على كتف القبطان حمامة الفصل الثالث 3 - بقلم رُسُل فَهد

على كَتف القُبطان حَمامه
- رُسل فَهد
..

المُهم ما نگدر بلياك
توجع بَـعدك الايـام ..
" حَامل و بـ بطنها تدوس "
تعال النه الاعذار هواي
طگنا العوز و أنتَ " فلوس "
- رسل فهد
...

بَس صدمني الصوت ...
و اني اشوفه واكف بدون تيشيرت فقط بـ البنطرون
صاح بوجه امي بقوة و يريد عيونه تشوف غير امي بالبيت
ارتكزت نظراته عليه و راد يتقدم امي دفعته بقوه

عِماد : منو لج الحاط عينه عليچ ؟ منو الي يبوگ فلوس ؟
و انتِ منو ؟ گلج ع بعضچ وحده دايحه

رحاب : جوهرة ؟ تحجي هيج ؟ هاي منو كلك ؟ خاف مُراد المهتلف
يالله منا يالله وايدك اذا تمدها ع الباب هيج و تكسره اكسر ايدك

عِماد : هي الام متربية حتى البنيه تتأدب اذا ما اشيلچ على سوايت بتچ
ما اتسمى عماد انتِ و هاي بنتچ الـ ..
بعده ممكمل صاحت امي بـ اعلى من صوته
رحاب : ديالله يالله خاف جاي تبرز عضلاتك يم الحبايب
حتى يصفگن الك صارت قديمه و حفظناها

طلع مُراد من بيتهم يمشي بأتجاهنا سريع
مُراد : هاي شكو شكو ؟ شعندك هنا عماد مو عيب نسوان وحدهن
رحاب : ديالله اخذ الوياك و تحركو منا
بعده مُراد يريد يبررلها و يحچي طبگت الباب بوجههم

للان اني ما مستوعبة شكو ؟
نَفسه الشخص الي مُعجبة بي من يوم الي كعدنا بهالبيت
و الي ياما المُراهقة خلتني ابني كل احلامي ويا
يوكف كبالي و هيچ يجرحني ؟

اباوع لامي تغلط عليه و تدعي عليهم
جوهرة : هو شگاعد يحچي اني ما افتهمت !!
رحاب : كله من جوه راسج و عنادج اكلج خل نشيل ذوله مو خوش عالم
مچلبه يم آميره صرت حتى ما اميز اني امج لو اميرة

جوهرة : هسة غير تفهمني
رحاب : تلگين مُراد الچلب دافعة متشوفي اجه يركض كل ضنه راح أگلبه
لو اگله على عينك حاجب ما يدرون بـ حذاء ذاك ما اشتريهم

محتاره ضليت بصدمتي و بالاهانه الي حَسها گلبي رغم محد يعرف اصلاً اني بيوم فكرت بهالشخص و لا حتى امي تفكر بيوم اني ممكن انعجب برجل
هاي اذا كان عندها وقت تفكر

مُراد احقر شخص عرفته بحياتي من يوم الي دخلنه هالمنطقة لان وصفوها النا
اغلب الساكنين بيها عراقيين و مصاريف الايجار اقل من المناطق الباقية
الاكثر شالو بسبب السُمعة الي صارت بالمنطقة
الي كان سببه ايضاً قلة الدفع الى ان صارت بعض الشقق
مَحط للسُكر و الدعارة

و بعدها سكنت ناس من اهل سوريا زينه و تخلصنا من الكابوس الي چنه عايشي لكن بقت السُمعة تخص هالمنطقة ما نُظفت
لو بوقتها كان الحاله الماديه تسمح چان انضمينه للناس الي طلعت من المنطقة
و خلصت من الُرعب بس كانت الماده تسمح لذلك اضطرينا نتمسك بالمكان الي كاعدين بي

و جان وجود آميره الامان بحد ذاته
آمرإة اكبر من امي مُطلقة بسبب زواجها من شخص فاشل
بين لليلة و يوم ترك ورقة طلاقها و سَافر للخارج وهسه توصلها اخباره
متزوج و عنده اطفال وهي للان تحبه ...

خرجوا من العراق هي و مُراد اخوها بسبب كمية الديون الي متراكمه عليه
و بَس يحصلون مكانه ينقتل !! و هل أتعض ؟ بعد هالشيء ؟
بالعكس للأسوء حياته عبارة عن شُرب .. بَنات لليل ..

