مراح تغلبني لو الحب غلاب
من حضرتك عشان قلبي تذله
((منقول))
،،
،،
،،
،،
اسامه وهو يناظر جهة ....ريوف ..وبأبتسامه مزيفة :
وهذي تجي .. أروح بدونها. ..
ريوف
انصدمت أكثر من رده توقعت يتحجج ..بشيء. .
ولا يدبر عمره عشان ماروح معه بس قال شيء ماهو متوقع
نزلت نظري للأرض. ..مدري وش اقول رفعت رأسي على سؤال العمه
صيته : هاوش رأيك ي ريوف ..والله راح تنبسطي
في أجواء الديرة أحسن من هالكتمه عايشين فيها وناظرت ام اسامه الله يهديك حرمتي أخوي.. من هالاجواء بسكنك في المدينه
ام اسامه ودها تقول لها أخوك. .ماهو مقصر بس هاج ..للبر
بس لا مستحيل .تشمتها فيها وأكيد بتقول ماهو مرتاح .تنهدت بصبر.. وهي تتدعي الله يفكها من لقوفهن على خير قالت بجمود : يالله كل وأحد ينام على الجنب اللي يريحه وأخوك لو ماهو مبسوط كان عمر هنا ...وسكتت ماتبي تزود كلمه ثانيه .ماهي
ناقصة ...زعل زوجها ...لانه أكيد بيكون عنده اي كلمة
صيته حاست بوزها ماحبت ردها بس طنشت ..وناظرت ريوف وهي تنتظر رد منها ...بس شافت البنت ..مافتحت فمها بكلمه كررت كلامها :هاا ي ريوف وش رايتس ..
ريوف
هزيت ..رأسي وانا اناظر اسامه ...اللي ناظرني بحده شكله يبيني أرفض. .ايه واضح بعد .....خليني اسوي اللي يبيه أحسن قبل ما يسمعني كم كلمه ..يدرو رأسي منها ....وبعد انا
مالي في الروحه معه قلت بهمس: لا مقدر اروح آسفه
صيته فتحت عينها بصدمه : وشهوله ماتقدري ..أقول الديرة ماتتعوض وجالسة اعزمتس عليها يكون كذا ردتس علي ..
الجدة بحده: خليها على راحتها ...وناظرت اسامه ..
اسامه بسرعة تدخل يوم شاف نظرة جدته ..له يعني زوجتك ماتعرف الأصول. وترد عزيمتهن .:ماعليك ي عمه ان شاءالله معنا الله لايعوق بشر ..وناظرها ...غبيه ذي البنت من أول يناظرها يبيها تشكرهن ..على العزيمه ...وقف ومد يده لريوف:يالله الحين رايحين للبيت ..وبكرة من الفجر ..تكونوا جاهزين ..
ريوف ناظرت يده الممدوده... أعطيته يدي ...بدون تردد
أخاف ..لو طنشت ..آكيد يومي بينقلب رأساً على عقب ...
وقفت ...جنبه ..وناظرت لطيفه ...ابتسمت لها ..بحزن
مابي اروح الديرة ....فكيت يدي وقربت منها ..وقلت بهمس ...تكفين روحي معنا .. ماحست إلا بلطيفه تسحبها بقوة من ..يدها :تعالي اعطيك أغراضك
مشيت معاها .
لطيفه فكت يدها أول ماطلعوا للصالة وقالت بقهر:غبية أنتِ
ابي الفكة منهن الحين ..وشهوله أروح الله يسامحك بس ..
جيت ارد بس سكتت ..يوم شفت اسامه طلع ...من المجلس ..
وناظرني بحده : روحي سلمي عليهن قبل ماتطلعي واشكريهن ..على العزيمه
لطيفه : اي شكر إلا مفروض تعزي حالها وهي بتددبس فيهن
اسامه وهو صاك على سنونه: كم مرة قايل لك لا تغلطي عليهم
لطيفه بهمس : ماهو انت مثلهم طالع وطنشته وطلعت فوق ..
ريوف ناظرته ...وقلت بخجل: مدري وش اقول لهم
اسامه زفر بعصبية : أمشي
مشيت معه وشكرتهن ..على العزيمة ..اللي ماودي فيها .. سلمنا عليهم .. وطلعنا .. وانا أدعي. ..انه
يساعدني ويعتذر لي مابي أروح. ماهو مرتاحة لهاالروحه ...أبد ..أول ما طلعنا السيارة ...وحرك وطلعنا من الحي ..ناظرته كان يسوق ساكت.....
قلت بهمس : مابي اروح معكم خلني في الشقة تكفى دور عذر
اسامه شد على الطارة بقوة ..وقال بحده : ولا انا ابي بس مقدر ارد عمتي ...
ريوف سكتت وانا مقهورة ...يعني وشهوو ...لازم يسوي الي تطلبه منه عمته ...وبعدها بدقايق وصلنا الشقه ونزلنا دخلنا البيت رميت الشنطه على الكنبة الي قدامي و..مشيت لناحية الغرفة ابي ملابس ...وأخذ دش ..وانام شوي قبل المشوار اللي انفرض علي ...شفته جاي وري .. سمعت تسكيرة ...باب غرفة النوم ..لفيت بقوة ...
شفته قرب مني ..حسيت برجفه ...وخوف ...قلت بسرعة وانا
ارفع يدي : ماعلي صلاة والله
اسامه ناظرها بسخرية ومد يده وأخذ بجامة
ريوف عضيت شفتي وحسيت بسخافة الي قلته يوم مد يده فوق راسي ..وأخذ ملابسه ..الرجآل يبي
ملابس له وانا فهمت غلط ....قلت وانا اغطي ..الي قلته :ايه طويل مره وتفجع .. ....كان قلت لي شوي ابعدي عشان اطلع ملابس ولا اي شيء ماهو كذا تفجعني وبلعت رايقي يوم شفت نظرته لي
اسامه رفع حاجب وهز رأسه وأشر للباب: براااااا
ريوف
عضيت شفتي بفشله ..الرجآل ماهو طايقني وانا تفكيري راح بعيد ..اللحين لو شافني أصلي وش يقول ...آكيد يقول ذي كذوب وبعد تثبت على حالها ..آه صدق غبية ودايم استعجل ...والمصيبة وضعي معه حساس ....
اخذت بجامه ..واعطيته ظهري بس حسيت فيه يمسك كتفي ...
ناظرته بخوف
اسامه وهو يناظر عيونها ...: اطلع من المسجد بعد صلاة الفجر اشوفك قدامي جاهزة فاهمه ...مافيني اتأخر على جدتي وتزعل مني ...
ريوف قلت بمحاولة أخيرة : ياليت تعتذر لي والله أكون ممنونه لك
اسامه بصرخة: ليه ماتفهمي اقولك عمتي عزمتنا عيب نردها فاهمة عندهم منقود ...
ريوف رفعت راسها وناظرت .. عيونه وقالت بستفسار: يعني بكرة ننام في خيمه والا كيف
اسامه عقد حواجبه وكرر كلمتها : خيمه ...وش تقولين أنتِ
ريوف : دايم اسمع أهل الديرة بيوتهم خيم وكذا مدري ايش موفاهمه شيء ...والله
اسامه قال بطفش: صح الديرة الي ساكنين فيها أهل ابوي
تعتبر ماهي مثل المدينه. ومافيها هذاك التطورو الخدمات الي متوفرة هنا ..بس ماهو مثل ماتتصوري لا فيها اشياء متوفرة انا عشت فيها فترة وكان الحمدلله كل شيء متوفر لنا أهلي أول مانقلوا الرياض ماحبيت كثير كنت اروح الديرة كثير واجلس فيها بالأيام . آه ..ناس عايشة وقلوبها نظيفه والواحد مايفكر إلا في يومه وبس......
