رواية عآمـلوني گ فصـليه بقلمي ايمان محمد وٌ رين الزين الفصل الثالث والعشرون 23 - بقلم آلگآتبه تآج آلعرآق

____________________________________

تضحك عليه هي وام صكر واني كلبي ملجوم على شوفه وليدي

همس. الله ينتقم منكم والله لاكول لصكر عالي سمعته

ام صكر. ديلا علا أساس هو راح يصدقج هو يعرف انو انا معتبرتج بنتي وضلت تضحك هي واخلاص

طلعت من عندهم وانا مهضومة وحاسه حالي عايشة بغابة قربت اوصل غرفتي سمعت صوت ابني ديبجي بغرفة اخلاص رحت عالغرفة حاولت افتح الباب لكيته مقفول ضليت ابكي ونسيت زعلي من اخلاص وعمتي ونزلت بسرعة لغرفة عمتي

همس. عمة ابني ديبجي الله يخليج تعالي اخلاص افتحي الباب

اخلاص بضحك. عوفيه يبجي مالج شغل بي

ام صكر بحقاره. هو ابنها وهي حرة بيه تعوفه يبجي أو لا هالشي مايخصج
انصدمت منهم معقول قلوبهم سوده لهالدرجة لأنهم ياذون ابني حتي يوجعون كلبي

طلعت من عندهم وسمعت عمتي ترزل اخلاص كيف عايفه الطفل بالغرفة لحالة وأنها اتكلمت بهالشكل حتي تضايقني وانو الطفل لازم تهتم فيه وماتخليه يبجي
دست علي كلبي وكعدت بالاستقبال حتي يحسوني مامهتمة لانو لو شافو كلبي محروك راح يزيدون باذية ابني

طلعت اخلاص من عند عمتي كالبة وجها باوعتلي سويت حالي مامهتمة طلعت هي لابني وانا دموعي نزلت وضليت ادعي عليهم وعلي كان السبب واخذ ابني طلعت عمتي كالت اكوم اجهز الغدا لانو صكر علي جيه كمت للمطبخ اجهز بالاكل واتذكر كيف كانت وانا حامل ماتخليني اكوم من مكاني هسه ظهرو وجوههم الحقيقية خلصت تجهيز الاكل وطلعت لغرفتي انتظر صكر يجي حتي احجي وياه واحجيله عاللي سمعته من عمتي واخلاص

شوي وسمعته تحت يناديني بصوت عالي ومضايق
كمت من مكاني ونزلت تحت لكيت عمتي كاعدة يمة تبجي واخلاص تطبطب علي كتفها نزلت اول ماشافني
صكر. تعالي هنا

اجيت عنده
همس. نعم

صكر. انتي شلون تغلطيم علي امي وترمين صينية الاكل بوجها

انصدمت من كلامه
همس. منو اللي غلط عليها انا ماغلطت مع احد والله

ام صكر بدموع. ليش اسوين هيج يمه مو انا معتبرتج بنتي ليش اتغيرتي هيج

همس علت صوتها. انااااا يمتى غلطت عليج ورميت الاكل بوجهج لاتجذبيييييين

اجا صكر ضربني علي وجهي بضهر ايده
صكر. نصي صوتج ولج منو الجذابة والله اكطع لسانج سمعتي لو لااا

ام صكر. مو انا دزيتلج اخلاص تصيح عليج تتغدين ومارضيتي تنزلين وانا بنفسي طلعت لعندج ونزلتج وياي وجهزت صينية بغرفتي حتي نتغدي انا وياج وانتي دفرتيها عليه وكمتي تصيحين وتغلطين وياي

همس. والله ماصار انتي تسوي كل هالشي حتي لا اكول لصكر عالي سمعته منج انتي واخلاص
والله سمعتهم يكولون انهم يحركون كلبي علي ابني وان هي ماتحبني وسوت هالشي حتي تاخذ ابني مني وتنطيه لهاي العاااكر

