رواية عآمـلوني گ فصـليه بقلمي ايمان محمد وٌ رين الزين الفصل السابع عشر 17 - بقلم آلگآتبه تآج آلعرآق

گلبي مـن آلفرح مـحروم آضـحگ وآلگلب مـهہمـوم

ظـلمـت آنسـآن يحبگ آحذر دعوه آلمـظـلوم

عندگ گلب تترگني تخلي آلدمـعهہ تعشـگني

آنآ آعتب على گلبگ آلمـفروض ينصـفني

آلمـفروض ينصـفني
____________________________________
كالت هالكلمتين وعافتني وراحت اللي اعرفه هي تكرهني شلون تجي عليه تباركلي وتدعي اكوم بالسلامة اجتي مرة عمو عباس كعدت يمي

سارة. كيفج حبيبتي

همس. الحمد لله عمة زينة

سارة. شلون جاي تعاملج هاي اللي اسمها اخلاص

همس. معاملتها زينة معاي حتي انا متعجبة عليها

سارة. الله يهدي يمكن عرفت معدنج وعرفت مالج أحد .. اهم شي انتي مرتاحة وسعيدة بحياتج حبيبة

همس. والله ماادري عمة بس احس ورا هالراحة ايام صعبة كلبي حاسني اكو شي حيصير مادري ليش

سارة. لاتفكرين هيج حبيبتي ان شاء الله ماكو شي

همس. ان شاء الله

جتي رهف هي وبنتها الصغيرة كعدت معنا ضلينا شوي وبعدها صبو الغدا اتغدينا و اغلب النسوان راحو وماضل بالبيت الا الكرايب ومن ضمنهم اهل اخلاص
اجتي عمتي ام صكر وام اخلاص واخلاص معهم كعدو كدامي وكامو يسولفون بصوت ناصي

ورهف ناولت الطفلة لعمتي تشيلها عنها شوي
وهي كعدت ويا أصدقاءها اللي اجوي الها من الكلية حتي يباركولها عمتي سارة راحت تساعدهم بالمطبخ واخوات ايهم معها يغسلون الاماعين ويعزلون المطبخ
ضليت كاعدة انا لحالي واجتي عماتي هناء وصابرين كعدو معي شوي ورجعنا لبيتنا ومعنا اهل اخلاص وعمتي صابرين لانو راح يباتو عندنا ويرجعو باجر باتو عندنا وثاني يوم راحو وام اخلاص ضلت عندنا وماراحت معهم

مرثلاث شهور وام اخلاص عندنا بهالفترة كرهت حالي حتي بسبب ام اخلاص والله كلامها مثل السم بمرة كنا كاعدين بغرفة عمتي وانا معهم وهي سالتني
ام اخلاص. كوليلي همس ليه صكر منعك تكملي دراسة

همس. والله خالة هو يكلي ما يريدني اطلع كل شوي والناس تضل تباوعلي
هزت أيدها ماعجبها الكلام

ام اخلاص. متأكدة هو هذا السبب . يعني راح تضلين طول عمرج بالبيت وماراح تطلعين منه ولا راح تكملي دراسة

همس. لا هو واعدني ارجع لدراستي العام الجاي بس مااعرف اذا راح اكدر أو لا لان حيكون معي ابني ماراح اكدر اعوفه

ام اخلاص. ههههههههههههههه اي راح يكون معاج طفل اكيد ابوج وامك قبل لايموتون كان عندهم. حلم انو يشوفون اطفالج بس يلا مالهم نصيب ههه تدري ابوج ظلم اختي وماوافق يتزوجها وهو يدري انو هي تحبه واختار امك بس الله طلع حوبة اختي منهم وماتو اثنينهم وماتهنو بحياتهم
جانت تتكلم وعيونها تنكط حقد وكره

حسيت بغصة بقلبي شلون تحجي عن اهلي هيج وشلون تتشمت بموتهم

همس. بس بابا بعمره ماظلم اي احد ليش تكولين عنه ظالم وتتشمتين بموته وموت ماما الموت مابي شماته
وتركتهم وطلعت لغرفتي ابجي من كلامها
عمتي ام صكر واخلاص كاعدين مبتسمين علي كلامها وعلي طريقتها معاي حسيت حالي كاني غريبة عايشة بوسط عالم مااعرفهم من هاليوم وانا احاول ابعد عنها لأن كل مااشوفها اتذكر كلامها عن اهلي وكرها بالزايد صكر بالفترة هاي مشغول بدوامه وبالديوان مانشوفه الا اخر اليوم

