على كتف القبطان حمامة الفصل الثاني وأربعون 42 - بقلم رُسُل فَهد

شُكراً لكل دعوة حلوة بخصوص عيوني
انتن ماي العيون والله 🎀🤎🫶🏻🪞✨

التَصويت و المُتابعة لُطفاً
عَلى كتِف القُبطان حَمامة
- رُسل فَهد
...

فصيحاً:
من ذا الذي يأخذ حق الروح
و اصحاب الروح هُم من قاموا بـ سَلبِها ؟

شعبياً :
ياهو ياخذ حگها روحي ؟
وهيَ منهوبة من إهلها
مسألة أني بدرس ما يحويلة شاطر
يعني بَس أستاذها اليگدر يحلها
المُشكلة بالعشگ نَفسة
ماشفت بي أي عدالة
عود شنهو العاشگة تحن للـ خذلها ؟
- رُسل فَهد
....

الماس
راكان : لك شنو منين جايبتني اني اخوها مُنحرف
علي و عَمة بقو صافنين بين الي يصدكون او لا
ويسحبون امير من راكان و ما ينسحب اباوع تيشيرت راكان كله دَم اجيت عليه اركض و اني خايفة
الماس : يمه راكان تيشيرتك كله دم

راكان : مو دمي دم هذا القذر
ايديه يرجفن هو من شاف ايدي و وضعي تركه و خله ايده على راسي وقرب راسي على بَطنه لان هو جداً طويل
راكان : يالله اخذو هذا الجبان الي وياكم و طلعو برا
علي : مرت عمي صدك هذا اخوج منين انتِ مو ما عندج اهل
راكان : لا عندها ليش ما عندها جاية من فطر الحايط
روحو للسيد عبد العزيز هو يفهمكم اني منو

بقو صافنين اخذو امير و طلعو اخذت تيشيرته اغسل بي بالصابون
راكان : غسلي زين الماس هذا ابوي اذا شافه هسة ينجلط
شويه و اجه السيد سولفوا هو و راكان وتعشو لبس تيشيرته وراح

الماس : يمه اليوم شلون خفت خوفة
عبد العزيز : يا يابة ليش عيوني
الماس : من وره هذولة عبالك عصابة يتهموني بشرفي
عبد العزيز : ما عاش تربيتي ما عاش سوء تفاهم و اجوي اعتذروا

الماس : امير يكله منين جايبته
عبد العزيز : اي منين جايبته ؟ من بطن امج غير
الماس : بس هو مو هيج حجاها بطريقة مو حلوة
عبد العزيز : طريقة تشبه اخلاقة و انحطاطة و اجا الرَد المُناسب
الماس : يستاهل
- ابنج عندة خوش خال
بقيت صافنة النوب استوعبت ابتسمت

صبيت اله و الي چاي و كعدنا نسولف هو شرب الچاي مالته و اني بعده عَلى حطته منتظرته يبرد يالله اشربه
عبد العزيز : ترى چايج صار ثلج و الچاي ما ينشرب بارد
الماس : ادري بس غير علمود الطفل
- شعليه ؟
- لا ينچوي

باوعلي بنظرة عود انتِ صدك تحجين ؟ و هو مبتسم
عبد العزيز : والله يا الماسة اني اذا جبتي بالسلامة
لازم احتار بتربية اثنين اطفال
الماس : ومنو يكول توأم ؟
عبد العزيز : لا مو توم حبيبتي بس انتِ و ابنج

باوعتلة و اني ما راضية
الماس : ترى اني كبيرة لا تستهزء بيه
يريد يجاوبني و فاتت بزونه من باب المطبخ صرخت بقوة و مدري شلون صرت بحُضنه البزونة من الخرعة شردت

عبد العزيز : يعني بشرفج بشرفج هاي طفرة وحدة عاقلة وًببطنها فل
الماس : سَيد انتَ ادور ادور و ترجع على الطفل مسويلة كيان وهو بعده مجاي للدنيا
ضحك بقوة

كمت من حُضنة و رحت للغرفة متنرفزة و عصبية و خوفة البزونة بيه
عبد العزيز : و تكولين اني كبيرة و انتِ من ابنج تغارين
الماس : لا ما اغار شنو طفلة بس يعني انتَ تحترمه اكثر مني
- هههههههه ، احترمه شنو لج انتِ شنو من كارثة

الماس : كله كله دير بالج عليه انتبهي عليه لا يصير بي شيء
و لا دكول ديري بالج على نفسج انتِ و انتبهي على حالج
هو انتَ اصلا مو بحالي حجيتها و من كل عقلي بجيت
عبد العزيز : يابة صدك تحجين عمي حتى الطفل ماريدة
لا مو ما اريدة خطية ، بس عمي وين يجي لمعزتج
انتِ عزيزة الروح

