رواية على صراط امي الفصل الحادي عشر 11 - بقلم Shaqraa

مساء الفل

على صراط امي
الجزء الحادي عشر

شفت هذا ابن اخت مرت عمو صافن عليه وعاض شفته
من شافني استغربت بنظرتي
مثل الفز ودار وجهه ..وانة هم بسرعة درت ..
ابد ماباوعت بوجهه من امس يعني هاي اول مرة
انتبه ومن انتبهت شفت امبحر بيه..

ورا شوية كالو خل نروح نزور وورا صلاة الظهر
نروح نتغدا ونفتر
اخذنا المترجم ورحنا زرنا ..ومن خلصنا رحنا
لمطعم حتى نتغدا..
كعدت بصفي مرت عمو ومن الجهة الثانية شذى
بتها..

شذى بقت تسولف وياي كالت..
ناوية تشتغلين لو نجحتي..
اي اذا حصلت شغل اكيد اشتغل ماحلوة كعدة البيت..
بس كون تحصليلج حكومي لان الاهلي مذلة
ومو كل واحد يقبل
اكيد المكان الاستغل بي عرف مراح اشتغل يم غريب..
يعني اهلج يقبلون ؟
اي طبعا مدام متاكدين من الناس الاشتغل وياها عادي
يشجعوني احصد ثمرة تعبي..
ههه الله يديمهم الج ..لو تشوفين اهلنا دراسة ماخلونه نكمل
والرجال طلع اضرب منهم...
بس خاف انت هم من يمنعج الرجال بعدين تبطلين..
مايحقله يمنعني لان مامسوية شي غلط..
اوه انت ماتعرفين ولدنا!!!

حجتها واندارت لامها حاجتها..بقيت مستغربة
شنو شعليه بولدهم انة..
حاجيت عابد حتى نخابر ماما بس الاحظ نظرات خالد
ابن اخت مرت عمو عليه..
كال عابد هسه من نخلص نخابرهم..
بعدها ماحجيت حتى اتجنب تصرفات هذا المريب..

وخلصنا اليوم كله برا شوية نفسيتي تحسنت
خصوصا عابد يسوي روح للطلعة ويونس..
ومرت خمس ايام مابقى مكان مارحنا بس
الي بدا يزعجني تصرفات خالد
احسه يتدحس لو يبسمر بحجة يحجي وي امه او اخته..

قبل لا نرجع بيوم جنا رايحين نشتري هدايا
وطبعا النسوان لازم نفتر براحتنا مو مثل الولد يشترون بسرعة..
وقتها انة وشذى واكفين بمحل ملابس لان شذى
تريد تاخذ مانتو وجاي تاخذ رأيي..
كتلها مخصر ويبين صغير لا يغرج قماشهم
لان ماياخذ وقوي..

هي قاسته طلع صح ضيك واخذت اكبر..
من ردنا نطلع خالد كدامنا شايل ابن شذى كلها..
شذوة زين سمعنا صوتج ادري بيج باتري وتخافين
يخلص..
هي بقت تضحك وتحركله بعيونها بس انة اتخذت
وضع الاثول..
اذا ماعجبني الشي اسوي نفسي ثولة والسالفة
مو يمي بس صافنة...
بس كلش تضايقت منه احسه مراقب كل حركاتي
وتمنيت نرجع بس افتك منه...

صار يوم ثاني وتعطلنا هواي بالرجعة بحيث وصلنا العصر
ومن وصلنا و سلمنا عليهم بالمطار وودعناهم
ام خالد كالت زورينا وي عمتج لا تكطعين لان
طول السفرة هي دك سوالف وياي
كتلها اكيد اجيب ماما واجي..

ومن اجه علينا بابا للمطار اجه لوحده كال ماما تعبانة
خفت وسالته شبيها بس كال ظهرها ياذيها
ماصدكت وخفت عليها بس من رحعنا واجت للباب
تركض حضنتها ونسيت كلشي
مشتاقة لحضنها كلش ..سالتها سلامتج ليش تعبانة..
ظهري شوية ياذيني لايبقى بالج حبيبة..
والتمو الولد ويمامة وكعدنا مشتاقين لبعض
مامتعودينزنتباعد هالكد..

ويوم ثاني كعدت الصبح لان نمت البارحة من وكت
تريكنا وبقينا نسولف انة وماما..
كالت رايحين خاطبين لمرتجى بس ينتظرون
الناس يدزون خبر..
مرتجى خطب بنية متخرجة هالسنة من الكلية
وحسب كلامه اقارب الدكتور الي يشتغل وياه
بس احنا نعرف بي يريدها ..

