على كتف القبطان حمامة الفصل الثامن وثلاثون 38 - بقلم رُسُل فَهد

التَصويت و المُتابعة لُطفاً
عَلى كتِف القُبطان حَمامة
- رُسل فَهد
...

فصيحاً :
كيف أعود اليك ؟
و البضاعة التي تعود لبائعها على الاغلب تكون بسبب
انتهاء صَلاحيتها

شعبياً :
إتمنى اردلك بَس صعب
منتهية اكيد الي
سلعة اذا رجعت على الباعوها
و البوگة زَحمة من الاهل محتار تبقى بفشلتك لو تلزم الباكوها ؟
- رُسل فَهد
...

جَوهرة
تُراب : گومي جوهراا
أستغربت و خفت الدنيا ظَلمه مديت ايدي اله وطلعت
ماكو احد على حافة السَفينة هو يباوعلي و مبتسم
وصلنه لنهاية السفينة وكفت فاتحة عيوني
جوهرة : اريد تشمرني بالبحر تُراب ؟

جان لازم ايدي هدها و لزم خاصرته من كثر الضحك
تُراب : مَا عيب ابو الجواهر اكو واحد يشمر روحة
جوهرة : اي اكو ينتحرون ، مو اني اخاف منك والله
تُراب : تتعودين المَلحة

باوعتلة بنظرة انتَ شتريد هسة ؟
لِزم خُصري و رفعني على الحَافة شكل الروج القوي و البحر مُخيف
درت وجهي بسرعة اريد انزل صار هو وراي ثبت جسمي بأيدة
و حُضن خُصري

جنت لابسة فستاني الزيتوني الجديد
و الربطة بُني باوعتلة بخوف و هو مَد ايدة على بطني
تُراب : مَـا دام القُبطان موجود عٍيب على الحَمامة تخاف

أبتسمت و لزمت ايدة الي على بطني بقوة
وجهة صار قريب على أذني ولما يتكلم احس بـ بحرورة أنفاسة
عكس الجو البارد
تُراب : تحبيني جوهرا ؟
بقيت ساكتة ثواني و احس حتى اني احتريت من الخجل

درت وجهي و طَخ خدي بـ بوجهة بسُرعة طُبع بوسة بخدي
بعدت وجهي و بِست خَدة
جوهرة : أحبك تُراب

بدون اي كلام منه بس جانت نظراته تتكلم عن فرحتة لزم ايدي الي جانت على ايدي و رفعها بَخط مُستقيم و هو لازمني
واجهتنة نسمة هواء قوية و باردة غَمضت عيوني و احس خشمي
صار قالب ثلج على لحظة و حسيت نفسي حَمامة و ايدي
جناحات

جوهرة : احس روحي حمامة
تُراب : هو انتِ حَمامة
جوهرة : الله ياريت جانت طرت وي ما اريد
تُراب : و مِن تتعبين توگفين على چتفي

احس الوظعية عجبتني و بقيت مغمضة و اتخيل لقائي وياهم
راح يكون مثل ما اني مخططة لو لا
تُراب : جاك و روز بالنكهة البصراوية

جوهرة : منو هذولة ؟
تُراب : ابطال فيلم التايتنك حقج ما تعرفيهم انتِ محتارة بأخوانج
لزم ايدي ونزلني الحجي الي يقود السفينة لوح لتُراب بأيدة
هو ابتسم واخذنا بأتجاهة
تُراب : يالله كابتن روح نام ساعتين اني كاعد هنا

دخلنه للغرفة عبارة عن اجهزة
هو يضغط و يعلمني
تُراب : ادري ببالج سؤال و حازة بكلبج ليش عفتج بدون ما اكول
باوعتلة بنظرة بدون اي كلام

تُراب: لان خوفج ما راح يخليني اروح و اني دموعج ما اكدر عليهن
سكت و مسح شورابة و كال هو اني عيونج بدون شيء ما أكدرلهن مو النوب دموعج
جوهرة : شكد دعيت عليك بوقتها

تُراب : مو من كلبج ما يستجاب ، اي فـ اعرف راح ابقى مكابلج و ما اروح و اني الولد منتظريني حدي لليل حتى نرجع
وهم ضامن انتِ بـالبعد راح تعرفين روحج تحبيني لو لا

لان لو متحبيني جان جمعتج وي اخوانج و ترخصت
باوعتلة بقهر
جوهرة : و تطلگني ؟

تُراب : طبعاً لا ماعندي نسوان تتطلگ بس ابقى انتظرج شوكت ما الله يهديج و تحبيني اني بالوجود
انرسمت الابتسامه على وجهي و ضاع كل الكلام
اجيت احضنه باوع للجام وعَض شفته
تُراب : شو صايرة مُنحرفة

جوهرة : من عاشر القوم صار منهم
ضحك و گرص خشمي
تُراب : يالله روحي يم اميرة لا يسطي عليها الحجي
ضربته بقوة و طلعت مبتسمة ميعرف يحجي اذا مو هيج

لكيت اميرة بعدها نايمة
الفجر جاب النه ريوك اكلت و نمت و اميرة بقت كاعدة
ويا فرحتي من كعدني لان وصلنه اني لازمك بأيدة وهو يستحي من جماعتة و بنفس الوقت ما يريد يضوجني
تُراب : لزمي اميرة خطية

جوهرة : كول ما اريدج
تُراب : انجبي بس هذولة يباوعون عيب
تركته و رحت يم اميرة لحد ما عبرناهم اجه هو من وحدة
لزم ايدي
جوهرة: وخر ايدك لازمة اميرة ما اكدر
ضحك وگرص زَندي

وكفنا على صفحة و راح جاب سيارته اباوع وكل ما تعود بية الذاكرة
الكا يباوعلي و اخدرك كأن يعرف اني بيمن افكر
الطريق مو طريق بيته
- وين ماخذنه
- لامج