درت وجهي و تغطيت ابجي
عبد العزيز : امشي اطلعج نتونس صارلج هواي ما طالعة اكيد ضايجة و منا حامل يالله كومي
الماس : ما اروح ما اروح
حچة بنبرة جّدية كأنه عصبي اكثر نبرة اخاف منها
عبد العزيز : گلت كومي

باوعتله بنظرة خوف
الماس : لا تحجي وياي هيج و اني زعلانه حتى اخاف و تروح الزعلة
عبد العزيز : يالله يا روح و عزيزة عبد العزيز گومي
بنص الضوجة ابتسمت بس احاول اخفي الابتسامه حتى ما اخسر عنادي

بدلت و اني معصبة هو واكف يخلي عُطر
مِسح بأيدة و خله على دشداشته و مسح
من دشداشته خلة على ربطتي
عبد العزيز : نساءً طاهرة من غير عُطراً يفوح منها المسكِ و العنبر
درت وجهي على الكنتور گرص خدي و طلعنه

و كالعادة اكثر حركة احبها لما يدنك يشيل اطراف عباتي و يخليهم
بالسيارة وكفنه كبال عيادات دكتورات
عبد العزيز : هم اله حق علينه نشوف وضعة
الماس : و حتى الطلعة خصيصاً اله مو الي حتى ترضي مزاجه
عبد العزيز : اكيد ، هذا سيدنا الصِغير
بنص العصبية و أبتسمت على الاسم

نزلت مبتسمة و دخلت ما جان اكو احد و الدكتورة تريد تطلع بسرعة السكرتيرة دخلتني بقت تستجوبني الدكتوره مبتسمة
- يجنن يخبل كل الاوضاع تمام
الماس : وهو مبين ؟
- اي وًحلو على امه

طلعت و بيدي الوَصفة مبتسمة
عبدالعزيز: يا الله
الماس : يخبل يجنن و طالع حلو عليه
- هههههههه ، حتى الايام الجايه تروحين ويَ مرت ضُرغام
انتِ وحدج متعرفين

نزلنه للسوگ و اول ما اشترالي لَعابه
بقيت لازمتها بأيدي طول الطريق و العالم تباوعلي مبتسمه
الماس : سَيد
- عيونه
- اريد عصير عليه بسكت
- شنو

الماس: يعني هيج اريد عصير بكلاص و عليه بسكت مطحون خبط
عبد العزيز : و منين اجيبلج هسة شنو هالنساوه الغريبة
خلي نوصل للبيت
الماس : لا اريد هسة

اخذلي بسكت من اسواق و كعدنا بمحل عصائر طبيعية
جابو العصير و هو كاعد يطحن بالبسكت و يستغفر بقلة صَبر
داره على العصير و احس العالم كلها مستغربة
شربته كله و هو يباوعلي مبتسم
عبد العزيز : لو عايفج زعلانه يابة هواي اشرفلي
على هاي الدكة

رجعت للبيت اشعر بالسعادة بسبب اللعابة
وهو اخذلي علاج من الصيدلية علمني على العلاج
و اخذت الي بالليل و مديت ايدة ، خليت راسي على صَدرة

الماس : اختي جوهرة مشتاقتلها
عبد العزيز : الخميس عرسها و نروح ان شاء الله
....

جوهرة
تُراب : مو كتلج ما تطلع زفتي اذا مو انتِ تهلهلين بيها ؟
سُعاد : و چبتلي من الچناين زينتهن و احلاهن
ابو تُراب: يكولون اذا العمة حبت الچنة بليس يطب للجنة
تُراب : چا خل يتفضل بليس للجنة
سُعاد : انا ما حاسبتها چنتي جوهرة بنتي الما جبتها

ابو تُراب: والله انا مثلج دوم ما حاسبها چنة
تُراب : يامن تعب يامن شگة و يامن على الحاظر لگة
انا خلصت عمري و فلوسي عليكم تالي جوهرة تصير اعز مني
جوهرة : لان اني وياك واحد فـ هم ما يفرقون بيناتنا

جان يحجي و هو كاعد و متوجه نظرة على امه
وكف و دار وجهه عليه و فتح ايده
تُراب : اويلي لَك اويلي
و كلنه ضحكنة

راح للدوام حتى يجي الخميس
اني فرحتي بأخواني غِنتني عن كُل فرحة ترك جهازة الثاني لان تعودت يومية العصر يتصل عليه راكان و بَراء يمه
نبقى نسولف و نعيد الذكريات مره نضحك
و مرات ننهضم على فراغ زهراء
يعني شيصير لو هي موجودة ؟

فَزيت على دكة الباب القوية سديت الجهاز
و طلعت و عمي طلع قلبي لكيته دعبول
تعارك ويا عمي على دكة الباب العالية
ابو تُراب: انت مو محذرك انا من دكة الباب هاي مدكول منا عالم
دعبول : ديالله هو انتو حتى جيران ما عندكم

