رواية على صراط امي الفصل التاسع عشر 19 - بقلم Shaqraa

مساء الخير

على صراط امي
الحزء التاسع عشر

من جاب شيرته بابا حجي خفت ..اي اصلا
كمت اخاف من اسمه
بس من كال بالسجن استغربت لان هم محد يحجي بالموضوع
سالته بفضول وتردد..
يعني منو اشتكى ليش بالسجن..
شلون ليش يابوية غير تعدى عليج ..

بس شنو اخوانج فرسو فرس كوة ابوج خلصه منهم
يمتى كتلو مو انة بس جابني طحت
بعد مادريت بالصار ؟
شوفي مو جابج وطالعله مختار من طحتي دخلج ويا للبيت
ومختار لازمة وحسين موجود
وملتمين عليه شابعينه دك بس بجية ابوج وماخلاهم
مفاككهم وطارد خالد
وماخذج للمستشفى هو وياهم وعدج انهيار وصدمة
ناطينج مغذي وابرة

ومخبار امج واختج وراحن للمستشفى بس متعارك
وي امج لان مخليتج ترحين
وهي باقية تلوم بروحها ومتخربطة بس بعد شبيدها ياجدي
ومن رجعوج للبيت
ابوج مخابر على نسيب عمتج ام حسن ابوه عقيد
وهو ضابط بالمركز
كايله السالفة وجايين ماخذينه من بيتهم بتهمة الخطف
وهم هذا لان عرف وكفلنا
لان اخوانج مسكطينه من الدك بس هو اندارت عليه
القضية

واجو اهله يتعذرون وويردون نطلعه وتوسلو بابوج
وكعدنا امه نتفاهم
بس ابوج كلهم مااتنازل ولو بيدي اذبحه من شفت بتي
الاخاف عليها من الهوا وجهها ماينشاف
ومن كعدت لهسه ترجف وصافنة تخبلت البنية من
ورا ابنكم
وضل يصيح وصار نار كبرة..
يكلهم راح تروح من ايدي البنية ولكم ليش هسه ماقبل
يطلك وكلنا نخلي براحته
ماردنا لا محاكم ولا طلايب ..ليش يكتلها كتلة موت
وكرهها بعيشتها ولكم انة مدللها
من الصوت العالي تخاف يجي واحد غريب يسوي
بيها هالسواية وتردون اتنازل

لو يموت مااتنازل وسجلتها دعوة اختطاف وخل يعفن
بالسحن ويعرف
من سكتنا مو خوف بس احترام للكرابة البينا ونمشي
بتربيتنا واخلاقنا
بس هذا الظاهر لا تربية ولا اخلاق..
ورفع دعوة طلاك هم وماقبل واحد يتدخل لو يحجي
اخوانج معارك ويا يكلهم محد اله غرض
انة الورطتها بهالزواج وانة اخلصها وارجعلها حقها..

بقيت استمعله وصافنة ولازمة راسي
احجي بداخلي واكول كله مني انة الحطيت نفسي
بهذا المأزق
سرعة القرار والطيش هي السبب..ردت انسى او ردت
اقطع امل حر بزواجي
بس ماسويت الا الخراب وساءت الامور ..
راسي كلش قوا المه ..اجيت اكوم واجتلي يمامة ساعدتني
كمت رحت للغرفة تمددت
جابتلي العلاج اخذت وغمضت عيوني لان مسطورة..
ماطولت هواي ونمت..

كعدت من النوم وانة متكسرة كوة اتحرك تمطيت وحركت
ركبتي شوية حسيتها لانت
سندت نفسي وكمت فتحت الباب شفتهم كاعدين
اجالي عابد وسندني وماما وبابا كالو صح النوم
ويمامة كامت تصبلي غدا ..
كتلها بالاوس اغسل احسن..رادت ماما تكوم بابا ماخلاها
وهو كام وياي للحمام غسلت
وهو لزمني من كتفي ويمشيني ويسالني شلون صرت
ماحجي هواي بس كلمتين واسكت..

جابت يمامة الاكل واكلت شوية واخذته
وانة تمددت ع رجل بابا ومصفنة
كآبة عندي ومتضايقة حيل احس نفسي متقوقعة
بقى بابا يمسح ع شعري
وانة اغمض وافكر بالصار وياي وارجع افتح واقنع
نفسي خلاص انتهى ماكو شي بعد يخوف...