ريوف
حسيت فيه استرسل في الحكي ..ماحبيت اسأله شي ثاني ...الا كان عندي فضول ..اسأله يعني الي تحبها ..من الديرة ..بس هزيت راسي وانا اطرد هالسؤال من رأسي ...صدق الحين بيعصب لو سألت انا وجهي ...هزيت راسي له ...وطلعت ...بسرعة رحت أخذت شور...
وتمدتت وانا أفكر ...اشلون. .بكرة بيكون ...قفلت عيوني وانا
استغفر الله ...ابي أطمن شوي ..من الي منتظرني بكرة
جلست اتقلب واتقلب ...بس مافيني نوم ..على التعب ..اللي احس فيه ...وقفت ..ورحت المطبخ ....فتحت الثلاجة. .وأخذت عصير ...وشربته كله ..ورجعت تمددت عندي امل انام شوي قبل الروحة ..بس مافيني ...تذكرت الجوال ...الي أعطاني اسامه قمت بفضول. ونزلت نفسي شوي ..وسحبت شنطتي اليد الي
رميتها أول مادخلت على الكنبة ....وفتحتها وطلعت الجهاز ...
ناظرته... بدون فهم ...ايه هوو كذا فتح حركت اصبعي على الشاشة مثل ماسوى ... وفعلاً فتح معي ...حسيت بوناسه ...فتحت الاستديوو ..ورحت للصور بفضول. .
كان في صور لاسامه .كثيرر ....بس اللي لفتني وحدة ..كان راكب ...على خيل ...واحد واقف جنب الخيل ماهو باين غير نص وجهه طلعت لصورة ثانية كان ...اسامه لابس بدلته العسكريه ..وجالس .. جنبه وأحد .ماد يده على رقبته و مسوي بيخنقه ..شكلة بعد اللي في الصورة الي قبل بس كان هناك وجهه ماهو واضح مثل الحين ... ..أستغربت ...فيه شبه كثير من اسامه ..معقول أخوه. ...بس ماعنده
غير واحد اللي أعرفه ..هذا مين ....معقول ذا اخوه بس مات ايه أكيد مات لان لطيفه
..قالت لي عدد أهلها كلهن ماقالت عندها أخو ثالث ...
بس مفروض تذكر أخوها لو ميت ..يالله يرحمه حسيت بصرخته واري ... طاح الجوال من يدي وانا مفزوعه .. اشلون طلع وماحسيت فيه
صرخ بعصبيه : ماتستحي على وجهك تناظري الرجال ....كذا
ناظرت الجوال ..في الأرض وقلت بخوف : لا لا ماكنت اناظرة اشوف صورتك و...سكتت وش اقول ..اقول كنت أفكر معقول ذا اخوك ..مات ولا وشهوو .....آه وش ذي المصيبة الي سببتها لنفسي ..
اسامه بعصبية: كل يوم تثبتي لي أنك وقحة وقاحتك بعد زيادة
وقال ايش ماتعرفي له والحين وشهوو .....
ريوف بسرعة نزلت نفسي للأرض وأخذت الجوال وقلت بسرعة :خذه مابيه. ...وبعد والله كنت العب فيه طلعت لي
هالصور ...وأنت طلعت فجأة ... ايه ماعرف له والله ..وهي تكرر الكلام تبيه يصدقها ....
اسامه مد يده وأخذ الجوال ...بسرعة من يدها وقال :الحق ماهو عليك الحق علي انا أعطيتك .....
ريوف احسن شي اقول الصدق قالت وهي متوتره :والله العظيم ماهو مثل ماتفتكر
كنت أفكر معقول ...هاللي في الصورة يشبهك ...يكون عندك أخو ثالث ومحد ذكرة... وبتلكك كن تتت.. احسبه ميت يعني كذا آه ليت تفهم علي وما تظلمني ... اللي ... نزل على خدها خلاها تسكت غصب عنها صرخت ب آه ...
اسامه اعطاها كف قوي خلاها تسكت ..ينقهر ..لما يشوف. ..كذبها عليه ....عيني عينك ...جالسة تألف قصة عشان بس
تلعب عليه ..وقال وهو ينزل رأسه لها وناظر عيونها اللي مغرقة دموع ويدها اللي ماسكه خدها ..مد يده ونزل يدها من على خدها وهو يشوف أثر أصابعه معلمه قال بشمزاز :لا تخافي فاهمك عدل ..هز رأسه وهو متحسر . على اللي كاتبها جنب أسمه ....مع الأسف كل مرة تثبتي على نفسك أكثر ..ي خسارة والله إني ماستاهل مثلك ...
ريوف
كنت احس خدي اليمين منشل من قوة الضربه ...صح غلطت يوم شفت صورة ..
بس والله انظلمت بالتفكير اللي فكرة عني ....مسحت دمعتي اللي عاندت ونزلت .....آه شكلي بنظلم كثير معاه .. جلست على الكنبة ..بوجع ...والله الحسرة علي ماهو عليك ....وقفت ..ورحت توضيت .ابي اصلي الوتر..فرشت سجادتي ....وكبرت
وبديت أصلي ...بعدها سجدت سجدة طويلة ادعي ربي ...
يأخذ حقي منهم جيمع ...وينصرني عاجل غير أجل ....
بعدها جلست وذكرت التشهد ...وسلمت ..ورفعت يدي ..
وانا أدعي ....للي قادر على كل شيء ...واستغفر الله...
من الذنب الي احسه سويته ..يوم جلست اتأكد من الصورة ..
ماحسيت إلا على صوت الأذن ....عضيت شفتي. ...
الحين أكيد يقوم يصلي ...وبعدها نروح ..والله ماودي في هالروحه أبد ...وبذات بعد الموقف الي صار من تووو ....
وقفت وصليت الفجر ...وبعدها أخذت السجاده وحطيتها على الكنبة..وجلست. ..رفعت رأسي على فتح الباب ..شفتة طلع من الغرفة. لابس ثوب ... .وشكله ...توه أخذ شور ......
وطلع بسرعة ...من غير مايوجهه لي اي كلمة. يآرب ... ..يروح فيهم وهي يخليها ....يآرب ..تمددت بكسل ..بس وقفت
بتعب ..أفضل شيء ترتب لها أغراض وتخليها في الشنطه إذا جاا ولسى يبيها تروح ...تكون جاهزة عشان مايعصب أكثر. ..وإذا راح لحاله يكون أحسن ...دخلت الغرفة ..شفت ملابسة ..على السرير. ..عقدت حواجبي ..وش فيه كذآ حاس الغرفة ...بسرعة لميت اللي في الأرض ..وحطيتها على السرير. ..شفت شنطة صغيرة ..على السرير بعد ...فتحتها ..كانت ملابس داخلية ..وثوبين ...وشماغ ...رجعت قفلتها ..
أخذت انا بعد ملابس ..من الجديدة .اللي أخذتها ...وبعد سويت احتياط لأي عزيمة ... أخذت.. عطور ومكياج ...المهم أخذت اغراض اللي بحتاجهن ضروري. ....قفلت الشنطه على صوت باب الشقه يفتح ..بسرعة نزلتها في الأرض ..وطلعت ...للصالة مابية
يدخل ويشوفني ..في الغرفة. ..
اسامه ناظرها بحده:جاهزة
ريوف هزيت رأسي بزعل ..مابي اسمع صوته احس بحقد عليه
وبعد مقهورة يعني فيه روحة افف .....