دخل خاوه عوج حلكة من شافني فات للاستقبال و اني اجيت يمه
جوهرة : انت وين تغط تغط و تطلع شنو سمجة ؟
باوعلي شكلة مهضوم كام يبجي انفطر كلبي اجيت يمه
يكسر خاطري شكلة التعبان و الشيب الي بشعرة
و ملابسة التعبانة اظافيرة الطويله
- شبيك دعبول ؟

دعبول : ليش اخذتي تُراب مني ؟ جان يحبني بس اني
جوهرة : اني ؟؟ والله ما اخذتة بالعكس اني كلش احبك
و اتمنى تبقى ويانه لان انتَ كلش لطيف
دار وجهه عني و بقى يبجي

رحت للغرفة تذكرت لمن نظفنه الغرفة اكو ملابس ردت اذبهن
كال تُراب هذني مال دعبول مابيهن شيء عزلتهن بالمجر
رحت للغرفة طلعتهن و كاسرت المي بالحمام
جوهرة : نلعب و اذا فزت اسويلك اندومي على حسابي ؟
- لا
بقيت اتشاقة ويا الى ان اقتنع

جوهرة : شنو اكلك تنفذ و ما دكول لا
تحمست زيادة و شغلت المكينه ردت ازينه و اجه عمي بالثواني الاخيرة نقذ دعبول من ايدي و زَينه و هم بينهم دعبول يجفص و عمي يرزل
جان دعبول يطلع عمره قريب الخمسين بس شكله ناعم
يعني ايده و رجله ناعمات بس وجهه مليء بالتجاعيد

خلصه عمي و راد يبطل من اللعبه و يبقى بدون سبح كمت الطم رجعت اشهي بالاندومي دخل يسبح طلع لابس التيشيرت بالمكلوب عدلته و كعدته بالغرفه فرضتله و خليتله مرطب و عطر
صار جديد
جوهرة : المفروض العطور الجنت تاخذهن
من محلي تخليهن الك مو لـ تُراب
دعبول : هواي ينطيني و يبوكوهن بعد ما انطاني

طلعت فلوس و انطيته يشتري النه و يجي
و اني حطيت المي على النار
الجو بارد فتحتله الباب و ردت ادخل
انضرب الباب بشيء قوي وتطشر الگزاز عليه
خليت ايدي على وجهي و صرخت

اجه عمي و خالة مصدومين اباوع لاديه تحركني
لكه عمي بطل كزاز مكسر و باقيه قطع منه بالارض
طلع بسرعة فتح الباب ما لكه احد
بس دعبول بالشارع يمشي و يصفگ
جوهرة : بس عمو مو دعبول ما احس هو
عمي مُصر على ان هو دعبول

لمن اجه بقى عمي يرزله و هو يكله مو اني ما خايف منك
كف ايدي انجرح شديته و اني اسوي لدعبول اندومي
خلصته و رحت خابرت تُراب سولفتله شلون اهتميت بدعبول
و رحت يمه سولفت ويا و اثناء الحديث سولفت لتُراب عن الضربه
تالي تُراب كال انطينيا احاجي

سولف ويا
تُراب : وداعتي مو انتَ هيج سويت
دعبول : وداعتك مو اني
تُراب : جا هذني الثلاثة الكبالج ماكو غيرهن
انطيني ابوي

حچة وي عمي و بقى عمي مصدوم يكول انطونياهن اني وياهن بغرفة الا اربيهن من جديد و دعبول محتار بالاندومي
الصبح ثاني يوم اسوي ريوك و فاتحة الباب كل شوية تنشمر حجاره صغيرة باوعت من الشباك هن يفتحن شباك الغرفة
يشمرن الحجارة ويسدن الشباك

اني عصبية عمي ما احبها عندي تُراب اهون قـ ما كتله كلت يروح يكول لابوهن و خطية اجه يغسل كال شنو هالصوت كتله ما ادري بقى
واكف انشمرت حجارة رفع بردة الشباك و يباوع
ابو تُراب : انا ما اضن جيرانه خاف دعبول هو وينه
- لا عمو دعبول نايم

بعده يحجي و انفتح شباكهن و هم ضربن الباب
ابو تُراب: له له له هاي صدك هنَ انا غلام ابوي
طب لبس دشداشته و طلع دك الباب اني وكفت ورا الباب اتصنت
اسمع صوت رجال يحجي وي عمي و من سلامه مبين خوش رجال

ابو تُراب: بعد عمك تسلم بس عمي جايك بطلب عندك جهال فوك هاليومين سالبين راحتنه البارحة شمروا بطل على جنتي لو جاي براسها جان هسة ميته و هسة حصو يشيلن و يشمرن على الشبابيك
اذا بيهن شيء مريضات حتى نعذركم
- لا والله عمي ما بيهن شيء اصلا انتَ صدمتني

لثاني يوم بعد ما انسمع الهن حِس راح عمي يتسوك النه
و دعبول انطيته التليفون يلعب العاب بدأ يحبني يا الله
اندك الباب كلت منو صوت بنية ناصي فتحته و فاتن. بسُرعة منهن اثنين ووحدة ماده راسها من السطح تباوع و هن يباوعن الها انطيتهن
الاوكي و انجريت من شعري