يحب أمي من يوم الي دخلنا للمنطقة و يحاول بكل طريقة تتقبله
و اخذ فترة حتى ترك الشُرب و كل هالاشياء و من شاف ماكو نتيجة
رجع لنُقطة الصفر و من اول نظرة لا اني اطيقة و لا هو يطيقني
بس المصبرني عليه آميرة

و هي دگلي اني ما عندي جهال و الله دزچ الي هدية
ادخل على نفسي التيشيرت و بس هي تذكرني بكل روحه للسوگ
حتى قُراصات مال بنات صغار تجيبلي حَسيت وياها بمشاعر
استفقدتها عند أمي ..

قطع الذاكرة صوت امي
رحاب : بدال ما صافنه كومي طفي الماطور و قفلي البيبان
الله ينتقم منك مُراد انكطعت السماعات من وراك انت وذاك العتوي

جوهرة : بس ترى اني ما كايله هيج
رحاب : ادري ادري قابل بيج حظ صدك هذا مُراد ابو البنات يريد
يسوي مسرحية حتى يجي يدافعلنا و ارضى عليه متأثر بالهنود مثلج
ما يدري هو و الويا ما يهزون شعرة من شاربي ولو حافته الصبح

جوهرة : ويعوف الدنيا كلها يروح لهذا ؟
رحاب : و شنو هذا خلگ واحد انگس من مُراد بس يريد الواكفات بالشبابيك
يگلله عفية انت رجال

جوهرة : نوسه و اختها واكفات يباوعن
رحاب : اي هو تلگي كاللهن شوفن شراح اسوي مايدري براشدي انيمه بحظنهن
ضحكت على عصبية أمي لان اكثر شخص تكرها بالمنطقة من بعد مُراد و آميره نوسه و اختها و هن شعور مُتبادل

خليت راسي على المخده و هو مية فكره بي
كعدت على صوت امي بدلت بسرعة و انطلقت لـ بيت آميره
لگيتها مسويتلي ريوگ و مشغله قرآن
بستها بس ما تلگتني مثل كل مره كعدت اكل و هي نطقت
آميرة : السالفة السواها عماد البارحة من ورا مُراد هو الدافعة
مريض و ما على المريض حَرج

جوهرة : آميره هي الدنيا كلها عاكسة وياي ضلت على مُراد
يريد امي بطران مايدري اذبحه و اذبحها و نبقى بالبيت بس اني وياج
ابتسمت و هيَ إبتمست

آميره : لعد شبيج ؟ بعدج ضايجة مو ؟ حقج
كملت ريوك وطلعت

و اني طول الطريق افكر معقولة الدنيا بيها رجال زين ؟
شو كل المرو عليه حُقراء من خوالي لـ ابويه لـ زوج أمي
لـ مُراد و حتى عِماد جنت اخلق اعذار للضحكات الي تنضحك وراي
و هسة ادركت كلها حقيقة

و أنمست النَفس العزيزه نزلت دمعة تنبهني على غبائي مسحتها و واصلت المسير لكيت احسان قلبي موجود وخلص يوم مُتعب

و تمشي الايام مُحمله بالحزن على امل ان يأتي
الفرح يوماً على طبقٍ من تّعب و ليس ذَهب

رجعت للبيت و اخذت من فلوسي الضامتهن يم آميره
حتى اتسوگ مسواگ رمضان و دگيتلها النشرة و رتبت ركنها الرمضاني
و طلعت

و فرحانه بأعلانات زي الوان على المسلسلات الجديدة
دخلت لأمي محمله مسواگ و هي ترتب و السماعات بأذنها
و كلساع تحركهن و تسب مُراد

حاولت اراقبها من فتحت الجهاز و باوعت نفس الاسم
الي يتصنف هم ثاني ينضاف لـ هموم گلبي " إحمد "
نفس الشخص الي على مدار كل هالسنين
أمي رافضة كُل الموجودين هنا و متمسكة بالوضع لخاطره ..