اسامه بجمود: يالله أجل
،،
،،
،،
،،
في بيت ابو اسامه
لطيفه وام اسامه من الفجر وهم مشغولين في الفطور .. وهم فيهن النوم ..بس مجاملة ....وعشان ماينقدن عليهن .حضروا السفرة
لطيفه بتعب:يمه مين يفطر هالوقت
ام اسامه : روحي قوميهن ساكته
لطيفه راحت ..الغرفة ..أول مادخلت شافت جدتها جالسه تسبح ..وعمتها نايمة حست بقهر ...ايه لو هم ناموا هالوقت ..كانت صارت علوم ...قلت بقهر:يالله الفطور جاهز
الجدة وهي توقف: صحي عمتك صيته توها غفت بعد الصلاة ..
.لطيفه ..بقهر ..ايه رجعت تنام وحنا نكرف....افف بعد اسامه تأخر ...ليته يجي بسرعة ويفكنا .....
بعدها الكل جلس على الفطور .شوي و اسامه دخل ..رد السلام
ردوا عليه وهم يعزمونه ....يجلس
قال بعتب:يجعله هني
الجدة : يمه اقرب كل لك لقمة قبل ماتروح فينا
اسامه تمنى تقول له خلاص هونا ونأجلها للعصر ..يحس بصداع ويالله قادر يفتح عيونه. ..قال بتعب: مابي يمه انتظركم في السيارة
.رجع السيارة. ..وركب ..ورجع راسة على المقعدة ..بتعب ...
رفع يده وشد على راسة بقوة ...وهو يتذكر كيف طلع وهو يشوفها تناظر ....ولد عمته ...شهاب ....حس بغيض منها ..يعني ماتترك فرصة إلا ..اشوف عليها شيء ....يذبح اي رجآل ...
آه لما متى بتحمل ....رفع راسة للمرايا ...شاف سيارة رائد
توها وقفت ونزل ..قال بهمس:كملت ...هالصايع وقته الحين ..لف راسه وشافها مسندة راسها وماهي منتبه أبد ....بس اللي استغربه ..رائد مر من عند السيارة حتى بدون مايناظر له اويغثه بكلمة ...رفع يدة بس بسلام ودخل حوش بيتهم
تنهد براحة يوم شاف جدته وعمته طالعين ...الحمدلله
ماطولوا عليه وده يصل بسرعة وينام ...فتح الدرج الي قدامه واخذ حبة حبوب وشربها بسرعة قبل مايصلن للسيارة وقال بحده وهو يناظرها في المرايا: رحبي فيهن أول مايطلعوا ..ونزل وهو يمسك جدته ..ويساعدها تركب...قدام ..
ريوف طنشت .كلامه ..مافيها تفتح فمها ..فكها كله يوجعها ..ناظرت عمته يوم طلعت جنبها .
اسامه قال وهو يبها تنتبه وترحب فيهم ...: حي الله ميمه
عض شفته يوم بدا يحرك وهي مافتحت فمها بكلمة ...ضحك على عصبية جدته
الجدة وهي معصبة عليه :اكرة هالسيارة ماعندك غيرها ،،
الله يهديك أنت وشهاب و ش حبكم فيها
اسامه :مع الأسف والله ماعندي غيرها وسيارة رائد
ماظمنها توصلك كرفها كرف ....وبضحكة عندي ونيت جارنا تبيها الحين انزل وطلبها منه واظمنه لك مايردني
الجدة قالت بحده:وش زينها الونيت ...والله ازين من ذي اللي تعلق حالك عشان تركب ...
اسامه ضحك بصوت عالي: ههههههههههه
ريوف
ناظرته سبحان الله قدام أهله يطلع شخص ثاني وقدامي يتحول
صيته بتعب : آه تعبانه حدي من السهر آه حنا مناسباتنا ..تبدا العصر تنتهي العشاء الواحد يمدي ينام قبل الصبح
ماهو هنا تبدا العشاء وتنتهي الفجر
ريوف ناظرتها بقهر هي سبب اللي انا فيه
ودبستني بهااروحه ...والحين جالسة تتذمر حضرتها ..كان ودي أقولها وش حادك ...
ناظرت الطريق من الدريشه وانا امسك فكي ..احس بألم فيه .....وبعد ضرسي الضربة جت عليه ..آه وهذا يعورني من قبل الله يستر ..لا يقوم علي ..بعد ماهو ناقصة ألمه ..قلت بهمس: اسامه اعطني حبوب من اللي أخذتها توو
اسامه مد يده واعطاها الحبوب
صيته بصرخة : هييي وش حبوبه ذي اقول لاتشربي من ذا البلى عشان لو به ورع ماينضر
ريوف شفتوا مو قلت لكم غثيثه ...طنشتها وشبرتها
بدون مارد عليها ..ودخلتها الباقي الشنطه ... .....
صيته بقهر : والله ي ا سامه و تعطيها بعد والله عندنا بالديرة كثير حريم عيالهن تشوهوا بسب الحبوب
اسامه بجمود:اي ورع توني متزوج من اسبوعين ...
ريوف ابتسمت بسخرية .على رده ..وكنت ..بقول لهم ..وبعد مأخذ احتياطة ...لا تخافون...
الجدة :ربي يرزقك الذرية الصالحة يمه ....اللي تبر فيك
ريوف
.قفلت عيوني انام أحسن .....فتحت عيوني على صرخة عمته فزت بخوف : بسم الله ايش فيه
اسامه اللي عصب هوو ناقص :لا تخافوا بس كفر ضرب
صيته وهي مفزوعه صرخت :يمه كفر ضرب عليك ووانت مسرع
الجدة :ربي ستر خلاص اسكتي وقولي الحمدلله ..
ريوف ..ناظرتها ..والله على صرختها افتكرت السيارة بتقلب فينا ولا شيء ...يالله ي صبر الأرض عليها ...
اسامه نزل ...وشاف الاسبير ..بس طلع منسم بعد ...
عض شفته بقهر ..اشلون نسي يغير الاحتياط ناظر الطريق .. شاف سيارت كثيرة ماره ..أشر بيده ..
ريوف ..استغربت ليه يأشر ..
صيته فتحت الدريشه وقالت وهي مستغربه: وشهوله تأشروليه ماتغيرة
اسامه وهو يحط يده على جهبته ويشد عليها بتعب: نسيت إن الاحتياط ..الي معي مستعمله من قبل ..
صيته فتحت عينها بصدمه:اشلون يعني مابه رجا
اسامه بطفش من اسألتها وراسه صاك عليه بعد:ان شاءالله خير وسكتت يوم شاف ..واحد يوقف قال وهو يطمنها ان شاءالله هذا فيه خير ويروح يغيره ..لنا من اقرب بنشر ...
صيته هزت رأسها وقفلت الدريشه .وناظرت ريوف : اشلون رجلك يمشي ومامعه احتياط ..ليتنا يمه انتظرنا شهاب
صدق مخاوي السفر مايمشي إلا معه احتياطه...
ريوف
يالله صبرني ..وانا وش يدريني عشان تسألني هالسؤال ..
ليتك انتظرتيه فعلاً وريحتينا من هالتعب كله ...
ناظرتها بصدمه من كلامها ..الأخير
صيته :هوو طرمه صايرة ولا وش قصتس من وقت ماطلعنا معتس وأنت مافتحتي فمتس بكلمه ..لايكون من هالحريم العوبات الي مآتحب أهل رجلها
ريوف مره وحده ماحبهم يآربي هذي أكيد بتورطني مع ولد أخوها ...قلت وانا أتمنى تسكت : معليش ي عمه بس والله
ضرسي يوجعني ولما احكي احسه يزيد علي
صيته : ي حرة سبدي عليتس والله ي شينه وجع الضرس
وناظرت الدريشه تتوقعي راح ..يجيب كفر ..ولا بيعتذر
..يمه لو يعتذر وش بيكون حالنا
ريوف حسيت فيها طيبة بس مخربتها.. طول لسانها. ولقوفها . كنت ودي اقولها لا تستبقي الأحداث واهجدي شوي
بس ..قلت بهدوء:ان شاءالله خير
وناظرت اسامه الي جاي يمنا ..فتح الباب ..ومد يده وأخذ محفظته
صيته بسرعة:هاا ايش قال
ريوف ناظرتها ياربي لطفك...يعني جاي يأخذ فلوس أكيد وافق يروح ...