مسكني من شعري حسيته تقطع بيده حاولت ابعد ايده وانا اصرخ وهو كان يزيد ضغط علي شعري

ام صكر. عوفها يمة لاتاذيها جاهلة انا ماكلت الك حتي ماتضربها والله بعد مااكلك علي شي

صكر ... وانا لو مادخلت غرفتج لكيتج تبجين والأكل مطشر عالكاع والغراض مكسرة ماكنتي كلتي عاللي صار والله الا اعيد تربيتج من جديد صارلج فترة وكحة ومامكدور عليج

همس. اتركنييييي انا ماسويت شي
بس والله ماراح اسكت وراح اخربها عليكم كلكم حتي اخذ ابني من عيونكم

ضربني صكر علي وجهي وسحبني لغرفة عمتي لكيت صينية مرمية بالأرض والصحون مكسرة والأكل عالارض ومدمرة الزولية

صكر. تعالييي لهنا نظفي اللي سويتي يلا

همس. انا ماسويت شي وماراح انظف اي شي
حسيت صكر راح ينفجر نزع حزامه وضل يضربني وانا اصرخ وادعي عليهم وهو يزيد بالضرب اجتي رهف وايهم بعدو صكر عني وهو يبعدهم ويريد يرجع علي يضربني وانا من كتر الظلم اللي ظلموه الي حسيت حالي فاقدة وضليت ادعي عليهم بقلب محروق اجتي رهف حطت ايدها علي حلكي حتي اسكت لان كل مااشتم صكر يتخبل بالزايد بعده ايهم عني وطلعه برا وهو يتحلفلي سندتني رهف وطلعتني من غرفة عمتي لكيتها كاعدة ورافعة تك حاجب واخلاص واكفة يمها وعلي وجها ضحكة خبيثة اول ماشفتهم دعيت عليهم

همس. روحو الله ينتقم منكم ولاتتهنون بحياتكم كل هالشي لاني اريد ابني وانتو حرمتوني منه الله يحرمكم ويحرك كلوبكم مثل ماحركتو كلبي

رهف. خلص تعالي لايسمعج صكر ويرجع هم

سندتني طلعت لغرفتي دخلتني للحمام غسلتلي وبدلت ملابسي كعدت يمي عالجربايه تسالني عاللي صار لانها اجت من بيتها علي صوت صراخي حجيتلها اللي سمعته من عمتي واخلاص وحجيت الها عاللي كالوه لصكر وضربني ضلت تتحسب علي اخلاص وكالت انها راح تحجي ويا عمتي كعدت يمي شوي وخلتني ونزلت رهف بالرغم هي مصدكتني بس ماانطت بعمتي ولا جابت طاريها حتي ولو هي غلطانة اكيد امها مو معقول تغلطها لخاطري كعدت افكر باللي راح اسويه حتي ارجع ابني فجأة اتذكرت خالتي وفكرت لو اجت اكيد راح تساعدني بالرغم انو هي عمرها ماسالت عني بس انا محتاجتها هسه
ضليت افكر شوون راح اوصل الها ......
..............

رهف
بعد سبوع ابن همس واللي صار فيه ضلت همس فترة مريضة بسبب جرحها والخياط مر شكم يوم وفكت خيط العملية وصارت زينة جنت اروحلها كل يوم اشوفها
صارلها 35 يوم  هسه والدة وانا صارلي كم يوم مارحت الها لان بنتي مريضة ومشغولة بيها سمعت الضهر صراخ همس طلعنا نركض انا وايهم لكينا صكر يضربها وامي واخلاص واكفات يباوعن بعد ايهم صكر عنها وانا سندتها لغرفتها وحجتلي عاللي سمعته من امي واخلاص انا صدكتها بس وضليت اتحسب علي اخلاص لانها سبب بكل اللي صار وعدتها راح احجي ويا امي نزلت لامي لكيتها كاعدة بالصالة وسيف علي أيدها واخلاص تنظف غرفتها

