رواية على صراط امي الفصل العاشر 10 - بقلم Shaqraa

مساء النرجس

•كد حجايتي وكون الله لا ينطيك..ربك مايخلي ابن ادم بعازة
ماترهم بعد والملكى صعبة وعيب..بشارع واحد تمر زفة وجنازة..
                             :
                              :
دعيت الله يعثرك بسلف مال ذياب..وعلى متونك جبل وبجدمك كزازة...

                                                (سيف الحلفي)

على صراط امي
الجزء العاشر

سديت الفون وانطيته لسبأ..مشكورة حبوبة ماقصرتي
بس تكدرين تخليني وحدي شوية..
نطقت هالكلمات باعصاب تلفانة لان بداخلي بركان
لحظات ويثور..
صفنت عليه سبأ بعيون مغرغرة ليش هيج سويتي
ولج يحبج خطية..
غطيت عيوني بيدي ..حجيت بصوت كوة يطلع..
خليني وحدي سبأ..
لا خليني يمج حتى يصيرلج سبب ماتطلعين وتبجين براحتج..
هي نطقت هالكلمات وانة
غطيت وجهي بيديه ثنينهم وبقيت ابجي وخانكة صوتي
ماريده يطلع مااريد..

بقيت ابجي واحجي بشهكة..
صار اسبوعين مستقوية واكابر واكول انتهينا
بس اول ماسمعت صوته ضعفففت انهااريت
ليش ليش مو هو الدخلني بهاي اللعبة وخلاني احبه
وهو يعرف دروبنا ماتلتقي ..
جرتني سبأ لحضنها وبقت تبجي وياي تحاول تهديني
بس هي اصلا كوة تحجي
وانة احس راسي صار بي الم مو طبيعي
بقيت لازمته واعصر بي
بقت هي تعصر براسي وتكلي ..كافي انة متاكدة
ترجعون كافي موتي روحج ..

مسحت دموعي وكتلها روحي هسه واجي وراج
لزمتني من ايدي..متأكدة؟
هزيت راسي اي ..
طلعت وسدت الباب وراها..
امسح بوجهي ودموعي ماتقبل توكف
حاولت قدر مااكدر اقوي نفسي خلاص اعتبرها تجربة
ولازم اخذ منها عبرة..

طلعت ورحت للمطبخ الكل كاعد بالصالة
دخلت للمطبخ تفاجئت فقار واكف يفلس رمان
من شافني بقى ينطي الوان..
طلعت يمامة من المطبخ الحار وباوعتلي بنظرات
بيها الف سؤال ..
كتلها ها شنو بقى اساعدج؟
لا مابقى شي و..وفقار كال اسوي رمانية ههه..
حجتها وصارت حمرة ..
بهاللحظة دخلت امي ومرت خالو انة ماردتها تنتبه لوجهي
طلعت بسرعة..

بقيت الملم بطالة الماي واسوي نفسي مشغولة حتى
لا احد ينتبهلي..
علاء كاعد ع اعصابه ووجهه محتقن..
لان من رجع تدخل بموضوعي خالو كله لا تدخل
نفسك وتصير مكروه
ومثل ماامها سوت قبل هي سوت هسه ..
شكد انقهرت من هذا الحجي وهم واكفين وي حر
اكثر مني ومخدوعين بي..

ورا ماراحو والكل نام ويمامة حتى ماسالت
ليش هلكد باجية لان تهربت مني
خافت اسالها اذا اكو تطور بينها وبين فقار..
بقيت سهرانة من وجع راسي ومن ضوجتي وقهري
اجت ببالي اخذ فون يمامة
اشوف هم راسل شي حر اليوم لو لا ..

تاكدت منها نامت واخذت الفون فتحته
رحت للرسائل ..
لكيت محادثة بينها وبين حر فتحتها..
من قبل فترة دزيت الخبز بيد سبأ..
هو كايللها بس احاجيها وافهمها..
وهي مجاوبته نفسيتها تعبانة وحاجاها جدو
وحاجيلها كلشي
لا تضغط عليها هسه وتتسرع بقرارها ..
وهواي رسائل يطلب يحاجيني بس هي من تكلي
انة ارفض..