احس فوضى مشاعر بداخلي خاف يكون حضنها و سلامها بارد و اتفشل كدامهم و خيالي القوي يتخيل امور ما تتسولف
صرت اتخيل ما نلكة امي بالبيت ونويرة دكول تزوجت

نزلت للمنطقة الله ذكريااات
من كثر ما تنقلت صار عندي بكل مكان ذكرى
عُمال تارسين الشارع يرَممون بيت
من شافو تُراب كلهم سلموا عليه دخلنه اني و اميرة و هو بقى برا
يحجي وياهم

فتحت الباب النه نويرة
و اخ يا ذيج حَضنتها كأن تشرحلي شكد هي مشتاقتلي
بكد ما جانت حلوة بكد ما أتمنيتها من أمي
شلون اشرحلج اني سبب جنت بدمار فرحتج

درت وجهي أدورها بالاستقبال
سمعت صوتها صدر من وراي درت وجهي وهي واكفة باب المطبخ
رحاب : جوهرة
- يُمة

وهاي اول مرة احب احساسي من يخطأ
و حضنتني الحَضنة الي ياما و ياما اتمناها
وهي تغلط على تُراب تريد تشوفة و ترزلةً
جوهرة : لا يوم ترى والله خوش رجال
رادت تطلع ترزلة سمعت صوت اميرة لان هي و نويرة دخلت للاستقبال

رحاب : هاي اميرة لو اني غلطانة
جوهرة : لا هي ، مُراد اخوها مات و محد الها جبتها وياي
رحاب : مااااااات ؟ الله يرحمة
دخلت سلمت عليها و اني رحت قدمت مي

بعدني اول ما خليت الكلاص سمعت دگت باب الممَر
تُراب : يا الله
نويرة : فور خالة فوت عيني
تُراب : السلام عليكم

ردت نويرة بس امي لا
تُراب : على كيفج ام جوهراا
رحاب : الله يسلمك خلصت ان شاء الله من خوالك
جوهرة ما ترجع وياك و طلاگ تطلگها

تُراب : جوهرااا اني شگايل ؟
جوهرة : يمة ما عدهم نسوان تتطلگ
نويرة و اميرة ضحكن و امي خازرته و خازرتني

رحاب : جا انتِ صمتي صمتي تفطرين على راس بصل ولج
شحصلتي منه شو لا زفة لا هلهولة لا حامض حلو و لا شربت
تُراب : هسة اذا عَلى الهلهولة تدللين و اذا على الحامض حلو و الشربت العصر هن يمج

رحاب : تعذرني والله اني ما جايبتها من الشوارع حتى تاخذها هيج
هي بنتي مضحك
تُراب : اويلي ، يالله ابقي يم امج اني بالليل اجي
رحاب : والله ولا تجي تصرف بانزين بدون نفع

تُراب : بكيفها
طلع و بقيت حايرة اباوع لامي و اباوع ورا
تركتهن و طلعت و ورا ابتسم كأن جان يعرف اني راح اطلع ورا
جوهرة : لا تعوفني ابقى
تُراب : امي مشتاقلها لازم ارجع للبيت و انتِ ابقي يم امج
شوية هم الها حق

جوهرة : خاف تعوفني و تسافر
تُراب : حبيبتي المَلحة ما تنچبين

صعد بالسيارة و اني أباوع مقهورة ما اريدة يروح
فتح الچكمچة و طَلع فلوس وسوار
تُراب : خلي البَت هذا يمج حتى تعرفين راح ارجع
جوهرة : بالليل تجي اروح وياك
- صار

اخذتهن منه و دخلت
امي تعد و تصف عليه عرفت بكلبها محروك منه مو بس عليه
على احمد اكثر
نويرة : اذا مرته تريدة انتِ شعليج انا كلت يجوز حتى هي ما تريدة
لا هنا صدك ما نخليها تروح

جوهرة : لا احبة و اريدة وهو يموت عليه حتى لگالي اخواني و رجع فلوسنه من احمد الحرامي وكلشي اريد يسويلي ليش اعوفة
رحاب : ولج هذا الوداج للموت برجلج وعقد عليج واني ما ادري
و حبسج يمه هاي الشهور كلها وين فلوسج هسة احمد حراميً
الفلوس مو الج قسم بيهن ليش انطه بس لاميرة فلوسها
احاجي يكلي هذا الموجود انتِ جاي تشتغلين شتسوين بيهن

جوهرة : لا هو مو حرامي هسة يالله مو زين رجع فلوس اميرة
و اني وديت روحي للموت هو كالي ارجعي بس اني فضولي
كبر السالفة وهو ما حابسني ترى اني يمه مرتاحة
رحاب : و تدافعيلة طاح حظج اي والله

اميرة : والله واحد يحجيها لله الولد خوش ولد
رحاب : خاف انتِ هم نصب عليج و صدكتي لكه اخواتها
هاي البطرانة هو من حاجبة المطبور اني غسلت ايدي منه

جوهرة : هو احلى شيء بي حاجبة المطبور
امي بقت صافنه و اميرة تضحك
نويره: كككللليييششششش سبحانة مغير الاحوال
جا ياهي الجانت توكفلنه على الكحلة و الديرم ياااا عفو لحظي
و لقسمتي

جوهرة : يعني اني احبة بس بعدني ما وصلت
مرحلة المكياج علمودة وهاي هو وكع بحبي ترى و اني بعدين حبيته
يعني بعدني نفس شخصيتي

اميرة : و البواجي عليه تالي الليل
بقيت ساكته و هن يضحكن عليه بالي يمة
الظهر نويرة تشويلنه سمج بالكراج و تسولف العمال فوك مبينين
لان البيت كباب بيت نويرة