اسامه بصبر:الحمدلله فيه خير طلع ..وقفل الباب
صيته :يارب يجي بسرعة ماهو يأخرنا ..
.
اسامه رجع السيارة وقفل الباب ورجع رأسه بتعب : شوفوا هالحظ
صيته :والله من إهمالك مفروض هالاشياء محد يتهاون فيها
والله خابرتك حريص وش الي غيرك يمه ...
اسامه بتعب:والله نسيت ...
الجده :خيرة يمه
صيته :ياربي..عيالي مدري وش صار عليهن من امس عنهن ...ليتني ماجيت آه .. من يوم زوجت بنتي وهجت عني ...صايرة ضايعة بدونها ..اقول اسامه خلي شهاب يوريك بصورة بنت بنتي
الله يرزقك مثلها
اسامه تنهد بضيق: ان شاءالله
صيته : دق عليه خله يرسلها لك في ذا الي اسمه مدري وشهو يعرفه شهاب دايم يرسل لعيالي منه ..وانت اكيد تعرفه يمه فديتها ودي بشوفتها والله
الجدة بعصبية : اسكتي خلاص صدعتي رأسي. .حنا الحين في بنت بنتس ولا في هالمقطعه واقفين بها
صيته :هووو يمه علامتس بعد أنتِ متولهه عليها ودي بشوفتها
الجده طنشتها ....
. ريوف هزيت رأسي ..بأيس .آكيد ماراح تسكت شوفوا الحين طلعت لنا بصورة لبنت بنتها يآرب الصبر بس..رجعت قفلت عيوني.. وبعدها ما .حسيت إلا بنغزة في كتفي .فتحت عيوني
...وناظرته
: أمشي وصلنا
ريوف ناظرت حولي. . متى صلح الكفر ..ومتى حرك السيارة ..صدق صدق ماحسيت بشي ..ابد ...ناظرت السيارة كانت فاضية ... نزلت الملقوفه .......
نزلت من السيارة ..شفت المكان شكله غريب ...
علي. ..دخلت وراه.في حوش كبير مره .. ..فزيت بخوف يوم سمعت
صوت الماعز...اللي في شبك عند طرف الباب ....
قلت وانا مصدومه: يربونهن في البيت ...
اسامه طنش سؤالها ..ودخل وراء جدته وعمته
صيته دخلت الصالة ..وفكت العباية ...وهي ترحب فيهم ......
تفضلوا تفضلوا ..شوي والغداء زاهب ...
ريوف يالله مسافة لما نصل داخل البيت ..ماشاءالله ماشفت أكبر من ها الحوش وبعدين ذي اي غدا الحين بتحطه
اسامه بتعب: لا ي عمه والله فيني نوم ورأسي صاك علي
والغدا.. باقي من وقته كثير. ..
صيته : ولا كثير ولا شيء على بال مانتقهوى شوي واقوم نحضره الا قد جا وقته
اسامه يالله وقت قهوة الحين :ماعليه لما اصحى اتغدا ان شاءالله
الجده :خليه ي صيته على راحته روح نام يمه
ولما تقوم لصلاة الظهر تأكل..
صيته : طيب خلى مرتك تجلس تسولف معنا ..وتقهوى حتى يجي وقت الغداء..ودي أتعرف على هالمزيونه معك
اسامه بسرعة مسك يدهاا ..وسحبها له غبي هوو يخليها تجلس
لهن وهاتي ي تحقيق : لا ي ي عمه مقدر انام بدونها
صيته حاست بوزها: ي شين الرجآل لا تدلعوا ..والله ماهقيتك منهم ...
اسامه ابتسم :افاا ي عمه تقوليها في وجهي بعد
صيته : ايه اقولها في وجهك ليت شهاب أعطاك شوي ...من حزمه مع مرته ..
الجده: وش استفاد شوفيه المره طقت وهجت
صيته : والله ماهجت إلا من دلعها إلا الصقر ..مابه عيب..
وبعدين يمه ماعرفت لتس مره وتكوني معه ومره ضده
الجده بضيق من طلاق ..شهاب لبنت خالة ...:خلاص اسكتي
صيته ناظرت اسامه: اقول روح نام في مجلس الرجآل .وخلي مرتك عندنا وانا خلني ازين غرفتك . وبعدها اصحيك للغدى وارجع نام
اسامه ي ام النشبه ..:اقول أنتِ مشوارك طويل وغرفتي مابها شيء أكيد ... مشى وهو ماسك ريوف .. دخل غرفتة ..اللي عند جدته ...
ريوف فرحت يوم سبحني معه ..ي الله مابغينا ننفك ..ناظرت الغرفة ...كانت بسيطه جداً. فيها كرسين .
ومفروشه ...بسجاد قديم شوي.... بس احسن شيء هالكرسين ...
جلست على السرير..وهي منزلة رأسها ..تناظر الأرض ...
تحس بغربة من تزوجت بس الحين زادت غربتها في هالمكان الغريب عليها ....
اسامه قال بحده:انثبري هنا ماتطلعي إلا معي فاهمه
واي أحد يسألك قولي مدري ترى عمتي صيته مافي زيها حشري في هالكون ...واخاف تجرك في الحكي يكفي سواد وجهه .....
ريوف صديت عنه من غير مارد عليه احس بحقد عليه .. ليت عندي الجرأة اللي تخليني اصرخ عليه ...وأقول خلاص اقرفتني بس لازم اشتري راحتي ..يكفي الي فيني وهو..خليه يقول اللي يبي ...
...تمددت بالعبايه ..وانا اضم حالي .... شفته خلع ثوبه ..وفتح التكيف ..وتمدد على ظهره ..اعطيته ظهري
وحطيت يدي..على فكي ابيه يخف .. قفلت عيوني..وانا أتمنى اقدر ارجع انام.....بس وجع فكي...ماريحني ..أبد ومفعول الحبوب ..فك عني .. جلست وانا ناويه اقوم اسحب شنطتي اللي رميتها على الطاولة ....بس اول ماوقفت الكرسي.. طلع صوت .عضيت شفتي .آكيد الحين بيعصب . .نزل يده من على وجهه و..ناظرني وقال بحده: وين وين
ريوف ..مسكت على فكي...من غير مارد عليه ..
فكيت العباية ...وسحبت الشنطه ..وفتحتها ابي مسكن ..
دورت ماحصلت ..عقدت حواجبي مستغربه ..بنفسي حاطيته بعد ماشربت في الشنطه ...معقول آخذه قلت بهمس:أخذت المسكن
اسامه بحده : ايه أخذته....
عمتي صيته حلفتني ..انك معاد تشربيه ..وابتسم على جنب
.متأملين كثير ....قال ايش اخلف منك مجنون ..انا ...
ريوف حسيت بعصبيه ..صرخت من الألم اللي آحس فيه: اشلون فتحت شنطتي ...وش ذا الللقوف فيها الله يشفيها منه بس
.
اسامه ناظرها وهي معصبه ..ابتسم على جنب ..وقال : دواك عمتي صيته هي بتأخذ حقي منك
ريوف رجعت مكانها وهي مقهورة ....الحين وش بيهديه
قلت بقهر : والله الحق لي ماهو ب لك ..
اسامه وقال وهو يأشر على رأسه : ذا مقفل الحين احسن لك نامي قفل مااافصل عليك ...وأعطاها ظهره
ريوف برجى : تكفى روح نزلة من السيارة والله تفعل فيني خير
اسامه وهو مقفل عيونه:انخمدي ...