خليت الحنيه و الاخلاق على صفحة
شكولهن بيها اثار الضرب الظاهر جايات ياخذن اثر الضربة
تذكرت عركتنه وي الي اجن على نويرة و كتلناهن
جريت وحده منهن من شعرها و صفگتها راشديات

الثانية رادت تجي ضربتها راشدي قوي و على الصوت طلع دعبول
هن من شافنه خافن فتحت الباب و دفعتهن و سديته يردن يغلطن بس يخافن لان طلعتهن صايرة بالبسكوت
خابرت تُراب و سولفتله
تُراب : اويلي المَلحة يابة هذا كلة علمودي

جوهرة : والله عايش اللحظة
تُراب : ليه يا ئلبي شو المانع
حچيت بنَرفزة
جوهرة : ترى مصختها
تُراب : ليش حبيبي ذكرناج بالاعزاز

جوهرة : نعم
تُراب : قابل طاير الخميس
سديته و بقيت كاعدة يم خاله اليوم ثلاثاء و تُراب اتصل على ابو ياخذني لبيت اهلي جنت ضايجة و ما صدكت
و استغربت من عمي كال ابقي هنا ليوم الخميس

بالليل بدلن ثلاثتهن و رحنا للسوك امي تجيب النواقص
و نويرة تمشي و تحشش على العالم و احنه خربانات من الضحك حتى العالم تباوع النه
نويرة : هسة لو حامل جان سوينه زفة و البطن للخشم
و هذا اول فرخ حاضر بعرس اهلة
تحجي و تهوس بعبايتها و احنه نضحك

شاورت امي ليش لسة ما صرت حامل شو خايفة
سمعتني نويرة و صفكت بيدها
نويرة : شني حبها و لُبط كولي يا الله بعدكم توكم
بقيت ساكتة و افكر و اكثر شيء اكرها تفكيري

كعدنا ناكل و اني طلبت فنكر
نويرة: ولج هسة انتِ ماكلة و دافعة فلوس تاخذين بتيته شو المطبخ مَتروس بتيته و الزيت من الحصة و هذا الكجب بألف
دطلبي شيءٍ يضب كلبج
جوهرة : نويرة مال المطاعم مو مثل مال البيت اطيب

و احنه كاعدين الي يقدم عينه على امي و واحد ثاني واكف بعيد
يباوعون النه و يتشاورون و يضحكون نويرة و اميرة ميشوفن لان ظهرهن عليهم اخزر بيهم و يضحكون عادي
رُغم هي امي ابد ما تعير الهم اهتمام بس ابقى اني احترك حرك

خلصنه و رحت ادفع الحساب كال واصل خليته على الميز و تكتفتله
جوهرة : يالله رجع الباقي
- و شدعوة هلكد عصبية
جوهرة : لان ابو المطعم مشغل ناس زفت و ميدري بنفسة
رجعلي الباقي وهو يضحك و لا تنكسر عيونهم

واحد رجعلي و الثاني راح يمهن قريب الميز حچة وياهن و نويرة ضحكت اجيت عليه بعصبيه و ما اريد اسوي مشكلة
- منكدر حتى نحجي وياكم حارس
نويرة : لا انتَ بكد ولدنه احنه امهاتك

باوع لامي و كال
- لا عمي هنا الانسة صغيرة مو مال بكد امي
جوهرة : متزوجة و عدها عشر جهال يالله كومن

اخذتهن و طلعت و اني اهدد
جوهرة : وحق هذا الله وحق هذا الله التطلع بعد و بوجهه مكياج متلوم الا نفسها رايحات تتونسن لو تدورن زِلم
اميرة : ههههههه ولج والله بعدج على سوالفج ما كبرتي
هي هاي الشوارع بيها اشكال و الوان الواحد يمشي و يسكت

نويرة : جا شني هي ديرمايه و خبطه مال وجه وجوهنة مطعونه من الشموس ياهو اليباوع لخلقنه بالله انتِ حتى الي يحط عينه بعينج على هذا التخوزر يشرد
جوهرة : اي اني ما اخلي واحد يباوعلي ما اريد افكس عينه
و انتن جايبات النه الشبهه انتِ مو ما تقبلين

رحاب : و هو منو مكلبهم بس انتِ شايلة روحج و راكعتها طبهم مرض
تجيبين الهم لو طار
جوهرة : ديالله يالله امشن اجرنه تكسي ونويرة كعدت بالصدر
دار وجهه شافهن كلهن مليانات و هو شايب مبين يخاف على سيارته
كال انزلن عمي انزلن ما تكفي السيارة نزلت نويرة و سدت باب السيارة قوي
نويرة : يايمة هي سايبة مسكربة جا لو كاعد بجكسارة شسويت

