رواية على صراط امي الفصل السابع 7 - بقلم Shaqraa

مساء الخير

على صراط امي
الجزء السابع

اجه حسين تجاهي وجهه نار من العصبية
اني من ذبيت الفون غلقته بسرعة
اجه عليه وبنبرة عصبية صاح
ولج ادبسييييز وكفخني على وجهي ..منو هذا كاعدة
تدكين وياه غزل
جرني من تشيرتي ويحجي ..نطقي لا اطلع روحج
اخذني جر للصالة ويصيح
وامي وابوي فتحو الباب
وانة تبهذلت احوالي بيده من كد مايعت بيه ويصيح

صاح بي بابا بصوت عوفها ولك...
امي اجت تركضلي والولد نزلو من فوك
وبابا جر حسين وكعده ع القنفة بقى يصيح والولد يسالون
ويصيحون
بابا عاط بصوت عالي احجي شصار ؟؟؟؟
حسين عاط كلهم لحد يدافعلها الادبسيز
يعجبك بابا كاعدة تتغزل بواحد وتتمضحك وياه
صاحت امي لا تحجي على اختك هيج ولك
خلينا نفهم
شتفهمين ؟؟لا تركعيلها السالفة لو تجذب بحجة احاجي
صاحبتي ..
سمعتها ترس ذاني تكله حر اسمه حر

نصت صوتها ماما وكالت شنو؟منو؟
دفعتني من حضنها للكاع
بابا يباوع لماما باستغراب لحظات وذبت نفسها عليه
وشبعتني راشديات وتصيح
مالكيتي غيره؟؟؟؟بابا يريد يجرها ماكو
اخواني تقربو بابا دفع الكل واخذني بحضنه ...
صاح بصوت عالي كلكم ولووو يلااا...

دخلني  للغرفة مالتهم وسد الباب وطلع
كعدت ع الجرباية وعيوني تصب واحس خدودي نار
كد ماكفخني حسين وامي
شوية ودخل جابلي ماي وامي ويا ..تقرب
شربني الماي وغسل وجهي
وامي اجت كعدت يمي  ..

ليش ماكلتي هو نفسه حر؟؟ليش ضميتي؟؟
بقيت مدنكة ودموعي تصب
بابا يفتر بالغرفة ماكعد ولا حجه بس يباوعلنا
ويروح ويرجع بخطوات ثكيلة
تنهدت ماما وكالت..هو منعج تحجين؟
ارتجى بابا ع ميز المراية وباوعلي بترقب ..
بابا لا نضربج ولا ناذيج بس انت ليش ما كلتي لامج
هو نفسه حر؟؟

مسحت دموعي بتشيرتي وشهكت..هو هو ماقبل احجي
كال ..حجيتها وبجيت حيل ..
بالخطوبة يعرفون ..
امي صفنت ع الحايط ودموعا تنزل بلا ردة فعل وبابا
باوع لماما وحرك شفايفه باسف
وتنهد بعدها وكال ..
وعدج بخطوبة؟
هزيت راسي وماكدر احجي من البجي ..

جابلي كلينكس مسحت وجهي وهو كعد يمي ع
الجهة الثانية
كال شوكت يريد يخطب؟
الاربعاء ورا اخر امتحان ..
وانت قابلة بي؟
سكت ماحجيت..
امي كالت..شعجبج بي؟هذا المعهد والكرايب كلها
ماردتي الا هذا؟
اكيد لعب بعقلج وجذب عليج..

شوفي حر صفحة وتطوينها من حياتج واياج
ثم اياج اعرف محاجيته لو شايفته..
حاجيتها من بين دموعي..ليش مو ذنبه لونه هيج انخلق...
خزرتني وبقت تصيح سدي حلكج ولا تناقشين
عفتي الشباب الكدامج مالكيتي غير هذا وهو الحقير
لعب بعقلج لان شافج ثولة
ومنعج تحجيلنا لان يعرف محد يقبل بي ..