والله لو تدري همس أن ابنها هنا راح تجي ركض وتنسي كل شي حتي تشوفه انا ادري انها متعذبة بسبب ابنها وكلنا حاولنا نرجع صكر عن قراره ويرجع ابنها بس رفض وصارلهم فترة مايخلوها تشوفه حتي بحجة أن الطفل لازم يتعود ويتعلم علي اخلاص بس حتي يعرف هي امه ولو كل شوي شاف همس مثل اخلاص راح يتشتت ومايعرف امه منهي

طبعا عذر واهي وحجة من اخلاص حتي تمنع همس تاخذ الطفل وصكر مفكر همس بيوم راح ترضي بالي صار وتعوف ابنها عادي وراح تخلف طفل ثاني وتعيش وخلص بس همس ماراح تسكت انا ام واحس بيها اكيد ماراح تتنازل عن ابنها بهالسهولة رحت عند امي كعدت يمها شفت سيف كاعد ومفتح عيونه وامي فرحانة بيه وتلاعبه

رهف. شفتي عيونه ولونها مثل همس كانها عيونها بالضبط هالشي اللي ماراح تكدرو تنكروه أو تخفوه

ام صكر. وهي همس بس اللي عيونها خضر

رهف. لا مو هي بس بس همس لون عيونها مو اخضر لون زمردي وابنها نفسها بالضبط يعني اللي مايعرف انو ابنها بس يشوف عيونه راح يعرف لحاله

اخلاص. هااا ابنها ابن منو حبيبتي هذا ابني انا مو ابن همس

رهف. تضحكين علي حالج مو

اخلاص. لا والله انتو اللي تضحكون علي حالكم ومصدكين انو راح تكدر همس تاخذه مني

ام صكر. سيف ابنج انتي اخلاص وماحد راح يكدر ياخذه منج وانتي رهف كافي كلام بهالموضوع مامليتو
رهف. حتي لو احنا ملينا من الكلام همس ماراح تمل من المحاولة انو تاخذ ابنها وكل خططكم راح يجي يوم وتنعرف

ام صكر. خطط شنو

رهف. حنانج وحبج لهمس ودموع اخلاص الجذابة  كان خطة حتي تكدرون تستعطفون صكر وتخلوه ينطيكم طفل همس مو

ام صكر. حلو هالفلم وين شفتيه حتي اتفرج عليه انا واخلاص هم

رهف باوعتلها. تستهزئين صح ارجعي بالي تسويه يمة الله مايرضي بالي جاي تسووه لهاليتيمة

ام صكر. واحنا شنو اللي سويناه والله يالله

وتركتني ودخلت لغرفتها هي واخلاص هزيت راسي منهم ومن اللي يسوونه رجعت لبيتي لكيت عمتي نايمة يم بنتي وايهم مو موجود اكيد كاعد ويا صكر بالديوان يهديه
..........

همس
مر يومين ماشفت بيهم صكر جان ينام يم اخلاص وابني صارلي فترة ماشفته حتي قبل المشكلة اللي صارت  ماشفته لان اخلاص ماتطلعه من الغرفة اوقات تخليه عند عمتي ويقفلو غرفتها حتي مااشوفه ثاني يوم الصبح دخل صكر لغرفتي وكالي اغير ملابسي حتي نطلع مارديت عليه ولاطايقة حتي اسمع صوته والحب اللي كنت احبه لصكر بدأ يتحول لكره هسه

صكر. مو كلت كومي غيري ملابسج

مارديت
اجا لعندي وتنهد وكعد علي ركبه كدامي

ومسك ايدي سحبت ايدي منه
صكر. يعني انتي الغلطانة وماعاجبج وزعلانة فوكها
رفعت عيني عليه

همس. انا الغلطانة هاااا شنو تريد صكر

صكر. كومي حتي نروح عدكتوره اليوم صارلج 40 يوم والدة ولازم تروحين عندها تنطينج حبوب حتي مايصير عندج حمل لان انتي ولدتي عملية غلط تحملي هسه