واخر رسالة الي هي قبل شوية..
_اختي عذريني ازعجج بهذا الوقت بس وصليها لوطن..
مو حر اليلعب بشرف بنية ويتخذها وسيلة
يحقق بيها غاية غيره..واذا كنت قبل مصر اخطبها
بسبب حبي الها..هسه بعد السمعته صار واجب اخطبها
بس حتى لا تكول لعب بشرفي
لان هي اصلا ماتعرف معنى الحب ولا حبتني..
اطلب منج وصليلها هالرسالة وكليلها ..زواج وي غير ماكو
راح ياخذج ويثبتلج هومايلعب بعرض الناس_

اقرا الرسالة ودموعي تصب ..احسه كاعد كدامي بهدوءه
واصابعه المتشابكة ويحجي ..
رجعت ابجي من جديد وانقهرت اكثر معناها صدك مايحبني
ليش يكول اخطبها مو لان احبها..
امداني الغبية صدكت بي وخليته يمثل عليه..
مسحت المسجات كلها ورجعت الفون..
كمت غسلت ورجعت دنيا حارة ومنا روحي زاهكة
والم راسي موتني..
شربت بندول وبعد عناء ونزاع يلا نمت...

يوم ثاني من شافني بابا وشاف عيوني صاحلي
جان كاعد يباوع اخبار
وامي بالمطبخ..جنت انظف بالاستقبال وخلصت ..
كال ..وطونة تعاي باباتي شوية..
ها بابا..
تعاي كعدي يمي ..
كعدت يمه ابتسملي..شكلج تعبان لا تجهدين نفسج بالدراسة
يمتى امتحانج؟
بعد اقل من اسبوع..
هينة انشالله خلصي امتحان وروحي وي بيت عمج
واخوانج لايران..

اها منو رح يروح؟
عمج سامي وعائلته وعديله وعائلته وعابد ومختار ..
لعد ليش متروحون انت وماما..
ممنوع عليها السفر هسه لان بداية حملها
هم هالايام نريد نريد نمشي لمرتجى على بنية رايدها..
اها مو كال مو هسه؟
لا البارحة حجه وكلنا بس نفرغ نروح..
روحي وياهم وارتاحي يحتاجلج وكت تبقين لوحدج..
الله كريم ..

ومرت الايام تعاسة بوجع بحزن بشعور بالوحدة
ماينوصف..
جنت من اكعد يم اهلي واخواني سوالفهم تنسيني نفسي
هسه اكعد يمهم وبنصهم بس وحيدة
احس نفسي مثل الضايعة..
وقلة الاكل وكثرة البجي سوت عندي وجع راس ماينحمل
اتوقعها شقيقة لان بس هي ماتهدأ..
بابا كال خلصي امتحان واوديج للدكتور..

بيوم امتحاني عابد جان عنده شغل ووصلني بابا..
دخلت للمعهد واباوع للطريق للناس
اباوع بيأس وعدم مبالاة..جنت حيوية وعندي حب للحياة
ومتفائلة بشكل..
بس الصار كسرني كلش..ولد مني طفلة كبرت فجأة
بصدمة حبيب..
يمكن الوكت الي جمعني بحر مو هواي ويمكن اليسمعني
يضحك عليه لان متأثرة بحبه هالكد ..

بس انة عشت بدلال ابوي واخواني مثل الفراشة اطير
ولا مجربة الحب ولا اعرفه ..
وماجنت مخلية ببالي شخصية لفارس الاحلام
ولا متحضرة حتى احب مثل اكو ناس هي تدور عن الحب
انة لا الحب بلا شعور اجتاحني..
يوم الشفت حر ماعرفت شنو هالاحساس ..
بس جنت احب اشوفه اكثر واحب يباوعلي اكثر
رغم الملامة وكلها تكول مو حلو ..اسود..
انة اشوفة احلى من الشوكولا..

هه..فد مرة كلي ..
شكلي يمج مثل الحليب والكاكاو..
كتله ياي اموت ع الشوكولا ممكن اخذ منك عضة..
هههه تعاي اخذي عضات مو عضة وحدة
بس بشرط انة اريد اكل واشرب بالحليب ..
تالي انتبهت لنفسي شلون جفصت وبوكتها سديت الخط
بوجهه..

