رواية على صراط امي الفصل الرابع والعشرون 24 - بقلم Shaqraa

مساء الخير

على صراط امي
الجزء الثاني والعشرون

وطن احجي شمسوي وياج ؟
ما ما كلشي ماكو مامسوي ..
انت معليك مايخصك اصلا كله بسببك
لا تحاجيني ولا تخابر بعد
انت السبب بكل المشاكل ..

استغفر الله..استغفر الله العظيم
يعني كل هالخبال والارتباك
وجايه تكولين ماكو؟
احجيلي حتى اعرف اتعامل وياج وطن
ماتتغير نظرتي الج وعيونج ..

حجيت بعبرة وصوت مخنوك ..
ليش تعرف حتى تروح تعاركه وهالمرة ...
بعدني مامكملة واندك الباب نزلت الفون جوا
الغطا..
منو؟؟
انة ولج ادخل؟
ها اي عادي ادخل...
فتح الباب عابد ودخل..

ها وطونة شفتج كاعدة كلت انطيج كرزات تردين؟
ايي انطيني شوية..
هاج فتحي ايدج..صدك خوش صفحة مال سؤال يطرح نفسه
همزين متابعتها
عود انة ردت اكلج عليها بس زين تعرفيها..
ايي لكيتها بالمقترحات ..
وانطاني الكرزات وطلع ..
كمت قفلت الباب ورجعت طلعت الفون
بعده حر ع الخط ..

حطيته ع اذني وحجيت..
شمنتظر ليش ماكطعت الخط؟
منتظر عصفورتي عاجبني اصادقج تقبلين؟
هه شنو تصادقني شبيك حر؟
يفداج حر يابعدهم كلهم ..عندج فيس بوك لوتية
اكول وين مخلصة وكتج ..
اي عندي.
زين اريد اصادقج ممكن..
انت ليش تحجي بضحكة مكتومة شنو كدامك
مخبلة؟اشو حاصرتك الضحكة؟

لا مو ضحكة بس من الفرحة مبتسم ..
لا مو هيجي امبين تريد تضحك..
هههههههههههههه كشفتيني ..
وليش تضحك؟؟؟
احاجيج واتذكر كل مااشوفج لازم تنبطحين بالكاع
خرب يومج عبالك دجاجة بيت
ليش هالكد فقيرة..
مو فقيرة انة ولساني اطول مني ..
لا غلطانة فقيرة كلش...

وهسه اخر مرة افتح سيرة الماضي وذاك السز
اجيب سيرته..
كليلي بشنو مأذيج؟
انة عرفت انتو افترقتو بسبب عركة وخلاف
لان انة كتله رايدها وهي مجبورة
بس السبب الحقيقي والتفاصيل منج اريد اعرفها
احجيلي دلوعتي حتى ترتاحين...

حر اخر مرة اكلك ماصار شي بس مشاكل وتطلكنا
واذا تريد تتهرب
لا تتحجج بالماضي وتكول صاير شي ..
لحظة لحظة!!اتهرب من شنو؟؟
سؤالي الج نتيجة تصرفاتج ..وهذا هو انسي الموضوع
بعد لا افتحه ولا اسال..
واريد نبدي من جديد..
بس كولي اي حتى ارجع اخطبج...

ماريد..
لا تردين..رجفة صوتج والآه التطلع منج من تشتاقيلي
اكدر اسمعها
رغم هالمرة خفيفة بس سمعتها باحساسي قبل
اذني...
ليش سكتي؟ترى اعرف انت موافقة وقابل بكلشي
خلاص يا وطن
كافي كلبي تعب وانت تعذبتي وثنينا غلطنا وثنينا
لازم نبدي من جديد...

بس ماافيدك حر انة معقدة ..
غلطانة انت ماتعرفين نفسج بكد مااعرفج..
بسيطة وسلسة وواحساس البيج نغمة عودي واعرفها
وانة مغمض اعزفج وباحلى ايقاع..

