رواية عائلة الحاوي الفصل الأول 1 - بقلم تقى محمد

_رايحه فين؟
_ميخصكيش.
_لأ يخصني يا رنا و يخصني اوي كمان لإنك بنت عمي.
اخدت موبايلي و مفاتيح العربيه بتاعتي من قدامها
و قلت و انا عيني في عينها
_و اديكِ قولتي يا ملك بنت عمي يعني ملكيش
دخل في حياتي انا حره.
دموعها نزلت و هي بتبصلي
_بس انا كنت اكتر من اختك و احنا صغيرين انتي
ليه قلبتي كده.
_انتي قولتي بلسانك اهو كنتِ يعني ماضي خلاص خلص و انتهى.
و طلعت و قفلت الباب ورايا
_اوووف شكلي نسيتها.
نزلت من العربية تاني و دخلت الفيلا جبت علبه
المهدئات بتاعتي اللي بقت صديقتي الصدوقه
من وقت موت بابا.
_رنا تعالي عاوزك.
و انا نازله على السلم جدو نده عليا
اتأففت بملل و روحت له لقيت ملك واقفه جمبه
ضحكت بسخريه من أفعال الأطفال بتاعتها دي.
_خير يا جدو عاوزني في ايه؟
_انتي رايحه فين بدري كده؟
_رايحه اقابل صحابي يا جدو.
رفع حاجبه باستغراب
_بدري كده ده الساعة مجاتش 12 الضهر حتى؟!
بصيت في ساعة موبايلي
_عندنا مشوار مهم ممكن اروح بقى عشان اتأخرت.
_روحي يا رنا و ياريت تعملي حسابك تيجي الاجتماع في الشركة الساعة 5.
حدفت له بوسه في الهوا
_حاضر يا جدو باي.
______________________________
و صلت المكان بتاعنا و نزلت لهم و سلمنا على بعض بحراره كالعادة
_رونييي اتأخرتي ليه كده؟
_اووف متفكرنيش بنت عمي الزفته دي قعدت
تقولي رايحه فين و مع مين وقفت عملتلي تحقيق.
_مين ملك؟
_هي فيه غيرها مطهقني في عيشتي.
_طب خلاص فكك و روقي بقى كده عشان عاملكم
النهاردة Day very interesting.
_ايوة بقى عشان البت دي قفلتلي اليوم من أوله.
_لالا يوسف و زياد هيفرفشوكي ب مخططاتهم تاني.
_اشطا امال فين جومانا مش جايه؟
_لا جايه بس سبقت على هناك لما لقتك اتأخرتي.
_طب اشطا باصي اللوكيشن بقى.
______________________________
_جماعة انا نفسي في حاجه عارفين هي ايه؟
ردت جومانا عليا بعد م خدت نفس من الفيب بتاعها
_ايه يا روني عاوزة حجرين معسل ولا ايه اخليه يجيب لك؟
_لأ يا جوجو خليه بليل انا عاوزة حاجة اكبر بكتير.
رد عليا زياد بحماس
_ايه عاوزة تنتقمي من حد؟
قومت ضربت كف ب كف انا وهو
_احبك و انت فهمان يا زوز.
_عيب عليكي اللمعة اللي في عينك دي مبتطلعش غير في الانتقام و بس.
يوسف ساب اللي في إيده و عدل قعدته بحماس
_ايوة بقى خلينا نتسلى بدل الملل ده بس مين؟!
_فاكر الواد اللي كان هيشقلب لي العربيه المره اللي فاتت؟
_اه الواد التنح ابو نضارة ده؟
_هو بعينه ابو نضارة.
_ايوة ماله يعني يا جماعة انا مش فاهمه حاجه.
_الواد ده لما روحت البيت لقيته باعتلي بيهددني
و اني مروحش السباقات دي تاني و كلام خايب
كده.
_طب و انتي عايزة تنتقمي ازاي؟
_هنزل قصاده سباق تاني و هشقلب العربيه بيه و نخلص منه.
جومانا بصتلي بتوتر
_م بلاش يا روني عشان ميتقلبش عليكي الواد ده
شكله تقيل.
_جرى ايه يا جومانا تقيل على نفسه انا مبخافش.
_خلاص يا ستي براحتك انتي حره.
______________________________
في شركه الحاوي/ الساعة 5
_مجتش برضو يا جدو و الاجتماع خلاص.
_معلش يا ملك سيبيها انتي عارفة انها من وقت
موت عمك مؤمن و هي الصدمه مأثرة عليها.
_طب م توديها لدكتور يا جدي يعالجها ولا حاجه انت سايبها ليه؟!
_اصبري بس يا ملك و انا هظبط كل حاجه بإذن لله.
_لما نشوف يا جدي.
______________________________
روحت بليل لقيت ملك قاعدة في الجنينة
تجاهلتها و طلعت اوضتي غيرت هدومي
اخدت مهدئاتي و نمت.
