رواية عآمـلوني گ فصـليه بقلمي ايمان محمد وٌ رين الزين الفصل الرابع والعشرون 24 - بقلم آلگآتبه تآج آلعرآق

وآني وحدي
وآلزمـن شـوفني ويلهہ وآني وحدي مـآنمـت مـرتآح
ليلهہ وآني وحدي مـحد بهمـي آشـتگيلهہ وآني وحدي
آلدنيهہ ضـدي وآني جآي بعمـري آگبر مـآشـي وحدي
وروحي بلخطـوآت تعثر وييين آودي دمـعي هذآ آلجآي يگثر يآآآآ قسـمـتي
وآنآآدي وشـسـوي صـوتي آنجرح وآنآدي يومـيهہ مـصـيبهہ وآگووول لروحي عآدي
آسـوي وآگبر مـو تآلي تعبي يروح دگآفي يآدنيآ دگآفي بسـ جروووووح وآني وحدي
____________________________________
سيف حبيبي صار عمره 3 شهور كل يوم يكبر بعيد عني أحسه سنة بالنسبة إلي وكل مايمر يوم وهو بعيد عني أفقد الأمل انو راح يصير بحضني فد يوم اليوم راح تجي سناء اخت صكر هي وام اخلاص يبقون عدنه يومين لان من يوم سبوع ابني مااجو عمتي هناء صارلها فترة مااجت عندي لان زوجها مريض وعمتي سارة اللي وعدتني ماتتركني ماسالت عني ولا اجت حتي ولما رحت سالتها كالت انو عمتي كايلة لعمو عباس انو هي تسوي مشاكل لما تجي للبيت وعمي منعها تجي عندنا

حسيت كل الناس صارو يتخلون عني ومادافعو عن حقي بابني ورضو باللي صار وخلص انا الوحيدة اللي اتعذب بس قررت لازم مااضعف وأخذ حقي منهم اجت ام اخلاص الحية وياها سناء وزوج سناء وجهالهم ام اخلاص دخلت حتي ماباوعتلي وسناء من بعيد كالت شلونج سلمو علي عمتي واخلاص

كعدو شوي بالصالة وبعدين اخذتهم عمتي لغرفتها واخلاص وياها ابني سيف وقفلو الباب اخلاص ماعادت تقفل الباب علي ابني لان صكر مرة عرف انها قافلة الباب ورزلها ومنعها تقفله ومن يومها يااما تبقى مع ابني بالغرفة أو تنزله لعمتي حتي مااشيله ولانو انا ماروح لغرفة عمتي وماطايقتها حتي تعرف انو ماراح ادخل عند ابني اجت اخلاص وكالت يالا كومي نجهز الغدا مارديت عليها يعني فوك كل شي تريدني اشتغل وياهم عادي

اخلاص. كومي ولج يلا ساعديني بتجهيز الاكل ام احمد ماراح تجي اليوم

همس. مو مشكلتي هاي هما اهلج جهزي انتي الغدا الهم

اخلاص. والله بس يجي صكر راح اكوله علي وكاحتج هاي
مارديت عليها

راحت هي تجهز بالاكل وانا كعدت فتحت التلفزيون وكعدت اتفرج عليه طلعت سناء من غرفة عمتي شافتني كاعدة اجت لعندي

سناء. كيفج همس وينها اخلاص ليش ماتساعديها

همس. يطبها طوب وليش اساعدها

سناء. شوفي انا ادري انتي من يوم اللي صكر اخذ سيف وانطاه لاخلاص وانتي كارهتهم وحتي كارهة امي

همس. ومو من حقي يعني

سناء. كبرتي الموضوع ترا هو ابنج مو هنا كدام عيونج واخلاص تحبه ومراعيته بطلي تفكيرج السلبي هذا وعيشي واسكتي

همس. والله يعني عادي ياخذو ابني واسكت ولو حجيت شي لو ودافعت عن حقي ب ابني يكون تفكيري سلبي مو ان شاء الله تحسين باللي أحسه انا حتي اشوف وقتها تفكيرج كيف راح يكون

