلاج بنام

صكر. تسلمين يالحبيبة همس راح تضل هنا يمج بالغرفة تعرفين مو زين عليها تضل فوك لحالها

ام صكر. اي يمه خليها هنا يمي حتي ادير باللي عليها هاي بنتي تعالي يمي هنا حبيبتي

همس جانت رافضة تكعد بغرفة امي بس اقنعتها انو مايصير تضل لحالها وممكن تتعب ولازم اي احد يمها
بس رفضت تنام يم امي عالجربايه وخلتني افرشلها بالكاع وسندتها ونيمتها سلمت عليها عمتي هناء وكالت راح ترجع الصبح الها بس لازم تروح بيتها لان زوجها مريض شوي راحت عمتي مع خالد ابن عمي عباس يوصلها واجا صكر كعد يم همس باس راسها
بعدت نفسها عنه

وسألته وين ابني اريد تجيبه الي
صكر. حبيبتي ابنه هسه نايم ومايصير نشيله لانو بس يكعد يضل يبجي الصبح اجيبه الج ضلت تبجي وصكر يكلمها وهي ماترد

بكيت علي دموعها والله كلبي وجعني
همس. كوليلي بالله عليج اللي يصير هذا يرضي الله يحرموني من ابني
وضلت تبجي وجرحها وجعها خليتلها علاج بالكانوله ابرة بس اخذتها وبعد شوي نامت ودموعها علي خدها
غطيتها وبست رأسها وطلعت لايهم منتظرني برا حتي ارجع لبنتي وامي حاولت تكلمني وانا مارديت عليها
وزعلت عليه بس مااكدر اتقبل اللي سووه بهمس وامي اعرفها شريكة باللي يصير

رجعت لبيتي وثاني يوم من الصبح رحت لهمس لكيتها لسة نايمة من مفعول الدوا وصكر نايم يمها وحاضنها بثنين اديه وامي كاعدة جربايتها وتسبح بسبحتها
طلعت للمطبخ اسوي لهمس اكل لان اعرف ماحد راح يسأل عليها اكلت لو ماتت سويت الريوك وكعدت بالصالة  ليما تكعد همس بنتي كنت مخليتها عند عمتي ام ايهم حتي اتفرغ لهمس شوي وسمعت صوت همس
دخلت للغرفة لكيتها تبعد صكر عنها وتكوله روح هات ابني يلا وامي ماعاجبها الكلام وكل شوي تطلع أعذار حتي مايروح يجيب الطفل لما همس تعبت وضلت تبجي صكر راح لغرفة اخلاص شوي ونزل بايده الطفل واخلاص نازلة وراه تسأله وين ماخذ ابني بالله مصدكة حالها وانو هالطفل ابنها دخل صكر لهمس
وهي بس شافت ابنها علي ايده مدت أيدها وهي كاعدة ماتكدر تكوم والله بوقتها حسيتها طفلة صغيرة من طريقة مد أيدها حتي تاخذ الطفل وهي بالأساس طفلة كل عمرها 17 سنة

ناولها صكر الطفل وهي كأن روحها ردت الها ضمت ابنها لحضنها وضلت تبوسه وتشمه شوي فتح عيونه والله نفس لون عيون همس وهالشي اللي ماحد راح يكدر ينكره ضلت حاضنة الطفل وحسيتها نسيت حالها ونسيت كل شي كل اللي تذكره انو ابنها بحضنها
واخلاص واكفة تفور بمكانها شوي وراحت علي همس حاولت تاخذ الطفل منها وهمس ضمته مارادت اخلاص تاخذه بس صكر أخذه منها واخلاص أخذته وراحت
وهمس ضلت تبجي وتصرخ وصكر حاضنها

صكر. ياعمري هو هنا وين راح يروح مع اخلاص راح يسكتها عنه وانا وياج اضل والله راح اعوضج عن كل شي وابنج كدامج هاهو

ماردت عليه وضلت تبجي وتنشغ واحس حتي ماعندها طاقة تبعد صكر عنها جرحها تعبها ورحت جبتلها الريوك ماقبلت تتريك وأخذت العلاج علي معدة خاويةوتمددت بمكانها ودموعها علي خدها والله هاي دموعج ياهمس راح تحرك عليهم  هالبيت ضلت تشهك وتنشغ مثل الطفله ونامت ماتدري عن الدنيا شي