تريد تطلع و الا البس عبايتها و اني اجيت يمها
رفعت راسها عليهم
نويرة : خالة بعد امكم و اسمها ما تنزلون شوية اريد اشوي السمجات
كامو يضحكون و نزلو

فتحت الباب و مدت راسها
نويرة : لا تجيبون هواي غده راح اشويلكم وياي سمجة
ضلو يتشكرون منها و اني واكفتلها صفح
جوهرة : يعني نزلتيهم و طلعتيلهم من الباب خو كولي معجبة

ضربتني على ايدي
نويرة : من خفت و عابت هاي الخلقة ولج لو متزوجة و انا صغيرة ذوله بكد ولدي هم اصغر بعد
جوهرة : هو انتن مَن تكبرن دكومن تدورن صغار
نويرة : هو المره بالاولى اذا ما كعد حضها لا تنطر الثانية
و انا خالتج وين ما تحطها سودة مصخمة

تغدينه و ودت للعمال سمجتهم
و للعصر احنه كاعدين نسولف
نويرة : فاتتج يالخُنفسانة ذيج الهوسة
غير امج كعد الها واحد بعتبة الباب ما يرضى يتحرك الا ترضى بي
حطيت ايدي على خدي صافنه

طلعتله امج بالبداية حجي هو جبير اضنه مسودن لان حركاته مو مال صاحي يابة عدل بدل روح تعال ابد و لا يقتنع عبالة امج وحدها بالبيت كام يكسر بالبيان و انا تدرين بيه كلشي و لا سمعة باب بيتي

والله اخذتلج ذيج التوثية و طلعت كتلة شتريد تدك بـ باب بيتي
كال انتِ منو و انتِ ياهي
كتله انا نفسها بس مسحت المكياج
كام يمشي و يعيط و يلطم على راسة بالمنطقة

تمددت بالكاع من الضحك ما قاومت
نويرة : و مرة مشينا انا وياها و اثنين بكد رجلج چلبو يم السوگ
انا طنشتهم بالبداية كان كولي يالله هسة يرحون
امج سرحانه بأحمد تدرين بيها بالها مو يمهم

كام يأشرلي بشكد السعر مادري شيسوي هي هاي حركاتهم الوسخة
و انا نويرة و واحد اعلى ثيابي داس والله بيدي السجينه و اجيت عليهم انا كضيتلج واحد من ياخته و الثاني شرد
كتله هسة اطببها بكلبك ما هديته لحد ما فته يريد يبجي
كلبي رهيف ما كدر

وهذا يوم و ذاكَ يوم بعد ما فاتو عتبة السوك
انا من اتوبلي واحد البقية كلها تتوب هذوله الـ بالسوك من الخوف
من افوتن حتى سالفتهم يكطعوها

سولفتلها على عماد
نويرة : جا طبعاً غير انتِ عشتي يمي اخذتي اطباعي
سمعت بقصة اميرة و زوجها الي هجرها و تركها كامت تبجي نويرة
نويرة : يخية احنه نخلقنه للضيم

جوهرة : هسة انتن ثلاثة ناقصجن ام تُراب شايفاتها شكد لطيفة ؟
تجنن و من كد ما تحبني نطقت بأسمي اول اسم لمن نطقت
و كعدت اسولف لنويره و امي قصتها لان اميرة مسولفتلها
كلش انقهرن عليها تمددت اميرة نامت و نويرة لازم تنام لان هذا جدولها

اجيت يم امي خليت راسي بحضنها هي تسمع اغاني بالسماعات
جوهرة : يمة ترى لا عبالج تُراب مستغلني هو كاعد يبني النه بيت و راح يسويلي زفة و كلشي بس التقي بأخواني والله هو كالي
رحاب : اي كلش عاد و انتِ بساع صدكتي

جوهرة : يمة اني اريد اروح ويا حتى ياخذني لاخواني
انتِ تدرين بَراء متزوجة و اسمها الماس و راكان ما قابل يغيرون
الاسم مالته الناس الي تبنو تذكرين هذا الاسم ؟
باوعتلي عاقدة حواجبها
جوهرة : تتذكرين شكد تعاركتي وي عمار على هذا الاسم
يالله قبل تسمي

رحاب : رَاكان
جوهرة : هسة صار رجال بالكلية وامة الي ربته تبجي عليه و تريدة
بقت صافنه و ما حجت اني غفيت على حضنها لان ما نايمة هواي
و بين النايمة و الكاعدة اسمع صوته قريب

اني نايمه بالارض و متغطية فركت عيوني لكيته كاعد
يحجي وياهن منطلق لابس بنطرون اسود و بَدي ابيض
باوعلي مبتسم و رجع كمل حديثة وياهن
طلعت بسرعة اغسل و امشط شعري

صعدت فوك شفت ملابسي القديمة الله مشتاقة الهن و دخلت اسبح
و ادعي كون اكشخ و اكمل و محد يصيحلي
طلعت بسرعة رحت لمكياج امي خليت خفيف و ولميت شعري وخليت عُطر عند امي مسكارا اخر شيء ردت اجازف بي
اهلي و ايدي ترجف بس شفت النتيجة انصدمت
اني انحسرت بعيوني هو شلون ؟ ...
احس حتى الحيطان تگلي شنو هالثقة

باوعت لروحي معجبة بيها
نزلت امشي اطگ بكعبي على الدرج هُو جان يحجي سِكت
و بعدها رجع يحجي دخلت للاستقبال بقيت واكفة يم الباب
هو منطلق يحجي ومن دخلت باوعلي
مسح وجهه بكف ايدي و حَك شواربة و بعدها رجع يحجي مبتسم

انتبهت على الموضوع هو يحجي الهن عن خوالي وشصار بيهم
بعد ما طلعو من بغداد و نويرة تصيح حيل جا هاي حوبة الايتام
امي صافنة ولا تحجي شيء كلت بلكي يحن گلبها
هو كام ترخص و باوع لامي
تُراب : هسة اخذها لو لا الا انتِ تقبلين