جاي تبجين؟؟؟مسحي دمعج ولا تبجين وانة وياج فدوة
لدموعج الحلوة..
مسحت دموعي وتشجعت حتى احجي..
لا مو ابجي بس متضايقة وماريد ارتبط هسه حر
افهمني..
ميخالف مو هسه بس حدديلي وقت ماريد اخسرج
مرة ثانية بعد..
لا بعد مااخطي خطوة غبية وغلطة وراحت واهلي
وياي بقراري..بس
انت خليني براحتي ولا تضغط عليه...
لعيونج ميخالف اصبر ..بس توعديني تردين
على مكالماتي
وماتكطعين وياي..
اي اوكي وهسه خليني اروح انام لان نعست..
تصحبين على خير وطني..
وانت من اهله ...
انتظرري..
نعم؟
احبج ...
ههه باي...

ختمته وياه وتمددت ع ظهري رخيت جسمي كله
اول مرة احس نفسي
مامتشجنة واعصابي مرتاحة ..
طكطكت ظهري وتمغطت وتثاوبت..ههه عبالك
طفل جان مكمط
وهسه فتحو كماطه..
بس ياترى قراري صح!وقبلت حر يفتح الكماط وراح
اثبتله انة كبرت!
لو ابقى طفلة بقرارتي وتصرفاتي ومحرد هيكل وصورة
كبيرة بعقل طفل:..

خلاص ماريد افكر بشي والسويته مقتنعة بي وبس..
نفسيتي هدأت ومزاجي تحسن وتغير..
نمت نووومة عميقة كلش..
ومن هذا اليوم رجعت اتواصل وي حر وضفته بالفيس
وبقينا ندردش كتابة
اسهل بهواي من المراسلات ع الرقم
بحيث كمنا ننسى نفسنا مرات للفجر ونغفى واحنا نكتب..

مر على وضعي وياه سنة ونص وهو يتعامل وياي
كصديق
لان اكثر من مرة تغزل بس مو غزل عذري
وتسبب بخلاف بينا وزعل
هنا هو تفهمني وبقى خلاني براحتي وصادقني
صرت حتى مااستحي منه وميانة
اتشاقى واحجيله كلشي وهو يسايرني بنفس الاسلوب...

مرتجى تزوج صارله سنة وشوية ومرته جاي تعالج
لان عدها خربطة هرمونات
ارتفاع هرمون الذكورة اثر على قدرتها للحمل..
صارت صديقتي وكلش احبها وتحبني ..وكله اسميها خطر
وهي تكلي فعلا جنت اشبه خطر..
ومن اول ايام زواجهم ساعدتها بشنو تنسق وشنو تلبس
لان من يجون يتباركون
خصوصا العمام والخوال ..جانو يجون بس يردون يلزمون
فد زلة صغيرة
لان مرتجى مااخذ من الاقارب واخذ غريبة..

وياها وياها بمكياج بلبس حتى الاحذية انة اساعدها شتختار
وهي ما تستنكف بالعكس
تكلي علميني لان انت اختي وماكو فرق بينا..
ومرات تكلي وين جنتي عني قبل كد ما جنت بدائية وكلشي
مااعرف زين ماتحولت رجال
وانة ماحاسة بنفسي..
وحالياً مستمرة ع العلاج ..

اما امي ولدت رضاوي ..كل اليشوفه يكول ابني بكد ما
يشبهني كلش
هو صح انة نسخة من امي بس هو نسخة مني اكثر ..
بس بالبداية ضعيف حيل حتى صعب ينلزم
وحددله الدكتور حليب طبي وعليه صار دنفوش
يجنن..
وانة وي ماما اهتم بي واساعدها هواي وهي تكلي
تعلمي حتى ماتتعذبين
من تخلفين وتعرفين تتعاملين وي الطفل..
وفعلا تعلمت كلشي وصرت اعرفله بس يبجي اعرف اذا
جوعان او غير شي...

يمامة جابت ولد اسمه يسر ..ومن تجي للبيت تصير
حضانة
واذا رحنا لبيت خالو تصير بس لغوة مال اطفال
لان بت سبأ وابن يمامة ورضاوي
اخر شي يذبوهم يمي ويرحون
يخلوني اكمز بس عادي احبهم واصورهم وادز لحر
وهو يكلي يمته نجيب مثلهم ..

وبيوم راحت يمامة وماما للصالون وبقو الاطفال يمي
كاعدة احاجي حر
وانكطع النت..
خابرني كتله مادري يمكن خلل..
مادري بس حتى يمي راح؟خل اطلع لبيت عمي سلام
اسألهم.
يلا انتظرك انة...