رهف. اتمني تكونين ارتحتي هسه ونفذتي اللي تردينه

ام صكر. دسكتي بلا هالعيارة والله اللي يشوفها يكول ميتلها واحد وين اخلاص ماخذة الطفل يعني مو كدامها

رهف. انتي ام واكيد تحسين بيها ليش قبلتي تحرمينها من ابنها

ماردت علي خليت وطلعت لكيت اهل اخلاص اللي هما خالاتي وبنات خلاتي كاعدين يتريكون برا كانو هما أصحاب البيت واخلاص هما يطلعولها الاكل فوك لغرفتها لانو ماتكدر تترك الطفل هه والله يالله كانو هي اللي امه ومريحينها والمسكينة اللي ولدته كلبها ديحترك كل يوم عليه

رجعت لبيتي ماكدرت اتحمل اللي اشوفه وكلت شوي وارجع لهمس لان بين بيتي وبيتهم مسافة كلش صغيرة
......................

همس

كعدت بعد الضهر بشوي حسيت حالي مصخنة وجسمي كله يوجعني وصدري احسة يوجعني حيل  غير وجع العملية عمتي كاعدة وام اخلاص واختها يسولفون ولا كانو انا موجودة ومريضة ماكدرت اتحرك بس صحت باسم رهف ماردو علي ولا كأنهم سامعيني ضليت اصيح وحتي علي عمتي ماردو
من وجع جسمي وتعبي وماحدا يسأل فيني وابني اللي أخذوه مني بكل جبروت بجيت وحاولت اكوم ماكدرت

ضليت كاعده بمكاني واحس حالي اغيب عن الدنيا شوي وارجع حسيت برهف يمي وتحسس كصتي وصوت صكر وهو يكلمني وصوت رهف تعارك وي امها شلون مخليتني هيج وهي ترد انو ماتعرف انا مريضة وهي رجليها توجعها وماتكدر كل شوي تنزل من الجربايه وتجي عليه

وبعدها شي بارد علي راسي ورجلي شهكت من برودته وحاولت ابعده عن كصتي بس صوت صكر يمنعني وأيده تمسك ايدي حتي لاابعد الخاولي عن راسي حاولت رهف تكومني حتي اكل اي شي وأخذ علاجي ماكدرت سندني صكر وانا كارهته بس حتي ايدي ماتعيني أبعده عني

جابت رهف شوربة ساخنة واكلتني وانا بألف يالله كدرت اكل شوي وعطتني علاجي واسمعها تحجي مع صكر انو سبب حرارتي هاي هو  الحليب بصدري وانو الطفل مايرضع مني وصكر يكولها انو خلص الطفل عند اخلاص ومو كل شوي اروح ارضعه وترجع تاخذه وان الطبيب كاتبله علي حليب واخلاص ترضعه منه

وعمتي تكول انو انا يومين واصير زينة والحليب يجف بصدري لحاله كنت اسمع وابجي علي حالي وعلي ابني اللي حرموني حتي ارضعه سمعني صكر ابجي مسح دموعي ويسألني أذا اكو شي يوجعني مارديت لان اعرف كلامي ماله داعي وفكرت بنفسي بس اصير زينة اروح لعمي عباس وعمي صالح واخليهم يرجعولي ابني ماعرفت انو انا معلقة حالي بخيوط ذايبة

مر اليوم وانا احس حالي متكسرة ووليدي ماشفته ولاحتي سمعت صوته ورهف راحت بالليل لبنتها وطول الليل صكر يمي ثاني يوم كمت علي صوت هوسة حسيت حالي احسن شوي حاولت اكوم دخلو عمتي هناء وعمتي صابرين وهناء اخت صكر وعمتي سارة ووياهم رهف

