رواية على صراط امي الفصل الثامن 8 - بقلم Shaqraa

مساء الخير..اسفة حبايبي واعتذر ع انقطاع بس ماجان عندي نت
ودزيتلكم خبر بيد البنات
وانشالله رجعنا نكمل القصة سوا بدون عراقيل..
*****************

على صراط امي
الجزء الثامن

جاوبني بصوت متفاجأ ونبرة قلق ..
وطن دلوعتي طمنيني عنج كلبي نار عليج ..
حجيت بخنكة كوة نطقت..
تعبانة حبيبي مشتاقتلك اريدك ماكدرت اكمل ونزلت دموعي..
تنهد وكال صبري لخاطري ولا يهمج
مراح اتخلى عنج ومستعد اخطبج يومية لحد مايوافقون..
ماكدرت اجاوبه بس اشهك ويمامة تندس بيه ..
بسرعة احجي لا يجي احد ..
مسحت دموعي وكتله حبيبي لازم اروح
بس المهم سمعت صوتك
وبس الكى فرصك اخابرك
جاوبني بصوت يائس..اوف دربالج ع نفسج..
حضنت يمامة وشكرتها ..
كالت اروح اجيبلج اكلي واكلي..

طلعت جابتلي اكل وانة افكر بصوته
وشكد واضح بي اليأس والتعب
كل مرة من يحاجيني التمس ابتسامته بصوته
بس هالمرة من حاجاني احس تعابيره توحي بحزن
وقهر واحساس بالفشل
وخصوصا الاهانة الي حصلها هو واهله من اجو..
سوتلي يمامة لفات صفار وانطتني
واكل وصافنة ..قطع شرودي صوتها وهي تكول..

وطن اذا تحبين صدك عوفي اليأس وصيري قوية
البجي والانعزال وترك الاكل
هذا كله يولد منج انسانة فاشلة عاجزة لا حول ولا قوة
وتنكسرين بسهولة
سالفتج صعبة كلش..مااكلج مستحيلة لان ربنا موجود
بس اهلي رافضين
واذا عرف بابا حجي تكطعين كل امل لان يكلب الدنيا
عليج ولا تتزوجي..

ذبيت اللكمة من ايدي..اكلج ليش هالرفض كله
وبابا حجي شنو علاقته يتحكم؟؟
اكلج مو تعرفين اي واحد يخطب بنية من العمام والخوال
كلمة بابا حجي هي الاساس والماشية بخطوبتها
يعني يرفضون لرفضه ويقنعون لقناعته..
بس كلهم مو مثل بابا متفهمين وماما مثقفة
ولو ماما هم كلبت عليه
ولا توقعتها راح تصير ضدي رغم هي جانت موافقة
مجرد عرفته منو تغيرت..
وطن مو بس ماما الكل ماراضين عليه
بس اذا تحبي تمسكي بي
ولا ترضخين بسهولة ترى حذرتج هسه
لان ماريدج تندمين بعدين ..
الله كريم ..حجيتها بخوف وبال مشغول...

بس قررت اشد نفسي واقويها ومااستسلم
ورجعت اكل صح مو مثل قبل
بس المهم اكدر اتقوى لان صحتي صارت بالنازل
اخواني من يوم المشكلة ماحاجية وياهم غير الرسميات
يعني كلمتين ثلاثة
عابد الوحيد الي يحجي وياي عادي ويحاول
يغير نفسيتي

بابا اشوف الخوف بعيونه ويحاول يفهمني
وماما طول الوكت ضايجة وتعبانة
صارت تتقيأ هواي ومكتأبة
وكعداتنا مو مثل قبل الكل سوا
هسه اغلب الوقت متفرقين ..انة دوم بالغرفة
امي معزولة بغرفتها
وبابا بينا وبينها صاير يحاول مايبعد عن طرف
من الاطراف
والولد بغرفهم عابد الوحيد الي شوية يغير
جو البيت

