رواية على صراط امي الفصل الخامس والعشرون 25 - بقلم Shaqraa

مساء العافية

على صراط امي
الجزء الثالث والعشرون

رفعت الفون بايد ترجف..بقيت ادعي كون مو
شي يفجعني..
قبل لينكطع جاوبت..
سمعت صوته وهو يكلي ..كل عيد وانت حبيبي
كل عيد وانت وياي..
وصلت للبصرة انة..
صبت دموعي وطفرت من السرير بفرح..
صدك حر ..
رجعت؟
رجعت احلف؟؟
هههه وعيونج الحلوة رجعت وهسه راح اوصل للبيت..

الحمدلله الحمدلله الحمدلله..
ياربي انت كريم ياربي احبك يارب..
ههه حبيبي انت زين انت مابيك شي..
افتر بالغرفة واحجي ولا حاسة بنفسي..
جاوبني بضحكة هادئة..
لهالدرجة مشتاقتلي ولج؟وخفتي عليه..
اكثر ماتتصور حبيبي
اصلا عشت حرب اعصاب ماتعرف شصااار
ماجنت عايشة
جنت ميته وهسه رجعت...

اويلي خيعونك حر شتريد بعد...
ههه اوش لتحجي بهالطريقة اخجل..
ام ام ام ..
شنو هذا؟
هذا يعني يمه منج ههه..صدك حبيبي اليوم
اليوم عليها ..
اي الله يسهل ..حجيت لماما وحاجت بابا..
يعني مبدأيا موافقين؟

حسب الفهمته من كلام ماما انو هي قبل رفضت لان
مرادت اتعذب
لان تعرف بيك حتنرفض
ووو بعد يعني هواي كلام خاص بيها..
قصدج حتى لا تلتقي بابوي؟
حبيبي هاي خصوصيتهم يعني مايحقلنا نتدخل..
بس المهم هسه هم قابلين وهذا اليهمنا..
يلا هانت انشالله...
انة هسه اوصل اسبح وانام لان نعسان وتعبان
ومن اكعد اراسلج
انتبهي لجهازج زين...
ماشي حياتي باي...

سديته منه ووحضنت الفون لصدري ..
فرحانة فرحانة
كلساع اشيله وابوسه..
سمعت صوت برا اهلي كعدو
كمت طلعت صبحت عليهم وعايدتهم..
وتجمعنا كلنا ع السفرة تريكنا
ومن خلصنا وانة انظف بالمطبخ
كالت ماما..
خلصي حتى نروح لبيت ابوج الحجي..
طبعا احنا متعودين كل عيد عدهم نتجمع
اول يوم..

بس انة حطيت ايدي ع قلبي اخاف ماما تحجي
واخاف هم يمانع!
بس هالمرة مااسكت واكله اريده واحاجي بابا
بلكي ماتتعرقل سالفتي
سهلها يارب سهلها...
خلصت ورحت بدلت ورحنا كلنا الهم
بس انة بالطريق ونعسانة
انتبهلي بابا كال..
شنو بنيتي امبينة مانايمة كلش؟
لابابا مادري ماكو نعوسة مساع هسه اجت..
بس نوصل نامي
من يصير الغدا نكعدج
عيونج مو مال سهر وراسج لازم نرجع نجيك
الشقيقة مو هيج وجعها..
ماعرف بابا هي الادوية كلها تسطر وتنوم الينطوها..
نروح واذا نفس التشخيص
بس يخلص العيد نروح لبنان افضل..
الله كريم باباتي..

وصلنا لبيت بابا حجي وطبعا الكل متجمع
بس الحديقة هوسة كللش
ذابحين عجل وجاي يغسلون بالدم
انة بس شفته بالكاع غمضت
تخيلت العجل من يذبحو
كدامي حسين لزمت بيده حيل..
شبيج مغمضه خرب بس لا خفتي؟
اي اي حسين فدوة ماريد اشوف الدم..
اسمع بابا وماما والاصوات يمي يسالون ويضحكون
بابا كال..
حسن بابا الزمها من ايدها ودخلها بلا ماتفتح حتى لا تخاف...