سناء. والله انتي وكحة ولسانج يرادله كص شلون هيج تحجين وياي بهالشكل

همس. اصلا انتي خايفة علي حياتج عند اهل اخلاص وتكولين هالشي حتي مااخربها علي بنتهم وانتي عيشتج عدهم تتأثر بس مو مهم بنت عمج اهم شي اخلاص يعني اذا ماكلتي الحق ماريدج تتفلسفين براسي

طلعت اخلاص من المطبخ ترزلني تاكوم اساعدها وتتعدى بالكلام

اخلاص. كومي ست همس مو خدامة عند اللي خلفج انا

همس. لاتغلطين سمعتي لو لا

اخلاص. لا راح اغلط عليج وعلى اهلج حيوانة بنت السكط

همس. ماكو احد سكط غيرج انتي واهلج حقيرة
قربت مني بصوت ناصي كالت

اخلاص. كل هالشي لان حرقت كلبج وأخذت ابنج وما خليتج تشوفينه تدرين انا حتي لما يبجي اضربه واضل اكرص فيه

اتخبلت لما سمعت
همس. صح هو مو ابنج لأنج عاكر الله لايوفقك ياحقيرة عسي ايدج تنكسر أن شاء الله

هي دموعها نزلت خلال ثانية حتي انا استغربت وكالت
والله لا اكول لصكر على الي تكولينه اليه

همس. كولي هو اصلا صكر كدرته بس علي

ومافهمت خطتها الا علي صوت صكر لما صاحلي بصوت عالي الحقيرة كانت شايفة سيارته لما دخل من شباج المطبخ واجت تستفزني حتي اضوج وارد عليها

صكر. هاد الكلام عليمننن

بلعت ريكي وسكتت
سناء بنذاله. والله صكر هاي همس مو مؤدبة حتي غلطت علي وانا احجي وياها حتي تعيش وماتسوي مشاكل

طبعا انا ماكدرت اسكت ولساني سبق عقلي

همس. اسكتي انتي والله حرامات ينكال عنج بنت عمي انتي خدامة اخلاص واهلها الله لايوفقج حقيرة

صكر فتح عيونه علي وسعهم وبخلال ثانية كان عندي ضربني راشدي شلع خدي وضل يضربني وكعت بلكاع وهو ضربني برجله علي ظهري حسيت روحي راحت
هو يضرب وانا اصرخ طلعت عمتي من غرفتها وام اخلاص وكفو يتفرجون سناء بس اللي حاولت تبعد صكر عني هو طبعه عصبي لما يعصب يتخبل مايشوف كدامه ضل يضربني لما حسيت حالي فقدت والدم ينزل من خشمي ومن حلكي

سحبني من ايدي واخذني لغرفة يم المطبخ فيها الفرش الزايد والزوليات رماني بالغرفة وقفل الباب
وحلف ماحد منهم يجيبلي اكل او اي شي لحد مااتعلم الادب ضليت عالارض مكان ماخلاني مابيه حيل اكوم حتي ماعرفت الوقت اللي ضليته بهاي الغرفة وانا اسمع صوتهم برا يضحكون ولا كانو صاير شي وصكر صوته ماموجود الظاهر راح للديوان

شوي وسمعت صوت اخلاص واكفة تتشمت بيه وتضحك وراحت ضليت ابجي والعن حظي واليوم اللي اجيت فيه لهنا لو ميته ويا اهلي ولا شفت هالعذاب
نمت أو بلاصح غميت مااعرف بس صحيت علي صوت ملاكي الحارس رهف هاي انا دايما اسميها هيج لأنها بظهري وتحميني دوم انفتح الباب ودخلت تركض لعندي اجت سندتني وتكومني صرخت من وجع ظهري
همس بصراخ. ااااااااااه ظهررررري