اهدي سهير كافي عوفي الولد مو بس هو غلطان
وانت وطن البينكم انتهى وخلاص..
حجاية وحطيها ترجية بذانج وتذكريها زين
_حر لو يخطبج بكد لحظات عمره كلها مايصيرلنا نسيب_

حجه هالجملة وطلع من الغرفة
واني ذبيت نفسي بالفراش وانحب ..يعني ليششش
شنو ذنبه لان اسود الكل يحكم عليه بالموت وهو عايش
تخبلو واستنفرو من عرفو بحر ليش؟
ماتعودت عليهم هيجي عنصريين اصلا هم ربونا مانفرق
والطفل مثل ماتربي يتعلم
عمرهم وحياتهم مافرقو ومايسمون الاسود اسود
لا يسمو اسمر طوخ

لهسه اتذكر امي من تحجي بمدرستها بالكلية
تكول جانت كلش تحبني
وبابا من سالها منو منهم كلتله ست بديعة السمرة طوخ
حتى مايلفظون كلمة اسود او عبد
لعد ليش وقت الكلام الكل يتمنطق ووقت الصدك
تطلع الحقائق..؟

امي بقت يمي واني احس بلاعيمي طبكت من البجي
شوية وجرتني كعدتني
صارت كبالي ودموعها تصب ..مسحت دموعي
وتمنيت تحضني اريد حضنها
بس ماحضنتني ..مسحت دموعي وحجت بأمر ..
كافي بجي وروحي لغرفتج فكري عدل
وانسي حر وكلشي يخصه
لا تدفعين الثمن كلش غالي ترى...
كومي يلا ..

انطتني ظهر وبقت بمكانها..كمت رحت غسلت
ورحت للغرفة لكيت يمامة كاعدة
ماحاجتني بس لكيتها تبجي ..
تمددت بفراشي وابجي ..كالت شعجبج بي وطن؟
كعدت ع حيلي بسرعة و
كبيت بوجهها عبالك اريد افرغ قهري
شبيكم شبيكم كلكم تصيحون شعجبج بي؟؟؟؟
مو بشررر حاله حالكم؟؟؟مو يعبد الله لو يعبد ابليس؟؟؟؟؟
شكد تافهين وعقولكم مغلقة
كلكم متعجبين عبالك حابتلي حيوان مو حابة بشر...

مسحت دموعها وباوعتلي بشفقة..
هذا هو براحتج حبي وضوكي المر انت عاجبج
تمرمرين
بس ايسي محد يقبل بي ترى..
انطيتها ظهر وبقيت ابجي اكثر..
ليش؟؟؟ليشش؟؟؟
اكرر وي نفسي هالسوال ومااعرف...
بقيت على فد دمعة لحد مانمت

الصبح اجت امي كعدتني وكالت
ياخذج عابد تمتحنين وينتظرج بالباب
دربالج تحاولين تتواصلين ويا ترى تعمين عليه
اكيد اخوج مايعوفه سالم
هزيت راسي وماحجيت شي ..
كمت غسلت واباوع لوجهي ذبلان والاثار الزركة بي
وعيوني غايرة رغم يوم واحد الصار بس
هيجي اثاره بيه
شيصبرني ع الجاي الله يستر...

بدلت وطلعت عابد ينتظرني بس ماحجه شي
بس شكله ضايج ومقهور..
بالطريق كال..وطن شوداج ع هالطريق؟
انت بريئة وطفلة شعرفج بالحب وسوالفه...
دنكت ونزلت دموعي..
لا تبجين ماريدج تبجين ..السويتي غلط وهو حتى
لو اجه وخطب محد ينطي
ابوي رافض وحسين البارحة كله يتحلف ومرتجى
مابطل من الصياح

تدرين ابوي كعدنا الفجر وحجه ويانا..
كال اليمسها بحجاية اغضب عليه لحد ماينزلوني
بكبري.،
محد يحاسبها او يناذيها ابدد اعتبرو الصار ماصار
وانة موجود واعرف اتصرف
اختكم نور عينكم ودارو نورها ولا تطفو ..
ليش تقهرين ابوي وهو هلكد يحبج..
بقيت ابجي مجاوبته..

وصلنا وامتحنت وطلعت لكيته ينتظرني
رجعنا للبيت ماما سالتني شلونه الامتحان
كتلها زين وانة اصلا مادري شكتبت
افكر بي اكيد هسه حس صاير شي
انة سديت الخط قبل لا يسمع ولان متعودة
من اسمع شي حركة اسد الخط
بس بعدها اطمنه
والصبح اصبح عليه برسالة
هسه اكيد باله يمي...