نويرة : اخذها ما تشوفها متحضرة
رحاب : اخذها بس توفي بكلامك و تنطيها حقها مثل باقي البنات
تُراب : مَاعيب ام جوهراا انطيتچ حچاية بَعد

باوعلي و كال
تُراب : يالله وين حجابج
اشرتلة على اميرة
نويرة : تبقى يمنه تسد وحشتنه قابل شعدنه احنه
اجيت يم اميرة اشوفها مرتاحة لو لا كالت والله مرتاحة
جوهرة : اني يومية اجيجن

صعدت فوك البس الربطة نزلت لكيته واكفلي بالباب
باوعلي اربطني وأشر على مَكان الصدر ما متغطي زين
غطيته و بست امي و طلعت
صعدت بالصدر و انطيته السوار رجعة بالچكمچة

تُراب : اويلي ، كاشختلي المَلحة
جوهرة : وشنو خاف عبالك علمودك
ضربني على راسي بخفة ايدة
- لعد المن المَلحة شو صايرة فد مرة

جوهرة : اي شنو اني بحالك والله يا الله
باوعلي مصدوم وكف السيارة
تُراب : لو ما ادري بيج ما تعرفين شجاي دكولين جان
حركتج انتِ و السيارة

جوهرة : وحدك لو بس انتَ
تُراب : المَلحة بنت رحوبة تدورلي شغل لبناني حتى خوش
جوهرة : هذا تفكيرك وبعدين تستاهل شكو تعوفني
تُراب : ها يعني الـ يعوف مرته لازم من يرجع يلكاها منتهية
هزيت راسي بـ نعم حتى اغثة

تُراب : جوهرا
درت وجهي عليه وهو يسوق و اني مبتسمة لان نرفزته
جوهرة : نعم
صفگني راشدي ما يوجع بگد صدمتي
- ادبسز

جوهرة : تضربني ؟؟؟
النوب بوكت الضربة اجتني حالة الضحك اريد اكون جدية
بس الضحكة مامخلية هيبة هو يسوق و مبتسم
تًُراب : اضحكي اضحكي على روحج

جوهرة : خرب تُراب تضربني عبالك انساها الك
هسة نوصل لو منوصل
تُراب : بيج خير لا تأخرين ثارج
جوهرة : اعلمك بسيطة اعلمك اذا ما خليتك مثل دعبول اني ما افتهم

ضحك بقوة وصلنه
نزلت و اني معصبة لكيت البيت الي كبالنة بـ بابهم سيارة و صوت بنات عالي باوعت ليفوك البنات طالعات على البلكونة مو كلش كبار
اعمارهن هيج ١٤ ، ١٥ جانن ثلاث بنات و بس يتبسبسن و يضحكن

باوعلهن تُراب اباوع هذني تغيرت ملامحن وحدة تعدل كذلتها
و الثانية ختلت وراهن مستحية
تُراب : انتن عمو شعدجن هنا صاعدات يالله طبن جوه عيب
راح تجي الشباب هنا تلعب طوبة

سكتن و طبن جوه يضحكن وحدة تدفع بالثانية
بقيت صافنة و هو يهز بأيدة دخلت قبلة شافني ابوو ضِحك
ابو تُراب: يا هلاااا
ما كدرت اشرح اشتياقي حضنته و حتى هو انصدم
باسني بجبيني و سمعت صوت دعبول جوه

اباوع لمكان خالة ما هيَ طلعت من الغرفة ركضت الها
و حضنتها بقوة بس مو اقوى من حضنتها الي
جانت كأن تريد تدخلني بروحها كامت تبجي و اني دموعي ما لزمتها
لزمت ايدها امشيها

سُعاد : شلو شلونج حَـ حَبيبتي
جوهرة : انتِ حبيبتي و حياتي اني زينة شلون صرتي
كعدت على القنفة وكعدت بصفها اشرتلي على صدرها
تُراب : خلي راسج هنا
خليت راسي على صدرها تحديداً مكان گلبها

تُراب واكف و مكتف ايده مثل الطالب الي منتظر امر من مُعلمة
وهي دايرة وجهها عنه و تحجي وياي
جوهرة : انتِ زعلانه على تُراب مو ؟
سُعاد : اي

تُراب : اني ادري العمة تفضل النسيب على بتها
بس مال ام تحب چنتها اكثر من ابنها ما سامع
سُعاد : امـ امشي
تُراب : ترى بعد مابية صَبر بعد شبگيني يُمة

دارت وجهه عليه و اجة راد يوخرني و يكعد بمكاني ضربت ايدة
تدنيت و هي تدنت و كعد بصفها من الجهة الثانية
احتار شلون يبوسها مثل العطشان الي يخلون گبالة كلاص مي
خلت راسة على الجهة الثانية
و يبوس بـ ايدها

تُراب : مشتاقلج كلة علمود المَلحة هيج تبعديني عنج
سُعاد : ما تستاهل هـ هيج يصير بـ بـيها
تُراب : شبيها هاي مو بصفج تدور شغل بالوشوم

ضربته على ايدة و هي دكلة لا متسويها هاي الطفلة
شوية و انفتح باب الحمام طلع دعبول يخزر بـ تُراب
و اجه يباوعلي من شافني رفع ايدة ليفوگ
دعبول : يبوووو هم المَلحة لا هلا و لا مرحبا

تُراب يضحك و يأشرلي اش
دخل ابو تُراب بأيدة درنفيس
ابو تُراب: هاي عليمن لا هلا و لا مرحبا على چنتي ؟
شو انتَ ما طايقك اني
تُراب : شونك يابة

ابو تُراب : الله يسلمك تعال انتَ و ذاك يالله تعالو
حجاها و دار وجهة دعبول يهدد بصوت ناصي و يسولف لتُراب على ابو و تُراب يبوسة ويقنع بي

