رواية عآمـلوني گ فصـليه بقلمي ايمان محمد وٌ رين الزين الفصل الحادي والعشرون 21 - بقلم آلگآتبه تآج آلعرآق

كلمات مني تحجي حال همس

هآي آلدنيآ شـسـووت بينهہ

يومـ ويآنهہ وعشـرهہ علينهہ وآحد مـن آول مـآ يوصـلهآ

يبجي وتنزل دمـعهہ عينهہ

آول نفس يصـيح عمـري رمـآني بريييح

ثآري آلدنيآ صـحيح نفرح مـآتخلينهہ بهآي آلدنيآ همـوم

ويوم آصـعب مـن يوم وآبن آدم مـظـلوم بس آلدمـعهہ بعينهہ

هآي آلدنيآ آوهآم غربهہ وهم وآلآم وآحنهہ وي آلآيآم

مـآندري شـسـوينهہ

نرفع آيدينهہ ونشـگي لربنهہ

يآرب مـن آلهمـم تعبنهہ آلي نحبهہ ضـآيع مـنهہ وضـيعنهہ آلي جآن يحبنهہ
____________________________________

صارلي فترة كل ما اكول لصكر اريد ابني يتحجج بشغله ومايجيبه الي راح الصبح علي دوامه ونزلت انا اتسحب حتي اروح لبيت عمو عباس واشكيله من اللي سواه صكر بيه واخليه يرجعلي ابني لان صكر رافض اطلع من البيت مريت من عند غرفة عمتي وانا ماشية سمعت صوتها هي واخلاص يحجن بصوت ناصي والباب كان مو مقفول زين وهما ماانتبهولي واكفه اسمع كلامهم

اخلاص. انا سيف صار ابني ومو كلساعه شوي صكر ياخذه لهاي همس

ام صكر. انا حجيت مع صكر وحاولت اقنعه أن الجاهل راح يتشتت بينج انتي وهمس ومو كل شوي ياخذه الها وهو بالاول كان رافض بس بدأ يقتنع ماتشوفينه مااخذه لعندها صارله فترة

اخلاص. والله لو علي مااخليها تشوفه بعيونها حتي

ام صكر. لا خليها تشوفه وتملي عيونها منه حتي يحترك كلبها عليه وهو عندج وبحضنج انتي

اخلاص. وهو هذا اللي راح يصير

ام صكر. طول المدة اللي فاتت وانا اضغط علي حالي وامثل انو انا احبها واعتبرها مثل بنتي بس انا حتى اكره اسمها مو احبها هي ولا بيوم راح انسي اللي سواه ابوها السكط باختي لما رفضها وهي لهسه دتتعذب والله الا اخليها تحترك بكل ثانية تمر عليها

اخلاص. هههههههه ايه خالتي حبيتي هو هذا الكلام هي عبالها اذا اخذت صكر مني وان هو مادام يحبها يعني فازت خلي حبه لها يفيدها وهو اللي راح يدمرها بايده من دون مايحس

انصدمت من كلامهم معقول اكو هيج بشر معقول الإنسانة اللي اعتبرتها امي تكرهني هالكثر
وتريد تحرك كلبي علي ابني حسيت رجليه بعد ماتشيلني بس گويت نفسي وطلعت من البيت رحت لبيت عمي عباس بيته قريب علينا مشيت شوي وانا ابجي علي حظي وعلي الخدعة اللي كنت عايشة فيها
وصلت لبيتهم ودخلت دكيت الباب طلعت عمتي سارة تفاجات لما شافتني وحضنتني اول ماحضنتني كمت  ابجي حسيت حالي اريد حضن اتخبي فيه من كل العالم دخلتني جوا وهي تهديني لكيت عمي عباس كاعد كام سلم عليا وباس راسي

عمو عباس. شلونج همس بنيتي شخبارج

همس وهي تبجي. مو زينه عمي والله كل يوم داموت من يوم اللي ولدت وانا احس روحي تنسحب مني عالبطيء ابوس ايدك عمي اريد ابني احجي صكر حتي يرجعلي ابني والله اللي يصير هذا ظلم الله يوفقك عمي ساعدني