وصدك دخلني مغمضة لحد مافتت كبل جوا
فتحت عيوني واتلفت
وهم ناصبين عليه ويصنفون
سلمت عليهم واضحك وبوست بيبي
بس جدو ماكو
سالت ماما..لعد ابوي وينه؟
جاوبتها مرت خالي..بالحمام عمي هسه يجي وتضجك..
بابا رفع حاجب لخالو..
ابو اثير الحجي امبين مستقبل العيد بحيل صدر..
ههههههه اي الحجي مثل الهمر شغال
باحلك الظروف..

بقو الكل يضحك واحنا الصغار نتلافت ..
دخل جدو ورحناله نسلم..
وبوسنا وكعدنا يمه وكالعادة انطانه عيدية
وشوية وطفيت كلش انة..
كلولي روحي نامي
بس ردت انتظر يمامة تاخرو مااجو..
بس كلولي روحي نامي واحنا نكعدج ..

رحت للغرفة مالت جدو تمددت وبسرعة غفيت
فوني ضميته جوا راسي..
كعدوني الساعة بالوحدة ونص ..
فتحت عيوني كوة
كلش بصعوبة جاي اشوف
بس شفت يسر نايم فوكي ويمامة تضحك
فزيت بوسته واعض بي
وهي حضنتها وتعايدنا..
شو تاخرتو ولج ونعست وعفتكم ماانتظرت..
اي مو على ماكملت الحلاوة
سويناها وسوينا كيك وجبنا
ايي حلاوة خالة تجنن كون هواي مسوين؟
اي طبعا هواي غير تكفي الجيش الموجود..
ههه..

باوعت للفون حر ممخابر..
دزيتله رسالة حتى لا يخابر وكتله انة ببيت جدو..
ورحت لكيتهم جاي يصبون
ساعدتهم وكملنا وتغدينا
ومر الوقت وياهم متونسين
للساعة بالاربعة غمزتلي سبأ حتى اطلع..
كمت وياها رحنا للمطبخ..
وج شوكت ترحعون حر ينتظر حتى يجوكم..
اي غير انتظر ماما ..
دولي ذكريها الفاهية اخخ منج ..حجتها وعضت صبعها..
ههه يلا يلا رايحة مو استحي..
هوي هوي امشي امشي
اصلا احنا هسه طالعين ..لان عمي يجي
وياهم الكم..
اوف تحمست وخفت يلا امشي لعد...

دخلت جوا وباوعت لامي اريدها تنتبه ماكو
بقيت عشر دقايق
صافنة عليها..
اخر شي هي كالت حنروح من وحدها..
وبي خالو هم كلمو وطلعنا سوا..
وصلنا للبيت
الولد مارجعو كل واحد طلع وي جماعته
بس انة وماما وبابا ورضا...

اخذ بابا رضا لان جان نايم نزله ووداه لغرفتهم
وماما حاجتني بالحديقة..
ها اكيد يجون اليوم؟
اي طبعا ماما توة سبأ كالت ..
يلا خير ..
روحي بدلي وحضري شي نقدمه وانة رايحة
لابوج..
لزمت ايدها بتوسل..
ماما فدوة ..
ههه فدوة لعمرج لا تفكرين روحي..

رحت للغرفة طايرة..خابرته وبسرعة جاوب...
الو..
الو ولج اشتعلو ولج احتركو
شعدكم هلكد طولتو..حجاها بضحكة..
لحظة عيني من الاشتعلو بلة..
الاضوية مال استقبالكم راح يشتعلون من ندخل..
ههههههه مو بعد استحي الح..
يلا احنا ثواني ونطلع متحضرين..
اوكي هلا بيكم حياتي اروح ابدل..
اخذي راحتج ...