ريوف بألم : والله موجوعه
اسامه بهمس :ماهو مثل الوجع الي احس فيه وبحده رفع صوته .كلمة زيادة راح تشوفين الوجع صدق ...
ريوف
هزيت رأسي بتحسف على حالي .. ...صدق مضيعة وقتي وجالسة أحاول مع وأحد الرحمة انعدمت من قلبه.. تمددت وحطيت يدي على خدي وجلست أقرأ
عليه. .وبعدها ماحسيت بحالي ...وغفيت ..........
ناظرته وهو معصب لسى ..قالت وهي تفرش السفرة : ي رجآل روق اليوم ..ضربك بكرة تضربه..والدنيا كذآ أخذ وعطاا
سامي عض شفته وش يسوي فيها جالسة تتمسخر..عليه
فرصة وجتها ....
ام سامي قالت بخوف: بسم الله يمه من ضربك ....
غلا وهي تناظر سامي وتلعب بحواجبها:قولي دبغة
والله ي دمه صب وعيا يوقف إلا بالعافية ...
ام سامي بخوف: يمه ماهي بالعادة ..دايم انت اللي تضرب
وعسى ماعورك واجد
غلا وهي تناظر سامي وفيها ضحكه ..: والله إني صادقة وبعد رفض يقول ..ليه طقه ..شكل ولدك حرق دمه. .والرجال مسكين مقدر يتحمل ...
سامي قال بقهر: انكتمي أحسن لك وناظر امه ماعليك هوشه بسيطه وانتهت ..بشرها ..خلاص وشوفيني قدامك مافيني الا العافية
ام سامي مدت يدها ومسكت كتفه بحنان : يمه ماعندي بعد الله غيرك الحين ...
غلا بستفزاز : والله لو جلس على الهوشات الي يسويها
عزالله جلستي وحيدة ولدك بعد هالدبغة حصلها ..اتوقع الثانيه بعزيك فيه ..
ام سامي بقهر رفعت يدها: بسم عليه لا تفاولي ...والله يأخذ اي أحد منكد على ولدي ...وناظرته وش اسمه
غلا رفعت حاجب شكلها بعد تقصدني بس طنشت وقالت :لا تقول لها تكفى الرجآل بيروح فيها من هالدعاوي
اللي بتجيه ..وصدقيني ولدك غلطان حرام تدعي عليه
سامي ناظرها .مسويه تستهبل حضرتها ولا وش سالفتها
قال وهو صاك على سنونه : غلا لو ماتعرفي تمسكي لسانك فارقي أحسن خليني اتغدى ...
غلا حزنت عليه ..: خلاص كل بالعافية
وصرخت يالله نسيت ...ملكة بنت خالتي اليوم
من يومين خالتي دقت علي ..مدت يدها لناحية خدوج يالله اعطيني سلف .. وناظرت سامي.وعد ذا الرجال قدامك ..يخارجك .....
ام سامي وهي غاصة باللقمه: وشهوو اقول مناك بس ماسلف أحد انا
سامي عصب بقوة....وبعدين يعني كم مرة قايل لها شغل الاستفزاز ذا مايحبه ..ومحذرها فلوس امه ماتذكرها الحين وش يسكت امه بالله ...قال بحده:ماعليك فيها يمه
هذي من يومها كذا ماعمرها سوت شيء سنع
ام سامي ناظرت غلا : في ذي صادق والله وبقهر وش علامتس على دراهمي بتصرفيها
غلا عضيت شفني بقهر ...الحين قايمه ضدي..: افا ماهاقيتها منك بعد مافزعت معك ...افتكرت ..تعطيني بعد من غير سلف . ..الله يسامحك ي خدوج ..والله ان قلبي بدا يميل لك بس يالله الحين لو ايش ماخذت منك ريال لا تحاولي
سامي حس بقهر جالس تتمسخر على امه ..صرخ بعصبية: غلا
غلا: خير خير تصارخ علي وبعدين انا وخدوج وش دخلك فينا
ام سامي بقهر: خالتس تخلخت عظامتس ان شاءالله
غلا صغرت عيونها : شفتي ان الزهايمر لاعب بحسبتك مرة قايله لي ياولك تناديني بخالتي والحين زعلانه ليه قلت لك خدوج
صراحه ماعرفت لا لك ولا لولدك ...ذا اللي منفس علي ...
سامي بعصبية:غلا اااااا انقلعي قومي عن وجهي
غلا قاطعته بصرخة وهي ترمي الملعقه بعصبية:قايمه خلاص ومخلية لكم المكان بعد أنت وامك
سامي ناظر الملعقة الي حطت قريب من امه .وقال بعصيية: ربي رحمك والله لو حطت فيها لا اقوم انهيك من على الدينا
غلا بعصبية راحت لغرفتها ..وهي معصبة ..مايستاهلوا هذولا
حد يعطيهن وجهههه ...
صدق ما يبان فيهم معروف ..وبعدين في وشهو غلطت هي الحين طلبت سلف ..واكيد راح تخارجها من الفلوس اللي يعطها سامي ..ضحكت على حالها ..وش فيها صايرة ..شحاته
تذكر أول ترفض تأخذ من أحد ريال ...هزت كتوفها بدون مبالاة هو الي قعدني في البيت. ..أجل يتحمل .يجيه مني ...
بس حرام والله حسيتها خايفة على فلوسها بقوم اطمنها ..اني مابي منها شيء .
سامي ..ناظر امه :كلي يمه وماعليك فيها ...وفلوسك محد يجي يمها ...أبد ومن بكرة ابي افتح لك حساب واودعها بعد
ام سامي : تخسى بنت راجح ماتقدر تأحذ ريال ماقدر رجآل بشنبات تجي هي لا تخاف ..وفلوسي عندي ماعليها شيء
سامي ناظرها يوم طلعت من الغرفة ..بس طنش ...ونزل رأسه وكمل أكل
غلا
كانت طالعة ...وهي تبي تقول لهاا ...انها تمزح ومستحيل
تأخذ فلوس منها ...واللي مفروض ..يعطيها سامي ..وملزوم بعد ..بس سمعت كلام سامي ..وامه ..رجعت وهي مقهورة
الحين هذولا صادقين في الي يقولونه ....وسامي بعد خايف مني على فلوس امه وبيودعها لها .....جلست على السرير ..وهي تحس بضيقه ...بس تستاهل ..هي اللي اعطتهم وجهه ...
ومطيحة الميانه معاهم ..وين غلا اللي ..آخر همها سامي وأهله
حست بكره لهم ..ليه خايفين منها ..توقعت امه تقول كذا عادي بس سامي ...لا والله مصدومه فيه ....
في الصالة
سامي وقف:الحمدلله
ام سامي :هووو مااكلت زين ...
سامي : ابي اريح شوي ..وبعدها.انزل ادفع إيجار اليوم وبكرة ..
ام سامي :يمه لو جلسنا كل يوم ندفع 300 ريال في اليوم لهاالغرفتين قسم بالله فلست ...وانا دارهمي مابي انفقها كذا
سامي بضيق : يمه دراهمك ماقربت منها ...غير أخذت
500 بس لاول يوم سكنا فيه ومن بعدها استلمت الراتب...وجالس ادفع منه
ام سامي بقهر :الراتب بيكمل وبترجع لدراهمي ..
سامي :لا يمه ..من بكرة ادور ..شقة سكن إيجارها بالشهر
ونفرشها ونسكن فيها قال بتردد بس يمه لو احتجت لمقدم لشقة واكيد بيكون ..مبلغ ..هذاك الوقت ماعندي غير فلوسك قالها وهو متوقع تفلعة بعلبة الشطه اللي قدامها ...من تو كرشت غلا تجي عليه هووو ...
ام سامي بضيق :الله يعين بس بتقصدها كل شهر ..ألف. ..