عمو عباس والله يابنتي انا مو راضي عاللي سواه صكر وحجيته وحاولت اقنعه انو يرجع عن اللي براسه بس ماوافق

همس. يعني خلص تقصد انو انسي ابني بعد ماشوفه

عمتي سارة. لا حبيتي هذا وليدج غصب عن الكل ان رضو ولا مارضو

ضليت ابجي واتوسل عمو عباس انو يحجي عمو صالح ويكولون لصكر يرجعلي ولدي

اخذتني لفوك بغرفة بنتها وكعدت وياي تهديني وحجيتلها الها على كلشي سمعته من عمتي واخلاص
شهكت وكالت والله جنت حاسة اكو شي غلط مستحيل  سعدية حبتج هيج فجأة وهي جانت ماتطيقج حتي وكل مشاكلها ويا عمج سلمان الله يرحمه بسببج انتي

سكتت شوي كانها تفكر ورجعت كالت. لهالسبب وافقت تزوجين صكر حتي تنتقم من أهلج بيج انتي وحتي لو أخذت الطفل ماحد يكدر يمنعها يعني صكر كان لازم يجي يوم ويتزوج حتي يخلف وهي كالت يتزوجج انتي حتي تاخذ الطفل تعطيه لبنت اختها الحية المسمومة لانو لو اتزوج وحدة ثانية اهلها راح يوكفون بوجههم وماراح يوافقون انو الطفل ينوخذ من أمه الله يلعنهم تفكير شيطاني كعدي حبيبتي ولاتشيلين هم وان شاء الله راح تنحل ضليت عندهم وعمو عباس حجه عمو صالح ابن عم بابا وحجه هم ويه صكر انو اول مايرجع من دوامه يجي لعدنه وماكاله عالسبب

حوالي الساعة 3 اجه صكر وقبله بشوي اجا عمو صالح صاحلي عمو عباس انزل تحت عندهم صكر اول ماشافني استغرب وكان مفكرني مريضة او شي
بس لما عمو صالح حجاه علي وليدي انو يرجعه الي خزرني يالله حتي مايريدني أطالب بابني يعني يدوسون علي واسكت

عمو صالح. باوع ابني اللي جاي تسويه مايرضي الله رجع الطفل لأمه خطية ماتشوف كيف متعذبة

صكر. وابنها هاهو كدامها بالبيت ماخذناه وسفرناه احنا

عمو عباس. اي يابه كدامها بس بحضن غيرها وحتي صارلكم فترة ماتخلونها تشوفه حتي

صكر. هالشي احسن حتي يتعود سيف علي اخلاص لان هي اللي راح تصير امه

من كلام صكر وطريقته كان ضايج مني كلش لانو اشتكيتلهم وهالشي يمكن هو حسه إهانة اشلون هو شيخ العشيرة وانا اطلع واشتكيه

عمو صالح. بس همس هي امه مو اخلاص

صكر. وشنو اللي يثبت الطفل باسم اخلاص كم مرة احاول افهمكم انو اخلاص انحرمت من انو تصير ام وهالطفل راح يعوضها شوي والله طول ماهمس حامل وهي تبجي ليل ونهار وتكول أمنية عمري يصير الي طفل والله ادفع عمري واشيل طفل بحضني ويصير ابني همس راح تحمل مرة ثانية وتجيب طفل يعوضها وينسيها وحتي ابنها كدام عيونها ماراح لمكان
عمو عباس. عذر اقبح من ذنب والله يالله وليش كتبته باسمها كان ممكن تكتبه باسم امه همس واخلاص تساعدها بتربيته

صكر. اي يابه وهمس وقت اللي تريد تمنع عنها سيف تمنعه وتذلها بالطفل مو وبعدين شلون أكتبه باسم همس واحنا ماعاقدين محكمة بعد