صار مرادد بالحجي بينها و بينه
و كف شاب يضحك سيارته حديثة
كال صعدي يمه صعدي
صعدن ويا و نويرة تعد و تصف على الرجال ذاك و هذا ميت من الضحك نويرة ارتاحتله سولفتله قصة حياتها كلها
جنها اني من ارتاح لواحد

توسلت بي ياخذ كروه ما قبل
طَبيت شمرت الجنطه و الربطة
جوهرة : بابا هو انتن ما تتطلعن انتن كارثة هاي اخر طلعة الجن سوه
نويرة : يمه يمه تالي الوكت تحكمنه الخُنفسانه ولج انا كلبي مجمر منج لا توازيني اشوه وجهج قبل العرس

امي كالت لا تنامين ترتاح و نروح نرتب غراضج بغرفتج
تحمست و حتى النعاس طار من عيوني اميرة نامت تعبانه و نويرة وراح طلعة الصبح رحنه اني و امي المفتاح مخلي تُراب يمها
ضلينه ندخل بالغراض و قفلته الباب صعدناهن نرتب بيهن

فتحت باب الغُرفة و بقيت مصدومه بالجمال
اخر توقعاتي بيوم من الايام اني اكعد بمثل هيج بيت و انام بهيج غرفة
احس رب العالمين انطاني اكثر من ما اني استاهل و اتمنى

شفت امي ما مخلية شيء ما مشتريته ارتب حسب كلامها لان اني واثقة هي ذوقها احلى من ذوقي
رحاب : حضري روحج تصبغين شعرج
جوهرة : لا والله ما اصبغ ما يلوكلي غير لون شعري شتردين
اصبغ اصفر لو احمر حتى اطلع سعلوة

ثاني يوم الاربعاء اخذتني امي للصالون و حجت وياها
رضيت بخيار واحد هوَ التخصيل باللون السِلفر
و النتيجة جانت حلوة كلش رجعت و بالليل دخلت نويرة
و بيدها طاسة الحِنه

نويرة : الليلة حنته و باجر يزفونه
ولو هو شابع بيج من قبل العرس بس ميخالف
جوهرة : يعني انتِ متعرفين تمشيها عدل لازم تجفصين بيها
اميرة : هههههههه ولج نويرة عوفيها

نويرة : و يم السفينه المُلتقى اها اها يم السفينه
حطت الحنه بأيدي و اني ميته من الضحك

نويرة : و يا ابو حاجب المطبور جبنالك التهواها
و امي و اميرة يردن وراها وعايشات اللحظة
لحد ما تعينه نمنه
الظهر جهزت نفسي و رحت ويَ امي للصالون

لحذ ما خلص المكياج اني مخلية دمي بشيشة لان ما متعودة على المكياج لحد ما خلصت و لبستني امي البدله حتى تسويلي التسريحة
بقيت فاتحة حلكي كبال المرايا على الطَلة الحلوة
الي ابد ما توقعتها

يا خيبة تلكَ الالوانِ
منُذ ارتداء سمرائنا أبيض الفُستانِ
فَـ ليصمُت اصحاب الجمال جميعهم
وَ يَهتفوا
- حَيَّ على السُمرانِ

حسب تعليماته الزفة من البيت القديم و اني كل بالي بَراء و راكان موجودين لو لا ما اريد اسأل خاف انصدم بالاجابة اذا كالو لا
بعد ما خلصت دك على امي و كال اجيتكم و اني ولا عبالك هذيج
الي خلصت كل هاي الفترة ويا
احس شلون راح يشوفني بهذا الشكل ما متعودة

بقيت منزلة راسي و صعدت وي امي هو يستحي من امي كلشي ما حجة لحد ما نزلنه لكيت السيارات تارسة الساحة الي بصف بيتنه يمه ذوله منين اجوي صار العشاء بالشارع و اني عيوني تدورهم
لحد ما طلعت امي و دخلت بأيدها بَراء خجلانه تباوع بالوجوه
احس هسة صدك تكحلت عيوني

سألت خالة منين هذولة الناس
كالت كلهم اهل اصدقائة واعدينه بس يتزوج يسووله عرس
رَنان و ما صاير مثله
بَراء : الله جوهرة طالعة تخبلين تجننين
جوهرة : انتِ الحلوة يا روحي

بقت طول الحفلة لازمه ايدي و خلص العشاء و اشتغلت الموسيقى
و تُراب و جماعتة بدون خجل دخلو يركصون من الشارع
للاستقبال و تُراب جماعتة شايلينه وهو مُحترف بالركص
امه تهلهل وابو يركص وياهم
و من كد الحماس حتى اني اريد اركص

بَراء اختفت من يمي و شفتها طلعت برا
و صدمتي الجبيرة من شفت راكان دخل تگابل ويَ تُراب و يركض ويا اجه يمي باسني حضنته بگد ما مشتاقتلة
جوهرة : ولك راكان اني اختك ميصير تركص بعرسي
راكان : اويلي يابة جوهرة عوفيني فرحان شارد من الواقع
امتحنت امتحانين و اثنينهن مامجاوب بيهن