عمتي صابرين تبجي علي حالي وعلى الي صارلي
حضنوني وانا ابجي بحضنهم يمكن مالي غيرهم بعد
كعدو يمي شوي واحسهم متوترين سالت رهف علي الهوسة اللي برا شنو سببها بجو عمتي صابرين وعمتي سارة دخلت اخت اخلاص وبيدها صينية عليها اكل استغربت انو اخت اخلاص تجيب اكل النا
حطت الصينية وكالت هاك اكلي معلاك صكر لما ذبح حتي يسوي عزيمة  لسيف ابن اخلاص وكال دزو لهمس وابتسمت بحقارة وراحت حسيت حالي اغلي وقلبي يحترق عاللي يصير

سندت حالي عالجرباية حتي اكوم واطلع برا حاولو يمنعوني بس انا ماقتنعت سندتني رهف وفتحت الباب
شفت المشهد اللي كسر ظهري اخلاص كاعدة وابني بحضنها والناس تباركلها وكاعدة يمها عمتي ام صكر وسناء كاعدة قريب عليهم يااناس هذا ابني انا انا اللي المفروض تباركولي انا امه مو هي والله مو هي
رحت عندهم وانا منحني ظهري شوي بسبب عمليتي والم بطني

وصلت لعندهم وكل العيون عليه وعمتي ام صكر كامت حاولت تدخلني لغرفتي ماوفقت

همس. ليش تردين ادخليني حتي مايعرفون الناس انو هذا ابني انا مو ابنها هي خليهم يشوفوني ويشوفون وجعي والمي حتي يعرفون انو انا اللي فتحو بطنها وطلعو منها الطفل مو هذيج

ردت اخت اخلاص هالة. ايه عيني كلهم يدرون انو انتي اللي فتحتي بطنك واخلاص أخذت الطفل خلص مايفيد الكلام بعد

اخلاص ساكتة بس علي وجها احقر ابتسامة وعيونها كلها شماته

رهف. مالج دخل انتي سمعتي لو اجي هسة امسح بوجهج الاراضي

هالة. تمسحين بوجه منو الارض كل هذا لان محروكين شون اخلاص اخذت منها الطفل وصكر ماهان عليه يزعلها واكيد شاف انو همس ماتستحق تربي ابنه

فجأة عمتي سارة هجمت عليها  مسكتها من شعرها ونومتها بالأرض وضلت تضربها علي وجها بالنعال

سارة. تخسين ولج والله لو تجيبين سيرتها علي لسانج والله احركج انتي وكل اللي يدافعلج

حاولو النسوان يبعدوها واخوات هالة واخلاص حاولو يشدو عمتي سارة ويضربوها بس بنات عمتي سارة بعدوهم وواحدة من اخوات اخلاص اخذت راشدي علي وجها من بنت عمي عباس بالزور يالله كدرو يبعدو عمتي سارة عن هالة اخت اخلاص

عمتي سارة. شوفو كلكم لايغركم شكلي وانو انا مدرسة ومو من بلدكم وتفكروني راح اسكتلكم والله اللي يجيب طاري همس انهي حياته شوية كح...... ويرديدون يسوون روحهم نسوان بروسنه

كامت هالة وهي شعرها مكفش ووجها كله خطوط حمرا وخرابيش من عمتي سارة

هالة. والله ماراح اسكتلج عاللي سويتيه

عمتي سارة. ورجيني اللي راح تسوية يلا انا منتظرة

ام صكر. سارة شلون تضربين بنت اختي ببيتي
انتي ضيفة هسة ببيتي ياتحترمين البيت وناسه يااما ماتجين عندي مرة ثانية

عمتي سارة. والله خاف ماترضين وانا راح اروح بسبب كلامك لااا عيني راح اجي وغصب عن الكل طول ماهمس بالبيت ماراح اعوفها الكم تسوين هالشي حتي ازعل واروح وانتو تستفردون بهالطفلة اليتيمةلا والله ماراح تشوفيها

كامت عمتي تغلط عليه وعلي عمتي سارة وانو انا السبب باللي صار كنت كاعدة علي كرسي ماكدرت اوكف وضليت ابجي علي صارلي واللي راح يصير 
شوي واجا صكر وعمي عباس وايهم وزوج هالة
لانو ابن هالة راح الهم عالديوان وكال عالعركة اللي صارت ولأن الديوان بعيد شوي عن البيت هما ماسمعو الصوت لما تعاركن سال صكر عاللي صار وعمتي تبجي هي وهالة وانو عمتي سارة ضربتها
زوج هالة اتخبل كيف تضربو مرتي وعمو عباس ضل يسال عمتي سارة عاللي صار وهي تحجيله
كالها خلص يلا نرجع للبيت