طلعت برا بسرعة ورجع صكر وياها وهي تعاتبه علي سواه بيه وتدعي علي كل اللي ظلموني سالني عاللي يوجعني مارديت عليه رهف كالتله أن ظهري يوجعني حط ايد تحت رجلي والايد الثانية تحت راسي حاولت امنعه يشيلني بس غلس عني

شالني ضمني لصدره وهو يعتذر باذني وماحد يسمعه وباسني بخدي طلعني لغرفتي ورهف تركض وراه
خلاني عالجرباية واجت رهف اول ماشافتني بالضوا شهكت لانو الغرفة تحت ظلمة وماشافت وجهي

رهف. شنووووو هذا حراام عليك صكر والله شلون تضربها هالشكل

صكر واكف مارد راحت جابت خاولي مبلل ومعقمات واجت تمسح بوجهي وانا اباوعلها وابجي مسحت علي خدي وهي تبجي ويايه

همس. شفتي اللي صارلي رهف تدري اتمني الموت بهالحظة حتي ارتاحالله عليج اذا تحبيني ادعيلي اموت وارتاح

صكر بعصبيه. اخرررسي والله لو سمعتج تحجين بهالشكل مرة ثانية ماراح يصيرلج

خير رهف حطت ايدها علي حلكي وحضنتني وتبجي اول ماحضنتني وايدها لمست ضهري صرخت من الالم عدلتني علي كيف وراحت ورا ظهري رفعت الدشداشة وشهكت اجاها صكر بسرعة بس شاف ظهري عصب بزياده وضل ينافخ

صكر. ليش همس تخليني أاذيج

وعافنه وطلع كال رايح يجيب علاج الي رهف ضلت تمسح بوجهي من آثار الدم دخلت سناء تسال عني
طبعا رهف ماتعرف اللي صار ولا تعرف انو سناء سبب من الأسباب اللي ضربني صكر عليها

رهف. والله ضهرها يوجعها حيل ولما شفته اكو زراق بمنطقة كبيرة بيه وشوفي وجها شلون مدمر من الضرب الله لايوفقها اخلاص

همس باوعتلها. هااا مو اخلاص لحالها رهف هاي اختج وبنت عمي مثلهم وبسببهم صكر ضربني

حجيتلها اللي صار واللي كالته الي رهف ضاجت منها وضلت تعاتبها شلون توكف بصفهم ضدي وسناء حاسة حالها ماغلطت ضلت تحجيها عن طول لساني واني انا اللي مسوية بنفسي هيج عصبت منها رهف حيل وطلعتها من الغرفة وقفلت الباب بحجة تغيرلي ملابسي

رهف. حتي سناء صارت مثلهم الظاهر عيشتها ويه خالتي وبناتها علمتها النذالة والأنانية والحقد

شوي واجا صكر شايل جنطة مليانه علاج طلع إبرة وجهزها حتي اخذها وطلع انواع مراهم وكال هاي لظهري وانواع ثانية لوجهي راد ينطيني الإبرة ماوافقت وكمت اطرده بس ماوافق لا آخذ الإبرة وهو يطلع استسلمت لان ماكو غيره بالبيت يعرف ينطي الابر غمضت عيوني حيل وهو انطاني الإبرة ووصي رهف تدهنلي ظهري بالمرهم وتمرغه الي وطلع
نمت علي بطني ورهف حطتلي الدهن وهي تدلك بيه ظهري

طبعا الالم لايطاق بس صبرت حتي اخف وارتاح خلصت وغيرتلي ملابسي ونزلت تحت تجهزلي الاكل شوي شوي حسيت ظهري ارتاح من مفعول الإبرة والدهان
جابتلي عشه رفضت اكل مالي نفس ضلت تحاول وياي وانا رفضت وأخذت الصينية ونزلت بعد ماانطتني علاجي ودهنت وجهي وراحت لبيتها