وبقى يتصل ويتصل اخر شي جاوبته..
عفية لتاخذها بغير قصد انة انة عوبة ..
ضحك بهدوووء ..حبيبي عبالي اجه يمج احد وسديتيه..
شلونها دراستج ..
غير الموضوع كله وماحسسني بشي ولا خلاني اخجل..
بعد هذا كله يطلع مخادع ويعرف بماضي امي وابوه
يعني هلكد ابوه حاقد ع امي
بحيث حط ابنه بطريقي!!

انتظرت شوية وفتحو القاعات ودخلنا نمتحن..
همزين الاسئلة زينة وجاوبت
لان بعد مالي خلك الدراسة كلش...
طلعت من الامتحان من وكت ..بس ابوي كال ب١١ ادزلج
احد ياخذج
واصلا ماعندي فون واخابر اكلهم خلصت..
ضحكت على نفسي واستهزأت وين جنت وين صرت
كله بسبب الحب ..عجيب يقلب
حياة الانسان من جحيم لنعيم
واقل زلة يصير العكس...
وانة ملتهية احاجي نفسي.. انضربت بشخص
فزيت ورجعت بسرعة
من اجت عيني على ايديه..

وكف كدامي وحجه باسلوب امر..
ممكن دقايق من وكتج؟
هزيت راسي وعيوني غرغرت ماريد ابجي لا عفية
لا عيوني لا تبجين...
صرنا على جهة وهو تنهد وحجة باسلوب مختلف..
مو نفسه اسلوب قبل..
هذا الاسلوب بي امر وجزع نفس الوقت..
شبك اصابعه وكال..

باوعي وطن..اتهمتيني لعبت بيج وكلتي انتقم..
الظاهر اجاثا كريستي اثرت عليج خلتج تشوفين
كلشي بمنظور الاجرام..
طبعا حجه هالشي لان جنت اكله اقرا روايات
اجاثا كريستي واحب الجرايم..
كمل كلامه..ورجع لنبرته السابقة...

وطن..حبيتج ونسيت الفوارق ونسيت نفسي..
ماكلت انة عبد ومايحقلي احلم بشكرة ولا كلت
اهلها يطردوني من الباب..
لان عندي ايمان بالشي الاسوي واذا ردت شي اخذه
مو بقوة ولا غصب..
بس اصر عليه وعندي ارادة يااما اكون او لا اكون..

بالاول مادري بيج بت سهير ..لان ابوي حاجيلي
واعرف عن معاناته وعن ترك امج اله..
ابوي كبر وخلف وشيب..
بس مانسى سهير ولا كطع سواله عنها...
ويعرف اسامي ولدها واسامي بناتها..
شايفج وانت صغيرة مرة وياها بالعشار..
كلي بتها الصغيرة نسخة منها وامبينة لوتية..
تعرف شحسيت من شفتها؟
سالته بغيض لان بعده يحن وهو عنده امي الماقصرت
عليه بشي..

شحسيت؟؟
حسيت هاية بتي ومن عرفت اسمها وطن ضحكت
جانت سهير حلمها تسمي اول ابن وطن
جنت اكلها عدج حس وطني زايد
تضوج وتدلل عليه تكلي اسمي وطن وعراق وبغداد
وعلى عنادك الصغيرة بصرة...
اموت من الضحك عليها اكلها بطاقتنا تصير مو بطاقة
تموينيه تصير خريطة..

يتذكر كل تفصيلة عاشها وياها بس يكمل كلامه
يستغفر ويكول صارت بعصمة غيري
ومااتمنالها بس الخير والراحة..لا تاخذ كلامي بغير
تفسير ياابني بس تدري بية افضفضلك ..
رغم هذا كله مافكرت ااذيج ومن عرفتج بتها
بعد ماسكنتي عقلي
صار عندي دافع وصريت اخذج وماهمني شي..
وماهمني الصار قبل ورفضهم لابوي..لان كتله
لازم ماتتركها مدام تحبها
وخلي كدامك خيار واحد بس..
تاخذها تاخذها ماكو غير احتمال...

بس للاسف طلعتي انت مو كفو حب وبعتيني باول الطريق
وتهمتيني العب واتسلى
وسويتيها فوز وخسارة..اليوم جاي وكدامج اكلج..
راح اخطبج الف مرة ومرة..ونتزوج
بس اسقاط فرض مو اكثر..
حتى اثبتلج انة رجال وكد حجايتي...
بس غير قصد...لا ابد..
لان المرة الماتقدر حبي الها وتبيع باول محنة
حرام بيها كل رفة نبض وكل شهكة احساس...
اسمحيلي...