يعني هو صاحب الفضل بـ بقاء امي للان بدون زواج
من و هو مواعدها إما يجي ويستقر هنا إما يسحبها للعراق
و أي خطوة راح تخطيها تكون سبب دمار حياتي

كل ما تجي سنه جديدة اكول هاي السنه اني راجعة و راح الگاهم و تصير
الي عرقله اكبر من الي قبلها اول سنوات بوجودي هنا جنت صغيرة و انتظر اكبر حتى اسيطر لان ما اشوف اي ردة فعل من امي بخصوص هالموضوع
بالعكس حاولت بكل طريقة تخليني انساه بس
" يُستحال للدم ان يصبح مياه "

كانت أمي المرأة التي جار عليها الزمان من كُل الجهات حتى اصبحت الان
مُجرده من المشاعر لا تهتم الا بنفسها لقد اكلوا احشائها وهي على قيد الحياة

لكن هي بدت تعالج الخطأ بـ الخطأ
الي بقى من العُمر مو اكثر من الي راح ولو انكتبت الها الراحه
فـ المفروض تكون بوجودنا مو بالتخلي عنا

و سُبحان الي نزع الحنيه من گلبها و صَبها بگلبي
رُغم قساوتها بس اعذرها لان بس اني اعرف بشنو مَرت

دائماً تراودني فكرة مُخيفة وهي خاف ارجع بيوم من الشغل و الكاها ماموجوده ؟ ويا ترى للان هو لو يحبها فعلاً ليش ما جازف او بدر منه شيء
افكار تريح عقلي و اني أكول اكيد ميريد يتزوجها صدگ
و منتظرة اللحظة الي اشوفه يتركها حتى تعرف بس اني احبها صدگ

مواقف كان المفروض اني اعيشها لكن قَدر الله
و الموازين اختلفت
يا ترى جوهرة لو كان كُل هذا جزء واحد من البداية
فـ متى النهاية ؟

ثاني يوم سولفت لأحسان على رجعتي للعراق بلكي يكدر يساعدني
كان رده مثل كل مره الاوضاع بالحدود نسبة النجاة بيها 2٪؜
جمعي مصاري اكثر حتى تطلعين جواز قانوني
و بعدها فكرة الجنسيه صفنتنا اكثر

من غير مُراد الي صاير عثرة بطريقي و هو يخرب كل فكرة تهريب
وهو يتوعد اذا خطيتيها أخبر عنكم و حقارته سابقته
حُره طليقة اني بس حسيت بشعور الي بالسجن

إنُ انتَ تريد تطلع بس كل الامور ضدك
من غير صعوبة التفكير من يراودني سؤال
ووين راح الگاهم ؟ وهُم اشبه بفص الملح الي ذاب

أدگ البيبان باب باب و أكلهم اخوتي يمكم ؟
لو اخلي التراچي بأيدي و افتر على الولد اكلهم منو منكم چان
صغير و انطاني هاي التراچي الطلعت بالسحبه ؟

لو افتر على كل البنات التوأم و اكللهن انتن خواتي ؟
اني جوهرة الي جنت اشدلچن الشرايط احلى من امي و أني الچنت أبوك فلوس ابوكم حتى اخذكم اشتريلكم علمود متغارون من الجهال الواگفين بالشارع
و عادي خلي ابوكم يضربني و يصيحلي البواگة اهم شيء انتو متغارون

بالليل طلعت بوقت متأخر حتى اجيب صمون للسحور
صارلي هواي مطالعة هيج وقت استغربت الوضع
جان اختياري للبس فضفاض و اني مرتاحه بي رغم اسمع من امي دائماً
التقليد على ملابسي و هيئتي بـ بالي اكون بيوم بغير هذا الشكل لكن بعد ما يرتاح بالي حالي يشبه حال التلميذ المُجتهد وقت الامتحانات يأجل كل الاشياء الحلوة فيما بعد النجاح

اتمشى وَ من بعيد اشوف عماد طب يركض للمنطقة
بـ ملابس تختلف اختلاف تام عن الي متعوده عليه
ضليت واكفة بمكاني اشوفه ينزع قطع الملابس الي لابسها و يشمر بالشارع
لحد ما وصل يمي شمر القميص و الحزام عليه
من صدمتي و أستغرابي لزمتهن شفته طفر على سياج حديقة اخت نوسه
و اختفى و عم الهدوء

لحد ما بدت اذاني تفزرن صوت سيارة شرطه قريبة ردت اركض
و شفتها دخلت بالفرع صارت كل مقاطع المسلسلات تدور بعقلي
اذا ركضت و تركت الملابس راح يشكون بيه عبالهم اني هم مجرمه
و يلزموني و انعدم و امي تتزوج و كلشي ينتهي

طلعت الناس من البيوت و اني واكفة على حطتي اذا أنذبح مل تنوجد بيه قطرة دم من الخوف و الرعب وكفت السيارة و نزلو و هم يشوفون قطع ملابسه
بالشارع و اكثر شي جان بارز الشفقة الكبيرة