اليوم موعد متابعتي عند الطبيبة وصكر كايلي يجي العصر حتي ياخذني اتصل علي العصر حتي البس واجهز حالي لبست ونزلت عند عمتي تحت انتظره يجي لكيتها لابسة عباتها وكاعدة واخلاص وامها بغرفة اخلاص
ام صكر تعاي حبيبة

همس كعدت يمها وهي حضنتني وضلت تكولي ماازعل من كلام ام اخلاص لانها مقهورة علي اختها لأنها اتزوجت واحد ماتحبه وتعبانة بحياتها لان زوجها مو زين وياها وحتي اتزوج عليها هي تحجي وانا اهز براسي بعمري ماراح اسامحها علي كلامها عن اهلي
اجا صكر. يله خلصتو حتي نروح

ام صكر. ايه يمة خلصنه

طلعنا ركبنا بالسيارة صكر
الفترة اللي مرت جنت احس بعيونه نظرة شفقة وندم وكل فتره يسألني عن شعور اخلاص وانو هي ماراح تصير ام بس صارله فترة عادي ورجع لطبيعته
كلت بنفسي اكيد جان عنده مشاكل بدوامه متل ماجان يكلي وصلنا العيادة دخلنا انا وعمتي وانتظرنا دورنا ودخلنا للطبيبة ضلت تسالني مثل كل مرة عن صحتي وعن حركة الطفل وهالاشياء وسوتلي سونر وطمنتنا انو صحة الطفل زينه وانو انا بنص الثامن تشكرنا منها وطلعنا رجعنا عالبيت عمتي بالطريق كالت لصكر انو ضللي بس ثلاث شهور والمفروض نجهز للطفل
حسيت بفرحة أخيرا ابني راح يجي وانا راح اجهزله

صكر. ماشي يمة باجر اخذكم للسوك وتطيبون التريدو
فرحتي انو راح اجهز لطفلي ماطولت وصلنا للبيت ودخلنا وصكر معنا لكينا اخلاص وامها كاعدين بالهول
سالت اخلاص عن وضعي انا والطفل طمنتها وعمتي رجعت فتحت موضوع تجهيز الطفل مو اتفقنا راح نروح للسوك باجر شو اللي خلاها ترجع تفتح هالموضوع
ام صكر. اخلاص راح تجين معاي انا وصكر باجر للسوك حتي نجهز للطفل لان همس ماراح تجي
التفتت عليها مصدومة منو كال ماراح اجي

همس. بس انا راح اروح حتي اشتري اللي أريده لولدي

ام صكر. واحنا راح نشتري كل شي حبيبتي وكل اللي تريدي راح نجيبه انتي مو زين عليج فرة السوك وخاف تتعبين

همس. لا تخافين ماراح اتعب

ام صكر. لا حبيبة اخلاص هي اللي راح تروح معاي مو صكر
كل هالكلام وصكر ساكت ماحجه شي

همس بدموع. صكر اريد اروح انا اجهز لابني
باوعلي شوي وحسيت لثانية بعيونه نفس نظرة الشفقة بس ماطول شوي وكال

صكر. خلص همس انتهينا اخلاص هي اللي راح تروح

اخلاص. الله لا يحرمني منك صكر والله همس راح اشتري كل اللي تريديه

ام صكر. لاتزعلي هموسة انا من خوفي عليج منعتج من روحة السوك

ام اخلاص كاعدة وعيونها تنطق فرح تركتهم من دون كلمة وصعدت لغرفتي وانا ابجي تمددت عالجرباية وضليت ابجي اجا صكر وراي وعدلني وحضني بعدته عني وانا امسح بدموعي

صكر. لا تبجين ياعمري انا خليت اخلاص هي اللي تروح حتي افرحها شوي مو شفتيها كيف فرحت لما كلت اخلاص اللي تروح انتي تدري هي ماعندها طفل وانحرمت تجهز للطفل مثل كل الامهات