بقينا نسولف ع السفرة واحسها رجعت شوية
مثل قبل انفك الحاجز
وللعصر اجه جدو وبيبي النا..طبعا صارلهم
هواي ماجايين واستغربت جيتهم
جبت الفاكهة واجيت جانو الكل كاعدين
كال جدو تعاي يمي بعد بيتي..
رحت اخذتله الماعون واكشرله بالتفاحة..
انطيته ياكل ويسولف..
كال..عندي حجاية وي وطن بوية اذا تكدرون
سوولنا درب..

اول الناس ماما كامت وكومت وياها بيبي..
يمامة بقت نظراتها تدور بيني وبين جدو
كامو بس بابا كال..بوية هاي الغالية لا تضغط عليها..
جاوبه جدو..عيسى هاي بت سهير
يعني صبي العين وابتسم..
طلع بابا وعينه عليه وشكله مامرتاح..

كال جدو..شلونها بتي السباعية عساج بخير..
هزيت راسي وابتسمت مجاملة..بتك سبعة لا تخاف عليها..
اي ادري بيج بعد جدج..باعي بنيتي
انت كبرتي وهل خلصتي دراسة ومهما طولتي
مصيرج واستقرارج يم رجلج
وتددرين شكد يطلبونج مني ومن ابوج ..بس انة
اكول ماكو واحد يستاهلج ومحد يقنعني
كبل مدة رادج ابن بت اخوي وحاجاني ابوه
كتله ابنك مايوازيها
لان ابنه صح حليو وجيبه عامر بس يابوية مطكطك
هذا ماينشد بي ظهر..

وكبل شهر اجاني سامي كال رايدين مرة لخالد
ويريد يمشون على وطن شتكول حجي
كتله ياابرك الساعة..خالد زلمة وكفو ويعجبني
بس ماردت اضغط عليج على كولة ابوج..
اهله وبيت عمج عدهم سفرة..كلت لسامي اخذو خالد وياكم
باعتباره شاب ويعينكم
وانة ارتب روحة وطن وهناك بلا ماتدري بي رايدها
تشوفه
حتى لا تتسرع ..وماكلت للطير الطاير بس امج تدري
حتى ابوج ماكتله..

هسه شنو رايج بي بنيتي؟
انة استمع لجدو وصافنة يعني اصر الا يزوجني
وكالت يمامة الخطوة الثانية
توقعيها يزوجج وفعلا هه جابلي رجل!
ماعرف ارفض او اوافق النتيجة وحدة يعني حر مستحيل
ارتبط بي..
اااه حر ااه اسمك من اذكره تصير عندي شهكة والف اااه...

رجعت جاوبت جدو ..اي شفته بس مادري
ماحطيت بالي وياه..
انطيني مهلة افكر ويصير خير..
فكري بنيتي فكري بس ترى الولد مايتفوت وانة
اعرفهم
وصدكيني من تتزوجين وتستقرين تضحكين ع روحج
بعدين وع ايام المضت
ماكو احلى من الزواج وكل الحب يجي بالزواج..
تقرب وحجه بصوت ناصي يم اذني..هالتشوفين
امج نست روحها وحبلت  بهالعمر
وكبل تصيح ماريده ههههه ...
ضحكت مدري ع روحي مدري ع حججه الغير مقنعة...

بعدها كلي روحي صيحيلي ابوج ووياج جيبي ماي..
طلعت ابوي كاعد ع اعصابه..
شافني كام ..ابتسمتله كتله بابا حجي يريدك..
تنهد وراح..وانة رحت جبت الماي ووديته الهم
سديت الباب وراي ورحت للصالة..
محد حجة او سالني بس النظرات كفيلة بهالشي..
عابد كاعد يعصر رجل بيبي ويتشاقه وياها ..
امي تحاول متخلي عيونها بعيوني لان عرفت
بيها تعرف سبب سفري
الي مخططله جدو واي هي الها ايد بي..

شوية واجو بابا وجدو يمنا وبابا ضايج
بس يعني يحاول يبين ماكو شي وعيب يثكل وجهه ..
وبقو بيومها لحد ورا العشا راحو ..
ورا ماراحو دخلت للغرفة شفت يمامة متمددة والسماعات
بذانها..
غمزتلها ابتسمت وصارت حمرة..
تقربت جريت السماعة منها وحطيتها بذاني
جاي تسمع عبدالله رويشد..
هزيت راسي وطربت وياها وهي تباوعلي بخجل..