و وكفتي وخوفتي الي تخلي حتى الي ميشك بية يشك اجه واحد گلب بالملابس
الي لازمتهم بأيدي بقوة گال وين راااح ؟
ضليت ساكته و اني ما ادري بالنتائج شنو
يلح عليه بالسؤال و اني ساكته كال صعدوها و طوقو المنطقة

مدت راسها امي و من شافتني اجتي تركض يكررون بالاسئلة
و انعقد لساني بسبب الرهبة ما اكدر حتى اجاوب لحد ما حسيت الكلبچة بدت تطوق ايدي شمرت الملابس و سحبت ايدي بقوة و اني اگول
- والله هو شمرهن عليه والله

- وينه هوَ ؟

بين خوفي من الكلبچة و خوفي اذا گلت وين شنو راح يصير بيه
كل ما احاول ارتب حياتي تطلع شغلة تكركبها من جديد اذاني متسمع
غير صوت الضابط و هو يردد وينه .. احجي وينه

اتجهو الجنود على بيت اخر نوسه بعد ما رفعت ايدي و گلت الهم
جوهرة : هناك

امي واكفة تعظ بـ اصابيعها و آميره مطلعة بـ باب البيت واكفة و صافنه ما مفتهمة الوضع ما تكدر تتقدم بسبب رجلها الي متعينها
الى ان طلعو الجنود لازمين عِماد و يضربون بي و هو مُصر يكوللهم مو اني

و يباوعلي بنظرة ليش حچيتي بغَضب
لعد اورط نفسي و منو يسوه حتى اضحي بنفسي علموده ؟

و ما خلصت و أخذوني ويا لان هو اصلاً ما بَرأني و ضل مُصر
يگول اني ممسوي شيء و خفت معقول يحقر و ميكول اني معلية ؟
و يكون السجن نهايتي ؟

لمحت امي و مُراد و ابو سَلام جيرانه رجل سوري آصيل
بديت اسولف المقتل بالحرف الواحد للضابط و من گال
خلوها بالتوقيف للان الشغلة غامضة انطفت كل الدنيا بعيني

دخلت بـ زنزانه تحتوي على مُختلف الاشكال و الاعمار رددت يا رب
محد الي غيرك انتَ وحدك تعرف اني شنو ..

لـ نصف الليل و بدو يقدمون السحور للسجينات
شنو مقسوملي اتسحر بالسجن !!

ما اكلت اجتي وحده گعدت يمي
- ليش متاكلين ؟
جوهرة : اي ما اريد اذا تردين اخذي

- سارقة شيء ؟ لو تشتغلي شحاته ؟
جوهرة : لا ، الله يبعدنا اني بريئة والله
ضحكت و اخذت الخبزة و الشوربه و راحت يم مجموعتها

ويَ طلعت الشمس بده صوت المفاتيح بالباب كلها رفعت راسها
و انتَ تُعرف هزةّ الشارب خَسارة ..
و هَزة المفتاح نَغمة تصير للعاش بـ سجن
فُرصة و انتَ الضيعتني
انا عافيتك صرتلك من أعوفك عُمرك تخلصة تونّ

- جوهرة إفراج ..

وكفت و احس الرجفه صابتني و بس اريد اشوف السماء حتى أگول شُكراً يا اللهي جنت خيرَ كفيل و ما بهذلتني لكيت امي و مُراد ابو سلام واگفين
مُراد : لو ما اني مهدده يعترف جان خلصتي عمرج بالسجن
رحاب : الله يسلمك هو انتَ ويا طنجره و لگت غطاها ما يبرأها اذا ما لازم عليه لزمه اقوى

ضحك
مُراد :خلفلة عليج ام جوهرة هو هذا اليسوي زين بهالوكت
اجرنه تكسي وي مُراد و رجعنه للبيت بدلت بسرعة و رحت للمعمل متأخره
ما حاچوني لان هاي اول مره بحياتي أتأخر

و كانت هذهِ حياة جوهرة مليئة بالمغامرات السلبيه
ويَ رجعتي من الدوام نوسه و اختها بالباب اختها كالت
- ايام قليلة مو كتير و بدو يطلع ساعتها تخبي بحضن الماما

جوهرة : والله عاد اني انسانه منتظرة الموت يوم يوم
أهلاً و سهلاً بي بأي وقت
نوسه : و مين الي قال بدنا نقتلك ؟

تركتهن و دخلت للبيت هلكانه من التعب
امي واكفة تطبخ و اكلب بالتلفزيون ادور بالمسلسلات
ما شدت گلبي غير غدر الزَمن و أغنيتها كانت تتكلم عني شخصياً

و من اول حلقة خلتني صافنه بيها وبسبب اجواء رمضان تغير نظام شغلنا
و صارت الرجعة الساعة السادسه مساءً
و اني اطلع قبل بـ وقت حتى حتى اوصل للبيت قبل لا تبدي
لان بوقت الاعاده اني نايمه

اباوع للزمن صدگ غدرني مو خوش غدره
و أحس بس اني شايله هم البقية يا ترى يجي اليوم الي اضحك ع الدنيا ؟
و أگوللها انتِ مو گدي !!