همس ببكاء. ايه فانتو ماردتو تحرموها من هالاحساس وخفتو علي مشاعرها بس انااااا حرمتوني انا من هالاحساس حرمتوني اصير مثل كل الامهات ردتو سعادة اخلاص بس منو يريد سعادتي هاااا منووو

صكر. يعني احنا مانريد سعادتج همس كل هذا لانو اخلاص هي اللي راح تجهز للطفل

همس. بس هو طفلي انا ومن حقي انا اسويله كل شي

صكر. خلص همس كبرتي الموضوع ترا
مارديت

مارديت عليه ودخلت للحمام قفلت الباب وضليت ابجي بالحمام بقى يدك عالباب يريدني اطلع ويحاول يقنعني انو اللي سوا عادي مابيه شي بس مارديت عليه سمعت باب الغرفة انقفل عرفته طلع ضليت شوي وغسلت وجهي وطلعت نمت عالجربايه كل مااحاول ابطل تفكير مااكدر نزلت دموعي ضليت ابجي لما نمت ماحسيت الا ورهف يمي تمسح على شعري بحنية كمت مفزوعة حسبالي صكر لكيتها هي

رهف. اسم الله حبيبتي هاي انا لاتخافين

حضنتها وضليت ابجي وهي تواسيني
رهف. لاتزعلي حبيبتي والله صكر كلمني اجيج لانو انتي ما مبطلة بجي وكايلي على الي صار وانا والله غلطتهم وحاولت اقنعه انو تروحيم وياهم بس ماوافق من خوفه عليج

همس. لا رهف موو خوف علي خوف علي شعور اخلاص

رهف. الله لايوفقها هالاخلاص خلص لاتبجي مو زين عالطفل ولا عليج حبيبتي
ضلت تسولفلي عن بنتها وحركاتها اللي تسويها وعن ايهم شلون متعلق بيها وحاولت تخليني انزل معاها واكعد تحت بس انا رفضت

رهف. طيب انزلي تعشي واطلعي

همس. مااريد رهف والله انا حتى ماطايقه اشوف اي واحد هسه

رهف. علي راحتج ياعمري راح اجيبلج الاكل لهنا

همس. لا ماريد لاتجيبين شي

حاولت معي بس ماوافقت تركتني ونزلت لان بنتها جانت تبجي شوي ودخل صكر وبايده جنطة مالت اكل

صكر. رهف كالتلي أن انتي مانزلتي تتعشين كلت اكيد مشتهية لفات كص رحت جبتهم الج وكلت نتعشي سوا انا وانتي

همس بجفاء. شكر ماريد شي

صكر. هموسة ياعمري انتي والله كبرتي الموضوع مو فهمتج انا

همس. وانا ماحجيت شي سوي اللي تريده مو مهم همس مو مهم شنو اللي تحسه همس عسا الله ياخذ همس حتي ترتاحون كلكم

اجا حضني بكل قوته
صكر. لا تكولي هيج شلون تدعين علي حالج انتي تعرفين مالي حياة من دونج ياعمري تريديني اموت هااا

همس. لاا ماتموت من دوني لو جنت اهمك ماهانت دموعي عليك

صكر. حبيبتي والله اخلاص كابلتني وانا طالع لهنا وكالت لو همس رافضة انو انا اروح السوك اجهز للطفل ماراح اروح

همس. انا ماكلت هيج ولا منعت روحتها بس انا ردت اروح اجهز لابني وهي تروح ويانه عادي بس مو تمنعون روحتي وتخلونها هي اللي تروح

صكر. من خوفي عليج حبي خلص كافي دموعج مو مردتي كلبي

همس. يعني راح تخليني اروح

صكر. لا هموسة ماراح تروحين كلت موضوع وانتهى
درتله ضهري وضليت ابجي حاول يحجي وياي ويراضيني بس مارديت راح للحمام توضى واجه صلي
غمضت عيوني وسويت حالي نمت حتي يتركني وفعلا نمت من دون مااحس كعدت الصبح علي صوت اخلاص العالي وهي تنادي عمتي من فوك حتي تجهز لان راح يروحون حسيتها علت صوتها وصاحت عمتي حتي تسمعني صرت احس ورا معاملة اخلاص الزينة معي اكو حقارة وخبث مالكيت صكر يمي عرفته طلع حتي يروح معاهم