اجتي رهف ثاني يوم من الصبح وياها بنتها ماشاء الله كبرانة وصايرة مثل الكمر جهزلتي ريوك وماخلتني الا لما اكلت طبعا صكر بعد ما راحت رهف بالليل اجا عندي يطمن علي بس سويت حالي نايمة وهو نام عالقنفة اللي بالغرفة وانا من تعبي مانمت كل الليل بس ماتحركت ولا سويت صوت حتي لايكعد لاني مااريد احجي وياه وحتي الصبح قبل لايروح دوامه دخل حاول يكلمني وضل يكول انو انا السبب بس مارديت عليه نزلت رهف الصينية وطلعت عندي مرة ثانية فاتحتها بموضوع انو انا اريد اوصل لخالتي حتي اتحرر من صكر بس هي شكلها ضاجت وضلت تنصح بيه مااسوي هيج خطوة ردت اكول الها ايهم يساعدني لما شفت رفضها ماتكلمت وقررت اكول لايهم

يساعدني من دون ماتدري لان هو الوحيد اللي يكدر يوصلني لخالتي ضلت عندي طول اليوم وبعد الضهر صكر رجع من دوامه وحاول يحاجيني مرة ثانية بس مارديت عليه بهالفترة صارت فكرة الموت مسيطرة علي دماغي يعني اريد اوصل لخالتي وتساعدني وارجع اكول لا الموت راح يحررني من كل هالشي

رهف جانت تدهنلي ضهري الصبح وبالليل بعد ماترجع بيتها صكر هو اللي يدهنلي برغم ارفض واضل اصرخ بس ماكو فايدة مر كم يوم وصرت زينة وضليت افكر كيف راح اكلم ايهم يساعدني جنت مفكرة رهف راح تكون الوصل بينه بس اول ماعرفت اريد خالتي رفضت

نزلت تحت لكيت ام اخلاص وعمتي وسناء واخلاص كاعدات وابني علي ايد ام اخلاص اتنهدت وضليت اتحسب بكلبي يعني هاي الحية تشيله وهو مايكربلها اي شي وانا امه انحرمت منه دخلت المطبخ ولا كأنهم موجودين وجهزتلي ريوك وصبيت الي كوب جاي كعدت بالمطبخ اتريكت وطلعت وانا مارة من يمهم سمعتهم يستهزئون

اخلاص. والله ناس ماعندها كرامة لو انا منهم مااكدر اكل بعد الكتلة اللي اخذتها

ام اخلاص. ههههه اي والله الله يريحكم من هيج شكولات

ماتكلمت ولا التفتت حتي عليهم طلعت للحديقة اللي ورا البيت كعدت شوي شفت صكر جاي من ناحية الديوان رايح عالبيت شافني كاعدة عالمرجوحة اجا لعندي

صكر. كيفه الحلو شخباره

كعد يمي عالمرجوحة وحضني لصدره مااعرف بوقتها مامنعته ولا بعدته حاسة حالي مفصولة عن العالم مااعرف احساس غريب يخليك عندك لامبالاة لاي شي ضل يكلمني ويحاول يصالحني وبالاخر مل من سكوتي ودخل جوا خليت عيني عليه لحد مااختفي
ضليت كاعدة شوي شفت رهف دخلت من البوابة وايهم وياها وشايل همس الصغيرة اجو لعندي وسلم علي ايهم وضل يسألني عن صحتي وكيف صرت
اخذتني رهف وخلنا جوا وانا استنجد بايهم بعيوني وهو الظاهر لاحظ هالشي لان هزلي رأسه يمكن فهمني اريد منه شي وبهالحركة يعرفني أنه فهم اريد مساعدة منه

دخلنا جوا وهو راح للديوان ينتظر صكر شفت صكر يلاعب ابني وعلي ايد ام اخلاص استهضمت زعلت علي حالي كلهم راضيين باللي يصير طلعت لفوك من بسكووت ورهف كعدت وياهم يمكن تكون ملت مني ومن كثر كلامي بموضوع ابني كنت بهالفترة كلش حساسة يعني لو رهف مااجت بيوم احسها ملت مني
ولو كعدت عندهم شوي احسها راضية باللي يصير
احساس الغدر صعب كلش صعب وكل اللي حوليه غدروني وماباقيلي الا رهف