عمو عباس وعمو صالح انصدمو انو نحنا ليهسه ماعاقدين محكمة وطلبوه يعقدلي هو وافق يعقد محكمة بس بعده مافارغ هلايام عمو عباس حاول يقنعني انو اصبر حتي صكر يعقدلي محكمة وبعدها يحجون وياه مرة ثانية بخصوص ابني شوي واخذني صكر وطلعنا وانا اجر بذيول خيبة الأمل والانكسار اللي فكرتهم راح يساعدوني ويخربون الدنيا حتي يجيبو حقي استسلمو من اول مرة وماتعبو حالهم حتي وحاولو مرة ثانية

رجعني صكر عالبيت واحسه صاير نار وعلي اي لحظة راح ينفجر اول مادخلنا للبيت سحبني من ايدي  بقوة حسيتهاانكسرت

صكر. ولج انااااا تروحين تشتكيني لعمي عباس وعمي صالح شايفتني جاهل كدااااامج

علي صوته طلعت عمتي من غرفتها ونزلت اخلاص من فوك

عمتي. خير يمه شنو صار شنو سوت همس

صكر. الخاتونه رايحة لبيت عمي عباس تشتكي مني انو انا ظالمها

ام صكر بخبث. ليش همس بنيتي سويتي هيج تعرفين رجلج شيخ عشيره رايحة تشكيه

لما سمعتها تحجي وياي تذكرت كل كلامها ونسيت حتي خوفي من صكر

همس. انااااا مووو بنتج سمعتي لو لا بعد كافي تمثيل ماتعبتي انتي السبب بكل اللي صارلي الله ينتقم منج يارب

فتحت عيونها علي وسعهم مذهولة من كلامي وصكر مسك شعري ولف وجهي عليه وضربني راشدي علي وجهي حسيت خدي انشلع مسكت خدي مصدومة ونزلت دموعي وهو واعدني انو عمره ماراح يضربني
صكر. تدعين علي منو هااااا علي اللي اعتبرتج بنتها وحبتج اكثر من بناتها

همس بدموع. كل هالشي كان تمثيل وهي بعمرها ماحبتني بالعكس تكرهني الإنسانة اللي اعتبرتها امي تكرهني وتنتقم من اهلي بيه انااا

ضلت ام صكر تبجي وتحلف أنو معتبرتني مثل بناتها شلون انا اظن فيها هالظن واخلاص اجت حضنتها وبقت تهديها وصكر شاف امه تبجي تخبل مسكني من شعري وطلعني سحل لغرفتي فوك فتح الباب ورماني عالكاع وقفل الباب ورا ضليت اخبط بقوه عالباب وابجي وصيح اريد ولدي شوي ادعي عليهم وشوية احلفهم واتحايل يجيبولي ابني بس ماحد رد علي

واسمع صوت اخلاص رايحة وراجعة من كدام باب غرفتي وصوت ابني يبجي ضليت الطم علي وجهي وخرمشت وجهي باظافري ياااناس اريد ابني والله هذا قطعة من روحي ضليت لليل كاعدة بلكاع وساندة ضهري علي الجرباية وحاطة راسي بين رجليه واناشغ سمعت صوت الباب انفتح ودخل صكر اجا لعندي مسح علي شعري ورفع راسي شاف وجهي شون متخرمش وعيوني حمر من دموعي حضني لصدره وهو يعاتبني ويكولي انو غلطت علي امه وانو انا اللي استفزيته لما رحت لعمي عباس وبعدها غلطت علي عمتي

حاولت ابعد عنه بس هو رفض وضل حاضني ويمسح علي شعري حزت عليه نفسي وقتها يضربني ويصالحني بكيفه لو عندي اهل اكيد ماراح يخلوهم ياذوني بهالشكل بكيت بصوت عالي وهو ضمني اكتر لصدره ويعتذر علي ضربه الي

صكر. كاافي ياعمري انكسرت ايدي قبل لاامدها عليج والله انتي اللي عصبتيني وغصب عني ماحسيت علي حالي لما ضربتج

مسكت طرف دشداشته وانا ابجي واحلفه يجيبلي ابني

همس. الله يخليك صكر اريد ابني والله احس حالي داموت كل يوم 100 موته وهو بعيد عن حضني