بقيت انتظره وشوية واجو امي ويمامة بس مقهورين
وامي كعدت بقت تبجي..
طفرت يمها بسرعه..
شبيج ماما شصاير شبيكم احجو؟؟احاجيها واباوع ليمامة..
مسحت دموعها وبقت تردد
حسبنا الله ونعم الوكيل..ولج ماما يكولون داعش بحدود بغداد
والدنيا امكلوبة سودة عليه هيج يصير بينا ..
يبببوي شلون ماما حبوبة بس لا راح يوصلون!؟؟النه..
وج لا تهبطين كلبي كعدي
الله يستر انشالله شدة وتزول..

كومن خل نصلي كومن وجيبن الجهال تكعد كدامنا
الله سبحانه وتعالى يسمع للنساء والاطفال ..
والنعم بي رؤوف رحيم ..يلا بس نتوضى...

ورحنا توضينا وكعدنا نصلي ونقرا دعاء''يامن تحل به
عقد المكاره''
واذن المغرب وكملنا صلاتنا ..
وبابا والولد اجو وضعهم اسوء من ماما والكل يلوب..
بقى النت ماكو ويوم ثاني رجع...
وساءت الاوضاع الى درجة
وهنا انقطع النت نهائياً..

صادف قبل رمضان يوم او يومين..
رجعنا بالاتصال على الشريحة وحر هنا كلش ضاج
كال ..خلي اجي اخطبج ..
شلون مو رمضان يعني مو وكتها اكو واحد يخطب
وهو صايم؟
وشلون عيني ننتظر للعيد بعد شهر هنا هنا..
هسه انت ليش ضايج خايف ع الرصيد؟
ههههه كون هسه الزمج وهذا لسانج احطه على بليته حااارة
كون اسمه من يسوي تششش..
الله يستر لييش؟
عاجبني اشويه واكله ...

ها خنستي مساع جنتي تلعلعين ام لسان..
باعي عندي حل..لا حفلة ولا هوسه بس نجيب شيخ
ويعقدلنا ورا الفطور ها؟
اوو لا حر لا مو هيجي ..نتحمل نصبر هو شهر
اريد تصير حفلتنا حلوة عفية عفية..
شلون بيه انة كلبي رچيچ وياج كلش..
ياربي دومه حتى استغلك عدل ههه...
لا منيلج هالسوالف بريئة انت عصفورة ..
خجلتني ههه..
بعدج بعدج اشايفة حتى تخجلين..اريد اخجلج من صدك
بس مو هسه لا
وجهاً لوجه..اشوف الخديدات من تصير حمرة والشفة تنلم
وترجف اخ اويلي...

بقيت ساكته ماجاوبته لان توترت واستحيت وكل ما
يفتح هذا الموضوع ازعل
ردت اكسر الحاجز هالمرة صح مااجاريه بالكلام
بس ماازعل..
رجع كال..شعندج صافنة وايدج على الخد ..جنج عاشكة
وببالج احد..
ههه ع فكرة صوتك بي مشروع فنان..
اي فنان مكسب ..ولج هي كل دبكة زلابية ..عبالج
حسين البصري يومية ينعاد..
اوف شكد حلوات اغانيه..
اي بس رجعو جددوهن وخربوهن قبل بصوته
يخبلن..
امممم...

وبدا رمضان وانشغلنا نص النهار نوم والنص الثاني
تحضير فطور وصلاة وشوية مسلسلات
وبالليل نبقى كاعدين محد ينام ..صرت احجي وي
حر بس رسائل..
لحد مارجعو النت ببرنامج يمكن اسمه سايفون
ورجعنا نكدر نحجي احسن من قبل..
وكل يومية يدردم عليه ويكول شهر رمضان
هالمرة كلش طول
اكلج ماكو خصم ماكو تخفيض..
وانة اداهره واخلي يعيط...

قبل العيد بثلث ايام..خابرني بالخمسة الصبح
جنت جاي انظف للعيد
والكل بغرفهم وماما كتلها روحي ارتاحي
لان خطية تتعب وي رضا وبالبيت..
جنت اطرف الصالة بالسعفة وخابرني..
دك مرتين ماجاوبت..
ثالث مرة رحت لغرفتي وجاوبته..