صار وقت النتيجة وراح عابد جابها
وطلعت دور ثاني بمادة وحدة
بس فرحت كلت بلكي اكدر اشوف بيومها حر
خابرته بس ثلث مرات من يمامة
ومكالمتتا ماتطول بس عشر دقايق اكثر شي
لان هي واكفة تراقب الباب
وانة احجي بسرعة وخوف من ان يعرفون

ومرت شهرين ع هالوضع وعلاقتي بامي
كلش تحجمت
بس الي عاد الروح للبيت وغير الامور كلها
بيوم ..امي وابوي العصر راحو لبيت بابا حجي
ومرتجى بالشغل وحسين طالع
ومختار ببيت عمي ..
قفلنا البيبان ويمامة بقت بالصالة وانة اخذت فونها
ودخلت للغرفة خابرت حر..
بسرعة جاوبني من اول دكة..

واخيراً ولج ورمتي كلبي شكد صارلي ماسامع صوتج؟
حقك حبيبي بس اليوم كدرت لان ماما وبابا مو هنا
والولد طالعين..
هسه امنت الجو يلا كدرت اخابر ..
هههه عبالك استخبارات امنت الجو بس مدام
راحو هناك هسه اخابر عمي سلام يروح يحجي وياهم
وبلكي ربج يهديهم ويلينون..
لحظة شوي اكو احد يدك ..شلت الفون لكيت بابا
بالانتظار.. ركضت ليمامة ..

هاج بابا جاي يدك..
اخذته يمامة وجاوبت بابا ..اسفة بابا جنت احاجي
صديقتي ..
اي عادي نكدر ليش ؟ها هسه نتحضر ..
مع السلامة..
هي تحجي واني ااشرلها شكو؟
سدت الخط وكالت ..بابا راح يدز علينا ياسر ابن خالو
نروح نتعشى يم بيت جدو ..
شعجب؟
ماعرف كال تجهزو راح ادز ياسر..كومي
قبل لا يعجلونا..
ولو صوت بابا فرحان حسيت بشي غريب!
خوفتيني؟
ههه شبيج ولج دفضيها تحركي...
اي بس اكتب لحر رسالة واطمنه..
كتبتله رايحين لبيت جدو ورحت بدلت..

كملنا ثنينا وانتظرنا شوية واجه ياسر اخذنا
دخلنا جوا الكل كاعدين
ومتحمعين يم جدو وبيبي ..
ماما صافنة وبابا مبتسم ويسولف وي جدو
سلمنا عليهم وجدو صاحني
كعدت يمه ..سالني شلون صرتي؟
لان هو الفترة الفاتت عرف بيه مريضة
جاي احاجيه ودخلو بيت خالو سلام..
سلمنا عليهم وسلمت على علاء بلا مااباوع بوجهه ابد
لان استحي وهو من عرف
بعد ماحجاله حر ماصار ضده بالعكس
وحجه وي بابا وماما بس طبعا حجيه هواء في شبك..
سلمت عليه مرته وحجت بصوت ناصي..عندي شغلة وياج..
كتلها اوكي ورجعت بمكاني..

جابت مرت خالي صينية العصير وجدو كال..
اجيت بوكتك ابو علاء اليوم تعشو يمنا وباجر
كلها معزومة على مفطح
باجر اذبح عجل جوا رجل سهير..
شرب خالو العصير ونزله من ايده مبتسم..
ياالله عجل فد مرة ..
اباوع لامي وجهها ينطي الوان وبابا حط ايده ورا ظهرها
الوجوه كلها تتسائل ومبتسمة شكو؟
كال جدو شبيكم منططين عليه يابه غير
سهورتي حامل وفرحان بيها..

الكل بقى مبتسم وهذا اليبارك وهذا اليداهر بابا
انة ويمامة وحدة تباوع بوجه الثانية ونضحك
مستغربين وفرحانين لان امي كبيرة
عمرها ٤٦ سنة واحنا كلنا كبار
بس رغم هذا فرحنا ..
كمنا شبكناها منا انة ومنا يمامة
شبكتنا حيل وتبوس بينا ووجهها احمر..
كنالها شبيج خجلانة ههه اصلا فرحانين احنا
ولاول مرة بعد المشكلة الصارت تشبكني بهالطريقة وتبوسني..