سامي ضحك من خاطرة على امه:ايه ارجعي خدوج الي اعرفها الي من اسبوع ما حببتها ابد
ام سامي سكتتت
سامي ضحك وهو يسحب يدها ويسلم عليها :أبشري بالي يزيدك بعد ي ام سامي ..
ام سامي: قوم راضي مرتك ...ترى ماقصرت فيني ... ..وبعد اعطيها سلف ..لوتبي .....
سامي عض شفته يوم ذكرته فيها ...الحين ..تطلع عيونه ....
بطول لسانها... وليه سويت فيني كذا قدام امك ...وليه صرخت فيني ومن هالكلام اللي يرفع ضغطة ..
وقف ..وقال بقهر: والله انا الي احتاج السلف .منك يمه ابي اتزوج ...
ام سامي بصرخة: ارتاح من مرتك تجيني أنت انقلع والله ولا ريال لا لك ولا لهاا ...وزواج مالت عليك أنت وابوك
مسوين فيها ..يقال
سامي رفع يده :هدي هدي وهو مساك ضحكته ....
بعدها راح ...غسل يده ودخل الغرفة...شافها تناظره ...بقهر ..جلس جنبها
غلا بزعل : ابعد عني
قربها منه غصب وقال بحزن عليها : عارف انك سمعتي ..وش قلت ..بس والله ابي امي تتطمن ..على فلوسها ..احسها بيصير فيها شيء ...لو نقص منها ريال .....والحين الي بقي من راتبي كله لك ... واوديك السوق ....و.خذي الي تبين . شافها مطنشة ... ماترد عليه
قال بهمس :غلاي ماحب اشوفك كذا
غلا ناظرته ..وقالت بكسرة نفس:والله كنت امزح إلا الحمد لله ماذل حالي لاحد وأنت عارف هالشيء ...
وبعد مابي لا اروح السوق ولا شيء .....ومن اصلة ماحب احضر مناسبات ....
سامي وقف : اوك انا اشتري لك احسن فستان
غلا صرخت :لااااا تكفى ...والله ماروح احسن...
سامي عض شفته : افاااا لهالدرجه ذوقي خايس
غلا : اي والله قولي ايش جبت شيء عليه القيمه
سامي وهو يلعب بحواجبه : في ذي صادقة وبذات أنتِ
غلا بقهر : سآمي لا تزعلني الحين على الزعل الي فيني
سامي ابتسم لها :...افاا والله الكنق مرته زعلانه منه ماتجي ذي أبد اروح لك فدوه ....
غلا تحسه يتمسخر عليها قالت وهي ناوية عليه :سامي شكلك اليوم بتخسر لاني قررت قرار خطير الحين .. وكاد ارد شوي من كرامتي ....اللي هدرتها أنت وامك
سامي: خلي امي على جنب ..وقولي وش هالقرار الي بيخسرني وبيرجع لك كرامتك ست غلاااااا
غلا:انت من امس جالس تصارخ علي ومفروض
مع كل صرخة وكلمه ضايقتني ...تأخذ لي شيء ...
ورفعت يدها في وجهه ..بتهديد ..ترى حاسبتهن زين ...
وياويلك ترفض
سامي عض اصبعها الي رفعته في وجهه....
غلا صرخت بألم .....:آه
سامي شد زيادة وقال وهو شاد بسنونه:قولي اتراجع عن قراري
غلا بعناد وهي تحس بالم لانه شاد بقوة بذات يوم سكت
: بس مافيها تتحمل صرخت بقوة: آه فكني واتراجع ولا بارك الله فيه من قرار فك يال********
سامي طاح على ظهره وانسدح على السرير ..وهو ميت ضحك
قال :ههههه كم مره قايل هالسب خليه ..
..غلا بقهر وهي تناظر اصبعها الي لونه صار احمر واسنانه باينه عليه قالت وهي مقهورة: حشا ماهو ادمي ... وضربته بقوة على صدرة
سامي رفع رأسه بالم وهو ماسك على صدرة: آه
غلا بقهر: شوف اصبعي كيف سويت فيه والحين من ضربة بسيطة تصرخ ....ليه انت كذا ....متهور ...ودفش في كل شيء ....
سامي ...سحب يدها وناظرها ...شاف سنونه واضحة عليها ...باس يدها وقال بضحكه : عشان تتوبي ..بس
غلا بقهر: والله لا أخذ حقي منك ي سيد سامي الوعد في السوق
سامي ضحك:ههههههه لسى باقيه على قرارك الي بيفلسني ...
غلا سحبت يدها منه وقفت وقالت : بلا تراجع ... ...
سامي جلس بقوة وهو يأخذ نفس : عيوني لك غلاااااااي ..
غلا رفعت حاجب .تعشق اسمها منه صايرة ..وبغرور : ايه كذآ ..
سامي ابتسم لها .:اوك ي حلوة اشوف أمي ..إذا تبي تروح معنا .غلا هزيت راسي بدون صوت ..رحت اتجهز ...وانا افكر ..في هدية لبنت خالتي ...وبعد ليت ام سامي تروح معي بيت خالتي
طلعت وانا لابسه العباية ...شفتها جالسة تتقهوى
قلت : ليت تروحي معي بيت خالتي
ام سامي :هوو واترك فلوسي هنا لا مالي في هالروحه
سامي ناظر غلا : حتى السوق رفضت تروحه ..
،،
،،
،،
،،
،،
،،
بيت ابو وليد. ..
قالت بقهر:شوق حرام عليك ...الكوفيرا شوي وتصيح منك
شوق بعصبية: والله المكياج أبد ماهو ضابط على وجهي
عزالله ..الرجال هج
ريتآج بطفش:والله اظمنه لك مايهج وبحذره بعد حتى لو ماحب شكلك مايعلق بشيء
شوق صرخت بقهر:الحين يقال تطيبي خاطري ...
ريتاج ..رفعت فستانها الطويل .وبقهر ..انا طالعة وأنتِ كيفك ...أول ماطلعت من غرفة شوق ..شافت قدامها لطيفه وهي لابسه العباية توها جت ....ارتاحت ..يوم شافتها توقعت ماتحضر .....
لطيفه اول ماشافتها حست بقهر ...وبذات مع شياكتها ....
طشنتها ودخلت على شوق ..وهي تناظرها ..قالت بنبهار :واو طالعة حلوة .
شوق وهي مو مصدقتها: صدق ..حلوة طلعت بذمتك احس في شيء بوجهي ماحبيته ..ماهو كنه كثير شوي شوفي من هنا
احس مكثرة بودرة مدري شوفي زين
لطيفه ابتسمت عليها وهي تخربط في الحكي :وش تقولي أنتِ والله حلوة طالعة
شوق بعجز هزت رأسها : اوك..طيب اجلسي عشان يمديها تعدلك ....
لطيفة
ابتسمت لها وجلست والله عشانها جاية ..إلا نيتها خلاص ترتاح من وليد ..ومن هالبيت كله ...بس بعد تفكر ..
وش يصير فيها لو تطلقت ..أكيد بتكون خسرانه ...آه ليت
..جلست على رأيي كان شوي حافظت على كرامتي ..
ناظرت الكوفيرا الي تسألها كيف حابه يكون مكياجها هزت رأسها وهي مو معاها :على كيفك سوي اللي تبي ....
كملت بهمس لو ايش ماصار ماوصلت لجمالها
الكوفيرا:شوو
لطيفه هزت راسها :سلامتك وسكتت وهي متضايقه فعلاً
تحس .بستسلام .... غريب عليها ....وتحس حالها ماهي لطيفه القوية لا وليد كسرها حيل ..قفلت عيونها ..وهي تذكر يوم جا
لها بيت أهلها ...طلعت معه عشان شوق بس ....