همس. لاتخاف ماراح يصير حمل لان انا راح اتطلك منك صكر انطيني ابني بس ومااريد اي شي ثاني

صكر. اممم كلتي تطلكين مو شوفي الطلاك هذا تنسيه لأنه ماراح يصير انتي راح تضلين باسمي وملكي طول عمرج

همس. تدري شنو هي الحرية بالنسبة إلي

صكر. شنو هي

همس. الحرية مو حرية جسد الحرية عندي هي حرية روح يوم اللي اريد اتحرر منك صدكني ماراح يهمني جسمي راح احرر روحي منك

صكر. مافهمت بس صايرة فيلسوفة

همس. مو مهم تفهم هسه بس اكيد راح يجي يوم وتفهم كلش زين

صكر. ولحد مايجي هاليوم كومي حتي نروح عالدكتوره

همس. ماراح اروح لمكان

صكر. براحتج انا راح اكلمها وأخذ منها اسم حبوب مناسبه الج

وخلاني وراح

ضليت ابجي اساسا حياتي بهالفترة كلها دموع طلعت من غرفتي يمكن المح ابني أو اشوفه نزلت تحت لكيتهم كاعدين كلهم وصكر وياهم وابني علي ايده
والله بلحظتها نسيت كل شي ونسيت نفسي حتي
واخذتني رجلي لعند صكر رفع وجهه شافني اتقرب عليه وعيوني علي ابني

وصلت عنده وشفت ابني يااااالله حسيت كان روحي ردتلي هاللحظهاجيت أخذه منه رفض لاني عاندته فوك وهو يردلي هالشي هسه بابني كعدت علي ركبي كدام صكر هسه الأدوار تبدلت هو من شوي كان كاعد علي ركبته كدامي وانا هسه حتي اشوف ابني
مو مهم مستعدة اكعد تحت رجليه حتي بس اخذ ابني
قربت وجهي لابني شميت ريحته مليت ريتي بريحته بوسته ومسكت أيديه الصغيرة بستها

نزلت دموعي علي ايده مسحتها وبوستها وشميته مرة ثانية اريد احضنه واضمه لصدري بس مانعيني عنه رفعت عيني علي صكر صارت عيني بعينه  لكيته يباوعلي وعيونه كلها شفقة وبسمة خفيفة علي شفته حسيتها بسمة حزن باللي يصيرلي

همس بهدوء. حرمتوني من ابني وخليتوني حتي اتمني اشم ريحته الله يحرمكم بالدنيا ويحرمكم تشمون ريحة الجنة مثل ماحرمتوني منه

وكمت طلعت لغرفتي وانا ابجي بهدوء

مرت الايام الي  بعدها وهما زاد خبثهم وياي كدام صكر طيبين ويحبوني ومن ورا يظهر كرههم وخبثهم
ابني حبيبي صار عمره شهرين واليوم موعد لقاحه
اخذه صكر واخلاص الصبح حتي يلقحوه وانا بالبيت علي نار خايفة عليه يتاذي شوي واجوي كنت منتظرتهم بالصالة اول ماشفتهم كمت عليهم أسأل علي ابني طمني صكر أن الطفل زين من يوم مشكلتي ويا صكر وانا مااتكلم معه ولا مع أي واحد بالبيت حاول اكثر من مرة يصالحني بس ماانطيته وجه وردت اروح لعند عمي عباس اكعد عنده واخليه يطلقني من صكر

بس ماكدرت اترك ابني واروح ولو أطلقت اكيد راح انحرم من ابني العمر كله بعد الظهر سمعت صوت سيف يبجي ومريض طلعت ركض من غرفتي لغرفة اخلاص فتحت الباب لكيته مقفول وابني يبجي من كلبه انا فكرت اخلاص معه بالغرفة وقافلة الباب حتي ماادخل واشوف ابني بس لكيتها جاية من وراي الظاهر كانت بغرفة عمتي