جدو كلي حتى اليجي ماياخذ معزتج بعد جدج
تعاي بحضني ..
رحت يمه باسني براسي ..كال سهير جيبينا وحدة مثل
طيرالذهب هذا ..
ويمسح بخدي اخذت ايده وبستها..
خالو سلام كال لجدو رايدك بموضوع واريد سهير
وعيسى يمنا..
كلهم جدو خير انشالله وراحو للاستقبال..

انة احس روحي راحت لان اكيد خالو راح بحاجيهم
بهذا الموضوع
يمامة استغربت من طلب خالو وكتلها حر طلب منه
يحاجيهم
بس تخبلت وبقت تلوم بيه..ولج اذا دخل بيها
بابا حجي غسلي ايدج بعد ماتصير
وتلوب اكثر مني..
بس انة متفائلة بجدي بلكي هو يقبل لان يحبني ويقنعهم..

سبأ مرت علاء اجت يمنا
كالت وطن اريدج شوية تكدرين؟
اي ماعندي شي تفضلي..
لا نطلع بالحديقة احسن..
طلعنا بالحديقة اخذت بساط من الحبل وفرشته
كعدنا وكالت سبأ..
شخبارج وطونة بالي يمج خطية حر اكثر من مرة يطلب مني
اجيكم بس كتله خل يمر وقت واروح
ماردت اسببلج احراج..
ابتسمتلها بشغف..يعني حر يسالج عني؟
اي خطية يلوب عليج وكم مرة يكلي اتصلي ع يمامة
وانة احاجيها بس اخاف عليج ..
نزلت دموعي ومسحتها مبتسمة ..

اريد احجي وصاحت عليه بت خالو ..
وطن بابا حجي يريدج جوا..
اريد اكوم ماكدر بقيت ارجف خفت يسالني وشجاوبه
كامت وياي سبأ وشجعتني
دخلنا جوا شفتهم كاعدين بس يمامة كالعادة بزاوية
رحت للاستقبال ولكيت خالو سلام واكف
امي مرتجية ع القنفة وتباوعلي من دخلت
اما بابا ما موجود..

حجيت برجفة..ها بابا ردتني؟
طبطب يمه ع القنفة ..تعاي بعد ابوج كعدي هنا
امي نظراتها بيهن استغراب من حاجاني جدو
تباوعلنا بترقب..
وخالو سلام استأذن وطلع..
جدو كال لماما ..سهير روحي ارتاحي برا
وهالموضوع محد يحله غيري
روحي ودزيلي علاوي وزيوني وياسر بسرعة اتانيهم..
انة كعدت يم جدو وساكته..

طلعت امي واجو اولاد خوالي ..
ها بابا اامر ..
بعد ابوكم يمته تجيبون الاكل ؟وصيتو زايد كون مو ناقص
اي طبعا لا تسغل بالك خير زايد انشالله..
اي بعد ابوكم توكلو وشوفو النسوان شمحتاجات
صار امرك ..
ترخو وراحو ..

هو باوعلي وكال ها يابت سهير
رادتج وطن لان هذا حلم صباها
وما سمت لا ولد ولا بت بي وكلهم طلعو فقرا
سمتج بي عمن تعرفج تطلعين نسختها
انة هالحجي مدنكة واكل باظافري
وهو مستمر يحجي..
وطن بوية لا تعيدين الصار گبل ترى امج لليوم تدفع الثمن
والدليل انت هسه انحطيتي بنفس الموقف
وهي العارضتج ومنعتج ..