وبقيت على هالحال شهرين ونص او يمكن ثلث اشهر
بقيت طول الوكت صافنة ومااحجي
الا كلمات قليلة وارجع اسكت ..نومي قل صار عندي
ارق كلش قوي
ونظري حيل قل بهالفترة سويت نظارات وكمت مااكدر
اباوع للفون او اكتب بدونها..

تطلكت من خالد بمدة قياسية مع كافة حقوقي
لان تقريري الطبي ومن شافوني
سهل الامور وهم خالد ماقاوم وطلك ..
واجو اهله لبيتنا واعتذرو ثلث مرات ورادو ينطون
فصل ..
بس بابا كلهم احنا اهل وبنتي مايعوض سعادتها
مال الدنيا كله
بس تنازل عن خالد وسقط الدعوة ..لان امه تمرضت
من عرفت راح ينحكم وبابا هم كال خطية
صح السواه مو شوية بس شاب مااضيع مستقبله وجنت
بحالة عصبية ومقهور
بس هسه لا راح الراح وعفا الله عما سلف..

بقى عليه حكم عام بس سقط بكفالة وطلع
ومن طلع اجه لبابا واعتذر
بس بابا طرده وماقبل يحاجيه ..بس بابا حجي
دز عليه واحه خالد عدهم
واعتذر لبابا وكله انت احترمتني وماتجاوزت
حجايتي بس ساعة شيطان واذيتها
وطلب من بابا يرجعني بس بابا كله حتى اسمها لا تذكره..

انطوت صفحة خالد واعتبرتها درس ..وماانكر
ظلمته وظلمني..
وظلمت نفسي قبل كلشي..
الشي العشته حيل صعب ومر ومتعب..
احس نفسي رجعت للصفر ومالي اي بداية
صرت مثل الدمية البلاستيك
جامدة باردة مااحرك ساكن ..مملة الى درجة..

رجعت اتصالات حر ومراسلاته الي يومية
بس ابدا ماجاوبته
لان هو طرف مشارك بمسرحية عذابي واناني
مافكر شنو يصير بيه
من قرر يحجي لخطيبي كل الهمه ارجعله بابهض
ثمن..
بس كلت مااريد رجال بحياتي ومامستعدة ومتقززة
من كلشي يخص الجنس الاخر...

ماانكر احبه واريده ومانسيته لحظة..بس انة جبانة
وانهزامية..
استسلمت لقدري واكتفيت بالواقع العايشة بي حالياً
يكضي وكتي بين..نوم..كعدة كئيبة..نوم..
هذا النظام العايشة بي
واهتماماتي صفر حتى العجوز انشط مني ..

ورا مابدلت رقمي وارتاحيت من اتصالات حر
بس بقيت اتصفح هواي بالفون
سويت فيس بوك سوالي عابد والتهيت بي يسلي
تقريبا شغلني عن واقعي
او اني شردت من الواقع اله يعني وقفت حياتي
عد هالنقطة..
محاولات بابا وماما والولد كلها ماجابت نتيجة وياي
صرت ثلج مايتاثر بشي..

يمامة جانت مترددة تسوي الخطوبة بسببي
وتاجلت حفلتها مرتين
اخر شي قررو هي وفقار يعقدون وتصير حفلة وحدة
هي خطوبة وهي زواج
باعتبارهم علاقة وفاهمين بعض واختصرو الطريق..

تقرر زواجهم ببيت بابا حجي وزواجهم فرحة كلش
جبيرة
لان امي اختهم الوحيدة والمقربة من خالو سلام
وانطته بتها الجبيرة
يعني جانو الكل متحمس ويحضر والزينة الولد اشتغلوها
الحديقة كلها والبيت
جنا نروح يمهم نباوع للتحضيرات والبنات يصورن
بس انة ابقى كاعدة على جهة
اتفرج على ضحكاتهم وحركاتهم والروح العدهم..
اي عدهم روح بس انة بلا روح
ليش هيج صرت جامدة وبلا تأثير ..