ضليت ابجي وأبجي لما حسيت خدودي تشككت من كثر الدموع نمت مثل الجنين ضميت رجلي كرب بطني ضليت بغرفتي مانزلت ضلو حوالي ساعتين او ثلاثة واجو سمعت هوستهم وضحك اخلاص وعمتي
شوي وفتح صكر الباب كعد يمي عالسرير رفع شعري عن وجهي ومسح على وجهي

صكر. مو كافي دموع ماتعبتي
مارديت

صكر. طيب يلا حتي تشوفين الغراض اللي اشتريناها للبيبي

دموعي مره ثانيه نزلت لما كال هيج اروح اشوف اغراض طفلي اناااا اللي هما اختاروها
ضل معي نص ساعة حاول وحاول معي بس انا لاحياة لمن تنادي رن جواله وراح سمعت صوت رهف كدام غرفتي أو غرفة اخلاص ماميزت وهي تتعارك وياهم كمت من مكاني حسيت حالي دايخة وجسمي نحلان سندت نفسي علي طرف الجرباية وعالحايط لما وصلت الباب طلعت لكيت صكر طالع الدرج وجاي عليهم

رهف بصياح. يعني انتو نفذتو اللي براسكم واختاريتو كل شي وماكفاكم رحتو كملتوها وخليتو غراض الطفل بغرفة اخلاص همين

ام صكر. ولج يمة وشكو بيها يعني خلينهاهم هسه بغرفة اخلاص ولما تولد همس راح ننقل كل شي لغرفتها

رهف. وليش تنتظرون حتى تولد انقلوهن هسه

ام صكر. لا ماراح ننقل شي

همه يحجون وانا ساكتة بس اباوع علي حياتي اللي يرتبوها علي كيفهم بس اللي زعلني اكثر شي وصدمني هو سكوت صكر عاللي يصير مامرة عارض اي شي هما يسوو أو يكولوه كانو موافق عاللي يصير عمتي ام صكر اجتي مسكت ايدي وسحبتني وراها حتي اروح لغرفة اخلاص اشوف اللي جابوه

ام صكر. تعالي يمة شوفي اللي جبناه للطفل

مشيت وراها كاني الة ماحجيت ولا كلمة حتي فتحت غرفة اخلاص وضلت تفرجيني شجابو وانا ساكتة بس اباوع

اخلاص. شوفي همس هذا الطكم شلون حلو انا اللي اختاريته حلو مو وباوعي هذا الكاروك وضلت تفرجيني وانا بس اباوع بسكووت

رهف حاولت تشيل ملابس الطفل وتنقلهم لغرفتي بس صكر منعها وهي خلت وطلعت رجعت لبيتها لأنها زعلت منهم

صكر. شو رايج هموسة باللي اشتروه حلو ولا تريدي اي شي ثاني

همس بصوت مبحوح. هو انا اختاريت شي حتي هسه تسالني اذا كان ناقص شي ثاني

ام اخلاص. مو كافي يعني من امس وانتي تبجين وضيعتي فرحتهم بلا هالعيارة الجذابة ودلع النسوان

صكر ... خلص خالة اتركيها
هزت أيدها

طلعت من الغرفه ورجعت لغرفتي كعدت علي طرف الجرباية اضغط علي عيوني وامسح بوجهي حتي ماابجي جابتلي عمتي ام صكر اكل وضلت تخوفني انو لو مااكلت راح يتاذي طفلي وممكن يصيرله شي خفت ليصير لابني شي واكلت لكمتين وشالت الصينية هي ونزلت برغم انو انا اكلت لما جابتلي الاكل بس انا زعلانة منها وكلامي معاها ثكيل لان حسيت حالي انظلمت لما حرموني اجهز طفلي واللي أتذكره انو رهف راحت للسوك هي وعمتي وجهزت طفلها وعمتي ماكالت الها مثلي ليش كالتلي انا هيج