طفلة صغيرة موجوعة
غَفيانه ما بدها بتوعى
تعبانه ، زعلانه خَبت بالبسمى دموعا
يا زمان أتركني بحالي
غدرك حطم الي إيامي

واكفة گبال التلفزيون بملابس شغلي و شكلي التعبان و اردد الاغنيه
بصوت اعلى من المُغنيه
رحاب : لو ترحين تقدمين بهاي البرامج بلكي تنقبلين مطربة
احسن من شغلج بالدبكة و المربى

جوهرة : و اوكلج انتِ و أخواني حَرام ؟
رحاب : بعدج بالاحلام ؟ و منين اجوي اخوانچ ؟
جوهرة : ليش مو كلنه من بطنج اجينه ؟

رحاب : اذا بيوم اجه احمد و رجعت للعراق تجين وياي ؟
سكتت و بلعت ريگي بـ غصة
جوهرة : و تعوفيني وحدي ؟

رحاب : شسوي الج اجيتج بكل الطرق ما تقنعين
ردت ازوجج و أمن عليج ما تقبلين ردتج تروحين ويَـ ام نوسه ما قبلتي
جوهرة : اي و ام نوسه تتفتر بيه على الزلم عندج عادي اهم شيء انتِ خلصانه و مرتاحة

رحاب : لا يجوز الله يهيئلج واحد من ذوله الابيه و تعيشين ويا احسن من الفكر
الكاعدين بي هسة !!
جوهرة : الظاهر انتِ المراهقة هاي غسلت عقلج والله على گلبچ
و اعيش و اموت وياج لتتوقعين بيوم اتخلى عنج لو اخليج تتخلين عني

رحاب : اش يالله اش سدي حلگج
تركتها و دخلت حتى اسبح و احس المي جمر من حرارة گلبي
اذن الاذان و ما قبلت افطر حاولت هيَ وياي مرتين و من شافتني معانده تركتني

الم رجلي بسبب الروماتيز فضيع
اكلت لگمتين و رجعت نمت على آمل تجي لحظة ترفع الغطى من راسي
و تگلي ها يُمه شيوجعج ؟

و قررت اشتغل شغل ثاني حتى اكدر اقرب مسافة رجوعي للعراق
و اشوف منو يساعدني و يخلصني من مُراد لان عماد اذا طلع مراح تعدي على خير و مايرتاح الا يطلعنا من المنطقة

حتى لو كانت الحياة بالعراق اصعب بس على الاقل
الزم خيط من الموضوع البُعد احد اسباب النسيان

و ما إأمن بشخص هنا غير بـ احسان
و هو مُصمم الا يرجع ويانه للعراق من غير الاوضاع هنا
للاسوء و العراق ايضاً ما يبشر بخير

كعدت بالكراج الصبح خرز الاسوار بأيدي
انشلعت اللاستيكة و اتجهت للخيط و كعدت ارتب بيهن واحد
واحد سوار سوته الي بنيه ويانه بالمعمل
بين كل خرزة و خرزة حَرف اعز الناس على گلبي
الاول كان حرف أمي

و الثاني حرف R راكان
الي هسة صار شاب يا ترى يتذكرني ؟
يگول أختي وين ؟ هو مو صغير حتى ميتذكر ؟
شوفته اشتريها بعمري

و حرف B و Z
براء و زهراء
بدون خرزة بينهم لان هنّ توأم
بناتي مو بنات أمي كبرتهن على أيدي
يتذكرن حناني و حُبي الهن ؟ و هسة هنَ بيا أيد صارن ؟
بعدهن سوه لو تفارگن ؟ يفكرن بيه مثل ما افكر بيهن ؟

اتذكر بـ اخر لحظة كانت بينهن و بيني واحنه مصممين نشرد سوه
بعد ما سحبتهن سُميه و سعيدة من ايد أمي و أيدي بحجة
القارب ميكفي و فلوس ما عدنه الج حق تاخذين واحد بس