همس. وين جنتي وعايفه ابني يبجي افتحي الباب شوفيه ليش يبجي بالطريقة

اخلاص وانتي شلج شغل يبجي أو مايبجي لاتتدخلين
وضلت واكفة ومادخلت اله

دست علي كلبي مشيت من كدامها حتي لاتعاند وتضل واكفة وماتدخل اله دخلت غرفتي  قفلت الباب ووقفت وراه  شوي وفتحت الباب وباوعت من فتحة صغيرة اشوفها راحت اله ولا لأ لكيتها طالعة من الغرفة تركض وابني علي أيدها يصرخ نزلت وراها اركض دخلت غرفة عمتي تكولها سيف حرارته مرتفعة
أخذته عمتي منها وحاولت تسكته ماسكت اتصلو علي صكر شوي واجا كنت واكفة كدام باب  غرفة عمتي  وضامة ايدي لصدري وابجي احس انا المريضة مو ابني شافني صكر باوعلي ودخل بسرعة شاف الطفل كال لاخلاص تلبس عباية راح ياخذوه للطبيب  طلعت اخلاص تلبس وهو شاله ليما ماتنزل وطلع للسيارة وانا وراه ابجي

صكر. لاتخافين والله راح يصير زين الدكتوره كالت عادي راح ترتفع حرارته من اللقاح

قتربت من ابني وهو شوي يبجي وشوي يسكت لكيته بالكوة مفتح عيونه وشكله مريض بوسته لكيت وجهه ناار وبس ينشغ من كثر البجي اللي بجاه ياااعمري انا  أن شاء الله انا وانت لا من عمري علي عمرك ماما اجت اخلاص تتمشي وتعدل بحجابها زمخ فيها صكر تسرع الطفل مريض راحو وحسيت كلبي راح وياهم ضليت ادعي لابني يصير زين

ضلو اكثر من ساعة واجو جنت منتظرتهم كدام الباب ماكدرت ادخل واكعد والله لو انا المريضة ولا ابني يمرض نزل صكر ووراه اخلاص وشايلة ابني يمكن  نايم حبيبي

صكر.  ليش واكفة هنا همس

همس. ابني ابني شلونه الله يخليك طمني

صكر. ياعمري انتي والله صار زين هذا اللقاح جان رافع حرارته

همس. يعني يعني هو صار زين

صكر. والله صار زين حتي شوفي

اخذه من اخلاص قربه مني  أخذته منه ضميته لصدري وانا ابجي ضميته لصدري شوية كنت اريد ادخله بقلبي وجوا ضلوعي حتي ماحدا ياخذه مني

اخلاص. هاتي همس حتي اغيرله ملابسه وانطيه علاجه

اخذه مني صكر وانا احس اخذ روحي أخذته اخلاص وطلعت فوك عيوني عليها وهي طالعة بابني وابجي
حسيت صكر ضمني لصدره بعدته عني

همس. وخرررر عني كافي تعذبوني بايدك تعذبني وانت اللي ترجع تضمني

صكر. اهدي حبيبتي والله انا اللي اتعذب وانا اشوفج بهالشكل

همس. كله من ايدك صكر انت السبب لما حرمتني من ابني وخليت مرتك هي اللي تربيه

تنهد وراح للديوان لكيت ام احمد جهزت الغدا مالي نفس اكل من قلقي علي ابني صبت الاكل وعمتي اكلت واخلاص نزلت اتغدت بس صكر كال ماله نفس ياكل اعتقد الوحيدين الخايفين علي سيف من قلبهم انا وصكر اخلاص خوفها عادي احسها تمثل الخوف حتي وعمتي تكول كل الاطفال تمرض عادي