راحت وياه بس قبل لاتروح كالت والله اللي ياذي همس راح يلاكيني كدامه سكتنا كثير الكم لحد لما اخذتو قطعة منها بس خلص ماراح اسكت مرة ثانية
راحت صكر من اول مادخل وعيونه علي وانا نظرتي اله كلها كره سندتني رهف دخلتني لغرفتي ماوافقت اروح لغرفة عمتي مرة ثانية

كل شوي اكوم اطل من الشباك عالناس وعالهوسة وابجي هذا سبوع ابني انااااا ياناس ضلت الهوسة لوقت متأخر من الليل والكل راح حتي رهف رجعت لبيتها شوي ودخل لصكر وانا كاعدة عالجربايه وعيوني حمرا بسبب دموعي طول اليوم

صكر. ما كافي هاي الدموع والله دموعج هاي تحرك بكلبي

همس. اريد ابني صكر

صكر. مو خلصنا من هالموضوع يااعمري انا والله اخلاص تحبه ومراعيته لاتخافين عليه وانتي هسه تعبانة

همس. ابني هو دواي بس اضمه لصدري انسي كل الوجع

صكر. والله تنسين الوجع وكلشي كلها مسألة وقت يعني انتي راح تكوني فرحانة واكو واحدة محرومة من الأمومة كدامج وكل يوم تتحسر عالطفل

همس. وانت هسه فرحان وانا احترك كدامك راح تكون فرحان واكو ام اخذتو منها ضناها

صكر. وين اخذناه هو كدامج ماراح يروح لمكان والله بس تهدين شوي وتفكري راح تعرفي انتي ماخسرتي ابنج

همس بشرود. تدري طول عمري مالي حظ باي شي بالاول ماما وبابا راحو وعافوني بوسط ناس كنت احسهم اغراب عني والله عوضني بعمو سلمان ماخلاني احس باليتم بس انحرمت منه وحرمتني من دراستي واحلامي وماكفاك حرمتني من ابني وهسه انا صفيت وحدي حتي اسم الطفل حرمتني اختاره وانت تدري اريد اسميه عمران

حسيته غلس عن موضوع اسم الطفل واتهرب بكلامه
صكر. وانا وين رحت انتي مو وحيدة انا يمج

ضحكت باستهزاء ودرت ظهري ونمت يجرح ويريد يداوي يسرق كل شي من حياتي ويكلي راح اعوضج
نزلت دموعي وماحسيت علي حالي لما نمت

ثاني يوم راحو اهل اخلاص وسناء وياهم حتي مااجت الي كانو تخاف علي حياتها مثلهم لو سلمت عليه
الله ينتقم من كل اللي ساعد ووافق انو طفلي ياخذو مني

مر كم يوم  كنت تعبانة بسبب الصخونة من صدري بس اتحسنت والجرح صار زين وداني صكر للدكتورة وفكت السلك

باول فترة كان صكر كل فترة يجيب الي الطفل كل كم يوم بس هسه لا عمتي رفضت وحاربته وكالتله مايجيبه الي بحجة الطفل راح يشتت بينا ولازم يصير مع اخلاص فقط حتي يعرف هي امه يوم عن يوم اكتشف انو عمتي اللي كنت احسبها امي هي سبب عذابي
وتاكدت من هالشي لما سمعتها هي واخلاص يتفقن يمنعن الطفل عني نهائيا
____________________________________
يتبع.....
همس حال الضيم حالها انظلمت بحياتها هواي اول شي تيتمت ثاني شي انحرمت من دراستها ثالث شي تزوجت غصب عنها وبعمر صغير ورابع شي اخذو ابنها منها وحرموها انها تسميه وترضعه وتشوفه وحتى حرموها تمسكه بايديها هذا ظلم كلش جبير والله الله مايرضى بس شنو بايدنه نسوي غير ندعيلها الله يفرج همها ويساعدها وحسبي الله ونعم الوكيل على كل ظالم

مع تحياتي الكم. رين الزين