طلعت السيارة بدون ماتتكلم
وليد : افا مافي الحمدلله على السلامه ماستاهل يعني
لطيفه بسخرية : إلا تستاهل حبيبي ..وسكتت شوي .يوم شافت ابتسامته ..قلت ..لي مغصوب وبتعدل عشان ابوك
معقول ابوك متخبي فوق ..جنب الجناح وأنت جالس تمثل عليه وانا مدري
وليد :لطيفه انا يوم قلت لك كنت صادق وبعدين خلاص انا مستعد أعدل اقولها لك للمليون مثل مالك لها لا ابوي ولاشي
الحين ...
ولوتبي تكسبي قلبي. ..لا تجلسي كل وقت تذكريني فيها
ليت لو جلست معك ماتذكريها أبد ....
لطيفه ناظرته بحسرة : ليت يوم جيت رديتك وكسبت حالي
وليد مد يده ومسك يدها وقال بهمس: واهون عليك
لطيفه ناظرت الدريشه : ايه تهون مثل ماهنت عليك
وليد :اقسم بالله ي لطيفه غلاك محدن يصل له وش تبين أكثر
لطيفه رفعت يدها تسكته :خلاص تكفى شبعت من كذبك
حست بصوت الكوفيرا تكلمها ناظرتها ..وقالت بهمس :خلاص
كملتي
هزت رأسها واقفت تشوف حالها. .ابتسمت برضى ..
على شكلها ...رفعت رأسها بغرور..ماهو جمال ريتاج
اللي ينقص ثقتي في نفسي ....
وهي طالعة من المطبخ ... .وكان عينها على..
على المبخرة الي في يدها واليد الثانية تحط عود على الفحم .....شافت وليد في وجهاا ..قالت بفزع وهي ترجع لورا.... :يمه ربي ستر كان طاح من يدي ... فجعتني ...حرام عليك كذآ طبيت
،،،،،
أول ماشافها ..حس روحة رجعت له ...قال وهو مسوي ثقيل شوي عقد حواجبه .. : وين ميري
ريتاج بهدوء: أرسلتها للمجلس تحط الضيافة
ايش تبي منها
وليد وهو يناظر المبخرة اللي في يدها :ابيها تشعل لي فحم
ريتآج رفعت حاجب وقربت منه ..:تبخر بهذا
وزودت عود وقالت بهمس.. كان اقتصرتها وقلت هاتي الي في يدك ماهو مشوار تتطلب لسى ميري تشعل لك رفعت رأسها وابتسمت له وهي تشوف وجهه وبهمس ترى مكشوف عندي .
. حطت المبخرة بعد مابخرته ..رفعت يدها وسوت له الشماغ وقالت بهمس: كذا تطلع اوسم ..
وليد رفع حاجب وابتسم على جنب وقال . اول ماسمع ..صوت أمه تصارخ على ميري ...ابتسم : ي ذي الميري الضايعة اليوم. ..وأعطاها ظهره وطلع
ريتاج ناظرته وهو طالع
ملخبطه في مشاعرها صوبه ...تكذب لو تقول ...لما تشوفه تحس في قلبها شيء صوبه. ...صارت تخاف ..تتعلق
فيه ..
حرام الي يسويه فيها ..ماهو كذا اتفاقهم .....ايه ماهو كذا ولا هذا وعدهم لبعض .. آه يعرف كيف يخلي الوحدة تتعلق فيه....هزيت رأسي وأخذت المبخرة وطلعت ..وانا متوترة ..حدي ...لازم ابعده من تفكيري ولا عز الله ماتطلقت ...ولا لي حيل في شغل الضراير ......
،،
،،
،،
،،
،،
في مجلس الرجآل ...
استغل جلستهم مع بعض قبل مايجوو الضيوف. ..قال بحده وهو مصمم على اللي باله : اسمع .بحول الله وقوته نروح بكرة لعمك ونطلبه يد اسيل من ثاني...وتعتذر على سواد وجهك
ناصر
ندم انه جاا بدري ...هو كل مره يتهرب ...مايبي يجلس معه .... عشان مايرجع ويفتح السيرة قال بضيق: يبه ماطفشت من هالسالفة .
ابو وليد بحده: لا ماطفشت مدام مرتك كذا مسويه فيك
وشوف اللي ماتستحي ولافكرت تجي تطيب خاطر ..امك وتحضر ملكة أختك ....
ناصر قال وهو يدور لها عذر: يبه والله انها ضايقة من بعد ما
سقطت ضناها وبعد يدها توجعها ..لسى
ابو وليد بحده : ربي .... ماكتب له يتم تجلس كذا معترضه ...
ولو هي مثل الحريم ..اللي فيهن خير كان فكرت بعقل ..وش بيضرها من بزر مثل اسيل ....
ناصر :يبه الحريم مايفكروا كذآ
ابو وليد بعصيية : وأنت وش لك في سواليف الحريم اجزم بس وماعليك ومثل ماقلت لك بكرة نروح وتخطبها وعصب عنك تملك عليها
وليد
طول الوقت وهو يفكر ..ليت فعلاً ..اسيل توافق عليه ..
يكون حلوو ضرب عصفورين بحجر واحد عصام متزوج اخته واسيل متزوجه أخوه ....يعني طلاق .ريتاج صعب صعب ...ابتسم بخبث ....والله ي رتياج مردك لي وحدي .....ابتسم وهو يأيد ابوه: اي والله ي ناصر شوف حالتك كيف وصدقني أول ماتزوج اسيل منيرة بترجع لك
من غيرتها شوف انا حريمي كل وحدة تتمنى ابيت عندها
ولا اعطيها وجهه وانا ماهو يمهن أبد أفكر في الثالثة بعد
ناصر عقد حواجبه. .معقول منيره ...راح تحس بغيرة إذا تمم زواجه من أسيل. ...وفعلاً تسوي مثل مايقول وليد قال بحيرة :الحين خلونا في عصام وشوق وبعدها يحلها ربي وقف وهو متضايق
وليد ناظر ابوه بنتصار بعد ماطلع ناصر: شفت يبه لفيت مخه المصدي ذا
ابو وليد بسخرية : ماقصرت بس والله ي بوك
مو كنك كذبت واجد قلت لي حريمك يموتون فيك والله اني شايف كل يوم وحده هاجة لبيت أهلها .....وضحك بقوة يوم شاف وجهه
وليد تفشل وماعرف يرد......هههههههه
وليد .. عض شفته ..مايدري وش يقول .له .بس فرح يوم جاا حسا م يركض يقول انهم وصولوا .وقف بسرعة وهو يتهرب : شكلهم جوو خلني اطلع استقبلهم .....
،،
،،
،،
،،
في مجلس الحريم
غلا ..وهي مستحية ...تناظر الضيوف .الي قايلة لها اسيل انهم جاين مع امها .همست لها
: ماشاءالله امك ماخلت حد الا عزمته وبعد خالتي تقول مقتصرة على الأهل
اسيل فتحت عينها بدلع : يعني للحين ضيوف ماما مسوين زحمه
غلا :اي بالله مسوين زحمه
اسيل وهي تنعم صوتها : ماما تعرف ناس واجد وهذولا ماهو كلهم بعد
غلا عوجت فمها : وع والله اكرهك يوم تتكلمي ليتك ساكته على طول
اسيل فتحت فمها بدلع :ايش وع لي انا
غلا بقهر عضت شفتها :يمه يمه تكفين اسكتي خلاص
بطني بدت تقلب علي ...