اليوم زواجهم والبيت عبارة عن مسرح واقارب واهل
كلها متجمعة ..
بالبداية انة ماقبلت اروح صالون وردت ابقى بحجابي
وماقبلت باي تغيير
لحو الكل عليه بس ماجني اسمع احد..
بس يمامة جابت بابا واجتلي بقت تبجي
كالت من اشوفج هيج ماافرح
اذا الي خاطر عندي وبابا اله خاطر تروحين وياي
للصالون وتلبسين فستان..

ولخاطرها رحت وياها وسوتلي مكياج خفيف الحلاقة
وظفرتلي شعري دفن بس نص مفتوح
وعابد وبابا اخذوني اشتريت بدلة طويلة
ومن فوك كصتها واسعة ومخروطة وردانها منفوخة
ولونها زيتوني طوخ..
عابد يكلي ذكرتيني بالفلم مال لويس السادس عشر
بس بابا كال تلوكلج تخبل ..

لبستها ووي التسريحة تناسقت والمكياج طلعت نازكة
من خلصت ووكفت اباوع لروحي
تاملت نفسي بقهر صار شكد مامهتمة بروحي وما
كاشخة
يمامة جاي تشتغلها الحلاقة وكلساع التفتلي وكالت
ريحان نبعة ريحان وتضحك..
لحد ماخلصت كلتلها الحلاقة زين ماخربتي تسريحتج
وخليتي ريحان تكسر عليج
عبالها اسمي ريحان خلتني اضحك وشوية خففت من بؤسي..

اجه علينا فقار بالسيارة مالت الزفة ومحد ويا كال
شردت منهم ماريد يلحكني
ورحت وياهم للاستوديو اخذو صور واخر صورة انة
وياهم ثنينهم
ووحدة بس انة ويمامة وحدة حاضنه الثانية..
خلصنا صور ورجعنا لبيت بابا حجي ..

من وصلنا قريب الباب ..تذكرت قبل سنة اول ماشفت
حر..هنا بهذا المكان
وجانت نفس الهوسة اي نفسها ونفس الناس ونفس المكان
بس انة مو نفسي ..
ولا نفسها ذيج البنت الوكيحة التباوع للكمارو وتريد تشوف
صاحبها منو..
بس اي هاي نفسها الكمارو ..اي واقرب هالمرة ..
وصاحبها موجود وواكف يمها وعيونه تدور...
لازم ادنك لان ماريد اشوف..

دنكت وماردت يشوفني وحسيت على ايد يمامة عصرت
ايدي حيل وانة لزمت ايدها بيدي ثنينهم
اريد الزم بيها حتى لا اضعف اريد انسند واتقوى..

صوت الموسيقى والدك من شافو سيارة الزفة وصلت
صار عااالي واغاني مسجل السيارات
وهوسة الناس كلها
وترتني وراسي وحعني بس الحمدلله وصلت السيارة بسرعة ووكفنا
ونزلت حتى انزل يمامة
بدلتي من جوا مستورة بس من فوك لبست برنص
مغطي شعري وايديه وحطيت دنبوس من كدام
لان صدري هواي يبين ..

عدلت البرنص ونزلت وي فقار الي من نزل بقو يضربون
صعاديات وانة ويمامة نطفرمن الصوت
نزلت وهو لزمها من ذراعها وانة شايلة بدلتها ومدنكة
سمعت صوت علاء رفعت نظري شوية
يمشي كدام فقار ويسويلهزطريق حتى نفوت بسرعة
درت عيني اجت على..على قاتلي ..
اجت عيني بعينه نزلتها بسرعة ومنعت نفسي حتى
من الحنان اله
بس ماكدر امنع فؤادي الصار يعزف اكثر من صوت
الطبل الي بالعرس ..

دخلنا جوا وعلت الهلاهل والصلوات
على محمد وال محمد توحدت باعلى صوت
وصلت يمامة للكوشة وكعد يمها فقار
وماما لزمت ايدي وتبوس بيها فرحانة بشكلي
والتغيير
بنات عمامي وعماتي وخوالي اجو لفقار كلوله كوم
اطلع نريد نركص وكومو وطلعو بالصفكات والضحك..

انة كعدت بمكانه والبنات اشتغلو ركص وردح واشكال
سرحت عنهم خيالي بالواكف برا..
ماريد افكر بي ماريد احجي بهالموضوع
بس مااااكدر....
ااااه شكد مشتاقتله مشتاقة لصوته الهادىء الي من يحجي
كأنه معزوفة ل بتهوفن ..