ضليت يومين ماانزل تحت ورهف تجي الي وتحاول تخليني اكل شوي صكر بهاليومين اجا صالحني ووعدني بس اولد واصير زينة راح يخليني اشتري كل شي للطفل من جديد

سكتت واقتنعت بكلامه بس بداخلي حزن أنهم حرموني من هالشي بالاول وخلو اخلاص ام اخلاص لسة عندنا ماراحت اول مرة تطول هيج داخلة عالاربع شهور
هي جانت تكعد عدنا اسبوع او عشر ايام بالكثير
مر ثلاث اسابيع ودخلت بشهري صارلي اسبوع وكل شوي تجيني الام وتروح وعمتي تكولي هالشي عادي يصير وبيوم تعبت حيل وصكر أخذني

لدكتورتي وكالت انو موعد ولادتي قرب ولازم امشي دائما حتي تتسهل ولادتي صكر لما كان يشوف تعبي والالامي يضل يحضني ويتأسف ولما اساله ليش يأسف يكول لان مااكدر ارفع عنج هالالم بس حسيت مو لهالسبب هو جاي يعتذرلي اخلاص وياي وكل شوي تطلعني وتتمشى وياي صحيح مانسيت ضيقي منها بسبب اللي صار بس مابايدي شي مالي غيرهم لازم اتحمل اليوم صكر ماراح عدوامه ولا نزل للديوان بقى معاي ومحتار شنو يسويلي احس رجعت نظرة الندم مرة ثانية بس هالمرة اقوي من قبل كل مايشوفني تعبانة اجتي عمتي تصيح علينا نتريك وياهم
نزلت الدرج بمساعدة صكر لان احس حالي صرت مثل البطة مااكدر امشي حتي نزلت تريكت معهم وطلعت اتمشي بالحديقة شوي وصكر هالمرة هو معاي

همس. تدري صكر كل مايجي الوجع الي احس روحي تطلع مني وترجعلي بس كله يهون لعيون ابني حبيبي اكيد راح انسي كل هالشي مجرد مااشيله واضمه لصدري مو

صكر ارتبك. هاااا اي اي اكيد
سكت شوي وكمل تعاي نكعد هنا
رحنا كعدنا علي العشب اللي بالكاع
سندني هو كعدني ضلينا شوي ودخلنا جوا لكيت ام اخلاص كدامي

ام اخلاص. هااا همس الوجع لسة يجي ويروح ولا لأ

همس. ايه اوقات يجي وأوقات لا

ام اخلاص. ايه عالخير ان شاء الله

تركتني وراحت حتي سؤالها غريب مثلها
مر يومين بنفس الحال وباليوم الثالث وانا نايمة صحيت عالوجع القوي كان قران الفجر شغال حسيت اقوي وجع شفته كعدت صكر لأنه صار كم يوم يبات عندي يخاف اتعب بالليل

همس صكر صكر كوم تعبااانة الله يخليك
خطيه انتفض كام مفزوع

صكر. شكو همس شبيج

همس. تعبانة صكر راح اموت من الوجع الحكنيي فدوه

نزل لعمتي بسرعة كومها واجت هي سالتني كيف الوجع وانومثل وجعي بالايام اللي مرت

همس. لااااا عمة هذاا اقوي الله يخليكم راح اموت من الالم

صكر. يلا يمة لبسيها عباتها وانتي البسي وتعالن اني راح اشغل السياره

ام صكر. اي وليدي بسرعه لبستني وطلعنا من الغرفة لكيت اخلاص لابسة عباتها وجاية علينا حتي تساعدني وامها وراها واكفة

صكر. خليج انتي اخلاص مع خالتي شلون نعوفها لحالها

اخلاص. لا صكر الله يخليك راح اجي لا تنسي وعدك اليه صكر

ام اخلاص. روحو انتو لاتخافون علي شنو اللي راح يصيرلي يعني

حاولت اخلاص تساعدني انزل الدرج ماكدرت شالني صكر ونزلنا واخلاص راحت جابت جنطة بايدها الظاهر جنطة الطفل يالله حتي الملابس اللي راح يلبسها طفلي اول مايولد حرموني اختارها مثل كل الامهات