طلعت لغرفة اخلاص وهما يتغدو حتي اشوف ابني لكيت الغرفة مقفولة كالعادة وكفت شوي عند الباب حتي اسمع اذا ابني صحي أو بجي اكون قريبة عليه واسمعه ودعيت علي اخلاص الله يقفل بوجها ابواب الجنه مثل ماتقفل الباب حتي مااشوف ابني شوي وطلعت شافتني ابتسمت باستهزاء ودخلت وقفلت الباب وراها بقيت طول اليوم كلبي مشغول علي ابني ورايحة وراجعة كدام غرفتها العصر اخذت ابني ونزلت تحت وهو شوي احسن شافتني كالت

اخلاص. ههههههه من وقتها وانتي واكفة هنا

همس. واكف العمر كله حتي اطمن علي ابني

اخلاص. وشنو سويتيله مثلا وانتي واكفة لو كعدتي أو وكفتي نفس الشي

همس. هاد قلب ام شنو تعرفين عنه انتي انتي لاحملتي ولا تعبتي بولادة ولاشفتي الموت حتي يطلع ابنج للدنيا وكل هالشي علي قلبي مثل العسل في سبيل اشوف ابني بس

اخلاص. هههه وكل تعبج راح لان ابنج انا اللي أخذته
خليتهاا ومشيت كل شوي تحرك كلبي بالكلام الله ينتقم منها

ضليت لليل لا اتغذيت ولا حتي نزلت اتعشي صكر طلع لعندي جايبلي معه اكل حتي اتعشي بس رفضت ومانطيته وجه حلفني بداعة ابني اكل اكلت لكمة وكمت

همس. زين تعرف أنه ابني وتحلفني بي

مارد علي وطلع من جيب دشداشته شريط حبوب
انطاه الي وكالي كل يوم اخذ حبة من العلبه وماافوت يوم ماوافقت أخذه منه حتي ولا اعرف ليش هالحبوب

صكر. لاتعاندين همس اخذيها هاي حبوب لمنع الحمل كالت عليهم الدكتوره

حسيت بوقتها اتخبلت يريدني اعيش حياتي عادي وياه ولاكانو اخذ ابني مني

همس. مارااااح اخذ شي بعد عني كرهتك مااريدك
تريدني انسي كل اذيتك الي وضربك وابني اللي أخذته واتقبل كل شي عادي واكمل وياك والله ماراح يصيييير ولا راح يجمعنا انا وانت فراش واحد ابدااااا

بس كل كلامي راح مع الريح لما صكر مسكني وحط الحبة بحلكي غصب عني وشربني ماي خلاني ابلعها وماعافني الا لماتاكد اني بلعتها وصار يأخذ حقوقه مني وقت الي يريد حتي لو رفضت وكل يوم هو بايده يبلعني الحبة غصب وبعدها صرت انا اخذها كدامه لان بالحالتين راح اخذها مرت فترة بهالطريقة

وفكرت اكلم ايهم يدورلي علي خالتي ويحاول يخليني اتواصل وياهاا وان شاء الله اخلص منهم وأخذ ابني من عيونهم
____________________________________
يتبع.

بنات الروايه نسبه المشاهدات عليها كلش عاليه بس
التصويتات زيروو ليش يعني
من اتاخر بنشر بارت تكولن ماتلتزم بلمواعيد وما منطيه الروايه حقها ومن هلكلام ومن انزل بارت تقروه بدون ماتصوتون ليش يعني حبايبي من تقرون هلكلام صوتو لكل البارتات وواكتبو تم بكومنت على هذا البارت والي يصوت لكل البارتات يدخلي خاص بحسابي فيس ويطلب طلب يريده

بعضكم يمكن يعتبر هذا رشوه ويمكن يجاوز على كلامي بس احب اكول اتي ما ارشي متابعيني ولا ممكن افكر بهلشي بس كلت الي يصوت يطلب طلب لان اني حابه اشوف شتحبون تطلبوني وهالشي هم لاني احبكم

مع تحياتي الكم. رين الزين