صكر. اهدي هسه ونحجي الصبح بهالموضوع

ضل يهديني وانا ابجي هو الموضوع يحتاج يحجيني بي بعدين هذا ابني روحي مايحتاج ياجل كلامه وياي
نمت من دون مااحس

ثاني يوم كعدت لكيت صكر ماموجود الظاهر رايح لدوامه احس عيوني دتحركني من كد ما بجيت
رحت غسلت وجهي ونزلت تحت حتى اواجه عمتي واسألها على الكلام الي سمعته منها هي واخلاص

نزلت لكيت اخلاص كاعده بغرفه عمتي وولدي
مو وياها احسها تعوفه بغرفتها عمدا حتى ما اشوفه الله ينتقم منها شافتني عمتي لوت خشمها تقربت عليها وانا احس بضيق بصدري ونفسي كوه اخذه

همس بدموع. انكشف كلشي وبعد ماكو داعي تمثلين حبج اليه ماتصورت بيوم انج تكرهيني هيج لدرجه انج تحرميني من ابني كطعه من كلبي لحتى تشوفيني اتعذب بس كوليلي انا بشنو اذيتج شسويتلج والله اعتبرتج امي وكلت الله عوضني بأم ثانيه تحتويني

ام صكر بضحك. وبالله شسويلج اني اذا انتي وحده غبيه يعني بيوم وليله حبيتج مو معقول وانتي تدرين اني ماطيق حتى اسمع اسمج لحتى فد مره احبج واعتبرج بنتي ههههههه والله يالله

اخلاص. لو انتي معتبره الي صار وشفتي عذاب لا والله بعدج ماشفتي شي الجايات اكثر انشالله وعد مني راح تشوفين العذاب على اصوله وانتي شفتي شلون صكر ضربج كدامنه هم وحتى راح احرمج انج تشمين ريحه ولدج اوووووي اسفه اقصد ولدي هههههههه
وبقت تضحك هي وعمتي
____________________________________
يتبع.

ادري بيكم زعلانين لان مانزلته البارحه بس صارتلي مشكله مدري اضحك عليها مدري ابجي والله ماعرف
بس ارتعبت عالفاضي بسبب امي واني كاعده اعدللكم البارت وواصله للنهايه بيه داكتبها ما سمعت الا صوتها تصيح بطنها جاي يمغصها واني لا ابوي موجود وعمي مريض عنده حمى تيفو وماعندي الا اخواتي اصغر مني وبعد ماعرف شسوي وماسكه جوال امي بيدي اريد اتصل على ابوي وكل شوي اوكعه من صوت صياحها ولما اخذوها ع المستشفى طلع مغص بسبب الكبسه الي ماكلتها والكمون الي شاربته وراها فورا
بالله بس كعدت ساعتين برعب بسببها واخر شي من جابوها تعاركت اني وياها وهسه مانحاجي بعض 😅

هاي نص تعويض عن الفتره الي غبت بيها اني وايمان انشالله تعجبكم وباجر بليل هاا بليل انزللكم النص الثاني وهم الروايه ماباقيلها شي وتنتهي فد 9 لو 10 بارتات لان لسه جاي نستلم الاحداث من همس اني وايمان ومحتاجين تدعولها الله يبرد كلبها ويرجع ابنها لحضنها خطيه تكسر الكلب اكيد قرائي اكو منجن امهات وحوامل الله يتمملجن على خير وتعرفن شعور الوحده من تنحرم من طفلها الي انتظرته شهور وايام وساعات حتى تمسكه بايدها وتشم ريحته بس همستنه انحرمت من انها تشوفه وتمسكه وترضعه وتشم ريحته لو اسبحه وتلبسه والله اني الي لامزوجه ولا عندي اطفال حاسه بأحساسها كون امي حامل والحمدالله باجر تدخل بشهرها واني الي منتظرتها تولد حتى احضن اختي الصغيرونه اخر العنكود ف ادعلها

مع تحياتي الكم. رين الزين