ركبنا بالسيارة عمتي كدام واخلاص معي ورا ورحنا للمستشفي طول الطريق انا اصرخ من الالم وصكر يسوق باقصي سرعة وصلنا للمستشفي الخاص اللي تشتغل بيه الدكتورة اللي متابعة معاها لكيناها منتظرة الظاهر صكر كلمها وشالني صكر ودخل للمشفي قابلوه الممرضين بالسدية والدكتورة معاي دخلت لغرفة الولادة وكلهم برا متانيني

اول ما دخلت غرفة الولادة حسيت بخوف ورعشة بجسمي وحسيت حالي محتاجة لامي بهالوقت اكثر من اي وقت فات نمت علي سرير الولادة والدكتورة تفحصني وانا اصرخ من الالم اللي يجي ضليت يمكن ساعة الم متواصل وماولدت لما حسيت حالي تعبت ومااكدر ارفع ايدي حتي غمضت عيوني من التعب واسمع صوت الدكتوره

الطبيبة. همس بنتي لاتغمضي ماما حاولي تدفعي حبيبتي همس همس

حسيت صوتها بعيد حيل سمعت اصوات متداخلة واحس اصوات رجلين تركض حولي
شوي وسمعت صوت صكر كانو ديبجي ويكول هموسة ياعمري تحملي حبيبتي وصيري قوية انا متانيج هنا لا تتاخرين عليه

انا سامعة صوته بس مااكدر ارد عليه مااعرف ليه احس حالي مثل الطايرة وجسمي مالامس الارض حتي الالم حسيته راح
................

رهف

جنت ضايجه حيل بسبب اللي صار مع همس وانو امي واخلاص ماخلوها تختار اي شي لطفلها وتعاركت معاهم وزعلت من صكر لما منعني اخلي الاشياء اللي تخص الطفل بغرفة همس ورجعت لبيتي
ثاني يوم رحت لهمس بس لسة زعلانة منهم
وصكر صالحها بس احس اكو غصة بقلبها ماراح تروح
صارلها كم يوم تعبانة واليوم من بعد الفجر كمت اصلي ومااعرف ليش حسيت بخوف علي همس انا اعرفها تكون كاعده بهالوكت تصلي الفجر دكيت علي جوالها اكثر من مرة ماردت

ايهم. شكو حبي ليش تتصلين عليها هسه

رهف. مااعرف ايهم كلبي مقبوض وخايفة عليها وهي ماترد

ايهم. اكيد نايمة لاتخافين

رهف. لا لا لا رهف لازم تكوم تصلي الفجر راح اتصل علي صكر والي يصير يصير

اتصلت علي صكر ورد وعرفت أنهم بالمشفي همس دتولد خفت عليها حيل ولبست بسرعة وطلعت. انا وايهم وأخذت همس الصغيرة لبيت عمي صالح
رحنا للمستشفي لكينا امي واخلاص وصكر واكفين وصكر شكله خايف عليها ورايح وراجع يدعي رحنا عليهم سألنا كالو لسة جوا صارلها اكثر من ساعة وما طلعت شوي وطلعت الطبيبة وكالت انو همس ولادتها متعسرة ولازم تسوي عملية لأنها تعبت جدا وهي هسه تعتبر فاقدة الوعي وانو سنها الصغير يعتبر سبب رئيسي بتعبها وتعسر ولادتها

ام صكر. يعني الطفل زين ماراح يصيرله شي
التفتنه عليها استغربنا كلامها

ام صكر. هااا ا ا اقصد يعني ماكو خطر عليها هي والطفل
هااي اول مرة بعمري اشوف صكر خايف هالكد وافق عالعملية وطلب من الطبيبة انو يدخل يشوف همس دقيقة دخل الها وطلع عيونه حمر كأنه باجي ضليت ابجي وادعيلها الله يكومها بالسلامة

رهف. ان شاء الله راح تصير زينة صكر لاتخاف

صكر بصوت مخنوك. ماشفتيها رهف والله شكلها يوجع الگلب ووجها اصفر من كثر التعب الله يكومها بالسلامة ياااارب ومايصيرلها شي