احس الاغنية لعبت باحساسي وراح تسببلي نوبة
ذكريات ..
رجعتلها السماعة واجيت لفراشي نمت وغطيت راسي
بالمخدة..
تذكرت اول مااجاني للمعهد وانطاني الهدية..ههه
بعدها الهدية بالجرار وي الملابس..
ذبيت المخدة من وجهي وكمت يمامة مغمضة وتسمع
فتحت الجرار وجريت العلاكة من جوا الملابس
فتحتها وغمضت ماريد ابجي..
بس خانتني الدمع ونزلت ..اخذت السوار بسته
حطيته بيدي وبقيت اباوعله..
ارجعه لمكانه لو البسه؟لا خلي البسه واعتبره ذكرى حلوة..
حطيته بيدي ورجعت لفراشي...

ومرت كم يوم الوضع نفسه ..اليوم موعد النتائج
ماقبل عابد اروح كال شيوديج
ابقي وانة اجيبها الج..ماحجيت شي كتله بعد احسن..
راح جابها واجه جايبلي دبدوب جبير ابيض
من دخل وانة كاعدة انتظر بقلق
كمزت من شفته بيده الدبدوب وبقيت واكفة بمكاني
ومبتسمة ونزلت دموعي..
اجاني حضني واجت ماما ع صوتنا وكلتله بشرر
باسني براسي وانطاني الدب كلها نجححت..
هلهلت ماما وشبكتنا ثنينا..
حسيت بفرحة وارتاحيت لان خلصت وتخرجت
بس فرحتي مجروحة ..

من اجه بابا لكاني بالصالة وحاضنة الدب اجاني
يركض..
اروح فدوة للخريجة بتي ..شبكته حيل وبقى يبوس براسي وبخدودي..
وكعد وكعدني يمه وفتح العلاكة الجايبها..
جايبلي فون بوكته جان جديد توة نازل اسمه N8
جانت الاجهزة اللمس قليلة وبداية طلعتها ..
وجايبلي حلويات الاحبها..
بوسته وشكرته وكعدت نزعته جواريبه ومايخليني
اعصر رجليه..

فرحت بالفون شوية يونسني..علمني عليه وكال حطيتلج
بي شريحة..
ومنزلي بي برامج والعاب..
خلصت اليوم كله ملتهية بي ومتونسة ..
يمامة شافته كالت اريد اشتريلي واحد سبقتيني
حطيت عيني عليه تتشاقة وياي..

يوم ثاني خابرو اهل البنية قابلين وحددو موعد
حتى نروح نتفق وياهم ع الخطوبة..
بابا كال جدو يريدنا اليوم نروح الهم ..
عرفت جدو راح يسالني اليوم عن الجواب
وعرفت مايتركني الا وانة موافقة..
و
وفعلا من رحنا وطبعا الكل موجود
ومن ضمنهم بيت خالو سلام...
من انشغلو الكل سالني ..ها شقررتي بوية ترى مرتين سالوني
وكتلهم تانوها جاي تفكر..
بعدني مادري ..توكلي ع الله يمعودة هسه امبينة
مقتنعة اعرفج انة..
كيفك بابا حجي انت اعرف..
من كتله هيج انطيته الضوا الاخضر...

علة صوته وكال ياجماعة اريد هلهولة توصل لسابع حي..
الكل باوعله بتفاجئ وكالو شكو شنو..
كلهم انشالله هالايام نمهر لخالد على وطن...
اباوع عيون علاء تريد تطلع وغضب..
كام وكامت مرته وراه جدو بقى مبتسم ابتسامة فاترة..
كال بابا قررتي؟متاكدة؟
اي فكرت ..حجيتها وانة اباوع للسوار..
هز راسه كال الله كريم..

وبدت الاسئلة والاستفسارات من كل الجهات..
يمامة صافنة عليه وبس..
ماحجت ولا علقت بشي..يمامة وبابا اكثر شخصين يحسون
باحساسي هسه
لان ضاكو لوعة الحب والفقدان ويعرفون ناره تجوي..
بيت خالو سلام ماطولو راحو لان اصلا ضاجو
بس مابين خالو ..
من طلعو اباوع لفقار عينه ع يمامة وهي مثل اليريد
يبوك شي ويحاول يأمن ويبعد الشبهات
بس هي جانت تريد تبوك نظرات ..نظرات وبس
بس قلقلها وخوفها وترددها
يخليها متذبذبة بكلشي تسوي...

رجعنا للبيت وبابا سالني ..فكرتي عدل متاكدة
من قرارج ترى هاي حياة طويلة
لا تتسرعين ومحد يضغط عليج بشي..
امي كلتله لا هي عاقلة وتصرفت صح الصح
وباوعت لبابا وابتسمت...

للحكاية بقية
بقلم شقراء(قمر كانون)

اعرف اول حجاية تكولون البارت صغير بس ابد مافرغت
هذا نصه كتبته البارحة بالليل والنص الثاني قبل شوية
عذروني كلش حبايبي مقصرة وياكم🌺