وناظرت ريتاج الي مشغولة في الضيافة أشرت لها
وجتت قالت بقهر: أختك ذي من امك وابوك متأكدة
ريتاج جلست بتعب جنبها : ايه
غلا : سبحان الله فرق في كل شيء وهي تناظر ملامح ريتاج
اسيل بقهر: ايس قصدك ممكن اعرف افف
غلا وهي تقلد صوتها :افف مالت .. وبحده ..والله قصدي انك ماخذيتي من أختك لا عقل ولا شكل
اسيل حاست فمها بدلع :كذا تقوليها في وجهي سوفاج صدق
غلا كشرت بوجهاا:وع ثم وع ريتاج تكفين روحي فيني لشوق
اسيل سبلت عيونها . وقفت اقوم أجلس عند ماما احسن وقفت .وهي مطنشتهم ....
ريتاج اببتسمت على كلام غلا ..تحسها كذا تعطي في الوجهه بدون مجاملة .قالت بضحكه : ابشري يالله نطلع لها الحين بس لا اوصيك غلسي عليها ....مثل مانكدتي الحين على اسيل ...
غلا : لا الدلوعة حقتكم ذي ماهو بس انكد عليها ودي افرك خشتها .وافقع عيونها ...اللي تسبل فيها ...امم شوق ابشري لاتوصي ...وطلعنا شفت خالتي في الصالة
تكلم ميري ..ابتسمت لها ي حبي لها قربت مني وهي تقول
: يمه والله اني فرحانه انك جيتي
غلا :فديتك والله وبعد انا افرح يوم احصل فرصة وازورك فيها
ام وليد بعتب:بس ماتجي يمه كثير آخر مرة شفتك يوم زواج وليد وانا مافيني اطلع واجي ازورك قالتها بغصة .....
غلا قربت منها وسلمت فوق راسها :ابشري ي خالة ان شاءالله ازورك على طول وتجي تزورني أول مانقل شقتي الجديدة
قلت لها كذا عشان تعرف ..اني ماهو في الحارة لسى ..
اللي زوجها معترض ..على جيتها هناك ...
وناظرت ريتاج الي ساكته ..امشي ننطلع للعروسة ..
،،اول مادخلنا عند الغرفة شفت لطيفه وشوق سلمت عليهم
وباركت لشوق بس قلت وانا مستغربة :وين منيره وحشتني والله
ريتاج : تعبانه
لطيفه بدقة: مسكينه منيره فوق تعبها مصدومه ..شكل اي أحد يتزوج من هالعايلة مكتوب عليه ينصدم وتجي الثانيه على راسها
عقد ت جواجبي مو فاهمه وقلت بخوف :بسم الله ايش فيها
لايكون فيها شيء قوي منعها من انها تحضر
لطيفه ناظرت ريتاج وهي مقهورة :لا بس في ناس يرموا حالهم كذا بدون مايفكروا انهم يجرحون مشاعر الغير...ويخربوا حياتهم والمضحك في ذا ايش مابيه وراح اطلع من حياتك
بس يثبتوا العكس حنا الي نطلع وهم اللي يأخذوا مكانا
غلا حسيت السالفة بتنقلب هوشة من كلام لطيفه ..
ندمت إني سألت ...خليني اغير السالفة أحسن ..:اخخ ي شوق ماهو مصدقة انك عروس يختي حالك كان ينشفق عليه
والله مخطوبة مع وقف التنفيذ
شوق بقهر: انقلعي الحين ارتاح من ريتاج تجي أنت....
ريتاج
عضيت شفتي ....بقهر...جالسة ترمي كلام كبير ...
بس ماعليه ناظرت شوق الي خايفة اسوي مشكله مع لطيفه وانا اطمنها ...وحبيت يوم غلا غيرت السالفة انسحبت
بهدوء من غير مارد عليها بشيء ....حياتي ي اسيل
اشفق عليها يوم ..أسمع أحد يتهمها انها هي الي خربت حياة
ناصر ومنيره . الله المستعان ....
،،
،،
،،
،،
،،
بعد الملكه
عصام وده يطير من الفرحة ..همس لوليد يوم بارك له
أقول تفعل في ولد عمك خير خلني الحين ادرعم على أختك
وليد ضحك: بعد تدرعم آه ي شوق على هالحظ
عصام بقهر: اقول بلا هياط وشوف لي الطريقة ولا اي مصيبة خلني اشوفها ....
وليد ابتسم بستفزاز: أصبر الزواج بعد سبعة شهور وشهوله مستعحل ....
عصام قال بتهديد : أقول قسم بالله لو ماتشوف لي صرفة اشوفها اليوم ..أختي تروح ....معي والله لايعوق بشر ...
وليد وقف : لا مدام كذآ أبشر على هالخشم
عصام رفع حاجب : ايه ناس لابد تشد عليهم
وليد طنشه ..وطلع ..
ودق على ريتآج
وقال بهمس: شوفي لنا طريق ابي ادخل عصام لشوق
ريتاج وهي واقفة عند مجلس الحريم :اوك الحين اشوف لكم
الطريق وبعد ادخل شوق المجلس ...الثاني ..
وقفلت ..وهي طالعة الدرج بسرعة . ودخلت الغرفة..
ماناظرت حول لطيفه أبد .و.ابتسمت.. لغلا وهي تقول: يالله ننزل بنت خالتك وناظرت شوق :يالله ي العروس اخوي ينتظرك في المجلس
شوق بخجل :ماهو قادرة خليه يأجلها للزواج مرة وحدة
ريتآج فتحت عيونها بصدمه: الحين متى يجي أخوك ومدري ايش وفي النهاية كذآ علومك أقول قدامي بلى سماجة
شوق ناظرتها وهي معصبة ..
غلا بضحكه : اخخ ي بنت الخالة مسوية ثقيله علينا وأنت من داخل ترقصي سامري ....
شوق ناظرتهن بقهر ... والله تحس بخجل فعلاً ..بس
تحركت معاهم.. وهي ..متوترة ...حدها ...ومستحية وحالتها حالة ...بس سوت حالها قويه عشان ريتاج وغلا مايجلسوا يتمسخروا عليها .....دخلت معاهم الغرفة..وهي تسمع صوت الحريم ..في المجلس الكبير. .... غلا بعدها انسحبت ..
،،
،،
،،
،،
،،
عند ريتاج
بعد ماضبطت شوق . . طلعت وقفت عند المدخل الثاني تنتظر
دخول ...عصام وليد
زفرت براحة طفشتها شوق يقال خجلانه ...وهي تكذب
لو لا الحيا لاقامت تردح على قول غلا .....شافت أخوها مقبل
....
حست بفرحة وهي تشوف سندها ...قربت منه ...وهي فرحانه حيل .ونست ضيقها كله .....ضمته .بحب ...وعيونها دمعت من الفرحة ذا سندها ي ناس تحبه ...وتحب حنانه عليهم ..
: مبروك ي قلبي ورجعت سلمت عليه وهي فرحانه
عصام سلم فوق رأسها :الله يبارك فيك ي الغالية ...وهو يضمها بحنان
وليد سبحها من حضنه: ماهو كنها امسخت
ريتاج مسحت دمعة الفرح الي نزلت هزت رأسها : فرحتي اليوم غير آه ي خوي مبسوطه حيل
وليد ابتسم لها ... ..حس بفرحة مع فرحتها ..
عصام وهو ينزل عقالة ويهدد : اقول وين مرتي خلاص الصبر فاض بي ....
وليد دفه قدامه :امش ي الفضيحه
ريتاج ضحكت على حركات أخوها ..ي ناس تعشقه ...
عصام .
..يحس حالة فرحان حيل ..بس ناظر وليد بحقد ..يوم تذكر عرسة بيتأخر ..اول مادخل ..شافها قدامه منزلة رأسها
قال وهو فرحان : .أخيراً شفتك..ولف بيقفل الباب بس شاف وليد وريتاج جاين .. وراه
... انقلعوا برا وشهوله داخلين ورأي. ...
وليد ناظر ريتاج بصدمه.......
. ........
،،
:
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!