اخذهم للكراج و طَلع الصوبات ينضفوها
تُراب يكلة والله بعد وكت كوة تريد تجيب الشتاء
و ابو ما يقتنع بعد خلة شيء براسة

بقينه كاعدين اني و امه و ابو بالصالة نسولف
و هو ودعبول انكربوا
رحت بدلت و رفعت شعري و بديت انظف بالبيت
ر الغرفة تُراب هاجمها هَجم حتى ملابس ناثرها

لازمه الفرشة و اجلف و اسمع ابو يصيح
ابو تُراب : امشي ساعد مرتك مو ضال تخيس و هي تنظف وراك
اجه تُراب ما يتحاچة من ورا ابو نزع البنطرون و البدي
تُراب : سدي الباب يمعودة مو عداج ندارة
جوهرة : كاعد انظف والله اعذرني

سحبت الميز واجلف
ابو تُراب : شو كاعد وين تكدر هي وحدها
تُراب : شنو يابة صغيرونه هي لا تعرف شنو اجلف شمعرفني
- كوم نظف الشارع يالله
تُراب : مابية حيل ابدل بعد نزعت

ابو تُراب: امشي اصعد سوي الاشارة
تُراب : يعني اهم شيء ما اكعد عسى ما افلش البيت
بس المهم اشتغل
ابو تُراب: جا شتريد تبقى مدلل و تخلف مسربتين مثلك هم مدللين
و تبقى هاي الطفلة هي و بناتها يخدمن بيكم

تُراب : امهم و بناتي نمون عليهن
سُعاد : عـ عوفة تعبان خل يكعد
ابو تُراب : هو انت المدلل مالتها منو سَقطك غيرها

اني بس اضحك و امسح كملت البيت و عَطرتة و دخلت اسبح حتى اسويلهم عشاء تُراب نايم صبيت و كملت و صحت لدعبول
و رحت حتى اكعدة بالكوة كعد
اجه كعد ويانه يتعشى
ابو تُراب: متاكل زين خاف لان كاعد ويانه طبعاً احنه مو من مقامك
تُراب : كول يابة حبيبي ليش متاكل لو متعرف يابة

ابو تُراب : اكل يالله
دعبول : هسة ما تعوفة مو راح يهج خلي كاعد يمنه
-اش انتَ لك مو صايرين حزب
دعبول : تعال روح ودي جيبو امشو نظفو
ابو تُراب: و غصباً ما عليكم و انتو الممنونين

تُراب اشر لدعبول يسكت سايگ عليهم عمي
جوهرة : عمو
ابو تُراب: ها حبيبتي
اباوع لتُراب يضحك هو و خالة

جوهرة : الساحبة تشكل قبل لا اروح جانت هيج
و هسة صايرة فد مرة
ابو تُراب: بعد شوية اشوفها

خلصنه عَشاء و بده كلمن يستقر بمكانه و دعبول حاضن تُراب ما يقبل يعوفة دخلت للغُرفة ابدل حتى انام وكفت كبال الميز
حطيت عُطر و أنتابني شعور اشوف شنو بالمجرات
رغم اني هواي ادخل و اطلع من الغُرفة بس ما افتحهن

جان المجر الاول عبارة عن اوراق
اباوع الهن و اقرا بعدم فهم لحد ما سحبت ورقة ملونه من بين الاوراق
و يا ريت ما رفعتها ...
....

الماس
رجع اندك الباب كال استغفر الله نسيت حتى الواكفين بالباب
عبد العزيز : گومـي يَـا عزيزة عَيني
راح و اني بعدني نايمة بمكاني شلون صار هيج
شلون راح اباوع بوجهة بَعد و شلون المتزوجات عندهن الحياة طبيعية
شلون اصير مثلهن

اسمع صوت عمي ضُرغام كعدت واعض بأصابيعي
دخلت عليه نبأ مبتسمة
نبأ : شلونها عروستنا الحلوة
الماس : اخذيني وياج نبأ بداعت بناتج

نبأ: يا ولج ليش شكو
كمت ابجي وسولفت الها
نبأ : يا غير كلتي علمج لعد انتِ لوتية
هذا امر مكتوب على كل المتزوجين كولي يا الله شنو بيج شيء ؟
الماس : ولج شلون اباوع بوجهه بعد

نبأ : هههههههه عود لا تباوعين نزلي راسج
الماس : عليج الله انتِ شسويتي شلون كدرتي تعيشين اني هسة
اتمنى اموت من المستحى
نبأ : اي عادي كلنه استحينه بس هو رب العالمين من يمه ينزع الخجل بمرور الايام وشكد ما انتِ معظمته راح يصير عادي

الماس : يعني شكد وقت ينراد ويصير عادي ؟
نبأ : هههههه ولج انتِ كارثة و اجيتيني فهمني ما فهمني
طلع ناصب عليج بس والله زين يسوي انتِ لو شامه ريحة لهذا الموضوع جان ضليتي كل عمرج بلا زواج من هذا مستحاج

الماس : لا اني اروح وياج اخذيني يمج فترة خلي انسى
نبأ : واجهي المصاعب حتى تتعديها ، يالله كومي جبنالكم گيمر
الماس : يعني هسة العالم كلها عرفت شصار ؟
نبأ : و شعليج بالعالم كومي مو فتيتي گلبي ولج

وهي واكفة باب الغُرفة تسحبني و ما اقبل اطلع تالي راحت للمطبخ وعافتني رحت وراها
نبأ : كملي ريوك و البسي الفستان الابيض الي اشتريته الج بالجهاز
لا تخلين المستحى يحرمج من ايامج الحلوة

سوت الهم صينية و اني وياها و البنات صينية
اكلت و اللكمة تبقى ساعة بحلكي من كد ما بالي سارح بغير افكار
نبأ : يبوووو هسة دكافي يجوز ابنج خَضر
لزمت بطني مصدومه
الماس : شنو بس لا اني حامل صرت