بس لا ماريد رجال بحياتي بعد ماريد
اجتلي مرت خالو سلام كومتني اركص بس ماقبلت
كوة جرتني ولزمت ايدي وتلوح بيديها وياي..
دخلت ويانا مرة فلتت ايدي ولزمتها بيدها وبقت تركص
ويانا وتحجي..

ام علاء منين هالكيكة وج هاي اجنبية ..يمه انت تحجين عربي؟؟
تحجيها وتضحك وتركص ويانا..
جاوبتها مرت خالو..لا عيني سعودة هاي محجوزة دوري
غيرها وغمزتلي..
كالت المرة ياسعيد بخته الخذاها الله يوفقج يمه..
وبقت يمنا شوية وكعدنا..
استغربت ليش كالت محجوزة غريبه ولو فضل منها كالت
لان كارهة الزواج وسيرته..

صار وكت العشا وجابو الولد وانة وي البنات ناخذه منهم
جاب الخبز علاء وانة كدامه
انطاه الي ودنك ورجع باوعلي..
شلونج وطن...
هزيتله راسي واخذت الخبز ومشيت..
وبداخلي اكول روح لحر بسرعة ..بلكي يلمحني بعيونك...

وبعد ماخلصت الحفلة وصارت الزفة ..بغرفة بابا حجي
والاجواء هدت والهوسة خفت..
احنا نبقى ببيت بابا حجي..انة سبأ رادت تبقى وياي
ماقبل علاء كال باجر تعالي ..
هي توسلت بيه اروح وياها بس رفضت ماريد
ماريد اروح واتصادف وي حر..

راحو بيت خالو وبقت بس مرته وكم واحد بقى هم
من الاهل..
انة النوم مجافيني ومايمرني..طلعت فوني وتذكرت
ناسية النظارات
حاولت استخدمه بدونها بس وجعني راسي..
ضميته وغمضت على امل انام..

ورا شوية سمعت هلاهل وصوت بابا حجي يبارك لفقار
وماما راحت
بس انة استحيت اطلع بقيت جوا..
بقت ماما هواي برا وتالي رجعت ..
انة متمددة ومغمضة هي عبالها نايمة..
تمددت وبقت تحجي وياي ..يوم الج ياوطن وافرح بيج
انطي نور عيوني واشوفج عروس وفرحانة
خربت فرحتج يابعد كل عمري ...

دمعت عيوني على حجيها وشوية خليتها تسكت وانداريت
وحطيت رداني بحلكي وعضيت عليها من البجي
مختنكة كلش مختنكة والبجي ماجاي يريحني..
بقيت لوقت متاخر يبا نمت..
وكعدتني الصبح ماما حتى اتريك وياهم..
طلعت ولكيت يمامة يمهم جاي يصبون ريوك
حضنتها وباركتلها وهي بقت تبجي..
كالت امشو وياي للبيت لا تروحون هسه وماما كلتلها اي
نروح لخاطرج..

بس خلصنا ريوك رحنا لبيت خالو واباوع السيارة
بباب البيتزالبصفهم
ماصدكت ندخل بسرعة خاف يطلع واشوفه..
بباب الشارع  واكفين الولد بالباب ووياهم
رجال ولازم خروف يريد يذبحه جوا
رجل يمامة 
انة شفته واخترعت اصفريت..
صرت ورا ماما..عفية خل ندخل بسرعة ماريد اشوف يذبحوه ..
اوكفي ماما الباب كله ولد منين ندخل..

وهي تحاجيني وبدخلتهم بسرعة نيمه وحط رجله فوكه
ثبته بيها ووحط السكين على ركبته
نفض الدم قوي وانة صرخ حيل وفقدت...

للحكاية بقية
بقلم شقراء(قمر كانون)

تعبير حلو لو ما كلمة انسحل ههه

😂😂😂😂

كلش كلماتج بالصميم عشتي

من تكولين مع احترامي معناها ابشرو بالسحل اخاف منج

عجبني احساسج بحالتها عشتي

حبزبوز ياظالمة

طبعا تعليقج خلاني اضحك من امس لليوم

😂😂😂😂😂

اني اخجل🙈🙈🥰مااتحمل الغزل فديتج شيخة