الو؟
هلا دلوعتي وينج شكد دكيت..
جنت انظف..شبي صوتك تنهت؟شجاي تسوي؟
سمعيني عمري عدل..
انة رحت وي الدكاترة المتطوعين يعالجون الجرحى
بامرلي..
شنو؟؟؟؟؟شنوو شتكول انت؟؟حجيتها وبجيت..

وطن وطن ..انت والوطن نفس المعزة ..وكل واحد منكم اله حق
عليه..
تقبليها مااشارك بشي بسيط اساعد ابن بلدي؟
ترضين يبقون الجرحى بسبب تاخر العلاج وماكو اسعافات
ينتكسون ويموتون؟
لا طبعا مايصير كلنا اخوة وانت روحتك شرف النا كلنا..
بس ليش ماكتلي قبل لا تروح
بس ردت اودعك ماردت شي..

ماكدرت اكمل بقيت ابجي..حجه هو بنبرته الرزنة..
ماريد وداع اريد استقبال..
انة راجعلج بليلة العيد ..مانطول وعيونج ..
وجايبلج مشية وجاي باول يوم ورايدج حلالي ياروحي
وراحتي..
تانيني ودربالج على روحج زين وكولي لامج حتى تتحضر..
تسمعيني وطونتي؟

حر احلفلي ترجع...
وطني يااحلى وطن..الله شحلاتها من محبوبتك اسمها وطن
تحس روحك وفي لوطنك ههه..
حر لا تدور الموضوع احلف..
وطونة انة اثق باحساسي..واحس راح ارجع
واخطبج ويطلعلي
جدج مفرق الجماعات ويخربها
بس هااا..هالمرة مااسكت..
اجيبلة خالتي شلون مرة تعجبه هو يريد هيج نوعية
يوم ثاني يودع صدكي مايطول...

هههه فديتك بعد عمري لا تطول بداعتي..
وعيونج مااطول بس خليني اروح محتاجيني...
محروس حبيبي..احبك...
ايي هسه ارتاحيت..احبج موت عصفورتي..

سديته منه وماكدرت اسيطر ع دموعي..
رجعت اكمل تنظيف بس ايدي ترجف احس
شنو الزم يطيح مني
ودموعي ماراضيةتوكف وصدري احتصر كلش
شغلت نفسي بالشغل
نظفت الباقي كله ماخليت شي..
صعدت للطابق الثاني وبلشت بي..طلعت مرت مرتجى
وسالتني بس ماقبلت احجي اي شي..
رادت تساعدني وماخليتها حلفتها ترجع..

لحد ماصارت الساعة عشرة ونص خويت كلش
عيوني غوشت
كمت مااشوف حتى بالنظارة..
راسي احس وزنه عشر كيلوات من الثكل
غسلت ورحت لفراشي
ردت انام ماكو نوم ماتغمض عيني
بس التعب والدوخة هادتني
مادري فقدت الوعي
مادري نمت...

كعدوني وي الاذان كوة كمت
وعيوني منفخة كلش
وبعدها مغوشة
بقيت لابسة النظارة وهم مو كلش اشوف
كال بابا فطري خاف
بسبب الصيام
بس انة الماي ماكدرت اشربه
تفكيري كله بحر..

كلت لماما رايحة اخابره وحجيتلها الصار
كالت روحي ولاتخافين
زلمة وماينخاف عليه وان رجع على رجليه
لو على جتاف صاحبة
يبقى حر واسمه عليه ماعاف وطنه واخوانه بضيك..

كلامها خلى دموعي تصب بالزايد..صح مفتخرة
بي وبروحته
ومامنعه ولا اكله لتروح بس مو بيدي
احبه واخاف عليه..
خابرت عليه ماكو تغطية..بقيت الوب..
خابرت سبأ تجس نبض من علاء..
كالت خابره قبل شوية بس كله راح نطلع وتنكطع الشبكة..
شوية شبه ارتاحيت...

وبقيت يومين لا من الاحياء ولا من الاموات
احس كلساع يكولولي
صار بي شي..
بصباح العيد بقيت كاعدة مانمت..
ساعةسبعة وثلث دك حر علي...

للحكاية بقية
بقلم شقراء(قمر كانون)

حبايبي جدا اعتذر منكم بس تعرفون السبب
وانشالله رجعت وياكم وهالايام تكمل القصة