نبأ : ان شاء الله يعني لا بس هو اضرب الج مثل
بدلت و ما دام هي وياي شوية مسيطرة اني علمتني شنو اسهل شيءٍ استخدمه بالمكياج لحد ما اتعود و ختمت الحديث
نبأ : و لو هو انتِ حلوة بوجودة و بدونه

قبل الظهر راحو و اني واكفة بالمطبخ احس حتى النفس ضاگ
دخل السيد من باب الاستقبال و قُفلة
لمن دخل للمطبخ غَمضت عيوني بقوة
عبد العزيز : لا تسوين غداء اني اجيب
هزيت راسي بـ نعم

لحد العصر اني ما دخل عتبة باب الغُرفة و ضالة اهوجم منا و منا
اروح و اجي لان تعودت على الغرفة و لا حتى هو صاحني
العصر اجوي الجارات يوصفولي مكان بيتهم و اسم ابوهم
اكو اعرفهم و اكو لا جايبين وياهم هدايا

و السيد من شافهن راح للجامع و بعد صلاة المغرب يالله اجه
عبد العزيز : الماس
الماس : ها .. ها سَيد
- امشي تروحين ؟
- وين ؟
- ايام باقي للدوام متردين قُرطاسية ؟
رأساً انرسمت الابتسامة على وجهي

الماس : اي اروح
عبد العزيز : يالله بدلي
رحت للغرفة بسُرعة لبست رَبطة الصُبح البيضة و عَدلت العباية
اجه هو يجدد العُطر دار وجهي عليه بطرف اصابيعة
ودخل الشعر الي ظاهر بجبيني
عبد العزيز : انتبهي للحجاب ست الماس حرامات شَعرة وحدة
تخرب كل هذا الالتزام

الماس : و اذا ما ادري
عبد العزيز : اكيد اذا ما تدرين متتحاسبين
بس هاي مرايا و قبل لا تطلعين تأكدي
لزم ايدي و طلعنا فتحلي باب السيارة الى ان صعدت
و عدلت نفسي و شال أطراف العباية دخلها بالسيارة
يالله سَد الباب

تعشينه و افترينا بالسيارة و أني اتسائل نفسي ليش هو طبيعي مو مثلي و لا منطي اي اهمية للموضوع
نزلنا للمكتبه هو اخذ نوعية اقلام خاصة بي و كال يالله اختاري
اختار و احس بفرحة بكل قُطعة و اتذكر انها البدايات

ببداية السنة اكتل نَفسي و اقرا حتى المو مُهم و بس اوصل للنص
اضل ادعي و انتظر شوكت تخلص السنة و ارتاح
اشتريت و أستعاريت بذوق السيد وياي
و واكف الرجال يدورلي جلاد لكتاب الاسلامية لازم ورد

- هذا لعابات عادي
و اني اباوع للسيد اكلة ما يقبلون الا ورد
ما لكينه عنده و تعكر مزاجي بسبب جلاد و بقيت طول الطريق ضايجة و ابتسمت لمن وكفنه كبال مكتبة ثانية
عبد العزيز : لا تنزلين اني اجيبلج و اجي
اجه خلىٰ بحُضني زفرت براحة
عبد العزيز : قبل لا أحرك كولي عاجبج لو لا ؟
-اي والله

عبد العزيز : نروح الاسبوع الجاي لايران و انتو اول اسبوع بالدوام عندكم عادي مو دراسة قوية عشر ايام و نرجع
الماس : ان شاء الله
مرة ابتسم لان راح اسافر ومرة بسبب فرحتي بالقرطاسية
و خلصت الطريق بس ابتسامات

بالبيت صعدت ارتب بيهن فوگ و نزلت لگيت السيد يقرا قرآن
رحت حتى انام ما اجاني النوم اجه هو دخل للغرفة
عبد العزيز : مَـا بال جميلة العينين لَم تنُمِ ؟
الماس : فرحااانه

عبد العزيز : و ما يلوگ لغيرج الفرَح
الماس : متحمسة اداوم و اذا ما طلعت الاولى على المدرسة
لا تحجي وياي بعد
عبد العزيز : لا تجهدين اكثر من اللازم ما دام ضامنه النجاح خلاص خلي حيلج للسادس
هزيت راسي بـ فرح

الماس : يعني تقبل اداوم كُلية ؟
عبد العزيز : ان شاء الله ليش لا قابل شنو المانع ؟
اجه تمدد يمي
الماس : و العربي تقريني ؟
عبد العزيز : تدللين و اذا ما عجبج تدريسي يدرسج اخوج
بقيت صافنه بوجه

وهو قربني اله اكثر
الماس : شوكت اشوفهم
عبد العزيز : هم ان شاء الله يجون
- متحمسة كلش وخايفة مادري بنفس الوقت
- وارد الخوف ، لان هو من الاساس موضوع مو بَسيط

بقيت ساكته و هو هَم ساكت الى ان هو قطع الصَمت
عبد العزيز : المَاس يا المَاس منو گال هذيج الطفلة تكبر
و تصير انتَ نصيبها اذا كُبرت منو گال راح ينلم شَمل اخوان
يُستحال اي احد يفكر بيوم ينجمعون
سُبحانك اللهم اذا قُلت للشيء كُن فـ يكُن

الماس : اني لسة ما ناسية هُدى و الاء
عبد العزيز : يا الله شجابهن ببالج اليوم
الماس : هن اصلاً ما يطلعن
ضحك بصوت عالي

لزم ايدي راد يحجي و باوع لاطافيري
عبد العزيز : هاي ليش طوال حبيبتي
الماس : نسيت اقرضهن
اشرلي على مكان المقراضة و رحت اجيبها و اجيت كعدت
اخذها من ايدي و هو يحجي يقرضلي و اني مخلية
دمي بـ شيشة لا يجرحني