صرت اشك بكل شي تسوية وهي ماكانت تقصد اي شي ولا اي شي من الي براسي صحيح بس انا هيج عقلي صورلي ايهم عزمنا لبيتهم ثاني يوم عرفت سوا هالشي حتي يعرف الي أريده منه رحت انا من الصبح وداني صكر حتي اساعد رهف وعمتي واخلاص كالو راح يجون بعدي ضليت مع رهف بالمطبخ اساعدها لحد ما ايهم صاح لرهف تطلع لهمس لا تبجي طلعت هي لهمس وايهم اجا لعندي

ايهم. صاير شي همس البارحة حسيت عيونج تنطق وتطلب مساعدة

همس. اريدك تساعدني ايهم الله يخليك ماباقيلي أحد اعتمد عليه الا انت

ايهم. كولي همس واللي تردينه يصير

همس.اريد اوصل لخالتي الله يخليك ساعدني اوصللها حتي تجي تساعدني وتحررني منهم وأخذ ابني

ايهم. وهي وينها خالتج هاي

همس. اللي أتذكره أنو هي جانت بتركيا عايشة مع خال ماما

ايهم. ماشي انطيني اسمها وانا اللي صديق بتركيا راح اخليه يساعدني

انطيته اسم خالتي واسم خال ماما اتذكر ماما ذكرت اسمه كدامي مرة وانا صغيرة حلفلي راح يبذل كل جهده ولو تطلب الأمر يسافر يدور عليها بنفسه وايد قراري بشدة لأنه شايف اللي يصيرلي وماحدا منهم كدر يرجع صكر عن قراره أكدت عليه مايجيب طاري لاي واحد حتي رهف لأنها رفضت الفكرة حتي وعدني مايجيب لاي واحد سيرة وطلع تنهدت وضليت ادعي يكدر يوصلها اجو بعد الظهر عمتي واخلاص وصكر وام اخلاص وسناء وزوجها وجهالها تغدينه ورجعنا للبيت
بعد يومين راحو ام اخلاص وسناء وزوجها

مرت ايامي بهالشكل وزادت شكوكي وتفكيري انو رهف صارت تكرهني مثلهم سيطر علي
ماجنت ادري أنه هالشي بداية دمار نفسي ومرحلة مرض نفسي خلاني أفقد حتي الفرحة بكل شي وصرت مثل الميتة

ابني يكبر كدامي يوم بيوم ومااكدر اقترب منه لأن صكر مانعني عنه بسبب عنادي وياهم وانو انا اسوي مشاكل كل شوي
صحيح انا بهالفترة صايرة اراددهم واسوي كل شي بالعناد يعني لو كالولي سوي هالشي مااسوي ولو صكر ضربني حتي اسوي شي اخربه يعني بيوم عمتي كالت اسوي غدا عاندت ورفضت بس صكر كان بالديوان اتصلت عليه واجا الي وحلفلي لو ماسويت اللي تريده امه الا يضربني نفذت رغبته بس حلفت لاخرب كل شي رحت سويت الاكل وعمتي كالت اسوي الدجاج بالفرن شويته وعلي عنادهم خليته يحترك والأكل كثرت الملح عليه خليته ماينوكل من كثر ماهو مالح

اجو ياكلو انصدمو من الاكل مااكلو منه وعمتي تضلت تغلط عليه وانو انا مسوية هالشي بمزاجي انا طبعا حبيت اضايقها وكلت ايه مسوية بمزاجي ولوغصبتوني علي اي شي مرة ثانية راح اخربه وصكر بس سمع اتخبل وكام علي ضربني وانا بس ادعي عليهم
مابيدي شي الا لساني ادافع بيه عن حالي