دخلت للحمام سبحة سريعة وطلعت ابحوش
بالملابس
طشرتهن بالغرفة وع السرير ومن التعاليك
سويتها عركة ملابس
اخر شي اختاريت..بنطرون ابيض وبدي ربع
ردن مشمشي
ومن كدام قفل للركبة بس مشبك من صدره
ولبست فوكه قميص مفتوح
شعري سويته ظفيرة راخية
وذبيت الشال سويته لفة راخية..
لان احنا عدنا عادي اليريد يخطب حتى لو يطلع نص الشعر كدامه..
بس انة يعني غطيته بس
عشوائي مو محكم كلش..
ومكياج حطيت بس ماسكرة وحمرة خفيف مشمشي
باوعت لروحي بالمراية
انطيت روحي بوسة وفاتت امي..

اللهم صل على محمد وال محمد..
حجتها وهي مبتسمة..
فدوة لطولج شحلاتج طالعة..تدرين اجو صارلهم شكد
وانت بعدح تعدلين..
ياا صدك ماما..
ههه يلا جيبي الصينية وتعاي ابوج يمهم ..
فدوك وياج ادخل ماكدر وحديي..
يلا تعاي...

طلعت وي ماما واخذت الصينية وامشي
واباوع لخطواتي
بس امي حصرتها الضحكة ..
ولج وطن اذا طحتي كدامهم هالمرة تصيرين فلم..
ههه ماما عفية شنو بدل
ماتشجعيني تضحكين عليه..
ولج مو اعرفج بسرعة تتمددين..
يلا يلا بس ادعيلي انت...

دنكت راسي ودخلت وسلمت..
سلمت على ابوه وامه وياهم رجال ومرة هم سلمت
وخالو مرته كاعدين..
ومن الجهة الثانية
البصف الباب ماباوعت..
بس شفت الرجلين وانة تخربطت احوالي
ارتبكت بس كتله ..
السلام عليكم..وماباوعت ابدا...

كعدت بصف ماما وهو صار ع جهتي اليمنى..
بقيت مدنكة بس
ماعرف ليش اتذكر سالفة ماما من خافت اعثر
وكوةحابسة ضحكتي..
بقو يسولفون بابا والرياجيل وانة ماتحملت اطول
بسرعة ترخصت وطلعت..

بقيت افتر بالصالة ومحتارة اروح واجي وادعي
اخر شي سمعت صوت
ركضت لغرفتي..
ورا شوي اندك الباب..
منو..
انة بابا...
اي بابا تفضل..حجيتها برجفة وخجل وخوف..
ها شو لابدة ولج ..
دنكت راسي وبقيت اكل باظافري..
اجه كعد يمي..
رفع راسي وجر ايدي من حلكي..
بطلي هالعادة تمغص بطنج وخليلج ظفر يطول وراج عرس..

فتحت عيوني بوجهه بتفاجأ..
هههه عيونج راح تطفر عليه ع كيفج..
حطيت ايدي ع حلكي وضحكت..
تنهد بابا وكال..
شوفي بنيتي..
انة من قبل الولد مارافضة وبالعكس كلش احترمه
وشخصيتهبصراحة
جنت متمني ترتبطين بهيج شخصية..
انسان متوازن وهذا النوع تحسينة يعرف شيريد..
رفضته بالاول والاسباب
يمكن تعرفين نص ونص
ماتعرفي...

بس كسرتي ظهري انت من وافقتي وماردتي تخليني اتواجه
وي فخري بنفس الكعدة
احس فشلتيني وبينتيلي برغم صغرج بس عقلج
جبير وفكرتي بينا قبل نفسج
ضحيتي بحبج وانة ادري بيج ماتكدرين
بس سويتي السويتيه وتعذبتي
والسواه بيج خالد خلاني احلف الف قسم
لو طلعتي سلامات ورجعتي زينة
حتى لو حر مااجه وخطبج انة اروحله واكله
تعال اخطبها...