عِلى صوت الموسيقى و عافني و دخل بنصهم يركص
أمي خربانه من الضحك لحد ما صار تُراب قريب مني ولزم ايدي
صعدنا اني ويا بالصدر و امه و ابو ليوره
تُراب : بعد شتردون صحيح انا العريس بس راح ازفكم

الزفة كلها اني اباوع لسيارات اصدقائة
مطلعين روسهم من الجامه وسدو الشوارع
و هو وياهم يحجون بالالغاز و هو يمد راسة من الجامه يجاوبه
ابو يرَزله و خاله تضحك دكلة عوفهم

وصلنه للمنطقة اميرة و نويرة واكفات بالباب يصفكن
نزلت و السيد زوج بَراء راد يروح و تُراب ما قبل و لا ابو هم يجرون بالرجال و الرجال يجر بروحة تالي استسلم الامر الواقع
و دِخل للبيت

رجعو سوو هوسة الثانية بالشارع و ولا تعبو من الركص
اني من يمي تعبت صعدت للغرفة و امي يمي
رحاب : انتِ يمه حتى ما يحتاج اعلم تستحين مني
و منه ما تستحين

هي طلعت و اني مبتسمة من اتذكر شكل تُراب شلون فرحان
و كأن فايز بالدنيا كُلها و خالة فرحتها ما تنوصف
و هلاهلها ترست الدنيا
وكفت گبال المرايا مبتسمة و اني اول مرة بحياتي اوكف كبالها راضية
اباوع لشكلي الي اني اول شخص معجب بي
و متحمسة اذا شافني تُراب شنو ردة فعلة

من جوهرة الي ما يهمها شكو بالدنيا غير احلامها
و حتى لنفسها ما مهتمة لـ جوهرة الي حققت حلمها و صار عندها هواي اشخاص جابتهم الها الصدفة تحبهم تحب تطلع كدامهم
بالشكل المناسب بدأ الهدوء يعم و صوت گلبي يعلىٰ
لحد ما انفتح الباب بهدوء و اني واكفة
دِخل هوَ بـ بأيدة سترته النيلية و يفتح بالرباط
باوعتله و الباب مفتوح نِسه يسد الباب
تُراب : اويلي لَك اويلي

جوهرة : الباب
تُراب : انعل ابو الباب
- انفضحنا
رجع ليوره بدون ما يدير وجه قفل الباب و اجه
تُراب : هاي شطالعة

جوهرة : حلوة ادري بس تعبانة اريد انام
تُراب : اويلي يابة تعبانة شمسوية
- ما مسوية من الكعدة تعبت
وگف وراي و حُضني بأيد وحده و التليفون بأيده
اخذلنه صوره و جانت احلى صورة بحياتي

بده يسحب المَاشات من راسي و يحسبهن
تُراب : الله يساعد راسج حبيبتي
ضحكت و دخلت اسبح الحمام بنفس الغُرفة
لمن طلعت هو واكف يباوع من الشباك و فاتح القميص
جوهرة : انتَ شكد ركصت
تُراب : فرحااااااااان

جوهرة : قابل هستوك تزوجتني و فرحان ترى احنه متأقلمين
احس فرحتك مشكوك بيها
تُراب : جان وضعج ياكل و يشرب وياي شلون
انتِ حبيبتي و روحي و مگعدج بـ بيت چنه خَرابة
و الاحلى انتِ من النسوان القنوعات بكلشي خفت خاف قناعتج
تنسيني حقوقج و ما اسويلج العليه

خليت راسي و شعري الي ينقط مي على صَدره
و الهوى البارد يكفخ وجوهنا
جوهرة : اني قانعة لان انتَ بحياتي معيشني بگلبك وحدي
شايفة روحي اميرة ما تهمني كل الماديات لا عمري ردت منك ذهب
و لا بيت و لا فلوس اني ردت مطلب واحد و انتَ سويته
و ثبتتلي انتَ شكد تحبني

تُراب : لا ، اني لكيتلج اخوانج غصباً ما عليه لان انتِ عرضتي حياتج
للخطر في سبيل تلكين ابوية و هذا كله الصار و السويته قليل بحقج
نِهى كلامه بـ قُبلة على شعري

جوهرة : تُراب انتَ حَبيبي يعني من صدگ حبيبي
تُراب : انتِ حياتي و عمري و بَناتي انتِ المَلحة ما تنوصفين

دخل يسبح و اني اضحك بقيت اباوع للمنطقة هاي شكد احبها
و شكد هادئة تشهدلي ذكريات هواي هاي الارصفة
و الشارع الكراج مال بيت نويرة صاير كبال شباك غرفتي بالضبط
تُراب : سدي الشباك لا تتمرضين حياتي

تمدد و اجيت نمت على ايدة
جوهرة : شو ما جبت كيس الملاكمة بيمن اطلع حرگتي اذا عصبت
غُمز و اشر على صَدرة
تُراب : بية حبيبي
- تروح تموت و ابتلي بيك و اصير ارملة يبووو شلي بهاي الدوخة

تُراب : لااااا؟
جوهرة : والله
تُراب : دكومي حبيبتي طفي الضوة و تعاي اسولفلج اليوم شصار
جوهرة : شصار ؟
- دطفي و تعاي
انقبض كلبي لان طريقة كلامة ما تطمن ابداً

طفيته و اجيت بسرعة كعدت كباله
جوهرة : شنو شكو تُراب
- اويلي اموت ع الخوافات
و ضربته بقوه لمن عرفته شنو يريد ..