بقيت بالغرفة طول اليوم..ماكدر اطلع ولا خلك
بس ماما كالت ابوج اخذ تلفونج
ولحد بالليل بعد الصلاة بساعة ..صليت
وبقيت متمددة بمكاني وابجي
اجت يمامة كالت ..
تعرفين منو اجه؟بلا ماانتبهلها كتلها معليه..
اجت كعدت كدامي كالت ..
حر واهله وبيت خالو سلام...

كعدت بسرعة ..شنو؟؟؟
باوعت للباب وحجت بصوت ناصي
اننة رحت لبيت خالو اليوم
وحجيت لخالة ام علاء وكتلها الصار كله
اعرفها علاقتها قوية بحر
من يوم الطحتي وبقيت يمهم
وخابرت حر واجه من الدوام لبيت خالو وحاجيته..
يعني شتفتي؟حجيتها بدمعة وابتسامة..
اي خطية انقهر ووضحتله الصورة وهسه هو واهله
وبيت وخالو اجو...

حضنتها وبقيت ابوس بيها..مشكورة مشكورة
مانساها الج ..
ماهان علي اشوفج متعذبة بس الله يستر من الجاي
البارحة ماعرفت اكون وياج لو عليج
لان تعرفين وجهة نظري تجاه هالشي
بس من حاجيت حر اليوم حسيت اكو امل وو...
مو الكل سوا.. قررت اساعدكم
ونشوف وين تصفى...
زين روحي سمعي شيصير حبوبة ..
يلا رايحة ..

راحت وانة بالغرفة الوب وطول الوكت وهي ماكو
وانة استحي اطلع بعد الصار
ورا وقت يلا اجت يمامة..كمزت عليها بسرعة
مثل الينتظر نتيجة امتحان..
كعدت وكالت اهدي عاد لا تخليني اندم..
احجي فدوة دمي نشف..
طبعا ماسمعت عدل بس امي كعدت تسمع برا مادخلت
وهي حجتلي..
حر معتذر من بابا وكايلة لازم من الاول اخطبها
بس لخاطر الامتحان ومستقبلها اجلت..

وحاجيله هو رايدج ومنعجب بيج وهو عنده امكانية
لكل الطلبات
وبابا سامعه لحد النهاية وطبعا ابوه وامه هم
حاجين وي بابا
بس هو كايللهم مو صغرا بيكم بس بتكم وابنا ماينجمعون
سبق وتفرقت عوائل بسبب هالشي
وماعدي استعداد اخسر بعد..البنية طفلة وماتعرف مصلحتها
واحنا من اصغر شخص لاكبر شخص رافضين
وليدي بعدك شاب وكدامك الاف البنات
احترمتك انت واهلك وقدرتكم وهم جية ابو علاء
فوك راسي
بس نختصرها من الاول هذا النصيب مايصير

وكدامك ابو حر واعتبرو طلب او تحذير كيفكم
بتي طفلة ومدللة
ومتعلقة بيك حر ماريدك تحاجيها من ورانا
وتعذبنا بيها
عوفها تشوف حياتها لا تصير اناني وتربطها بيك
هسه حاجيتك بتفاهم
بس لو عرفت بعد هالكعدة حجيي ماجاب فايدة
ورجعت وياها
اسوي الماسويته قبل واكلبها عاليها واطيها
ورغم تدخلات خالو بس بابا قفل
وطلعو ...

بعد ماسمعت حجي يمامة احس راسي ثكل
ودخت وماحسيت باي شي...
مدري شصارلي بس فتحت عيوني بحضن ابوي
ويضربون بخدودي ويفركون ايديه
فتحت عيوني بصعوبة ودايخة
شربتني امي ماي ومددوني بفراشي
الكل طلع بقت امي يمي..تعصر براسي
ويمامة جابتلي عصير ماقبلت اشرب
بس صافنة وابجي...

بقت امي يمي الى ان نمت ومن كعدت الصبح
لكيتها يمي مارايحة لغرفتها
كمت غسلت وهي صبتلي ريوك وكعدت بالمطبخ
يمامة راحت للشغل
حسين عطلة مانزل ومختار دوام وعابد هم
بقيت بالمطبخ لوحدي
مكابلة الريوك بس ماكدرت ابلع لكمة
تالي عفته ودخلت للغرفة ..
ولا فتحت المادة ولا قريت حرف مالي خلك الدنيا

مر اليوم بين دمعتي وبين قهري وماضكت حتى الماي
لحد الليل انتهيت
دخت واعصابي ترجف حركة ماكدر اتحرك
امي تعاركت وياي بس حتى اضوك الاكل
وماقبلت ابد
نمت وانة افكر وابجي وبسرعة من الدوخة
عبالك فقدت رحت لغير عالم...