عافني واكفة وراح..خلاني مصدومة من الحجي
وخلاني متحطمة من شوفته..
كعدت وخليت ايديه على وجهي وبقيت انحب بوجع
شجااابك عليه ليش حبيت
شجابني للحب وماصار بطريقي الا انت الا ابن الرجال
العافته اني رغم حبها بس رادت ترضي ابوها..
حسيت بنية تدك على كتفي..
شبيج يابنية تحتاجين شي تردين تخابرين اهلج؟
رفعت راسي ومسحت دموعي..
لا مشكورة كلشي مابيه..
بقت تباوعلي وعافتني وراحت...

كمت للكافتيريا اشتريت ماي..وحار عبالك مفور
غسلت وجهي وشربت ورجعت كعدت انتظر..
لحد مااجه عليه عابد اخذني..
سالني شبيج كتله راسي يوجعني كلش..
شغل السيارة يريد يحرك وعبرت من يمنا سيارة حر..
بس شخط حيل بس انتبه عابد للسيارة
ضحك كال..شوفي ولج كمارو ههه بس حرامات ماشفت
الراكبها..
خليتيتي مثلج اباوع للسايق واقارنه بسيارته
ضحكت وبقلبي اكول لو تدري منو راكبها...
بس مانتبه جان جاي يشغل التبريد...

رجعنا للبيت وامي سالتني عن الامتحان
كتلها زين كلش مجاوبة..
عجيب صارت تتحاشاني وابد ماتباوع بعيوني
مادري مقهورة مني لو عليه...
ورا ماتغدينا كال بابا امشي حجزلتج يم دكتور جملة عصبية...
صدك بدلت ورحنا..
وبقى يسولف وياي عن السفرة ويسالني شنو احتاج
يحاول يغير نفسيتي...

وصلنا للدكتور وسوا فحوصات وفحص نظر لان شك
السبب من عيوني..
طلع عندي استكماتزم ..واحتاج نظارات..
بس حولني على الرنين حتى يتاكد..
واستمرت مراجعتي كم يوم لحد مابينت النتائج
وبعد الفحص الشامل كال كلشي مابيج
بس هاي شقيقة واصلا الشقيقة شي نفسي..
علاجها استرخاء وراحة وهالامور...
وانطاني كم مسكن اشربه بس احسن شوية تحسنت...

وبيومها عابد اخذني اشتريت كم شغلة احتاجها
لان باجر الظهر نسافر..
كملت اغراضي وجنطتني..ومختار وعابد
يسافرون وياي ..
يوم ثاني ودعتهم..حسين باسني براسي وحسيته
مثل اليعتذر..ومرتجى هم ..
بابا حضني ونزلت دموعه..يمامة شبعت بجي
امي حضنتني وبلا ماتنطق اي كلمة..
عصرتني بحضنها حيل وباستني...

رحنا للمطار وهنتك التقينا بعمو وزوجته وحمودي
ابنهم صغير بالابتدائية
واختزمرته وزوجها وبتهم اكبر مني وطفلها
وابنهم هم شاب بس مملتقية بية اول مرة اشوفه
اصلا هي اقاربنا من بعيد بس مشايفتهم..
طارت طيارتنا ومختار يمي موقعه
بس خلصها نايم عبالك رايح للمريخ..
وصلنا هناك واخذونا للفندق..
بس وصلنا مسطورين وتعبانين بس الجو كلش حلو
لان عدنا بالبصرة تشوي
بس عدهم لا حلوو..

نمنا بيومها عبالك اموات وكعدنا اكلنا ورجعنا نمنا..
يوم الثاني الفجر كعدنا شبعانين نوم ومرتاحين كلش
نزلنا تريكنا بالبوفيه مال الفندق ..
وللتسعة كعدو جماعتنا كالو تعالو يمنا شربو جاي
حتى وراها نطلع..
نزلنا لكيناهم كاعدين بالمطعم مالت الفندق..
كعدنا وطلبو جاي ونسولف
اخت مرت خالو وبتها حلو اسلوبهم واجتماعيات بسرعة
يفتحن موضوع..
واحنا نسولف رفعت راسي لا اراديا..
انتبهت لواحد بيده كوب الجاي وعاض شفته
وصافن بوجهي...

للحكاية بقية
بقلم شقراء(قمر كانون)