مدت ايدها امي حتى تاخذ اركان دفعتني سُمية عليها
سُمية : اخذي الجبيرة و اشردي يردون يذبحوها اول وحده
ذوله صغار اني اضمهم بين ما ادزهم الج

صاح الرجال يالله
و اخواتي يبچن عليه بس أركان چان واكف بدون اي ردة فعل
وصلنه للدولة الي أتجهنه الها بدون فلس واحد

مَرت علينه ايام و أمي تاخذ خبز يابس من البيبان
اكو ناس تخلي گواني خبز بين ما يجي ابو العتيق ياخذها
و تنگعها بالمي و ناكلها
و بدت تشتغل من خياطة لـ عاملة بصالون لـ عاملة بالبيوت

لحد ما مَره توازت على فلوس علاج لـ كلياتها الي أنعدمت بسبب
ضرب ابوية الها و مدت ايدها لوحده من البيوت و ام البيت فضحتها
و حرموا عليها دخول المنطقة كلها

و من يومها عزت عليه نفسي اخلي امي بهيج حال
جان العوز بجهة و سُمية و سعيدة الي غدرن بـ أمي
بعد ما عجزنه حتى نتصل عليهن جانت سُميه تطمنا الاطفال بخير موجودين
و تتحجج بأنقطاع الخط اول منگول خلي نسمعهم
من عندها و عرفت الاطفال مو يمها

امي صابها برود اتجاه كلشي بالدنيا و اني روحي تفور
صرت وحدي اشيل روحي و أضربها بالگاع من أكوللها
يمه خاف باعن اخواني ؟
رحاب : الله وياهم

لحد ما وصلتنا اخر آخبار گُل البيت باعو بعد الفضيحه الي صارت
و الاطفال كل واحد بايعته بسعر انهاريت و ايدي ترجف
و اني اهز بچتف أمي اريدها تبدر اي ردة فعل

و أنهاريت اكثر من سمعتها تگول
رحاب : من ساعة الي الي ما خلتهم يرحون عرفت تريد تبيعهم
جوهرة : و لهذا السبب ردتي تاخذين اركان
و تضحين بينه
- أي

توقعت بيومها من القهر هذا اخر يوم بحياتي
بس رب العالمين زرع الصبر و الامل بگلبي و هذا يوم و هذاك
يوم و اني أنتظر اليوم الي أوگف گبالهم و اذكرهم اني منو
و كل ما تزيد سَنه يحترگ گلبي أكثر

قطع ذاكرتي صوت امي و هي تشعل الجداحة حتى تحمي الچاي
بدلت و طلعت يم آميره الوحيده الي احچيلها كلشي بدون تقيُد
نهت الحديث و هي تمسح بدموعي و تردد
يا فرَح جيب شموعها
و ينزلن بساع بساع
حلوات حتى دموعها
تحچي و تصفگ بضحكه مرسومه على وجهه

آميره : مُراد راح يسافر لو بيج روحه للعراق ما تستعجلين ؟
جوهرة : فلوسي متكفي آميره اذا ادفعهن ما يعيشني الباقيات شهر بالعراق
آميره : هاج اخذي ذهبي بيعي

جوهرة : وشلون اعوفج ؟ خاف ما ارجع بعد ؟
آميره : روحي هسة و أگطعي الشك باليقين اسألي المنطقة الچنتو
بيها كاعدين والعالم بلكي الله لن ملتفت الج و تلگين شيء
السنين تطب منا و تطلع منا و كل ما تزيد البعد يقوه

حتى تتجهين لروحج و تعيشين حياتج يجوز هم مرتاحين اتطمني عليهم و ارجعي لهنا تردين تستقرين هناك بكيفج حتى تتزوجين و ترتاحين
بلكي عمرج الجاي احلى من الراح

بدون كلام بستها بقوة و رحت لامي اركض ما همني الزعل
لزمت ايدها
جوهرة : يمه يمه مُراد راح يسافر و اميره أنطتني ذهبها خلي نرجع
للعراق يجوز هاي رسالة من رب العالمين سهللنا الطريق

و چان الرد ما مُتوقع منها
سحبت ايدها من ايدي و نطقت ..
رحاب :

لا تقلقوا
حتى و إن مَس الظلام فؤادنا
سَتُنير شَمساً خُبئت للروح
بين الاضلُعي
...
رسُل فهد

مُلاحظة / جميع الاشعار و النصوص التي تحتويها الرواية
فصيحاً كان و شعبياً هو بقلمي إنا

حسابي الانستقرام