عبد العزيز : بأيدة الانسان يعظم الامور و يهدأها و يكبرها و يصغرها
حسب تفكيرة لذلك يفرق الكبير عن الصغير و مرات حتى العمر مو مقياس لبلوغ العقل

مرات التفكير هو يخلق الاشياء تبدي انتَ تفكر بشغلة
تروح منا تجي منا تتصرف فلان تصرف دكول فلان حجاية
فـ تلگة الموقف الي فكرت بي كاعد يصير
انتَ ماتعرف بتفكيرك ساهمت بأنجذابة اللك

الماس : زين مرات اني افكر بشيء ورا ايام الگة
صديقتي مسويته و اني حتى ما كايله لاحد و لا اي احد عنه
عبد العزيز : لان هي حتى الافكار مُتنقلة تبقى يمج فترة معينه تشوف نفسها انتِ ما أهتميتي تنتقل لشخص ثاني
الماس : حتى الافكار تدور اهتمام
عبد العزيز : هههههه مو ؟ شفتي ؟

الماس :يعني هسة اذا اضل افكر بيهن يرجعن
تكلم بأبتسامة مُمكن
الماس : اي حتى اذبحك و اذبح روحي
باوعلي بصَدمة و اختفت أبتسامته دخل شفته لداخل حلگة
عبد العزيز : شنو ؟

من شفت ردة فعلك خليت ايدي على حلگي و كعدت عدل
الماس : مدري شلون طلعت
عبد العزيز : تذبحيني مَشيناها بس تذبحين نفسج ليش ؟
الماس : لان هو اني بوكتها للنار للنار

ظهرت ابتسامته المخفية
عبد العزيز : الصراحة ست الماس انتِ تخوفين
مديت ايدي على وجهي و ايدي ترجف
الماس : اني اخوف ؟

حُضني بأثنين ايده و مسح على شعري
عبد العزيز : يعني اقصد افكارج تخوف مو وجهج
ليش هو اكو احلى من وجهج و اكثر برائة ؟

بقيت نايمه على ايده الى وقت الصلاة
قرب يخلص الاسبوع و مثل ما كالت نبأ راح يبدي الخجل من وحده يروح و اني كل يوم بوقت جيته لازم موجودة بالمطبخ ما يدخل
اذا ما يفتحلي عباتة و يحُضني
كأن يعوضني عن الايام الي عشت بيها اتمنى هاي اللحظة

كانت اغراض الاء فوك بغرفة البنات و السيد طلب من علي زوج ورقاء يوديهن الها و الغُرفة تبرع بيها ليتيم اذا تريد فلوسها
خلي تنطي خبر

احب الحديث ويا لما يكون يقرأ قرآن لان يكون مبتسم طول الجلسة
الماس : سَيد اذا الانسان عنده هواي اخطاء و ذنوب يعني
و راد يتوب الله راح يقبل توبتة لو ينتظر النار ؟
اليوم سمعت محاظرة بخصوص هذا الموضوع
بس ردت انتَ تجاوبني

باس القرآن و خلى على الطبلة
عبد العزيز : اولاً اني ممتن لتلك الصغيرة التي لا يعجبها الحديث
الا مني
ابتسمت
الماس : لان انتَ حتى المواضيع الصعبة تسهلها

عبد العزيز : عزيزتي الجميلة ،
الماس : وبالبداية هذا الموضوع مو سهل حتى اجاوبج بـ اي او لا
ضحك ضحكة قوية

عبد العَزيز : ما دامت النَفس موجود باب التَوبة مفتوح
الى حِين يموت الانسان ينسد هذا الباب و ينتهي كُل شيء و تضيع الفُرص الي اجنن اله كلها و التوبة مو شيء عادي
يعني من الانسان يتوب عن خطأ توبة الي وجه الله تعالى
اذا بالاحلام يشوفة يدير وجهه

مو اني خطأت و تبت و بعدين توازيت رجعت هم خطأت
و اكول ان شاء اتوب بالمرة الجاية و هاي خلص العُمر
و تموت و انتَ ما تبت

رب العالمين غفار للذنوب و رحيم ارحم حتى من الام على ابنها
يعني هسة الانسان من يخطأ فد خطأ جبير يعرف بس امه
راح تستره و متحجي و تحاول تصحح خطئه
اما بالك من تجي تبجي و تشكي لرب العالمين ؟
وهو اقرب الك حتى من حبل الوريد

بس غير يتوب الانسان توبه نَصوحه
تخلي رب العالمين ما يتندم لمن انطاك فرصة ثانية
حتى نحسب من عبادة الصالحين
لو يريد الانسان يعيش عيشة صحيحة و كريمة
يصادق رب العالمين

الماس : يصادقة ؟
عبد العزيز : اي علاقة صداقة
شلون لمن الانسان كبال صديقةالمقرب يسولف كل اسرارة
و يحجي كل مواضيعة الزينه و الـمو زينه
هيج المفروض العلاقة وي رب العالمين

الماس : خاف حرام ؟
عَبد العزيز : شلون حرام ؟ هسة اني گبالج اي صديق مُقرب ما عندي
مكتفي برب العالمين من أوگع بشدة افرش السجادة و اشكيلة
من يصيبني الفرح اجي اشكرة على كل نعمه
لان الحياة بيني وبينه مشتركة اذا صابني هَم هو ابتلاء منه
و اذا فرح فـ هو نعمة لان اني غيرة بحياتي ما عندي

من أخطأ اجي افرش السجادة احسة زعلان مني
و لان يكسرني زعلة وهو مخليني بهاي المكانه و غامرني بكل هاي النعم ويقدملي كل شيء ممكن يفرحني و اني اجي اخيب ضنه
شكد تقهر ؟ لذلك ما اخطأ بعد خوفاً لا يزعل عليه
و كثر الزعل ينهي العلاقة و اذا انتهت علاقتي برب العالمين
منو يفيدني ؟