بس الحمدلله من رجعتي زينة ومثل قبل بنيتي المثل الفراشة
تفتر بينا بضحكتها
بدلعها بعفويتها بطفولتها..
والرجعج هو حر..
يعني يستاهلج شما يكون ..
و صفحة الماضي انسدت وراحت..
احنا كبرنا وصرنا اجداد..
ماعتقد اله داعي نتذكر سوالف وطيش شباب
وفخري صح الي وياه ماضي
بس لخاطر ابنه يعاملني بمنتهى الاحترام
وداس على نفسه واجه..
وانة لخاطرج ذبيت كلشي بمحرقة النسيان
وحركته بتفاصيله
باوجاعه..

عيب علينا بهذا العمر ونتذكر هالشي
وتصرفنا قبل ورفضنا
يمكن صار عفوي
او يمكن بقايا جروح جانت وانلجمت من انعاد الموضوع
بس هسه لا
شفينا وطابت نفوسنا..
انة رديتلهم وكتلهم نطيتكم..
جدج ورا المغرب اروح احاجي..
اكله انطيتها الهم وشما يكون رده
ماراح ياثر بيه
تطمني وارتاحي وماريد تعب لو مرض فاهمة
راسج وعيونج مايتحملن اجهاد
دربالج على نفسج
واتمنى ماظلمتج بيوم...

كام باسني براسي وحضنته حيل وبقيت ابوس بي
بكل وجهه وكتفه وايديه..
هو عيونه صارت حمرة وطلع..
وانة كابلت مراية الكنتور وبقيت اركص
ورحت خابرت حر
انفتح الخط بلا كلام
واجتني هلهولة قوية حيل
ضحكت ..
منو هاي..
اسمع مرت خالي تهوسله وعلاء وصوت يمامه
الظاهر هو يمهم..
سديت الخط خفت مدري استحيت..

وبيومها راح بابا لبابا حجي وحجاله
بس رفض وكله ازعل منكم
بابا كايله ..
لو صدك تحب بتك وتحب بتها جان اقتنعت
وصلت للموت كدامك
بقيت سنة بيها حالة نفسية
لا خلينا علاج لا غيره وكله وبقت متعقدة
يبا انت ربيتنا مانظلم
وتعلمنا نحب بناتنا منك لان فتحنا عينه عليك
انت عندك سهير مقدسة
وتكول البنية بذيالها مفتاح الجنة ..

انة بتي اريد راحتا واريد ادخل الجنة بيها
اذا تعبد الله وتعرف رسوله
ترى هم وصو بالبنية ورسول الله (صلى الله عليه واله وسلم)
احسن قدوة النا بحبه لبته ونتعلم منه..
انة طالع هسه ومادري يمكن تشوفني بعد
يمكن ربك ياخذ امانته..
بس ابريني الذمة وانت ربيتني اكثر من ابوي ومعزتك عدي
تدري شكبرها..

وطالع بابا وباقي بابا حجي زعلان
بس بابا ماخلاني اتأثر او اخاف من الموضوع..
وياي بكل خطوة وبكل تحضير احضره
بس الاقارب احسهم مستعرين من الموضوع
وحتى من يجونا بعدهم مو مصدكين بهالشي
بس ماما تبينلهم كلش فرحانين احنا
ومرت خالو وي امي بكلشي بشغل بتحضير
تقريبا اكثر من امي تعبت
لان متفرغة مو مثل امي طفل عدها ...

وتحددت خطوبتي الخميس ..واليوم اربعاء
المغرب وياي البنات
كاعدين وحدة تحف للثانية ..بيومها باتو بنات العملم والخوال
اغلبهم
هم مو يكرهونا بالعكس احنا كلش مترابطين
ونحب بعض
بس موضوع حر مامتقبلي ..
بس رغم ذلك اجو باتو وياي وساعدوني بكلشي
عكس اول ايام مبتعدين..
بالليل واحنا كاعدات نحف..اجت شهد تركض وسدت الباب..

وطينه وطينه جبتي راس بابا حجي..
شنوو شبي؟
ولج بابا حجي اجه وهسه بالاستقبال كاعد
وكلهم يمه
ودزني عمي كال صيحي لوطن
جدها يريدها...

للحكاية بقية
بقلم شقراء(قمر كانون)

اعتذر عني وعن وطن وقلوبنا وياكم انتو اخوانا..