كعدت الصُبح على صوته يخابر و يضحك على جماعتة
تُراب : طاح حضكم عبالي دكولون محتاج شيء ، شلونك
كعدت و الضوء خفيف داخل من الشباك
جوهرة : شنو دنيا الفجر ؟
تُراب : لا يا عروستنه المَلحة راح يأذن الظهر بس الدنيا تمطر كومي
اختج هنا

انشف شعري غصباً عني حتى انزل
بدلت و امي تدك عليه تُراب ما يقبل ينزل الا اكمل
خليت مكياج خفيف و نزلت ويا
و استقبلتنه امه بالهلاهل بَراء احسها كاعدة على اعصابها
اجيت يمها لزمت ايدها
- شبيج حياتي

الماس: عندي امتحان باجر و احس عيب باقين هنا
جوهرة : انجبي شنو عيب قابل احنه غُربة
و اذا على الامتحان يتأجل
الماس : مو خاف اجي الاسئلة صعبة للمؤجلات

جوهرة : يا بَراء شبيج هسة من السيد تخافين من المدرسات هم تخافين عاد خلي عندج شخصية راح يجي ابنج
الماس : ولج لا دكولين بَراء اني احب الماس
جوهرة : طبعا غير السيد مختارة

الماس : اكلج شعدكم وي السَيد ترى حباب حبوّ يستاهل خطية
جوهرة : احسج تخافين منه مادري احساس
الماس : هو اني اخاف بس من الله و من السيد و المدرسات

جوهرة: ههههههه ولج لعد شبقى ، لا بس هو شلون يعاملج يعني ؟
الماس : اني والله يموت عليه يعاملني مثل الوردة الخايف عليها لا تذبل
هو هيج يكلي و صحيح كلامه لان هو السيد ما يجذب ترى
جده رسول الله (ص)

جوهرة : يا يا دخيل جده و انا شكلت
الماس : هو بس جاي اسولفلج وحق هذا الله فد يشوّر مره اجتي وحدة
فاصل ابنها من الجامع لان عنده سوالف مكسرة حاول ويا السيد ما اجه للطريق يكول عرفت غايته هو ما جاي يصلح نفسة
بس جاي يخرب الي ويا و يسحبهم لـ طريقة وهم مراهقين
فـ من فصل ابنها اجتي علينه هاده

حجت عنه اشكال والوان بباب الشارع و هو واكف مبتسم ما جاوبها
من خلصت كاللها خَصيمنا الله وهو على كُل شيءٍ شهيد
بس هو شنو دخل اعصاب للبيت لان هي مره وما يكدر يسويلها شيء
اول ما كعد صار صياح بالشارع و اندك الباب
طلعت المره اول ما عابرة اندعمت و الجيران كلها مصدومة
و لمن طابت اجتي اعتذرت منه

جوهرة : يمه الله كون هيج اشور بكل واحد أذاني
الماس : لو كلها هيج و رب العالمين ياخذ الحق بسرعة جان انتهت البشرية لان كل واحد مأذي واحد شكل فـ هو حتى تأخير
العقاب بي عِبرة من رب العالمين

اجتي امي و اميرة و نويرة جابن كيمر وًكاهي و نويرة دكلة
دير بالك على جوهرة ترى عندها ثلاث امهات
تُراب : لا حجية اربعة امي وياجن انا بيش الكيلو
نويرة : يالله انتَ ابوك وياك لا تبجي
تُراب : تهي بهي والله بطرانه حجية ابوي قبل لا اجي للدنيا
واكف ضدي مو النوب اتعارك وي جوهرة حتى يشحتني من الباب

للعصر رادو يحرون الماس .. الماس .. اعود نفسي على اسمها
و زوجها و عمي ما قبل لان الدنيا مُطر و الطريق طويل وًيخوفً
و بقو الليله هاي هم ويانه نايمين بغرفة عمي و خالة الجديدة
اني نيمت تُراب و هي نام زوجها و نزلنه كعدنا بالصالة
نيمتها على رجلي وشغلنه تلفزيون على مسلسلة هندية

تركت السوالف و بقت تحجي عليهن
الماس : يعني هذني صدك يحجن مطلعات خصرهن والله خطية ما يعرفن بعقاب الله و شراح يسوي بيهن
جوهرة : هم ميعبدون الله ترى