كعدتني يمامة الصبح بالكوة مابية اكوم
وكفت واجيت اطيح سندتني عليها
ودتني للحمام واباوعلها مدمعة
رجعت للغرفة بدلت وامي اجتني كالت تريكي
كتلها اكل هناك
وعاطت بيه بس تريدني اكل وهي صارت قاسية
حسيتها قست عليه كلش
بابا مو بكدها قسى ورغم هي تبجي عليه
واشوف عيونها مساندتني
بس تصيح عليه وتكلي كافي انسي ومحد مات ورا احد

جرتني للكرسي وكالت تاكلين كدامي لا
ابتلي بيج هسه..
ماقبلت بقيت ابجي واصلا دايخة عيوني مغوشة
دخل عابد وتقربلي كال كافي بجي
مسح دموعي وكومني..امشي امتحني يلا فكري
بمستقبلج...
كمت واني افرك بعيوني وهي كعدت ع الكرسي
وغطت وجهها بايدها..

طلعنا ولازمة بيد عابد مابيه امشي
وطول الطريق مخلية راسي ع الجامة ومصفنة
والرؤية عندي مغوشة تعبانة حيل
وصلنا وهو نزلني لان شافني وجهي شاحب مثل الميت
بقى يمي لحد مافتحو القاعات
دخلني ووصا الاستاذ اليراقب
كله مريضة كلش ودربالك عليها ..
كعدت والقلم مايثبت بيدي..اريد اكتب اسمي ماكدر

ونظرات الطلاب كلها تجاهي
ونظرات الاء الشماتة بيها واضحة ولا كانها بيوم صديقتي
ماتقربت ولا كالت شبيج
سالوني البنات كتلهم مريضة من اول امس
بس هي مااجت ولا سالت
صح شكلي واضح بس هالشي احسه فرحها
وهي تسولف وي البنات وتضحك بمكر..
يلا تولي ماتسوى واحد يهتملها وانة بحالها هسه...

بقيت مكابلة الورقة ولا كتبت حرف
لحد ماصارت بالعشرة الا ثلث يلا يسمحون نطلع
سلمت ورقتي وطلعت
عابد كاعدلي بالباب اجاني بسرعة سندني
وبيده علاكة كال جبتلج اكل اكلي لا تموتين..
كعدنا بالسيارة وفتحلي اللفة وحاول وياي
اكلت لكمتين ولعبت نفسي ومعدتي انعفست
ذبيتها كتله بعدين اكمل
ماكدر معدتتي تاذيني..
ضمها بالعلاكة ورجعنا للبيت ..
بابا كاعد ويمه الولد ..

شافني عابد مسندني كام وكف والولد هم وكفو..
خير بابا ليش هيجي؟
جاوبه عابد تعبانة من الصبح هيج كوة تتحرك
كعدني عابد كتله لا اروح ارتاح بالغرفة
كله بابا خليها انة اخذها
تقربلي واخذني للغرفة كتله تعبانة اريد انام ..
اخذت بجامتي من الجرباية
كال ارتاحي بعدين عندي حجي وياج
وطلع سد الباب وراه
بدلت وتمددت بالفراش واحس حيلي بايد
نمت كلش هواي

كعدت راسي مسطور اكثر واكثر ..
لكيت يمامة كاعدة تصلي
تقربت مني تلمس كصتي خاف مصخنة
كالت راح تموتين اكلي عاد..
مااريد حجيتها بلسان ثكيل..
راحت قفلت الباب واجتلي بيدها لتلفون
اخليج تخابرينه بس اكلي..
ضحكت بفرحة دكي عليه بالاول
يلا اكل
هاج دكي واحجي بس بسرعة ..
دكيت الرقم رنتين وفتح خط
حجيت بصوت يرجف وخنكتني العبرة
حر حبيبي...

للحكاية بقية
بقلم شقراء(قمر كانون)