رهف. ان شاء الله خوية ان شاء الله

مر حوالي ساعة وطلعت الممرضة بايدها الطفل ناولته لصكر سألنا علي همس طمنونه أن هي زينة بس الدكتورة دتخيط العملية شوي وتطلعها صكر من كثر فرحته بالطفل عيونه دمعت ضل يبوسه ويحضنه واذن باذنه واخذته منه امي وهي فرحانة بي واخلاص واكفة يمها شالت منها الطفل وحضنته وضلت تضحك من فرحتها هي وامي اول مرة اشوف واحدة تفرح لضرتها

صكر انشغل بعدها بهمس وهما اخذو الطفل كالو راح يضل بالخدج شوي ويطلعوه حتي يطمنون عليه طلعو همس بغرفة عادية ورحنالها كان شكلها تعبان حيل ووجها اصفر ضلينا كلنا يمها وبدأت تصحى شوي وسألت علي ابنها كلنا الها بالخدج اجتي الممرضة وكالت راح يطلعون الطفل طلعت امي واخلاص عليها بسرعة
صحت لامي على صكر وهي شايلة الطفل طلعت وراهم

ام صكر. يمة اخلاص راح تاخذ الطفل وترجع للبيت

صكر ضل ساكت وبعيونه كل هم الدنيا
رهف. وليش تاخذه مو امه هنا خلو هنا اكيد همس راح تسال عليه مرة ثانية

ام صكر. هاا مو المستشفي مو زينة عليه وكلها امراض وممكن يتعب

رهف. لا عادي لما ولدت بنتي ضلت معاي بالمستشفي لاتخافين

صكر حجه. خلص رهف يلا اخذيه اخلاص وارجعي للبيت

باوعت على اخلاص عيونها تشع من الفرحة

رهف. لااا ماراح تروح شلون تاخذه يعني ولو همس سالت عنه شنكولها

صكر. عوفيها تروح رهف هسه أو بعدين راح تاخذه اخلاص انا واعدها والافضل همس ماتشوفه هسه حتي ماتتعب ولو سالت عنه راح نكول لسة بالخدج حتي تتحسن صحتها شوي واكولها

وكفت مصدومة من كلامة وصدمتي الاكبر لما كال
صكر. يلا اخلاص اخذي ابنج وارجعي عالبيت....
____________________________________
يتبع ...........

كتبته وانا عيوني مدمعه من هالناس الي متخاف الله
معقول اكو بشر هيج تحرم ام من شوفه ابنها هالشكل لا وبكل صلافه ينطوه لضرتها والله ماعرف شحجي وشكول ماكدر اكول هسه الا حسبي الله ونعم الوكيل بهيج بشر ميرحمون
ياناس الله كال (واما اليتيم فلا تقهر)
هذوله شنو من بشر مارحمو بحال هاليتيمه ولا قدرو صله الرحم والقرابه بينهم الله يبرد كلبها بس ادعولها

صووتو للقصه حبايبنه
وبآلمـنآسـبهہ آگو قصـهہ گلشـ حلوهہ وصـلتني ورآح آبدي بگتآبتهآ ورآ مـآ آختم هہآي آلروآيهہ
مـتأگدهہ گلشـ حتعجبگم
آنآ جذبت آنتبآهي لآن لآحظـت آنهآ مـختلفهہ گل آلآختلآف عن آلروآيآت آلبآقيهہ
لآهي فصـليهہ
ولآهي زوآج بآلآجبآر
ولآهي نهوه
ولآهي هديهہ
تختلف گل آلآختلآف عن آلروآيآت آلحآليه
آنتظـروني بيهآ بعد گتآبه هہآي آلروآيه بشـهر آنشـر آول بآرتآتهآ بسـ آگو آعلآن وآقتبآس مـمـگن آنزلهہن بأي وقت
وآي شـخص عنده قصـهہ تعبر يريد ينشـرهآ خلي يحجيني على حسـآبي آلفيس آسـمـهہ
(شہيہخہهہ آلبہنہآتہ) تلاكوه بكروب زهراء الحسناوي وهم تلاكوه عند ايمان محمد صديقتي الي نكتب اني وهي هاي الروايه تكدرون تكولولها وهي تنطيني خبر واكو الخاص مالتي هنا بلواتباد

مـع تحيآتي آلگم. رين آلزين