اعرف يبا هسه انت محتارة وتكولين شعليه بامي
بس خلي ببالج ترى العشك وسوالفه هذا مزنة مطر وتروح
مايدوم ولا احد مات بالعشك ولا احد ربح
شوفيها امج مو تزوجت ابوج وهي مارايدته
ذيج هي حبته ودللها وخلفت منه
وهسه حبلت بواحد جديد
معناها شكد يحبها وتحبه وبهذا العمر نسو روحهم وخلفو

الوكت ينسي والاهل اعرف بمصلحة ضناهم
من عارضت زواجها وانطيتها لابن عمها
لان اريد مصلحتها
هسه انت كافي تكرضين بظافيرج كليتي حتى لحمهن
وحطي بالج وياي بالراح اكوله
احجيلج السالوفة كلها وانت بكيفج بعد
رفعي شوفج بلة..

رفعت راسي باوعتله بعيون مدمعة
طلع جفيته من جيبة وانطاني..
هاج مشي دموعج بعد حشاي انت بت الغالية وكطعة
من جبدي
اخذتها منه ومسحت عيوني وخليتها بحضني..
كال شوفي بوية ..

ذيج السنة جان عمر امج ١٥ سنة جانت بالمدرسة
وشاطرة نار
وهي وحيدتي على خمس ولد
كلها ماقبلت بناتها تكمل حتى خواني بس انة
خليت سهير تكمل
عمنها عزيزتي والتريده يصير ..دللتها  وماخليت شي بنفسها
وجنت اروح للهند ولمصر عدي اشغال
اجيب جنطة الها بحدها شنهو لبس شنهو ريحة
احذية جنط كلشي تتمناه البنية...
بس مايوم تشرطت لو عذبتني رغم دلالي كله الها

وجانت روحها باخوها سلام تكولين روح وحدة
مكسومة بجسمين
وهو ياخذها وياه من يروح للجامعة يوصلها للمدرسة ...
جان وياه صاحبة هم ربع من جانو بالمدرسة
وكبرو سوا و جانو خوان دنيا
كعدتهم اكلتهم شربتهم كلها سوا
اكربله من اخوته هذا الاحجيلج عنه
فد يوم مسوين سفرة للحبانية بالجامعة
وخالج كال اخذ سهير وياي تتونس
لان جانت بالثالث والدروس صعبة وهي تهتم للدراسة
وكال سلام تروح وياي تريح عن نفسها..

خذاها وراحو يوم الخميس الصبح
كال نبقى هناك خمس ايام ونرجع ..
راحت بس انة روحي نار وتسعر على فراكها
احسها مشلوعة من افادي
لا تطبكلي عين ولا تنزل لگمة من بلعومي
ماكدر على فراكها عزيزتي وحيدتي
عود اخابرها يومية هناك
لحد ماخلصت السفرة ورجعو
بس حسيت روحي ردتلي اروح فدوة لوجهها انة ...

بس سهير من ردت مو الاولية كلش
متغيرة علومها وتصفن
خفت عليها احد ماذيها ومن سالتها تكول كلشي مابيه
انت توهوس
يوم عن يوم الاحظ سهير تغيرت وتسمع اغاني وتصفن
عرفت بتي عشگت
خفت عليها وخفت تتقشمر لان الزلم ماتتامن
يشوفونها حلوة كصيبتها صفرة لحزامها وعينها
شاكة وجهها
وجنها شطبة ريحان نبعة ومدللة
وهم يطمعون بفلوسها ويستغلون فقاريتها

كلت لا زم اشوف حل واعرفها منو لاف عليها
ماحجيت كدام احد ابد
بس بديت اتابع بحدي واحاول اعرف
وكبل لا اعرف اجاني خالج وكلي ..
حجي اليوم ناس جايتنا عل سهير
كتله بوية سهير عيسى رايدها من جانت صغيرة ..
بوية هذا حجي قابل نجبرها وهي مارايدته...
كتله هم صح شعدي غيرها واجبرها
بس كون الجايها يستاهلها وانت كافله ..
كافلة وماالكى احسن منه
تعرفه انت صاحبي وعضيدي فخري..
عاب حلكك ولك شننو؟؟؟
طكيته على حلكه كتله انعل ابوك لابو فخري...

للحكاية بقية
بقلم شقراء(قمر كانون)