صحيت دماغي مصدعة جامد اوي قومت اخدت
شاور و طلعت لقيت ملك في اوضتي و بتشوف علب
المهدئات اللي جنب سريري
اخدتها منها
_انتي بتعملي ايه في اوضتي اطلعي بره حالا.
بصتلي بعدم تصديق و على ملامحها أثر الصدمه
_مهدئات يا رنا!!
بصيت على العلبه اللي في أيدي تاني ببرود
_ اه ما انا عارفة.
_ايه اللي وصلك ل كده؟!
عليت صوتي و كنت خلاص نفذ صبري
_انتي مالك بتتدخلي في حياتي ليه؟
لآخر مرة يا ملك هقولك ملكيش دعوة بيا ولا
بحاجاتي عشان المره اللي جايه
هتزعلي اوي مني.
سابتني و نزلت جري اكيد هتروح تقول لجدو طبعا.
مسكت موبايلي و قعدت على السرير و انا ماسكه
دماغي من كتر الصداع لقيت الشله باعتين على
الجروب ف رنيت عليهم
_الو ايه يا روني عامله ايه؟
_مصدعة اوي، يوسف هو السج.اير اللي ادتهالي
امبارح دي نوعها ايه؟
_دي نوع جديد كده لقيتها امبارح ف قولت نجربها،
حلوة ولا ايه.
_اه بس بتعمل صداع جامد.
_م هي برضو بتعمل دماغ جامدة.
_طب ايه مش هننزل؟
_اه يلا هقوم البس و ننزل.
_اشطا و احنا هنقوم نلبس برضو.
قومت لبست و اخدت حاجاتي و انا بدندن
باستمتاع لقيت ماما و جدو و ملك قاعدين تحت
ف عرفت انها ليله سودة مش معديه
_رنا انا و جدك عاوزينك خمسه لو سمحتي.
_طيب انتي قولتي انا و جدك ملك بتعمل ايه معلش؟
_رنا اتلمي دي بنت عمك.
_نعم يا جدو انت و ماما عاوزين ايه عشان انا نازله.
_نازله فين،انتي كل يوم تقولي نازله و متجيش الا بليل.
كنت لسه هرد بس جدو قاطعني
_استني يا نوال لو سمحتي سيبيهالي و قوليلهم
يعملولي كوبايه قهوة.
_حاضر يا بابا امرك.
و قامت ماما دخلت المطبخ راح جدي بص ل ملك
_و انتي يا ملك روحي رني على ابوكي قوليله
ميتأخرش النهاردة عشان الضيوف اللي جايين.
_حاضر يا جدو.
بعد ما ملك قامت لقيت جدو بيقولي
_طب و بعدين؟
_و بعدين في ايه يا جدو؟
_و بعدين فيكي انتي المفروض في آخر سنه طب
أسنان هتفضلي كده لحد امتى؟
_جدو لو سمحت انا عاجبني حياتي كده و مش متضايقه،عن اذنك عشان متأخرة.
_رنا مفيش خروج النهاردة.
_و ده ليه بقى يا جدو؟
_عشان في ضيوف جايين و انتي هتقعدي معانا.
_يا جدو بس حضرتك عارف اني مبحبش اقعد مع حد.
_طب انتي عارفة مين اللي جاي؟
_لا معرفش بس هيكون مين يعني رئيس الجمهورية مثلا؟!
_لا يا خفيفة عمك مهدي هو اللي جاي مع ابنه آسر.
_اممم بس هو ايه علاقة انهم ييجو بإن انا مخرجش برضو.
_عشان تقعدي معانا انتي بتفهمي منين؟
_طب هروح بسرعة واجي اقعد معاكم.
_لأ انتي كل مرة بتقولي كده و مبتجيش.
_لا لا المرادي هاجي بجد.
_رنا انا قولت مفيش خروج يعني مفيش خروج.
طلعت الجنينة بعت للشله ماسدج
_جماعة جدو مش راضي يخليني انزل خالص.
شويه و بعتولي انهم بره ف خرجت اشوفهم
_ايه بقى الهزار ده يا روني؟!
_معرفش والله بيقولي عمي و ابن عمي جايين و هقعد معاهم.
_طب و الانتقام طب؟
_خلاص يوم تاني يا جدعان مش عارفه اخلع.
_طيب،عمتا انا شيكت على الأسماء بتاعت النهاردة و هو مش فيهم.
_ايوة صح هو اسمه ايه؟
_آسر مهدي تقريبا.
_بتهزر صح يا يوسف!!!
_لأ ههزر ليه؟
_عشان مستحيل يبقى آسر.
_و ليه مستحيل انا شوفت اسمه في الكشوف القديمه طلع اسمه آسر مهدي الحاوي.
_جماعة حد يقول ان ده تشابه أسماء.
_ليه انتي تعرفيه؟
_عشان ده يبقى ابن عمي اللي جاي النهاردة!!
______________________________
ان ان آن