استنفرت و كعدت على حيلها
الماس : لا تحجين هيج جوهرة و تتعذرين الها بهذا العذر القبيح
ليش هو منو يستحق العبادة غير الله بس هذا الجهل المُتعمد
مخليهم للان متمسكين بمعتقداتهم شلون اعبد شخص او حيوان
او شيء و اني اعرف منين جاي و شلون اجه للدنيا
يعني شلون الي عندةً عقل يعبد الي ما عنده عقل

جوهرة : دنامي شنسويلهم الله يهديهم
الماس : اتمنى قبل لا يموتون و يخسرون الدُنيا و الاخرة
تحجي وهي عصبية و منهارة
مديت ايدي على جبينها امسح عيونها
جوهرة : السَيد هم يحاسبج على الصلاة ؟

الماس: اكيد لعد شلون هو المسؤول عني اذا باجر يوم القيامة
بدر مني تقصير هو اول الي يتحاسبون لان هو مشرف عليه
فـ جان يحاسبني و بعدها اني التزمت لان ما اريد اخلي بموقف مو حلو يوم القيامة وهو تعبان على حياته
ابتسمت على تفكيرها

جوهرة : العباية تحسيها مقيدتج ؟ اكو لبس هم مُحتشم عادي
اذا يعجبج يعني قنعي السيد
الماس : يمه و ليش اتقيد ؟ والله احسها بروحي شايفة من اغسلها
على كيف احسها عندها احساس و الها هيبة ميصير اشيلها و اشمرها

جوهرة : يعني انتِ تحبين تلبسيها
الماس : اموت عليها لان اني متعودة عليها و احس بس بيها
ما اتقيد و من امشي امشي براحتي السيد يكول العباية
الي على رَاسج مثل العمامه الي على راسي
و اثنينهن لازم نعاملهن معاملة خاصة لان مو اي احد يتحمل
مسؤوليتهن

جوهرة : والله يعني السَيد تعبان بتربيته
الماس : يكول السيد المُلتزمات بالحجاب الشرعي باجر بيوم القيامة
السيدة فاطمة الزهراء (ع) تستقبلهن بـ باب الجنة
و اني منتظرة هاي اللحظة

ابتسمت على تفكيرها النظيف و تعليمها ان هيَ ابد ما مهتمه للدنيا
بكد ما مهتمة للاخرة صدك رب العالمين لمن فرقنا عرف وين يوزعنا
راكان صار بأيد اب مُتشدد لان مراهقته صعبة وبس هو عرف يتوبه
ممكن لو ويانه جان امي ما كدرت وحدها

و الماس خلاها بأيد شخص من عبادة الصالحين
يعني مطمئن عليها وين راح تكبر و انتِ جان عليج الحمل
الاكبر لان رب العالمين يعرف انتِ كدها

من الفجر طلعو الماس و السيد
و بيومها كعدت مطنگرة على تُراب الا اروح للدكتورة
و هو ابد ما قبل كمت ابچي بقى مصدوم
تُراب : صدك تبچين علمود الجهال شبيج جاهلة ؟

جوهرة : اي اريد اطفال اني كلبي حاس بيه شيء
ضربني علىً حلگي
تُراب : اششش طاح حظج على هذا الاحساس بعد
اذا حسيتي افلش وجهج

جوهرة : اخذني للدكتورة يالله
تُراب : يجوز هسة حامل شمدريج اني ما ماريد تتعلعلين
عند الدكتورات ونفسيتج تتعب خليها على الله
مَد ايده يمسح دموعي و خلة راسي على صَدرة
جوهرة : اني احب الاطفال و اريدهم

تُراب : اخذج بس ما تجين يومية تجيني بسالفة
جوهرة : اي والله ما اسوي شيء
تُراب : تاخذج امج لو اني اخذج
جوهرة : لا انتَ

العصر تجهزت بسرعة وكعدته من النوم بالكوه يالله كعد
بدل وهو ماقابل يروح خالة لحد ما طلعنه تدعي الله يسهل
تُراب : يمه هسة اني عاتب عليها والله ما رايد
سُعاد : ميخالف يمه هم من حقها تحبك و تريد ولدك يترسون البيت
هو انرسمت الابتسامة على وجهه

وصلنه للدكتورة و كعدت انتظر السره وهو منتظرني جوه بالسيارة
من وصل سراي صحتله لان ما اعرف احجي وي الاطباء
تُراب : الج خلگ تصيرين حامل و اكعد اتنمر على بطنج
شلج بهاي الدوخة

ضحكت و دخلنه للدكتورة
ما ادري المكان الي تدخلة بـ ابتسامة غالباً ما
تطلع منه و دموعك على خدك ...
....

للحلوة الحزن مَخلوق
انتِ جميلة ؟ هذا يعني عليكِ دفع ضريبة جَمالك بالدموع
عداً نقداً حتى انتهاء المَطاف
- رُسل فَهد