صارت كل ايامي بهالشكل انا اعاند واسوي مشاكل ويا عمتي واخلاص وهما كدامه مظلومين وهو يجي يشوفني ارادد يتخبل ويضل يضربني كل ايامي صارت تشبه بعضها ورهف صارلها كم يوم مااجت واجتي العصر الي اول ما شفتها طردتها حسيتها مثلهم وتكرهني واكيد ماتجي عندي كل يوم لهالسبب
هي استغربت مني وطلعت وتركتني ضليت ابجي واصرخ واكتم صرختي بالمخدة حاسة حالي راح اتخبل بسبب اللي كنت أحسه احساس انو اخذو منك كل شي وفوك هالشي انك مكروه اصعب احساس وحاسة حالي وحيدة احارب لوحدي ماكو اي واحد بصفي واكبر دليل علي هالشي أن رهف حتي رفضت فكرة انو اوصل لخالتي وأترك صكر

طبعا لو مهما حبتني ماراح تحبني اكثر من اخوها
وايهم ماردلي اي خبر عن خالتي وانا من يوم اللي طردت رهف هي مااجت لعندي زعلانة مني
قررت اروحلها انا وادوس علي حالي حتي اوصل لخالتي رحت الها وهي شافتني ودارت وجها مني رحت عليها احضنها واصالحها وكعدت عندها شوي اجا ايهم ورهف تسوي الغدا سالته عن خالتي كال انو صديقه بتركيا يدور عليها واول مايوصل لشي راح يبلغني اتغديت عند رهف ورجعت للبيت لكيت اخلاص كاعدة وابني علي رجلها وهي تأكله بسكت منكعته بمي غصة بقلبي صارت ابني حبيبي يكبر عمره 6 شهور وكل مرحلة من حياته انا ماحضرتها وياه ولا راح يكون النا ذكرة بهالشي

جنت رايدة اصعد لغرفتي بس كعدت كدامها وهي تأكله وهو يضحكلها ويناغيها اجا صكر شاف ابنه كعد يم اخلاص وسيف شافه صار يشاور بايده ويضحكله
شاله وصار يلاعبه وسيوفي يضحك بصوت عالي
انا اضحك لأنه كبل ودموعي تنزل لان محرومة منه يعني اكو ابتسامة علي حلكي والدموع تنزل من عيوني أخذته اخلاص وراحت تغسله وصكر عينه علي ويتنهد انا ماحجيت ولا كلمة اعرف الكلام ماياثر بيهم
دخلت للمطبخ وانا كارهة كل شي

مسكت كوب اشرب بيه مي وكع من ايدي كعدت بالأرض المه مسكت كطعة كزاز وسرحت وعقلي يكولي هي الحل صرت اقلبها بين أيدي
واباوع لشرايين ايدي واكول بس اقطعهم راح ارتاح من كل هالعذاب دخل صكر شافني ماسكة الكزاز بهالشكل اقترب مني وعيونه كلها قلق

صكر. شنو هذا همس ليه كاعدة هنا وماسكة الكزاز هيج

اول ماكلمني صحيت من اللي اسويه كان عقلي كان فاصل وهو صحاني

همس. انكسر الكوب وانا المه

صكر. بس نظرتج غريبة همس شنو اللي يصير وياج

همس. ماكو شي بس افكر انو اكو اشياء كثيرة تحررني وانا مااستغلها

صكر. يا اشياء ومن منو تتحررين مني همس شوفي لو تفكرين تتطلكين انسي هالشي لانو مستحيل يصير انتي ملكي انا كلج الي

همس. بس روحي ملكي انا وقريبا راح احررها منك مو كلتلك الحرية بالنسبة إلي هي حرية روحي مو جسمي

حضني بكل قوته بعدته عني وطلعت من المطبخ وهو طلع وراي بسرعة شفت ابني يضحك واخلاص وعمتي يلاعبوه اتلفتت عليه وكلت

همس. اكيد راح اتحرر حتي مااشوف هالعذاب كل يوم وقطعة من كلبي بايد غيري وصاير ملكها
____________________________________
يتبع.
صوتو
للبارتات