هيج هي العلاقة الصحيحة و الاصح مع رب العالمين
مو أوصفة بـ اقوى صور القساوة و اخوف الناس اخليهم
يأيسون من التوبة الى ان يصير مصيرهم النار و بأس المصير
ويشوفون القساوة و العقاب بعينهم
التوبة باب مفتوح مو بكيف الانسان يسدة و يحرم الناس من التوبة
لان كلنه بشر و مادامنه بشر يعني احنه خطائون

الشيطان مرافقنه علمود الخطأ مرات يصير اقوى منا
بسبب ضعف ايمانه طبعاً لكن كل هذا ما يمنع
الانسان من نعمة التوبة و العودة للطريق الصحيح

طول الطريق و اني مبتسمة
عبد العزيز : هل يا ترى ست الماس شنو اكبر خطأ ارتبكته بحياتها
و خايفة منه ؟
الماس : اني ؟
بقيت ساكته و اريد اتذكر شنو اخطائي
الماس : السرقة

كعد عدل مصدوم
عبد العزيز : منين بابا ؟ گولي
الماس : مو من احد
- كولي حبيبتي لا تخافين ما دام نطقتي حتى نرجعها

بلعت ريگي و احس نفسي تورطت حجيت
الماس : لا والله هيج بالغلط حجيت
و اني جنت بالارض و هو على القنفة لزم وجهي بأثنين اديه
عبد العزيز : كولي يابة لا تخافين اصححة ما دامي عُرفت

احس وجهي احتقن من الفشلة معاني وجهة تبين ما راح يقتنع
الماس : منك سَيد
يالله حسيته ارتخت اعصابة
عبد العزيز : اذا اني فـ مُحاللة و مُواهبة يمعودة و اني
الف فكرة بعقلي انرسمت

بقيت ساكته باوعلي و هو مبتسم
عبد العزيز : شماخذة يا احلى سارقة بالعالم
صفگت ايدي و كمت صعدت فوك فتحت المجر واخذتها و نزلت
خليتها بحُضنة
الماس : دشداشتك سَيد من جنت واكعة بالحُب
ضحك و غَص ركضت اجيبلة كلاص مي

الماس : خبصتوني بيها انتَ و عمي ضُرغام هي دشداشة
عبد العزيز : ههههههه شنو انتِ شنو
الماس : هسة انتَ دريت يعني راح الذنب مني و الحمدلله
عبد العزيز : لا هو ماكو ذنب لان اني من زمان اعرفها عندج
بس ردت أحچيچ

عَشر ايام عن زواجنة وباجر بالليل نسافر
كعدت احضر بالجنط و شاغلتني فكرة انتظرت السيد يجي حتى اخذ تليفونه اتصل بـ نبأ
و من اجه كلت اله ما سألني عن شيء

اخذت التليفون و صعدت فوك اركض خابرتها
و سألتها عن تأخير الشهرية هي قبل ٩ ايام موعدها
كالت كولي للسيد اريد أختبار حمل انتِ يمكن حامل
و اذا لا حتى اخذج للدكتورة

سديته بوجههة گبل من الصدمة و لزمت بطني
معقولة ؟؟؟؟ يمه شلون بقيت ابجي و ما اعرف شبية
من الصدمة يمكن لان امني اكثر شخص على وجه الكرة الارضية
يحب الاطفال

نزلت و باوعلي السيد بأستغراب
رحت بدون كلام للفراش حتى انام اجه سألني ما جاوبت و لحد الصبح اني كاعدة اتخيل شكلي اذا صار طفل بين ايدي
بس جان خوفي على الدراسة اكثر

هو يباوعلي و بس يريد احجي اخر شيء كال
عبد العزيز : من اتصلتي بـ زوجة ضرغام للان انتِ مو على بعضج
شنو بيج احجي او اتصل بيها !!
لزمت ايده
الماس : لا لا تتصل

عبد العزيز : شبيج بنتي شبيج حبيبتي
الماس : اريد أختبار حمل
حچيتها و بجيت
هو حُضني يضحك
عبد العزيز : حامل ؟ ما شاء الله ، ما شاء الله
وليش تبجين ماتردين شنو ؟

الماس : لا والله اريد بس و المدرسة
عبد العزيز : مو مشكلة هسة تأكدي من الموضوع و كلشي سهل
نمت و هو يقنعني لحد الظهر يالله كعدت
هو جايبلي الاختبار و مخلي على الكاونتر و للعصر
اصارع بنفسي اسوي لو لا

اخذت تليفونه وهو نايم و خابرت نبأ تعلمني
استخدمته و جانت صدمتي من النتيجة ايجابية
و لا عبالك جنت مخلية الموضوع بـ بالي ايدي ترجف
وكل اوضاعي متخربطة

اندگ الباب و اباوع طرق عباية من الباب من التوتر
حتى نسيت اكول منو كبل فتحت الباب
و خليت ايدي على گلبي و شهكت من شفتها الاء
باوعتلي بصَدمة و رجعت باوعت على ايدي فتحت عينها اكثر
سحبت الاختبار من ايدي و لطمت على صدرها

دخلت جوه و تصيح عبد العزيز عبد العزيز
طلع السيد من الغرفة مستغرب من الصوت و النوم بعده بعينه
الاء : ابشركككك الشريفة العندك حامل
نايم انتَ و رجليك بالشمس

عبد العزيز : الماس ؟؟ أي ابني هذا
....

قصة صغيرة عندي هواي
منو فارغ ويسمعني ؟

ضَيعتها الدنيا مَرة
و هسة أم السَادة اسمها ..
ذَني جَبرات الله ذَني
- رُسل فَهد